Updates from November, 2013 Toggle Comment Threads | Keyboard Shortcuts

  • mokrish 11:48 pm on November 29, 2013 Permalink | Reply  

    இல்லாததுபோல் இருக்குது 

    கண்ணதாசன் முன்னாள் நாத்திகர்தானே என்று நண்பர் @ncokkan ஒரு பதிவில் குறிப்பிட்டிருந்தார். பழ. கருப்பையா ஒரு திறனாய்வு நூலில்.

    “கண்ணதாசன் அறியாப் பருவத்தில் கடவுள் நம்பிக்கை உடையவராக இருந்தார். இளமையின் தொடக்கத்தில் கடவுள் மறுப்பாளராக மாறிவிடுகிறார். அந்தக் கால கட்டம் முழுவதிலும் அவர் எழுதிய பாடல்களில் கடவுள் ஏற்பு காணப்படவில்லையே தவிர கடவுள் எதிர்ப்பும் காணப்படாதது ஒரு வியப்பே”

    என்று தொடங்கி ஒரு முழு அத்தியாயமே எழுதியிருக்கிறார். சந்தர்ப்பவசத்தால் ஒரு இயக்கத்தில் சேர்ந்து அதற்குத் தன்னுடைய உயிரினும் இனிய கொள்கையை முதற்பலியாகக் கொடுத்துவிட்டு வெகுகாலமாக இருட்டறையில் புழுங்கிக்  கொண்டிருந்தார் என்றும் சொல்கிறார்.

    இயக்கத்தை விட்டு வெளியேறியபின் மீண்டும் தீவிர கடவுள் நம்பிக்கை! திரைப்பாடல்களில் அதை அழகாக வெளிப்படுத்தினார். அவ்வப்போது உரிமையுடன் நிந்தாஸ்துதியும் பாடினார்

    கண்ணதாசன் சண்முகப்பிரியா என்ற படத்தில் எழுதிய ஒரு பாடல் (இசை சூலமங்கலம் ராஜலட்சுமி & ஜெயலட்சுமி, பாடியவர் டி எம் எஸ்)

    இறைவனுக்கும் பெயரை வைத்தான் ஒரு மனிதன் இங்கே

    இறைவன் இல்லை என்று சொன்னான் ஒரு மனிதன் இங்கே

    என்று தொடங்கி

    இல்லை இல்லை என்றவனும் எதனை இல்லை என்றான்

    இல்லை ஒரு சக்தி என்று சொல்லவில்லை என்றான்

    நாத்திகம் என்பது கடவுள் மறுப்பு மட்டும்தானா? நாத்திகம் என்பது நம்பிக்கையற்று இருப்பதா? யோசித்தால் ஆத்திகர்களைப்போலவே நாத்திகர்களும் ஒரு பெயர் தேடிக்கொண்டிருக்கிறார்கள் என்றே தோன்றுகிறது. ‘ஒரே தேவன்’ என்றோ இயற்கை  என்றோ பெயரிட்டார்கள். ஸ்டார் வார்ஸ் படங்களில் வரும் பிரபலமான வசனம் “May the Force be with you” குறிப்பது கண்ணுக்கு தெரியாத ஒரு சக்தி.

    இரு தரப்பிலும் இருந்ததால் ஆத்திக-நாத்திக வாதத்தை மனிதனும் தெய்வமாகலாம் படத்தில் வெற்றி வேல் வெல்லுமடா என்ற பாட்டில் வைக்கிறார்.

    http://www.youtube.com/watch?v=DvFZurTDX1A

    வெற்றி வேல் வெல்லுமடா வினை தீர்ப்பான் வேலனடா

    கற்றவர்க்கும் கல்லார்க்கும் கருணை தரும் தென்றலடா

    என்று இறைவன் பெருமை  சொல்லும் அண்ணன். ஆனால் தம்பி நாத்திகவாதி.

    இறைவன் ஆளும் உலகம் என்றால் ஏழைகளை ஏன் படைத்தான்

    ஒருவர் வாழ ஒருவர் வாடும் உயர்வு தாழ்வை ஏன் அமைத்தான்

    என்ற stock  கேள்வி கேட்கிறான்.பக்தியில் உருகும் அண்ணன் ‘குழந்தை போல அவனைப் பார்த்தால் கூட வந்து கொஞ்சுமடா ‘ என்று சொன்னால் ‘குழந்தை இங்கு கோடி உண்டு குமரன் என்ன தேவையடா என்று பாடும் தம்பி.  பசியால் குழந்தைகள் வாடும்போது பாலபிஷேகம் எதற்கு  என்ற வழக்கமான வாதம்தான்.

    ஆனால் இது ஏன் mutually exclusive ஆக இருக்கவேண்டும்? குமரனையும் கொண்டாடி கோடி குழந்தைகளையும் கொண்டாட முடியுமே? ஆண்டவனை கும்பிட்டால் அன்பு செலுத்த முடியாமல் போகுமா?

    மோகனகிருஷ்ணன்

    362/365

     
    • amas32 9:43 am on November 30, 2013 Permalink | Reply

      //ஆனால் இது ஏன் mutually exclusive ஆக இருக்கவேண்டும்? குமரனையும் கொண்டாடி கோடி குழந்தைகளையும் கொண்டாட முடியுமே? ஆண்டவனை கும்பிட்டால் அன்பு செலுத்த முடியாமல் போகுமா?//

      இது தான் என் சித்தாந்தமும். என் மகன், பாடலில் தம்பி கேட்கும் கேள்விகளை தான் என்னையும் கேட்பான். உண்டியலில் போடும் பணத்திற்கு வாசலில் பிச்சை எடுப்பவர்களுக்குப் பிடிவாதமாக சாப்பாட்டு பேக்கட் வாங்கிக் கொடுப்பான். சுவாமிக்கு அலங்காரம் இருக்கும் போது இன்னும் ஏன் மலர்கள் வாங்கிப் போகிறாய் என்று கேட்பான். இதே பதில் தான் சொல்லுவேன். அதையும் செய் இதையும் செய்.

      அன்பு இருக்கும் இடத்தில் தெய்வ பக்தி இல்லாமல் இருப்பது அரிது. வெளிப்படாமல் இருந்து ஒரு நாள் பிரவாகமாக வெடிக்கும்.

      வெற்றிவேல் முருகனுக்கு அரோகரா 🙂

      amas32

    • rajinirams 10:54 am on November 30, 2013 Permalink | Reply

      கடவுள் மனிதனாக பிறக்க வேண்டும்,அவன் காதலித்து வேதனையில் வாட வேண்டும்,இறைவன் உலகத்தை படைத்தானா அவன் தான் ஏழ்மையை படைத்தானா-ஏழ்மையை படைத்தவன் அவனென்றால் இறைவன் என்பவன் எதற்காக? பாடல் சூழ் நிலைக்கேற்ப இப்படியும்-கடவுள் ஏன் கல்லானார் மனம் கல்லாய் போன மனிதர்களாலே, இறைவன் இருக்கின்றானா மனிதன் கேட்கிறான்-மனிதன் இருக்கின்றானா இறைவன் கேட்கிறான்- இப்படியும் பாடல் எழுதிய கண்ணதாசன் இறைவனுக்கும் பெயரை வைத்தான் பாடலின் இறுதியில்”இல்லை இல்லை என்றவனும் எதனை இல்லை என்றான்
      இல்லை ஒரு சக்தி என்று சொல்லவில்லை என்றான்” என்று முத்தாய்ப்பாக முடித்த விதம் அருமை.முதலில் நாத்திகராக இருந்த கவியரசர் பின் இறைவன் திருவடி சரணடைந்து பக்தியில் திளைத்ததோடு பல பக்தி பாடல்களையும் இலக்கியங்களையும் அர்த்தமுள்ள இந்து மதம் என்ற காவியத்தையும் தந்து என்றும் வாழ்ந்து கொண்டிருக்கிறார்.

  • GiRa ஜிரா 6:04 pm on August 30, 2013 Permalink | Reply  

    பொருத்தம் 

    எல்லாம் நன்றாகப் பொருந்தி வந்தால் மட்டுமே எதுவும் பெரும் வெற்றி பெறும்.

    எது பொருந்த வேண்டும்? அப்படிப் பொருந்தினால் எது வெற்றி பெறும்?

    காதலைத்தான் சொல்கிறேன். காதல் வெற்றி பெற மனப் பொருத்தம் வேண்டும். இல்லையென்றால் தோல்விதான். அதனால்தான் இலக்கியம் கூட பொருந்தாக் காமம் என்று ஒரு வகையையே வைத்திருக்கிறது. பெயரிலேயே தெள்ளத்தெளிவாக அது பொருந்தாது என்பதையும் முடிவு செய்திருக்கிறது இலக்கியம்.

    அப்படி உள்ளம் சிறப்பாகப் பொருந்திய காதலர்கள் பாடினால் எப்படி பாடுவார்கள்? கண்ணதாசன் எழுதிய ஒரு பாடல் உடனடியாக என் நினைவுக்கு வருகிறது.

    என்ன பொருத்தம் நமக்குள் என்ன பொருத்தம்
    காதல் என்னும் நாடகத்தில் கல்யாணம் சுகமே
    படம் – ரகசிய போலீஸ் 115
    இசை – மெல்லிசை மன்னர் எம்.எஸ்.விசுவநாதன்

    காதலர் இருவருக்கும் மனப் பொருத்தம் மிகப் பொருத்தமாக இருந்தால் திருமணப் பொருத்தம் பார்க்க வேண்டியதுதான்.

    அதெல்லாம் சரி. கல்யாணத்தில் பத்து பொருத்தங்கள் பார்ப்பார்களாமே. அவை எவையெவை?

    வைதிக முறைப்படி நடக்கும் திருமணங்களில் பார்க்கப்படும் பொருத்தங்கள் பத்து மட்டுமல்ல. மொத்தம் பதினாறு. அந்தப் பதினாறில் பத்து பொருந்தினாலே திருமணம் செய்யலாம் என்பது கருத்து. அந்த பதினாறு பொருத்தங்கள் எவையெவை எனப் பார்க்கலாமா?

    1. கிரக பொருத்தம்
    2. நட்சத்திர பொருத்தம்
    3. கண பொருத்தம் (மணமக்களின் குணப் பொருத்தத்தை இது குறிக்கும்)
    4. மகேந்திர பொருத்தம் (குழந்தைப் பேறு)
    5. ஸ்திரி தீர்க்க பொருத்தம் (தீர்க்க சுமங்கலியாக இருக்கும் பெருமை)
    6. யோனி பொருத்தம் (இன்பமான இல்லறவாழ்க்கைக்காக)
    7. இராசி பொருத்தம்
    8. இராசியதிபதி (மணமக்களின் மனவொற்றுமைக்கு)
    9. வசிய பொருத்தம் (ஒருவர் மீது ஒருவருக்கு உண்டாகும் ஈர்ப்பு)
    10. இரஜ்ஜு பொருத்தம் (மாங்கல்ய பலம்)
    11. வேதை பொருத்தம் (வாழ்வில் வரும் இன்பதுன்பங்களைக் காட்டும்)
    12. விருஷ பொருத்தம் (வம்சா விருத்தி)
    13. ஆயுள் பொருத்தம்
    14. புத்திர பொருத்தம்
    15. நாடி பொருத்தம்
    16. கிரக பாவ பொருத்தம் (செய்த செய்யப் போகும் பாவங்கள் பற்றியது)

    மனப்பொருத்தம் மட்டும் இருந்தால் போதாது. ஒவ்வொருவருக்குமான உடற் பொருத்தமும் தேவை. அது இருந்தால்தான் இன்பம் பெருகி இல்லறம் நிலைக்கும். அதையும் கவியரசர் கண்ணதாசன் ஒரு பாட்டில் சொல்லியிருக்கிறார்.

    மனைவி அமைவதெல்லாம் இறைவன் கொடுத்த வரம்
    மனது மயங்கியென்ன உனக்கும் வாழ்வு வரும்
    பொருத்தம் உடலிலும் வேண்டும்
    புரிந்தவன் துணையாக வேண்டும்
    படம் – மன்மதலீலை
    இசை – திரையிசைச் சக்கரவர்த்தி எம்.எஸ்.விசுவநாதன்

    இப்படியெல்லாம் பொருந்தி வாழும் கணவன் மனைவியரைக் கண்டால் எல்லாருக்கும் மகிழ்ச்சி வரும். சிலருக்கு மட்டும் பொறாமை வரும். அதற்கும் உண்டு ஒரு கண்ணதாசன் பாட்டு.

    எனக்கும் உனக்குந்தான் பொருத்தம்
    அதில் எத்தனை கண்களுக்கு வருத்தம்
    படம் – முகராசி
    இசை – திரையிசைத் திலகம் கே.வி.மகாதேவன்

    காதலரோடுதான் பொருத்தம் பார்க்க வேண்டுமா? கடவுளோடும் பொருத்தம் பார்க்கிறார் வள்ளலார்.

    எனக்கும் உனக்கும் இசைந்த பொருத்தம் என்ன பொருத்தமோ
    இந்தப் பொருத்தம் உலகில் பிறருக்கு எய்தும் பொருத்தமோ

    முருகப் பெருமானின் திருவருள் முழுமையாகப் பெற்றவர் வள்ளலார். வெற்றுக் கண்ணாடியில் மயிலேறி கந்தன் வரக்கண்ட மாமணி அவர்.

    ஆனால் பாடலில் முருகனை மெய்ப்பொருள் வடிவமாகவே எழுதியிருக்கிறார். அந்த மெய்ப்பொருளோடு தனக்கு உண்டான பொருத்தத்தை வியந்து பாராட்டுகிறார்.

    ஆண்டவனோடு பொருந்திய உள்ளத்தில் துன்பமில்லை. துயரமில்லை. வலிகள் இல்லை. வேதனை இல்லை. எல்லாம் இன்ப மயம். பேரின்பமயம்.

    வள்ளலார் அருளிய திருவருட்பாவின் இந்த அற்புத வரிகள் நம்ம வீட்டு தெய்வம் திரைப்படத்தில் குன்னக்குடி வைத்தியநாதன் இசையில் இந்தப் பாடல் இடம் பெற்றது. என்ன… ஒரு திருமண மேடையில் விலைமகளொருத்தி ஆடிப்பாடுவதாக அமைந்த காட்சியில் பாடல் இடம் பெற்றது.

    பதிவில் இடம் பெற்ற பாடல்கள்
    1. என்ன பொருத்தம் (டி.எம்.எஸ், பி.சுசீலா) – http://youtu.be/KJobbwySqRI
    2. எனக்கும் உனக்குந்தான் (டி.எம்.எஸ், பி.சுசீலா) – http://youtu.be/b_6C2Z3-8XQ
    3. மனைவி அமைவதெல்லாம் (கே.ஜே.ஏசுதாஸ்) – http://youtu.be/f4VxmTuaztQ
    4. எனக்கும் உனக்கும் இசைந்த (பி.சுசீலா) – http://youtu.be/m0urUMBv_ZA

    பின்குறிப்பு – என்ன பொருத்தம் பாடலிலும் எனக்கும் உனக்குந்தான் பொருத்தம் பாடலிலும் புரட்சித்தலைவர் எம்.ஜி.ஆரும் புரட்சித்தலைவி ஜெயலலிதாவும் நடித்தது என்ன அதிசயப் பொருத்தமோ!

    அன்புடன்,
    ஜிரா

    272/365

     
    • uma chelvan 9:57 pm on August 30, 2013 Permalink | Reply

      Very interesting post! ஆனால், கல்யாணம் தான் கட்டிக்கிட்டு ஓடி போலாமா இல்ல ஓடி போய் கல்யாணம் தான் கட்டிக்கலமா என்ற கால கட்டத்லில் பொருத்தம் எங்கே பார்கிறது???? எது எப்படி இருப்பினும், காதலின் போது நாம் ஒருவர் மீது வைக்கும் “பேரன்பு என்றும் பெரும் துன்பம் தான்”!!!

    • uma chelvan 11:42 pm on August 30, 2013 Permalink | Reply

      நாம் ஒன்றா வேறா? ஒன்றெனில் சரியானதைச்செய்யும் சக்தி வரட்டும், வேறெனில் வீணாய் கனவுகளில் காலம் கரையாதிருக்கட்டும்…. அன்பு சத்தியம் என்பதால் என் அவசரத்துக்கு உடனே வராது, ஆனாலும் காத்திருக்க திடம் கிடைக்கும் சன்னதியில்.
      நானென்றால் அது அவளும் நானும், ஆதலால் காத்திருத்தலும் அவளால், காத்திருத்தலும் அவளே !! A wonderful post by Dr. Rudhran….I think it is most appropriate for this post !!!

    • rajinirams 4:32 am on August 31, 2013 Permalink | Reply

      பதினாறு பொருத்தங்களையும் பட்டியலிட்டு.அதற்கு”பொருத்தமான”பாடல்களையும் கொன்டு அருமையான பதிவை தந்திருக்கிறீர்கள்.புருஷன் பொஞ்சாதி பொருத்தம் தான் வேணும்-பொருத்தம் இல்லாட்டி வருந்த தான் வேணும் என்ற வாலியின் வரிகளும்.பொருத்தமென்றால் புதுப்பொருத்தம் பொருந்தி விட்ட ஜோடி-நான் புலவனென்றால் பாடிடுவேன் கவிதை ஒரு கோடி என்ற கவியரசரின் வரிகளும் நினைவிற்கு வருகிறது.நன்றி.

    • amas32 6:10 pm on September 2, 2013 Permalink | Reply

      சூப்பர் போஸ்ட் ஜிரா 🙂 ரொம்ப ரசித்துப் படித்தேன் 🙂 சமையல் குறிப்பில் தான் நீங்கள் வல்லவர் என்று நினைத்தேன், ஜோசியப் பொருத்தங்கள் பார்ப்பதிலும் நீங்கள் காழியூர் நாராயணன் என்று இன்று தான் தெரிந்து கொண்டேன் 🙂

      //பொருத்தம் உடலிலும் வேண்டும்
      புரிந்தவன் துணையாக வேண்டும்// அடுத்த வரிகள் “கணவனின் துணையோடு தானே, காமனை வென்றாக வேண்டும்” என்று வரும் இல்லையா? கண்ணதாசன் கண்ணதாசன் தான்!

      amas32

    • Rajarajeswari jaghamani 5:50 pm on February 25, 2014 Permalink | Reply

      அருமையாக ரசிக்கவைத்த பாடல்களும் , பகிர்வுகளும் ..பாராட்டுக்கள்..!

  • என். சொக்கன் 11:36 pm on August 19, 2013 Permalink | Reply  

    விளக்கு வைத்தேன் 

    • படம்: திருமலை தென்குமரி
    • பாடல்: திருப்பதி மலை வாழும்
    • எழுதியவர்: தென்காஞ்சி பாரதிசாமி
    • இசை: குன்னக்குடி வைத்தியநாதன்
    • பாடியவர்: சீர்காழி கோவிந்தராஜன்
    • Link: http://www.youtube.com/watch?v=MR0l_ja1qUA

    அன்பெனும் அகல் விளக்கை ஏற்றிவைத்தேன், அதில்

    ஆசையென்னும் நெய்யை ஊற்றிவைத்தேன்,

    என் மனம் உருகிடவே, பாடி வந்தேன், உன்

    ஏழு மலை ஏறி ஓடி வந்தேன்!

    பிரபலமான இந்தப் பாடலை எழுதியவர் பெயர் தென்காஞ்சி பாரதிசாமி என்று நேற்றுதான் தெரிந்துகொண்டேன். எளிய மொழியில் மிகவும் அழகான பக்திப் பாடல்!

    குறிப்பாக, இந்த நான்கு வரிகள், ஆழ்வாரின் இன்பத் தமிழ்.

    நாலாயிரம் திவ்யப் பிரபந்தம் / ஆழ்வார் அருளிச் செயலில் பூதத்தாழ்வார் எழுதிய முதல் வெண்பா. அதில், திருமாலுக்கு இப்படி ஒரு விளக்கை ஏற்றிவைக்கிறார்:

    அன்பே தகளியா, ஆர்வமே நெய்யாக,

    இன்பு உருகு சிந்தை இடுதிரியா, நன்புருகி

    ஞானச் சுடர் விளக்கு ஏற்றினேன் நாரணர்க்கு

    ஞானத் தமிழ் புரிந்த நான்.

    நாராயணா,

    என்னுடைய அன்புதான் விளக்கு,

    நான் உன்மேல் கொண்டடிருக்கிறஆர்வம்தான் நெய்,

    எந்நேரமும் உன்னையே நினைக்கின்ற அந்தச் சிந்தனைதான் திரி…

    இவற்றைக் கொண்டு ஞானத் தமிழின் துணையால் நான் உனக்கு ஒரு விளக்கு ஏற்றிவைத்தேன்!

    எளிமையான பாடல்தான். இல்லையா?

    இப்போது சினிமாப் பாட்டு வரிகளை ஒருமுறை படித்துப்பாருங்கள். அழகான பாசுரத்தை இன்னும் கொஞ்சம் எளிமையாக்கி எத்துணை பேர்க்குக் கொண்டு சேர்த்துவிட்டது இந்தப் பாடல்!

    ***

    என். சொக்கன் …

    19 08 2013

    261/365

     
    • rajinirams 1:03 am on August 20, 2013 Permalink | Reply

      அடடா-இந்த பாடலை எழுதியவர் உளுந்தூர்பேட்டை சண்முகமோ பூவை செங்குட்டுவனோ எழுதியிருப்பார் என்று நினைத்திருந்தேன்-பெரும்பாலும் எல்லோருமே அறிந்த இந்த அற்புதமான பாடலை எழுதியவர் தென் காஞ்சி பாரதிசாமி என்பதை “வெளிச்சத்திற்கு” கொண்டு வந்ததற்காகவே உங்களை பாராட்ட வேண்டும். நன்றி. திருமலை திருமாலை வாழ்த்தி வணங்க இது நல்ல தமிழ் வார்த்தை பூக்களை கொண்ட பக்திமாலை.

  • mokrish 11:49 pm on August 17, 2013 Permalink | Reply  

    கல்லிலே கலைவண்ணம் கண்டோர் 

    சென்னையில் எங்கள் அலுவலகம் வரும் அமெரிக்கர்களும்  ஐரோப்பியர்களும் மற்ற நாட்டினரும் பார்த்தே தீர வேண்டும் என்று அடம் பிடிப்பது இரண்டு இடங்கள் – ஒன்று பனகல் பார்க் புடவை கடைகள் இன்னொன்று மாமல்லபுரம். ஒருமுறை ஜப்பானிலிருந்து வந்தவர்களுடன் மாமல்லபுரம் செல்ல வேண்டியிருந்தது. பார்த்த இடம்தான். ஆனால் உடன் வந்தவர்களின் உற்சாகம் எனக்கும் தொற்றிக்கொள்ள, எல்லா இடங்களையும் ஆர்வத்துடன் பார்த்தோம்.

    அதில் ஒருவர் கையில் இருந்த Lonely Planetல் இந்த இடம் பற்றி நிறைய விவரங்கள் படித்திருந்தார். அங்கே அவர் பார்த்த சிற்பங்களை Poetry in Stone என்று குறிப்பிட்டார். அட இது கல்லிலே கலை வண்ணம் தானே? குமுதம் படத்தில் கவி கா மு ஷெரிப் எழுதிய கல்லிலே கலை வண்ணம் என்ற பாடல் வரிகள்  (இசை கே வி மகாதேவன் பாடியவர் சீர்காழி கோவிந்தராஜன் )

    http://www.youtube.com/watch?v=g-HUpdB_OeI

    கல்லிலே கலைவண்ணம் கண்டான் – இரு

    கண்பார்வை மறைந்தாலும் காணும் வகை தந்தான்

    பல்லவர் கோன் கண்ட மல்லை போலப்

    பாரெங்கும் தேடினும் ஊரொன்றும் இல்லை

    சொல்வதும் இதைத்தானே?

    வா ராஜா வா படத்தில் மாமல்லபுரத்தின் சிறப்பு பற்றி அழ வள்ளியப்பா எழுதிய பாடல் (இசை குன்னக்குடி வைத்யநாதன் பாடியவர் எல் ஆர் ஈஸ்வரி).  http://www.youtube.com/watch?v=TlR7UH3D-J8

    கல்லெல்லாம் சிலை செஞ்சான் பல்லவ ராஜா

    அந்த கதை சொல்ல வந்தேனே சின்ன ராஜா

    ஓட்டுக்கல்ல சேர்க்காம ஒரே கல்ல குடைஞ்செடுத்து

    கட்டிவெச்சான் மண்டபத்தை பல்லவ ராஜா அதை

    கச்சிதமா சொல்ல வந்தேனே சின்ன ராஜா

    கடலோரம் கோபுரம் மலைமேலே மண்டபம்

    எப்படித்தான் செஞ்சானோ பல்லவ ராஜா

    அதை அப்படியே சொல்ல வந்தேன் சின்ன ராஜா

    சர்வர் சுந்தரம் படத்திலும் மகாபலிபுரம் பற்றி கண்ணதாசன் எழுதிய ஒரு அருமையான பாடல் உண்டு.(இசை விஸ்வநாதன் ராமமூர்த்தி பாடியவர் பி சுசீலா & குழுவினர்)

    http://www.youtube.com/watch?v=Uz_OGjZoPro

    சிலை எடுத்தான் ஒரு சின்ன பெண்ணுக்கு

    கலை கொடுத்தான் அவள் வண்ண கண்ணுக்கு

    ஆடை கொடுத்தான் அவள் உடலினிலே

    ஆட விட்டான் இந்த கடலினிலே

    படை கொண்ட பல்லவன் ஆக்கிவைத்தான்

    பருவத்தின் சாரத்தை தேக்கி வைத்தான்

    கன்னி பெண்ணை தேரினில் தூக்கி வைத்தான்

    காதலை ஏன் அவன் பாக்கி வைத்தான்…

    அன்னமிவள் வயதோ பதினாரு

    ஆண்டுகள் போயின ஆறுநூறு

    இன்னும் இவள் முதுமை எய்தவில்லை

    என்னதான் ரகசியம் தெரியவில்லை

    கல்கி சிவகாமியின் சபதத்தின் முன்னுரையில் “கையிலே பிடித்த கல்லுளிகளையே மந்திரக் கோல்களாகக் கொண்டு எந்த மகா சிற்பிகள் இந்த மகேந்திர ஜாலங்களைச் செய்தார்களோ என்று நினைக்கும்போது அந்தச் சிற்பிகளைக் கையெடுத்துக் கும்பிடத் தோன்றியது” என்று எழுதியிருந்தார். எனக்கும்தான்.

    மோகனகிருஷ்ணன்

    259/365

     
    • rajinirams 8:51 pm on August 19, 2013 Permalink | Reply

      நினைவாலே சிலை செய்து அருமையான பதிவை செதுக்கி “சிற்பி”த்திருக்கிறீர்கள். பாராட்டுக்கள். சிற்பி செதுக்காத பொற்சிலையோ.கண் கவரும் சிலையே இப்படி சி(ல)லை பாடல்களும் இருக்கின்றன. நன்றி.

  • GiRa ஜிரா 7:30 am on July 7, 2013 Permalink | Reply  

    வாழ்க! வாழ்க!! 

    வாழ்த்துவதற்கு இதயம் வேண்டும். ஒருவரை உளமாற உணர்வாற “வாழ்க! வாழ்க!!” என்று வாழ்த்துவதற்கும் ஒரு நல்ல இதயம் வேண்டும்.

    வாழ்க்கையில் ஒவ்வொரு கட்டத்திலும் யாரையாவது வாழ்த்திக் கொண்டுதான் இருக்கிறோம். அப்படியிருக்கும் போது திரைப்படத்தில் வாழ்த்துப்பாடல்கள் வராமலா இருக்கும்!

    நல்வாழ்த்து நான் சொல்லுவேன். நல்லபடி வாழ்கவென்று” என்று கவியரசர் கண்ணதாசன் எழுதினாரே. ஒருவரை எதற்காக வாழ்த்துகிறோம் என்பதற்கான காரணத்தை இதைவிட சுருக்கமாகவும் தெளிவாகவும் சொல்ல முடியுமா!

    சரி. வாழ்த்தை எப்படிச் சொல்ல வேண்டும்? வாழ்க வாழ்க என்று எல்லாச் சூழ்நிலையிலும் ஒரே மாதிரி சொன்னால் அதில் சுவை இருக்காது. ஒவ்வொரு சூழ்நிலையிலும் ஒவ்வொரு விதமாகச் சொல்ல வேண்டும். திரைப்படத்தில் கவிஞர்கள் வெவ்வேறு சூழ்நிலைகளில் எப்படி வாழ்த்தியிருக்கிறார்கள் என்று சில பாடல்களைப் பார்த்துத் தெரிந்து கொள்வோமா!

    முதலில் பிறந்தநாள். கையில் ஒரு பரிசைக் கொடுத்து விட்டு வாழ்க என்றால் சரியாக இருக்கும். ஆனால் அது அந்தச் சூழலின் மகிழ்ச்சியைப் பெருக்குமா? இல்லை. இப்போதெல்லாம் கேக் வெட்டும் போது சுற்றி நின்று அனைவரும் “Happy Birthday To You” என்று பாடும் போது அந்த இடமே மகிழ்ச்சியில் மூழ்கிவிடுகிறது அல்லவா.

    அதையே அழகாக “என்னோடு பாடுங்கள். நல்வாழ்த்துப் பாடல்கள்” என்று நான் வாழவைப்பேன் திரைப்படத்தில் இடம் பெற்ற பிறந்தநாள் காட்சிக்காக எழுதினார். எல்லாரும் சேர்ந்து நல்வாழ்த்துப் பாடினால் பிறந்தநாள் கொண்டாட்டம் சிறப்புறும் என்பது வாலியின் கருத்து.

    அடுத்தது திருமணம். புதுவாழ்க்கை தொடங்கும் மகிழ்ச்சியான தருணம் என்றாலும் ஒரு மெல்லிய சோககும் இருக்கும். பிறந்த வீட்டை விட்டுப் புகுந்த வீட்டுக்குக் கணவனே எல்லாம் என்று செல்லும் பெண். இதுவரையில் பாராட்டிச் சீராட்டி வளர்த்த பெண்ணைப் பிரியும் பெற்றோர்கள் என்று உணர்ச்சிக் கலவையாக இருக்கும் அந்த இடம்.

    இந்தச் சூழ்நிலையில் எப்படி வாழ்த்துவது? நெஞ்சிருக்கும் வரை திரைப்படத்தில் “பூமுடிப்பாள் இந்தப் பூங்குழலி” என்ற பாடலில் கண்ணதாசன் இப்படியெல்லாம் வாழ்த்துகள்.

    கொட்டியது மேளம்
    குவிந்தன கோடி மலர்கள்
    கட்டினான் மாங்கல்யம்
    மனை வாழ்க துணை வாழ்க குலம் வாழ்க
    கைத்தலம் தந்தேன் என் கண்மணி வாழ்க
    கடமை முடிந்தது கல்யாணம் வாழ்க
    அடைக்கலம் நீயென்று வந்தனள் வாழ்க
    ஆண்டவன் போலுன்னைக் கோயில் கொண்டாட
    பூமுடிப்பாள் இந்தப் பூங்குழலி

    திரையிசைப் பாடல்களை எழுதுகின்றவர்களுக்கு ஏதேனும் சந்தேகம் வந்தால் படிக்க வேண்டிய அகராதியாக கவியரசர் இந்தப் பாட்டிலும் இருக்கிறார்.

    திருமணத்தின் முதற்பலன் குழந்தை. மக்கட்பேறு என்றே வள்ளுவர் குறிப்பிடுகிறார். அப்படியொரு பெண் வயிறு நிறைந்து சுமக்கும் காலகட்டத்தில் அவள் மகிழ்ச்சிக்காக வளைகாப்பு நடத்துவது வழக்கம். அந்த வளைகாப்பில் அந்தப் பெண்ணை எப்படியெல்லாம் வாழ்த்தலாம்? கர்ணன் படத்தில் “மஞ்சள் முகம் நிறம் மாறி” என்ற பாடலில் கவியரசர் கண்ணதாசன் வாழ்த்துவதைப் பாருங்கள்.

    மலர்கள் சூட்டி
    மஞ்சள் கூட்டி
    வளையல் பூட்டி
    திலகம் தீட்டி
    மா தின்று வாழ் என்று வாழ்த்துப் பாடுவோம்

    குழந்தையைச் சுமக்கும் அந்தப் பெண்ணுக்கு மலர்களைச் சூட்டி மஞ்சளைப் பூசி கையிரண்டும் நிறைய வளையல்களை அடுக்கி திலகமிட்டு அலங்கரிப்பார்கள். இத்தனை செய்தாலும் அந்தப் பெண்ணின் மனம் மாங்காய் கடிப்பதிலேயே இருக்கும். அதைத்தான் கவியரசர் பாட்டில் காட்டுகிறார்.

    திருமணம் முடிந்தது. குழந்தையும் பிறந்தது. அது மட்டும் போதுமா? நீடு வாழ வேண்டாமா? பீடு வாழ வேண்டாமா? அப்படி வாழ்வாங்கு வாழ்ந்தாலும் உலகம் பெண்ணைத்தான் தீர்க்க சுமங்கலி என்று வாழ்த்துகிறது. சரி. அந்த தீர்க்கசுமங்கலியை எப்படி வாழ்த்துவது? மறுபடியும் கண்ணதாசனையே கேட்போம்.

    தீர்க்க சுமங்கலி வாழ்கவே
    அந்தத் திருமகள் குங்குமம் வாழ்கவே
    காக்கும் தேவதை வாழ்கவே
    அவள் காக்கும் நல்லறம் வாழ்கவே

    தீர்க்கசுமங்கலி படத்துக்காக எழுதிய இந்த வரிகளிலிருந்து குடும்பத்தின் நல்லறத்தைக் காப்பது பெண்ணே என்பதைப் புரிந்து கொள்ளலாம்.

    சரி. பதவியில் இருக்கும் பெரியவர்களை எப்படி வாழ்த்த வேண்டும்? ஆண்டு அரசாளும் மன்னனை எப்படி வாழ்த்த வேண்டும்? இந்த முறை கவிஞர் முத்துலிங்கத்திடம் பாடம் கேட்கலாம். ராஜரிஷி படத்தில் கௌசிக மன்னனை எப்படி வாழ்த்திப் பாடுகிறார்கள் என்று பார்க்கலாம்.

    கருணைக்கடலே வாழ்க வாழ்க
    காக்கும் நிலமே வாழ்க வாழ்க
    அறத்தின் வடிவே வாழ்க வாழ்க
    அரசர்க்கரசே வாழ்க வாழ்க
    அழகிய கலை நிலவே என்றும் வாழ்க வாழ்கவே
    அருள் மழை தரும் முகிலே என்றும் வாழ்க வாழ்கவே
    இமயமலை போல் புகழில் உயர்ந்தாய்
    உனது கொடையால் மனதில் நிறைந்தாய்

    அரசனை வாழ்த்திப் பாடுகையில் அந்த அரசன் காட்டும் பண்பு நலன்களையும் ஆட்சி செய்யும் முறையையும் வாழ்த்திப் பாட வேண்டும். அதைத்தான் இந்தப் பாட்டு சொல்கிறது.

    நீரின்றி அமையாது உலகு என்பது வள்ளுவன் வாக்கு. அது உண்மை என்று இன்றைய நிலை நமக்குப் பாடமாக இருக்கிறது. அதனால்தான் அன்று பெரியவர்கள் “பொய்யாக் குலக்கொடி” என்று வையை ஆற்றைப் பாடினார்கள். இது போன்ற ஆறுகளைப் பாராட்டும் போது எப்படி வாழ்த்த வேண்டும்? காவிரியாற்றையே எடுத்துக் கொள்வோம். அகத்தியர் திரைப்படத்தில் கவிஞர் கே.டி.சந்தானம் காவியாற்றை எப்படியெல்லாம் வாழ்த்துகிறார் பாருங்கள்.

    நடந்தாய் வாழி காவேரி நடந்தாய் வாழி காவேரி
    நாடெங்குமே செழிக்க நன்மையெல்லாம் சிறக்க
    உணவளிக்கும் உழவர்க்கெல்லாம் கண்ணாக பண்பு
    உயர்ந்த தமிழ் நாட்டின் செல்லப் பெண்ணாக
    புலவரெல்லாம் பாராட்டும் பொன்னாக
    அன்பு பொங்கிவரும் காவிரியே வாழியாவே

    ஆற்றினால் உண்டாகும் செழிப்பையும் அது நீக்கும் பசிப்பிணியையும் சொல்லி வாழ்த்த வேண்டும். இப்படியெல்லாம் வாழ்த்திக் கொண்டாடினால்தான் ஆறோடும் மண்ணில் எங்கும் நீரோடும்.

    தெய்வத்தை எத்தனையோ முறை எத்தனையோ விதங்களில் வாழ்த்தியாகி விட்டது. ஆனால் தெய்வம் குடியிருக்கும் திருக்கோயிலை?

    தஞ்சைப் பெரிய கோயில் பல்லாண்டு வாழ்கவே
    தாரணியில் தமிழ் போல நிலை நின்று வாழ்கவே

    நிலைத்து நிற்க வேண்டிய கோயில் என்பதால் மொழியோடு தொடர்பு படுத்தி தமிழைப் போல நிலைநின்று வாழ்க என்று எழுதியிருக்கிறார் கவியரசர் கண்ணதாசன்.

    எல்லாம் இருப்பது போல இருந்தாலும் சிலருக்கு வாழ்க்கையில் மகிழ்ச்சியே இருப்பதில்லை. ஒன்று மாற்றி ஒன்று ஏதேனும் வந்து கொண்டேயிருக்கும். அவர்களுக்கு எப்படி வாழ்த்துவது? மறுபடியும் படத்தில் வாலி கற்றுத் தருகிறார்.

    நலம் வாழ என்னாளும் என் வாழ்த்துகள்

    ஆர்ப்பாட்டமே இல்லாத அமைதியான வாழ்த்து. வாழ்த்தப்படுகின்றவருக்கு அந்த வாழ்த்து அமைதியைக் கொண்டு வரட்டும் என்று வாலி அப்படி வாழ்த்துகிறார்.

    வாழ்த்துகள் எல்லாருக்கும் கிடைத்து விடுவதில்லை. வாழ்த்துவதற்கு சுற்றிலும் நல்ல உள்ளங்கள் இல்லாத பாவப்பட்ட உயிர்களும் உண்டு. அப்படியொரு உயிர் மற்றவர்களை வாழ்த்தும் போது மனதுக்குள் என்ன நினைக்கும்?

    எல்லோரும் நலம் வாழ நான் பாடுவேன்
    நான் வாழ யார் பாடுவார்

    இப்படிப்பட்ட உள்ளங்களுக்கு ஆண்டவனே துணையிருந்து காப்பாற்ற வேண்டும்.

    பதிவில் இடம் பெற்ற பாடல்கள்
    நல்வாழ்த்து நான் சொல்லுவேன் (பட்டிக்காடா பட்டனமா/எம்.எஸ்.வி) – http://youtu.be/HkXXY_m6EIY
    என்னோடு பாடுங்கள் (நான் வாழ வைப்பேன்/இளையராஜா) – http://youtu.be/pzO8BBL_Zu8
    பூமுடிப்பாள் இந்தப் பூங்குழலி (நெஞ்சிருக்கும் வரை/எம்.எஸ்.வி) – http://youtu.be/ZMUfKlNYulM
    மஞ்சள் முகம் நிறம் மாறி (கர்ணன்/ எம்.எஸ்.வி+டி.கே.ஆர்) – http://youtu.be/h-KP-0ifwQA
    தீர்க்கசுமங்கலி வாழ்கவே (தீர்க்கசுமங்கலி/ எம்.எஸ்.வி) – http://youtu.be/yLX9jP7O8Uo
    அழகிய கலை நிலவே (ராஜரிஷி / இளையராஜ) – http://youtu.be/_qEdcAxfPgs
    நடந்தாய் வாழி காவேரி (அகத்தியர்/குன்னக்குடி வைத்தியநாதன்) – http://youtu.be/1RGZSokw_nI
    தஞ்சைப் பெரிய கோயில் (ராஜராஜசோழன்/குன்னக்குடி வைத்தியநாதன்) – http://youtu.be/5DhrsSQ-2aY
    நலம் வாழ என்னாளும் (மறுபடியும்/ இளையராஜா) – http://youtu.be/JjRs0KjYzbo
    எல்லோரும் நலம் வாழ (எங்க மாமா/ எம்.எஸ்.வி) – http://youtu.be/KPM20P7HDLs

    அன்புடன்,
    ஜிரா

    218/365

     
    • amas32 7:47 am on July 7, 2013 Permalink | Reply

      அழகாக வாழ்த்துவதும் ஒரு கலை தான். வாழ்த்துகள் என்று வெறுமே சொல்வது எப்படி, பதினாறும் பெற்று பெரு வாழ்வு வாழுங்கள் என்று வாழ்த்துவது எப்படி. கேட்கவே மகிழ்ச்சியாக இருக்கிறது அல்லவா? வாழ்த்தவும் ஒரு நல்ல மனம் வேண்டும். சிலர் வாயிலிருந்து வாழ்த்தே வராது. நல்ல வாழ்த்துக்களைக் கேட்க வேண்டும் என்றால் கவிஞகர்களிடம் தான் செல்ல வேண்டும். நீங்கள் இங்கே அருமையான பல உதாரணங்கள் கொடுத்துள்ளீர்கள்!

      நாம் நிறைய நேசிக்கும் ஒருவரை வாழ்த்துவது எளிது. அதே பண்பு அனைவரையும் வாழ்த்தும் பொது நமக்கு வரவேண்டும். அதற்கு எளிமையான வழி எல்லோரையும் நேசிக்க வேண்டும் 🙂 பெரியாழ்வார் பெருமாளையே பல்லாண்டு பாடி வாழ்த்தியவர். அவருக்குள் தான் எத்தனை வாஞ்சை இருந்திருக்க வேண்டும்!

      வாழ்த்தும் போது வாழ்த்தைப் பெறுபவர் தேவை அறிந்து வாழ்த்துவதே சிறப்பு. அதுவே அவர்களுக்கு மகிழ்ச்சியைத் தரும். அதுதானே வாழ்த்துபவருக்கும் பெருமை! 🙂

      amas32

    • Uma Chelvan 7:49 am on July 7, 2013 Permalink | Reply

      “Ennodu padungal” TMS version is far better then SPB vesion !!

    • Uma Chelvan 7:58 am on July 7, 2013 Permalink | Reply

      அடுத்தவரை வாழ்த்த நல்ல மனமும் உயர்ந்த குணமும் வேண்டும். amas சொன்னது போல் பெரியாழ்வார் “பெருமாளை” பல்லாண்டு வாழ வாழ்த்தியவர். எல்லோரயும் வாழ்த்துங்கள் , நமக்கு எந்த குறையும் வராது!!!

    • rajinirams 10:29 am on July 7, 2013 Permalink | Reply

      சூப்பர்.வாழ்த்துப்பாடல்கள் என்பது செண்டிமெண்டாக எல்லோருக்கும் மிகவும் பிடித்தமான ஒன்று.தமிழில் வாழ்த்து பாடல்களுக்கு பஞ்சமே இல்லை.
      1)பேசும் தெய்வம்- வாலியின் நூறாண்டு காலம் வாழ்க.
      2)இதய வீணை- இன்றுபோல என்றும் வாழ்க-வாலி.
      3)சட்டம் என்கையில்-எங்க ரத்னம் தங்க ரத்னம் இன்று போல என்றும் வாழ்க-கண்ணதாசன்.
      4)ஊருக்கு உழைப்பவன்-பிள்ளை தமிழ் பாடுகிறேன்-காஞ்சி மன்னன் புகழ் போல காவியமாய் நீ வாழ்க,கடவுளுக்கும் கடவுளென கண்மணியே நீ வாழ்க-முத்துலிங்கம்
      5)காளி -வாழுமட்டும் நன்மைக்காக வாழ்ந்துபார்ப்போம்-கண்ணதாசன்.
      6)மனமார வாழ்த்துங்கள்-மனமார வாழ்த்துங்கள்.
      7)நெஞ்சில் ஓர் ஆலயம்-எங்கிருந்தாலும் வாழ்க-கண்ணதாசன்.
      8)நூற்றுக்கு நூறு-நான் உன்னை வாழ்த்தி பாடுகிறேன்-வாலி.
      9)அடுத்த வாரிசு- வாழ்க ராணி வாழ்க ராஜாங்கம்-பஞ்சு அருணாசலம்.
      10)அன்னை ஓர் ஆலயம்-அம்மா-மீண்டும் இந்த மண்ணில் வந்து தோன்ற வேண்டுமே
      வாழ்க வாழ்க மகனே என்று வாழ்த்தவேண்டுமே -வாலி.
      11) இதயக்கனி-நீங்க நல்லா இருக்கணும்-புலமைப்பித்தன்.
      12)நல்லவனுக்கு நல்லவன்-எங்க முதலாளி-வாலி.
      13)முகமது பின் துக்ளக்-பாவலன் பாடிய புதுமை பெண்ணை,happy birthday to you -வாலி.
      14)நாம் மூவர்-பிறந்த நாள் இன்று- வாலி.
      15) வசந்த ராகம்-நான் உள்ளத சொல்லட்டுமா,”வாழ்க நீங்கள் வாழ்க”.
      வாழ்க நீங்கள் வாழ்க”.

    • suri 1:07 pm on July 9, 2013 Permalink | Reply

      theerka sumangali vazhkave was written by vali!

    • SRINIVASAN 8:23 am on July 14, 2013 Permalink | Reply

      Reblogged this on srinivasan s.

  • GiRa ஜிரா 8:13 am on June 1, 2013 Permalink | Reply  

    இராகங்கள் பதினாறு 

    இன்றைய பதிவில் இரண்டு பாடல்களை ரசித்துப் பாராட்டப் போகிறேன்.

    இரண்டு பாடல்களையும் எழுதியவர்கள் வேவ்வேறு. இசையமைத்தவர்கள் வெவ்வேறு. பாடியவர்கள் வெவ்வேறு. நடித்தவர்களும் வெவ்வேறு. ஆனால் இயக்குனர் ஒருவரே. ஆம். திரு.ஏ.பி.நாகராஜன் இயக்கிய இரண்டு படங்களில் இடம் பெற்ற பாடல்கள் அவை.

    முதற்பாடல் – ஒரு நாள் போதுமா
    படம் – திருவிளையாடல்
    பாடியவர் – பாலமுரளிகிருஷ்ணா
    வரிகள் – கவியரசர் கண்ணதாசன்
    இசை – திரையிசைத் திலகம் கே.வி.மகாதேவன்
    நடிகர் – பாலையா
    பாடலின் சுட்டி – http://youtu.be/ppnzHXqT5Sg

    இரண்டாம் பாடல் – வென்றிடுவேன் நாட்டையும் நாதத்தால்
    படம் – அகத்தியர்
    பாடியவர்கள் – டி.எம்.சௌந்தரராஜன், சீர்காழி கோவிந்தராஜன்
    வரிகள் – உளுந்தூர்ப்பேட்டை சண்முகம்
    இசை – குன்னக்குடி வைத்தியநாதன்
    நடிகர்கள் – சீர்காழி கோவிந்தராஜன், ஆர்.எஸ்.மனோகர்
    பாடலின் சுட்டி – http://youtu.be/N-5btIpWZmQ

    இந்த இரண்டு பாடல்களிலும் இயக்குனரையும் தாண்டி காட்சியமைப்பில் ஒரு ஒற்றுமை உண்டு. ஆம். சங்கீதத்தின் சிகரங்களாக இருப்பவர்கள் பாடுகின்ற பாடல்களாக இவை இருக்கின்றன.

    மீன்காரன் பாடினால் பாட்டில் மீனைப்பற்றி வரும். வேடன் பாடினால் மானைப் பற்றி வரும். விவசாயி பாடினால் பயிர் வகைகள் வரும். ஆய்ச்சியர் பாடினால் பாலும் தயிரும் ஓடும். ஆனால் இவர்கள் வாக்கேயக்காரர்கள். அதாவது சங்கீத சாம்ராட்டுகள். இவர்கள் பாட்டில் என்ன வரும்?

    இராகமும் தாளமும் அள்ளக் குறையாமல் வரும். இராகங்களின் பெயர்களையே பாடலின் வரிகளில் வைத்து விளையாடுகிறார்கள். அப்படி எழுதிய கவிஞர்களை முதலில் வணங்குகிறேன்.

    காலத்தில் திருவிளையாடல் பாடலே முந்தியது. ஆகவே அதையே முதலில் எடுத்துக் கொள்வோம்.

    இசை கேட்க எழுந்தோடி வருவாரன்றோ
    எழுந்தோடி வருவாரன்றோ
    இசை கேட்க எழுந்தோடி வருவாரன்றோ

    எனக்கிணையாக தர்பாரில் எவரும் உண்டோ
    தர்பாரில் எவரும் உண்டோ..
    எனக்கிணையாக தர்பாரில் எவரும் உண்டோ

    கலையாத மோகனச் சுவை நானன்றோ
    மோகனச் சுவை நானன்றோ
    கலையாத மோகனச் சுவை நானன்றோ

    கான(ண)டா என் பாட்டுத் தேனடா
    இசை தெய்வம் நானடா

    பாட்டு வரிகளில் வருகின்ற இராகங்கள் தெரிகின்றதா? அவைகளை எடுத்துப் பட்டியல் இடுகிறேன், பாருங்கள்.

    எழுந்தோடி வருவாரன்றோ – தோடி இராகம்
    எனக்கிணையாக தர்பாரில் – தர்பார் இராகம்
    கலையாத மோகனச் சுவை – மோகன இராகம்
    காண(ன)டா என் பாட்டு தேனடா – கானடா இராகம்

    கவியரசர் எவ்வளவு அழகாக பாடல் வரிகளில் இராகங்களின் பெயர்களை பொருள் பொருந்திவரும்படி நெய்திருக்கிறார். அடடா!

    கவியரசர் அப்படிச் செய்தது முதற்படி என்றால் உளுந்தூர்ப்பேட்டை சண்முகம் பாடலை அடுத்த படிக்கு எடுத்துச் செல்கிறார். பாடல் முழுவதுமே இராகங்கள். அதுவும் போதாதென்று இன்னொரு புதுமையையும் செய்திருக்கிறார். அதைக் கடைசியாகச் சொல்கிறேன்.

    இது போட்டிப் பாட்டு. அகத்தியருக்கும் இராவணுக்கும் இடையில் இசைப்போட்டி. எல்லாரும் மீட்டிய வகையில் வீணை இசைத்தால் இவர்கள் இருவருக்கு மட்டும் எண்ணிய வகையிலேயே வீணை இசைக்கும். அப்பேர்ப்பட்ட மேதைகள். அதனால் பாடல் வரிகளும் மேதாவித்தனமாகவே இருக்கிறது. பதிவின் ரசிப்புத்தன்மைக்காக பாடலின் சிலவரிகளை நீக்கியிருக்கிறேன்.

    வென்றிடுவேன் நாதத்தால் வென்றிடுவேன்
    நாட்டையும் நாதத்தால் வென்றிடுவேன் எந்த
    நாட்டையும் நாதத்தால் வென்றிடுவேன்

    வென்றிடுவேன் உன்னை வென்றிடுவேன்
    பைரவி துணைவன் பாதம் பணிந்து
    உன்னை வென்றிடுவேன்

    இசை கேட்டு எழுந்தோடி வந்தான் உன்தன்
    இதயத்திலே வாழும் ஈசன் எனைத் தேடி
    எழுந்தோடி வந்தான்

    ஆரபிமானம் கொள்வார் வெறும்
    அகந்தையினால் உனது
    அறிவது மயங்கிட இறைவனே இகழ்ந்தனையே
    ஆரபிமானம் கொள்வார்

    சண்முகப் ப்ரியன் என்னும் தைரியமா?
    சங்கீதத்தில் எனக்கு இணையாகுமா?
    சண்முகப் ப்ரியன் என்னும் தைரியமா? இனிய
    சங்கீதத்தில் எனக்கு இணையாகுமா?

    நாடகமா தர்பார் நாடகமா?
    அடக்கு முறை தர்பார் நாடகமா? எதுவும்
    அவன் செயல் அல்லாமல் கூடிடுமா?

    ஹம்சத்வனி அமைத்த மன்னவன் நான்
    அனைத்தும் உன் வசந்தானா ஆணவம் ஏன்?

    மோகன
    கானம் நான் மீட்டிடுவேன்
    மனோலயம் இல்லை உன் பாட்டினிலே

    பாகேஸ்வரியோ பரம்பொருளோ?
    பாற்கடலில் துயிலும் சாரங்கனோ?
    யார் வந்தால் என்ன காம்போதி
    ராகம் ஒன்றே போதும் வென்றிடுவேன்

    கௌரி மனோகரி துணையிருப்பாள்
    கல்யாணி மணாளன் கை கொடுப்பான்
    சரஸ்வதி எந்நாவில் குடியிருப்பாள்
    சத்தியமே நிலைக்கும் வென்றிடுவேன்

    பாடல் வரிகள் நாடகத்தனமாக இருந்தாலும் எத்தனையெத்தனை இராகங்கள் பார்த்தீர்களா? படிப்பதற்கு எளிமையாக எடுத்துக் கொடுக்கிறேன்.

    நாட்டையும் நாதத்தால் வென்றிடுவேன் – நாட்டை
    பைரவி துணைவன் பாதம் பணிந்து – பைரவி
    இசை கேட்டு எழுந்தோடி வந்தான் – தோடி
    ஆரபிமானம் கொள்வார் வெறும் – ஆரபி
    சண்முகப் ப்ரியன் என்னும் தைரியமா? – சண்முகப்பிரியா
    நாடகமா தர்பார் நாடகமா? – தர்பார்
    ஹம்சத்வனி அமைத்த மன்னவன் நான் – ஹம்சத்வனி
    அனைத்தும் உன் வசந்தானா ஆணவம் ஏன்? – வசந்தா
    மோகன கானம் நான் மீட்டிடுவேன் – மோகனா
    மனோலயம் இல்லை உன் பாட்டினிலே – மனோலயம்
    பாகேஸ்வரியோ பரம்பொருளோ? – பாகேஸ்வரி
    பாற்கடலில் துயிலும் சாரங்கனோ? – சாரங்கா
    யார் வந்தால் என்ன காம்போதி – காம்போதி
    கௌரி மனோகரி துணையிருப்பாள் – கௌரிமனோகரி
    கல்யாணி மணாளன் கை கொடுப்பான் – கல்யாணி
    சரஸ்வதி எந்நாவில் குடியிருப்பாள் – சரஸ்வதி

    இராகங்கள் பதினாறு. ஆம். பாட்டில் வந்திருக்கும் இராகங்கள் பதினாறு. அடேங்கப்பா என்று மலைப்பாக இருக்கிறதல்லவா.

    அத்தோடு நின்றுவிடவில்லை உளுந்தூர்ப்பேட்டை சண்முகம் அவர்கள். சுரங்களையும் சொற்களாக மாற்றியிருக்கிறார்.

    சுரங்கள் “ச ரி க ம ப த நி” என்று ஏழு வகை என்பது தெரிந்திருக்கும். இந்தச் சுரங்களையே முன்னும் பின்னுமாக மாற்றிப் போட்டு சொற்களை உண்டாக்கியிருக்கிறார் கவிஞர். பாட்டாகப் பாடும் போது சுரங்கள் மறைந்து சொற்கள் வெளிப்படும்.

    ச ம ம – சமமா?
    ச ரி ச ம ம – சரி சமமா?
    நி ச ரி ச ம ம – நீ சரி சமமா?
    ம நி த நி பா த க ம – மனிதா நீ பாதகமா!

    இப்படியாக பாட்டெழுதிய கவிஞர்களும் நம் நாட்டில் இருந்தார்கள் என்று நினைத்து நாம் பெருமை மட்டுமே பட்டுக்கொள்ள வேண்டியதுதான்.

    அன்புடன்,
    ஜிரா

    182/365

     
    • anonymous 9:18 am on June 1, 2013 Permalink | Reply

      நலம் பெற வேண்டும் – நீயென்று
      இலை மறை காய் போல் – பொருள் கொண்டு…
      ——

      இராகங்கள் தவழும் இன்னிசைப் பதிவு
      முருகத் திரு. TMS அவர்களின் நினைவை மீண்டும் கிளறி விடும் பதிவு!

      இராக மாலிகை -ன்னு சொல்லுவாங்க;
      பல ராகங்களையும் கலந்து பாடும் பாட்டு!

      ஆனா, அந்தப் பாட்டிலேயே, இராகத்தின் பேரையும் வச்சி,
      அதையும் அந்த இராகத்திலேயே பாடுவது என்பது மிக அழகு!

      இதைச் சினிமாவில் சிற்சில இடங்களில் செஞ்சிருக்காங்க!
      ஆனா, முதலில் செஞ்சவரு யார் தெரியுமா?
      Murugan Talkies முதலாளியான = அருணகிரிநாதர்:)
      ——–

      • anonymous 10:11 am on June 1, 2013 Permalink | Reply

        கொல்லி -ன்னு ஒரு தமிழ்ப் பண் (இராகம்)
        அதைப் பாட்டில் பயன்படுத்தி, அதே பண்ணில், அந்தப் பாட்டையும் பாடிய அருணகிரி

        கந்தர் அலங்காரத்தில்…
        “கொல்லியைச் சேர்க்கின்ற சொல்லியை” -ன்னு ஒரு வரி வரும்;

        வள்ளி பேசுற பேச்சே, பண் போல இருக்காம்
        எந்தப் பண்? = கொல்லிப் பண் (நாத நாமக் கிரியை)

        அவள் நாதனின் நாமத்தைத் தானே, சதா “முருகா முருகா” -ன்னு காடு மேடெல்லாம் உளறிக்கிட்டு இருந்தா?
        அதான் போல = நாத நாமக் கிரியை
        இப்படிக், “கொல்லி-சொல்லி-வள்ளி” -ன்னு, பாடுன மொத ஆளு அருணகிரி:)
        ——

        நட்டபாடை, செவ்வழி
        தக்கேசி, கொல்லிக் காவளம்,
        இந்தளம், சீகாமரம், புறநீர்மை
        -ன்னு எத்தனை எத்தனையோ தமிழ்ப் பண்கள்…

        எல்லாம் போயிருச்சி:(
        தேவாரம்/ ஆழ்வார் பாசுரம் என்கிற Museum-ல்ல தான் பாக்க முடியும்;

        கர்நாடக சங்கீதம் -ன்னு ஒன்னையே பரக்கப் பரக்கப் பேசினா, இன்னொன்னு கேட்பார் அற்று போயிருச்சி:(
        ஏதோ, கர்நாடக சங்கீதத்திலேயே, தமிழ்ப் பாட்டா, இந்தக் காலத்தில் பாட ஆரம்பிச்சி இருக்காங்க! ஆனா இராகம் என்னமோ = கர்நாடகம் தான்! தமிழிசை அல்ல!

        எங்கேயோ போயிட்டோம்;
        சொல்ல வந்தது = பாட்டில் பண் பேரை வச்சி, அதே பண்ணில் பாடிய அருணகிரி!

    • anonymous 10:19 am on June 1, 2013 Permalink | Reply

      நீங்க குடுத்த ரெண்டு பாட்டும் ரொம்பப் பிடிக்கும்!
      குறிப்பா, பாலையா (பாலமுரளி)… “எனக்கு இணையாகத் தர்பாரில் எவரும் உண்டோ?” -ன்னு அதே தர்பார் ராகத்தில் பாடுவாரு…
      பாலையா Body Language அதுக்கு, செம:)

      உளுந்தூர்ப்பேட்டையார் பாட்டும், Top Class!
      யார் வந்தால் என்ன காம்போதி -ன்னு இராவணன் பாடும் போது, “கபோதி” ங்குறாப் போல லுக்கு விடுவாரு ஆர்.எஸ்.மனோகர்:)

      காம்போதி = சிவபெருமானுக்கு உரிய ராகம்;
      (வீணைக் கொடி உடைய வேந்தனே – பாட்டில் கூட, நிறைவா அது தான் வரும்!)

      சிவனுக்கு ஈடு யாரு? = அவ ஒருத்தி தானே?:)
      கௌரி மனோகரி துணையிருப்பாள் -ன்னு அகத்தியர் பாடி முடிச்சீருவாரு!
      ——

      ச ம ம – சமமா?
      நி ச ரி ச ம ம – நீ சரி சமமா?

      இதை எங்கே சொல்லாம விட்டுருவீங்களோ? -ன்னு, மனசைக் கையில் புடிச்சிக்கிட்டே படிச்சேன்; ஆனா கடைசீயாச் சொல்லீட்டீங்க; அதப் பாத்தப் பொறவு தான், மனசே நிம்மதியாச்சு:)

    • anonymous 10:28 am on June 1, 2013 Permalink | Reply

      இது போல இராகப் பெயர்கள் கொண்ட, இதர பாடல்கள்…

      உன்னால் முடியும் தம்பி படத்தில், “என்ன சமையலோ?”

      கல்யாணி = அரிசியில் கல்…ஆணி
      ராகம் வசந்தா; ருசித்து பார்க்க ரசம் தா
      கரி கரி கரி கரி – கறி காய்களும் இங்கே; கறி வேப்பிலை எங்கே?:)
      ———–

      இதே போல், “வீணைக் கொடியுடைய வேந்தனே”
      ராகம் பேரு, சொல்லுல ஒளிஞ்சி வராம, நேரடியாவே வந்துரும்

      காலையில் பாடும் ராகம் – பூபாளம்
      உச்சி வேளை ராகம் – சாரங்கா
      மாலையில் பாடும் ராகம் – வசந்தா

      இரக்கம் பற்றிய ராகம் – நீலாம்பரி
      மகிழ்ச்சிக்குரிய ராகம் – தன்யாசி
      யுத்த ராகம் – கம்பீர நாட்டை

      வெண்பா பாடுவது – சங்கராபரணம்
      அகவல் பா – தோடி
      யாழ் இசைக்கு – கல்யாணி

      கயிலை மலையானைக், கானத்தால் கவர்ந்த ராகம் – காம்போதி, காம்போதி, காம்போதி

    • anonymous 10:43 am on June 1, 2013 Permalink | Reply

      அட, எல்லாத்தையும் சொல்லிட்டு, சென்னையில் என் அம்மாவைப் பத்திச் சொல்லலீன்னா எப்படி?
      வாழ்க்கைல, பல விசயமெல்லாம், அவ கிட்ட போய் நிக்கும் போது தான், நடந்து இருக்கு!

      =திருமயிலை வாழ் கற்பகம்!
      =அவரு ஒதுக்கினாலும், அவனே அவனே -ன்னு மயிலா மாறித், தவங் கெடந்தவ!

      அவளை TMS பாடும் பாட்டுல தான், இராகத்தின் பேரு இழையோடுமே!
      கற்பக வல்லி நின் பொற்பதங்கள் பிடித்தேன்
      நற்கதி அருள்வாய் அம்மா!
      ——-

      ஏன் இந்த மௌனம் அம்மா ஏழை எனக்கருள
      ** ஆனந்த பைரவியே ** ஆதரித்தாளும் அம்மா!

      ** கல்யாணியே ** கபாலி காதல் புரியும் அந்த
      உல்லாசியே உமா உனை நம்பினேன் அம்மா!

      தஞ்சம் என அடைந்தேன் தாயே உன் சேய் நான்
      ** ரஞ்சனியே ** ரட்சிப்பாய் கெஞ்சுகிறேன் அம்மா!
      ——–

      சும்மா, TMS இழுப்பாரு பாருங்க, ஒத்த தந்தித் தம்பூரா கணக்கா…
      யம்மாடியோவ்…
      கர்நாடக சங்கீதப் பிதாமகர்கள் கூட, அம்புட்டு உருக்கமாப் பாட முடியாது;
      உருக்கம் வேற, இலக்கணம் வேற = ரெண்டும் நிக்கும் TMS கிட்ட!

      இந்தப் பாடல் பற்றி எப்பவோ இட்ட பதிவு
      http://ammanpaattu.blogspot.com/2007/03/blog-post_27.html

      கற்பகவல்லி, சின்னஞ் சிறு கிளியே = ரெண்டும் நாதசுரத்தில் வாசிச்சிக் கேட்கும் போது, போற உயிரும், கொஞ்ச நேரம் நிக்கும்!
      மா மயிலாள் = கற்பகத்து அம்மன்;

    • Simulation 10:47 pm on June 1, 2013 Permalink | Reply

    • elavasam 10:07 am on June 2, 2013 Permalink | Reply

      /பாட்டாகப் பாடும் போது சுரங்கள் மறைந்து சொற்கள் வெளிப்படும்./

      இதற்கு ஸ்வராஷ்ட்ரப்ரயோக எனப் பெயர்.

      • anonymous 10:30 am on June 2, 2013 Permalink | Reply

        அது, ஸ்வ ராஷ்ட்ர அல்ல (தாய் நாடு)
        ஸ்வராக்ஷர
        = ஸ்வர + அக்ஷர (சுரம் + எழுத்து)

        சாமகான லோலனே, சதா சிவா -ன்னு கீர்த்தனை..

        ச, ம, க -ன லோலனே -ன்னு ஸ்வரம் போலவும் பாட முடியும்
        சாம கானத்தின் லோலனே -ன்னும் பொருள் வராப் போல, பாட முடியும்!

        = ஸ்வரமும் + அட்சரமும் இழைந்து ஓடுவது = ஸ்வராக்ஷரம்

    • Saba-Thambi 2:09 pm on June 3, 2013 Permalink | Reply

      பதிவு பிரமாதம். பலே பலே!

      இன்னொரு பாடல் -ஒரு சில ராக பெயர்களுடன்:

      • anonymous 2:48 pm on June 3, 2013 Permalink | Reply

        sooper song sir! – sri priya in grand

        ரஞ்சனி… சிவ ரஞ்சனி

        அதி காலையில் வரும் பூபாள ராகம்
        ஆனந்தத் தேன் தரும் கல்யாணி ராகம்
        என்ன சொல்லி என்ன பாட
        கம்பன் இல்லை கவிதை பாட
        class lines & a song for shankar ganesh to treasure

    • chinnapiyan 5:56 am on August 8, 2013 Permalink | Reply

      பதிவும் அருமை. வந்த விமர்சனக்கருத்துகளும் பலே. மிகவும் ரசித்து மகிழ்ந்தேன், நன்றி, வாழ்க ஜிரா

    • badrirag 8:43 pm on November 27, 2013 Permalink | Reply

      ”நீ ஒரு ராக மாலிகை என் நெஞசம் உன் காதல் மாளிகை” என்ற பாட்டில், வரிக்கு ஒரு ராகம் என்று பாடியிருப்பார் பாலு (SPB). அருமையான உவமைகள்.

  • GiRa ஜிரா 10:44 am on May 26, 2013 Permalink | Reply  

    பாட்டானவன் 

    நேற்றோடு (25-மே-2013) ஒரு வீணையின் நரம்பு அறுந்தது!
    ஒரு புல்லாங்குழலின் இசைத்துளைகள் மூச்சு விட மறந்தன!
    மேளம் ஒன்று தாளங்களை எல்லாம் மறந்து பாளமானது!
    தமிழ்நாட்டின் பிதாமக இசைக்குயில் ஒன்றின் குரல் நின்று போனது!

    ம்ம்ம். ஆர்மோனியத்தின் காற்றுப் பைகளுக்கும் மூச்சுத்திணறல் வருமென்று யாருக்குத் தெரியும்!

    ஆம். ஏழிசை வேந்தர் டி.எம்.சௌந்தரராஜன் இன்று நம்மோடு இல்லை. அவர் வணங்கிப் பாடிய தமிழ்க்கடவுள் முருகப் பெருமான் திருவடியில் அவர் ஆன்மா அமைதியை அடைந்திருக்கும்.

    ஆனால் அவர் குரலால் உயிர் பெற்ற பாடல்கள் நம்மோடு இன்றும் ஊடாடிக் கொண்டு இருக்கின்றன.

    அவர் பாடிய சில பாடல்களைக் கொஞ்சமேனும் நினைத்துப் பார்ப்பதே நாம் அவருக்குச் செய்யும் சிறப்பான அஞ்சலியாகும்.

    எத்தனையோ கவிஞர்கள் எழுதிய பாடல்களை அவர் உணர்வுப்பூர்வமாக பாடியுள்ளார். அவையெல்லாம் திரைப்படப் பாத்திரங்களுக்குப் பொருத்தமான பாடல்கள். ஆனாலும் சில கவிஞர்கள் எழுதிய பாடல் வரிகள் அவருக்குப் பொருத்தமாக இருக்கும். அப்படியான சில பாடல்களை இந்தப் பதிவில் பார்க்கலாம்.

    பாட்டும் நானே பாவமும் நானே” என்ற கா.மு.ஷெரீப்பின் வரிகளைப் பாடச் சிறந்த பாடகர் வேறு யாராக இருக்க முடியும்?! திருவிளையாடல் திரைப்படத்தில் மதுரையின் தலைவன் சொக்கநாதனுக்கு மதுரை தந்த சௌந்தரராஜன் பாடியது மிகப் பொருத்தம்.

    அந்தப் பாடலின் அடுத்தடுத்து வரும் இன்னொரு வரியும் மிகப் பொருத்தம். “அசையும் பொருளில் இசையும் நானே”. உண்மைதான். திரையில் அசையும் பொருளில் (நடிகர்களின் பிம்பம்) இசையாக இருந்தது அவர் குரல்தான். முப்பதாண்டுகள் திரையில் ஒலித்த குரலல்லவா!

    கா.மு.ஷெரீப் மட்டும் தானா? இல்லை. வாலியும் இந்தப் பட்டியலில் உண்டு. ஒரு மிக அருமையான பாடலை எழுதினார். அந்தப் பாடலைப் பாடியவரும் நடித்தவரும் ஒருவரே. ஆம். கல்லும் கனியாகும் என்ற திரைப்படத்தில் கதாநாயகனாக நடித்தார் டி.எம்.சௌந்தரராஜன். அந்தப் படத்துக்கு இசை மெல்லிசை மன்னர் எம்.எஸ்.விசுவநாதன்.

    ஒரு இசைக்கலைஞனின் கதை. ஏழை. ஆனால் உடம்பெல்லாம் இசை ஆர்வம். உணர்வெல்லாம் இசை வேகம். தன்னுடைய குரலின் திறமையைக் காட்ட ஏதேனும் ஒரு வழி வேண்டுமல்லவா! ஒரு சிறிய இசைக்கருவி ஒன்றைச் செய்கிறான். அதை வாசிக்க வாசிக்க இசையூற்று பொங்கிப் பெருகுகிறது. அந்த மகிழ்ச்சியில் பாடுகிறான்.

    கை விரலில் பிறந்தது நாதம்
    என் குரலில் வளர்ந்தது கீதம்
    இசையின் மழையில் நனைந்து
    இதயம் முழுதும் குளிர்ந்து

    வாலி எழுதியது அந்தப் பாத்திரத்தை விடவும் டி.எம்.எஸ் அவர்களுக்கு மிகவும் பொருந்தும். டி.எம்.எஸ் குரலில்தான் பலப்பல தமிழ் கீதங்கள் வளர்ந்தன என்றால் மிகையாகாது. அவருடைய உச்ச காலகட்டத்தில் அவர் பாடாத நடிகர் யார்! அவருடைய குரலிசை மழையில் உலகத் தமிழர்கள் நனைந்தார்கள்… இன்னும் நனைந்து கொண்டு இருக்கிறார்கள் என்றால் மிகையாகாது.

    அடுத்து வைரமுத்து எழுதினார். இசைஞானி இளையராஜாவின் இசையில் எழுதிய அவருடைய வரிகள் இன்று பழைய பாடல்களை ரசித்து ருசித்த மக்களின் ரசனையை பிரதிபலிப்பதாக உள்ளது.

    தாய்க்கு ஒரு தாலாட்டு திரைப்படத்தில் இடம் பெற்ற “இளமைக்காலம் இங்கு என்று திரும்பும்” என்ற பாடலில் “பழைய பாடல் போல புதிய பாடல் இல்லை” என்று டி.எம்.எஸ் குரலாலே ஆதங்கத்தைப் பதிவு செய்தார். அதை உண்மை என்றுதான் என் மனம் நம்புகிறது. பழைய பாடல்களில் இருந்த குரல் வித்தைகளும் உச்சரிப்புச் சிறப்புகள் இன்றைய பாடல்களில் இல்லாமலே போனது சோகம் தான்.

    அடிப்படையில் டி.எம்.சௌந்தரராஜன் வைணவக்குடும்பத்தில் பிறந்தவர். ஆனால் அவர் விரும்பி உருகி வணங்கியது என்னவோ தமிழ்க்கடவுள் முருகனைத்தான். அதனால்தானோ என்னவோ அவர் பாடிய முருகன் பாடல்கள் காலத்தையும் தாண்டி நிற்கின்றன.

    அவருடைய முருகன் மீதான அன்பையும் ஊர் ஊராகச் சென்று முருகன் பாடல்களைப் பாடும் பண்பையும் கவிஞர் குழந்தைவேலன் எழுதிய ஒரு முருகன் பாட்டில் உணரலாம்.

    எந்தன் குரலில் இனிப்பதெல்லாம் கந்தன் குரலே
    இன்பம் தந்து காப்பதெல்லாம் கந்தன் அருளே
    ஊருக்கு ஊர் போவேன் தினம் தினமே
    அங்கு உட்கார்ந்து பாடுவது கந்தன் புகழே
    கன்னித்தமிழ் பாடுவது புது சுகமே அதில்
    காண்பதெல்லாம் கந்தன் கவிநயமே

    கவிஞர் குழந்தைவேலன் வரிகளுக்கு இசையமைத்துப் பாடியது டி.எம்.சௌந்தரராஜன் அவர்களே. ஒவ்வொரு வரியும் டி.எம்.எஸ் அவர்களுக்கு எவ்வளவு பொருத்தமாக இருக்கிறது. அவ்வளவும் முருகனருள்.

    கவியரசர் கண்ணதாசன் “ஒரு கோப்பையிலே என் குடியிருப்பு” என்ற பாடலில் சொன்ன ”இசைப் பாடலிலே என் உயிர்த்துடிப்பு” என்ற வரிகளை டி.எம்.எஸ் பாடுவது மிகப் பொருத்தம்.

    இதற்கெல்லாம் சிகரம் வைத்தாற் போல உளுந்தூர்ப்பேட்டை சண்முகம் ஒரு பாடல் எழுதினார். குன்னக்குடி வைத்தியநாதன் இசையில் அகத்தியர் படத்தில் டி.எம்.எஸ் பாடிய அந்தப் பாடல் வரி டி.எம்.எஸ் அவர்களுக்கு மிகமிகப் பொருத்தம்.

    நாட்டையும் நாதத்தால் வென்றிடுவேன்
    எந்த நாட்டையும் நாதத்தால் வென்றிடுவேன்

    உண்மைதான். டி.எம்.எஸ் குரலில் கிளம்பிய நாதம் தமிழ் நாட்டை வென்றது உண்மைதான்.

    தமிழ்த்திரையிசையிலும் முருகனருள் பாடிய பக்தியிசையிலாகட்டும் அவருடைய சாதனைகள் இன்னும் வேறு யாராலும் முறியடிக்கப்படாதவை. முறியடிக்கப்பட முடியாதவை.

    அவருடைய பாடல்களைக் கேட்கும் போதெல்லாம் டி.எம்.எஸ் என்ற மகாகலைஞன் வாழ்ந்த காலத்தில் நாமும் வாழ்ந்தோம் என்ற எண்ணம் பெருமிதத்தைக் கொடுக்கும்.

    பதிவில் இடம் பெற்ற பாடலின் சுட்டிகள்
    பாட்டும் நானே பாவமும் நானே (கே.வி.மகாதேவன்/கா. மு. ஷெரீஃப்) – http://youtu.be/BAVFuEqqV-k
    கை விரலில் பிறந்தது நாதம் (எம்.எஸ்.விசுவநாதன்/வாலி) – http://youtu.be/Bp8kuO1Dq-o
    எந்தன் குரலில் இனிப்பதெல்லாம் (டி.எம்.எஸ்/குழந்தைவேலன்) – http://youtu.be/2lOr4vZVueY
    ஒரு கோப்பையிலே என் குடியிருப்பு (கே.வி.மகாதேவன்/கண்ணதாசன்) – http://youtu.be/ICSeUl6j66E

    அன்புடன்,
    ஜிரா

    176/365

     
    • chinnak kannan 10:57 am on May 26, 2013 Permalink | Reply

      ஒவ்வொரு குயிலாக ஓய்வு பெற்று வருகின்றன..ம்ம்..இது தான் வாழ்க்கை..தொடக்கம் என்று இருந்தால் முற்றுப் புள்ளி இருக்கும் எனத் தெரிந்திருந்தும் அந்த முற்றுப்புள்ளி வரும்போது மனம் அலைபாய்கிறது
      நல்ல அஞ்சலி ஜிஆர்.

      இது நேற்று எழுதியிருந்தேன்

      1வெண்ணிலவை நேற்றுப் பார்த்து நின்றவன் – அதன்
      சென்றதன்மை பற்றி நன்று சொன்னவன்..
      2பெண்ணழகு போவதெண்ணி வியந்தவன் – பல
      3கட்டழகைக் குரலினிலே தொட்டவன்
      4ஆண்டவனைப் பார்த்துமனம் மகிழ்ந்தவன் – கொஞ்சம்
      மாண்டவரின் நிலையையுந்தான் சொன்னவன்
      வேண்டியவன் கண்ணனிட்ம் அருளையே – எனில்
      திண்டிவிட்டான் அவனுடைய கழலையே..

      1அன்று வந்ததும் அதே நிலா
      2பெண்போனால் இந்தப் பெண்போனால்
      3கட்டழகுப் பாப்பா கண்ணுக்கு
      4ஆண்டவன் படைச்சான் என்கிட்ட கொடுத்தான் அனுபவி ராஜான்னு அனுப்பிவச்சன்
      5வீடுவரை உறவு
      6 புல்லாங்குழல் கொடுத்த மூங்கில்களே

      இன்றும் அவர் பாடிய பாடல்கள் மனதில் படையெடுத்து வருகின்றன..அவரது குரலினிமை -யாராலும் நிரப்ப முடியாத ஒன்று..

    • Saba-Thambi 5:14 pm on May 26, 2013 Permalink | Reply

      மனமார்ந்த அஞ்சலி. அன்னாரின் உயிர் சாந்தி அடைவதாக!
      10 ஆயிரம் பாடல்களில் ஒன்றாவது உலகத்தின் எந்த மூலயிலோ ஒவ்வொரு நாளும் ஒலித்துக்கொண்டே இருக்கும். இது நிச்சயம்.

    • rajinirams 5:27 pm on May 26, 2013 Permalink | Reply

      சூப்பர்.பக்தி பரவசம் ஊட்டும் முருகர் பாடல்களானாலும் அச்சம் என்பது மடமையடா போன்ற எழுச்சி ஊட்டும் பாடல்களானாலும் டி.எம்.எஸ்ஸுக்கு ஈடு இணையில்லை. நன்றி. பாட்டும் நானே கண்ணதாசன் ஆயிற்றே.

    • Saba-Thambi 5:33 pm on May 26, 2013 Permalink | Reply

      Reblogged this on SABAS LOG and commented:
      RIP TM Soundrarajan. A playback legend who has sung more than 10,000 songs for the Tamil fans. Will be remembered forever.

    • Kana Praba 6:08 pm on May 26, 2013 Permalink | Reply

      அருமையான பதிவு ஜி.ரா டி.எம்.எஸ் என்ற ஆளுமை குறித்துப் பேசிக்கொண்டே போகலாம்

    • amas32 9:48 pm on May 26, 2013 Permalink | Reply

      TMS அவர்கள் போல் ஆசிர்வதிக்கப்பட்டவர்கள் அதிகம் பேர் கிடையாது. அவரை நம் தமிழ்நாடு அடைந்தது நாம் பெற்ற பேறு. அவர் பெருமை காலத்தால் அழிக்கமுடியாதது!

      amas32

  • GiRa ஜிரா 10:22 am on March 1, 2013 Permalink | Reply
    Tags: கே.பி.சுந்தராம்பாள், டி.ஆர்.மகாலிங்கம்   

    மாத்தி வாசி 

    பொருள்கோள் கேள்விப்பட்டிருக்கிறீர்களா? அதாவது ஒரு பாடலை எப்படியெல்லாம் பொருள் கொள்ள வேண்டும் என்று சொல்லும் இலக்கணம் அது.

    சொற்கள் உள்ளது உள்ளபடியே வரிசையாகப் படித்து அப்படியே பொருள் கொண்டால் அது ஆற்றுநீர்ப் பொருள்கோள்.

    அதே போல விற்பூட்டு பொருள்கோள் என்று உள்ளது. பூட்டுவிற் பொருள்கோள் என்றும் இதற்குப் பெயருண்டு.

    அதாவது செய்யுளின் கடைசிச் சொல்லை அங்கிருந்து எடுத்து செய்யுளின் முதலில் வைத்துப் பொருள் கொள்ள வேண்டும்.

    என்னுடைய நண்பன் ஒருவன் பேசுவதெல்லாம் கூட இந்தப் பூட்டுவிற் பொருள்கோள் வகையில்தான் வரும். சற்றே நகைச்சுவையும் கிண்டலும் கலந்துதான் எப்போதும் பேசுவான் அவன். ஒரு எடுத்துக்காட்டு சொல்கிறேன் பாருங்கள்.

    அவனுக்கெல்லாம் உக்கார வெச்சு வெட்டனும்… தலைமுடிய. காடு மாதிரி வளந்திருக்கு.”

    இதில் தலைமுடி என்பதை வரியின் முன்னால் சொன்னால் அதுவொரு சாதாரண கருத்து போல ஆகிவிடும். ஆனால் அதை வேண்டுமென்றே பின்னால் சொன்னதால் எதையோ ஆபாசமாகச் சொல்ல வருகிறான் என்று நினைத்து கடைசியில் சாதாரணமாக முடியும்.

    இது போல முயற்சிகள் திரைப்படங்களிலும் நடந்தன. முதன்முதலில் கண்ணதாசன் இந்த முறையை கந்தன் கருணை திரைப்படத்தில் மிகச்சிறப்பாகச் செய்தார். அடுத்து கே.டி.சந்தானம் அகத்தியர் திரைப்படத்தில் பயன்படுத்தினார். அதற்குப் பிறகு 80களில் முழுக்க முழுக்க ஆபாசமாகவே ஒரு பாடல் வந்தது. “குத்துறேன் குத்துறேன்னு சொல்லிப்புட்டு குத்தாமதான் போறீங்களே.. பச்சைய” என்றெல்லாம் வரிகள் வரும். சரி. அதை விட்டு விட்டு முதல் இரண்டு முயற்சிகளைப் பார்ப்போம்.

    கந்தண் கருணை படத்தில் அரியது பெரியது கொடியது இனியது என்று ஔவையாரின் பாடல்களை முருகன் பாடச் சொல்லிக் கேட்பது போல ஒரு காட்சி. இவையெல்லாம் ஆனதும் முருகன் “ஔவையே புதியது என்ன?” என்று முருகன் கேட்டதும் கவியரசரின் வரிகளைக் கே.பி.சுந்தராம்பாள் பாடுவார்.

    என்றும் புதியது
    பாடல் என்றும் புதியது
    பொருள் நிறைந்த பாடல் என்றும் புதியது
    உனைப்பாடும் பொருள் நிறைந்த பாடல் என்றும் புதியது
    முருகா, உனைப்பாடும் பொருள் நிறைந்த பாடல் என்றும் புதியது

    இப்படி அடுக்கி அடுக்கி எழுதியிருப்பார் கண்ணதாசன். இதற்குப் பிறகுதான் பாடலே தொடங்கும். இப்படி வேண்டுமென்று ஏ.பி.நாகராஜன் கேட்டு வாங்கினாரா என்று தெரியவில்லை. ஆனால் அகத்தியர் படத்தில் லேசாக இதே முயற்சியை கே.டி.சந்தானம் செய்திருப்பதிலிருந்து ஏ.பி.நாகராஜனுக்கு இந்த முயற்சி பிடித்திருக்கிறது என்பதைப் புரிந்து கொள்ளலாம்.

    இசையாய் தமிழாய் இருப்பவனே
    இன்னிசையாய் செந்தமிழாய் இருப்பவனே

    இந்தப் பாடலை குன்னக்குடி வைத்தியநாதன் இசையில் சீர்காழி கோவிந்தராஜனும் டி.ஆர்.மகாலிங்கமும் மிக அருமையாகப் பாடியிருப்பார்கள்.

    பொதுவாக ஆற்றுநீர்ப் பொருள்கோளாக ஓடிக் கொண்டிருக்கும் இன்றைய பாடல்களுக்கு நடுவில் இப்படியான விளையாட்டுகள் நிறைந்த இந்தப் பாடல்களையும் கேட்பது சுகமே.

    இதுபோல நீங்கள் எங்கும் பயன்படுத்தியிருக்கின்றீர்களா? கேட்டிருக்கின்றீர்களா? படித்திருக்கின்றீர்களா? அவைகளை இங்கே எடுத்துச் சொல்லுங்களேன்.

    பாடலின் சுட்டி
    அரியது கேட்கின் (கந்தன் கருணை) –http://youtu.be/HYmH8wOZ4Yg
    இசையாய் தமிழாய் (அகத்தியர்) – http://youtu.be/467Y_UeokDo

    அன்புடன்,
    ஜிரா

    090/365

     
    • Arun Rajendran 2:37 pm on March 1, 2013 Permalink | Reply

      சூரல் பம்பிய சிறுகான் யாறே-னு ஒரு செய்யுள்..

      வரிகள எப்படி மாத்திப் போட்டாலும் பொருள் தரும் ..அடிமறிமாற்றுப் பொருள்கோள்-னு ஞாபகம்..

      கல்யாண தேன் நிலா
      காய்ச்சாத பால் நிலா
      நீதானே வான் நிலா
      என்னோடு வா நிலா
      தேயாத வெண்ணிலா
      உன் காதல் கண்ணிலா
      ஆகாயம் மண்ணிலா
      ——இந்தப் பாட்டு முழுதும் “அடிமறிமாற்று” மாதிரியே வருவதா என் எண்ணம்..

      தவறாயிருப்பின் திருத்துங்கள்…

    • Prabhu 10:15 pm on March 3, 2013 Permalink | Reply

      Does it include songs where the end of charanam and start of pallavi are merged and song is continued? THat would mean a lot of songs could be inclueded

    • Prabhu 10:19 pm on March 3, 2013 Permalink | Reply

      Like in that Ninnu kori varanam, when it ends like ‘உன்னோடு நான் ஓயாமல் தேனாற்றிலே நீராட நினைக்கயில், நின்னுக்கோரி வரணம்’ or ‘அழகி எனது வரனே, அனுதினமும் நின்னுக்கோரி வரணம்’ இப்படியெல்லாம் முடிவையும் ஆரம்பத்தையும் மொபியஸ் வளையம் போல இணைத்து எழுதப் பட்டவை?

  • GiRa ஜிரா 10:36 am on February 22, 2013 Permalink | Reply  

    வென்றார் உண்டோ? 

    பெண் ஜென்மம் படம் எத்தனை பேருக்குத் தெரியும்? 1977ம் ஆண்டு ஏ.சி.திருலோகச்சந்தர் இயக்கத்தில் வந்த படம். பத்ரகாளி எடுத்து வெற்றி பெற்ற கையோடு எடுத்த படம் பெண் ஜென்மம். இந்தப் படத்துக்கும் இசை அப்போதைய புதியமுகமான இளையராஜாதான். ஆனால் படம் தோல்வியடைந்தது.

    பத்ரகாளி படத்தில் வாலி எழுதிய “கண்ணன் ஒரு கைக்குழந்தை” பாடல் இன்றும் மிகப் பிரபலம். ஒரு கணவன் மனைவிக்குள் இருக்கும் உரிமை நெருக்கம் அணைப்பு அனைத்தையும் அழகாகக் காட்டிய பாடல்.

    அதே போலவொரு பாடலை பெண் ஜென்மம் படத்திலும் வைக்க விரும்பினார் அதே ஏ.சி.திருலோகச்சந்தர். அதே இளையராஜா. அதே வாலி. அதே பி.சுசீலா. அதே கே.ஜே.ஏசுதாஸ். பாடலிலும் அதே இனிமை. ஆனால் அதே கண்ணன் அல்ல. இந்த முறை முருகன்.

    ஆனால் படத்தின் தோல்வி பாடலைப் பின்னடைய வைத்துவிட்டது என்றுதான் சொல்ல வேண்டும்.

    சரி. பதிவின் கருத்துக்கு வருவோம். அந்தப் பாடலின் தகவல்களைக் கீழே கொடுத்துள்ளேன்

    செல்லப்பிள்ளை சரவணன்
    திருச்செந்தூர் வாழும் சுந்தரன்
    கோபத்தில் மனத்தாபத்தில்
    குன்றம் ஏறி நின்றவன் (செல்லப்பிள்ளை
    படம் – பெண் ஜென்மம்
    பாடல் – கவிஞர் வாலி
    பாடியவர்கள் – பி.சுசீலா, கே.ஜே.ஏசுதாஸ்
    இசை – இசைஞானி இளையராஜா
    ஆண்டு – 1977

    இந்தப் பாடலை இப்போது ஏன் எடுத்துப் பார்க்கிறோம்? இந்தப் பாடலின் நடுவில் வரும் ஒர் வரி என்னைச் சிந்திக்க வைத்தது. மனைவியின் புன்னகையை வியந்து கணவன் பாடுகிறான் இப்படி.

    மன்மதன் கணை ஐவகை
    அதில் ஓர் வகை உந்தன் புன்னகை

    இந்த வரிகளில் இருந்து மன்மதனின் கணைகள் ஐந்து வகையானவை என்று தெரிகிறது. பொதுவாக மன்மதனுக்குக் கரும்பு வில் என்றும் மலர்க்கணைகள் என்றும் நாம் அறிவோம். இதென்ன ஐந்து வகைக் கணைகள்?

    இந்த ஐந்து கணைகளையும் விளக்க நான் இன்னொரு கவிஞரை துணைக்கு அழைக்கிறேன். அவர்தான் கே.டி.சந்தானம். கண்காட்சி திரைப்படத்தில் அவர் எழுதிய வரிகளை ஏ.பி.நாகராஜன் வசனநடையில் மெதுவாகச் சொல்ல அதன்பின் எல்.ஆர்.ஈசுவரி மற்றும் எஸ்.பி.பாலசுப்ரமணியம் குரலில் பாடல் தொடரும்.

    வெண்ணிலவை குடை பிடித்து வீசு தென்றல் தேரேறி
    மென் குயில்தான் இசை முழங்க மீன் வரைந்த கொடியசைய
    கண்கவரும் பேரழகி கனகமணிப் பொற்பாவை
    அன்ன நடை ரதியுடனே அழகுமதன் வில்லேந்தி
    தண்முல்லை, தாமரை, மா, தனி நீலம், அசோகமெனும்
    வண்ண மலர்க் கணை தொடுத்தான்
    வையமெல்லாம் வாழ்கவென்றே!

    அடடா! என்ன அழகான வரிகள். வாசிக்கவே சுவையாக இருக்கிறது. ஒரு நடையில் வாய்விட்டு சொல்லிப்பாருங்கள். கவிஞரின் எழுத்து நடையின் சிறப்பு புரியும். கே.டி.சந்தானம் ஒரு நடிகரும் கூட. ஏ.பி.நாகராஜன் படங்களில் எல்லாம் தவறாமல் இருப்பார். “என்ன பொருத்தம் நமக்குள் என்ன பொருத்தம்” பாடலில் ஜெயலலைதாவின் தந்தையாக வருவார்.

    மன்மதன் வைத்திருப்பது மலர்க்கணை என்றாலும் அதில் ஐவகை மலர்கள் உண்டு. அந்த ஐந்து மலர்களாவன முல்லை, தாமரை, மாம்பூ, நீலம் மற்றும் அசோகம். இந்த ஐந்து மலர்களில் ஒரு மலரைப் போல முந்தைய பாடலின் கதாநாயகியின் புன்னகை இருந்ததாம். அது எந்த மலரைப் போல என்று இப்போது ஊகிக்க எளிமையாக இருக்குமே!

    காமதேவாய வித்மஹே புஷ்பபாணாய தீமஹி
    தன்னோ அனங்க ப்ரசோதயா

    பாடலின் சுட்டிகள்.
    செல்லப்பிள்ளை சரவணன் (பெண் ஜென்மம்) – http://isaiaruvi.net/downloads/download.php?d=/Ilayaraja/Ilayaraja%20A-Z%20Songs/Part-11&filename=UGVuX0plbm1hbSBfLV9DaGVsbGFfUGlsbGFpX1NhcmF2YW5hbi0oSXNhaWFydXZpLk5ldCkubXAz&sort=0&p=0
    அனங்கன் அங்கதன் (கண்காட்சி) – http://youtu.be/Z_UG7cmU6Do

    அன்புடன்,
    ஜிரா

    083/365

     
    • amas32 2:21 pm on February 22, 2013 Permalink | Reply

      Super Post! அற்புதமாக எழுதறீங்க 🙂 அது என்னமோ கண்ணனைத் தான் நமக்குக் குழந்தையாகக் கொஞ்சத் தோன்றுகிறது. எனக்கு முருகன் என்றுமே குமரன், பாலகன், கோபித்துக் கொண்டு போய் பேசாமல் தனித்து நிற்கும் சிறுவன். அம்மா போய் தாஜா பண்ணி அழைத்து வர எதிர்பார்க்கும் அழகன். ஆனால் கண்ணனோ அன்னைக் கோபித்துக் கொண்டாலும் அவள் பின் முதுகில் சாய்ந்து கைகளை வளையமாக்கி அம்மா கழுத்தில் மாலையாக்கி அவள் கோபத்தைத் தீர்ப்பவன்.

      நம் இந்து மதத்தில் தான் அனைத்தும் போற்றத்தக்க வழிபடத்தக்கவை. காமமும் inclusive.
      “காமதேவாய வித்மஹே புஷ்பபாணாய தீமஹி
      தன்னோ அனங்க ப்ரசோதயா”

      amas32

    • Mohanakrishnan 9:39 pm on February 22, 2013 Permalink | Reply

      மன்மதன் கணை ல மல்லிப்பூ இல்லையா? நம்பவே முடியலே. அதனால்தான் முன் வரியில் ‘மாலையில் ஒரு மல்லிகை என மலர்ந்தவள் இந்த கன்னிகை’ வாலி வாலிதான்

  • mokrish 11:01 am on January 24, 2013 Permalink | Reply  

    அவள் ஒரு ராகமாலிகை 

    திரையிசை பாடல்கள்  கர்நாடக இசைவடிவத்தை சார்ந்து இருப்பதை  பார்த்திருக்கிறோம்.  கதையின் நாயகிக்கு ராகத்தின் பெயர் வைத்ததையும் பார்த்திருக்கிறோம். ரஞ்சனியும் பைரவியும் சிந்துவும் சஹானாவும் நீலாம்பரியும் கதையில் உலா வருவதுண்டு.

     சண்முகம் என்னும் நாயகனை நினைத்து நாயகி மறைந்திருந்து  பாடிய பாட்டை சண்முகப்பிரியா ராகத்திலும்

    அபூர்வமான நாயகியைப்பற்றி  அதிசய ராகத்தில் பாடல் அமைத்ததும்

    நாயகியின் பெயர் கொண்ட லலிதா ராகத்தில் இதழில் கதை எழுதியதும்

    இசை அமைப்பாளர்களின் இனிய கற்பனை. Creative Brilliance

    திரைப்பாடல் வரிகளில் அதிகம் உபயோகப்படுத்தப்பட்ட வார்த்தைகளில் ‘ராகம்’ டாப் டென் லிஸ்டில் வரும். ராகங்கள் பதினாறு உருவான வரலாறும் ராக தீபம் ஏற்றும் நேரமும்  நமக்கு தெரியும். சரி ராகங்களின் பெயர்களை அது பெண்ணின் பெயராய்  வருவதை தவிர்த்து  கவிஞர்கள் எப்படி பிரயோகிக்கிறார்கள்?   முதலில் நினைவுக்கு வருவது ‘இசை கேட்டு எழுந்தோடி’ என்று தோடியை கண்ணதாசன் சொன்னதுதான். தர்பாரில் எனக்கு இணை யாரென்று கேட்டதும் ஒரு நாள் போதுமா என்று கேட்ட அதே பாடலில் தான்.

    அகத்தியர் படத்தில் ஒரு போட்டி பாடலில் சில முத்துக்கள் உண்டு. எந்த ‘நாட்டையும்’ நாதத்தால் வென்றிடுவேன் என்பதும் ‘அனைத்தும் உன் ‘வசந்தா’னா என்பதும் நயம். இசையமைப்பாளர் இளையராஜா கவிஞராகவும் மாறி என்ன சமையலோ என்று விசாரித்து ‘களைந்திடு அரிசியை கல்யாணி – கல் ஆணி என்று சர்க்கஸ் காட்டுவார்.

    கண்ணதாசன் முழுவதும் ராகங்களின் பெயர்களை வைத்து  ஒரு பாடல் எழுதியிருக்கிறார். பெண் ஒன்று கண்டேன் படத்தில் அவளை ராகமாலிகையாய் கற்பனை செய்யும்  பாடல்.

     உன் மை விழி ஆனந்த பைரவி பாடும்

    உன் தேகத்தில் மோகன ராகத்தின் பாவம்

    நீ ஒரு ராகமாலிகை

    உன் நெஞ்சம் என் காதல் மாளிகை

    என்று தொடங்கி எல்லா வரிகளிலும் ஒரு ராகத்தின் பெயரை சொல்லும் கவிதை.

     நான் வாவென அழைக்கையில் விரைந்தோடி

    வந்து தழுவிடும் தேவ மனோஹரி

    ஆரபிமானமும் தேவையில்லை இந்த

    அகிலத்தில் உன் போல் பாவையில்லை

    நீ ஓடி வந்து தழுவினால் வேறு யார் அபிமானமும் எனக்கு தேவையில்லை என்று சொல்லும் காதல்.

    நீ எனக்கே தாரம் என்றிருக்க

    உன்னை என் வசந் தாவென நான் கேட்க

    என்று ராகத்தின் பெயர்களை பிரித்து பொருள் கொண்டு அவன்  நெஞ்சினில் கொஞ்சும் ரஞ்சனியை அவன் தேடும் நாயகியை  பாடும் வரிகள் செய்யும் வித்தை  நயம்.

    பல்லவியும் சரணமும் ராகத்தின் பெயர்களில் சரணம் .

    மோகனகிருஷ்ணன்

    054/365

     
    • @npodiyan 2:51 pm on January 24, 2013 Permalink | Reply

      அருமை!

    • amas32 (@amas32) 2:55 pm on January 24, 2013 Permalink | Reply

      ராகங்களின் பெயர்களோடு அதே ராகத்தில் வரும் பாடல்கள் நம் நினைவில் நீங்காமல் நிற்பது அந்த ராகத்தின் பெருமை மற்றும் அப்படி இசை அமைத்தவர்களின் பெருமை, இரண்டையும் நமக்குக் காட்டுகிறது. நீங்கள் குறிப்பிட்டுள்ள அத்தனைப் பாடல்களுமே வரிகளைப் படித்தவுடன் மனதில் பாடல் ஒலி கேட்கிறது.

      amas32

    • suri 12:13 am on February 26, 2013 Permalink | Reply

      hai, this song was written by Vaali. The heroine is Premila!

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel