Updates from October, 2013 Toggle Comment Threads | Keyboard Shortcuts

  • என். சொக்கன் 3:33 pm on October 19, 2013 Permalink | Reply  

    விஸ்வநாதன், நெல் வேண்டும்! 

    • படம்: காதலிக்க நேரமில்லை
    • பாடல்: விஸ்வநாதன், வேலை வேணும்
    • எழுதியவர்: கண்ணதாசன்
    • இசை: விஸ்வநாதன், ராமமூர்த்தி
    • பாடியவர்: பி. பி. ஸ்ரீனிவாஸ்
    • Link: http://www.youtube.com/watch?v=VndSgJLoKkU

    மாடி மேல மாடி கட்டி

    கோடி கோடி சேர்த்துவிட்ட சீமானே!

    ஆளு அம்பு சேனை வெச்சு, காரு வெச்சு

    போரடிக்கும் கோமானே!

    பழந்தமிழ் நாட்டில் மாடு கட்டிப் போரடித்தால் கட்டுப்படியாகாது என்று யானை கட்டிப் போரடித்ததாகச் சொல்வார்கள். ஆனால் இந்தப் பாட்டில் வருகிற விஸ்வநாதன் என்ற சீமான் Car வைத்துப் போரடித்ததாக எழுதுகிறார் கண்ணதாசன்.

    மாடோ, யானையோ, காரோ, போரடித்தல்ன்னா என்ன?

    நானும் பார்த்ததில்லை. படித்துத் தெரிந்துகொண்டதைச் சொல்கிறேன்.

    நெல்வயலில் இருந்து கதிர்களை அறுவடை செய்தபிறகு, அவற்றிலிருந்து தானிய மணிகளைப் பிரித்து எடுத்தால்தானே அரிசி கிடைக்கும்? அதற்காக, அறுத்த கதிர்களைக் கையில் பிடித்து அடிப்பார்கள், அவற்றிலிருந்து நெல் மணிகள் மொத்தமாகக் கீழே விழும்.

    ஆனால் அப்போதும், சில நெல் மணிகள் பிடிவாதமாகக் கதிரிலேயே ஒட்டிக்கொண்டிருக்கும். அவற்றை ஒவ்வொன்றாகப் பிரித்து எடுக்கவா முடியும்?

    அதற்காக, அடித்து முடித்த கதிர்களையெல்லாம் ஒரு களத்தில் வட்டமாகப் பரப்பிவைப்பார்கள். அதன்மீது மாடுகளை நடந்துவரச் செய்வார்கள். அவை மிதிக்க மிதிக்க, கதிர்களில் மீதமுள்ள நெல்மணிகள் அனைத்தும் உதிர்ந்துவிடும். இதற்குதான் போரடித்தல் அல்லது சூடடித்தல் என்று பெயர்.

    விளைந்த நெற்கதிர்களின் அளவு குறைவாக இருந்தால், மாடுகளை மிதிக்கச் சொல்லலாம். நிறைய்ய்ய்ய்ய இருந்தால்? அதற்குப் பெரிய யானைகளோ கார்களோ தேவைப்படும் என்று பாடல்களில் புலவர்கள் உயர்வு நவிற்சி அணியாக மிகைப்படுத்திச் சொல்லிப் புகழ்கிறார்கள்!

    இதற்குமேல் இந்த விஷயத்தை விவரித்தால் bore அடித்துவிடும்!

    ***

    என். சொக்கன் …

    19 10 2013

    321/365

     
    • lotusmoonbell 5:09 pm on October 19, 2013 Permalink | Reply

      கிராமப்புரங்களில் பெரும்பாலும் ராகிக் கதிர்களை சாலைகளில் பரப்பி விடுவதைப் பார்த்திருக்கிரேன். கார், லாரிகள்தான் ‘போரடி’க்கின்றன.

    • Saba-Thambi 8:10 pm on October 19, 2013 Permalink | Reply

      நன்றாக சூடு மிதித்திருக்கிறீர்கள். பாரட்டுக்கள்!

    • rajinirams 11:00 pm on October 19, 2013 Permalink | Reply

      கார் வெச்சு போரடிக்கும் கோமானே வார்த்தையை வைத்து”போரடிக்காத” நல்ல சுவாரஸ்யமான பதிவை போட்டிருக்குறீர்கள். சூப்பர்

    • amas32 9:37 am on October 20, 2013 Permalink | Reply

      Like Lotusmoonbell has mentioned, roads near villages will be strewn with gains and cars and lorries will do the work of oxen. But now even that is missing. I think all agricultural land are being converted to residential plots 😦

      amas32

    • Anany 9:20 pm on October 22, 2013 Permalink | Reply

      //நானும் பார்த்ததில்லை. படித்துத் தெரிந்துகொண்டதைச் சொல்கிறேன்.// enna koduma sir ithu,
      ungalukke theriyavillai endral indraiya ilaiya thalaimuraiyin kadhi ? ippadithan ellavatrayum izhanthu kondirukkirom

  • mokrish 9:13 pm on October 17, 2013 Permalink | Reply  

    நான் யார் நான் யார் 

    சில வாரங்களுக்கு முன் எனக்கு LinkedIn லிருந்து ஒரு தகவல் (மறுபடியும்!) வந்தது – அதாவது நான் slideshare ஐ பயன்படுத்தி  என்னுடைய Profile க்கு ஒளி, ஒலி, கலர் பலூன், சீரியல் லைட் எல்லாம் சேர்த்து இன்னும் மேம்படுத்தலாம்.  ‘பாருங்கள் இவர் எப்படி செய்திருக்கிறார், இது ரொம்ப சுலபம்’ என்று படம் வரைந்து விளக்கம் எல்லாம் இருந்தது.

    இதுதான் இப்போது Trend ஆ அல்லது இது வெறும் மேல்பூச்சு வேலையா என்று தெரிந்து கொள்ள கொஞ்சம் ஆர்வம். HR நண்பர் ஒருவரிடம் பேசினேன். ‘இது போல வித்தியாசமான விண்ணப்பங்கள்  ஒரு சதவிகிதத்திற்கும் குறைவே.  சிலர் தன் வீர தீர பராக்கிரமங்களை  வீடியோ பதிவாக கொடுப்பதும் உண்டு. இவை தனித்து நிற்பதால் முதல் கட்டத்தை கடப்பது சுலபம்’ என்றார். மேலும் வள்ளுவர் சொன்ன

    இதனை இதனால் இவன்முடிக்கும் என்றாய்ந்

    ததனை அவன்கண் விடல்

    என்பது சுலபமில்லை. Hire for Attitude Train for skills என்பதால் வெறும் காகிதமாக இல்லாமல் Attitude , உடல் மொழி, பேசும் திறன், அணுகுமுறை, presentation திறன்  பற்றி சொல்லும் இந்த முறை விரும்பத்தக்கதே என்றும் சொன்னார்.

    திரையுலகிலும் இப்போது குறும்படங்களே தகுதி சான்றிதழ் என்றாகி விட்டது. இப்படியே போனால் நேர்முகத் தேர்வில் ஒருவர் ஆடிப் பாடலாமா? என்ன பாடல் சரியாக இருக்கும் என்று ஒரு (ஜாலியான)  யோசனை. படித்தால் மட்டும் போதுமா என்ற படத்தில் கண்ணதாசன் எழுதிய (இசை விஸ்வநாதன் ராமமூர்த்தி பாடியவர்கள் டி எம் எஸ் , பி பி ஸ்ரீநிவாஸ்)

    http://www.youtube.com/watch?v=-Bk08LHMcok

    நல்லவன் எனக்கு நானே நல்லவன்

    சொல்லிலும் செயலிலும் நல்லவன்

    உள்ளம் சொன்னதை மறைத்தவன் இல்லை

    ஊருக்கு தீமை செய்தவனில்லை

    வல்லவன் ஆயினும் நல்லவன்

    வரிகள் பொருந்துமா? அல்லது குடியிருந்த கோவில் படத்தில் வாலி  எழுதிய  கொஞ்சம் துள்ளலோடு இருக்கும் (இசை எம் எஸ் விஸ்வநாதன் பாடியவர்கள்  டி எம் எஸ் & குழுவினர்)

    http://www.youtube.com/watch?v=ZlhaOQSgD_M

    என்னை தெரியுமா என்னை தெரியுமா –

    நான் சிரித்து பழகி கருத்தை கவரும் ரசிகன்

    உங்கள் கவலை மறக்க கவிதை பாடும்

    கவிஞன் என்னை தெரியுமா

    நான் புதுமையானவன் உலகை புரிந்து கொண்டவன்

    நல்ல அழகை தெரிந்து மனதை கொடுத்து அன்பில் வாழ்பவன்

    என்ற வரிகள் சரியாக இருக்குமா?  இந்த குணங்களுடன் வரும் ஒருவரை நீங்கள் தேர்வு செய்வீர்களா?

    மோகனகிருஷ்ணன்

    319/365

     
    • amas32 9:31 pm on October 17, 2013 Permalink | Reply

      well, அழகிப் போட்டிகளிலும் மற்ற talent competition களிலும் ஒவ்வொருவரின் தனித் திறமையயை showcase செய்ய வேண்டியது அவசியம் ஆகிறது.

      இப்போ இருக்கிற போட்டிகள் நிறைந்த வேலை சூழலில் நாம் தனித்துத் தெரிந்தால் தான் வாய்ப்பு சதவிகிதம் அதிகம் ஆகிறது. ட்விட்டரிலேயே attractive DP gets more attention. ஒருவரின் கவனத்தை ஈர்த்தப் பின் நம் கடையை விரித்து சரக்கைக் காட்டலாம். அந்த முதல் வாய்ப்புக்குத் தான் இந்தக் குட்டிக்கரணம் எல்லாம்.

      //நல்லவன் எனக்கு நானே நல்லவன்

      சொல்லிலும் செயலிலும் நல்லவன்

      உள்ளம் சொன்னதை மறைத்தவன் இல்லை

      ஊருக்கு தீமை செய்தவனில்லை

      வல்லவன் ஆயினும் நல்லவன்//

      lovely lines 🙂

      amas32

    • lotusmoonbell 9:59 pm on October 17, 2013 Permalink | Reply

      எல்லாம் சரிதான்! சாதாரண வாழ்வில் நான் நல்லவன் என்று மிக நெருங்கியவர்களுக்குக் கூட புரிய வைப்பது ஹிமாலய சாதனையாக இருக்கிறது!என்ன சொல்கிறீர்கள்?

      • Uma Chelvan 3:11 am on October 18, 2013 Permalink | Reply

        மிக நெருங்கியவர்களுக்குக் புரிய வைபதுதான் கஷ்டம். மத்தவங்களுக்கு ஈசியா புரிஞ்ச்டும்.::::))))))

    • rajinirams 11:42 am on October 18, 2013 Permalink | Reply

      “உள்ளதை சொல்வேன் நல்லதை செய்வேன் வேறொன்றும் தெரியாது”என்று பாடிவிட்டு வேலைக்கு சேர்ந்து “பலே பாண்டியா”என்று பேரை வாங்கினாலும் அங்கு நடக்கும் அரசியலை பார்த்து நொந்து போய் “யாரை எங்கே வைப்பது என்று யாருக்கும் தெரியலே”ன்னு பாட ஆரம்பித்து விடுவார்:-))))

  • mokrish 1:00 pm on July 18, 2013 Permalink | Reply  

    நரை எழுதும் சுயசரிதம் 

    நண்பர் @nchokkan ட்விட்டரில் ‘35க்கப்புறம் 95கூட முக்கால் கிழம்தான்’ என்று எனக்கு சமாதானம் சொன்னார். விவாதம் முடிந்தாலும் அந்த முக்கால் கிழம் என்ற நிலை பற்றி அமைதியாக யோசித்தபோது கொஞ்சம் கவலை வந்தது. தொடர்ந்து சில தினங்கள் அதே யோசனை.

    முதுமை என்பது ஒரு பயம். உடலும் மனமும் தளர்ந்து, கை நடுங்கிக் கண் மறைந்து,  காதோரம் எட்டிப்பார்க்கும் நரை என்று முதுமை தரும் மாற்றங்கள் பல. நினைவு மங்கி எல்லாவற்றையும் மறக்க நேரிடலாம். இந்த நிலை சாபமா என்று தெரியவில்லை ஆனால் நிச்சயமாக வரம் இல்லை.

    ஆராதனை படத்தில் வைரமுத்து எழுதிய ஒரு குங்குமச் செங்கமலம் என்ற பாடலில் (இசை இளையராஜா பாடியவர்கள் எஸ் பி பாலசுப்ரமணியன் எஸ் ஜானகி)

    http://www.youtube.com/watch?v=Nx3opO-h8gg

    முதுமை ஒருநாள் நம்மை வந்து தீண்டும்

    மூன்றாம் காலில் நாம் நிற்க வேண்டும்

    முடியை பார்த்தால் முழு வெள்ளை

    என்று முதுமையின் அடையாளங்கள் சொல்கிறார்.

    ஒரு மெகா சைஸ் Hour glass ல் மேலிருந்து கீழே சரியும் மணலாக கண்ணுக்குத்தெரியாமல் நகரும் வருடங்கள் நம்மை மெதுவாக முதுமை நோக்கி செலுத்தும்.  கண்ணதாசன் போலீஸ்காரன் மகள் படத்தில் வரும் பாடலில்  (இசை எம் எஸ் விஸ்வநாதன் பாடியவர்கள் P B ஸ்ரீநிவாஸ் எஸ் ஜானகி) சொல்வது இதுதான்

    http://www.youtube.com/watch?v=H-V8ZciCTR4

    ஆண்டொன்று போனால் வயதொன்று போகும்

    அதற்கு முன்னாலே வா..வா..வா…

    அழகுடன் இளமை தொடர்ந்து வராது

    இருக்கின்ற போதே வா..வா..வா..

    இளமை இருக்கும்போது செய்ய வேண்டியவை என்று ஒரு Bucket List போடுகிறார்.

    நரை, தள்ளாட்டம் என்ற உடல் சார்ந்த அடையாளங்களைத் தாண்டி முதுமைக்கு வேறு ஒரு முக்கிய அடையாளம் உண்டு. அது தனிமை. கூட்டத்திலும் தனிமையாக உணரும் ஒரு மனோநிலை. வெள்ளிவிழா என்ற படத்தில் வாலி எழுதிய ஒரு பாடல் (இசை வி குமார் பாடியவர் எம் எஸ் விஸ்வநாதன்) வரிகள் இதோ

    https://www.youtube.com/watch?v=vvfLzYCmfug

    உனக்கென்ன குறைச்சல் – நீயொரு ராஜா..

    வந்தால் வரட்டும் முதுமை!

    தனக்குத்தானே துணையென நினைத்தால்

    உலகத்தில் ஏது தனிமை?

    கடந்த காலமோ திரும்புவதில்லை..

    நிகழ்காலமோ விரும்புவதில்லை..

    எதிர்காலமோ அரும்புவதில்லை..

    இதுதானே அறுபதின் நிலை..

    அந்த நாளில் அறுபதின் நிலை என்று பாடிவிட்டார். இப்போது வாழ்நாள் எதிர்பார்ப்பு அதிகரித்து 60ளில் தொடங்கி எண்பதுகளை கடந்து வாழும் பலர் மனதளவில் தனியாகவே உணர்கிறார்கள்.

    முதுமையை  எதிர்கொள்ள நாம் தயாராவதில்லை என்பதே உண்மை. காலத்தை நில் என்று சொல்ல முடிந்தால் , வயதாவதை நிறுத்த முடிந்தால் எப்படி இருக்கும்?

    மோகனகிருஷ்ணன்

    229/365

     
    • rajinirams 3:27 pm on July 18, 2013 Permalink | Reply

      பதிவு அருமை. மனம் இளமையாக இருந்தால் உடலும் இளமையாக இருப்பது போல் உணரலாம்.ஆசைக்கு வயதில்லை என்பதை ஐம்பதிலும் ஆசை வரும் என்று கவியரசர் எழுதினார். வயதானாலும். காதில நரைச்ச முடி கன்னத்துல குத்துது குத்துது.சுழியில படகு போல என் மனசு சுத்துது சுத்துது என்று வைரமுத்து எழுதியது போலவும் மற்றவர்களை மகிழ்விக்க முடியும்:-)), நன்றி.

    • GiRa ஜிரா 6:50 pm on July 19, 2013 Permalink | Reply

      வயதாவது… எல்லாரையும் அச்சுறுத்தும். இளமை குறையக் குறைய.. இரத்தத்தின் சூடு குறையக் குறைய.. உடலின் வேகம் குறையக் குறைய… முன்பு செய்த வேலைகளைக் கூட முழுமையாக செய்யமுடியாத நிலை வரவர ஒரு தொய்வு கூடும்.

      அதை விட முக்கியமாக தோற்றப் பொலிவின் குறைவு. அழகு குறையும். உடலின் கூடும் சதை. வெளுக்கும் முடி. குறையும் கண்பார்வை.

      ஆனால் இத்தனை இருந்தும்… கண்ணதாசன் சொன்னது போல…
      ஐம்பதிலும் ஆசை வரும்
      ஆசையுடம் பாசம் வரும்
      இதில் அந்தரங்கம் கிடையாதம்மா
      நாள் செல்ல நாள் செல்ல சுகம்தானம்மா

    • பொன்.முத்துக்குமார் 9:05 pm on July 19, 2013 Permalink | Reply

      “வயதாவதை நிறுத்த முடிந்தால் எப்படி இருக்கும்?”

      நல்ல கேள்வி. இதற்கு விடை தேடுகிறது “Tuck Everlasting” என்ற ஆங்கில திரைப்படம். பெரிய தத்துவ விசாரமெல்லாம் இல்லை. சாதாரண படம்தான். ஆனால் உங்கள் கேள்விக்கு அதில் பதில் கிடைக்கலாம். காந்தியாக நடித்த பென் கிங்ஸ்லி இதில் வில்லனாக. சுவாரஸ்யமான படம்.

      அன்புடன்
      பொன்.முத்துக்குமார்.

    • amas32 10:14 pm on July 19, 2013 Permalink | Reply

      பகவத் கீதையில் இரண்டாவது அத்தியாயத்தில் இறப்பு என்பது வேறொன்றும் இல்லை, ஓர் உடலை விட்டு இன்னொரு உடலுக்குச் செல்வது தான், அதற்கு ஏன் வருந்த வேண்டும் என்று கிருஷ்ணா பரமாத்மா கேட்பார். அந்த ஸ்லோகத்திலியே குழந்தை பருவத்தைக் கடந்து இளமை பருவத்தை அடைகிறோம், அடுத்து அதை முடித்து முதுமை பிராயாத்தை அடைகிறோம். ஒவ்வொன்றும் ஒரு வித இறப்பே, அதற்கெல்லாம் வருந்தி அழாத நாம் ஒரு உடல் மடியும் போது மட்டும் அழுவது ஏனோ என்று வினவுகிறார். கிழிந்த சட்டையை தூக்கி எறிந்து விட்டு புது உடையை நாம் நாடுவது போல தான் பழைய உடலை விடுத்துப் புதிய உடலுக்குள் புகுவதும்.

      ஆதலால் மூப்பு தவிர்க்க முடியாதது 😦 :-))

      amas32

  • என். சொக்கன் 8:11 pm on July 11, 2013 Permalink | Reply  

    காய் நிலவும் கனி நிலவும் 

    • படம்: பலே பாண்டியா
    • பாடல்: அத்திக்காய் காய் காய்
    • எழுதியவர்: கண்ணதாசன்
    • இசை: விஸ்வநாதன், ராமமூர்த்தி
    • பாடியவர்கள்: டி. எம். சௌந்தர்ராஜன், பி. சுசீலா, பி. பி. ஸ்ரீனிவாஸ், ஜமுனா ராணி
    • Link: http://www.youtube.com/watch?v=muWBARd3oAk

    அத்திக்காய் காய் காய், ஆலங்காய் வெண்ணிலவே,

    இத்திக்காய் காயாதே, என்னைப்போல் பெண்ணல்லவோ!

    கன்னிக்காய், ஆசைக்காய், காதல் கொண்ட பாவைக்காய்,

    அங்கே காய், அவரைக் காய், மங்கை எந்தன் கோவைக்காய்!

    ஒரு படை வீரன், கடமை அழைக்க, போர்க்களத்துக்குச் சென்றுவிடுகிறான்.

    அவனைப் பிரிந்து வாடும் காதலி, தவிக்கிறாள், துடிக்கிறாள், வானத்தில் இருக்கும் முழுச் சந்திரனும் அவளுக்குச் சூரியனைப்போல் சுடுகிறது. அதைப் பார்த்துப் பேசுகிறாள்:

    ‘அத்திக்காய்க் காய் காய், ஆலங்காய் வெண்ணிலவே,

    இத்திக்காய்க் காய்ந்துனக்கு என்ன பயன்?’

    இங்கே அத்திக்காய், ஆலங்காய் என்பவை காய்களின் பெயர்கள் அல்ல, ’ஆலத்தைப்போலக் (அதாவது, விஷத்தைப்போலக்) காய்கிற (அதாவது, சுடுகிற) வெண்ணிலவே, அத் திக்காய் (அதாவது, அந்தத் திக்காக, என் காதலன் இருக்கும் அந்தத் திசையில்) சென்று காய்வாயாக, இத் திக்காய் (அதாவது, இந்தத் திக்கில், நான் இருக்கும் இந்தத் திசையில்) மட்டும் காய்வதால் உனக்கு என்ன பயன்?’ என்கிறாள் அந்தப் பெண்.

    இதன் அர்த்தம், ’நிலவே, நீ என்னையே சுட்டுகிட்டிருக்கியே, என்னைப் பிரிவுத் துன்பத்தில வாடவைக்கற அந்தக் காதலன் இருக்கற திசையிலும் போ, அவனையும் கொஞ்சம் நல்லாச் சுடு, அப்போதாவது அந்தப் பயலுக்கு என் ஞாபகம் வருதான்னு பார்ப்போம்!’

    அவள் அதோடு நிறுத்தவில்லை, ‘பற்றில் அவரைக் காய், கோவைக் காய்’ என்கிறாள். அதாவது, (என்மீது) பற்று இல்லாத என் காதலனைச் சுடு, அவனைப் போருக்கு அழைத்துச் சென்ற அவனுடைய தலைவன் (கோ) இருக்கிறானே, அவனையும் சுடு!’

    இத்தனை சூட்டையும், ஒரு சந்தோஷமான காதல் பாட்டுக்குள் கண்ணதாசன் எப்படிக் கச்சிதமாக இறக்கியிருக்கிறார் என்று மேலே படித்துப் பாருங்கள்!

    ***

    என். சொக்கன் …

    11 07 2013

    222/365

     
    • ranjani135 8:41 pm on July 11, 2013 Permalink | Reply

      அருமை, அருமை!

    • Uma Chelvan 9:00 pm on July 11, 2013 Permalink | Reply

      OMG, I never Thought that this song means this way !!! ’நிலவே, நீ என்னையே சுட்டுகிட்டிருக்கியே, என்னைப் பிரிவுத் துன்பத்தில வாடவைக்கற அந்தக் காதலன் இருக்கற திசையிலும் போ, அவனையும் கொஞ்சம் நல்லாச் சுடு, அப்போதாவது அந்தப் பயலுக்கு என் ஞாபகம் வருதான்னு பார்ப்போம்! Wonderful!!.excellent.

    • ranjani135 10:00 pm on July 11, 2013 Permalink | Reply

      அன்புள்ள திரு சொக்கன்,
      இந்த கட்டுரையின் இணைப்பை எனது தளத்தில் பகிர்கிறேன், உங்கள் சம்மதத்துடன்.
      அன்புடன்,
      ரஞ்சனி

    • Arun Rajendran 11:08 pm on July 11, 2013 Permalink | Reply

      இந்தப் பாட்டுல “கனியிருப்பக் காய் கவர்ந்தற்று” பொய்த்துப் போகிறதோ? 🙂

      ஆனா படமாக்குன விதம் தான் பாடலுக்குப் பொருந்தி வரல 😦

      நன்றிங்க சொக்கன் சார்

    • pvramaswamy 5:33 am on July 12, 2013 Permalink | Reply

      எனக்கு ரொம்பவும் பிடித்தப் பாடல். நான் பிறகு எப்போதாவது எழுதவேண்டும் என்று நினைத்திருந்தேன். உங்கள் எழுத்தில் இன்னும் ‘லாகவ’மாக ( நன்றி: @elavasam ) வந்திருக்கு. ஒரு குறை. பாட்டு முழுவதையும் விளக்கத்தோடு எழுதியிருக்கலாம்.

    • Saba-Thambi 10:47 am on July 12, 2013 Permalink | Reply

      பாடல் முழுவதும் வரும் காய்கள் அத்தனையும் சிலேடை தானே ?

      அல்லது ஒரே சொல் பெயராகவும் வினையாகவும் அமையும் பதமா?

    • amas32 10:56 pm on July 12, 2013 Permalink | Reply

      எனக்கு மிகவும் பிடித்தப் பழைய பாடல் இது. பலமுறை கேட்டாலும் புதுசுப் போல தோன்றும். ஒவ்வொரு வரிக்கும் இரு பொருள்கள் வரும். அதுவும் கருத்தும் பாடலின் தேவைக்கேற்ப இருக்கும்.கவியரசரின் ரொம்ப நல்ல பாடல்களில் இதுவும் ஒன்று. நாலு வரி நாட்டிற்கு perfect song selection 🙂

      amas32

    • rajinirams 10:25 am on July 14, 2013 Permalink | Reply

      தமிழ் திரையுலகின் மிக முக்கியமான சிலேடை பாடல். தங்கள் விளக்கமும் அருமை.பாடல் முழுக்க கவியரசரின் கவித்திறமை பளிச்சிடும்.

    • Sakthivel 3:02 pm on July 17, 2013 Permalink | Reply

      என்ன ஓர் அர்த்தம் உள்ளே வைத்து இருக்கிறார்…!!! உண்மையில் மிக பெரும் பிரமிப்பை ஏற்படுத்திவிட்டார்.

  • mokrish 10:01 am on June 24, 2013 Permalink | Reply  

    ஆழக்கடலில் தேடிய முத்தையா 

    கவியரசு கண்ணதாசன். நாலு வரி நோட்டின் நாயகர்களில் முதன்மையானவர். இவரை ‘தமிழ்த் திரைப்படப் பாடலாசிரியர், கவிஞர், நான்காயிரத்திற்கும் மேற்பட்ட கவிதைகள், ஐந்தாயிரத்திற்கும் மேற்பட்ட திரைப்படப் பாடல்கள், நவீனங்கள், கட்டுரைகள் பல எழுதியவர்’ என்ற புள்ளி  விவரத்தில் அடைத்தால்  ஒரு முழுமையான பிம்பம் நிச்சயம் கிடைக்காது.

    திரைப்படப் பாடலாசிரியர் என்ற ஒரு பரிமாணத்தைப் பார்க்கலாம். நல்ல பாட்டு என்றால் இவர் எழுதியதாகவே இருக்கும் என்று தீர்மானமாக நம்பிய ஒரு தலைமுறை கொண்டாடிய கவிஞன். இவர் எழுதாத விஷயமே இல்லை என்றும் , அனுபவங்களையே பாட்டில் வைத்தார் என்று அவர் கவிதைகளை நேசித்தனர்.  அவரவர் வாழ்வின் எல்லா நிலைகளுக்கும் நிகழ்வுகளுக்கும் இவர் எழுதிய பாடல்களே reference. காதல், இலக்கியம், வாழ்வியல், தத்துவம், நாத்திகம்,அரசியல், புராணம், மதம் என்று எதை தொட்டாலும் இனிக்கும் நயம்.

    இதையெல்லாம் தாண்டி இன்னொரு காரணம் உண்டு. ஒரு மூன்று மணிநேர திரைப்படத்தின் கதையை, கருவை, காட்சியை ஒரு சில வரிகளில் கொண்டு வரும் திறமை.  பாடல் வரிகளுக்குள்  ஒரு விஷுவல் element. நெஞ்சில் ஓர் ஆலயம் படமும் பாடல்களும் இதற்கு சிறந்த உதாரணம் என்று நினைக்கிறேன்.

    படத்தின் கதை இதுதான். கல்யாண் குமாரும் தேவிகாவும் காதலர்கள். விதிவசத்தால் பிரிந்து, தேவிகா தான் மணந்து கொண்ட முத்துராமனின் நோயைக் குணப்படுத்த மருத்துவரிடம் செல்கையில், அவர் முன்னாள் காதலர் கல்யாண் குமார். கணவனுக்கும் இது தெரிந்துவிட, தான் இறந்தால் அவள் மறுமணம் செய்து கொள்ள வேண்டும் என்று விரும்பும் கணவன். இதைக்கேட்டு அதிர்ந்து போகும் மனைவி. படத்தில் வரும் நாலு பாடல்களில் வரும் சில வரிகளை கேளுங்கள்

     மருத்துவர்,  முன்னாள் காதலர்

     https://www.youtube.com/watch?v=_s8f6qlwY0k

    வருவாய் என நான் தனிமையில் நின்றேன்
    வந்தது வந்தாய் துணையுடன் வந்தாய்
    துணைவரைக் காக்கும் கடமையும் தந்தாய்

     கணவனுக்கு இது தெரிந்து, மறுமணம் பற்றி யோசிப்பது

    https://www.youtube.com/watch?v=20qUiIEdzkY

    ஆயிரம் வாசல் இதயம் அதில் ஆயிரம் எண்ணங்கள் உதயம்
    யாரோ வருவார் யாரோ இருப்பார் வருவதும் போவது தெரியாது
    ஒருவர் மட்டும் குடியிருந்தால் துன்பம் ஏதுமில்லை
    ஒன்றிருக்க ஒன்று வந்தால் என்றும் அமைதியில்லை
    பாதையெல்லாம் மாறிவரும் பயணம் முடிந்து விடும்
    மாறுவதை புரிந்து கொண்டால் மயக்கம் தெளிந்து விடும்

    மறுமணம் என்று கேட்டவுடன் பதறும் மனைவி

    https://www.youtube.com/watch?v=4WGVo1Zh3Yw

    சொன்னது நீ தானா சொல் சொல் சொல் என் உயிரே
    சம்மதம் தானா ஏன் ஏன் ஏன் என் உயிரே
    இன்னொரு கைகளிலே யார் யார் யார் நானா
    எனை மறந்தாயா ஏன் ஏன் ஏன் என் உயிரே
    சொன்னது நீ தானா சொல் சொல் சொல் என் உயிரே

    கணவன் தான் இறக்குமுன் அவளை மணக்கோலத்தில் வரச்சொல்லும் காட்சி. சத்தியவான் சாவித்திரி கதை சொல்கிறார்

    https://www.youtube.com/watch?v=9OlWrb-ntl8

    என்ன நினைத்து என்னை அழைத்தாயோ?

    ஏன் இந்த கோலத்தைக் கொடுத்தயோ?

    மாயப் பறவை ஒன்று வானில் பறந்து வந்து

    வாவென அழைத்ததைக் கேட்டாயோ

    பறவை பறந்து செல்ல விடுவேனோ?

    அந்தப் பரம்பொருள் வந்தாலும் தருவேனோ?

    உன்னை அழைத்துச் செல்ல எண்ணும் தலைவனிடம்

    என்னையே நான் தர மறுப்பேனா?

    நாலு பாடல்களில் படத்தின் கதை சொல்லும் வித்தை. மீட்டருக்கு மேட்டர் என்ற தளத்தில் சாகசம். அதற்குள் தத்துவம், இலக்கியம் சொல்லும் திறமை. அதுதான் கண்ணதாசன்.

    ‘பிறப்பின் வருவது யாதெனக் கேட்டேன்’ என்ற கவிதையில்

    http://tamilaavanam.blogspot.in/2012/11/Kannadasan-Kavithaigal.html

       அனுபவித்தேதான் அறிவது வாழ்க்கையெனில்

       ஆண்டவனே நீ ஏன்? எனக் கேட்டேன்!

       ஆண்டவன் சற்றே அருகு நெருங்கி

       “அனுபவம் என்பதே நான்தான்” என்றான்!

    என்று ஆண்டவனைப்பற்றி எழுதிய வரிகள் அவர் கவிதைகளுக்கும் பொருந்தும். அனுபவித்தால்தான் இனிமை.

    கவியரசர் பற்றி நிறைய செய்திகள், கட்டுரைகள், பாடல் உருவான விதம், ஆராய்ச்சிகள் என்று பல தகவல்கள். அதில் தேடியபோது ஒரு புதிய தகவல் படித்தேன். கவிஞர் மாலையிட்ட மங்கை என்ற படத்தில் எழுதிய ‘மழை கூட ஒரு நாளில் தேனாகலாம்’ https://www.youtube.com/watch?v=87pHmrrnrcs என்ற பாட்டை  சாகித்ய அகாதெமி 14 மொழிகளில் மொழிபெயர்த்து வெளியிட்டிருக்கிறது. இந்த பாடல் வரிகளை கேளுங்கள். சில ஆச்சரியங்கள்

    அவர் நிரந்தரமானவர். அவர் எழுதிய பாடல்களும்தான்

    மோகனகிருஷ்ணன்

    205/365

     
    • amas32 5:27 pm on June 24, 2013 Permalink | Reply

      எனக்கு இந்தப் பாடல் வரிகளை வரிசையாகப் படிக்கும் பொழுது புல்லரிக்கிறது. எவ்வளவு பெரிய மகா கவிஞன் கண்ணதாசன்!

      நாத்திகத்தில் இருந்து ஆத்திகத்திற்கு மாறியவர்கள் தான் ஆத்திகத்தின் உயர்வையும் பெருமையையும் பறை சாற்றும் வல்லமையை அதிகம் பெறுகிறார்கள். அதனால் தான் அர்த்தமுள்ள இந்துமதமும், ஏசு காவியமும் காலத்தால் அழிக்க முடியாதப் படைப்புகளாக இன்று உள்ளன். இன்று எத்தனையோ நல்ல கவிஞர்கள் தமிழ் நாட்டில் இருந்தாலும் என்னுடைய பேவரிட் கவியரசர் கண்ணதாசன் தான். அதற்கு இன்று நீங்கள் 4 வரி நோட்டில் கூறியுள்ள அனைத்துமே காரணம்.

      அவர் பாடல்களோ எளிமை, வரிகளிலிலோ புலமை! சந்த நயத்தோடு சிறுகூடல்பட்டி அம்பிகை அருள் பெற்ற அவர் நாவில் இருந்து விழும் வார்த்தைகள் அக்ஷர லட்சம் பெரும்.

      amas32

  • என். சொக்கன் 11:57 am on June 17, 2013 Permalink | Reply  

    கொடி அசைந்ததும்… 

    • படம்: போலீஸ்காரன் மகள்
    • பாடல்: நிலவுக்கு என்மேல் என்னடி கோபம்
    • எழுதியவர்: கண்ணதாசன்
    • இசை: விஸ்வநாதன் ராமமூர்த்தி
    • பாடியவர்: பி. பி. ஸ்ரீனிவாஸ்
    • Link: http://www.youtube.com/watch?v=BBEHY5WAbSc

    குலுங்கும் முந்தானை,

    சிரிக்கும் அத்தானை விரட்டுவ(து) ஏனடியோ?

    உந்தன் கொடி இடை இன்று,

    படைகொண்டு வந்து கொல்வவதும் ஏனடியோ!

    காதலியின் கொடி இடையைப் பார்த்தால், பெரும்பாலானோர் கிளுகிளுப்பாக உணர்வார்கள், அல்லது கிறுகிறுத்துப்போவார்கள், ஏனோ, இந்தக் காதலனுக்குமட்டும் அவள் இடையைப் பார்த்துக் கிலி பிடித்துவிடுகிறது!

    இடையைப் பார்த்தால் இச்சைதானே வரணும், அச்சம் ஏன் வந்தது? கண்ணதாசன் ஏன் இப்படி எழுதவேண்டும்?

    போர் வந்தால் இரு தரப்பினரும் கொடி பிடித்துச் செல்வார்கள், அதில் ஈடுபடுகிற தேர்களின்மீதும் அந்தந்த அரசர்களின் கொடி பறக்கும்.

    அதனால், இங்கே காதலியின் கொடி போன்ற இடையைப் பார்த்தவுடன், காதலனுக்குப் போர் ஞாபகம் வந்துவிடுகிறது. ’அடியே, இப்படிக் கொடி இடையை அசைத்து அசைத்து நடக்கிறாயே, இதன் அர்த்தம் என்ன? அடுத்து ஒரு பெரிய படையைக் கொண்டுவரப்போகிறாயா? என்மீது காதல் போர் தொடுக்கப்போகிறாயா?’ என்று கேட்கிறான்.

    ஒரு பெண்ணை வர்ணிக்கும்போது போர், ராணுவமெல்லாம் ஞாபகம் வரலாமா?

    தாராளமாக வரலாம். இந்த விஷயத்தில் கண்ணதாசனுக்கு முன்னோடிக் கவிஞர்கள் பலர் உண்டு. உதாரணமாக, புகழேந்தி எழுதிய நளவெண்பாப் பாடல் ஒன்றில், ஆட்சி இயல் சம்பந்தப்பட்ட அனைத்து அம்சங்களையும் பெண்மீது பொருத்திச் சொல்கிறார். இப்படி:

    நால்குணமும் நால் படையா, ஐம்புலனும் நல் அமைச்சா,

    ஆர்க்கும் சிலம்பே அணி முரசா, வேல் படையும்

    வாளுமே கண்ணா, வதன மதிக் குடைக் கீழ்

    ஆளுமே பெண்மை அரசு!

    தமயந்தி என்கிற பெண்ணை அன்னம் வர்ணிக்கிறது, ‘அவள் ஒரு பெரிய மஹாராணி, தெரியுமா?’

    ’நிஜமாகவா?’ நளன் ஆச்சர்யப்படுகிறான், ‘எந்த நாட்டுக்கு மஹாராணி?’

    ‘இன்னொரு நாடு தேவையா? அவளே ஒரு நாடு, அதற்கு அவளே மஹாராணி!’ என்கிறது அன்னம்.

    ’கொஞ்சம் விளக்கமாகச் சொல்லேன், ப்ளீஸ்!’

    ’அச்சம், மடம், நாணம், பயிர்ப்பு என்கிற பெண்மைக்குரிய நான்கு குணங்களும் அவளுக்கு உண்டு, அவையே அவளது நான்கு வகைப் படைகளைப்போல.’

    ‘வெறும் ராணுவம்மட்டும் போதுமா? அமைச்சர்கள் வேண்டுமே!’

    ‘கண், காது, மூக்கு, வாய், உடல் என்ற ஐந்து புலன்களும்தான் அவளுடைய அமைச்சர்கள்.’

    ’அப்படியானால், அரசர்களுக்கே உரிய முரசு?’

    ‘அதுவும் உண்டு! நடக்கும்போது சத்தமிடும் சிலம்புதான் அவளுடைய முரசு.’

    ’அரசர்கள் எப்போதும் வேல், வாள் போன்ற ஆயுதங்களை வைத்திருப்பார்களே.’

    ’அது இல்லாமலா? அவளுடைய ஒரு கண்ணில் வேல், இன்னொரு கண்ணில் வாள்.’

    ‘எல்லாம் சரி, வெண்கொற்றக் குடை?’

    ’நிலவு போன்ற அவளுடைய அழகிய முகம், அதைவிடச் சிறந்த வெண்கொற்றக் குடை எங்கே உண்டு?’

    ‘அப்படியானால்…’

    ’ராணுவமும் அமைச்சர் படையும் முரசும் ஆயுதங்களும் வெண்கொற்றக்குடையுமாக, தன்னுடைய பெண்மை அரசாங்கத்தை ஆட்சி செய்கிறாள் அந்தத் தமயந்தி!’

    ***

    என். சொக்கன் …

    198/365

     
    • rajnirams 12:26 pm on June 17, 2013 Permalink | Reply

      ஆஹா,பிரமாதம்.நளவெண்பா பாடலின் சுவையை அறிந்து கொண்டேன்.என்ன ஒரு வர்ணனை.”கொடியை”கட்சிக்காரர்களை விட இடையை வர்ணிக்க கவிஞர்கள் அதிகம் பயன்படுத்தி இருக்கிறார்கள் போலும்.”பூவறையும் பூங்கொடியே-வாலி. இடை ஒரு கொடி,இதழ் ஒரு கனி-கண்ணதாசன்,இடை நூலாடி செல்ல செல்ல ஓஹோ-வாலி.இது என்ன கூத்து அதிசயமோ-இளநீர் காய்க்கும் கொடி இதுவோ-வைரமுத்து இப்படி.

    • Arun Rajendran 3:00 am on June 18, 2013 Permalink | Reply

      சொக்கன் சார்,

      இன்று இடையிலக்கணமா?

      வண்ண மேகலைத் தேர் ஒன்று வாள் நெடுங்
      கண் இரண்டு கதி முலை தாம் இரண்டு
      உள் நிவந்த நகையும் என்று ஒன்று உண்டால்
      எண்ணும் கூற்றினுக்கு இத்தனை வேண்டுமோ!
      —–மிதிலைக் காட்சிப் படலம்

      ஆக, பெண்ணின் உடலே படைக்கலன் தான்..சிறுத்தக் கொடியிடை, மற்றப் போர் கருவிகளை அழகுற வெளிப்படுத்தும்..அத்தகைய மலர்கொடியிடை, ’பதாகை’ போன்று அசைந்து ”அந்திப்போர்” துவக்க வழிவகை செய்தலால் காதலன் சிறிது அச்சப்பட்டுதானே ஆக வேண்டும்?

      இவண்,
      அருண்

    • amas32 (@amas32) 2:28 pm on June 19, 2013 Permalink | Reply

      உடலே ஒரு கோவில் என்று கேள்விப்பட்டிருக்கிறேன். இங்கு பெண் உடலே ஒரு சாம்ராஜ்ஜியமாக வர்ணிக்கும் பாடலைக் கொடுத்திருக்கிறீர்கள். பெண்ணை வர்ணிக்கும் புலவனின் கண்ணிற்கும் கற்பனை வளத்திற்கும் இந்தப் பாடல்கள் ஒரு சிறந்த எடுத்துக்காட்டு.

      பெண்ணென்றால் பேயும் இறங்கும் என்ற பழமொழி பெண்ணிடம் இருக்கும் இந்த பவரினால் தானோ? :-)))

      amas32

    • freevariable 4:44 am on June 21, 2013 Permalink | Reply

      அடடா அருமை!

  • mokrish 9:27 am on June 12, 2013 Permalink | Reply  

    உன் குத்தமா என் குத்தமா 

    கதவு அல்லது நிலைப்படி இடித்தது, முள் குத்தியது என்று நாம் அடிக்கடி சொல்லும் / கேட்கும் இந்த வார்த்தைகளில் ஒரு உளவியல் ஆராய்ச்சி செய்யலாம். ‘இது என் தவறல்ல, வேறு யாரோ அல்லது வேறு எதுவோ தான் காரணம்’ என்று தீர்க்கமாக நம்பும் மனம் இப்படித்தான் யோசிக்கும். சாதாரணமாகவே இப்படியென்றால் காதலில் எப்படியிருக்கும்?

    தெரிந்துணரா நோக்கிய உண்கண் பரிந்துணராப்

    பைதல் உழப்ப தெவன்

    என்ற திருக்குறளில் காதலி கண்களைத்தான் குற்றம் சொல்கிறாள். கண்கள் செய்த குற்றத்தால்தானே காதல் நோய் ஏற்பட்டது. காதல் வரப்போவதை உணராமல் அன்று பார்த்துவிட்டு, இன்று அழுதால் எப்படி (புதிய உரை : சுஜாதா) என்று கடிந்துகொள்கிறாள்.

    இன்னொரு பாடல் முத்தொள்ளாயிரத்தில் பாண்டியன் காதலி தன் கண்ணே தனக்கு எதிராக செயல்பட்டால் என்ன செய்வது என்று புலம்புகிறாள்.

    கனவை நனவுஎன்று எதிர்விழிக்கும்; காணும்,

    நனவில் எதிர்விழிக்க நாணும் – புனையிழாய்

    என்கண் இவையானால் எவ்வாறோ மாமாறன்

    தண்கண் அருள்பெறுமா தான்.

    http://www.tamiloviam.com/unicode/printpage.asp?fname=02240508&week=feb2405

    திரைப்பாடல்களில் கண்ணதாசன் இதை பலமுறை எழுதியிருக்கிறார். வாழ்க்கை படகு என்ற படத்தில் வரும் கண்களே கண்களே என்ற பாடலில் (இசை விஸ்வநாதன் ராமமூர்த்தி பாடியவர் P B ஸ்ரீநிவாஸ்) http://www.youtube.com/watch?v=RggMJODLIac

    கண்களே கண்களே காதல் செய்வதை விட்டு விடுங்கள்

    பெண்களே பெண்களே வாலிபரை கொஞ்சம் வாழ விடுங்கள்

    நெஞ்சமே நெஞ்சமே நினைப்பதை இனிமேல் நிறுத்தி விடு

    மஞ்சமே மஞ்சமே மயக்கத்தை இனிமேல் மறந்து விடு

    என்று இன்னும் விரிவாக்கி கண்களையும் நெஞ்சையும் குற்றம் சொல்கிறார்.

    யாருக்கும் வெட்கமில்லை படத்தில் வரும் பாடலில் (இசை ஜி கே வெங்கடேஷ் பாடியவர் எஸ் ஜானகி) கவிஞரின் Charge Sheet இன்னும் பெரிது

    என் கண்கள் அன்று செய்த பாவம் பார்த்தது

    என் கனியிதழ்கள் செய்த பாவம் சிரித்தது

    என் இதயம் அன்று செய்த பாவம் நினைத்தது

    அந்த இறைவன் அங்கு செய்த பாவம் இணைத்தது

    கண்கள், இதழ்கள், இதயம், இறைவன் எல்லாம் சேர்ந்து செய்த பாவம் என்ற பாவனை.

    வைரமுத்து ரிதம் படத்தில் ‘யாரைக் கேட்டது இதயம் உன்னை தொடர்ந்து போக’ என்று காதலியின் சிணுங்கலையும் பூவெல்லாம் உன் வாசம் படத்தில்

    நெஞ்சே நெஞ்சே செல்வாயோ அவனோடு

    சென்றால் வரமாட்டாய் அதுதானே பெரும்பாடு’

    என்ற செல்லக் கோபத்தையும் சொல்கிறார்.

    ஆனந்த ஜோதி படத்தில் கண்ணதாசன் ‘நினைக்க தெரிந்த மனமே’ என்ற எவர் கிரீன் பாடல் (இசை எம் எஸ் விஸ்வநாதன் ராமமூர்த்தி பாடியவர் பி சுசீலா) முழுவதும் குற்றப்பத்திரிகை வாசிக்கிறார்.

    http://www.youtube.com/watch?v=L20DiHoF518

    நினைக்க தெரிந்த மனமே உனக்கு மறக்க தெரியாதா

    பழக தெரிந்த உயிரே உனக்கு விலக தெரியாதா…

    மயங்க தெரிந்த கண்ணே உனக்கு உறங்க தெரியாதா

    மலர தெரிந்த அன்பே உனக்கு மறையதெரியாதா

    எடுக்க தெரிந்த கரமே உனக்கு கொடுக்க தெரியாதா

    படிக்க தெரிந்த இதழே உனக்கு முடிக்க தெரியாதா

    இதில் மனம், உயிர், கண், அன்பு, கைகள் இதழ்கள் என்று சாடிவிட்டு அதோடு திருப்தியடையாமல்

    கொதிக்க தெரிந்த நிலவே உனக்கு குளிர தெரியாதா

    குளிரும் தென்றல் காற்றே உனக்கு பிரிக்க தெரியாதா

    பிரிக்க தெரிந்த இறைவா உனக்கு இணைக்க தெரியாதா

    இணைய தெரிந்த தலைவா உனக்கு என்னை புரியாதா…

    என்று ஒரு அந்தாதி டைப் chargesheet தருகிறார்.

    மேற்கத்திய நாடுகளில் இந்த தினம் அந்த தினம் என்று நிறைய உண்டு. அதில் Blame Some One Else day என்ற ஜாலியான தினம் பற்றிய விவரங்கள் படித்தேன்

    http://www.ehow.com/how_2330857_celebrate-blame-someone-else-day.html. இந்தியாவில் நமக்கு தனியாக ஒரு நாள் தேவையில்லை – எல்லா நாளும் செய்வதுதானே!

    மோகனகிருஷ்ணன்

    193/365

     
    • Kannabiran Ravi Shankar (KRS) 10:42 am on June 12, 2013 Permalink | Reply

      இல்ல சார், பஸ் லேட்டு
      -இப்படித் தான் பெரும்பாலும் சொல்லுவோம்
      -ஆனா, குறித்த நேரத்தில் போனா, பஸ் சீக்கிரம் -ன்னு சொல்லுவோமா?:))
      I try to be as punctual as possible = I, I, I

      நம் பழியை, இன்னொன்றின் மேல் போடுவதை @mokrish காட்டியுள்ளார்
      ஆனா, அடுத்தவர் பழியை, நம் மீது போட்டுக் கொள்வது??
      ——–

      யாருப்பா அந்த “லூசு”? -ன்னு கேக்காதீக:) = ஆழ்வார்களும் நாயன்மார்களும் தான்!

      மனத்தில் ஓர் தூய்மை இல்லை
      வாயில் ஓர் இன்சொல் இல்லை
      எனக்கு இனி கதி என்ன சொல்லாய்
      அரங்க மா நகருளானே!

      குறிக்கோள் இலாது கெட்டேன் -ம்பாரு அப்பர் பெருமான்; மற்ற எவரையும் விட உண்மை தெறிக்கும் பாட்டில்!
      அவரா குறிக்கோள் இல்லாது கெட்டாரு?:)

    • anonymous 10:54 am on June 12, 2013 Permalink | Reply

      சினிமாப் பாட்டுக்கு வருவோம்…
      கண்ணும், மனசும் தான் ரொம்ப திட்டு வாங்கும்:) அப்பறமா கடவுள் திட்டு வாங்குவாரு:)

      உன் “கண்” உன்னை ஏமாற்றினால்
      என் மேல் கோவம் உண்டாவதேன்?:)

      பொன்னான “மனசே”, பூவான மனசே
      வைக்காத பொண்ணு மேல ஆசை -ன்னு TR சித்தர் பாடுவாரு:)
      ——-

      உன்னைச் சொல்லிக் குற்றமில்லை; என்னைச் சொல்லிக் குற்றமில்லை
      காலம் செய்த கோலமடி; கடவுள் செய்த குற்றமடி

      ஒரு மனதை உறங்க வைத்தான்; ஒரு மனதைத் தவிக்க விட்டான்
      இருவர் மீதும் குற்றமில்லை; இறைவன் செய்த குற்றமடி!!
      ——-

      அவ கூட போயி, மொதல்ல பேசுனது நீ தானே?-ன்னு, வித்தியாசமா “உதட்டைத்” திட்டும் பாட்டு கூட இருக்கு; என்னான்னு சொல்லுங்க பாப்போம்!

      • anonymous 10:57 am on June 12, 2013 Permalink | Reply

        //பிரிக்கத் தெரிந்த இறைவா, உனக்கு இணைக்கத் தெரியாதா?
        இணையத் தெரிந்த தலைவா, உனக்கு என்னைப் புரியாதா???//

        முருகா!
        இதுக்கு மேல பேச்சு வரலை, இன்னிக்கு!

    • Arun Rajendran 2:50 am on June 13, 2013 Permalink | Reply

      சார், அருமையானப் பதிவு…”accountability” நெலமைக்கு ஏத்த மாதிரி திரியரத அழகா சுட்டி இருக்கீங்க…இதே மாதிரி திட்டு வாங்குற வரிசைல விதியும் காலமும் தவறாம இடம் பிடிக்கும்…குற்றமனப்பான்மைல இருந்துத் தப்பிக்க இப்படியெல்லாம் பழி சுமத்தி மனச்சாந்தி அடைய வேண்டியதுதான்… 🙂

  • GiRa ஜிரா 8:46 am on May 18, 2013 Permalink | Reply  

    பனிப் பானு 

    நிலவைப் பார்த்தால் கவிஞனுக்குக் கவிதை வரும். குழந்தைக்கு தூக்கம் வரும். காதலர்களுக்கு ஏக்கம் வரும். ஏழைகளுக்குப் பசி வரும். கோழைகளுக்கு பயம் வரும். ஒவ்வொருவருக்கும் ஒவ்வொன்று வரும்.

    அந்த நிலவைப் பாடாத கவிஞன் இல்லை. பாடாவிட்டால் கவிஞன் இல்லை. இலக்கியச் சுவைகள் எத்தனை உண்டோ, அத்தனை விதமான சுவைகளையும் வெளிப்படுத்தும் கவிதைகளிலும் நிலவு இருக்கும். இது மறுக்க முடியாத உண்மை.

    அப்படியிருக்க திரைப்படக் கவிஞர்கள் மட்டுமென்ன நிலவோடு கோவித்துக்கொண்டவர்களா?

    அவன் மனைவியை இழந்தவன். நெஞ்சமெல்லாம் சோகம். அவனை விரும்புகிறாள் ஒருத்தி. அவள் காதலை மறுக்க வேண்டும். அதே நேரத்தில் சோகத்தையும் சொல்ல வேண்டும். இரண்டையும் ஒரே வரியில் சொல்ல கவியரசர் கண்ணதாசனுக்கு கைகொடுக்கிறது நிலவு. “நிலவே என்னிடம் நெருங்காதே நீ நினைக்கும் இடத்தில் நானில்லை”.

    அதே கவியரசர். வேறொரு கதாநாயகன். திருமணமானவன். பிடிக்காத கல்யாணம். தொடாதே என்று சொல்லிவிட்டாள் மனைவி. அவனுடைய ஆத்திரத்தையும் ஆற்றாமையையும் ஒரே வரியில் சொல்ல வேண்டும். மறுபடியும் நிலா உதவுகிறது. “நிலவைப் பார்த்து வானம் சொன்னது என்னைத் தொடாதே”.

    நல்லவர்கள் இருவர். தவறு செய்கிறார்கள். அவர்கள் செய்வது கடத்தல். கடலில் தோணி கட்டி தோணியில் பாட்டு கட்டி ஆடிப்பாடி வருகிறார்கள். அவர்கள் களிப்புக்கும் கும்மாளத்துக்கும் நிலவு உதவுகிறது. “நிலா அது வானத்து மேலே. பலானது ஓடத்து மேலே” என்று எழுதினார் இளையராஜா.

    குழந்தைகளுக்கும் கோவம் வரும். அந்தக் கோவத்தை மாற்றுவது எளிதான செயலா? கோவித்தது சேயாக இருந்தாலும் ஆடியும் பாடியும் சமாதானப்படுத்துவது தாயாகத்தான் இருக்கும். அப்படிச் சமாதான வரிகளைச் செதுக்க கவிஞர் வாலிக்குத் துணை வந்ததும் நிலாதான். “மண்ணில் வந்த நிலவே, என் மடியில் பூத்த மலரே” என்று எழுதினார்.

    தூக்கத்துக்குக் காரணமாகும் நிலவுதான் ஏக்கத்தும் காரணமாகிறது. காதலர்கள் பிரிந்தாலும் துன்பம். கூடினாலும் பிரியப் போவதை எண்ணித் துன்பம். அந்தத் துன்பம் அவனைத் தூங்கவிடவில்லை. அப்படியொரு பாட்டெழுத வேண்டும். ”நிலவு தூங்கும் நேரம். நினைவு தூங்கிடாது” என்று எழுதினார் வாலிபக் கவிஞர் வாலி.

    காதலர்கள் உள்ளத்தில் எப்போதும் ஒரு பெருமிதம் இருக்கும். இந்தக் காதலனுக்கும் அப்படிதான். அவன் காதலி பேரழகி. அப்படியொரு பிரபஞ்ச அழகி அவனுக்குக் காதலி என்ற பெருமிதத்தைப் பாட்டில் சொல்ல வேண்டும். இந்த முறை நிலவோடு கை கோர்த்தவர் வைரமுத்து. “சந்திரனைத் தொட்டது யார் ஆம்ஸ்டிராங்கா? அடி ஆம்ஸ்டிராங்கா? சத்தியமாய் தொட்டது யார்? நான்தானே” என்று எழுதினார்.

    அவனுக்கு வாழ்க்கையே வெறுத்து விட்டது. வாழ்க்கை எப்படியெல்லாம் ஏமாற்றியது என்ற வெறுப்பைப் பாட்டில் சொல்ல வேண்டும். இந்த முறை நிலவை துணைக்கழைத்தவர் புலவர் புலமைப்பித்தன். “சந்திரனப் பாத்தா சூரியனாத் தெரிகிறது. செங்கரும்பு கூட வேம்பாகக் கசக்கிறது” என்று எழுதினார்.

    கும்மாளக் காதலர்களுக்குத் திருமணமும் ஆகிவிட்டது. குதித்துக் கொண்டிருந்தவர்களுக்குக் கால்கட்டு போட்டாயிற்று. இன்று முதல் இரவு. அந்த அளவுக்கு மீறிய உற்சாகத்தை மகிழ்ச்சியின் உச்சத்தை வரிகளில் கொண்டு வர முடியுமா? நிலவிருக்க பயமேன். “நிலவைக் கொண்டு வா கட்டிலில் கட்டி வை” என்று வைரவரிகளை வைரமுத்து கொடுத்தார்.

    இப்படியாக சோகம், ஏக்கம், ஆதங்கம், மகிழ்ச்சி, கொண்டாட்டம், உல்லாசம், ஆத்திரம், தாலாட்டு என்று எந்த வகை உணர்ச்சியையும் கவிதையில் வடிக்க உதவுவது நிலவு.

    என்ன? பக்திச் சுவை விட்டுப் போயிற்றா? யார் சொன்னார்கள்? இறையருளைப் பெற்றதும் சுந்தரரே “பித்தா பிறைசூடி” என்றுதான் பாடத் தொடங்கினார். சின்னஞ்சிறு குழந்தையாய் திருஞானசம்பந்தர் ஞானப்பால் உண்டு பாடிய பொழுது “தோடுடைய செவியன் விடையேறியோர் தூவெண்மதி சூடி” என்றுதான் பாடினார்.”

    ஓ! திரைப்படப் பாடலாக இருந்தால்தான் ஒத்துக் கொள்வீர்களா? சரி. அதற்கும் பாடல்கள் பல உண்டு. ஆனாலும் ஒன்று சொல்கிறேன். ஆதிபராசக்தி திரைப்படத்தில் அபிராமி பட்டர் எப்படிப் பாடுகிறார்? ”சொல்லடி அபிராமி நில்லடி முன்னாலே முழு நிலவினைக் காட்டு உன் கண்ணாலே” என்று கண்ணதாசன் எழுதிக் கொடுத்தபடிதானே பாடினார்?

    இந்தப் பாடல்கள் மட்டுந்தானா? இல்லை. இன்னும் எத்தனையெத்தனையோ பாடல்கள். “வான் நிலா நிலா அல்ல உன் வாலிபம் நிலா” என்று பாட்டு முழுக்க எழுதினார் கவியரசர் கண்ணதாசன்.

    இந்த நிலவுக்கு எத்தனையெத்தனை பெயர்கள். மதியென்பார். சந்திரனென்பார். பிறையென்பார். வெண்ணிலா என்பார். முழுமதி, நிறைமதி, வளர்மதி, வெண்மதி என்று எத்தனையெத்தனையோ பெயர்கள்.

    ஈசனார் சூடிய பிறைச் சந்திரனை ஞானக்கண்ணால் பார்க்கிறார் அருணகிரிநாதர். அந்தப் பிறைச் சந்திரனை என்ன சொல்லிப் பாடுவது? உடனே ஒரு திருப்புகழ் பிறக்கிறது.

    பாதிமதி நதி போது மணிச்சடை நாதர் அருளிய குமரேசா
    பாகு கனிமொழி மாது குறமகள் பாதம் வருடிய மணவாளா

    பிறைச்சந்திரன் பாதியாகத்தானே இருக்கிறது. அதனால் பாதிமதி என்றே பெயர் சூட்டிவிட்டார் அருணகிரிநாதர்.

    அதே அருணகிரி கந்தரந்தாதியில் நிலவுக்கு இன்னொரு பெயரைச் சொன்னார். அந்தப் பெயரை அவருக்கு முன்னாலும் பின்னாலும் யாரும் சொன்னதில்லை.

    சேயவன் புந்தி வனவாச மாதுடன் சேர்ந்தசெந்திற்
    சேயவன் புந்தி கனிசா சராந்தக சேந்தவென்னிற்
    சேயவன் புந்தி பனிப்பானு வெள்ளிபொன் செங்கதிரோன்
    சேயவன் புந்தி தடுமாற வேதருஞ் சேதமின்றே

    இந்தப் பாடலில் நிலவுக்கு அவர் சொல்லியிருக்கும் பெயர் பனிப்பானு. பானு என்றால் சூரியனைக் குறிக்கும். பனி குளுமையைக் குறிக்கும். நிலவு என்பது குளுமையான சூரியனாம். அதனால்தான் பனிப்பானு என்று புதுப்பெயர் சூட்டியிருக்கிறார் அருணகிரி. அழகான பெயரல்லவா?

    நிலா நிலா ஓடி வா! நில்லாமல் ஓடி வா! மலை மேலே ஏறி வா! மல்லிகைப்பூ கொண்டு வா!

    பதிவில் இடம் பெற்ற பாடலின் சுட்டிகள்.

    பாதிமதிநதி (யாமிருக்க பயமேன்) – http://youtu.be/FDMcv6CjglI
    நிலவே என்னிடம் நெருங்காதே (ராமு) – http://youtu.be/Z8MYbZVETDU
    நிலவைப் பார்த்து வானம் (சவாலே சமாளி) – http://youtu.be/FSdL74sUCNE
    நிலா அது வானத்து மேலே (நாயகன்) – http://youtu.be/ldPFymzsVd8
    நிலவு தூங்கும் நேரம் (குங்குமச் சிமிழ்) – http://youtu.be/0k6lUIhIqPo
    சந்திரனைத் தொட்டது யார் (ரட்சகன்) – http://youtu.be/ZIQXtyJQMIE
    சந்திரனப் பாத்தா (பிரம்மச்சாரிகள்) – http://www.dhool.com/phpBB2/viewtopic.php?t=3278
    மண்ணில் வந்த நிலவே (நிலவே மலரே) – http://youtu.be/UmCcv-4uv7k
    நிலவைக் கொண்டு வா (வாலி) – http://youtu.be/QOcrng-CkmE
    தோடுடைய செவியன் (ஞானக்குழந்தை) – http://youtu.be/-OT2RCgAvVA
    சொல்லடி அபிராமி (ஆதிபராசக்தி) – http://youtu.be/fCltNDw_oFA
    வான் நிலா நிலா அல்ல (பட்டினப்பிரவேசம்) – http://youtu.be/bV8V2oowwwI

    அன்புடன்,
    ஜிரா

    168/365

     
    • rajnirams 11:45 am on May 18, 2013 Permalink | Reply

      பனிப்பானு-புதுமையான தலைப்பில் அருமையான பதிவு.தமிழ் கவிஞர்கள் நிலவை வைத்துக்கொண்டு ஏராளமான பாடல்கள் எழுதியிருக்கிறார்கள்.அதுவும் புலமைப்பித்தன் “ஆயிரம் நிலவிற்கு” ஒப்பாக பெண்ணை பாடியது தான் உச்சம்.வாலியின் நிலவு ஒரு பெண்ணாகி,நிலாவே வா,கண்ணதாசனின் நிலவுக்கு என் மேல் என்னடி கோபம்,இரவும் நிலவும் வளரட்டுமே இப்படி சொல்லிக்கொண்டே போகலாம்.நன்றி.

      • GiRa ஜிரா 8:29 am on May 21, 2013 Permalink | Reply

        ஆயிரம் நிலவே வான்னு அவர் எழுதிட்டாரேன்னு இன்னும் லட்சம் நிலவுகள்னு யாரும் எழுதலையா? 🙂

    • Arun Rajendran 12:38 pm on May 18, 2013 Permalink | Reply

      ஒரே நாள் உனை நான் நிலாவில் பார்த்தது -> love at first sight
      கல்யாணத் தேனிலா காய்ச்சாதப் பால் நிலா -> தலைவனும் தலைவியும் ஒருவரை ஒருவர் எண்ணித் திளைத்தல்
      வானிலே தேனிலா ஆடுதே பாடுதே -> தலைவனும் தலைவியும் ஒருவரை ஒருவர் கண்டு மகிழ்தல்
      அந்த நிலாவத்தான் நான் கையில புடிச்சேன் -> பரிசில்கள் பரிமாறுதல்
      அமுதைப் பொழியும் நிலவே -> பிரிவு; வருத்தம் காதல் கலந்து வெளிப்பட பாடல்
      நாளை இந்த வேளைப் பார்த்து ஓடி வா நிலா -> தலைவி ஆற்றியிருத்தல்; காதலாகி கசிந்துருகி..
      நிலவுக்கு என் மேல் என்னடி கோபம் -> மீண்ட தலைவன் தலைவியின் கோபம் தனித்தல்
      மஞ்சள் நிலாவுக்கு இன்று ஒரே சுகம் -> காதல் கனிந்து மணமுடித்தல்
      நிலா காயுது நேரம் நல்ல நேரம் -> விரகம்; கூடி களித்தல்
      வாராயோ வெண்ணிலாவே நீ கேளாயோ -> தலைவன் தலைவி ஊடல்;வாழ்வியல்
      நிலவும் மலரும் பாடுது என் நினைவில் தென்றல் -> and their love story continues

      இவண்,
      அருண்

      • GiRa ஜிரா 8:30 am on May 21, 2013 Permalink | Reply

        அடா அடா அடா… என்னவொரு பட்டியல்…. நிலாவுல கட்டில் போட்டேன்னு என்னச் சொன்னீங்களே… நீங்க வீடே கட்டியிருக்கீங்களே 🙂

    • amas32 7:04 pm on May 19, 2013 Permalink | Reply

      திரை இசைப் பாடல்களில் வரும் நிலவுப் பாடல்கள் மட்டுமே, கணக்கிட்டால் ஓராயிரம் தேறும் போல இருக்கிறதே! ஜோதிட சாஸ்திரப் படி கூட சந்திரன் மனத்தையாளும் ஒரு கிரகம். சந்திரனின் கிரக நிலை ஒருவனுக்குச் சரியாக இல்லாவிட்டால் அவன் பித்துப் பிடித்து அலைவான். காதல் வசப்படுவதும் அதனின் mild form தானே? 🙂

      Lovely post Gira 🙂

      amas32

      • GiRa ஜிரா 8:31 am on May 21, 2013 Permalink | Reply

        அப்போ இந்தக் காதல் கீதல் எல்லாத்துக்கும் சந்திரந்தான் காரணமா? இத மொதல்லயே சொல்லிருந்தா நாட்டுல சந்திரனுக்கு பெரிய பெரிய கோயில்கள் கெட்டியிருப்பாங்களே காதலர்கள். 🙂

    • Saba-Thambi 6:21 pm on May 20, 2013 Permalink | Reply

      பனிப்பானு , இன்று புதிதாக படித்த சொல்!
      நன்றி.

      • GiRa ஜிரா 8:32 am on May 21, 2013 Permalink | Reply

        பனிப்பானு – அருணகிரி வைத்த பெயர். ஓசையை மொழியாக்கி அதிலும் பொருளாக்கி அந்தப் பொருளும் அருளாக வைத்த பெருமான். அருணகிரிப் பெருமான்.

  • GiRa ஜிரா 11:06 am on May 10, 2013 Permalink | Reply  

    பேராசை தரும் பேரழகு! 

    பொதுவாகவே பெண்களின் அழகைப் பார்த்து ஆண்களுக்கு ஆசை வரும். அந்த அழகு ஒரு பெண்ணுக்கு அளவுக்கு மீறி கூடிக்கொண்டே போனால்?

    நீ போகும் தெருவில் ஆண்களை விட மாட்டேன். சில பெண்களை விட மாட்டேன்” என்று வைரமுத்து அவர்கள் எழுதிய நிலைதான் உண்டாகும்.

    அந்தப் பேரழகி நடக்கும் தெருவில் ஆண்கள் நுழைந்தால் அவர்களும் ஆசைப்படுவார்கள் என்பதால் ஆண்களை விடமாட்டேன் என்கிறான் காதலன். ஆனால் சில பெண்களையும் விட மாட்டானாம். ஏன்? அவளைப் பார்த்தால் பெண்களுக்கே பேராசை வந்து விடுமாம்.

    அதைக் கவியரசர் கண்ணதாசன் ஒரு பாடலில் தெளிவாகச் சொல்லியிருக்கிறார். ஆம். செந்தமிழ்த் தேன்மொழியாள் பாடலில் “பெண்ணுக்குப் பெண்ணே பேராசை கொள்ளும் பேரழகெல்லாம் படைத்தவளோ” என்று அழுத்தம் திருத்தமாகச் சொல்லி விடுகிறார்.

    இப்படி பெண்ணுக்குப் பெண் பேராசை கொள்ளும் பெண்கள் அந்தக் காலத்திலும் இருந்திருக்கிறார்கள். பல நூற்றாண்டுகளுக்கு முன்னர் குற்றாலத்தில் அப்படியொரு பெண் இருந்திருக்கிறாள். அவளைப் பற்றி திருக்குற்றாலக் குறவஞ்சியில் திரிகூட ராசப்பக் கவிராயர் பாடியிருக்கிறார்.

    கண்ணுக்குக் கண்ணிணை சொல்லத் திரிகூடக்
    கண்ணுதலைப் பார்வையால் வெல்லப்
    பெண்ணுக்குப் பெண்ம யங்கவே வசந்தவல்லி
    பேடையன்னம் போலவே வந்தாள்
    நூல் – திருக்குற்றாலக் குறவஞ்சி
    எழுதியவர் – திரிகூட ராசப்பக் கவிராயர்

    அவள் பெயர் வசந்தவல்லி. காலையில் எழுந்து குளித்து முடித்து அழகு செய்து கொண்டு கிளம்பி வந்தாள். குற்றாலத்துப் பெண்கள் அவளைப் பார்க்கின்றார்கள். அவர்கள் கண்களே அவர்களுக்கு வசந்தவல்லியின் அழகை விளக்கிவிடுகின்றன. அவளைப் பார்த்து பெண்கள் மயங்கும்படியாக பேடையன்னம் போல வசந்தவல்லி நடந்துவந்தாள்.

    அன்றைக்கே பெண்ணுக்குப் பெண் மயங்கும் அழகு இருந்திருக்கிறது. அதைப் பின்னாளில் கவியரசர் “உன்னழகைக் கண்டு கொண்டால் பெண்களுக்கே ஆசை வரும். பெண்களுக்கே ஆசை என்றால் என் நிலையை என்ன சொல்வேன்” என்று பூவும் பொட்டும் திரைப்படத்தில் எழுதினார்.

    பழமை மாறாத புதுமை” என்று மெல்லிசை மன்னர் அடிக்கடி சொல்வார். கண்ணதாசன் எழுதியதும் அப்படித்தான். புதுமையான முறையில் சொன்னார். ஆனால் பழையதையே சொன்னார். ஆம். கம்பராமாயணத்தில் சொல்லப்பட்ட பழைய கருத்தையே புதுமையாகச் சொன்னார். கவியரசர் படிக்காத கம்பராமாயணமா?!

    கண் பிற பொருளில் செல்லா; கருத்து எனின் அஃதே; கண்ட
    பெண் பிறந்தேனுக்கு என்றால் என்படும் பிறருக்கு? என்றாள்
    நூல் – கம்பராமாயணம்
    காண்டம் – ஆரண்ய காண்டம்
    காட்சிக் குறிப்பு – சீதையைக் கண்ட சூர்ப்பனகை வியத்தல்
    எழுதியவர் – கம்பர்

    சூர்ப்பனகை இராமனைக் கண்டு மயங்கி அவனோடு பேசிக்கொண்டிருக்கிறாள். அப்போது அந்தப் பக்கமாக சீதை வருகிறாள். அவளைப் பார்த்ததுமே அவள் திருமகளோ என்று ஒரு ஐயம் சூர்ப்பனகைக்கு வருகிறது.

    சீதையினுடைய அழகு அவளையே மயக்கக் கண்டாள். அவளைப் பார்த்த கண்ணால் வேறெதையும் பார்க்க முடியவில்லை. அவள் அழகைக் கண்டு எண்ணிய கருத்தை வேறெதிலும் செலுத்த முடியவில்லை. ஒரு பெண்ணான தன்னுடைய நிலையே இப்படியிருக்கிறதே ஒரு ஆண் கண்டால் என்னாகும் என்று வியக்கிறாள்.

    அன்று சூர்ப்பனகை நினைத்ததையே ஆணின் கூற்றாக மாற்றி கவியரசர் எழுதியிருக்கிறார்.

    காலங்கள் மாறினாலும் காதலியின் அழகை ஆண்கள் இப்படிப் பெருமையோடு வருணித்துக் கொண்டேதான் இருக்கப் போகிறார்கள்.

    பதிவில் இடம் பெற்ற பாடல்கள்

    செந்தமிழ்த் தேன்மொழியாள்
    ………………………
    பெண்ணுக்குப் பெண்ணே பேராசை கொள்ளும்
    பேரழகெல்லாம் படைத்தவளோ
    படம் – மாலையிட்ட மங்கை
    பாடல் – கவியரசர் கண்ணதாசன்
    பாடியவர் – டி.ஆர்.மகாலிங்கம்
    இசை – மெல்லிசை மன்னர்கள் எம்.எஸ்.விசுவநாதன் டி.கே.இராமமூர்த்தி
    பாடலின் சுட்டி – http://youtu.be/WPDRRh1Ve6M

    உன்னழகைக் கண்டுகொண்டால்
    பெண்களுக்கே ஆசை வரும்
    பெண்களுக்கே ஆசை வந்தால்
    என் நிலமை என்ன சொல்வேன்
    படம் – பூவும் பொட்டும்
    பாடல் – கவியரசர் கண்ணதாசன்
    பாடியவர் – பி.பி.ஸ்ரீனிவாஸ்
    இசை – ஆர்.கோவர்தனம்
    பாடலின் சுட்டி – http://youtu.be/o2Iu8lXOlcs

    டெலிபோன் மணிபோல் சிரிப்பவள் இவளா
    …………………………….
    நீ போகும் தெருவில் ஆண்களை விடமாட்டேன்
    சில பெண்களை விடமாட்டேன்
    படம் – இந்தியன்
    பாடல் – வைரமுத்து
    பாடியவர் – ஹரிஹரன், ஹரிணி
    இசை – ஏ.ஆர்.ரஹ்மான்
    பாடலின் சுட்டி – http://youtu.be/SfHbknfOOuA

    அன்புடன்,
    ஜிரா

    160/365

     
    • dagalti (@dagalti) 11:23 am on May 10, 2013 Permalink | Reply

      ஒரு ஆண் equivalenடும் கம்பன்ல வரும்.

      விஸ்வாமித்ரர் ராமனைப் பார்த்து

      ஆடவர் பெண்மையை அவாவு தோளினாய்

      -னு விளிப்பார்

      ஆண்கள் தாங்கள் பெண்களாக இருந்திருக்கக் கூடாதா என்று நினைக்கவைக்கும் தோளழகு உடையவனே

    • rajnirams 11:27 am on May 10, 2013 Permalink | Reply

      ஹா ஹா,நல்ல தேர்வு.அருமையான பதிவு.காத்திருந்த கண்களில் கூட கண் படுமே பாடலில் மங்கை உன் அழகை மாதர் கண்டாலும் மயங்கிடுவார் கொஞ்ச நேரம் என்ற கவியரசரின் வரிகளும் பிரசித்தம்.
      கொடி பறக்குது பாடலில் வைரமுத்துவின் வரிகளில் “நாயகியின் தற்பெருமை”வரிகள்-“புடவை மாற்றும் போது கர்வம் வந்தது” என்ற காதல் என்னை காதலிக்கவில்லை பாடல் வரிகள்.நன்றி.

    • Arun Rajendran 12:21 pm on May 10, 2013 Permalink | Reply

      “வெங் களி விழிக்கு ஒரு
      விழவும் ஆய். அவர்
      கண்களின் காணவே
      களிப்பு நல்கலால்.
      மங்கையர்க்கு இனியது ஓர்
      மருந்தும் ஆயவள்.
      எங்கள் நாயகற்கு. இனி.
      யாவது ஆம்கொலோ?”
      (மிதிலைக் காட்சிப் படலம் – கன்னிமாடத்துள்ள சீதாதேவியின் சிறப்பு – பாடல் எண்: 596)

      பார்க்கும் ஆண்களைக் கவர்ந்திழுக்கக் கூடிய அழகைக் கொண்டப் பெண்கள் கூட சீதையின் அழகால் கவரப்படுகின்றனர்-னு கம்பன் சீதையின் அழகை கட்டியம் கூறுகிறார்..
      நன்றிகள் ஜிரா

    • amas32 9:08 am on May 11, 2013 Permalink | Reply

      அழகு என்றுமே கண்ணுக்கு விருந்து. அது மலரோ, மலையோ, மகவோ, ஆணோ அல்லது பெண்ணோ 🙂

      பெண்ணே பெண்ணைப் பார்த்துப் பொறாமை கொள்ளும் அழகு பல பேரிடம் உள்ளது. அந்த கால வைஜயந்தி மாலா, லலிதா பத்மினி ராகினி முதல் இன்றைய ஐஸ்வர்யா ராய், கத்ரினா கைப் வரை அசந்து போகும் அழகை சிலருக்கு வாரி வழங்கியிருக்கிறான் பிரம்மன்.

      இந்த அழகை ரசிக்கும் தன்மையில் சற்றே வித்தியாசமாக பெண்ணே பெண்ணின் மேல் ஆசைக் கொள்ளும் அழகு என்கிறார்கள் கவிஞர்கள். அதுவும் நடக்கக் கூடியது தானே.

      ஆனால் அசாத்திய அழகு பல சமயங்களில் பெண்ணுக்கே எதிரியாகிவிடுகிறது. எத்தனை சான்றுகள் அதற்கு! அகலிகை, சீதை, தெரிந்த கதைகள். தெரியாமல் மறைக்கப்பட்டன எத்தனையோ?

      amas32

  • mokrish 11:24 am on April 18, 2013 Permalink | Reply
    Tags: அறிவுமதி, , ரா பி சேதுப்பிள்ளை, , , PB ஸ்ரீநிவாஸ்   

    எந்த ஊர் என்றவனே 

    ஒருவர் நமக்கு அறிமுகமான சில நிமிடங்களில் கேட்கப்படும் கேள்விகளில்  ஒன்று – ‘நீங்க எந்த ஊர்? என்பது. ஒரே ஊர் என்றோ ஒரே மாவட்டம் என்றோ தெரிந்தால் ‘ அட நீங்களும் வேலூர் தானா என்று உடனே ஒரு புன்முறுவல். நட்பு சுலபமாகும். நாம் பிறந்து வளர்ந்த ஊரை நினைத்தாலே சந்தோஷம் பொங்கும். வெளிநாட்டில் வாழும்போது சொந்த ஊரில் / மாவட்டத்தில் இருந்து வருபவர்களுடன் பேசும்போது ஒரு extra connect இருப்பதை உணர்ந்திருக்கிறேன்

    ஊர்ப்பெயர்களை அதன் வேர்ச்சொல் அறிந்து ஆராய்வது ஒரு பெரிய சவால்.இடப்பெயராய்வு. கல்வெட்டு, புத்தகங்கள், அரசுப் பதிவேடுகள், செப்பேடுகள், கர்ணபரம்பரைக் கதைகள், நாட்டுப்புற பாடல்கள், பழமொழிகள், சொலவடைகள், விடுகதைகள் ஆகியவற்றில் சம்பந்தப்பட்ட ஊர்கள் இடம்பெற்ற விதத்தையும், அந்த ஊர்களின் மக்களுடைய வாழ்க்கைத் தரம், பொருளாதாரம், தற்போதய நிலை உள்ளிட்ட பல விஷயங்கள் குறித்தும் பல ஆய்வுகள் உண்டு. ரா பி சேதுப்பிள்ளை அவர்களின் ‘தமிழகம் ஊரும் பேரும்’ என்ற ஆய்வை இணையத்தில் படித்தேன். சுவாரஸ்யமான ஆய்வு.

    http://www.tamilvu.org/library/lA475/html/lA475con.htm

    ஒரு கவிஞனை எந்த ஊர் என்றால் என்ன சொல்வான்? திரைப்பாடல்களில் ஒரு தேடல் கண்ணதாசன் காதல் தோல்வி சொல்ல ஒரு பாடலில் பிறப்பில் தொடங்கி ஆணின் அன்றைய காதல் தோல்வி status வரை ஊர்ப்பெயர்களை எழுதிய வரிகள் அருமையான கற்பனை. எந்த ஊர் என்றவனே இருந்த ஊரைச் சொல்லவா? என்று தொடங்கும் பாடலில் வரும் கற்பனை ஊர்ப்பெயர்கள் – பேச்சு வழக்கில் இருக்கும் வார்த்தைகளை ஊர் போல சொல்வார். http://www.youtube.com/watch?v=eyIWD8FOh4g

    உடலூரில் வாழ்ந்திருந்தேன் உறவூரில் மிதந்திருந்தேன்

    கருவூரில் குடி புகுந்தேன் மண்ணூரில் விழுந்து விட்டேன்!

    என்று பிறப்பையும் பின் வரும் வரிகளில்

    வேலூரைப் பார்த்து விட்டேன் விழியூரில் கலந்து விட்டேன்

    காதலூர் காட்டியவள் காட்டூரில் விட்டுவிட்டாள்

    கன்னியூர் மறந்தவுடன் கடலூரில் விழுந்துவிட்டேன்!

    பள்ளத்தூர் தன்னில் என்னை பரிதவிக்க விட்டு விட்டு

    மேட்டூரில் அந்த மங்கை மேலேறி நின்று கொண்டாள்!

    காதலில் விழுந்ததையும் பின் பள்ளத்தில் விழுந்ததையும் சொல்கிறார்

    வாலி தமிழகத்தின் ஊர்ப்பெயர்களை வைத்து ஒரு பெண்ணை வர்ணிக்கிறார். மதுரையில் பறந்த  மீன் கொடியை அவள் கண்ணில் பார்த்து  சேரன் வில்லை புருவத்தில் பார்த்து புலிக்கொடியை அவள்  பெண்மையில் பார்த்து என்று அலங்காரமான பாடல் ஒன்று

    http://www.youtube.com/watch?v=GN5JGwKojgk அதில் தொடர்ந்து

    காஞ்சித் தலைவன் கோவில் சிலை தான் கண்மணியே உன் பொன்னுடலோ

    குடந்தையில் பாயும் காவிரி அலை தான் காதலியே உன் பூங்குழலோ

    சேலத்தில் விளையும் மாங்கனிச் சுவைதான் சேயிழையே உன் செவ்விதழோ?

    தூத்துக் குடியின் முத்துக் குவியல் திருமகளே உன் புன்னகையோ?

    பாடல் முழுவதும் வரிகளின் முதலில் ஒரு ஊர்ப்பெயரை வைத்து அழகான கவிதை.

    வைரமுத்துவும் பெண்ணை வர்ணிக்கவே ஊர்பெயரை வரிகளில் வைக்கிறார். ஒவ்வொரு ஊரிலிருந்தும் விசெஷமான பொருள் எடுத்து அந்த பெண்ண சிலை செய்ததாக கற்பனை தஞ்சாவூரு மண்ணெடுத்து என்ற பாடலில் வரும் வரிகள் http://www.youtube.com/watch?v=NzRHBQRpqkI

    கன்னம் செஞ்ச மண்ணு அது பொன்னூரு

    ஒதடு செஞ்ச மண்ணு  மட்டும் தேனூரு

    நெத்தி செய்யும் மண்ணுக்கு சுத்தி சுத்தி வந்தேங்க

    நெலாவில் மண்ணெடுத்து நெத்தி செஞ்சேன் பாருங்க

    வாழையூத்து மண்ணெடுத்தேன் வயித்துக்கு – அட

    கஞ்சனூரு மண்ணெடுத்தேன் இடுப்புக்கு

    கண்ணதாசனின் காதல் தோல்வி வரிகள் ஒரு extreme என்றால் வாலியும் வைரமுத்துவும் சொல்லும் வர்ணனைகளும் மிகையானவை. எனக்கு அறிவுமதி எழுதிய அழகூரில் பூத்தவளே பாடல வரிகள் இயல்பாக இருப்பதாய் தோன்றுகிறது http://www.youtube.com/watch?v=83Zq_Bh3mCg

    அழகூரில் பூத்தவளே

    எனை அடியோடு சாய்த்தவளே

    மழையூரின் சாரலிலே

    எனை மார்போடு சேர்த்தவளே

    உன்னை அள்ளி தானே உயிர் நூலில் கோர்ப்பேன்

    உயிர் நூலில் கோர்த்து உதிராமல் காப்பேன்

    அவள் பிறந்த ஊர் எதுவாக இருந்தாலும் அதுவே அழகான ஊர் என்பதில் ஒரு உணர்வுபூர்வமான நியாயம். அவள் சுருட்டி போட்ட முடியை மோதிரமாகியது அவள் சோம்பலில் இவன் முறிந்து போனது – மிகை தான் என்றாலும் சுவாரஸ்யம்தான். ,’என்னை மறந்தாலும் உன்னை மறவாத நெஞ்சோடு நான் இருப்பேன்’ என்று சொன்னவுடன் நெகிழ்ந்து ‘அன்பூரில் பூத்தவனே என்கிறாள்.  அழகு.

     மோகனகிருஷ்ணன்

    138/365

     
    • amas32 11:51 am on April 18, 2013 Permalink | Reply

      எனக்கு ரொம்பப் பிடித்தப் பாடல் “தஞ்சாவுரு மண்ணெடுத்து” பாடல் 🙂 http://www.youtube.com/watch?v=Ebw2V22-mZI

      அதெ மாதிரி இந்த வரிகலும் அருமை!
      /காஞ்சித் தலைவன் கோவில் சிலை தான் கண்மணியே உன் பொன்னுடலோ

      குடந்தையில் பாயும் காவிரி அலை தான் காதலியே உன் பூங்குழலோ/

      நமக்கு எப்படி தாய் மொழி முக்கியமோ அதே மாதிரி பிறந்த மண்ணும் மனத்துக்கு மிகவும் நெருக்கமானதொரு விஷயம். அந்த ஊரை விட்டு வந்து வெகு காலம் ஆகியிருந்தும் மண்ணின் மணம் மனத்தை விட்டு அகலுவதில்லை. அதனால் காதலிக்கும் பெண்ணின் வடிவிலும் அதைக் காண்கிறோம்!

      amas32

    • n_shekar 4:26 pm on April 18, 2013 Permalink | Reply

      எனக்கும் “அழகூரில் பூத்தவளே” பாட்டுதான் மிகவும் பிடிக்கும் – பாடிய விதமும் மிக இனிமை 🙂

    • GiRa ஜிரா 2:17 pm on April 19, 2013 Permalink | Reply

      நீங்க சொல்லியிருக்கும் அத்தனை பாட்டுகளும் நல்ல பாட்டுகள்.

      பெண்ணை நிலமென்றும் நீரென்றும் கவிஞர்கள் பாடிப் பாடி பாட்டுகள் நூறு வந்தாலும் இன்னும் அலுக்கவில்லை போலும்.

      ஊரு விட்டு ஊரு வந்து வம்பு செய்யக்கூடாதுங்குறது மறை பொருள் இதுதானா? 🙂

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel