Updates from November, 2013 Toggle Comment Threads | Keyboard Shortcuts

  • என். சொக்கன் 11:13 pm on November 30, 2013 Permalink | Reply  

    விருந்தினர் பதிவு : குழந்தைப் பாடல்கள் 

    முன்பெல்லாம் நம் தமிழ் திரைப்படங்களில்  குழந்தைகளுக்கு நாயகர்கள் அறிவுரைக் கருத்துகளைக் கூறும் பாடல்கள் நிறைய இடம் பெறும். அந்தப் பாடல்களில் உள்ள நற்கருத்துகள் பல பிஞ்சு மனங்களில் பசுமரத்தாணிபோல பதிந்து நல்வாழ்விற்கு வழிவகுக்கும் ஆற்றல் கொண்டவை. அது போன்று பல பாடல்கள் வந்திருந்தாலும் என்றும் மனதில் நிற்கும் சில பாடல் வரிகள்:
    “பாலுட்டும் அன்னை அவள் நடமாடும் தெய்வம்-அறிவூட்டும் தந்தை நல்வழி காட்டும் தலைவன்
    துணையாக கொண்டு நீ நடைபோடு இன்று-உருவாகும் நல்ல எதிர்காலம் ஒன்று”
    கிளி போல பேசு இளங்குயில் போல பாடு-மலர் போல சிரித்து நீ குறள் போல வாழு
     மனதோடு கோபம் நீ வளர்த்தாலும் பாவம்-மெய்யான அன்பே தெய்வீகமாகும்”
    : இது காவியக்கவிஞர் வாலியின் எளிமையான சக்தி மிகுந்த வரிகள் கொண்ட “நல்ல பேரை வாங்க வேண்டும் பிள்ளைகளே”பாடல்.
    அடுத்து கவியரசர் கண்ணதாசன் எழுதிய வரிகளை பாருங்கள்:
    “அறம் செய்ய விரும்பு என்றாள் ஔவை-தருமம் செய்யுங்கள்
       அன்பே தெய்வம் என்றார் பெரியோர் -அன்புடன் வாழுங்கள்
      யாரும் தீமை செய்தாலும் நீங்கள் நன்மை செய்யுங்கள்
       யாரும் பொய்யை சொன்னாலும் நீங்கள் மெய்யை சொல்லுங்கள்
      நேர்மையாய் வாழ்வதில் தோல்வியே இல்லையே”!

    எப்படிப்பட்ட வரிகள் பாருங்கள், “தங்கங்களே நாளை தலைவர்களே நம் தாயும் மொழியும் கண்கள்”பாடல்.

    அடுத்து  கவிஞர் வைரமுத்து அவர்களின் வரிகள்-
    குழந்தைகளுக்கு யானை,குரங்கு”கதையை கூறி “வினை விதைத்தவன் வினை அறுப்பான்-திணை விதைத்தவன் திணை அறுப்பான்,நன்மை ஒன்று  செய்தீர்கள் நன்மை விளைந்தது-அட தீமை ஒன்று செய்தீர்கள் தீமை விளைந்தது-தீமை செய்வதை விட்டு விட்டு நன்மை செய்வதை தொடருங்கள்”என்று எளிமையாக அறிவுறுத்தும் “ராஜா சின்ன ரோஜாவோடு காட்டுப்பக்கம் வந்தானாம்”..
    புதிய இயக்குனர்களும் தங்கள் படங்களில் இது போன்ற நல்ல கருத்துக்களை தங்கள் படங்களில் புகுத்துவது ஆரோக்கியமான வளர்ச்சியாக அமையும். நன்றி
    பதிவில் இடம் பெற்ற பாடல்கள்:
                                                                                பாடல்:             நல்ல பேரை வாங்க வேண்டும் பிள்ளைகளே
                                                                                படம் ”              நம் நாடு
                                                                                எழுதியவர்:   கவிஞர் வாலி
                                                                                இசை :             கே.வி. மகாதேவன்
                                                                                 பாடியவர்:      டி.எம்.சௌந்தர்ராஜன்
                                                                                 சுட்டி :                http://youtu.be/Th9bUtTIRGY
                                                                                 பாடல்:             தங்கங்களே நாளை தலைவர்களே
                                                                                 படம் :                என்னைப்போல் ஒருவன்
                                                                                 எழுதியவர்:     கவியரசர் கண்ணதாசன்
                                                                                  இசை:                எம்.எஸ்.விஸ்வநாதன்
                                                                                  பாடியவர் :        டி.எம்.சௌந்தரராஜன்
                                                                                  சுட்டி:                  http://youtu.be/6FQEFdXE3Io
                                                                                  பாடல்:                ராஜா சின்ன ரோஜாவோடு
                                                                                   படம்:                   ராஜா சின்ன ரோஜா
                                                                                   எழுதியவர்:       கவிஞர் வைரமுத்து
                                                                                    இசை:                  சந்திரபோஸ்
                                                                                    பாடியவர்கள்:   எஸ்.பி.பாலசுப்ரமணியம் குழுவினர்
                                                                                     சுட்டி:                    http://youtu.be/w9O4sdhxwos

    நா. ரஜினி ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன். ட்விட்டரில் என்னைப் பின்தொடர: @rajinirams

    Advertisements
     
  • என். சொக்கன் 9:27 pm on November 10, 2013 Permalink | Reply  

    விருந்தினர் பதிவு: போதை மயக்கம் 

    இன்றைய இளையதலைமுறையினரை மிகவும் பாதித்திருக்கும் கொடிய பழக்கம் போதைப்பழக்கம்.நாட்டில் பல சமூகவிரோத செயல்கள்,விபத்துக்கள் நடப்பதற்கு காரணம் மது மற்றும் இன்ன பிற போதைப் பழக்கங்களே.பலரின் உடல்நலம் கெடுவது மட்டுமல்லாமல் பலரின் திறமைகள் மங்கிப் போவதற்கு காரணமும் இதுவே.சமீபத்தில் ஒரு விழாவில் பேசிய கவிஞர் வைரமுத்து அவர்கள் “இளம் இயக்குனர்களே “மது”என்பது மதுரை என்ற வார்த்தையில் இருக்கட்டும்-உங்கள் வாழ்க்கையில் வேண்டாம்” என்று அறிவுறுத்தியுள்ளார்

    “உட்கப்படா அற் ஒளியிழப்பர்-எஞ்ஞான்றும் கட்காதல் கொண்டொழுகுவார்” என்று வள்ளுவரும் கள்ளுண்ணாமை குறித்து குறள்  எழுதியுள்ளார். தமிழ் சினிமாவில் இதை பற்றிய மூன்று முக்கியமான பாடல்கள்-

    கவிஞர் வாலி எழுதிய வரிகள்- “மானைப்போல் மானம் என்றாய்,நடையில் மதயானை நீயே என்றாய்,வேங்கை போல் வீரம் என்றாய் அறிவில் உயர்வாகச் சொல்லிக்கொண்டாய்-மதுவால் விலங்கினும் கீழாய் நின்றாய்” -தைரியமாக சொல் நீ மனிதன் தானா-இல்லை நீ தான் ஒரு மிருகம்-இந்த மதுவில் விழும் நேரம்…என மது அருந்திய ஒருவனை பார்த்து பாடப்படுவதாக அருமையாக எழுதியிருப்பார்.

    இரண்டாவதாக வாலியின் இன்னொரு பாடல்-

    “நல்ல மனுஷன் சாராயத்தை தொட்டதுமில்லை-அது தொட்டவனை லேசில தான் விட்டதுமில்லை-மனுஷனோட ரத்தத்தை தான் அட்டை குடிக்கும் ஆனா மனைவி மக்கள் குடும்பத்தையே பட்டை குடிக்கும்-“குடிக்காதே தம்பி குடிக்காதே-நீ குடிச்சிருந்தா ஊருலகம் மதிக்காதே,உன் வீட்டை ஒரு கழுதை கூட மிதிக்காதே” என மிக எளிமையாக குடியின் தீமைகளை எடுத்து கூறியிருப்பார்.

    மூன்றாவது பாடல்-கவிஞர் வைரமுத்து எழுதிய பாடல்-” ஒரு நாள் சுவைப்போம் என்று நினைத்தால் உயிரை சுவைக்கும்-பொய்யில்லை என போதைப் பழக்கத்தின் கேட்டைக் கூறி

    “மயக்கம் என்பது மாத்திரையா-மரணம் போகும் யாத்திரையா

    விளக்கு இருந்தும் இருட்டறையா -விடிந்த பின்னும் நித்திரையா

    வரம்பு கடந்து நரம்பு தளர்ந்து வயதை தொலைத்து வாழுவதா?

    இந்த உலகம் உன்னை அழைக்கிறது-அட இன்னும் வாழ்க்கை இருக்கிறது

    ஒரு பண்பாடு இல்லையென்றால் பாரதம் இல்லை-நாம் பண்போடு வாழ்ந்திருந்தால் பாவமும் இல்லை” என போதை பழக்கதிலிருந்து இளைஞர்கள் மீள்வதற்காக அற்புதமாக எழுதியிருப்பார்.

     

    பதிவில் இடம்பெற்ற பாடல்கள்-

    பாடல்:          தைரியமாக சொல் நீ மனிதன் தானா

    படம்:             ஒளிவிளக்கு

    எழுதியவர்:  கவிஞர் வாலி

    இசை :           M.S.விஸ்வநாதன்

    பாடியவர்:    T.M. சௌந்தர்ராஜன்.

    சுட்டி:            http://youtu.be/zwOSls9qlqY

     

    பாடல்:            குடிக்காதே தம்பி குடிக்காதே

    படம்:                நான் குடித்துக்கொண்டே இருப்பேன்

    எழுதியவர்:    கவிஞர்  வாலி.

    இசை:              M.S.விஸ்வநாதன்

    பாடியவர்:     T .M.சௌந்தரராஜன்

    சுட்டி:               கிடைக்கவில்லை.

     

    பாடல்:             ஒரு பண்பாடு இல்லையென்றால்

    படம்:                ராஜா சின்ன ரோஜா

    எழுதியவர்:    கவிஞர் வைரமுத்து

    இசை:               சந்திரபோஸ்

    பாடியவர்:       கே.ஜே.யேசுதாஸ்.

    சுட்டி:                http://youtu.be/2rcTcGv08NM

    நா. ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன். ட்விட்டர் முகவரி: http://twitter.com/rajinirams

     
    • Uma Chelvan 3:19 am on November 11, 2013 Permalink | Reply

      மிகவும் அருமையான போஸ்ட் !!!

      புகழிலும் போதை இல்லையோ.-பிள்ளை
      மழலையில் போதை இல்லையோ
      காதலில் போதை இல்லையோ- நெஞ்சில்
      கருணையில் போதை இல்லையோ.

      நீ நினைக்கும் போதை வரும் நன்மை செய்து பார் ,
      நிம்மதியை தேடி நின்றால் உண்மை சொல்லி பாரு !!

      இவ்வ்வளவு விசயங்களில் போதை இருக்கும் பொழுது தனியாக வேறு போதை எதற்கு ??

    • amas32 6:27 pm on November 11, 2013 Permalink | Reply

      போதை பொருட்களை விற்பவர்கள் அதை உட்கொள்ள மாட்டார்கள். அதன் தீமை அவர்களுக்குத் தெரியும். ஆனால் அதை விற்பதில் வியாபரத் தன்மையே ஓங்கி நிற்கும். மனசாட்சி இடிக்காது. இது உலக நாடுகள் அனைத்துக்கும் பொருந்தும். கஞ்சா பயிரிட்டு விற்பவன் அதை பயன்படுத்த மாட்டான்.

      ஆனால் நாடு இன்று போதை மயக்கத்தில் பாழாகிக் கொண்டிருக்கிறது. முன்பெல்லாம் MGR போன்ற நடிகர்களின் ரசிகர்கள் அவரை தெய்வமாகக் கொண்டாடியதால் அவர் சொல்வதை வேத வாக்காக எடுத்துக் கொண்டு அவர்அறிவுரையை ஏற்பர். இன்றும் நடிகர்கள் மீது அதே கிரேஸ் உள்ளது. ஆனால் நடிகர்கள் போதிப்பதில்லை.தங்கள் பாட்டைப் பார்த்துக் கொண்டு செல்கின்றனர்.

      அரசாங்கமே குடியை தேசிய பாஸ் டைமாக மாற்றிக் கொண்டிருக்கும்போது சாமான்ய மனிதன் என்ன செய்ய முடியும்.

      கடவுள் தான் காப்பாற்ற வேண்டும்.

      அருமையானப் பதிவு, வாழ்த்துகள் 🙂

    • Raja ram 7:22 pm on November 11, 2013 Permalink | Reply

      அருமையான பதிவு.

    • rajinirams 9:56 am on November 12, 2013 Permalink | Reply

      Uma Chelvan amas32 Raja ram தங்களின் கருத்துக்களுக்கு மிக்க நன்றி.

    • swaminathan 4:13 pm on March 1, 2015 Permalink | Reply

      nice

  • GiRa ஜிரா 1:18 pm on October 18, 2013 Permalink | Reply  

    சினம் ஏனோ சின்னவளு(னு)க்கு! 

    மெல்லியதோர் உணர்வினை இந்தப் பதிவில் பார்க்கப் போகிறோம். பூவினும் மெல்லியது. பனியினும் மெல்லியது. நம் கண்கள் காணாத தென்றலிலும் மெல்லியது.

    குழந்தைகளுக்கு வரும் கோவத்தைதான் சொல்கிறேன். சட்டியில் விழுந்த வெண்ணெய் உருகிவிடாமல் எடுப்பது போன்றது கோவம் கொண்ட குழந்தைகளை சமாதானப்படுத்துவது.

    குழந்தைகளே அழகு. அதிலும் கோவம் கொண்டு முகத்தைத் தூக்கி வைத்திருக்கும் போது பாருங்கள்…. அதை விட அழகு உலகில் இல்லவேயில்லை என்ற முடிவுக்கு வருவீர்கள்.

    அந்தக் குழந்தைகளை எப்படியெல்லாம் பாடி கவிஞர்கள் சமாதானப்படுத்தியிருக்கிறார்கள் என்று இன்று பார்க்கப் போகிறோம்.

    எதையும் கண்ணதாசனிடம் இருந்தே தொடங்கிப் பழகிவிட்டோம். இதையும் அவரிடமிருந்தே தொடங்குவோம்.

    தாயிடம் முகம் காட்டாமல் திரும்பி ஓடும் மகளை அழைக்க வேண்டும். திரும்பிப் பார்க்க வைக்க வேண்டும். எப்படி பாடுவாள் தாய்?

    சின்னக் கண்ணே சித்திரக் கண்ணே கேளம்மா
    உன்னைக் காக்கும் அம்மா என்னைப் பாரம்மா

    அழைத்தால் திரும்பிப் பார்க்குமா கோவம் கொண்ட குழந்தைகள். அவர்களைத் தூக்கி வைத்து புகழ்ந்தால்தானே காது கொஞ்சமாவது கேட்கும்.

    நீ தங்கம் போலே அழகு
    நீ எங்கள் வானில் நிலவு
    இளம் தாமரைப் பூவே விளையாடு
    காவிரி போலே கவி பாடு

    விளையாடச் சொன்னால் போதாதா குழந்தைகளுக்கு? அதுவரை இருந்த கோபமும் அழுகையும் மறைந்து சமாதானம் பிறக்கிறது. சமாதானம் ஆனபிறகு என்னாகும்? அணைத்துக் கொண்டு பாட வேண்டியதுதானே!

    அணைக்கும் அன்பான கைகள்
    அங்கே சொந்தம் கொண்டாட வேண்டும்
    வரும் நாளை வாழ்விலே உயர் மேன்மை காணலாம்
    நல்ல காலம் தோன்றினால் இந்த உலகை வெல்லலாம்

    கிட்டத்தட்ட ஒரு கதையாகவே பாடலை எழுதியிருக்கிறார் கவியரசர் கண்ணதாசன்.

    சரி. நாம் அடுத்த குழந்தைக்குப் போவோம். ஏதோவொரு செல்லச் சண்டை. அம்மாவோடு கோவம். கண் நிறைய கண்ணீர். யாரோடும் பேசாமல் ஒதுங்கி நிற்கும் பெண்குழந்தை. எப்படியெல்லாம் கொஞ்சி சமாதானப் படுத்தலாம்? புலவர் புலமைப்பித்தனைக் கேட்போமா

    மண்ணில் வந்த நிலவே
    என் மடியில் பூத்த மலரே
    அன்பு கொண்ட செல்லக்கிளி
    கண்ணில் என்ன கங்கைநதி… சொல்லம்மா….
    நிலவே… மலரே….
    நிலவே மலரே.. மலரின் இதழே… இதழின் அழகே!

    ச்சோ ச்வீட் என்று புலவர் புலமைப்பித்தனைப் பாராட்டத் தோன்றுகிறதல்லவா? அதிலும் அந்தாதி போல “நிலவே மலரே… மலரின் இதழே… இதழின் அழகே” என்று அடுக்குவது அட்டகாசம்.

    அதென்ன பெண் குழந்தைகள் தான் கோவித்துக் கொள்வார்களா? ஆண்குழந்தைகளுக்குக் கோவம் வராதா? அம்மா திரைப்படத்தில் வந்ததே. இந்த முறை சமாதானப்படுத்துவது கவிஞர் வைரமுத்து.

    ஆனால் ஒரு சின்ன பிரச்சனை. அவளுடைய மகன் தான் அந்தச் சிறுவன். ஆனால் இருவருக்கும் தாங்கள் தாய்-மகன் என்று தெரியாது. அவர்களுக்குள் ஏதோவொரு சண்டை. அதனால் கோவம். கோவத்தின் விளைவாக சோகம். சரி பாட்டைப் பார்க்கலாம்.

    பூமுகம் சிவக்க
    சோகமென்ன நானிருக்க

    குழந்தைகளே மென்மை. அந்த மென்மையான முகம் அழுதால் செக்கச் சிவந்து போய்விடுகிறதே! அதைப் பார்க்கத் தான் முடியுமா? பார்த்துவிட்டு சும்மாயிருக்கத்தான் முடியுமா? எத்தனை கோடி கொட்டிக் கொடுத்தாவது அந்தப் பூமுகத்தில் புன்னகையை அல்லவா பார்க்கத் துடிக்கும் தாயுள்ளம்!

    தாயின் வடிவில் என்னை நினைத்து விடு
    எனக்கும் அழுகை வரும் துடைத்து விடு

    எப்போதுமே பிள்ளைகளை அடித்து விட்டு அதற்கு வருத்தப்படுவது தாயாகத்தான் இருக்கும். அப்படியிருக்கும் போது மகன் அழும் போது தாய் அழாமல் இருந்தால்தான் அதிசயம். அதைக் கண்டு கண்ணீரைத் துடைக்க மகன் வருவான் என்ற நம்பிக்கைதான் இந்தத் தாயின் நம்பிக்கையும். அதே போல மகனும் வந்தான். கண்ணீரைத் துடைத்தான்.

    எவ்வளவு மென்மையான உணர்வுகள் இவை. இவற்றைப் பாடலிலும் குரலிலும் இசையிலும் கொண்டு வருவது எவ்வளவு கடினமாக இருந்திருக்கும். ஆனால் பாருங்கள்… நாம் பார்த்த மூன்று பாடல்களையுமே பாடியவர் இசையரசி பி.சுசீலா தான். இந்த ஒற்றுமை தற்செயலானதாக இருக்கும் என்று நினைக்கவில்லை. ஒவ்வொரு பாடலிலும் அவர் காட்டியிருக்கும் குழைவும் உணர்வுகளும் போதும் அவர் பெருமையைச் சொல்ல.

    இன்னொரு வகையான குழந்தைகள் உண்டு. ஆம். “நானொரு குழந்தை நீயொரு குழந்தை” என்று கவிஞர் வாலி சொன்ன கணவன் மனையர் தான் அந்தக் குழந்தைகள். அந்தக் குழந்தைகளில் ஒரு குழந்தை கோவித்துக் கொண்டால் எப்படி சமாதானப்படுத்துவது?

    பச்சப்புள்ள அழுதுச்சுன்னா பாட்டுப் பாடலாம்
    இந்த மீசை வெச்ச கொழந்தைக்கு என் பாட்டு போதுமா!

    புலமைப் பித்தன் கேட்கும் கேள்வியும் நியாயமானதுதான். குழந்தைகளுக்கு பொம்மையைக் கொடுத்து அழுகையை அடக்கலாம். காதலர்களுக்குள் அழுகை வரும் போது ஒருவரையொருவர் கொடுத்துத்தான் சமாதானப் படுத்த வேண்டும்.

    பதிவில் இடம் பெற்ற பாடல்கள்
    பாடல் – சின்னக் கண்ணே சித்திரக் கண்ணே
    வரிகள் – கவியரசர் கண்ணதாசன்
    பாடியவர் – இசையரசி பி.சுசீலா
    இசை – மெல்லிசை மன்னர் எம்.எஸ்.விசுவநாதன்
    படம் – பொல்லாதவன்
    பாடலின் சுட்டி – http://www.youtube.com/watch?v=VPM_AqzmZr0

    பாடல் – மண்ணில் வந்த நிலவே
    வரிகள் – புலவர் புலமைப்பித்தன்
    பாடியவர் – இசையரசி பி.சுசீலா
    இசை – மெல்லிசை மன்னர் எம்.எஸ்.விசுவநாதன்
    படம் – நிலவே மலரே
    பாடலின் சுட்டி – http://www.youtube.com/watch?v=UmCcv-4uv7k

    பாடல் – பூமுகம் சிவக்க
    வரிகள் – கவிப்பேரரசு வைரமுத்து
    பாடியவர் – இசையரசி பி.சுசீலா
    இசை – இன்னிசை வேந்தர்கள் சங்கர் – கணேஷ்
    படம் – அம்மா
    பாடலின் சுட்டி – http://www.youtube.com/watch?v=o70tn84msTs

    பாடல் – பச்சப்புள்ள அழுதுச்சுன்னா
    வரிகள் – புலவர் புலமைப் பித்தன்
    பாடியவர் – வாணி ஜெயராம்
    இசை – சந்திரபோஸ்
    படம் – புதிய பாதை
    பாடலின் சுட்டி – http://youtu.be/ae3gVTQwWDk

    அன்புடன்,
    ஜிரா

    320/365

     
    • suri 2:13 pm on October 18, 2013 Permalink | Reply

      if i am not mistaken, nilave malare was written by Pulamaipitthan. Pl check

    • amas32 9:34 pm on October 18, 2013 Permalink | Reply

      என் மகன் சிறுவனாக இருக்கும்போது அவனுடனேயே நான் இருக்க வேண்டும் என்று நினைப்பான். நான் வீட்டு வேலையில் ஈடுப்பட்டிருந்தாலோ தொலைபேசியில் உரையாடினாலோ முணுக்கென்று கோபம் வந்துவிடும். நிறைய இராமாயண மகாபாரதக் கதைகள் கேட்டு வளர்ந்தவன், அதனால் நீ என்னுடன் இல்லையென்றால் நான் சாமியாராகிவிடுவேன் என்று சொல்லி வீட்டின் முன் உள்ளத் தெருவோர நடைபாதையில் போய் சாமியார் மாதிரி உட்கார்ந்து தோம் தோம் என்று உச்சரிக்க ஆரம்பித்து விடுவான். இரண்டரை, மூன்று, வயது ஓம் என்று சொல்ல வராது 🙂

      நீங்கள் சொல்வது உண்மை, குழந்தைகள் கோபித்துக் கொள்வதும் கொள்ளை அழகு 🙂

      amas32

    • rajinirams 11:07 am on October 19, 2013 Permalink | Reply

      கோபம் கொள்ளும் குழந்தைகளையும்,கணவனையும் சமாதானப்படுத்தும் பாடல்களை கொண்ட அருமையான பதிவு-அதுவும் தமிழ் திரையுலகின் தலைசிறந்த “நான்கு”கவிஞர்களை ஒருங்கிணைத்தது சூப்பர். கோபம் கொள்ளும் காதலியை சமாதானப்படுத்தும் ஒரு அருமையான பாடல் கவிஞர் வைரமுத்து அவர்களின் “பொன் மானே கோபம் ஏனோ”-ஒரு கைதியின் டயரி.கோபமான கணவனை மனைவி சமாதனப்படுத்தும் பாடல்-தென்ன மரத்துல தேளு கொட்ட பனைமரத்துல நெறி கட்டும்-வீட்டுக்குள்ள கோபம் வேணாம் கோர்ட்டுக்குள்ள இருக்கட்டும்-சாட்சி-வைரமுத்து.
      இன்னொரு பாடல் எந்த படம் தெரியவில்லை-கோபம் ஏனோ கண்ணே உன் துணைவன் நானல்லவா..அன்பே எந்தன் தவறல்ல….. நன்றி.

  • GiRa ஜிரா 10:16 am on January 11, 2013 Permalink | Reply  

    கன்னத்தில் முத்தமிட்டால் 

    கொஞ்ச வேண்டும் என்ற சூழல் வந்தால் கன்னத்தைத் தொடாத கவிஞன் இல்லை.

    கண்ணம்மா என் குழந்தை என்று எழுதிய பாரதியும் குழந்தையின் கன்னத்தில் முத்தமிடுவது கள்வெறி கொடுக்கும் மயக்கத்தைக் கொடுப்பதைக் குறிப்பிடுகிறான்.

    சின்னஞ்சிறு கிளியே கண்ணம்மா

    கன்னத்தில் முத்தமிட்டால் உள்ளந்தான் கள்வெறி கொள்ளுதடி
    படம் – நீதிக்கு தண்டனை
    இசை – மெல்லிசை மன்னர் எம்.எஸ்.விசுவநாதன்

    பாரதி இப்படிச் சொல்லியிருக்க, கண்ணாதாசனா கன்னதாசனா என்று ஐயத்தை உண்டாக்கும் வகையில் பாடல்களை எழுதியிருக்கிறார். கன்னம் என்பதே தித்திப்பது என்பது அவர் கருத்து.

    முத்துக்களோ கண்கள்
    தித்திப்பதோ கன்னம்
    படம் – நெஞ்சிருக்கும் வரை
    இசை – மெல்லிசை மன்னர் எம்.எஸ்.விசுவநாதன்

    பார்க்கப் பார்க்க மின்னும் கன்னம் பருவப் பெண்ணின் கன்னம் என்பதை ரசித்தவர்தானே கண்ணதாசன். அதுதான் இந்தப் பாடலில் இப்படி வெளிப்படுகிறது.

    பால் வண்ணம் பருவம் கண்டு
    வேல் வண்ணம் விழிகள் கண்டு

    கன்னம் மின்னும் மங்கை வண்ணம்
    படம் – பாசம்
    இசை – மெல்லிசை மன்னர் எம்.எஸ்.விசுவநாதன்

    தித்திக்கும் கண்ணம் என்று சொல்லியாகி விட்டது. ஆனால் கன்னம் ஒரு கிண்ணம் என்றும் அந்தக் கிண்ணத்திலே கறந்த பாலின் சுவையிருக்கும் என்றும் சொல்லியிருக்கிறார் கவியரசர்.

    விழியே விழியே உனக்கென்ன வேலை
    விருந்துக்கு வரவா நாளைக்கு மாலை

    கன்னம் என்னும் ஒரு கிண்ணத்திலே
    கறந்த பாலிருக்கும் வண்ணத்திலே
    படம் – புதிய பூமி
    இசை – மெல்லிசை மன்னர் எம்.எஸ்.விசுவநாதன்

    தங்கமானது கன்னம் என்றால் காதல் விளையாட்டில் அதில் சேதாரம் இருக்கும் என்பது தெரிந்தவரும் அவர்தான். அதனால்தான் கன்னத்தில் என்னடி காயம் என்று குறும்போடு கேட்கிறார்.

    கன்னத்தில் என்னடி காயம்
    இது வண்ணக்கிளி செய்த மாயம்
    படம் – தனிப்பிறவி
    இசை – திரையிசைத் திலகம் கே.வி.மகாதேவன்

    நாணத்தாலே கன்னம் மின்ன மின்ன
    நடிக்கும் நாடகம் என்ன
    படம் – சிஐடி சங்கர்
    இசை – வேதா

    நாணத்தில் மின்னும் கன்னம் காதல் சோகத்திலும் கண்ணீர் சேர்ந்து மின்னும் என்றும் தெரிந்து வைத்திருக்கிறார் கண்ணதாசன்.

    நினைவாலே சிலை செய்து
    உனக்கான வைத்தேன்.. திருக்கோயிலே ஓடி வா
    ..
    கண்ணீரிலே நான் தீட்டினேன்
    கன்னத்தில் கோலங்கள்
    படம் – அந்தமான் காதலி
    இசை – மெல்லிசை மன்னர் எம்.எஸ்.விசுவநாதன்

    கவியரசர் மட்டுந்தானா இப்படி? அடுத்து வந்த வாலியின் கை வண்ணத்து கன்னத்து அட்டகாசங்களைப் பார்ப்போம்.

    கன்னத்தை அத்திப்பழம் என்று உவமிக்கும் வாலி.. அந்தப் பழத்தைக் கிள்ளி விடவா என்று கேட்கிறார். மெல்லிய நண்டின் கால் பட்டாலே சிதைந்து போகும் மென்மையான பழம் அத்தி என்று அகநானூறு சொல்கிறது. கன்னத்தை அப்படியொரு பழத்துக்கு ஒப்பிடுவதும் அழகுதான்.

    வண்ணக்கிளி சொன்ன மொழி என்ன மொழியோ
    வஞ்சிமகள் வாய்திறந்து சொன்ன மொழியோ

    அத்திப்பழக் கன்னத்திலே கிள்ளி விடவா
    படம் – தெய்வத்தாய்
    இசை – மெல்லிசை மன்னர் எம்.எஸ்.விசுவநாதன்

    அத்திப் பழம் என்று உவமித்த அதே வாலி கன்னத்தை மாம்பழம் என்றும் சொல்லத் தவறவில்லை. மரத்தில் பழுக்கும் அந்த மாம்பழங்களை விட காதலியின் கன்ன மாம்பழங்களைத்தான் காதலன் விரும்புவானாம்.

    நான் மாந்தோப்பில் நின்றிருந்தேன்
    அவன் மாம்பழம் வேண்டுமென்றான்
    அதைக் கொடுத்தாலும் வாங்கவில்லை
    இந்தக் கன்னம் வேண்டும் என்றான்
    படம் – எங்க வீட்டுப் பிள்ளை
    இசை – மெல்லிசை மன்னர் எம்.எஸ்.விசுவநாதன்

    பழம் என்று சொன்னால் அணில் கடித்து விடுமோ என்று நினைத்தாரோ என்னவோ… தாமரைப் பூவைப் போன்ற கன்னங்கள் என்றும் வர்ணித்து விட்டார். அந்தத் தாமரைக் கன்னம் என்னும் கிண்ணத்தில்தானே தேன் இருக்கிறது.

    தாமரைக் கன்னங்கள்
    தேன்மலர்க் கிண்ணங்கள்
    படம் – எதிர் நீச்சல்
    இசை – வி.குமார்

    கண்ணதாசன் கன்னத்தில் என்னடி காயம் என்று கேட்டால்… வாலியோ கன்னத்து முத்தங்களால் கன்னிப் போகும் கன்னங்களே அத்தானின் அன்புக்கு அடையாளச் சின்னங்கள் என்று அடித்துச் சொல்கிறார்.

    அத்தானின் முத்தங்கள் அத்தனையும் முத்துக்கள்
    அழகான கன்னத்தில் அடையாளச் சின்னங்கள்
    படம் – உயர்ந்த மனிதன்
    இசை – மெல்லிசை மன்னர் எம்.எஸ்.விசுவநாதன்

    நறுந்தேனை கிண்ணத்தில் வடித்து எடுத்து வருகிறாள் ஒருத்தி. அதெல்லாம் எதற்கு? உன் கன்னத்தில் தேன் குடித்தால் ஆயிரம் கற்பனை ஓடி வராதா என்று ஏங்குகிறது கவிஞனின் உள்ளம்.

    கிண்ணத்தில் தேன் வடித்து கைகளில் ஏந்துகிறேன்
    எண்ணத்தில் போதை வர எங்கெங்கோ நீந்துகிறேன்
    கன்னத்தில் தேன் குடித்தால் கற்பனை ஓடி வரும்
    படம் – இளமை ஊஞ்சலாடுகிறது
    இசை – இசைஞானி இளையராஜா

    கண்ணன் ஒரு கைக்குழந்தை
    கண்கள் சொல்லும் பூங்கவிதை
    கன்னம் சிந்தும் தேனமுதை
    படம் – பத்ரகாளி
    இசை – இசைஞானி இளையராஜா

    கன்னத்தை பழமென்றும் பூவென்றும் வர்ணிக்க கண்ணதாசனாலும் வாலியாலும் மட்டுந்தான் முடியுமா? இதோ இருக்கிறார் வைரமுத்து.

    தொட்டுரச தொட்டுரச மணக்கும் சந்தனம். அப்படியான சந்தனக் கிண்ணமடி உன் கன்னம். அதைத் தொட்டுரசி தொட்டுரசி மணக்குதடி என் கைகள் என்று கவிதையை அடுக்குகிறார்.

    ரெண்டு கன்னம் சந்தனக் கிண்ணம்
    தொட்டுக் கொள்ள ஆசைகள் துள்ளும்
    படம் – சிவப்புமல்லி
    இசை – சங்கர் கணேஷ்

    தொட்டுப் பார்த்தால் பளபளப்போடு வழவழக்கும் பட்டை கன்னத்திற்கு ஒப்பிடாமல் போவாரோ கவிஞர்.

    பட்டுக் கன்னம்
    தொட்டுக் கொள்ள
    ஒட்டிக் கொள்ளும்
    படம் – காக்கிச்சட்டை
    இசை – இசைஞானி இளையராஜா

    கண்ணுக்கு மையழகு.. என்று சொல்லும் போது கன்னத்தில் குழியழகு என்று எழுதிய வைரமுத்து ஒரு கிராமத்துக் காதலைச் சொல்லும் போது கன்னத்தில் கன்னம் வைத்த காதலனைப் பற்றியும் சொல்கிறார்.

    காக்கிச்சட்ட போட்ட மச்சான்
    கன்னத்திலே கன்னம் வெச்சான்
    படம் – சங்கர் குரு
    இசை – சந்திரபோஸ்

    தன்னுடைய குழந்தை கன்னத்தில் முத்தமிட்டால் நெஞ்சில் ஜில்ஜில்ஜில்ஜில் என்று எழுதியதும் இதே வைரமுத்துதான். ஆனாலும் காதல் குறும்பில் கன்னத்தில் முத்தமிட வரும் காதலனின் கன்னத்தில் தேளைப் போலக் கொட்டுவேன் என்றா எழுதுவது! உயிர் போக்கும் வலி அல்லவா அது!

    நேந்துக்கிட்டேன் நேந்துக்கிட்டேன்
    நெய்விளக்க ஏந்திக்கிட்டேன்
    உன்னோட கன்னத்திலே முத்தம் குடுக்க
    ..
    கன்னத்திலே தேளப் போலே கொட்டி விடுவேன்
    படம் – ஸ்டார்
    இசை – இசைப்புயல் ஏ.ஆர்.ரகுமான்

    அன்புடன்,
    ஜிரா

    041/365

     
    • niranjanbharathi 10:24 am on January 11, 2013 Permalink | Reply

      தேன் கன்னம், மதுக் கன்னம் , சந்தனக் கன்னம் ஆகியவற்றோடு சேர்ந்து இது தான் “ஜீரா” கன்னம் போலும். ஜாமூனைச் சூழந்து நிற்கும் ஜீரா 🙂 🙂

    • amas32 (@amas32) 2:43 pm on January 13, 2013 Permalink | Reply

      What a myriad of songs with cheeks alone! ;-)) You are one genius only 🙂

      amas32

    • தேவா.. 3:41 pm on January 13, 2013 Permalink | Reply

      கன்னங்களுக்கு பல உவமைகள்…..கண் பட்டிருச்சு ஜீரா…. 🙂

  • GiRa ஜிரா 10:23 am on December 17, 2012 Permalink | Reply
    Tags: Aingurunooru, Chandrabose, , P.Suseela   

    மாம்பூ 

    ஒரு அழகான பாடல் தொலைக்காட்சியில் வந்தது. மிக இனிமையான பாட்டு.

    படம் : மச்சானைப் பாத்தீங்களா
    இசை : சந்திரபோஸ்
    பாடியவர்கள் : இசையரசி பி.சுசீலா & கந்தர்வக் குரலோன் கே.ஜே.ஏசுதாஸ்
    எழுதியவர் : வாலி
    பாடலின் சுட்டி : http://www.youtube.com/watch?v=NcvYJiPUU48

    ஆண்: மாம்பூவே சிறு மைனாவே
    எங்க ராஜாத்தி ரோஜாச்செடி
    முள்ளிருக்கும் கள்ளிருக்கும்
    நினைக்கையில் இனிப்பாக இருக்கிறா ஆஆ
    நெருங்கையில் நெருப்பாகக் கொதிக்கிறா

    பெண்: மாம்பூவே சிறு மைனாவே
    நான் மச்சானின் பச்சைக்கிளி
    தொத்திக்கொள்ள தோள் கொடுத்தான்
    எனக்கது சுகமாக இருக்குது ஆஆ
    என் மனம் எங்கெங்கோ பறக்குது

    இந்தப் பாடலில் என்னை மிகவும் ஈர்த்தது பாடலின் தொடக்கம்.

    காதலியை எத்தனையெத்தனையோ பூக்களுக்கு ஒப்பிட்டுப் பாட்டெழுதியிருக்கிறார்கள். அழகிய தாமரை, மணமிகு மல்லிகை, செந்நிற ரோஜா என்று எத்தனையெத்தனையோ மலர்கள் இருக்க, மாம்பூவே என்று கவிஞர் தொடங்கியிருக்கிறார்.

    மாம்பூ மிகச்சிறியது. பொடிப்பொடியாக இருக்கும். ஒருவித மஞ்சள் நிறம் கலந்து இருக்கும். அதில் சிறப்பான நறுமணமும் இருக்காது.

    பிறகு ஏன் மாம்பூ என்று சொல்கிறார் கவிஞர்?

    பழைய தமிழ்ப் பாடல்களில் மாம்பூ வருகிறதா என்று தேடினேன்.

    ஐங்குறுநூறு என்ற நூலில் ஓரம்போகியார் ஒரு விளக்கம் கூறியிருக்கிறார். அது ஒரு 18+ குறும்புக் குறிப்பு.

    யாரெல்லாம் மாம்பூக்களை முகர்ந்து பார்த்திருக்கிறீர்கள்?

    சரி. ஓரம்போகியாரின் பாட்டுக்குப் போகலாம்.

    எக்கர் மாஅத்துப் புதுப் பூம் பெருஞ் சினை,
    புணர்ந்தோர் மெய்ம் மணம் கமழும் தண் பொழில்,
    வேழ வெண் பூ வெள் உளை சீக்கும்
    ஊரன் ஆகலின் கலங்கி,
    மாரி மலரின் கண் பனி உகுமே

    முழுப்பாட்டையும் விளக்க வேண்டாம். நேரடியாக மாம்பூவுக்கு வருகிறேன்.

    எக்கர் மாஅத்துப் புதுப் பூம் பெருஞ்சினை
    புணர்ந்தோர் மெய்ம் மணம் கமழும் தண் பொழில்

    கொஞ்சம் பிரித்துச் சொல்கிறேன் பொருள் புரியும்.

    எக்கர் மாஅத்துப் – மணல்மேட்டிலுள்ள மாமரத்தின்
    புதுப் பூம்பெருஞ்சினை – புதிதாக பூத்துள்ள பெரிய அரும்புகள்
    புணர்ந்தோர் மெய்ம் மணம் – ஆணோடு கூடிய பெண்ணின் மேனி மணத்தை(ப் போன்றது)
    கமழும் தண்பொழில் – கமழும் குளிர்ந்த சோலை

    மாம்பூவின் மணம் எப்படிப்பட்டது என்று தெரிகிறதா?

    ”மாம்பூவே சிறுமைனாவே” என்ற பாடலை எழுதியவர் வாலி. மாம்பூவுக்கு இலக்கியம் சொல்லும் நறுமணத்தைத் தெரிந்துதான் அவர் எழுதியிருக்க வேண்டும்.

    சற்று யோசித்துப் பாருங்கள்.. ஒரு காதலன் காதலியை மாம்பூவே என்று அழைக்கிறான் என்றால்… வேண்டாம். வேண்டாம். நான் இங்கேயே நிறுத்திக் கொள்கிறேன்.

    அன்புடன்,
    ஜிரா

    016/365

     
    • Samudra 10:34 am on December 17, 2012 Permalink | Reply

      ஹா ஹா.முழுவதையும் சொல்லவில்லையே

    • MGR 12:30 pm on December 17, 2012 Permalink | Reply

      ””மாம்பூவே சிறுமைனாவே” என்ற பாடலை எழுதியது யாரென்று தெரியவில்லை. “இதை மட்டும் மாற்றி விடுங்கள்!

      • என். சொக்கன் 12:39 pm on December 17, 2012 Permalink | Reply

        என் கவனக்குறைவுதான். மன்னிக்கவும். இந்தப் பிழையைச் சுட்டிக்காட்டியதற்கு நன்றி. சரி செய்துவிட்டேன் 🙂

    • Kannabiran Ravi Shankar (KRS) 12:35 pm on December 17, 2012 Permalink | Reply

      “மாம்பூவே” – ஒரு இலக்கியப் பாட்டு!
      இசையும் அப்படியே!
      மனசுக்குள்ள பல முறை ரீங்காரம் பண்ணும்…

      “மாம்பூவே” -ன்னு தொடங்குறதுக்கு முன்னாடி மெல்லிய தபேலா இசை..
      ஆண் குரல் முடிஞ்சதும் கொலுசு ஒலிக்கும் இசை = தந்தன-தன்; தன-தன்; தந்தன-தன் ன்னு ரொம்ப நல்லா இருக்கும்

      அப்பறம் ஜேசுதாஸ் பாடிக்கிட்டு இருக்கும் போதே, சுசீலாம்மா ஓஓ ன்னு இழுக்க ஆரம்பிப்பாங்க;
      நாலு வரிக்கும் முழு இழுப்பு…எப்படித் தான் மூச்சு பிடிச்சாங்களோ?… இழுத்து முடிச்ச அடுத்த நிமிசமே, “மாம்பூவே” ன்னு பிசிறில்லாமப் பாடத் தொடங்குவாங்க
      = இசை அரசி ங்கிற பட்டம் “வாங்குனதோ/ கொடுத்ததோ” இல்ல; “அமைஞ்சது” -ன்னு தெரிஞ்சிப் போகும்;

      சந்திரபோஸ் is a singer too, apart from Music Dir
      He wud have sung along with TMS in this same movie – எங்கம்மா மகராசி பாட்டுல அவரும் பாடுவாரு; நல்ல இசையமைப்பாளர்; காலம் அற்பாயுசுல பிரிச்சிருச்சி:(

      • Kannabiran Ravi Shankar (KRS) 12:46 pm on December 17, 2012 Permalink | Reply

        இந்தப் பாடம் பாக்கும் ஆசையைத் தூண்டிருச்சி

        Sivakumar, Sridevi & Sumithra – Kinda complex romantic flick
        ஸ்ரீதேவி அதிகம் ஆசையுள்ள, ஆனா வெளிக்காட்டிக் கொள்ளாத பொண்ணோ? ரொம்ப ஏக்கம் இருக்கும் அந்தக் காதல்ல;

        ஸ்ரீதேவி போட்டிருக்கும் அந்தக் குட்டைப் பாவாடை – தாவணி – பின்னல்; அதுக்காகவே படம் பார்க்கலாம்!
        “கொட்டடிச் சேலை” கட்டிய வண்ணம் பல்லக்கு ஒன்றாட = கொட்டடிச் சேலை -ன்னே எழுதி இருப்பாரு வாலி; Any1, what is கொட்டடிச் சேலை?:))

        வாலி, இது மாதிரி, போற போக்குல, நுண் வர்ணனைகள் அசால்டாத் தூவிச் செல்வதில் கில்லாடி

        முள்ளிருக்கும் கள்ளிருக்கும்
        மஞ்சக் குருத்து பிஞ்சுக் கழுத்து – மன்னவன் பூச் சூட
        மடல் வாழை மேல் – குளிர் வாடை போல் – அவனோடு நான்

        கிராமத்துல, மடல் வாழை பாத்தாத் தெரியும், ரொம்ப விரியாது; அது போல இந்தப் பொண்ணு; ஆசை இருக்குது ஆனா, ஆனா… Vaalee’s apt example
        பழகாத நாளெல்லாம் துயிலாத நாள்…

    • Kannabiran Ravi Shankar (KRS) 1:02 pm on December 17, 2012 Permalink | Reply

      “மாம்பூ”
      = இத பத்திக் கொஞ்சமே கொஞ்சமே சொல்லணும்; 18+ ரொம்ப இல்லாம சொல்ல முனைகிறேன்:)
      = வரம்பு மீறுச்சு-ன்னா பழியைச் சங்கத் தமிழ் மேல போடுங்க:) ஏன்னா, இது சங்கத் தமிழில், “அப்படியான” பூ:)

      மாம்பழத்துல வண்டு -ன்னு பாத்து இருக்கீங்க-ல்ல?
      ஏன் பலாப்பழம், வாழைப்பழம், ஆப்பிள், இன்னும் எத்தனையோ பழம்… அதுல எல்லாம் வண்டு இல்ல? Why Mango Only?:)

      அதாச்சும், பல பூக்களில் வண்டு வந்து உட்காரும்; “மோகம்” முடிஞ்சதும் பறந்துரும்!
      ஆனா, மாம்பூவில் வண்டு உட்கார்ந்தா…?
      அவ்ளோ சீக்கிரம் போக முடியாது; அவ்ளோ இன்பமா? பல நேரங்களில் வண்டு உள்ளேயே தங்கிக், காயாகிக், கனியாகி விடுவதும் உண்டு!

      இத்தனைக்கும் மாம்பூ ரொம்ப பெருசோ, அழகோ கிடையாது;
      ஆனா அதன் வாசம் = இலை வாசமா? பூ வாசமா? -ன்னு சொல்ல முடியாது
      “ஒரு மாதிரி” வாசம் = எனக்கு ரொம்பவும் பிடிக்கும்:)

      விறல் மாரன் ஐந்து மலர் வாளி சிந்த -ன்னு திருப்புகழ்!
      மாரன் (மன்மதன்) அம்பில் ஐந்து மலர்கள் = தாமரை, அசோகம், நீலோற்பலம், முல்லை, மாம்பூ! மாம்பூ தான் கடைசி; அப்பறம் No Escape:)

      • Kannabiran Ravi Shankar (KRS) 1:31 pm on December 17, 2012 Permalink | Reply

        ஆனா, இந்த மாம்பூ பின்னாடி ஒரு சோகம் உண்டு; பலர் கண்ணுக்கும் தெரியாத சோகம்; அவனுக்கு மட்டுமே தெரிந்த சோகம்!

        “மாம்பூ” சூல் கொள்வது (pollination) = வண்டால் அல்ல;
        பெரும்பாலும் காற்றில் பரவி வரும் மகரந்தம் தான்;

        அதான் பாத்தீங்க-ன்னா, மாங்காய்/ மாம்பழ விளைச்சல் கூட, ரொம்ப அதிகமா இருக்காது;
        தனி மரமா இருந்தா, ரொம்பக் கடினம்; எப்போ காத்து அடிச்சி, எப்போ மகரந்தம் வந்து, எப்போ காய்/ கனி ஆவது?
        அதான் மாமரங்களைத் தனியா நடாமல், தோப்பாவே நடுவாங்க, வெவசாயம் பாக்குறவங்க; வீட்டுல தனியா வளரும் மாமரம் ரொம்பக் காய்க்காது;

        வண்டுகள் ரொம்பச் சட்டை பண்ணாத பூ;
        ஆனா, அமர்ந்த பின், மீட்சி இல்லாமல், இறுதி வரை உள்ள பூ = மாம்பூ!
        ————

        இந்தக் குணத்தை வச்சித் தான், அதிக வெட்கமுள்ள ஸ்ரீதேவிக்கு, “மாம்பூவே” ன்னு வாலி தொடங்குனாரா? -ன்னு எனக்குத் தெரியாது;
        ஆனா, வாலி அறிவாரோ/ இல்லையோ, இந்தக் குணம் சங்கத் தமிழ் அறியும்!

        அவரோ வாரார்; தான் வந்தன்றே
        பொரி கால் “மாஞ் சினை” புதைய
        எரி கால் இளந் தளிர் ஈனும் பொழுதே
        -ன்னு, Sanga Tamizh records this Nature’s Harmony to the minutest detail

        அவரோ வாரார்; தான் வந்தன்றே -ன்னு பூக்கும் “மாம்பூ”
        =தன்னை அதிகமா யாருக்கும் குடுக்காத பூ!
        =குடுத்த பின் மீட்சி இல்லாத பூ
        அந்தப் பூவின் வாசம் கூட அப்படித் தான்! அது போதையோ/ பேதையோ தெரியாது; ஆனா அது அப்படித் தான்!

        விறல் மாரன் ஐந்து மலர் வாளி சிந்து போல,
        தமிழும் முருகுமாய்…
        முருகவனிடம் மீட்சியே இல்லாத “மாம்பூ” வாசமே, என் மனசிலும் மணக்கக் கடவது!
        =மாம்பூவே!

    • Rie 1:41 pm on December 17, 2012 Permalink | Reply

      இப்படி பிரித்தால் 18+ கிடையாதே? புணர்ந்தோர் – புணர்ந்து +ஓர். மணல் மேட்டில் உள்ள மாமரத்தில் புதிதாய் பூத்துள்ள அரும்போடு காற்று வந்து கலந்து, அங்கே ஒரு நறுமணத்தை கமழச் செய்யும் பூஞ்சோலை.

      • Kannabiran Ravi Shankar (KRS) 8:52 pm on December 17, 2012 Permalink | Reply

        Nice thinking Rie. We can take like that also.
        But, புணர்ந்து “ஓர்” மணல் மேடு ன்னு வராது; “ஒரு” மணல்மேடு ன்னு தான் வரும்;
        “ஓர்” = பொதுவா உயிர் எழுத்தின் முன்பே;
        பின்னாளில் (பாரதி காலம்) இவ்விதி தளர்ந்திடினும், சங்கத் தமிழில் அப்படியில்லை;
        பாடலில் “புணர்ந்தோர் மெய் மணம்” என்றே உள்ளது;

        இங்கு ராகவன் சொன்னது சரியே!
        இலக்கியத்திலும். உரைகளிலும் மாம்பூ வாசம் அப்படியே பயில்கிறது;
        Itz a speciality description:)
        சங்கத் தமிழில் பொருள் கொள்ளும் போது, எழுத்து-அசை-சீர் ன்னு இத்தனையும் பாக்கணும்:)

        • Rie 9:57 pm on December 17, 2012 Permalink

          Oh! Thank you.

        • Rie 6:16 am on December 18, 2012 Permalink

          ராகவன் பிரித்து சொல்லியிருப்பது தான் சரி. இப்படியும் பிரிக்கலாம் , பிரித்தால் தயக்கம் தேவைப்படாத உரையாக இருக்கும் என்பது தான் என் எண்ணம். ஓர் என்னும் சொல்லை ஒன்று என்பதற்கு பதில் அறிந்து கொண்ட என்றும் எடுத்துக் கொள்ளலாம்.

          “மணல் மேட்டில் உள்ள மாமரத்தில் புதிதாய்ப் பூத்துள்ள அரும்போடு காற்று வந்து கலந்து உணர்ந்த நறுமணம் கமழும் பூஞ்சோலை.”

          அப்புறம் பாட்டில் காற்று எனச் சொல்லப்படவில்லையே என ஒரு சந்தேகம் வரலாம். ‘காற்றுக்கு உருவம் கிடையாது என்பதைப் புலவர் நயமாகக் காட்டியிருக்கிறார்’ அப்படின்னு சொல்ல வேண்டியிருக்கும். 🙂

        • Kannabiran Ravi Shankar (KRS) 7:22 pm on December 18, 2012 Permalink

          ha ha ha; good try Rie:)

    • rajesh 11:16 am on December 19, 2012 Permalink | Reply

      Maanthalir meni endru solvomillaya.. thangam pol jolikkum .. appadi nayagiyai solliyirukkalame

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel