Updates from November, 2013 Toggle Comment Threads | Keyboard Shortcuts

  • GiRa ஜிரா 11:41 pm on November 28, 2013 Permalink | Reply  

    பெண்களின் பண்கள் 

    தமிழ் சினிமாவில் இரண்டு பெண்கள் சேர்ந்து பாடினால் அது ஒரே ஆணைப் பற்றியதாக மட்டுமே இருக்கும். இது ஆண்டாண்டு காலமாக மாறாத விதி. விதிவிலக்குப் பாட்டுகள் உண்டு என்றாலும் கதையில் இரண்டு பெண்கள் இருந்தால் ஒரு ஆண் என்று முக்கோணக் காதலை வைப்பது இன்றைக்கும் இயக்குனர்களுக்கு மிகவும் பிடித்த செயல்.

    வழக்கம் போல முதலில் நினைவுக்கு வருவது கவியரசர் தான். இதைச் சொல்வது ஒரு சம்பிரதாயமாகவே ஆகிவிட்டது. பாதகாணிக்கை படத்தில் இரண்டு பெண்கள் ஒருவனையே நினைத்துப் பாடுவார்கள்.

    உனது மலர் கொடியிலே எனது மலர் மடியிலே
    உனது நிலா விண்ணிலே எனது மலர் கண்ணிலே

    எப்படி அடித்துக் கொள்கிறார்கள் பார்த்தீர்களா? ஒருத்தி அத்தை மகளாகப் பிறந்தவள். இன்னொருத்தி அவனோடு உறவாக வளர்ந்தவள். அதையும் போட்டியில் இழுத்துவிடுகிறார்கள்.

    ஒருத்தி: பிறந்த போது பிறந்த சொந்தம் இருந்ததம்மா நினைவிலே
    இன்னொருத்தி: வளர்ந்த போது வளர்ந்த சொந்தம் வளர்ந்ததம்மா மனதிலே

    அடுத்ததாக கவிஞர் வாலி இரண்டு பெண்களை சண்டை போட வைக்கப் போகிறார். அந்த இரண்டு பெண்களையும் ஏமாற்றியது ஒருவன் தானோ என்று அவர்கள் பாடுகிறார்கள்.

    ஒருத்தி: மலருக்குத் தென்றல் பகையானால் அது மலர்ந்திடக் கதிரவன் துணையுண்டு
    நிலவுக்கு வானம் பகையானல் அது நடந்திட வேறே வழி ஏது
    இன்னொருத்தி: பறவைக்குச் சிறகு பகையானால் அது பதுங்கி வாழ்ந்திட கால்களுண்டு
    உறவுக்கு நெஞ்சே பகையானால் மண்ணில் பெருகிட வகையேது

    அவர்கள் இரண்டு பேர்களின் வாழ்க்கையையும் ஒருவன் ஏமாற்றி அழித்து விட்டது போல ஒப்பாரி. ஆனாலும் இனிய பாடல்.

    அடுத்து நாம் பார்க்கப் போவது ஒருவருக்குத் தெரியாமல் ஒரே ஆணை விரும்பிய இரண்டு தோழிகளை. ஆனால் ஒருத்தியின் காதல்தான் கைகூடுகிறது. சில நாட்கள் கழித்து ரகசியம் தோழிக்குத் தெரிந்து விடுகிறது. தோழியின் ஆசையைத் திருடிவிட்டோமோ என்று அவளுக்கு ஒரு வருத்தம். தோழியர் இருவரும் ஒருவரையொருவர் புரிந்து கொண்டிருந்தாலும் புரியாதது போலவே பாடுகிறார்கள். நீங்களே பாட்டைப் பாருங்கள்.

    ஒருத்தி:
    அடி போடி பைத்தியக்காரி
    நான் அறியாதவளா சின்னஞ்சிறுசா

    இன்னொருத்தி
    அடி போடி பைத்தியக்காரி
    நான் புரிந்தவள் தான் உன்னைத் தெரிந்தவள் தான்

    இவர்கள் நல்ல தோழிகள். சண்டையிட்டுக் கொள்ளவில்லை. தன் காதல் வெற்றி பெற்றதே என்று எண்ணாமல் தோழியில் காதல் தோற்றுப் போனதே என்று வருந்திப் பாடுகிறாள் ஒருத்தி.

    இறைவன் ஒரு நாள் தூங்கிவிட்டான்
    எழுத்தைக் கொஞ்சம் மாற்றிவிட்டான்

    இப்படியெல்லாம் யார் எழுதியிருப்பார்கள்? வேறு யார்? கவியரசரேதான்.

    இன்னும் இரண்டு பேர்கள் இருக்கிறார்கள். இவர்களும் தோழிகள். இவர்கள் இருவரையும் திருமணம் செய்தவன் ஒருவனே. ஆனால் அது இருவருக்குமே தெரியாது. அந்த உண்மை தெரியாமல் இருவரும் சேர்ந்து சுமங்கலி பூஜை செய்கிறார்கள்.

    மஞ்சளும் தந்தாள் மலர்கள் தந்தாள்
    மங்கல மங்கை மீனாட்சி
    உள்ளம் ஒருவன் சொந்தம் என்றாள்
    தேவி எங்கள் மீனாட்சி

    பாவம். பின்னால் அவர்கள் உண்மை தெரிந்து கொதிக்கப் போவதை அப்போது அறியாமல் பாடியிருக்கிறார்கள். இதே கதை பின்னால் கற்பூரதீபம் என்ற பெயரில் வந்தது. அங்கும் உண்மை தெரியாமல் இரண்டு தோழிகளும் பூஜை செய்கிறார்கள்.

    காலகாலமாய்ப் பெண் தானே கற்பூர தீபம்
    காவல் கொண்ட மன்னன் தானே தெய்விக ரூபம்

    இரண்டு பெண்டாட்டிக்காரன் கதைகள் என்றால் மக்களுக்குப் பிடித்திருக்கிறது என்றே தோன்றுகிறது. நம்மூர் சாமிகளே அப்படித்தானே!

    இவர்களாவது திருமணம் ஆனவர்கள். திருமணம் ஆகும் முன்னமே அக்காவும் தங்கையும் ஒருவனையே நினைத்துப் பாடிய கதைகளும் உண்டு. நினைத்தேன் வந்தாய் திரைப்படத்தைத்தான் சொல்கிறேன். இந்த முறை பாட்டெழுதியது கவிஞர் வைரமுத்து.

    மல்லிகையே மல்லிகையே மாலையிடும் மன்னவன் யார் சொல்லு
    தாமரையே தாமரையே காதலிக்கும் காதலன் யார் சொல்லு

    இந்த வரிசையில் இருகோடுகள் திரைப்படத்தை எப்படி மறக்க முடியும்? வாலியின் வார்த்தை விளையாட்டுகளில் ஒளிரும் “புன்னகை மன்னன் பூவிழிக் கண்ணன்” பாட்டை விட்டு விட்டு இந்தப் பதிவை எழுத முடியுமா? சாமிகளையே சண்டைக்கு இழுத்துப் பாடிய பாட்டாயிற்றே.

    அவள்: தேவன் முருகன் கோயில் கொண்டது வள்ளியின் நெஞ்சத்திலே
    இவள்: அவன் தெய்வானை என்றொரு பூவையை மணந்தது திருப்பரங்குன்றத்திலே

    வள்ளியும் தெய்வானையும் கூட இப்படிச் சண்டை போட்டிருக்க மாட்டார்கள்!

    இன்னொரு அக்கா தங்கையைப் பார்க்கப் போகிறோம். அக்காவுக்குப் பார்த்த மாப்பிள்ளை அவன். ஆனால் திருமணம் நின்றுவிடுகிறது. தங்கையோடு அவனுக்குக் காதல் உண்டாகிறது. அப்போது அவர்களுக்குள் போட்டிப் பாட்டு வைக்காமல் இருக்க முடியுமா?

    ஸ்ரீதேவி வரம் கேட்கிறாள்
    திருமாலைத்தானே மணமாலை தேடி
    எந்த மங்கை சொந்த மங்கையோ
    ஓ எந்த கங்கை தேவ கங்கையோ

    போன பாட்டில் முருகன் மாட்டிக் கொண்டால் இந்தப் பாட்டில் மகாவிஷ்ணு மாட்டிக் கொண்டார். அவருக்கும் இரண்டுதானே!

    இன்னும் இரண்டு பெண்கள் இருக்கிறார்கள். அவர்களைப் பற்றிச் சொல்லாமல் பதிவை முடிக்க விரும்பவில்லை. அவன் அவளைத்தான் விரும்பினான். விதி பிரித்தது. அத்தை மகளை மணந்தான். மகிழ்வாகத்தான் இருந்தான். போனவள் வந்தாள். பிரச்சனையும் வந்தது. அத்தை மகளோ அப்பாவி. தெரியாத்தனமாக “ஏன் திருமணம் செய்து கொள்ளவில்லை என்று அவளைக் கேட்டு விடுகிறாள்.” உடனே ஒரு பாட்டு.

    கடவுள் தந்த இருமலர்கள்
    கண் மலர்ந்த பொன் மலர்கள்
    ஒன்று பாவை கூந்தலிலே
    ஒன்று பாதை ஓரத்திலே

    சோகத்தைக் கூட அழகாகச் சொல்லியிருக்கிறார்கள் கவிஞர்கள். அவர்களைப் பாராட்டத்தான் வேண்டும்.

    இந்தச் சக்களத்திச் சண்டை பழைய படங்களோடு முடிந்து போகவில்லை என்று நிருபிக்க வந்ததோ பஞ்சதந்திரம் திரைப்படம்! ஒருத்தி மனைவி. இன்னொருத்தி மனைவியாக நடிப்பவள். அவர்களுக்குள் ஒரு போட்டிப் பாட்டு.

    வந்தேன் வந்தேன் மீண்டும் மீண்டும் வந்தேன்
    வைரம் பாய்ந்த நெஞ்சம் தேடி வந்தேன்
    எனது கனவை எடுத்துச் செல்ல வந்தேன்

    நல்லவளைப் போல அமைதியாகப் பாடுகிறாள் நடிக்க வந்தவள். கட்டிக் கொண்டவள் சும்மா இருப்பாளா? புலியாய்ப் பாய்கிறாள்.

    பந்தியில பங்கு கேட்டா விட்டு தருவேன்
    என் முந்தியில பங்கு கேட்டா வெட்டிப் புடுவேன்
    அடி கண்டவளும் வந்து கைய வைக்க
    அவர் கார்பரேஷன் பம்ப் அல்ல

    இவர்கள் கதை இப்படியிருக்க இன்னும் இரண்டு பெண்களைப் பற்றிச் சொல்லியே ஆக வேண்டும். அவர்களைப் பற்றிச் சொல்லவில்லை என்றால் இந்தப் பதிவு முழுமை பெறவே பெறாது. ஒருத்தி மேடையில் ஆடிக் கொண்டிருக்கிறாள். அந்த ஆட்டத்தை இன்னொருத்தி விரும்புகிறவன் ரசிக்கிறான். அதை இன்னொருத்தியால் பொறுத்துக் கொள்ள முடியவில்லை. அவளும் மேடையில் குதித்து சரிக்குச் சரி ஆடுகிறாள். சபாஷ் சரியான போட்டி என்று தமிழுலகம் ரசித்த பாடல் இது.

    முதலாமவள் அமைதியாகத்தான் ஆடுகிறாள். பாடுகிறாள்.

    கண்ணும் கண்ணும் கலந்து இன்பம் கொண்டாடுதே
    என்னும் போதே உள்ளம் பந்தாடுதே

    அடுத்தவள் ஆங்காரமாக வரும் போதே ஆர்ப்பாட்டமாகத்தான் பாடுகிறாள்.

    ஜிலுஜிலுஜிலுவென நானே ஜெகத்தை மயக்கிடுவேனே
    கலகலகலவென்று ஜோராய் கையில் வளை பேசும் பாராய்

    இன்னொருத்தி வந்ததும் முதலாமவள் தன்மானம் உரசப்படுகிறது. அவளும் போட்டியில் குதிக்கிறாள்.

    ஆடும் மயில் எந்தன் முன்னே என்ன ஆணவத்தில் வந்தோயோடி
    பாடுங்குயில் கீதத்திலே பொறாமை கொண்டு படமெடுத்து ஆடாதேடி

    பார்த்தீர்களா… தான் விரும்புகிறவன் இன்னொருத்தியின் நடனத்தை ரசித்தான் என்று தெரிந்ததும் ஆடல் அரங்கத்தைப் போட்டி போடல் அரங்கமாக மாற்ற பெண்களால்தான் முடியும்.

    எது எப்படியோ! காலங்கள் மாறினாலும் கோலங்கள் மாறினாலும்… கவிஞர் முத்துலிங்கம் எழுதியதைப் போல “என் புருஷந்தான் எனக்கு மட்டுந்தான்” என்று இரண்டு பெண்கள் சண்டையிட்டுக் கொண்டால் அதை மக்கள் ரசிக்கத்தான் செய்வார்கள் என்பது மட்டும் மாறவே மாறாது போல!

    பதிவில் இடம் பெற்ற பாடல்கள்

    பாடல் – உனது மலர் கொடியிலே
    வரிகள் – கவியரசர் கண்ணதாசன்
    பாடியவர்கள் – பி.சுசீலா, எல்.ஆர்.ஈசுவரி
    இசை – மெல்லிசை மன்னர்கள் எம்.எஸ்.விசுவநாதன் – டி.கே.இராமமூர்த்தி
    படம் – பாதகாணிக்கை
    பாடலின் சுட்டி – http://www.youtube.com/watch?v=grVbM9WJZks

    பாடல் – மலருக்குத் தென்றல் பகையானால்
    வரிகள் – கவிஞர் வாலி
    பாடியவர்கள் – பி.சுசீலா, எல்.ஆர்.ஈசுவரி
    இசை – மெல்லிசை மன்னர்கள் எம்.எஸ்.விசுவநாதன், டி.கே.இராமமூர்த்தி
    படம் – எங்க வீட்டுப் பிள்ளை
    பாடலின் சுட்டி – http://www.youtube.com/watch?v=jlGlD41oxJg

    பாடல் – அடி போடி பைத்தியக்காரி
    வரிகள் – கவியரசர் கண்ணதாசன்
    பாடியவர்கள் – பி.சுசீலா, எல்.ஆர்.ஈசுவரி
    இசை – மெல்லிசை மன்னர் எம்.எஸ்.விசுவநாதன்
    படம் – தாமரை நெஞ்சம்
    பாடலின் சுட்டி – http://www.youtube.com/watch?v=gxU3uBgng-E

    பாடல் – மஞ்சளும் தந்தாள் மலர்கள் தந்தாள்
    வரிகள் – கவியரசர் கண்ணதாசன்
    பாடியவர்கள் – ஜிக்கி, எஸ்.ஜானகி
    இசை – மெல்லிசை மன்னர் எம்.எஸ்.விசுவநாதன்
    படம் – தேனும் பாலும்
    பாடலின் சுட்டி – http://www.youtube.com/watch?v=KzcZFwOZSuk

    பாடல் – காலம் காலமாய் பெண் தானே
    வரிகள் – கங்கையமரன்
    பாடியவர்கள் – பி.சுசீலா, எஸ்.ஜானகி
    இசை – கங்கையமரன்
    படம் – கற்பூரதீபம்
    பாடலின் சுட்டி – http://youtu.be/SeZ6Z5ysm20

    பாடல் – மல்லிகையே மல்லிகையே
    வரிகள் – கவிஞர் வைரமுத்து
    பாடியவர்கள் – அனுராதா ஸ்ரீராம், சித்ரா
    இசை – தேனிசைத் தென்றல் தேவா
    படம் – நினைத்தேன் வந்தாய்
    பாடலின் சுட்டி – http://www.youtube.com/watch?v=Nu3uPoeEuss

    பாடல் – ஸ்ரீதேவி வரம் கேட்கிறாள்
    வரிகள் – கவியரசர் கண்ணதாசன்
    பாடியவர்கள் – பி.சுசீலா, வாணி ஜெயராம்
    இசை – மெல்லிசை மன்னர் எம்.எஸ்.விசுவநாதன்
    படம் – தேவியின் திருமணம்
    பாடலின் சுட்டி – http://www.inbaminge.com/t/d/Deiviyin%20Thirumanam/Sridevi%20Varam%20Ketkiral.vid.html

    பாடல் – கடவுள் தந்த இருமலர்கள்
    வரிகள் – கவிஞர் வாலி
    பாடியவர்கள் – பி.சுசீலா, எல்.ஆர்.ஈசுவரி
    இசை – மெல்லிசை மன்னர் எம்.எஸ்.விசுவநாதன்
    படம் – இருமலர்கள்
    பாடலின் சுட்டி – http://www.youtube.com/watch?v=X7RxuQ4tUwU

    பாடல் – புன்னகை மன்னன் பூவிழிக் கண்ணன்
    வரிகள் – கவிஞர் வாலி
    பாடியவர்கள் – ஜமுனாராணி, பி.சுசீலா
    இசை – வி.குமார்
    படம் – இருகோடுகள்
    பாடலின் சுட்டி – http://www.youtube.com/watch?v=hCR7rD4-K7c

    பாடல் – வந்தேன் வந்தேன் மீண்டும்
    வரிகள் – கவிஞர் வைரமுத்து
    பாடியவர்கள் – நித்யஸ்ரீ, சுஜாதா
    இசை – தேனிசைத் தென்றல் தேவா
    படம் – பஞ்சதந்திரம்
    பாடலின் சுட்டி – http://www.youtube.com/watch?v=sErsh9Kg7bk

    பாடல் – கண்ணும் கண்ணும் கலந்து
    வரிகள் – கொத்தமங்கலம் சுப்பு
    பாடியவர்கள் – ஜிக்கி, பி.லீலா
    இசை – சி.இராமச்சந்திரா
    படம் – வஞ்சிக்கோட்டை வாலிபன்
    பாடலின் சுட்டி – http://www.youtube.com/watch?v=AMotc9NQ9B8

    பாடல் – என் புருஷந்தான் எனக்கு மட்டுந்தான்
    வரிகள் – கவிஞர் முத்துலிங்கம்
    பாடியவர்கள் – பி.எஸ்.சசிரேகா, எஸ்.பி.ஷைலஜா
    இசை – இசைஞானி இளையராஜா
    படம் – கோபுரங்கள் சாய்வதில்லை
    பாடலின் சுட்டி – http://www.youtube.com/watch?v=_XjWcWHbB7A

    அன்புடன்,
    ஜிரா

    361/365

     
    • prabakar 6:42 am on November 29, 2013 Permalink | Reply

      படம் பெயர் நினைவில் இல்லை.கே.ஆர். விஜயாவும் ஜெயசுதாவும் பாடியிருக்கும் பாட்டு. அத்தாணி மண்டபத்தில் முத்து முத்து தீபம். எப்படி வேண்டுமானாலும் பெண்கள் வாழலாம் என்பதற்கும் இப்படித்தான் வாழ வேண்டும் என்பதற்கும் உள்ள வித்தியாசத்தை கவிஞர் கண்ணதாசன் அருமையாக கூறியிருப்பார். கோடி பெண்களை பூமி கண்டது தெய்வமானவள் சீதை. என்ற அற்புதமான வரிகள் உள்ள பாடல் இந்த பாடலில் ஆண் நாயகன் குறித்து பாடப் படவில்லை என்பதை குறிப்பிட விரும்புகிறேன்.

    • Uma Chelvan 7:33 am on November 29, 2013 Permalink | Reply

      இரண்டு பெண்கள் ஒரு ஆணுக்காக பாடியது போலவே, இரண்டு ஆண்களும் ஒரு பெண்ணுக்காக ஏங்கி பாடியதும் உண்டே.!!! நம்ம அல்லா ரெக்ஹா இசையில் அருமையான “சஹானா” ராகத்தில் .

      என்னை கேட்டு காதல் வரவில்லையே ,
      நான் சொல்லி காதல் விடவில்லையே !!
      மறந்தாலும் காதல் மறக்காதம்மா !!

      ஒ வெண் நிலா …..இரு வானிலா !!

    • kamala chandramani 8:31 am on November 29, 2013 Permalink | Reply

      பன்னிரண்டு பாடல்கள் ஒரே பதிவில் முதன்முறையாக? என்ன ஆராய்ச்சி? நிஜமாகவே என்னை ஆச்சரியப்பட வைக்கிறது. வாழ்த்துகள் ஜி.ரா.

    • umakrishh 9:56 am on November 29, 2013 Permalink | Reply

      நல்ல ஆராய்ச்சி..:) புன்னகை மன்னன் பூவிழிக் கண்ணன் ருக்மணிக்காக பாமா விஜயம்..அப்புறம் மல்லுவேட்டி மைனர் ல கூட ஒரு பாடல் வருமே..

    • rajinirams 10:05 am on November 29, 2013 Permalink | Reply

      ஆஹா,சான்சே இல்லை சார்.செம பதிவு.பாராட்டுக்கள்.நீங்கள் தேர்ந்தெடுத்த பெண்களின் பண்கள் எல்லாமே அருமை. என்னை நெகிழ வைக்கும் இன்னொரு பாடல் சொல்லத்தான் நினைக்கிறேன் படத்தில் பாட முடியாமல் தவிக்கும் பெண்ணிற்காக “மீரா”என்று பாடலை தொடரும் “பல்லவி ஒன்று மன்னன்” பாடல்.கே.பாலசந்தரின் இயக்கத்திலேயே இன்னொரு பாடல் வெள்ளி விழாவில் “கை நிறைய சோழி”பாடல்.டபுள்ஸ் படத்திலும் வைரமுத்துவில் ஒரு பாடல் நன்றாக இருக்கும்-ராமா ராமா ராமா என்று ஒரு பெண்ணும்,கிருஷ்ணா கிருஷ்ணா கிருஷ்ணா என்று ஒருவரும் பாடும் பாடல். நன்றி.

    • பாலராஜன்கீதா 11:55 am on November 29, 2013 Permalink | Reply

      கந்தன் கருணை – மனம் படைத்தேன் (கே.ஆர்.வி – ஜெ.ஜே) 🙂

    • amas32 7:13 pm on November 29, 2013 Permalink | Reply

      இந்தப் பதிவு முடிவுக்கு வரும் சமயத்தில் சான்சே இல்லாமல் ஒரு சூப்பர் போஸ்ட் 🙂 எந்தப் பாட்டையும் விடு வைக்கவில்லை. ரசிகர்களுக்கு ஒரு கல்யாண சமையல் விருந்தே பரிமாறி விட்டீர்கள். இன்னும் சொல்ல என்ன இருக்கு! அற்புதம் 🙂

      இத்தனைப் பாடல்களிலும் என் மனத்தில் நிற்கும் பாடல் என்னவோ புன்னகை மன்னன் பூவிழி கண்ணன் மட்டுமே. அதற்குப் பல காரணங்கள் இருக்கும் என்று நினைக்கிறேன்.

      இன்னும் திரும்ப வந்து உங்கள் பதிவை பொறுமையாக இரண்டு முறை படிக்க வேண்டும் 🙂

      amas32

    • ராஜேஷ் 1:29 am on December 4, 2013 Permalink | Reply

      பாடல் – மல்லிகையே மல்லிகையே
      வரிகள் – கவிஞர் வைரமுத்து
      பாடியவர்கள் – அனுராதா ஸ்ரீராம், சித்ரா
      இசை – தேனிசைத் தென்றல் தேவா
      படம் – நினைத்தேன் வந்தாய்

      வரிகள் பழநிபாரதி

  • mokrish 9:56 pm on November 17, 2013 Permalink | Reply  

    தலைப்பு செய்திகள் 

    தமிழ் சினிமாவில் இருக்கும் கதைப்பஞ்சம் நமக்கு தெரியும். இருக்கும் சில கதைகளுக்கும் தலைப்பு தேடுவதே பெரிய வேலையாகிவிட்டது. பெரிய ஹீரோ – ஸ்டார் இவர்கள் நடிக்கும் படங்களுக்கு நாயகனின் பெயரையே தலைப்பாக வைக்கலாம். பலர் ஏற்கனவே வெளிவந்த திரைப்படத்தின் பெயரையே திரும்பவும் வைத்துக் கொண்டிருக்கிறார்கள். இதில் ஒரே தலைப்புக்கு நடக்கும்  வாய்க்கா தகராறு கொடுமை!

    1950களில் சில திரைப்படங்களுக்கு இரண்டு தலைப்புகள் வைத்திருந்தனர். இப்போது அந்த இரண்டாவது தலைப்பை tag லைன் என்று சொல்கிறார்கள். மிக நீளமான தலைப்பைக் கொண்ட திரைப்படம் என்ற (ஒரே) பெருமை மன்சூர் அலிகானின் ‘ராஜாதி ராஜ ராஜ குலோத்துங்க ராஜ மார்த்தாண்ட ராஜ கம்பீர காத்தவராய கிருஷ்ண காமராஜன்’ என்ற படத்துக்கே. ஒரேழுத்து தலைப்பும் உண்டு – சமீபத்திய கோ,  தயாரிப்பில் இருக்கும்  ஷங்கரின் ஐ.

    அன்றும் இன்றும் என்றும் நாவல்களுக்கும் / திரைப்படங்களுக்ககும் பாடல் வரிகளையே தலைப்பாக வைப்பது ஒரு வழக்கம்.  ஆனந்த விகடனில் எழுத்தாளர் மணியன் ‘உன்னை ஒன்று கேட்பேன் என்ற பாடலின் வரிகளை தன் நாவல்களின் தலைப்பாக வைத்தார். தாமரை மணாளன் ஆயிரம் வாசல் இதயம் என்று ஒரு கதை எழுதினார். திரையுலகில் எம்ஜிஆர், சிவாஜி தொடங்கி நிறைய படங்களின்  தலைப்பு ஒரு பாடலின் முதல் வரியே

    ஒரு அதிசயமான டைட்டில் தொடர் சங்கிலி கண்ணில் பட்டது. ஒரு படத்தின் பாடலை இன்னொரு படத்தின் தலைப்பாக்கி  அந்த படத்தின் பாடல் இன்னொரு படத்தின் தலைப்பாகி என்று ஒரு சங்கிலியில் நான்கு அருமையான பாடல்கள்.

    லக்ஷ்மி கல்யாணம் என்றொரு படம்.அதில் ராமனின் பல பெயர்களை வர்ணிக்கும் பாடல்   http://www.youtube.com/watch?v=DR2GFE0B5M0

    ராமன் எத்தனை ராமனடி

    அவன் நல்லவர் வணங்கும் தெய்வமடி

    ராமன் எத்தனை ராமனடி என்ற படத்தில் ஒரு பிரபலமான பாடல் http://www.youtube.com/watch?v=cU9_w77CM1k

    அம்மாடி … பொண்ணுக்கு தங்க மனசு

    பொங்குது இந்த மனசு

    பொண்ணுக்கு தங்க மனசு என்ற படத்தில்  வரும் பாடல் http://www.youtube.com/watch?v=tCpQUgKU4YI

    தேன் சிந்துதே வானம்

    உனை எனை தாலாட்டுதே

    தேன் சிந்துதே வானம் என்ற படத்தில் வரும் பாடல் http://www.youtube.com/watch?v=lc1v6uBKtKs

    உன்னிடம் மயங்குகிறேன்

    உள்ளத்தால் நெருங்குகிறேன்

    உன்னிடம் மயங்குகிறேன் என்றும் ஒரு படம் வந்தது. ஆனால் இந்த டைட்டில் சங்கிலி தொடரவில்லை என்று நினைக்கிறேன்.

    தலைப்புக்கும் கதைக்கும் பெரிய தொடர்பே இருப்பதில்லை. அபூர்வமாக சில நல்ல தலைப்புகள் கண்ணில் படும். என் டாப் பட்டியலில் இருக்கும் தலைப்புகள் முள்ளும் மலரும், மூன்றாம் பிறை, வாலி, அழியாத கோலங்கள்

    மோகனகிருஷ்ணன்

    350/365

     
    • rajinirams 11:20 pm on November 17, 2013 Permalink | Reply

      நீங்கள் நம்புகிறீர்களோ இல்லையோ,சில மாதங்களுக்கு முன் இதை நினைத்தேன்-இதே போல இன்னொன்று- இருவர் உள்ளாம்=இதயவீணை தூங்கும்போது, இதயவீனை-இன்று போல என்றும் வாழக. இன்று போல் என்றும் வாழ்க-அன்புக்கு நான் அடிமை.அன்புக்கு அடிமையாகி நின்று விட்டது:-)) நன்றி.

    • rajinirams 3:06 am on November 18, 2013 Permalink | Reply

      இரு மலர்கள்-அன்னமிட்ட கைகளுக்கு,அன்னமிட்ட கை-16 வயதினிலே,16 வயதினிலே-செந்தூரப்பூவே,செந்தூரப்பூவேயுடன் நின்றது, தெய்வத்தாய்-வண்ணக்கிளி,வண்ணக்கிளி-மாட்டுக்கார வேலா,மாட்டுக்கார வேலன்-பட்டிக்காடா பட்டணமா.பட்டிக்காடா பட்டணமா-நல்வாழ்த்து நான் சொல்வேன்,நல் -வாழ்த்துக்களுடன் இனிதே முடிந்தது. அதே போல் நீ,தீ போன்ற ஓரெழுத்து படங்களும் வெளியாகின. மின்னலே பாடத்தில் வாலி எழுதிய அழகிய தீயே வரியை தன் படத்தில் தலைப்பாக வைத்ததற்கு அழகிய தீயே இசை வெளியீட்டு விழாவில் அவரை அழைத்து கெளரவப்படுத்தினார் அதன் தயாரிப்பாளர் பிரகாஷ்ராஜ்.பல படங்களுக்கு தலைப்பை பாடல் மூலம் தந்திருந்தாலும் தன்னை கெளரவப்படுத்திய பிரகாஷ்ராஜை மனமார பாராட்டினார் வாலி.நல்ல பதிவு.பாராட்டுக்கள்.

    • amas32 2:31 pm on November 18, 2013 Permalink | Reply

      Very quaint post 🙂 I have also wondered about this like Rjnirams 🙂 At least movies with song line titles is plenty common among Tamil film productions. அதுவே படத்தைப் பாதி மக்களிடம் கொண்டு சேர்த்துவிடும். நீ தானே என் பொன் வசந்தம் என்று பெயர் சூட்டியது கௌதம் வாசுதேவ் மேனனின் சாமர்த்தியத்தைக் காட்டுகிறது 🙂

      amas32

  • GiRa ஜிரா 1:24 pm on September 29, 2013 Permalink | Reply  

    ஒரு துளி தேன்! 

    ஒரு மிகப்பிரபலாமான கதை. கண்டிப்பாக எல்லாருக்கும் தெரிந்திருக்கும்.

    ஒருவன் காட்டு வழியே சென்றான். திடீரென்று பெண் சிங்கமொன்று துரத்தியது. தப்பிக்க ஓடினான். ஆலமரம் ஒன்று வழியில் வந்தது. அதன் விழுதைப் பிடித்து ஏறினான். பாதி விழுது ஏறும் போதுதான் மரத்திலிருந்த மலைப்பாம்பைக் கவனித்தான். மேலே போனால் பாம்பு. கீழே இறங்கிலாம் பெண் சிங்கம்.

    தப்பிக்க வழியில்லாமல் அந்த விழுதில் தொங்கினான். அப்போது ஆலமரத்திலிருந்த தேன்கூட்டிலிருந்து தேன் சொட்டியது. அந்தத் துளி நாக்கில் விழுந்ததும் அவன் அதை ரசித்து ருசித்தான்.

    அந்த மனிதனின் நிலமைக்குப் பெயர்தான் வாழ்க்கை. பிறப்பும் எளிதில்லை. வாழ்வும் எளிதில்லை.

    ஆனால் அந்த ஒரு துளி தேனைச் சுவைக்கும் போது மலைப்பாம்பையும் பெண்சிங்கத்தையும் அவன் மறந்தது போல சிற்சில இன்பங்களில் வாழ்வியல் துன்பங்களை நாம் மறந்திருக்கிறோம்.

    இந்த உண்மை நமக்குப் புரிந்தால் நாம் அமைதியாவோம். முடிந்தவரை நல்லவராவோம்.

    புரியாதவர்கள் ஆடித் தீர்த்து விடுவார்கள். எதெற்கெடுத்தாலும் பிரச்சனை. எல்லாவற்றிலும் தவறு. அடுத்தவருக்கு முடிந்த வரை நேரடியாகவும் மறைமுகமாகவும் தொல்லை கொடுத்தல். கொள்ளையடித்தல். கொலை செய்தல். அரசியல் பிழைத்தல். வஞ்சகம் செய்தல். இன்னா செய்தல். நாவினால் சுடுதல். அமைதியைக் குலைத்தல். நீர்நிலைகளைக் கெடுத்தல். இயற்கையை அழித்தல். குழந்தைகளைத் துன்புறுத்துதல். இன்னும் எத்தனையெத்தனையோ தவறுகள்.

    ஆடித் தீர்த்துவிடுகிறது மக்கள் கூட்டம். ஆனால் எதுவும் தொடர்வதில்லை. ஒரு நாளில்.. ஒரு நிமிடத்தில்… அல்ல அல்ல. ஒரு நொடியில் அந்த ஆட்டம் அமைதியாகி விடுகிறது.

    ஆடி அடங்கும் வாழ்க்கையடா” என்று எழுதினார் உவமைக் கவிஞர் சுரதா. அத்தனை ஆட்டங்களும் அடங்குவதற்குத் தேவை ஒரேயொரு நொடிதான் என்பது மனிதனின் மிகப்பெரிய பலவீனம்.

    அந்த பலவீனத்தினால் உண்டாவது அச்சம். இறப்பின் மீதான அச்சம். அந்த அச்சம் ஏழைகளுக்கு மட்டும் வருவதல்ல. வேறுபாடே இல்லாமல் அரசன் முதல் ஆண்டி வரைக்கும் வியாபாரி முதல் விவசாயி வரைக்கும் வருவதுதான்.

    யோகிக்கும் உண்டு அந்த அச்சம். அச்சத்தைப் போக்கவும் மறைக்கவும் அவன் செய்வதுதான் யோகம். அதையே போகி வேறுவிதமாகச் செய்கிறான். போகத்தில் தன்னை மறைத்து இறப்பின் அச்சத்தைத் தள்ளிப் போடுகிறான்.

    அந்த அச்சம் இறப்பின் மீது மட்டுமல்ல… அது தொடர்பான அனைத்தின் மீதும் உண்டாகிறது.

    உலகத்திலேயே மிக மிக அமைதியான இடம் ஒன்று உண்டு. அங்கு சண்டை இல்லை. சச்சரவு இல்லை. மேலோர் இல்லை. கீழோர் இல்லை. செல்வந்தன் இல்லை. ஏழை இல்லை. எந்தப் பிரச்சனையுமே இல்லாத அமைதியான இடம் அது.

    ஆம். இடு/சுடுகாடுதான் அது. அங்கு யாரையாவது தனியாகப் போகச் சொல்லுங்கள். போகவே மாட்டார்கள். அந்த இடத்தைப் பற்றி கவிஞர் மருதகாசி அழகாக எழுதினார் ரம்பையின் காதலுக்காக படத்தில். பாடலுக்கு இசையமைத்தவர் டி.ஆர்.பாப்பா.

    சமரசம் உலாவும் இடமே
    நம் வாழ்வில் காணா சமரசம் உலாவும் இடமே

    அமைதியே இல்லாமல் ஓயாமல் சிந்தித்துச் சிந்தித்துக் குழப்பிக் கொண்ட எத்தனையோ உள்ளங்கள் அமைதியானது அங்குதான்.

    ஜாதியில் மேலோர் என்றும் தாழ்ந்தவர் தீயோரென்றும் பேதமில்லாது
    எல்லோரும் முடிவில் சேர்ந்திடும் காடு
    தொல்லையின்றினே தூங்கிடும் வீடு
    ஆண்டி எங்கே அரசனும் எங்கே ஆண்டி எங்கே அரசனும் எங்கே
    அறிஞன் எங்கே அசடனும் எங்கே அறிஞன் எங்கே அசடனும் எங்கே
    ஆவி போன பின் கூடுவார் இங்கே ஆவி போன பின் கூடுவார் இங்கே
    சேவை செய்யும் தியாகி ஸ்ருங்கார போகி
    ஈசன் பொற்பாதம் தன்னை நாடிடும் யோகி
    எல்லோரும் இங்கே ஒன்றாய் உறங்குவதாலே
    நம் வாழ்வில் காணா சமரசம் உலாவும் இடமே

    மனித வாழ்வில் இல்லாத அமைதியும் ஒற்றுமையும் பாகுபாடின்மையும் நிலவுவது அந்த ஒரு இடத்தில்தான்.

    சரி. இந்தப் பதிவைப் படிக்கும் போதே மனம் இவ்வளவு அமைதியாகிறதே… ஒரு மெல்லிய சோகம் மனதில் படிகிறதே. அப்படியிருக்க இந்த அச்சத்தை எப்படி வெல்வது? வெற்றி கொள்வது?

    புத்தபிக்குகள் எப்போதும் சோகமாக இருப்பார்களாம். ஏன்? பின்னால் நிகழப் போவதுக்கு முன்னாலேயே சோகம் அனுபவிப்பார்கள். துறவிகள் அனைத்தையும் துறந்து தவம் செய்யப் போய்விடுவார்கள்.

    நாமும் அப்படிச் சோகமாக இருக்கத்தான் வேண்டுமா? துறவு கொள்ளத்தான் வேண்டுமா? வேறுவழியே கிடையாதா? ஆண்டவனுடைய திருவடியைப் பற்ற வேண்டும் என்று எல்லா மதங்களும் சொல்கின்றன.

    காலக்கணக்கை முடிப்பதற்கு காலன் வந்தால் தானே அச்சம் வரும். ஆண்டவனே வந்தால்?

    எத்தனையோ யோகிகளும் சித்தர்களும் முனிவர்களும் காணக்கிடைக்காத அந்த அருட்பெருஞ்சோதியே வந்தால்?

    அப்படி ஒரு வழியைத்தான் அருணகிரியும் சொல்லிக் கொடுக்கிறார்.

    பாதி மதிநதி போது மணிசடை
    நாத ரருளிய குமரேசா
    பாகு கனிமொழி மாது குறமகள்
    பாதம் வருடிய மணவாளா
    காலன் எனை அணுகாமல் உனதிரு
    காலில் வழிபட அருள்வாயே

    அன்புடன்,
    ஜிரா

    302/365

     
    • rajinirams 2:55 pm on September 29, 2013 Permalink | Reply

      வாழ்வியல் தத்துவத்தை எளிமையாகவும் அழகாகவும் எடுத்து “காட்டு”ம் அருமையான பதிவு. “சமரசம் உலாவும் இடமே”-மருதகாசியின் என்ன அறுபுதமான வரிகள்.முகராசி படத்தில் இடம்பெறும் கவியரசரின் வரிகளும் அருமையாக இருக்கும்-பட்டணத்தில் பாதி இவன் வாங்கி முடித்தான்,அந்த பட்டயத்தில் கண்டது போல் வேலி எடுத்தான்,அதில் எட்டடுக்கு மாடி வைத்து கட்டிடத்தை எட்டடி நின்று படுத்தான்,மண்ணை கொட்டியவன் வேலி எடுத்தான்-உண்டாக்கி வெச்சவங்க ரெண்டு பேரு-இங்கே கொண்டு வந்து போட்டவங்க நாலு பேரு. கவிஞர் வைரமுத்துவின் “கம்பங்களி தின்னவனும் மண்ணுக்குள்ளே தங்கபஸ்பம் தின்னவனும் மண்ணுக்குள்ளே-இந்த வாழ்க்கை வாழ தான்,கையில் என்ன கொண்டு வந்தோம் கொண்டு செல்ல”வரிகளும் சிந்தனையை தூண்டுபவை.”இறைவனின் திருவடியை பற்றுவதே சரி”என்ற அருணகிரியாரின் பாடலை சொன்னது முத்தாய்ப்பு.

    • Uma Chelvan 5:06 pm on September 29, 2013 Permalink | Reply

      ஜாதியில் மேலோர் என்றும் தாழ்ந்தவர் கீழோர் என்றும் பேதமில்லாது
      எல்லோரும் முடிவில் சேர்ந்திடும் காடு…………..எனக்கு மிகவும் பிடித்த பாடல் “பட்தீப்” ராகத்தில் !! மரணம் என்பது எல்லோருக்கும் பொது!! ஆனால் “எங்கே” ” எப்படி” என்பதுதான் பெரிய கேள்விகுறி? அதில் தான் இறைவனும் இருக்கிறான்!!!!! .

    • amas32 4:00 pm on October 1, 2013 Permalink | Reply

      ஆடி அடங்கும் வாழ்க்கையடா ஆறடி நிலமே சொந்தமடா என்ற பாட்டும் வாழ்வு முடிந்ததும் எல்லோருக்கும் ஒரே நிலை தான் என்று சொல்ல வருகிறது. அதற்காக முதலில் இருந்தே வாழ்க்கையை அனுபவிக்காமல் இருக்க முடியாது. தலை கால் புரியாமல் ஆடாமல், நல்ல எண்ணங்களையும் செயல்களையும் செய்து வந்தால் முடிவும் அமைதியானதாக இருக்கும்.

      amas32

  • mokrish 12:35 pm on September 19, 2013 Permalink | Reply  

    சென்னை செந்தமிழ்! 

    என்னுடன் லிப்டில் வந்த சிலர் ஒரு குறிப்பிட்ட சமூக / வட்டார மொழியை imitate செய்துகொண்டிருந்தனர். இவர் இப்படி பேசுவார் நமக்கு புரியவே புரியாது என்று யார் தலையையோ உருட்டிக் கொண்டிருந்தார்கள். வழக்கமாக நடக்கும் விஷயம்தான் – திரைப்படங்களில், கதைகளில், பதிவுகளில், சமூக வலைத்தளங்களில் தினமும் பார்க்கும் விஷயம்தான். ஆனால்  வட்டார வழக்கு கேலிக்குரியதா  ? இடம் சார்ந்து அல்லது சமூகம் சார்ந்து அல்லது தொழில் சார்ந்து வழங்கும் வட்டார  வழக்குகள் ஒரு மொழியை சுவாரஸ்யமாக்குகிறது என்பது என் கருத்து.

    லிப்டில் பேசியவர்கள் எந்த வட்டாரம் என்று எனக்கு தெரியாவில்லை. ஆனால் அவர்களின் உரையாடலில் ‘மச்சான், பந்தா, பீட்டர், ஃபிலிம் காட்டறது’ போன்ற வார்த்தைகளை மிகவும்  சரளமாக தெளித்து மகிழ்ந்தனர். அட இந்த வார்த்தைகளும் மெட்ராஸ் பாஷை என்ற ஒரு வட்டார மொழியின் தாக்கம்தானே? இவர்கள் கண்ணாடி வீட்டில் இருந்து கல்லெறிந்தார்களா?

    சென்னை மாநகரில் பேசப்பட்டு வந்த பிற மொழிச் சொற்கள் கலந்த தமிழ். சோ வின் Madras by night நாடகம் பார்த்ததிலிருந்தே எனக்கு இந்த மெட்ராஸ் பாஷை  மேல் மிகுந்த ஆர்வம் இருந்தது, அந்த நாளில் ஜாம்பஜார் ஜக்கு என்ற கற்பனை பாத்திரம் ‘அசால்ட்டா’  பேசும் தமிழை ரசித்தேன். சோ,தேங்காய், லூஸ் மோகன் ஜாலியாக பேசிய மொழி. திரைப்படங்களில் கமல் அதை சிறப்பாக நகைச்சுவை முலாம் பூசி மெருகேற்றினார். இந்த மெட்ராஸ் பாஷைக்கு இணையத்தில் நிறைய crash course பதிவுகள் உண்டு. சில அருஞ்சொற்பொருள் பதிவுகளும் உண்டு.

    அறுபதுகளின் இறுதியில் வந்த பொம்மலாட்டம் படத்தில் வாலி இந்த மெட்ராஸ் பாஷையில் எழுதிய ஒரு பாடல் பிரபலமானது (இசை வி.குமார் பாடியவர் மனோரமா).

    https://www.youtube.com/watch?v=x5qzl4mKCgE

    வா வாத்யாரே வூட்டாண்ட

    நீ வராங்காட்டி நா வுடமாட்டேன்

    ஜாம்பஜார் ஜக்கு நான்

    சைதாபேட்டை கொக்கு

    வூட்டாண்ட என்றால் என்ன? வீடு தான் வூடு. அண்டை  வீடு என்றால் பக்கத்து வீடு So இதை மாற்றி ‘வீடு அண்டை’ என்ற construction வீட்டுக்கு அருகில் என்ற  பொருள் தருகிறதோ ?

    வாராவதிலே நின்னுக்கினிருந்தேன்

    அமராவதியாட்டம்

    சைட்டடிச்சு நீ ஜகா வாங்கினே

    அம்பிகாபதியாட்டம்

    வாராவதி ? வார் என்றால் நீர். போக்குவரத்துக்காக ஆற்றின் இரு கரைளை  இணைத்துக் கட்டப்படும் பாலம் தான் வாராவதி. ஆங்கிலேயர் ஒருவர் பெயரால் சென்னையில் ஆமில்ட்டன் வாராவதி எனும் பாலம் ஒன்றுண்டு

    லவ்வாப் பாத்து சோக்காப் பேசி

    டேக்காக் கொடுத்தே பின்னாலே

    சர்தான் வாம்மா கண்ணு  படா

    பேஜாராச்சு நின்னு

    காதலாகி கசிந்துருகி தான் லவ்வாப் பாத்து. ஆனால் சோக்காப் பேசி?  ஒருவேளை ஜோக் ஆ பேசி சிரிக்க வைத்தான் என்று சொல்கிறாரா ? இருக்கலாம். அடுத்து இந்த பேஜார் என்ற வார்த்தை. நாம் எல்லாரும் உபயோகிக்கும் சொல்.  ஆங்கிலேயர்கள் dont badger me (என்னை நச்சரிக்காதே) என்று சொன்ன அந்த badgerஐ, கொஞ்சம் டிங்கரிங் செய்து  பட்டி பார்த்து பேஜார் ஆக்கிவிட்டார்கள்.

    நைனா உன் நெனப்பாலே நான் நாஸ்தா பண்ணி நாளாச்சு

    மச்சான் ஒன் மூஞ்சப் பார்த்தேன்

    சால்னா நெனப்பு வந்தாச்சு

    ஆயாக்கடை இடியாப்பம் நான்

    பாயாக்கறியும் நீயாச்சு

    வா வா மச்சான் ஒண்ணா சேந்து

    வாராவதிக்கே போகலாம்

    நீ காற்று நான் மரம் என்றும் சொல்லலாம். குயிலாக நீ பாட்டாக நான் என்று சொல்லலாம்  நான் ஆயாக்கடை இடியாப்பம் நீ பாயாக்கறி என்றும் சொல்லலாம். அதே அர்த்தம் தானே?  குறிலாக நான் இருக்க, நெடிலாக நீ வளர்க்க ,சென்னை தமிழ் சங்க தமிழ் ஆனதடி என்று அறிவுமதி  சொல்வது சரிதானே?

    ஜாலியான மொழி. Kerosene என்பதை ‘கிருஷ்ணா’யில் என்றும் Palm Oil என்பதை ‘பாமா’யில் என்றும் புராண வாசனையுடன் சொன்ன அருமையான மொழி. இதை மறக்க முடியுமா?

    மோகனகிருஷ்ணன்

    292/365

     
    • Chandsethu 1:01 pm on September 19, 2013 Permalink | Reply

      Lovely :-))

    • amas32 1:06 pm on September 19, 2013 Permalink | Reply

      என் ஊரைப் பற்றிய பதிவு! பேஷ் பேஷ்! 🙂 டக்கரா இருக்கு! – ரெண்டும் ஒரே பொருள் தான் 🙂

      //வா வாத்யாரே வூட்டாண்ட

      நீ வராங்காட்டி நா வுடமாட்டேன்

      ஜாம்பஜார் ஜக்கு நான்

      சைதாபேட்டை கொக்கு//

      இதுக்கு equivalent

      அடுத்தாத்து அம்புஜத்தைப் பார்த்தேளா
      அவ ஆத்துக்காரர் சொல்லுறதைக் கேட்டேளா?
      அடிச்சாலும் புடிச்சாலும் ஒண்ணா சேந்துக்கறா..
      ஆனா அடிச்சதுக்கொண்ணு புடிச்சதுக்கொண்ணு
      புடவையா வாங்கிக்கறா, பட்டுப் புடவையா வாங்கிக்கறா…

      வட்டார வழக்கில் பேசும் மொழி, ஒரு சமூகத்தினரால் பேசும் மொழி, இவற்றை ரசிக்க வேண்டும், ஆராயக் கூடாது :-))

      amas32

      • என். சொக்கன் 9:20 pm on September 19, 2013 Permalink | Reply

        isn’t it funny both these are written by Valee? 😉

        • rajinirams 11:16 am on September 20, 2013 Permalink

          செந்தமிழ் சென்னை தமிழ் என்று மட்டுமல்ல பல இந்திய மொழிகளையும் ஒரு(தமிழ்) மொழி பாட்டில் கொண்டு வந்த “ஒரே”கவிஞர் வாலி அவர்கள்-இந்திய நாடு என் வீடு-பாரத விலாஸ்:-)) அவறை பற்றிய சில விஷயங்களை சமர்ப்பிக்காதலால் இந்திய அரசின் சிறந்த கவிஞர் விருது அவருக்கு(அந்த பாடலுக்கு) கிடைக்கவில்லை.

    • rajinirams 3:54 pm on September 19, 2013 Permalink | Reply

      “ஷோக்கா கீதுபா”என்று சொல்லவைக்கும் நகைச்சுவையான பதிவு.”வா மச்சான் வா,வாடி என் கப்ப கிழங்கே”என்று கொச்சை தமிழில் பாடல்கள் வந்தாலும் சென்னை தமிழை சிறப்பிக்கும் (!) பாடல் இன்றளவில் வாலியின் இந்த பாடல் தான்.

    • க்ருஷ்ணகுமார் 8:56 pm on September 19, 2013 Permalink | Reply

      \\\ சைட்டடிச்சு நீ ஜகா வாங்கினே

      அமராவதியாட்டம் \\\

      தப்பு….தப்பு….தப்பு

      சைட்டடிச்சு நீ ஜகா வாங்கினே அம்பிகாபதியாட்டம்

    • தேவா.. 12:12 pm on September 20, 2013 Permalink | Reply

      எனக்கு என் காலத்தில் வந்த வட்டார மொழிப் பாடல்கள் மேல் தனி ப்ரியம். அதில் ஒன்று .

      மச்சி மன்னாரு (ராஜா சந்தோஷமாக, சென்னை தமிழில் பாடுவார்). காலத்துக்கு ஏற்றவாறு ஜாம்பாஜார், ஜக்கு எல்லாம் மாறியிருக்கும். உற்று நோக்கினால், பல ஆங்கில வார்த்தைகள், ஆங்கிலமாக தெரியாமல் தமிழாக மாறிருக்கும். சென்னை தமிழ் , பல கூடல் சங்கமம்.

  • mokrish 8:28 pm on August 11, 2013 Permalink | Reply  

    ராஜா என்பார் மந்திரி என்பார் 

    பிரபல செஸ் வீரர் காரி காஸ்பரொவ் எழுதிய How Life Imitates Chess படித்துக் கொண்டிருக்கிறேன். சீராக யோசித்தல், முடிவெடுக்கும் திறமை, வியூகம் அமைத்தல், என்று சதுரங்கம் தரும் பாடங்கள் பலவற்றை வணிக நிறுவன நிர்வாகத்தில் செயல்படுத்த முடியும் என்கிறார். செஸ் விளையாட்டு ஞாபக சக்தியையும் உள்ளுணர்வையும் மேம்படுத்தும் என்கிறார்.

    இந்த சதுரங்க விளையாட்டு பற்றி படித்தவுடன் கெளரவம் படத்தில் இரண்டு சிவாஜிகளும் ஆடிய life size செஸ் நினைவுக்கு வந்தது. கண்ணதாசன் எழுதிய ‘கண்ணா நீயும் நானுமா’ என்ற பிரபல பாடலில் (இசை எம் எஸ் விஸ்வநாதன், பாடியவர் டி எம் எஸ்) இருவருக்கும் இடையில் நடக்கும் வழக்கை சதுரங்க விளையாட்டுடன் ஒப்பிடுவார்

     https://www.youtube.com/watch?v=EjEa_j9kRbE

    மன்னனின் கெளரவம் சதுரங்க நடுவிலே

    மறிக்கின்ற சேனையோ பிள்ளையின் வடிவிலே

    ஆகட்டும் பார்க்கலாம் ஆட்டத்தின் முடிவிலே

    இந்த Board Games எனப்படும் சிறுபாடு விளையாட்டுகள் நமக்கு பல முக்கியமான வாழ்வியல் பாடங்கள் கற்றுத்தருகின்றன. சதுரங்க விளையாட்டில் ராஜா காப்பாற்றப்படவேண்டும். ஆனால் இதில் ராஜாவுக்கு பெரிய அதிகாரமோ சக்தியோ கிடையாது. கிட்டத்தட்ட ஒரு பார்வையாளன்தான். ராஜாவின் பக்கம் இருக்கும் ராணியும், மந்திரிகளும் ரத கஜ துரக பதாதிகளும் தான் காக்கவேண்டும்.

    வாழ்க்கையை ஆடு புலி ஆட்டம் என்று விவரித்து சபதம் என்ற படத்தில் கண்ணதாசன் எழுதிய பாடல் வரிகள்

    ஆட்டத்தை ஆடு புலியுடன் ஆடு

    போட்டிக்கு வருகின்ற ஆட்டம் ஆடு

    இங்கு ஆடுகள் மோதட்டும் புலியோடு

    வாலி இதில் வேறு கருத்து  சொல்கிறார் வெள்ளி விழா  படத்தில் கை நிறைய சோழி என்ற பாடலில் (இசை வி குமார் பாடியவர்கள் பி சுசீலா எல் ஆர் ஈஸ்வரி) ஒரு பக்கம் சதுரங்கம் இன்னொரு பக்கம் தாயக்கட்டம் என்று காட்சி.  இரண்டு விளையாட்டையும் குறிக்கும் வார்த்தைகளை வைத்து வாலி ஆடும் ஆட்டம்!  https://www.youtube.com/watch?v=AGM0KqoK3lY

     விதி என்று விளையாட்டை நினைப்பதும் ஏனோ

    பந்தயத்தை வாழ்க்கை என்று எண்ணி விடலாமோ!

    எனக்கென்னவோ இந்த விளையாட்டுகளை வடிவமைத்தவர்கள் இதன் மூலம் பாடம் சொல்ல நினைத்தார்கள் என்றே தோன்றுகிறது. நாம் செய்யும் நல்ல காரியங்களை ஏணியாகவும் தீய செயல்களை பாம்பாகவும் கற்பனை செய்த பரம பதம், புலிகளை எதிர்கொள்ளும் ஆடுகளை கொண்ட ஆடு புலி ஆட்டம், சரியான முறையில் காய் நகர்த்தினால் ஊர் போய்ச்சேரலாம் என்று சொல்லித்தரும் தாயக்கட்டம், என்று எல்லா விளையாட்டுகளும் நமக்கு ஏதோ பாடம் சொல்லுவதுபோல் இருக்கிறது.

    மோகனகிருஷ்ணன்

    253/365

     
    • rajinirams 2:45 pm on August 12, 2013 Permalink | Reply

      வித்தியாசமான விளையாட்டு பதிவு-அதற்கேற்ற அருமையான பாடல்கள். இரு கோடுகள் படத்தில் மியூசிகல் சேர் விளையாட்டில் இரு நாயகிகளை வைத்து வாலியின் வார்த்தை விளையாட்டு-அன்று போல இன்று கூட போட்டி போட இருவருண்டு,கண்ணகியா மாதவியா வெல்வது-என்ற கேள்விக்கு நான் என்ன பதில் சொல்வது.இதய மலரில் கண்ணதாசன்-என்றும் இந்த இதயம் ஒருவருக்கென்று கூறட்டும் விரைவினில் சென்று-என செண்டு மல்லி பூ போல் அழகிய பந்தை சொல்வதும் அருமையாக இருக்கும்.நன்றி.

    • amas32 5:41 pm on August 14, 2013 Permalink | Reply

      வாழ்க்கையை ஒரு விளையாட்டோடு ஒப்பிடுவது இந்த பாடல் வரிகளில் இருந்து தெரிகிறது. வீட்டிலும், வேலை செய்யும் இடத்திலும் நாமும் சதுரங்க ஆட்டத்தில் விளையாடுவது போல சரியான மூவ்களை செய்ய வேண்டியுள்ளது. வாழ்க்கையின் வெற்றியே அதில் தான் அடங்கியுள்ளது. பேக்கு மாதிரி இருந்தால் இளிச்சவாயன் என்ற பட்டத்தைக் கொடுத்து ஒருவரும் நம்மை மதிக்க மாட்டார்கள். அதனால் புலியிடம் இருந்துக் காத்துக் கொள்ளவும், ஏணியில் ஏறவும் கற்கவேண்டும்!

      amas32

  • mokrish 8:53 am on July 25, 2013 Permalink | Reply  

    மனதோடு மனமின்று பகை கொள்வதேனோ? 

    நீதிமன்றங்களை கடக்கும்போது அங்கே கண்ணுக்கு தெரியும் மக்கள் கூட்டம் எப்போதும் எனக்கு ஆச்சரியமாக இருக்கும். அதெப்படி தினமும் இவ்வளவு பேர் வழக்காட வருகிறார்கள்? எதிராளியை பணிய வைக்க வழக்கு, அப்பீல், என்று முட்டி மோத இவ்வளவு பேர் தயாராக இருக்கிறார்களா?

    இதில் வேதனையான விஷயம் – பெரும்பான்மையான வழக்குகள் உறவுகளுக்குள் தான். ஒரே குடும்பத்தில் உள்ள சொந்தங்கள், திருமண பந்தத்தால் இணைந்தவர்கள். சில தினங்களுக்கு முன் வரை இணைந்திருந்து பின் ஏதோ காரணங்களால் பிரிந்து, மனம் கசந்து வழக்காட வருகிறார்கள். நீதிமன்றம் தரும் அனுபவங்கள் அவர்களுக்கு நிம்மதியை அளிக்கிறதா?

    வள்ளுவர் உட்பகை என்று ஒரு அதிகாரமே எழுதுகிறார்,அதில் ஒரு குறள்

    உறல்முறையான் உட்பகை தோன்றின் இறல்முறையான்

    ஏதம் பலவும் தரும்

    உறவுமுறையோடு உட்பகை உண்டாகுமானால், அது ஒருவனுக்கு இறக்கும் வகையான துன்பம் பலவற்றையும் கொடுக்கும் என்கிறார். மனம் நிறைய கோபமும் பகையும் பொங்கினால் என்ன ஆகும்? எல்லோரும் நல்லவரே என்ற படத்தில் பகை கொண்ட உள்ளம் (இசை வி குமார், பாடியவர் கே ஜே ஜேசுதாஸ்) என்ற பாடலில் புலமைப்பித்தன் இதை அருமையாக விளக்குகிறார். http://www.youtube.com/watch?v=YuhOzHP6Af8

    பகை கொண்ட உள்ளம் துயரத்தின் இல்லம்

    தீராத கோபம் யாருக்கு லாபம்

    முதல் வரியிலேயே நிம்மதி இழந்த மனம் பற்றி சொல்கிறார். தீராத கோபம் பகையை வளர்க்கும். அதனால் வேதனை அதிகரிக்கும் என்கிறார்.

    வீட்டுக்கு வெளிச்சம் வருவதற்காக கூரையை எரிப்பாரோ

    வேதனை தன்னை விலை தந்து யாரும் வாங்கிட நினைப்பாரோ

    இதயத்தை திறந்து நியாயத்தை பேசு வழக்குகள் முடிவாகும்

    இருக்கின்ற பகையை வளர்த்திட தானே வாதங்கள் துணையாகும்

    பட்ட பின்னாலே வருகின்ற ஞானம் யாருக்கும் உதவாது

    ஏனோ இந்த பாடலை கேட்கும்போது எனக்கு மகாபாரதத்தில் துரியோதனன் பொறாமையால் வெந்து கோபப்பட்டு பகை வளர்த்து வீழ்ந்தது நினைவுக்கு வரும்.

    இதில் சரி தவறு என்பது பற்றி பேசவில்லை.இந்த பாதை சம்பந்தப்பட்டவர்களுக்கு என்ன தருகிறது? நிச்சயமாக நிம்மதியைத் தரவில்லை. மாறாக வேதனையையும் கண்ணீரையும் தருகிறது. நீதி தேவதை தன் கண்ணைக் கட்டிக்கொண்டிருப்பது இதையெல்லாம் பார்க்க வேண்டாம் என்பதற்காகவும் தானோ?

    மோகனகிருஷ்ணன்

    236/365

     
    • Uma Chelvan 9:52 am on July 25, 2013 Permalink | Reply

      Very nice one!

    • Yashaswini 12:42 pm on July 25, 2013 Permalink | Reply

      Very nice post, Mohan Uncle. And truly there is no better support system than one’s own family!

    • Prabhu 8:08 pm on July 28, 2013 Permalink | Reply

      Well written Mohan Anna. Excellent thought in connecting High Court scene, Thirukkural, Mahabaratha and finally Pulamaipithan.

  • mokrish 1:00 pm on July 18, 2013 Permalink | Reply  

    நரை எழுதும் சுயசரிதம் 

    நண்பர் @nchokkan ட்விட்டரில் ‘35க்கப்புறம் 95கூட முக்கால் கிழம்தான்’ என்று எனக்கு சமாதானம் சொன்னார். விவாதம் முடிந்தாலும் அந்த முக்கால் கிழம் என்ற நிலை பற்றி அமைதியாக யோசித்தபோது கொஞ்சம் கவலை வந்தது. தொடர்ந்து சில தினங்கள் அதே யோசனை.

    முதுமை என்பது ஒரு பயம். உடலும் மனமும் தளர்ந்து, கை நடுங்கிக் கண் மறைந்து,  காதோரம் எட்டிப்பார்க்கும் நரை என்று முதுமை தரும் மாற்றங்கள் பல. நினைவு மங்கி எல்லாவற்றையும் மறக்க நேரிடலாம். இந்த நிலை சாபமா என்று தெரியவில்லை ஆனால் நிச்சயமாக வரம் இல்லை.

    ஆராதனை படத்தில் வைரமுத்து எழுதிய ஒரு குங்குமச் செங்கமலம் என்ற பாடலில் (இசை இளையராஜா பாடியவர்கள் எஸ் பி பாலசுப்ரமணியன் எஸ் ஜானகி)

    http://www.youtube.com/watch?v=Nx3opO-h8gg

    முதுமை ஒருநாள் நம்மை வந்து தீண்டும்

    மூன்றாம் காலில் நாம் நிற்க வேண்டும்

    முடியை பார்த்தால் முழு வெள்ளை

    என்று முதுமையின் அடையாளங்கள் சொல்கிறார்.

    ஒரு மெகா சைஸ் Hour glass ல் மேலிருந்து கீழே சரியும் மணலாக கண்ணுக்குத்தெரியாமல் நகரும் வருடங்கள் நம்மை மெதுவாக முதுமை நோக்கி செலுத்தும்.  கண்ணதாசன் போலீஸ்காரன் மகள் படத்தில் வரும் பாடலில்  (இசை எம் எஸ் விஸ்வநாதன் பாடியவர்கள் P B ஸ்ரீநிவாஸ் எஸ் ஜானகி) சொல்வது இதுதான்

    http://www.youtube.com/watch?v=H-V8ZciCTR4

    ஆண்டொன்று போனால் வயதொன்று போகும்

    அதற்கு முன்னாலே வா..வா..வா…

    அழகுடன் இளமை தொடர்ந்து வராது

    இருக்கின்ற போதே வா..வா..வா..

    இளமை இருக்கும்போது செய்ய வேண்டியவை என்று ஒரு Bucket List போடுகிறார்.

    நரை, தள்ளாட்டம் என்ற உடல் சார்ந்த அடையாளங்களைத் தாண்டி முதுமைக்கு வேறு ஒரு முக்கிய அடையாளம் உண்டு. அது தனிமை. கூட்டத்திலும் தனிமையாக உணரும் ஒரு மனோநிலை. வெள்ளிவிழா என்ற படத்தில் வாலி எழுதிய ஒரு பாடல் (இசை வி குமார் பாடியவர் எம் எஸ் விஸ்வநாதன்) வரிகள் இதோ

    https://www.youtube.com/watch?v=vvfLzYCmfug

    உனக்கென்ன குறைச்சல் – நீயொரு ராஜா..

    வந்தால் வரட்டும் முதுமை!

    தனக்குத்தானே துணையென நினைத்தால்

    உலகத்தில் ஏது தனிமை?

    கடந்த காலமோ திரும்புவதில்லை..

    நிகழ்காலமோ விரும்புவதில்லை..

    எதிர்காலமோ அரும்புவதில்லை..

    இதுதானே அறுபதின் நிலை..

    அந்த நாளில் அறுபதின் நிலை என்று பாடிவிட்டார். இப்போது வாழ்நாள் எதிர்பார்ப்பு அதிகரித்து 60ளில் தொடங்கி எண்பதுகளை கடந்து வாழும் பலர் மனதளவில் தனியாகவே உணர்கிறார்கள்.

    முதுமையை  எதிர்கொள்ள நாம் தயாராவதில்லை என்பதே உண்மை. காலத்தை நில் என்று சொல்ல முடிந்தால் , வயதாவதை நிறுத்த முடிந்தால் எப்படி இருக்கும்?

    மோகனகிருஷ்ணன்

    229/365

     
    • rajinirams 3:27 pm on July 18, 2013 Permalink | Reply

      பதிவு அருமை. மனம் இளமையாக இருந்தால் உடலும் இளமையாக இருப்பது போல் உணரலாம்.ஆசைக்கு வயதில்லை என்பதை ஐம்பதிலும் ஆசை வரும் என்று கவியரசர் எழுதினார். வயதானாலும். காதில நரைச்ச முடி கன்னத்துல குத்துது குத்துது.சுழியில படகு போல என் மனசு சுத்துது சுத்துது என்று வைரமுத்து எழுதியது போலவும் மற்றவர்களை மகிழ்விக்க முடியும்:-)), நன்றி.

    • GiRa ஜிரா 6:50 pm on July 19, 2013 Permalink | Reply

      வயதாவது… எல்லாரையும் அச்சுறுத்தும். இளமை குறையக் குறைய.. இரத்தத்தின் சூடு குறையக் குறைய.. உடலின் வேகம் குறையக் குறைய… முன்பு செய்த வேலைகளைக் கூட முழுமையாக செய்யமுடியாத நிலை வரவர ஒரு தொய்வு கூடும்.

      அதை விட முக்கியமாக தோற்றப் பொலிவின் குறைவு. அழகு குறையும். உடலின் கூடும் சதை. வெளுக்கும் முடி. குறையும் கண்பார்வை.

      ஆனால் இத்தனை இருந்தும்… கண்ணதாசன் சொன்னது போல…
      ஐம்பதிலும் ஆசை வரும்
      ஆசையுடம் பாசம் வரும்
      இதில் அந்தரங்கம் கிடையாதம்மா
      நாள் செல்ல நாள் செல்ல சுகம்தானம்மா

    • பொன்.முத்துக்குமார் 9:05 pm on July 19, 2013 Permalink | Reply

      “வயதாவதை நிறுத்த முடிந்தால் எப்படி இருக்கும்?”

      நல்ல கேள்வி. இதற்கு விடை தேடுகிறது “Tuck Everlasting” என்ற ஆங்கில திரைப்படம். பெரிய தத்துவ விசாரமெல்லாம் இல்லை. சாதாரண படம்தான். ஆனால் உங்கள் கேள்விக்கு அதில் பதில் கிடைக்கலாம். காந்தியாக நடித்த பென் கிங்ஸ்லி இதில் வில்லனாக. சுவாரஸ்யமான படம்.

      அன்புடன்
      பொன்.முத்துக்குமார்.

    • amas32 10:14 pm on July 19, 2013 Permalink | Reply

      பகவத் கீதையில் இரண்டாவது அத்தியாயத்தில் இறப்பு என்பது வேறொன்றும் இல்லை, ஓர் உடலை விட்டு இன்னொரு உடலுக்குச் செல்வது தான், அதற்கு ஏன் வருந்த வேண்டும் என்று கிருஷ்ணா பரமாத்மா கேட்பார். அந்த ஸ்லோகத்திலியே குழந்தை பருவத்தைக் கடந்து இளமை பருவத்தை அடைகிறோம், அடுத்து அதை முடித்து முதுமை பிராயாத்தை அடைகிறோம். ஒவ்வொன்றும் ஒரு வித இறப்பே, அதற்கெல்லாம் வருந்தி அழாத நாம் ஒரு உடல் மடியும் போது மட்டும் அழுவது ஏனோ என்று வினவுகிறார். கிழிந்த சட்டையை தூக்கி எறிந்து விட்டு புது உடையை நாம் நாடுவது போல தான் பழைய உடலை விடுத்துப் புதிய உடலுக்குள் புகுவதும்.

      ஆதலால் மூப்பு தவிர்க்க முடியாதது 😦 :-))

      amas32

  • GiRa ஜிரா 11:43 am on July 14, 2013 Permalink | Reply  

    படைத்தவன் யாரோ? 

    நீண்ட நாட்களாக எனக்கு ஒரு ஐயம். தமிழ்க் கவிஞர்கள் அதிகமாகப் பாடிய கடவுள் யார்?

    முருகன், அம்மன், சிவன், கிருஷ்ணன் என்று அடுக்கலாம். ஆனால் அவர்கள் கடவுள் நம்பிக்கை உள்ளவர்களால் பாடப்பட்டவர்கள்.

    கடவுள் நம்பிக்கை உள்ளவர்களும் இல்லாதவர்களும் ஒத்த எண்ணத்தோடு எந்தக் கடவுளைப் பாடியிருக்கிறார்கள்?

    அப்படியொரு ஒரு கடவுள் இருக்கிறார். அவருக்கு கோயில் கிடையாது. வழிபாடு கிடையாது. திருவிழா கிடையாது. பலிகளோ படையல்களோ கிடையாது. ஆனால் கவிஞர்கள் மட்டும் அவரைப் போற்றிக் கொண்டாடுவார்கள்.

    யார் அந்தக் கடவுள்? ஏன் அவரைக் கொண்டாடுகிறார்கள்?

    கண்ணதாசன் எழுதிய ஒரு பாடலின் வரியைச் சொல்கிறேன். உங்களுக்குச் சட்டென்று புரிந்து போகும்.

    படைத்தானே பிரம்மதேவன் பதினாறு வயது கோலம்!

    புரிந்து விட்டதல்லவா? நான்முகன் பிரம்மன் என்றெல்லாம் அழைக்கப்படும் படைப்புக் கடவுள்தான் அந்தக் கடவுள்.

    ஏன்? ஏனென்றால் அந்தப் படைப்புக் கடவுள்தான் காதலர்களுக்குத் தக்க காதலிகளைக் கொடுக்கிறார். இல்லை இல்லை. படைக்கிறார்.

    மடப்பாவையார் நம் வசமாகத் தூது நடப்பாரே தெய்வம் நமக்கு” என்று ஆதிநாதன் வளமடலில் செயங்கொண்டார் சொன்னதும் அதே கருத்துதான்.

    கொன்றை அணிந்த சிவனோ உலகளந்த கோபலனோ எமக்குத் தெய்வமல்ல. அழகான காதல் பாவையருக்காக தூது நடப்பவரே நமக்குத் தெய்வம்.

    சரி. வாருங்கள். இனி ஒவ்வொரு கவிஞரும் பிரம்மனை எப்படியெல்லாம் புகழ்ந்திருக்கிறார்கள் என்று பார்க்கலாம்.

    அப்படி பிரம்மனைப் புகழ்ந்தவர்களில் என்னை மிகவும் வியக்க வைத்தவர் டி.ராஜேந்தர். அவரே எழுதி இசையமைத்த இரண்டு பாடல்களில் மிகமிகக் கவிநயத்தோடு பிரம்மனைக் குறிப்பிட்டிருக்கிறார். அந்த வரிகளை நீங்களே படித்துப் பாருங்கள். நான் சொல்வதை ஒப்புக் கொள்வீர்கள்.

    தேவலோக அமுதத்தை குழம்பாக எடுத்து
    தங்க நிற வர்ணத்தில் குழைக்கின்ற போது
    பிரம்மனுக்கு ஞானம் வந்து உன்னை படைக்க
    அட பிரமிப்புடன் நானும் வந்து உன்னை ரசிக்க

    மேலே குறிப்பிட்டுள்ள பாடல் உயிருள்ளவரை உஷா படத்தில் இடம் பெற்ற “மோகம் வந்து தாகம் வந்து என்னை அழைக்க” பாடல். விளக்கமே தேவைப்படாத அழகிய வரிகள் அல்லவா!

    அதே போல மைதிலி என்னைக் காதலி படத்தில் இடம் பெற்ற “ஒரு பொன்மானை நான் காணத் தகதிமித்தோம்” பாடலிலும் பிரம்மனைப் பாராட்டுகிறார் விஜய டி.ராஜேந்தர்.

    தடாகத்தில் மீன் ரெண்டு காமத்தில் தடுமாறி
    தாமரைப் பூ மீது விழுந்தனவோ
    இதைக் கண்ட வேகத்தில் பிரம்மனும் மோகத்தில்
    படைத்திட்ட பாகந்தான் உன் கண்களோ

    அடடா! என்ன கற்பனை! அவள் கண்ணைப் படைப்பதற்கே பிரம்மனுக்கு இப்படியொரு காட்சி தேவைப்பட்டிருக்கிறது. அவள் முழுவுடலையும் பளிங்குச் சிலையாய் படைப்பதற்கு எதையெதையெல்லாம் பார்த்துக் கற்றானோ!

    வைரமுத்துவின் சிந்தனை சற்று வேறுவிதமாகச் செல்கிறது. ஒரு எலக்ட்ரானிக் கண் கொண்டு காதலியைப் பார்க்கிறார். அவள் சிரிப்பு கூட டெலிபோன் மணி போலக் கேட்கிறது. அப்படி ஒரு பெண்ணை பிரம்மன் எதை அடிப்படையாகக் கொண்டு படைத்திருப்பான்? வேதங்களா? குருவருளா? சிவனருளா?

    கம்ப்யூட்டர் கொண்டிவளை அந்த பிரம்மன் படைத்தானா

    பிரம்மனும் காலமாற்றத்துக்குத் தக்க ஓலைச் சுவடிகளை வீசி எறிந்து விட்டு கம்ப்யூட்டரில் அனிமேஷன் செய்யத் துவங்கி விட்டானோ என்று வைரமுத்துவின் கற்பனை ஓடுகிறது.

    இன்னொரு பாட்டில் சற்று கொச்சையாக பிரம்மனின் படைப்புக் கதையைச் சொல்கிறார் வைரமுத்து. அண்ணாமலை திரைப்படத்தில் இடம் பெற்ற “அண்ணாமல அண்ணாமல” பாடல் வரிகளைக் கொஞ்சம் பார்க்கலாம்.

    பிரம்மனுக்கு மூடு வந்து உன்னை படைச்சிட்டான்
    அடி காமனுக்கு மூடு வந்து என்னை அனுப்பிட்டான்

    பிரம்மனின் வள்ளல் திறமையையும் கஞ்சத்தனத்தையும் இன்னொரு பாட்டில் கொண்டுவருகிறார் வைரமுத்து. ஜீன்ஸ் படத்தில் இடம்பெற்ற “அன்பே அன்பே கொல்லாதே” பாடல் வரிகளைக் கொடுக்கிறேன். பிரம்மன் எங்கு கஞ்சத்தனத்தையும் எங்கு வள்ளல் தன்மையையும் காட்டினான் என்று நீங்களே கண்டுபிடித்துக் கொள்ளுங்கள்.

    பெண்ணே உனது மெல்லிடை பார்த்தேன்
    அடடா பிரம்மன் கஞ்சனடி
    சற்றே நிமிர்ந்தேன் தலைசுற்றிப் போனேன்
    ஆஹா அவனே வள்ளலடி

    அத்தோடு விடவில்லை வைரமுத்து. பிரம்மனைப் பார்த்து “தகுமா? முறையா? நீதியா?” என்று ஜெமினி படத்து நாயகனுக்காக முறையிடுகிறார்.

    பெண்ணொருத்தி பெண்ணொருத்தி படைத்து விட்டாய்
    என்னிடத்தில் என்னிடத்தில் அனுப்பி விட்டாய்
    உயிரோடு என்னை உலையில் ஏற்றினாய்
    நெருப்புக்கு சேலை கட்டி அனுப்பி வைத்தாய்
    பிரம்மா ஓ பிரம்மா இது தகுமா இது தகுமா
    அய்யோ இது வரமா சாபமா

    இந்தப் பாட்டில் சொல்வது போன்ற அழகான பெண்ணை பிரம்மன் கொடுத்தால் அது வரமா? சாபமா? இரண்டும் என்று எனக்குத் தோன்றுகிறது. உங்களுக்கு என்ன தோன்றுகிறது?

    இன்னொரு வித்தியாசமான கவிஞர் இருக்கிறார். அவர் இசையில் அவர் எழுதி இசையமைத்த பாடல் தான் நாடோடித் தென்றல் படத்தில் வந்த “மணியே மணிக்குயிலே மாலையிளங் கதிரழகே” பாடல். ஆம். இசைஞானி இளையராஜா தான் எழுதிய பாடலிலும் பிரம்மனை இழுக்கிறார்.

    மணியே மணிக்குயிலே மாலையிளங் கதிரழகே
    கொடியே கொடிமலரே கொடியிடையில் மணியழகே
    ………………..
    பொன்னில் வடித்த சிலையே பிரம்மன் படைத்தான் உனையே

    இன்றைய கவிஞர்களும் பிரம்மனை விடுவதாக இல்லை. முதலில் பா.விஜய் எழுதிய பாடல்களைப் பார்க்கலாம்.

    அழகே பிரம்மனிடம் மனு கொடுக்க போயிருந்தேன்
    நீ என் மனைவியாக வேண்டும் என்று
    ஆண்டு பல காத்திருக்க வேண்டும் என்று அவன் சொன்னான்
    ஆயுள் வரை காத்திருப்பேன் என்று நானும் சொல்லி வந்தேன்

    அரசாங்க அலுவலகத்தில் மனு கொடுத்தால் அது எங்கு போகும் என்று தெரியும். ஆனால் பிரம்மனிடத்தில் மனு கொடுத்தால் கண்டிப்பாக அது நடக்கும் என்றொரு நம்பிக்கையை தேவதையைக் கண்டேன் திரைப்படப் பாடல் வரிகளில் கொண்டு வந்திருக்கிறார்.

    பிரியமான தோழி படத்துக்காகவும் பிரம்மனைப் புகழ்ந்திருக்கிறார் பா.விஜய்.

    பெண்ணே நீயும் பெண்ணா பெண்ணாகிய ஓவியம்
    ………………..
    பிரம்மன் செய்த சாதனை உன்னில் தெரிகிறது

    இந்த உலகத்தையே படைத்து, அதில் அத்தனை உயிர்களையும் படைத்ததை விட ஓவியம் போன்ற அழகான காதலியைப் படைத்ததுதான் மிகப் பெரிய சாதனை என்று காதலன் பார்வையில் பா.விஜய் எழுதியதும் ரசிக்கத்தக்கதுதான்.

    நா.முத்துக்குமாரும் வழக்கு எண் 18/9 படத்துக்காக பிரம்மன் கையைப் பிடித்து இழுத்திருக்கிறார்.

    வானத்தையே எட்டி புடிப்பேன்
    பூமியையும் சுத்தி வருவேன்
    …………………
    அடி பெண்ணே நீயும் பெண்தானோ
    இல்ல பிரம்மன் செய்த சிலைதானோ

    வழக்கமாக பாட்டெழுதும் கவிஞர்கள் மட்டுமல்ல, புதிதாகப் பாட்டெழுதுகின்றவர்களுக்கும் பிரம்மனே துணை. தானே இயக்கிய கச்சேரி ஆரம்பம் திரைப்படத்தில் ஒரு பாடலை இயக்குனர் திரைவாணன் எழுதியிருக்கிறார். அங்கும் பிரம்மனுக்குப் போற்றி மேல் போற்றி.

    பிரம்மா உன் படைப்பினிலே…
    எத்தனையோ பெண்கள் உண்டு
    ஆனாலும் அசந்துவிட்டேன் அழகினிலே
    இவளைக் கண்டு
    அழகினிலே.. இவளைக்கண்டு
    வாடா வாடா பையா

    இப்படியெல்லாம் பாடல்களைப் பார்க்கும் போது எனக்கு என்ன தோன்றுகிறது தெரியுமா?

    இதுதான் பிரம்மனுக்கு வந்த வாழ்வு! வாழ்வோ வாழ்வு!

    பதிவில் இடம் பெற்ற பாடல்கள்

    பாடல் – மோகம் வந்து தாகம் வந்து
    படம் – உயிருள்ளவரை உஷா
    பாடியவர்கள் – எஸ்.ஜானகி, எஸ்.பி.பாலசுப்ரமணியம்
    பாடல் & இசை – டி.ராஜேந்தர்
    பாடலின் சுட்டி – http://youtu.be/1S3XGSA4qTk

    பாடல் – அன்பே அன்பே கொல்லாதே
    படம் – ஜீன்ஸ்
    பாடல் – வைரமுத்து
    பாடியவர் – ஹரிஹரன்
    இசை – ஏ.ஆர்.ரகுமான்
    பாடலின் சுட்டி – http://youtu.be/_QzDFtWVf3c

    பாடல் – படைத்தானே பிரம்மதேவன்
    படம் – எல்லோரும் நல்லவரே
    பாடல் – கண்ணதாசன்
    பாடியவர் – எஸ்.பி.பாலசுப்ரமணியம்
    இசை – வி.குமார்
    பாடலின் சுட்டி – http://youtu.be/qamttiCClsc

    பாடல் – அழகே பிரம்மனிடம் மனு
    படம் – தேவதையைக் கண்டேன்
    பாடல் – பா.விஜய்
    பாடியவர்கள் – ஹரீஷ் ராகவேந்திரா, கங்கா
    இசை – தேவா
    பாடலின் சுட்டி – http://youtu.be/lrCW8fOcXVQ

    பாடல் – அண்ணாமல அண்ணாமல
    படம் – அண்ணாமலை
    பாடல் – வைரமுத்து
    பாடியவர்கள் – எஸ்.பி.பாலசுப்ரமணியம், சித்ரா
    இசை – தேவா
    பாடலின் சுட்டி – http://youtu.be/OQ3RdFU5vsQ

    பாடல் – வானத்தையே எட்டி புடிப்பேன்
    படம் – வழக்கு எண் 18/9
    பாடல் – நா.முத்துக்குமார்
    பாடகர் – தண்டபாணி
    இசை – ஆர்.பிரசன்னா
    பாடலின் சுட்டி – http://youtu.be/a-ohRTF8CeI

    பாடல் – பெண்ணொருத்தி பெண்ணொருத்தி
    படம் – ஜெமினி
    பாடல் – வைரமுத்து
    இசை – பரத்வாஜ்
    பாடியவர் – எஸ்.பி.பாலசுப்ரமணியம்
    பாடலின் சுட்டி – http://youtu.be/XNiS5Zxj_RY

    பாடல் – பிரம்மா உன் படைப்பினிலே(வாடா வாடா பையா)
    படம் – கச்சேரி ஆரம்பம்
    பாடல் – திரைவாணன் (இயக்குனர்)
    பாடியவர் – கார்த்திகேயன் எம்.ஐ.ஆர், அந்திதா
    இசை – டி.இமான்
    பாடலின் சுட்டி – http://youtu.be/ho-4PCJnQ6k

    பாடல் – பெண்ணே நீயும் பெண்ணா
    படம் – பிரியமான தோழி
    பாடல் – பா.விஜய்
    பாடியவர்கள் – கல்பனா, உன்னி மேனன்
    இசை – எஸ்.ஏ.ராஜ்குமார்
    பாடலின் சுட்டி – https://www.youtube.com/watch?v=KSM9aCJFVTo

    பாடல் – மணியே மணிக்குயிலே
    படம் – நாடோடித் தென்றல்
    பாடியவர்கள் – எஸ்.ஜானகி, மனோ
    பாடல் & இசை – இளையராஜா
    பாடலின் சுட்டி – http://youtu.be/UNIb8Pblu7w

    பாடல் – ஒரு பொன் மானை நான் காண
    படம் – மைதிலி என்னைக் காதலி
    பாடியவர் – எஸ்.பி.பாலசுப்ரமணியம்
    பாடல் & இசை – டி.ராஜேந்தர்
    பாடலின் சுட்டி – http://youtu.be/S-XvP9p9mOs

    பாடல் – டெலிபோன் மணிபோல் சிரிப்பவள் இவளா
    படம் – இந்தியன்
    பாடியவர் – ஹரிணி, ஹரிஹரன்
    பாடல் – வைரமுத்து
    இசை – ஏ.ஆர்.ரகுமான்
    பாடலின் சுட்டி – http://youtu.be/SfHbknfOOuA

    அன்புடன்,
    ஜிரா

    225/365

     
    • மணிகண்டன் துரை 2:19 pm on July 14, 2013 Permalink | Reply

      அருமையான பதிவு

    • rajinirams 2:49 pm on July 14, 2013 Permalink | Reply

      அடடா பிரமாதம். எல்லா பாடல்களுமே சூப்பர். புதியவன் படத்தில் வைரமுத்துவின் “நானோ கண் பார்த்தேன்” பாடலில் பருவம் அடடா பஞ்சம் இல்லை,அடடா பிரம்மன் அவன் கஞ்சன் இல்லை என்று வரும். எல்லோரும் நல்லவரே பாடல் படைத்தானே பிரம்மதேவன் பாடல் கவியரசர் கண்ணதாசன் எழுதியது. (பகை கொண்ட உள்ளம்,சிகப்புகல்லு போன்றவை புலமைப்பித்தன் எழுதியவை).திருவருள் படத்தில் வரும் கந்தன் காலடியை பாடலில் “அதனால் கந்தனிடம் பிரம்மனும் மிரளுவான்” என்ற வரி வரும். நன்றி.

    • amas32 5:49 pm on July 14, 2013 Permalink | Reply

      எத்தனை எத்தனைப் பாடல்களைத் தேடி எடுத்து அடுக்கியிருக்கிறீர்கள்! படைப்புக் கடவுளான பிரம்மா சும்மா இல்லை! 🙂 அவருக்குக் கோவிலோ வழிபாடோ இல்லை என்றாலும் திரைப் பாடல்கள் அவரை துதிப்பது அவருக்குப் பெருமை தான் 🙂

      amas32

  • mokrish 12:10 pm on May 31, 2013 Permalink | Reply  

    எங்கே எந்தன் காதலி 

    ஆண்கள் காதல் வந்ததும் (அல்லது அதற்கு முன்பே) காதலியைப்  பற்றி  ‘இவ  என்  ஆளு’ என்று நண்பர்களிடம் சொல்வதுண்டு. நேரடியாகவோ அல்லது வர்ணித்தோ இந்த அறிமுகம் நடக்கும். அல்லது தனிமையில் காதலியை நினைத்து  உருகுவதும் உண்டு. இப்படி நிறைய பாடல்கள் திரைப்படங்களிலும் உண்டு. வித்தியாசமான காதலியை அறிமுகம் செய்யும் சில வரிகளைப்  பார்க்கலாம்

    வாலி எழுதிய உன்னிடம் மயங்குகிறேன் என்ற பாடலில் (படம்: தேன் சிந்துதே வானம் இசை: வி.குமார் பாடியவர்:  கே.ஜே.ஜேசுதாஸ்)

    https://www.youtube.com/watch?v=PYhF-ipC2Jw

    உன்னிடம் மயங்குகிறேன்

    உள்ளத்தால் நெருங்குகிறேன்

    எந்தன் உயிர் காதலியே

    இன்னிசை தேவதையே

    ஒரு பெண் பற்றிய வர்ணனை போல்தான் இருக்கிறது. காதலியைப்பற்றி சொல்ல ஆரம்பித்து ‘இன்னிசை தேவதையே’ என்கிறார். தொடர்ந்து ‘வஞ்சி உன் வார்த்தையெல்லாம் சங்கீதம்’ என்று இன்னொரு clue கொடுக்கிறார். கவிஞருக்கு இசைமீதுதான் முதல் காதல்.. இதே கருத்தை மீண்டும் இன்னொரு  பாடலிலும் சொல்கிறார். தங்கத்திலே வைரம் படத்தில் (இசை சங்கர் கணேஷ் பாடியவர்கள் கே.ஜே.ஜேசுதாஸ், SPB)

    https://www.youtube.com/watch?v=nmvOZg0usCQ

    என் காதலி யார் சொல்லவா

    இசையென்னும் பெண்ணல்லவா

    ராக தாளங்களில் நல்ல பாவங்களில்

    நான் கொண்டாடும் கண்ணல்லவா

    யார் தன்  காதலி என்று வெளிப்படையாக சொல்கிறார். இசை மேல் அவருக்கு இருக்கும் அளவுகடந்த காதல் இதோடு திருப்தி அடையவில்லை. இன்னும் இன்னும் எழுதலாம் என்று நினைத்து முத்தான முத்தல்லவோ படத்தில் ஒரு பாடல் (இசை எம் எஸ் விஸ்வநாதன், பாடியவர்கள் எம் எஸ் விஸ்வநாதன், SPB)

    https://www.youtube.com/watch?v=n6D8REKB2ec

    எனக்கொரு காதலி இருக்கின்றாள் அவள்

    ஏழு சுரங்களில் சிரிக்கின்றாள்

    கீதம் அவளது வளையோசை

    நாதம் அவளது தமிழோசை

    இசைக்காதலி  கவிதைக் காதலனை எப்படி அணைத்து அன்பு காட்டுவாள்?  இங்கே வாலி விளக்குகிறார். எழுத்து வடிவில் உள்ள கவிதை இசை வடிவம் பெறும்போது அங்கே பஞ்சமம், தைவதம் எல்லாம் கொஞ்சும் இல்லையா?

    பஞ்சமம் பேசும் பார்வை இரண்டும்

    பஞ்சணை போடும் எனக்காக

    தைவதம் என்னும் திருமகள் மேனி

    கைகளை அணைக்கும் இனிதாக

    இசையை விரும்பும் காதலிக்கும் அனைவருக்கும் பொருந்தும் வரிகள். இன்னும் சொல்கிறார்

    என்னுடன் வாழும் இன்னொரு ஜீவன்

    மெல்லிசையாகும் என்னாளும்

    காதலியை ‘என்னை மயக்கிய மெல்லிசையே’ என்று சொல்வது ஒருவகை. இசையே என் காதலி என்று சொல்வது கொஞ்சம் வித்தியாசம்தான்

    மோகனகிருஷ்ணன்

    181/365

     
    • anonymous 11:10 pm on June 2, 2013 Permalink | Reply

      அழகான பதிவு @mokrish
      இசை – காதல் : ரெண்டுமே very complicated, but very pleasurable:)

      //கவிஞருக்கு இசைமீதுதான் முதல் காதல்//

      egg-jactly:)
      காதலி அருகில் இல்லாத போதும், உடலையும்/ மனதையும் பார்த்துக் கொள்வது “இசை” தானே!
      அம்புட்டு ஏன்? காதலி அருகில் இருக்கும் போது கூட, இசையை ஓட விட்டுக், காதல்/கலவி செய்வது தான் பேரின்பமாம்!:)

      அய்யோ; என்னை மொறைக்காதீக; சொல்லுறது இளங்கோவடிகள்!
      —–

      மாதவி அறிமுகம் ஆகுறா கோவலனுக்கு!
      அப்போ, மாதவி மேல, ஆரம்பத்திலேயே வருத்தமாம் அவனுக்கு! = ஏன்?

      மாதவியின் உடல் பாகங்களால், இசைக் கூறுகள் எல்லாம் அழிஞ்சி போயிருதாம்; அதனால் கோவலனுக்குச் சோகமாம்:))

      எண்ணும் எழுத்தும் இயல்-ஐந்தும் பண்-நான்கும்
      பண்-நின்ற கூத்துப் பதினொன்றும்– மண்ணின்மேற்
      போக்கினாள் பூம்புகார்ப் பொற்றொடி மாதவிதன்
      வாக்கினால் ஆடரங்கின் வந்து….

      பண், இயல் -ன்னு எல்லாத்தையும் “போக்கிட்டாளாம்”; மண்ணின் மேல் இதையெல்லாம் போக்கிட்டாளே மாதவி… ச்சே -ன்னு வருத்தம் இசை-ஆர்வலன் கோவலனுக்கு:)
      அழகான சிலப்பதிகார வெண்பா!

      • anonymous 11:33 pm on June 2, 2013 Permalink | Reply

        //எனக்கொரு காதலி இருக்கின்றாள் அவள்
        ஏழு சுரங்களில் சிரிக்கின்றாள்//

        MSV’s master piece!

        அவர் குரலில் இருக்குற “வீர்யத்துக்கு” முன்னாடி,
        SPB குரல் மாணவனா அடங்கீரும்:)
        திரைக் காட்சியிலும், மாணவன் – ஆசிரியர் கிட்ட, பயிற்சி வேண்டித் தான் வருவான்; தேங்காய் சீனிவாசன் கலக்கி இருப்பாரு! Piano & Violin combo!
        ——

        //பஞ்சமம் பேசும் பார்வை இரண்டும்
        பஞ்சணை போடும் எனக்காக
        தைவதம் என்னும் திருமகள் மேனி
        கைகளை அணைக்கும் இனிதாக//

        சரிகம-பதநிச
        இதில் ப = பஞ்சமம்; த = தைவதம்
        சேர்த்துப் படிங்க = பத(ம்)

        பதம் என்பதே “புணர்ச்சி”யால் வருவது; பகு-பதம்; பகாப்-பதம்
        பதமா நடந்துக்க -ன்னு சொல்லுறோம்-ல்ல?:) பதம் செய்த உணவு -ன்னும் சொல்லுறோம் அல்லவா?

        அப்படியொரு அனுபவம் குடுக்க வல்லது = பதம்!
        அதைப் ப-த -ன்னு எடுத்து
        பஞ்சமத்தை = பஞ்சணையாக்கி, தைவதம் = அவளாக்கி, படர விடக் கண்ணதாசனால் மட்டுமே முடியும்! மனுசன், இன்பத்தில் அப்படி ஆழமானவரு:))
        ——-

        சரிகம-பதநிச வில், எதுக்கு பஞ்சமம்-தைவதம் மட்டும் குறிப்பிட்டுச் சொன்னீங்க?-ன்னு, இசைக் கல்லூரியில் யாரோ கேட்டாங்களாம்;
        அப்போ, கண்ணதாசன் சொன்ன வெளக்கம் இது; நானா, அனுபவிச்சிச் சொல்லும் விளக்கம் -ன்னு தப்பா நினைச்சிக்காதீக:))

    • Saba-Thambi 5:56 pm on June 3, 2013 Permalink | Reply

      Another song your theme…
      Athisaya raagam
      (http://www.youtube.com/watch?v=O8PO18QQ5Gk)

  • mokrish 11:07 am on May 15, 2013 Permalink | Reply  

    குமரிப் பெண்ணும் குழந்தைப் பெண்ணும் 

    காற்றின் வகைகள் பற்றி நண்பர் @ragavanG எழுதிய பதிவில்  ‘குழந்தைகள் கூட குமரியும் ஆட’ என்ற வரியைப் படித்தவுடன்  இந்த குழந்தை / குமரி வார்த்தைகள் ஜோடியாக  மற்ற பாடல்களிலும் வந்திருக்கிறதே என்று தோன்றியது. அப்புறம் நண்பர் @narraju எழுதிய அம்மானை பதிவில் கதாநாயகியை ஒரு குழந்தையாக பாவித்துக் காதலன் ‘பிள்ளைத் தமிழ்’  பாடுவது பற்றி படித்தவுடன் ஒரு சின்ன ஆராய்ச்சி.

    குழந்தை , குமரி ஒன்றாக வருவது முதல் எழுத்து ஒன்றி வரும் மோனை நயத்துக்காக மட்டும்தானா? அல்லது பெண்ணின் வெவ்வேறு நிலைகள் சொல்ல எழுதியதா? அல்லது வேறு பொருள் சொன்னதுண்டா?

    வைரமுத்து இதை வர்ணனை / காதல் / சிறுமி குமரியாகும் மாற்றம்  என்ற வட்டத்தில் பல பாடல்களில் உபயோகிக்கிறார். சிவாஜி படத்தில் வரும் வாஜி வாஜி என் ஜீவன் என்ற பாடலில் (இசை ஏ ஆர் ரஹ்மான் பாடியவர்கள் ஹரிஹரன், மதுஸ்ரீ ) http://www.youtube.com/watch?v=M7Et_8BgKFU

    அடடடா குமரியின் வளங்கள், குழந்தையின் சிணுங்கல்

    முரண்பாட்டு மூட்டை நீ

    என்று ஒரு வரி. அலைபாயுதே படத்தில் காதல் சடுகுடு பாடலில் (இசை ஏ ஆர் ரஹ்மான் பாடியவர்கள் SPB சரண், நவீன் ) http://www.youtube.com/watch?v=rmxs7b9Y5HE

    ஓஹோ.. பழகும் போது குமரியாகி என்னை வெல்வாய் பெண்ணே படுக்கையறையில் குழந்தையாகி என்னை கொல்வாய் கண்ணே

    என்று வரிகள். தாஜ்மஹால் படத்தில் சொட்ட சொட்ட நனையுது (இசை ஏ ஆர் ரஹ்மான் பாடியவர் சுஜாதா  ) https://www.youtube.com/watch?v=VsWo2pVYSnQ

    உனக்காக உயிர் பூத்து நின்றேன் உனக்காக கன்னிகாத்து நின்றேன்

    இன்னும் நானும் சிறுமிதான் எப்போதென்னைப் பெண் செய்குவாய்

    என்ற வரிகள் – இப்படி சிறு வட்டத்தில் சுழல்கிறார்.

    கண்ணதாசன் பார்வை வேறு. கை கொடுத்த தெய்வம் படத்தில் வரும் ஆயிரத்தில் ஒருத்தியம்மா நீ என்ற பாடலில் (இசை கே வி மகாதேவன், பாடியவர் டி எம் சௌந்தரராஜன் ) http://www.youtube.com/watch?v=NG7YOfSz8-A

    உலகம் அறிந்திடாத பிறவியம்மா நீ

    பார்வையிலே குமரியம்மா

    பழக்கத்திலே குழந்தையம்மா

    என்று ஒரு வெகுளிப்பெண் பற்றி சொல்வது போல அழகான  வரிகள்.  அரங்கேற்றம் படத்தில் வரும் ஆண்டவனின் தோட்டத்திலே அழகு சிரிக்குது என்ற பாடலில் (இசை வி குமார் பாடியவர் பி சுசீலா) வரும் கண்ணதாசனின் வரிகள் ஒரு பெண்ணுக்கு இந்த சமுகத்தில் வெவ்வேறு நிலைகளில் உள்ள constraints என்ன என்று சொல்கிறது.

    குழந்தையிலே சிரிச்சதுதான் இந்த சிரிப்பு

    அதை குமரிப் பொண்ணு சிரிக்கும்போது என்ன வெறுப்பு

    அக்னி சாட்சி என்ற படத்தில் வாலியின் வரிகளை MSV இசையில் SPB பாடும் கனாக் காணும் கண்கள் மெல்ல என்ற பாடலில் http://www.youtube.com/watch?v=rPuFA8wSEwU

    குமரி உருவம் குழந்தை உள்ளம்

    ரெண்டும் ஒன்றான மாயம் நீயோ

    தலைவன் மடியில் மகளின் வடிவில்
    தூங்கும் சேயோ!

    நாயகி பெரும் மனக்குழப்பத்தில் இருக்கும்போது நாயகன் அவளை அமைதிப்படுத்த பாடும் ஒரு தாலாட்டு. வாலிக்கு ஜே!

    அதே இரண்டு வார்த்தைகள். ஆனால் வேறு வேறு கோணங்கள். பார்வைகள். Interesting!

    மோகனகிருஷ்ணன்

    165/365

     
    • amas32 11:19 am on May 15, 2013 Permalink | Reply

      What a beautiful collage you create by picking lines from various songs! குழந்தை வளர்ந்து குமரியாகிறாள். அதனால் குமரிக்குள் சிறு குழந்தை இன்னும் ஒளிந்துகொண்டு இருப்பது ஆச்சர்யம் இல்லை. அதுவே குமரிக்குள் அதிகக் குழந்தைத்தனம் இருந்தால் மன வளர்சிக் குன்றியவராகக் கருதிவிடுவோம். சரியான விகிதாச்சாரத்தில் இருந்தாலே ரசிக்க முடியும். குழந்தையாக இருக்கும்போதே குமரியாக நடந்துகொண்டாலும் பிஞ்சில பழுத்துவிட்டது என்ற அவப் பெயர் தான் மிஞ்சும்.

      ஆனாலும் கவிஞர்களுக்கு எப்பவுமே poetic liberty உண்டு, இந்த மாதிரி எழுத 🙂
      அருமையான பதிவு!

      amas32

    • vaduvurkumar 11:28 am on May 15, 2013 Permalink | Reply

      நல்ல ஆராய்ச்சி.

    • ராஜூ 7:44 pm on May 15, 2013 Permalink | Reply

      உங்களுக்கு சும்மா டக்கு டக்குன்னு வந்து விழுகுதுங்க வரிகள்! கலக்கல்.

    • rajnirams 10:56 am on May 16, 2013 Permalink | Reply

      அருமை.ரிதம் படத்தில் நதியே நதியே பாடலின் வரிகளும் அருமையாக இருக்கும்.”சமைந்தால் குமரி,மணந்தால் மனைவி ,பெற்றால் தாயல்லோ”.நன்றி.

    • GiRa ஜிரா 11:02 pm on May 16, 2013 Permalink | Reply

      குமரியோ குமரனோ… ஒருவர் மடியில் ஒருவர் விழும் போது குழந்தைதான்.

      நானொரு குழந்தை நீயொரு குழந்தை
      ஒருவர் மடியிலே ஒருவரடி – கவிஞர் வாலி

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel