Updates from September, 2013 Toggle Comment Threads | Keyboard Shortcuts

  • GiRa ஜிரா 12:32 pm on September 3, 2013 Permalink | Reply  

    காலை எழுந்தவுடன் பாட்டு 

    பாவேந்தர் பாரதிதாசன் எழுதிய குடும்ப விளக்கு என்ற நூலைப் படித்துக் கொண்டிருந்தேன். அதில் ஒரு காட்சி. பொழுது புலர்கிறது. இல்லறத் தலைவி எழுகிறாள். அப்போது அவள் செய்ய வேண்டிய வேலைகளை எல்லாம் செய்து விட்டு யாழை மீட்டிப் பாடுகிறாள். அந்த இனிய பாடலைக் கேட்டு கணவனும் குழந்தைகளும் கண்விழிக்கிறார்கள்.

    யாழின் உறையினை எடுத்தாள்; இசையில்
    ‘வாழிய வையம் வாழிய’ என்று
    பாவலர் தமிழிற் பழச்சுவை சேர்த்தாள்.
    தீங்கிலாத் தமிழில் தேனிசைக் கலவைபோல்
    தூங்கிய பிள்ளைகள், தூங்கிய கணவனின்
    காதின் வழியே கருத்தில் கலக்கவே,
    மாதின் எதிர்அவர் வந்துட் கார்ந்தனர்
    அமைதி தழுவிய இளம்பகல்,
    கமழக் கமழத் தமிழிசை பாடினான்

    காட்சி முற்போக்குத்தனமா பிற்போக்குத்தனமா என்பதை ஆராய்வதை விட காட்சியின் அழகில் நான் மயங்கிவிட்டேன் என்றுதான் சொல்ல வேண்டும்.

    இன்றைக்கும் பல வீடுகளில் பெண்கள் எழுந்ததும் கந்த சஷ்டிக் கவசத்தையோ சுப்ரபாதத்தையோ ஒலிக்க விடுவதைக் கேட்கத்தானே செய்கிறோம்.

    இப்படியான காட்சிகள் திரைப்படங்களில் வந்திருக்கிறதா என்று யோசித்தேன். சட்டென்று எனக்குத் தோன்றியவை மூன்று பாடல்கள்.

    மலர்கள் நனைந்தன பனியாலே
    என் மனதும் குளிர்ந்தது நிலவாலே
    பொழுதும் விடிந்தது கதிராலே
    சுகம் பொங்கி எழுந்தது நினைவாலே

    காலை நேரத்துக் காட்டியையும் முந்தைய இரவில் அவள் கண்ட இன்பங்களின் மீட்சியையும் இப்படி நான்கு வரிகளில் சொல்ல கண்ணதாசன் இருந்தார் அப்போது.

    அந்தப் பெண் கணவனோடு கொண்ட காதல் விளையாட்டைக் கூட நாகரிகமாக எடுத்துச் சொல்லியிருக்கிறார் கவியரசர்.

    சேர்ந்து மகிழ்ந்து போராடி
    தலை சீவி முடித்தேன் நீராடி
    கன்னத்தைப் பார்த்தேன் முன்னாடி
    கன்னத்தைப் பார்த்தேன் முன்னாடி
    பட்ட காயத்தைச் சொன்னது கண்ணாடி

    கூடல் இன்பத்தை மட்டும் பாட்டில் வைக்கவில்லை அவர். அந்தக் குடும்பத்தலைவியின் அகவொழுக்கத்தையும் இறைநம்பிக்கையையும் பாட்டில் வைக்கிறார்.

    இறைவன் முருகன் திருவீட்டில்
    என் இதயத்தினால் ஒரு விளக்கேற்றி
    உயிரெனும் காதல் நெய்யூற்றி
    உன்னோடிருப்பேன் மலரடி போற்றி

    மேலே நான் சொன்ன பாடல் இதயக்கமலம் திரைப்படத்தில் கே.வி.மகாதேவன் இசையில் பி.சுசீலா அவர்கள் பாடியது. அடுத்து இளையராஜா இசையில் ஒரு பாடல் நினைவுக்கு வருகிறது. ஆம். காயத்ரி படப் பாடல் அது. பஞ்சு அருணாச்சலம் எழுதிய பாடல்.

    காலைப்பனியில் ஆடும் மலர்கள்
    காதல் நினைவில் வாடும் இதழ்கள்
    காயம் பட்ட மாயம் கன்னி எந்தன் யோகம்

    இந்தப் பாடலில் புதிதாகத் திருமணமான பெண் விடியலில் முந்தைய இரவின் நினைவுகளை வைத்துக் கொண்டு பாடுவாள்.

    எல்லாம் சரி. திருமணமான பெண்கள் இதையெல்லாம் நினைத்துக் கொண்டு விடியலில் பாடலாம். திருமணம் ஆகாத பெண்? திருவெம்பாவையும் திருப்பாவையும் மட்டுமே பாட வேண்டுமா?

    இல்லை என்கிறது உயர்ந்த உள்ளம் திரைப்படத்துக்காக கவிஞர் வைரமுத்து எழுதிய பாடல்.

    காலைத் தென்றல் பாடி வரும் ராகம் ஒரு ராகம்
    பறக்கவே தோன்றும் சிறகுகள் வேண்டும்

    இளம் பெண்ணின் ஆசை என்னும் வானில் இன்பம் என்னும் சிறகுகளை விரித்துப் பறக்கத் துடிப்பதை இந்த வரிகள் அழகாகச் சொல்கின்றன.

    அவளுடைய மனது அழகை ரசிக்கிறது. படிந்திருக்கும் பனி. குளிர்ந்திருக்கும் நிலம், கூவியிருக்கும் குயில், கூடியிருக்கும் குருவி, ஓங்கியிருக்கும் மரங்கள், பறவைகளைத் தாங்கியிருக்கும் கிளைகள் என்று அழகை ரசிக்கிறாள்.

    அந்த இரசனையில் இரவை நினைத்துப் பார்க்கிறாள். ஒரு அழகான பாடல் வரி உடனே தோன்றுகிறது.

    இரவிலே நட்சத்திரம் இருந்ததே எங்கே
    பனிதுளிகளாய் புல்வெளியில் விழுந்ததோ இங்கே

    இப்படியாக அவள் பெற்ற இன்பங்களை உலகமும் பெற வேண்டும் என்று நினைக்கிறாள். உறங்குகின்றவர்களை எழுப்புகிறாள்.

    உறங்கும் மானிடனே உடனே வா வா
    போர்வை சிறையை விட்டு வெளியே வா வா
    அதிகாலை உன்னை பார்த்து வணக்கம் சொல்லும்

    பதிவில் இடம் பெற்ற பாடல்கள்
    பாடல் – மலர்கள் நனைந்தன பனியாலே
    வரிகள் – கவி்ரசர் கண்ணதாசன்
    பாடியவர் – பி.சுசீலா
    இசை – திரையிசைத் திலகம் கே.வி.மகாதேவன்
    படம் – இதயக்கமலம்
    பாடலின் சுட்டி – http://www.youtube.com/watch?v=4HVJhS-KTzM

    பாடல் – காலைப்பனியின் ஆடும் மலர்கள்
    வரிகள் – பஞ்சு அருணாச்சலம்
    பாடியவர் – சுஜாதா
    இசை – இசைஞானி இளையராஜா
    படம் – காயத்ரி
    பாடலின் சுட்டி – http://www.youtube.com/watch?v=pTgZcMOGveI

    பாடல் – காலைத் தென்றல் பாடிவரும்
    வரிகள் – கவிஞர் வைரமுத்து
    பாடியவர் – இசையரசி பி.சுசீலா
    இசை – இசைஞானி இளையராஜா
    படம் – உயர்ந்த உள்ளம்
    பாடலின் சுட்டி – http://www.youtube.com/watch?v=HMdOYRD3Shs

    அன்புடன்,
    ஜிரா

    275/365

    Advertisements
     
    • amas32 4:46 pm on September 3, 2013 Permalink | Reply

      பெண்ணில்லா வீட்டில் குப்பையும் கூளமும் தான் இருக்கும். பெண்ணொருத்தி இருந்தால் விடியற்காலையில் எழுந்து வீட்டை சுத்தம் செய்து கோலமிட்டு விளக்கேற்றி வீட்டை லக்ஷ்மிகரமாக்குவாள்.
      காலை நேரத்தில் பாடுவது, யாழிசைப்பதற்கெல்லாம் இந்த துரித யுகத்தில் நேரம் இருப்பதில்லை 😦 அந்த வேலையை குறுந்தகடுகள் செய்கின்றன 🙂

      //கன்னத்தைப் பார்த்தேன் முன்னாடி
      பட்ட காயத்தைச் சொன்னது கண்ணாடி//
      இதை ஆங்கிலத்தில் hickey என்பார்கள். எல்லா சமூகத்திலும் அடுத்த நாள் எழுந்து முன்னிரவு நடந்தவைகளை பெண் அசை போடுவது இயல்பான விஷயமாகக் கொண்டாடப் படுகிறது 🙂

      amas32

    • rajinirams 10:49 am on September 4, 2013 Permalink | Reply

      அதிகாலைப்பொழுதின் இனிமைக்கு மெருகூட்டும் மூன்று முத்தான பாடல்களை கொண்ட நல்ல பதிவு. “இரவிலே நட்சத்திரம் இருந்ததே எங்கே
      பனிதுளிகளாய் புல்வெளியில் விழுந்ததோ இங்கே” என்ற வைரமுத்துவின் வரிகளாகட்டும்-“பொழுதும் விடிந்தது கதிராலே
      சுகம் பொங்கி எழுந்தது நினைவாலே”என்ற கவியரசரின் வரிகளாகட்டும் சூப்பர்.”அலைகள் ஓய்வதில்லை”படத்தின் வெளிவராத “புத்தம் புது காலை பொன்னிற வேளை பாடலும் பொண்ணு ஊருக்கு புதுசு படத்தின் “சோலைக்குயிலே காலைக்கதிரே” பாடலும் இனிமையானவை.

  • mokrish 11:13 am on May 12, 2013 Permalink | Reply  

    குடியிருந்த கோயில் 

    எழுபது எண்பதுகளில் என் பள்ளி, கல்லூரி நாள்களில் அன்னையர்தினம் என்று ஒன்று தனியாக தெரிந்ததில்லை ஆசிரியர் தினமும் குழந்தைகள் தினமும் மட்டுமே எங்களுக்கு தெரியும். இதை இந்தியா முழுவதும் கொண்டாடும் வழக்கம் எப்போது துவங்கியிருக்கும்?

    தமிழ் இலக்கியத்தில் இது பற்றி ஏதாவது உண்டா ? தெரியவில்லை.  இது மேற்கிலிருந்து இறக்குமதி செய்யப்பட்டதா ? படிப்புக்காகவும் வேலை தேடியும் கடல் கடந்த இந்தியர்கள் துவங்கியிருக்கலாம். அல்லது ஆர்ச்சீஸ் ஹால்மார்க் வாழ்த்து அட்டைகள் வந்தவுடன் துவங்கியிருக்கலாம்.

    அன்னையர் தினம் என்று  கொண்டாடும் வழக்கம் இல்லைதான் . ஆனால் தாய்க்கும் தாய்மைக்கும் இந்தியா கலாசாரத்தில் ஒரு ஸ்பெஷல் இடம் உண்டு, இங்கு மரியாதைக்குரிய எல்லாமே தாய்தான். அம்மாதான் (அரசியல் பேசவில்லை!)

    இங்கு கதைகளிலும் திரைப்படங்களிலும் தாய் – தியாக உருவான ஒரு உன்னத கதாபாத்திரம். தாயின் பெருமை சொல்ல நிறைய பாடல்கள் உண்டு. தாய் பற்றி எழுதாத கவிஞரே இல்லை என்று நினைக்கிறேன் அம்மா  பற்றி கண்ணதாசன் எழுதிய ஒரு பாடல் டீச்சரம்மா படத்தில்

    http://www.youtube.com/watch?v=MP3XOTn1ju8

    அம்மா என்பது தமிழ் வார்த்தை

    அதுதான் குழந்தையின் முதல் வார்த்தை

    அம்மா இல்லாத குழந்தைகட்கும்

    ஆண்டவன் வழங்கும் அருள் வார்த்தை

    கவலையில் வருவதும் அம்மா அம்மா

    கருணையில் வருவதும் அம்மா அம்மா

    தவறு செய்தாலும் மன்னிப்புக்காக

    தருமத்தை அழைப்பதும் அம்மா அம்மா

    பூமியின் பெயரும் அம்மா அம்மா

    புண்ணிய நதியும் அம்மா அம்மா

    தாயகம் என்றும் தாய்மொழி என்றும்

    தாரணி அழைப்பதும் அம்மா அம்மா

    வழக்கம் போல் எளிமையான வார்த்தைகளில் ஒரு statement of fact. (ஒரு நெருடல் – அம்மா என்பது தமிழ் வார்த்தை என்று சொல்கிறார். ஆனால் கூகிளில் தேடினால் –  Amma means mother in many languages. It is originally derived from the East Syriac word Emma which means mother என்கிறது . இது சரியா?)

    ராம் திரைப்படத்தில் சிநேகன் எழுதிய ஓர் அழகான பாடல். தாயின் பாதமே சொர்கம் என்று சொல்கிறார் தாய்க்கு  ஒரு தொட்டில் கட்டி மகன் பாடும் தாலாட்டு போல் வரிகள் http://www.youtube.com/watch?v=4KwKnk3_-Jw

    ஊர் கண் எந்தன் மேலே பட்டால் உன் உயிர் நோகத் துடித்தாயே

    உலகத்தின் பந்தங்களெல்லாம் நீ சொல்லி தந்தாயே

    பிறப்புக்கும் இறப்புக்கும் இடையே வழி நடத்தி சென்றாயே

    தாய் சொல்கின்ற வார்த்தைகள் எல்லாம் நோய் தீர்க்கும் மருந்தல்லவா

    சுழல்கின்ற பூமியின் மீது சுழலாத பூமி நீ

    என்று சொல்லி அன்னை தான் எல்லாம் என்று முடிக்கிறார். அந்த கடைசி வரியின் தித்திப்பு … அருமை.

    இந்தக்காலக் கவிஞர்கள் பலர் காதலியின் வளையோசை கவிதைகளில் மூழ்கி அவள் கால் கொலுசில் தொலைந்து என்று கற்பனையில் இருக்கும்போது பாரதிதாசன் வேறு விதமாக சிந்திக்கிறார் . எம் பி ஸ்ரீனிவாசன் இசையில் சேர்ந்திசையாக கேட்ட நினைவு. நிஜங்கள் என்ற படத்தில் வாணி ஜெயராம் குரலில் திரையிலும் வந்தது

    . http://groups.yahoo.com/group/mytamilsongs/attachments/folder/2089257867/item/list

     அம்மா உந்தன் கைவளையாய் ஆகமாட்டேனா?

    அலுங்கி குலுங்கி நடக்கையிலே பாடமாட்டேனா?

    அம்மா உந்தன் காதணியாக ஆகமாட்டேனா?

    அசைந்து அசைந்து கதைகளினைச் சொல்ல மாட்டேனா?

    அம்மா உந்தன் நெற்றிப்பொட்டாய் ஆகமாட்டேனா?

    அழகொளியாய் நெற்றி வானில் மின்னமாட்டேனா?

    எவ்வளவு இனிமையான வரிகள்

    இமைபோல  இரவும் பகலும் காக்கும் அன்னையின் அன்பு பார்த்த பின்பு அதைவிட வானம் பூமி யாவும் சிறியது  என்கிறார் வாலி. உண்மைதானே?

    மோகனகிருஷ்ணன்

    162/365

     
    • amas32 11:30 am on May 12, 2013 Permalink | Reply

      அம்மா வரும் முன்னே அவளுக்கே பிரத்யேகமான கைவளை ஓசையோ மெட்டியயொலியோ அம்மா வருகிறாள் என்பதைத் தெரியப்படுத்திவிடும். அவளுக்குத் தெரியக் கூடாத செயல் ஏதாவது செய்து கொண்டிருந்தால் அதை விரைவில் ஒளித்து வைக்க அந்த ஒலி உதவும். அதே போல அம்மா மடியின் மேல் படுத்துக் கொள்ளும் போது சமையல் வேலை செய்து சிறிது புடவையில் எஞ்சியிருக்கும் ஈரம் அந்தத் தாயின் குழந்தைகளுக்கு மட்டுமே புரியும் ஒரு தனித் தன்மை 🙂 தாய் என்பவள் தோழியாகவும் இருந்து விட்டால் அதைவிட சொர்க்கம் வேறு எதுவும் இல்லை.

      amas32

    • GiRa ஜிரா 11:30 am on May 12, 2013 Permalink | Reply

      அன்னையைப் போல் ஒரு தெய்வமில்லை
      தாய் தந்த பிச்சையிலே பிறந்தேனம்மா
      அம்மா… நீ சுமந்த பிள்ளை சிறகொடிந்த கிள்ளை
      தாயே என் தாயே எனை ஏன் மறந்தாயே
      தாயிற் சிறந்த கோயிலும் இல்லை
      தாயின் முகம் இங்கு நிழலாடுது
      அம்மா ஓர் அம்பிகை போல் அப்பா ஓர் ஆண்டவன் போல்
      என் தாயெனும் கோயிலைக் காக்க மறந்திட்ட

      எத்தனையெத்தனை பாட்டுகள் தமிழ்த் திரைப்படங்களில்.

      அம்மா என்பது தமிழ் வார்த்தைதானே. எல்லா மொழியிலும் இருக்கும் ஒரு வார்த்தை இது. குறிப்பிட்ட எந்த மொழியிலிருந்தும் போயிருக்க முடியாது.

      கன்றின் குரலும் கன்னித் தமிழும் சொல்லும் வார்த்தை அம்மா அம்மா
      கருணை தேடி அலையும் உலகம் உருகும் வார்த்தை அம்மா அம்மா
      எந்த மனதில் பாசம் உண்டோ அந்த மனமே அம்மா அம்மா
      (நானும் அரசியல் பேசவில்லை) 🙂

      இதையும் கண்ணதாசன் தெள்ளத்தெளிவாகச் சொல்லிவிட்டார்.

    • rajnirams 12:31 pm on May 12, 2013 Permalink | Reply

      அன்னையர் தினத்துக்கேற்ற அருமையான பதிவு. தாய் பாச பாடல்களுக்கு குறைவே இல்லை.அம்மா என்பது தமிழ் வார்த்தை பாடல் அருமையான பாடல்.என்னை பொறுத்த வரை “அம்மா என்றழைக்காத உயிரில்லையே” தான் சூப்பர். நன்றி.

    • Uma Chelvan 7:47 pm on May 12, 2013 Permalink | Reply

      excellent post as usual. but,ஆனல், குழந்தை தமிழில் பேசும் முதல் வார்த்தை ” அத்தை அல்லது தாத்தா”. உதடுள்கள் ஒட்டாத வார்த்தைகள் தான் முதலில் பேசுவார்கள்.

  • mokrish 12:10 pm on April 9, 2013 Permalink | Reply
    Tags: , பாரதிதாசன்   

    தமிழும் அவளும் ஓரினம் 

    பாவேந்தர் பாரதிதாசன் எழுதிய தமிழுக்கும் அமுதென்று பேர் என்ற பாடல் நம் மொழியின் பெருமை சொல்லும். இதில் தமிழுக்கு சொல்லப்பட்ட சிறப்பையெல்லாம் ஒரு பெண்ணைப்பற்றி  சொல்ல நினைத்த வாலி. அதை அவளுக்கும் தமிழ் என்று பேர் என்ற  ஒரே வரியில் சாதித்தார்.

    தமிழும் அவளும் ஓரினமா ? கண்ணதாசன் என் மகன் படத்தில் வரும் பொன்னுக்கென்ன அழகு என்ற ஒரு காதல் பாடலில் http://www.inbaminge.com/t/e/En%20Magan/Ponnukkena%20Azhagu.eng.html தமிழ் பற்றியும் அவள் பற்றியும் சொல்வதைப் பாருங்கள். பல்லவியில் அவள் கண்கள் எழுதும் தமிழ்க் கோலங்கள் என்று ஆரம்பிக்கிறார். தொடர்ந்து இலக்கியம், இலக்கணம், எதுகை மோனை, கம்பரசம், வஞ்சி , சிந்து என்று வார்த்தைகள். பாடலில் எங்கே தொட்டாலும் சங்கத்தமிழ் வாசம்.

    பொன்னுக்கென்ன அழகு
    பூவுக்கென்ன பெருமை
    உன் கண் எழுதும் தமிழ்க்
    கோலங்கள் போதாவோ.. வண்ணக்கிளியே

    பொன்னென்றும் பூவென்றும் சொல்வேனோ கதை எழுதும் உன் விழிகளே போதும் என்று பல்லவியில் பின் காதலன் காதலி உறவை இலக்கியத்திற்கும் இலக்கணத்திற்கும் உள்ள உறவாக குறிப்பிடுகிறார்

    ஒரு பொருள் மறைபொருள்
    விவரிக்கும் இலக்கியமே
    உடன்பட்டுத் துணை நின்று
    சுகம் தரும் இலக்கணமே

    இலக்கியமா இலக்கணமா எது முதலில் தோன்றியது ? மொழிதான் முதலில். இந்த விவாதத்தை தவிர்த்து இலக்கியமும் இலக்கணமும் complementary என்பது போல ஒரு விளக்கம் கொடுக்கும் கவிஞர்  இதை இவ்வளவு அழகாக, பொருத்தமாக ஒரு காதல் பாடலின் வரிகளாக  கொண்டு வந்திருப்பது அருமை. மறைபொருள் விவரிக்கும் ஆண்தான் இலக்கியமா? உடன்பட்டு துணை நிற்கும் (ரூல்ஸ் பேசும் ?) பெண்தான் இலக்கணமா?

    எதுகையில் உன் முகம்
    மோனையில் உன் முகம்

    எதுகையும், மோனையும் கவிதைக்கு அழகு. காதல் வயப்பட்டவன் கவிதை எழுதும்போது ‘ஒன்றி வருவது’ அவள் முகம் என்கிறாரோ?

    கம்பரசக் கிண்ணம் அதிலே
    கட்டி வெல்லக் கன்னம்
    காமதேவன் வாகனங்கள்
    காற்றிலே ஆடுதே..

    கண்கள் எழுதும் தமிழ்கோலங்கள், எதுகையிலும் மோனையிலும் முகம், கட்டிவெல்லக் கன்னம் எல்லாம் பார்த்தவுடன் காமதேவன் வாகனங்கள் காற்றிலே ஆடுதே என்று ஒரு வரி. மன்மதன் அம்பு தெரியும் அதில் உள்ள பூக்கள் தெரியும் அவன் வாகனம் என்ன? மவுண்டன் வியூ மகாவிஷ்ணுவிடம் கேட்டால் மன்மதன், ரதி—வாகனம் கிளி என்று பதில் வருகிறது ஓ அதனால்தான் காற்றிலே ஆடுதே என்று ஒரு clue கொடுக்கிறாரா?

    சேரன் மகள் வஞ்சி எதிரே
    சேனை கண்டு அஞ்சி
    காதல் தேவன் மார்பின் மீது
    காவலைத் தேடுதே

    போர்தொடுத்துச் செல்பவர் தான் வஞ்சிப் பூவை சூடிச்சென்றதாக கேள்வி.  ஆனால் கண்ணதாசன் காதலியை வஞ்சி என்று சொல்லி அவள் காதல் தாக்குதலில் அஞ்சி அவன் காவலை தேடுவதாய் சொல்கிறார்

    மின்னும் நீலமணி போல் இன்று
    என் மேல் ஆடு கண்ணே
    இன்னும் என்ன ஏக்கம் இன்ப
    வண்ணம் பாடு கண்ணா

    மின்னும் நீலமணியிலும் இலக்கிய வாடை. என்ன என்று கூகுளில்  தேடினால் கோங்க மலரில் உறங்கும் வண்டு பொன்னில் பதித்த நீலமணிபோல் உள்ளது என்ற பொன் தகடு உறு நீலம்  புரைவன பல – காணாய்! என்று கம்பன் வார்த்தைகள் . பொன்னில் பதித்த  – அட அதான் மின்னுதோ !

    பாடலை எப்படி முடிக்கிறார் ? நாம் பள்ளியில் படித்த ஒன்றே செய்க அதை நன்றே செய்க என்ற இழையில் காதல் வரிகள் நெய்து முடிக்கிறார்

    ஒன்றே காண வேண்டும் அதை
    நன்றே காண வேண்டும்
    நன்றே காண வேண்டும்
    அதை இன்றே காண வேண்டும்

    கண்ணதாசன் பாடல்கள் தேக்கடியில் யானை போல கம்பீரம். நாக்கடியில் கல்கண்டு போல தித்திப்பு.

    மோகன கிருஷ்ணன்

    129/365

     
    • amas32 3:00 pm on April 9, 2013 Permalink | Reply

      The last line is beautiful! Never heard of these songs until today. Learnt something new, thanks :-). amas32

    • Saba-Thambi 3:04 pm on April 9, 2013 Permalink | Reply

      “கண்ணதாசன் பாடல்கள் தேக்கடியில் யானை போல கம்பீரம். நாக்கடியில் கல்கண்டு போல தித்திப்பு”. spot on!

    • GiRa ஜிரா 11:39 am on April 11, 2013 Permalink | Reply

      எனக்கு ரொம்பவும் பிடிச்ச பாட்டுல இதுவும் ஒன்னு. வெறும் காதல் பாட்டு.. கண்ணே மணியே முத்தே பவழமேன்னு எழுதாம இவ்வளவு யோசிச்சு எழுதனுமா? எழுதியிருக்காரே கவியரசர். அதையும் அழகா எடுத்து எழுதியிருக்கிங்களே நீங்க 🙂

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel