Updates from October, 2013 Toggle Comment Threads | Keyboard Shortcuts

  • mokrish 7:54 pm on October 23, 2013 Permalink | Reply  

    இருவர் ஒன்றானால் ஒருவர் என்றானால் 

    அன்றொரு நாள் ட்விட்டரில் ஒரு அட்டகாசமான வெண்பா விளையாட்டு. நண்பர் @nchokkan கண்ணன் பற்றி வெண்பா எழுத நண்பர் @elavasam அதில் ஒரு கேள்வி கேட்க — இவர் பதில் சொல்ல என்று பரபரப்பான one day மாட்ச்  போல சுவாரசியமாக இருந்தது.

    எனக்கு வெண்பாவும் தெரியாது விருத்தமும் தெரியாது. ஆனால் விவாதிக்கப்பட்ட விஷயம் கண்ணனும் ராமனும். கண்ணன் பற்றிய பாட்டில் ஏன் ராமர் பற்றிய Reference என்று முதல் கேள்வி.. இருவரும் ஒன்றுதானே என்று ஒரு பதில். தப்பு செய்தவன் ஒருவன் மாட்டிக்கொண்டவன் வேறொருவன் என்று ஒரு மறுமொழி.  ஒரே பாட்டில் பல அவதாரங்கள் என்று ஒரு தனி track. அட அட

    அதே கேள்விகளுக்கு நாமும் பதில் தேடலாம் என்று ஒரு (விபரீத) ஆசை. ஆண்டாள் திருப்பாவையில் கொக்கு உருவத்தில் வந்த பகாசுரனை வதம் செய்த கண்ணனைக் குறித்தும், பொல்லா அரக்கனாகிய ராவணனைக் கொன்ற ராமனைக் குறித்தும்

    புள்ளின்வாய் கீண்டானைப் பொல்லா வரக்கனைக்

    கிள்ளிக் களைந்தானைக் கீர்த்திமை பாடிப்போய்ப்

    என்று ஒரே பாசுரத்தில் பாடியுள்ளதாகப் படித்தேன். மணாளன் எப்படி இருக்க வேண்டும் ஆண்டாள் கலங்குகிறாள். கண்ணனா ராமனா ? கண்ணுக்கு இனிய கண்ணனுக்கு ஒரு வரி மனத்துக்கு இனிய ராமனுக்கு ஒரு வரி என்று மாறி மாறி உருகுகிறாள்.  கண்ணதாசன் சுமைதாங்கி என்ற படத்தில் ஒரு matrimonial விளம்பரம் போல எழுதுகிறார் (இசை விஸ்வநாதன் ராமமூர்த்தி பாடியவர் எஸ் ஜானகி)

    http://www.youtube.com/watch?v=lsY6sJPpAF0

    ராதைக்கேற்ற கண்ணனோ

    சீதைக்கேற்ற ராமனோ

    கோதைக்கேற்ற கோவலன் யாரோ அழகு

    கோதைக்கேற்ற காவலன் யாரோ

    அன்னை இல்லம் படத்தில் நடையா இது நடையா என்ற பாடலிலும் (இசை கே வி மகாதேவன் பாடியவர் டி எம் எஸ்) பொருத்தம் பார்க்கிறார்.

    தேரோட்டும் கண்ணனுக்கு ராதா

    சிங்கார ராமனுக்கு சீதா

    காரோட்டும் எனக்கொரு கீதா

    கல்யாணம் பண்ணிக்கொள்ளத் தோதா

    நம்மாழ்வார்  ராமன் கூனி மேல் மண் உருண்டை எறிந்த பழியை

    மானேய் நோக்கி மடவாளை மார்வில் கொண்டாய் மாதவா

    கூனே சிதைய வுண்டைவில் நிறத்தில் தெறித்தாய் கோவிந்தா!

    என்ற பாடலில் கண்ணன் மேல் போடுகிறார். .

    ராமன் ஒரு வகை கண்ணன் ஒரு வகை என்பது ஆண்டாள் கட்சியா? நம்மாழ்வார் அதெல்லாம் இல்லை இருவரும் ஒன்றே என்கிறாரா? இன்னும் நிறைய படிக்க வேண்டும்.

    கண்ணதாசன் அந்த Bride / Bridegroom தேவை என்பதையெல்லாம் தள்ளிவைத்து இருவேடம் போட்டாலும் திருமால் ஒன்றே என்று உயர்ந்தவர்கள் படத்தில் (இசை சங்கர் கணேஷ் பாடியவர் எம் பாலமுரளிகிருஷ்ணா)

    http://www.palanikumar.com/filmsongdetails.phtml?filmid=2697&songid=13160

    ராமனும் நீயே கிருஷ்ணனும் நீயே

    ராதையின் வடிவம் சீதையும் தாயே

    நால் வேதம் அவனாக உருவானதோ

    நாலாகும் குணம் பெண்மை வடிவானதோ

    என்று சொல்கிறார்.

    தசாவதார வரிசை ஒரு evolution செய்தி சொல்லும் என்று படித்தேன் . முதலில் நீர் வாழ் உயிரினம் அடுத்து ஒரு amphibian அப்புறம் ஒரு நிலத்தில் வாழும் வராகம் அடுத்து கொஞ்சம் மிருகம் கொஞ்சம் மனிதன் என்று அது ஒரு அழகான வரிசை. இதில் ராமனுக்கு அடுத்து கண்ணன். இதில் இருக்கும் evolution செய்தி என்ன?

    மோகனகிருஷ்ணன்

    325/365

    Advertisements
     
    • amas32 8:12 pm on October 23, 2013 Permalink | Reply

      மோகனக்ரிஷ்ணனனான உங்களுக்கு அது விளங்காதா? 😉 இராமன் ரூல்ஸ் ராமனுஜன். கிருஷ்ணன் சகலகலா வல்லவன். அடுத்த பரிணாம வளர்ச்சி அதுவாகத் தானே இருக்க வேண்டும். ஆறு அறிவுள்ள மனிதன் இன்னும் இன்னும் சாமர்த்தியத்தையும் செயல் திறனையும் அதிகப் படுத்திக் கொள்ள வேண்டிய நிலையை இன்று நாம் கண் கூடாகப் பார்க்கவில்லையா? அதைத் தான் கிருஷ்ணனின் அவதாரம் நமக்குக் கட்டியுள்ளது. இன்றைய காலக் கட்டத்திற்குத் தேவையான நெளிவு சுளுவோடு வாழ கிருஷ்ணன் கற்றுத் தருகிறார் என்பது என் தாழ்மையானக் கருத்து.

      இராமனின் வாழ்க்கை ஒரு பாடம். கிருஷ்ணன் உபதேசம் செய்யவே அவதாரம் எடுத்தார். சிலது கேட்டுத் தான் கற்றறிய முடியும். அதை நமக்கு அருளியவர் கண்ணன்.

      அருமையானப் பாடல்கள் :-)) நன்றி!

      amas32

    • rajinirams 7:35 pm on October 24, 2013 Permalink | Reply

      ராமன்,கிருஷ்ணன் என்ற அவதாரங்களை வைத்து அருமையான பதிவை தந்திருக்கிறீர்கள்.
      “டபுள்ஸ்”படத்தில் நாயகனை-ராமனாக சித்தரித்து மனைவியும் கிருஷ்ணனாக காதலியும் நினைத்து பாடும் வைரமுத்துவின் பாடல் நன்றாக இருக்கும். “ராமா ராமா ராமா சீதைக்கேத்த ராமா உன் வில்லாய் நானும் வந்தேன் அம்பு பூட்டடா… கிருஷ்ணா கிருஷ்ணா உன் புல்லாங்குழலாய் வந்தேன் நீ வாசிடா என்று வரும். தசாவதாரம் படத்தில் வாலியின் வரிகள் “ராவணன் தன் தலையை கொய்ய ராமனாக வந்தாய்,கண்ணனாக நீயே வந்து காதலையும் தந்தாய்”.இன்னொரு பாடல் வரிகள்: ஒருத்திக்கு ஒருவன் என்ற தத்துவமே ஸ்ரீ ராமன்,காதல் உணர்வுக்கு பேதமில்லை என்றவனே பரந்தாமன், ஸ்ரீ ராமனாக நாயகியோடு வாழ்வது ஓரின்பம்,ஸ்ரீ கிருஷ்ணனாக கோபியரோடு வாழ்வது பேரின்பம்-வீட்டிலே ராமன் வெளியிலே கிருஷ்ணன். http://youtu.be/XkM4zfgSBDg

  • என். சொக்கன் 3:02 pm on August 16, 2013 Permalink | Reply
    Tags: 08 2013, 258/365   

    தளிரே! 

    • படம்: கலைக் கோவில்
    • பாடல்: தங்க ரதம் வந்தது
    • எழுதியவர்: கண்ணதாசன்
    • இசை: விஸ்வநாதன், ராமமூர்த்தி
    • பாடியவர்: பாலமுரளி கிருஷ்ணா, பி. சுசீலா
    • Link: http://www.youtube.com/watch?v=2wWdF_kZhjA

    தங்க ரதம் வந்தது வீதியிலே, ஒரு

    தளிர் மேனி வந்தது தேரினிலே!

    மரகதத் தோரணம் அசைந்தாட, நல்ல

    மாணிக்க மாலைகள் கவி பாட!

    துளிர் தெரியும், அதென்ன தளிர்?

    தமிழ்க் கவிஞர்களுக்கு, குறிப்பாகக் காதல் பாடல் எழுதுகிறவர்களுக்கு மிகவும் பிடித்த வார்த்தை இது. ‘தளிர்மேனி’ என்று வர்ணிப்பார்கள், ‘இளந்தளிரே’ என்று புகழ்வார்கள், ‘மாந்தளிரே’ என்று வகை குறிப்பிட்டுச் சொல்வதும் உண்டு.

    ’தளிர்’ என்றால் இலை என்பது எல்லாருக்கும் தெரியும், அதற்கு ‘இலை’ என்ற வார்த்தையையே பயன்படுத்திவிட்டுப் போகலாமே. ஏன் ‘தளிர்’ என்று சொல்லவேண்டும்?

    இலை என்றால், அது இப்போதுதான் முளைத்ததாகவும் இருக்கலாம், காய்ந்து கரடுமுரடானதாகவும் இருக்கலாம், ஏன், பழுத்துப்போய் உதிர்ந்து கீழே கிடக்கும் சருகுகூட இலைதானே?

    ஆனால் தளிர் என்பது அப்படி இல்லை. அது இலையின் ஒரு குறிப்பிட்ட நிலையைச் சொல்கிறது, முளைத்துச் சிறிதளவுமட்டும் வளர்ந்த (தளிர்த்த) மென்மையான, அழகான இலை.

    திருவள்ளுவர் இந்தச் சொல்லை எப்படிப் பயன்படுத்துகிறார் என்று பாருங்கள்:

    உறுதொறு உயிர் தளிர்ப்பத் தீண்டலால் பேதைக்கு

    அமிழ்தின் இயன்றன தோள்

    ஒரு காதலன் காதலியைப் பார்த்துக் கேட்கிறான், ‘அடியே, உன் தோள்களை எலும்பால, சதையால செஞ்சாங்களா, இல்லை அமுதத்தால செஞ்சாங்களா?’

    ‘ஏன்ய்யா உனக்கு இந்தச் சந்தேகம்?’

    ‘பின்னே? உன்னைப் பிரிஞ்சு வாடின என் உயிர், நீ தொட்டதும் சட்டுன்னு தளிர்க்குதேடி!’

    அதாவது, புதிய இலை அல்ல, ஏற்கெனவே இருந்த உயிர்தான், அவள் தொட்டதும், Refresh ஆகிறது, இளமையாகிறது, என்றும் பதினாறாகிறது!

    அதான் தளிர். காதல் பாடல்களுக்கு மிகப் பொருத்தமான வார்த்தை, காதல்வயப்பட்ட இளம் மேனியை வர்ணிக்கவும்!

    ***

    என். சொக்கன் …

    258/365

     
    • Uma Chelvan 4:30 pm on August 16, 2013 Permalink | Reply

      என்ன ஒரு அற்புதமான பாடல் ஆபோகி ராகத்தில்.!!பின்னே? உன்னைப் பிரிஞ்சு வாடின என் உயிர், நீ தொட்டதும் சட்டுன்னு தளிர்க்குதேடி!’……….காதலில் அழகே அங்கேதானே இருக்கு!. :)))))).

    • Uma Chelvan 5:50 am on August 17, 2013 Permalink | Reply

      அது சாதாரணமாக தொட்டாலும் சரி அல்லது சமயலறையில் கை வேலையை விடிட்டுடு வந்து தொட்டாலும் சரி !!!

    • rajinirams 9:06 pm on August 19, 2013 Permalink | Reply

      அடடா எளிமையாகவும் அருமையாகவும் விளக்கி விட்டீர்கள்-தளிர்”சிறப்பை. நன்றி.

  • mokrish 11:20 am on June 6, 2013 Permalink | Reply  

    மௌனத்தில் விளையாடும் 

    ‘இப்படி மனசாட்சியே இல்லாம பேசலாமா’ என்ற கேள்வியை நாம் யாரிடமாவது வீசியிருப்போம்.. அல்லது நம்மைப் பார்த்து யாராவது கேட்டிருக்கலாம். இந்த மனசாட்சி என்பது என்ன?  இதற்கு ஒரு உருவம் உண்டா?

    திரைப்படங்களில் மனசாட்சி என்று காட்டப்பட்ட imagery என்ன ? திடீரென்று கதாபாத்திரம் இரண்டாக பிரிந்து விவாதம் நடக்கும்  அல்லது சக்கப்போடு போடு ராஜா என்று பாடும். அல்லது ‘அழக்கூடாது நீ டான்’ என்று விவேக் காமெடி போல் பேசும். அவ்வளவுதானா?

    கண்ணதாசன் நூல்வேலி என்ற படத்தில் எழுதிய மௌனத்தில் விளையாடும் மனசாட்சியே என்ற பாடலில் மனசாட்சிக்கு ஒரு அருமையான வடிவம் கொடுக்கிறார். (இசை எம் எஸ் விஸ்வநாதன் பாடியவர் : பாலமுரளி கிருஷ்ணா)  https://www.youtube.com/watch?v=RPBTtUwNeWA

    ஆயிரம் நினைவாகி ஆனந்தக்கனவாகி

    காரியம் தவறானால் கண்களில் நீராகி

    மௌனத்தில் விளையாடும் மனசாட்சியே

    எல்லா நினைவுகளுமாய் ஆனந்த கனவுகளாக செயல் தவறானால் கண்ணீராக என்று பல வடிவம் எடுக்கும் உள்ளுணர்வு பற்றி சொல்லுகிறார்.

    ஒருகணம் தவறாகி பலயுகம் துடிப்பாயே

    ஊமையின் பரிபாஷை கண்களில் வடிப்பாயே

    ஆசையில் கல்லாகி அச்சத்தில் மெழுகாகி

    யார் முகம் பார்த்தாலும் ஐயத்தில் தவிப்பாய் நீ

    தனிமனிதனின்  தார்மீக மதிப்புகளுக்கு எதிரான அவனது  செயல்கள் ஏற்படுத்தும் குற்றவுணர்ச்சியும் self -pity யும் மனிதனை நேர்வழிப்படுத்தும் என்பது உளவியல் மருத்துவக் கருத்து. தவறு செய்தவனின் தவிப்பும் பதட்டமும் என்று இதை எவ்வளவு அழகாக சொல்கிறார்!

    மூன்று முடிச்சு படத்தில் கே பாலச்சந்தர் ரஜினி கதாபாத்திரத்தின்  மனசாட்சிக்கு   பைத்தியக்காரன் போன்ற ஒரு தோற்றத்தை கொடுத்திருப்பார். ஒவ்வொரு முறை தப்பு செய்த பிறகும் வந்து கேள்விகேட்கும் மனசாட்சி  தப்பு செய்வதற்கு முன்பு வந்து எச்சரிக்காதா என்ற கேள்விக்கு படத்தின் கடைசியில்

    விதைக்கின்ற வேளையிலே விளங்காத மனசாட்சி…

    விளைவுக்குப் பின்னாலே விரைந்துவரும் மனசாட்சி….

    தனக்காகத் தன்னுடனே போராடும் மனசாட்சி….

    தவறுபவன் கண்களுக்குப் பைத்தியந்தான் மனசாட்சி.

    என்று பதில் சொல்வார்.

    ஒருவரின் சரி, தவறு இரண்டையும் அவரிடம் சொல்லும் என்பதே மனசாட்சியைப் பற்றிய பொதுவான கருத்து. இது சரியா? செயல்களுக்கு சாட்சியாக நிற்பவனே தீர்ப்பும் சொல்லமுடியுமா? நம் செயல்களுக்கு மனம் சாட்சியா நீதிபதியா?

    மோகனகிருஷ்ணன்

    187/365

     
    • amas32 11:56 am on June 6, 2013 Permalink | Reply

      பாரத விலாஸ் படத்தில் வரும் சக்கை போடு போடு ராஜா உன் காட்டுல மழை பெய்யுது, நீங்கள் குறிப்பிட்டிருக்கும் மனசாட்சிப் பாடலுக்கு நல்ல உதாரணம் 🙂 http://www.youtube.com/watch?v=FDhS6VjY7Tw

      amas32

    • Saba-Thambi 12:48 pm on June 6, 2013 Permalink | Reply

      Superb choice!!
      Cannot beat மௌனத்தில் விளையாடும் மனசாட்சியே for this concept. A great philosophical song with beautiful lyrics,music and voice.

      another song comes to mind is:
      நல்லவர்க்கெல்லாம்….
      (http://www.youtube.com/watch?v=jGAeoj0z1sc)

    • GiRa ஜிரா 1:35 pm on June 6, 2013 Permalink | Reply

      மௌனத்தில் விளையாடும் மனசாட்சியே…. என்னவொரு பாடல். திரையிசைக்கு பாலமுரளி கிருஷ்ணாவை முதலில் அழைத்து வந்து “தங்கரதம் வந்தது” என்று சுசீலாம்மாவோடு பாட வைத்ததே எம்.எஸ்.விதான்.

      மனசாட்சி எது தெரியுமா? தவறு செய்கின்றவர்கள் தூங்க வைப்பது. முட்டாள்களுக்கு புரியவே புரியாதது. நல்லவன் மட்டுந்தான் மனசாட்சியோடு மல்லுக்கட்டிக் கொண்டிருப்பவன்.

      அதனால்தான் எல்லாம் தவறாகும் போது “கண்களில் நீராகி” வரும் மனசாட்சி,

      இந்த மனசாட்சியை மண்ணாங்கட்டி என்று சொல்லிவிட்டால் பிறகு எல்லாத்தவறுகளையும் யோசிக்காமல் செய்ய முடியும். அது முடியாமல்தான் உலகின் பெரும் பகுதி ஒரு கட்டுக்குள் இருக்கிறது.

    • anonymous 4:45 pm on June 6, 2013 Permalink | Reply

      சில பாடல்களைச் சிலர் மட்டும் தான் பாட முடியும்
      அதுக்கொரு நல்ல எடுத்துக் காட்டு = பாலமுரளி கிருஷ்ணாவும் + இந்தப் பாடலும்…
      Husky voice, yet classical based voice
      அதில்.. மௌனத்தில் விளையாடும் மனசாட்சியே

      மனசாட்சிக்குப் பேசத் தெரியாது = ஊமை
      அதான் “மெளனத்தில்” விளையாடும் மனசாட்சியே!
      ——

      //ஒருகணம் தவறாகி பலயுகம் துடிப்பாயே
      ஊமையின் பரிபாஷை கண்களில் வடிப்பாயே//

      பாத்தீங்களா? தப்பு பண்ணுறவன் மனுசன்; ஆனா துடிப்பதோ மனசாட்சி; அவன் அல்ல!:(

      கண்ணைத் தான் காட்டுறாரு கவிஞர்
      உடம்புல அடிபட்டா உடம்பா அழுவுது? எங்கே-ன்னாலும், கண்ணு தானே அழுவுது??
      ——

      //ஆசையில் கல்லாகி அச்சத்தில் மெழுகாகி//

      என்னவொரு வீச்சு இந்த வரியில்
      *கல்லு = சுலபத்தில் உடைக்க முடியாது; = மனுசனின் “ஆசை”
      *மெழுகு = உடைக்க முடியாத ஒன்னு, உருக மட்டும் சாத்தியம்? = மனுசனின் “அச்சம்”

      மனசாட்சி is equidistant between “ஆசை” & “அச்சம்”

      நல்லார்க்கும் பொல்லார்க்கும் “நடுநின்ற நடுவே”
      எல்லார்க்கும் பொதுவில்நடம் இடுகின்ற சிவமே!

      • anonymous 5:01 pm on June 6, 2013 Permalink | Reply

        அட, அடுத்த பாட்டில் நீங்களே சொல்லிட்டீங்க @mokrish

        விதைக்கின்ற வேளையிலே விளங்காத மனசாட்சி… = ஆசை 🙂
        விளைவுக்குப் பின்னாலே விரைந்துவரும் மனசாட்சி…. = அச்சம் 🙂
        ———-

        இன்னோரு பாட்டும் நினைவுக்கு வருது..

        நல்லவர்க்கெல்லாம் சாட்சிகள் ரெண்டு – ஒன்று மனசாட்சி
        ஒன்று தெய்வத்தின் சாட்சியம்மா
        ஒன்று தெய்வத்தின் சாட்சியம்மா

        நம்பிக்கை வைத்து கல்லையும் பார்த்தால் – தெய்வத்தின் காட்சியம்மா
        அதுதான் உள்ளத்தின் காட்சியம்மா
        அதுதான் உண்மைக்கு சாட்சியம்மா
        ———-

        மனசாட்சிக்குச் சொந்தமாச் சக்தி கிடையாது;
        உடம்பில் எது தப்பு செஞ்சாலும், மனசாட்சி தான் அழுவும்… too weak?

        மன சாட்சி
        மனசு ஆட்சி
        = இரண்டில், வெல்வது யாரோ? அது வேலவன் பேரோ?

      • anonymous 5:26 pm on June 6, 2013 Permalink | Reply

        = //தனக்காகத் தன்னுடனே போராடும் மனசாட்சி….//

        இதுல இன்னுமொரு விசேடம்,
        தவறுகளை “நியாயப்”படுத்துவதும் அதே மன சாட்சி தானோ?

        may be yes!

        ஆனால், தன்னையே தான் “நியாயப்”படுத்தும் போது,
        நம் கண்ணில் ஈரம் வருவதில்லை!

        ஈரம் வரும் போது…. மனசாட்சியில்
        ஈசன் வருகின்றான்;

        =அப்போ, மனசாட்சி->தெய்வசாட்சி ஆகும்
        =அதுவே இறுதி வரை “அவனே” -ன்னு நிலைச்சி நிக்கும்!

    • Uma Chelvan 6:06 pm on June 6, 2013 Permalink | Reply

      Excellent post !!! I never paid attention very closely to the lines of this song. After i read this post it, என்ன ஒரு அழகான அற்புதமான பாடல், அதற்கு ஏற்ற நல்ல விளக்கம். இன்று காலையில் படித்த ஒரு face book கமெண்டும் உடனே நினைவுக்கு வந்தது , ” நீதி : சூன்யம் யாரும் வந்தெல்லாம் வைக்கிறதில்லை…. நாமளே சொந்த செலவில் வைக்கிறது தான்..”.

  • GiRa ஜிரா 8:13 am on June 1, 2013 Permalink | Reply  

    இராகங்கள் பதினாறு 

    இன்றைய பதிவில் இரண்டு பாடல்களை ரசித்துப் பாராட்டப் போகிறேன்.

    இரண்டு பாடல்களையும் எழுதியவர்கள் வேவ்வேறு. இசையமைத்தவர்கள் வெவ்வேறு. பாடியவர்கள் வெவ்வேறு. நடித்தவர்களும் வெவ்வேறு. ஆனால் இயக்குனர் ஒருவரே. ஆம். திரு.ஏ.பி.நாகராஜன் இயக்கிய இரண்டு படங்களில் இடம் பெற்ற பாடல்கள் அவை.

    முதற்பாடல் – ஒரு நாள் போதுமா
    படம் – திருவிளையாடல்
    பாடியவர் – பாலமுரளிகிருஷ்ணா
    வரிகள் – கவியரசர் கண்ணதாசன்
    இசை – திரையிசைத் திலகம் கே.வி.மகாதேவன்
    நடிகர் – பாலையா
    பாடலின் சுட்டி – http://youtu.be/ppnzHXqT5Sg

    இரண்டாம் பாடல் – வென்றிடுவேன் நாட்டையும் நாதத்தால்
    படம் – அகத்தியர்
    பாடியவர்கள் – டி.எம்.சௌந்தரராஜன், சீர்காழி கோவிந்தராஜன்
    வரிகள் – உளுந்தூர்ப்பேட்டை சண்முகம்
    இசை – குன்னக்குடி வைத்தியநாதன்
    நடிகர்கள் – சீர்காழி கோவிந்தராஜன், ஆர்.எஸ்.மனோகர்
    பாடலின் சுட்டி – http://youtu.be/N-5btIpWZmQ

    இந்த இரண்டு பாடல்களிலும் இயக்குனரையும் தாண்டி காட்சியமைப்பில் ஒரு ஒற்றுமை உண்டு. ஆம். சங்கீதத்தின் சிகரங்களாக இருப்பவர்கள் பாடுகின்ற பாடல்களாக இவை இருக்கின்றன.

    மீன்காரன் பாடினால் பாட்டில் மீனைப்பற்றி வரும். வேடன் பாடினால் மானைப் பற்றி வரும். விவசாயி பாடினால் பயிர் வகைகள் வரும். ஆய்ச்சியர் பாடினால் பாலும் தயிரும் ஓடும். ஆனால் இவர்கள் வாக்கேயக்காரர்கள். அதாவது சங்கீத சாம்ராட்டுகள். இவர்கள் பாட்டில் என்ன வரும்?

    இராகமும் தாளமும் அள்ளக் குறையாமல் வரும். இராகங்களின் பெயர்களையே பாடலின் வரிகளில் வைத்து விளையாடுகிறார்கள். அப்படி எழுதிய கவிஞர்களை முதலில் வணங்குகிறேன்.

    காலத்தில் திருவிளையாடல் பாடலே முந்தியது. ஆகவே அதையே முதலில் எடுத்துக் கொள்வோம்.

    இசை கேட்க எழுந்தோடி வருவாரன்றோ
    எழுந்தோடி வருவாரன்றோ
    இசை கேட்க எழுந்தோடி வருவாரன்றோ

    எனக்கிணையாக தர்பாரில் எவரும் உண்டோ
    தர்பாரில் எவரும் உண்டோ..
    எனக்கிணையாக தர்பாரில் எவரும் உண்டோ

    கலையாத மோகனச் சுவை நானன்றோ
    மோகனச் சுவை நானன்றோ
    கலையாத மோகனச் சுவை நானன்றோ

    கான(ண)டா என் பாட்டுத் தேனடா
    இசை தெய்வம் நானடா

    பாட்டு வரிகளில் வருகின்ற இராகங்கள் தெரிகின்றதா? அவைகளை எடுத்துப் பட்டியல் இடுகிறேன், பாருங்கள்.

    எழுந்தோடி வருவாரன்றோ – தோடி இராகம்
    எனக்கிணையாக தர்பாரில் – தர்பார் இராகம்
    கலையாத மோகனச் சுவை – மோகன இராகம்
    காண(ன)டா என் பாட்டு தேனடா – கானடா இராகம்

    கவியரசர் எவ்வளவு அழகாக பாடல் வரிகளில் இராகங்களின் பெயர்களை பொருள் பொருந்திவரும்படி நெய்திருக்கிறார். அடடா!

    கவியரசர் அப்படிச் செய்தது முதற்படி என்றால் உளுந்தூர்ப்பேட்டை சண்முகம் பாடலை அடுத்த படிக்கு எடுத்துச் செல்கிறார். பாடல் முழுவதுமே இராகங்கள். அதுவும் போதாதென்று இன்னொரு புதுமையையும் செய்திருக்கிறார். அதைக் கடைசியாகச் சொல்கிறேன்.

    இது போட்டிப் பாட்டு. அகத்தியருக்கும் இராவணுக்கும் இடையில் இசைப்போட்டி. எல்லாரும் மீட்டிய வகையில் வீணை இசைத்தால் இவர்கள் இருவருக்கு மட்டும் எண்ணிய வகையிலேயே வீணை இசைக்கும். அப்பேர்ப்பட்ட மேதைகள். அதனால் பாடல் வரிகளும் மேதாவித்தனமாகவே இருக்கிறது. பதிவின் ரசிப்புத்தன்மைக்காக பாடலின் சிலவரிகளை நீக்கியிருக்கிறேன்.

    வென்றிடுவேன் நாதத்தால் வென்றிடுவேன்
    நாட்டையும் நாதத்தால் வென்றிடுவேன் எந்த
    நாட்டையும் நாதத்தால் வென்றிடுவேன்

    வென்றிடுவேன் உன்னை வென்றிடுவேன்
    பைரவி துணைவன் பாதம் பணிந்து
    உன்னை வென்றிடுவேன்

    இசை கேட்டு எழுந்தோடி வந்தான் உன்தன்
    இதயத்திலே வாழும் ஈசன் எனைத் தேடி
    எழுந்தோடி வந்தான்

    ஆரபிமானம் கொள்வார் வெறும்
    அகந்தையினால் உனது
    அறிவது மயங்கிட இறைவனே இகழ்ந்தனையே
    ஆரபிமானம் கொள்வார்

    சண்முகப் ப்ரியன் என்னும் தைரியமா?
    சங்கீதத்தில் எனக்கு இணையாகுமா?
    சண்முகப் ப்ரியன் என்னும் தைரியமா? இனிய
    சங்கீதத்தில் எனக்கு இணையாகுமா?

    நாடகமா தர்பார் நாடகமா?
    அடக்கு முறை தர்பார் நாடகமா? எதுவும்
    அவன் செயல் அல்லாமல் கூடிடுமா?

    ஹம்சத்வனி அமைத்த மன்னவன் நான்
    அனைத்தும் உன் வசந்தானா ஆணவம் ஏன்?

    மோகன
    கானம் நான் மீட்டிடுவேன்
    மனோலயம் இல்லை உன் பாட்டினிலே

    பாகேஸ்வரியோ பரம்பொருளோ?
    பாற்கடலில் துயிலும் சாரங்கனோ?
    யார் வந்தால் என்ன காம்போதி
    ராகம் ஒன்றே போதும் வென்றிடுவேன்

    கௌரி மனோகரி துணையிருப்பாள்
    கல்யாணி மணாளன் கை கொடுப்பான்
    சரஸ்வதி எந்நாவில் குடியிருப்பாள்
    சத்தியமே நிலைக்கும் வென்றிடுவேன்

    பாடல் வரிகள் நாடகத்தனமாக இருந்தாலும் எத்தனையெத்தனை இராகங்கள் பார்த்தீர்களா? படிப்பதற்கு எளிமையாக எடுத்துக் கொடுக்கிறேன்.

    நாட்டையும் நாதத்தால் வென்றிடுவேன் – நாட்டை
    பைரவி துணைவன் பாதம் பணிந்து – பைரவி
    இசை கேட்டு எழுந்தோடி வந்தான் – தோடி
    ஆரபிமானம் கொள்வார் வெறும் – ஆரபி
    சண்முகப் ப்ரியன் என்னும் தைரியமா? – சண்முகப்பிரியா
    நாடகமா தர்பார் நாடகமா? – தர்பார்
    ஹம்சத்வனி அமைத்த மன்னவன் நான் – ஹம்சத்வனி
    அனைத்தும் உன் வசந்தானா ஆணவம் ஏன்? – வசந்தா
    மோகன கானம் நான் மீட்டிடுவேன் – மோகனா
    மனோலயம் இல்லை உன் பாட்டினிலே – மனோலயம்
    பாகேஸ்வரியோ பரம்பொருளோ? – பாகேஸ்வரி
    பாற்கடலில் துயிலும் சாரங்கனோ? – சாரங்கா
    யார் வந்தால் என்ன காம்போதி – காம்போதி
    கௌரி மனோகரி துணையிருப்பாள் – கௌரிமனோகரி
    கல்யாணி மணாளன் கை கொடுப்பான் – கல்யாணி
    சரஸ்வதி எந்நாவில் குடியிருப்பாள் – சரஸ்வதி

    இராகங்கள் பதினாறு. ஆம். பாட்டில் வந்திருக்கும் இராகங்கள் பதினாறு. அடேங்கப்பா என்று மலைப்பாக இருக்கிறதல்லவா.

    அத்தோடு நின்றுவிடவில்லை உளுந்தூர்ப்பேட்டை சண்முகம் அவர்கள். சுரங்களையும் சொற்களாக மாற்றியிருக்கிறார்.

    சுரங்கள் “ச ரி க ம ப த நி” என்று ஏழு வகை என்பது தெரிந்திருக்கும். இந்தச் சுரங்களையே முன்னும் பின்னுமாக மாற்றிப் போட்டு சொற்களை உண்டாக்கியிருக்கிறார் கவிஞர். பாட்டாகப் பாடும் போது சுரங்கள் மறைந்து சொற்கள் வெளிப்படும்.

    ச ம ம – சமமா?
    ச ரி ச ம ம – சரி சமமா?
    நி ச ரி ச ம ம – நீ சரி சமமா?
    ம நி த நி பா த க ம – மனிதா நீ பாதகமா!

    இப்படியாக பாட்டெழுதிய கவிஞர்களும் நம் நாட்டில் இருந்தார்கள் என்று நினைத்து நாம் பெருமை மட்டுமே பட்டுக்கொள்ள வேண்டியதுதான்.

    அன்புடன்,
    ஜிரா

    182/365

     
    • anonymous 9:18 am on June 1, 2013 Permalink | Reply

      நலம் பெற வேண்டும் – நீயென்று
      இலை மறை காய் போல் – பொருள் கொண்டு…
      ——

      இராகங்கள் தவழும் இன்னிசைப் பதிவு
      முருகத் திரு. TMS அவர்களின் நினைவை மீண்டும் கிளறி விடும் பதிவு!

      இராக மாலிகை -ன்னு சொல்லுவாங்க;
      பல ராகங்களையும் கலந்து பாடும் பாட்டு!

      ஆனா, அந்தப் பாட்டிலேயே, இராகத்தின் பேரையும் வச்சி,
      அதையும் அந்த இராகத்திலேயே பாடுவது என்பது மிக அழகு!

      இதைச் சினிமாவில் சிற்சில இடங்களில் செஞ்சிருக்காங்க!
      ஆனா, முதலில் செஞ்சவரு யார் தெரியுமா?
      Murugan Talkies முதலாளியான = அருணகிரிநாதர்:)
      ——–

      • anonymous 10:11 am on June 1, 2013 Permalink | Reply

        கொல்லி -ன்னு ஒரு தமிழ்ப் பண் (இராகம்)
        அதைப் பாட்டில் பயன்படுத்தி, அதே பண்ணில், அந்தப் பாட்டையும் பாடிய அருணகிரி

        கந்தர் அலங்காரத்தில்…
        “கொல்லியைச் சேர்க்கின்ற சொல்லியை” -ன்னு ஒரு வரி வரும்;

        வள்ளி பேசுற பேச்சே, பண் போல இருக்காம்
        எந்தப் பண்? = கொல்லிப் பண் (நாத நாமக் கிரியை)

        அவள் நாதனின் நாமத்தைத் தானே, சதா “முருகா முருகா” -ன்னு காடு மேடெல்லாம் உளறிக்கிட்டு இருந்தா?
        அதான் போல = நாத நாமக் கிரியை
        இப்படிக், “கொல்லி-சொல்லி-வள்ளி” -ன்னு, பாடுன மொத ஆளு அருணகிரி:)
        ——

        நட்டபாடை, செவ்வழி
        தக்கேசி, கொல்லிக் காவளம்,
        இந்தளம், சீகாமரம், புறநீர்மை
        -ன்னு எத்தனை எத்தனையோ தமிழ்ப் பண்கள்…

        எல்லாம் போயிருச்சி:(
        தேவாரம்/ ஆழ்வார் பாசுரம் என்கிற Museum-ல்ல தான் பாக்க முடியும்;

        கர்நாடக சங்கீதம் -ன்னு ஒன்னையே பரக்கப் பரக்கப் பேசினா, இன்னொன்னு கேட்பார் அற்று போயிருச்சி:(
        ஏதோ, கர்நாடக சங்கீதத்திலேயே, தமிழ்ப் பாட்டா, இந்தக் காலத்தில் பாட ஆரம்பிச்சி இருக்காங்க! ஆனா இராகம் என்னமோ = கர்நாடகம் தான்! தமிழிசை அல்ல!

        எங்கேயோ போயிட்டோம்;
        சொல்ல வந்தது = பாட்டில் பண் பேரை வச்சி, அதே பண்ணில் பாடிய அருணகிரி!

    • anonymous 10:19 am on June 1, 2013 Permalink | Reply

      நீங்க குடுத்த ரெண்டு பாட்டும் ரொம்பப் பிடிக்கும்!
      குறிப்பா, பாலையா (பாலமுரளி)… “எனக்கு இணையாகத் தர்பாரில் எவரும் உண்டோ?” -ன்னு அதே தர்பார் ராகத்தில் பாடுவாரு…
      பாலையா Body Language அதுக்கு, செம:)

      உளுந்தூர்ப்பேட்டையார் பாட்டும், Top Class!
      யார் வந்தால் என்ன காம்போதி -ன்னு இராவணன் பாடும் போது, “கபோதி” ங்குறாப் போல லுக்கு விடுவாரு ஆர்.எஸ்.மனோகர்:)

      காம்போதி = சிவபெருமானுக்கு உரிய ராகம்;
      (வீணைக் கொடி உடைய வேந்தனே – பாட்டில் கூட, நிறைவா அது தான் வரும்!)

      சிவனுக்கு ஈடு யாரு? = அவ ஒருத்தி தானே?:)
      கௌரி மனோகரி துணையிருப்பாள் -ன்னு அகத்தியர் பாடி முடிச்சீருவாரு!
      ——

      ச ம ம – சமமா?
      நி ச ரி ச ம ம – நீ சரி சமமா?

      இதை எங்கே சொல்லாம விட்டுருவீங்களோ? -ன்னு, மனசைக் கையில் புடிச்சிக்கிட்டே படிச்சேன்; ஆனா கடைசீயாச் சொல்லீட்டீங்க; அதப் பாத்தப் பொறவு தான், மனசே நிம்மதியாச்சு:)

    • anonymous 10:28 am on June 1, 2013 Permalink | Reply

      இது போல இராகப் பெயர்கள் கொண்ட, இதர பாடல்கள்…

      உன்னால் முடியும் தம்பி படத்தில், “என்ன சமையலோ?”

      கல்யாணி = அரிசியில் கல்…ஆணி
      ராகம் வசந்தா; ருசித்து பார்க்க ரசம் தா
      கரி கரி கரி கரி – கறி காய்களும் இங்கே; கறி வேப்பிலை எங்கே?:)
      ———–

      இதே போல், “வீணைக் கொடியுடைய வேந்தனே”
      ராகம் பேரு, சொல்லுல ஒளிஞ்சி வராம, நேரடியாவே வந்துரும்

      காலையில் பாடும் ராகம் – பூபாளம்
      உச்சி வேளை ராகம் – சாரங்கா
      மாலையில் பாடும் ராகம் – வசந்தா

      இரக்கம் பற்றிய ராகம் – நீலாம்பரி
      மகிழ்ச்சிக்குரிய ராகம் – தன்யாசி
      யுத்த ராகம் – கம்பீர நாட்டை

      வெண்பா பாடுவது – சங்கராபரணம்
      அகவல் பா – தோடி
      யாழ் இசைக்கு – கல்யாணி

      கயிலை மலையானைக், கானத்தால் கவர்ந்த ராகம் – காம்போதி, காம்போதி, காம்போதி

    • anonymous 10:43 am on June 1, 2013 Permalink | Reply

      அட, எல்லாத்தையும் சொல்லிட்டு, சென்னையில் என் அம்மாவைப் பத்திச் சொல்லலீன்னா எப்படி?
      வாழ்க்கைல, பல விசயமெல்லாம், அவ கிட்ட போய் நிக்கும் போது தான், நடந்து இருக்கு!

      =திருமயிலை வாழ் கற்பகம்!
      =அவரு ஒதுக்கினாலும், அவனே அவனே -ன்னு மயிலா மாறித், தவங் கெடந்தவ!

      அவளை TMS பாடும் பாட்டுல தான், இராகத்தின் பேரு இழையோடுமே!
      கற்பக வல்லி நின் பொற்பதங்கள் பிடித்தேன்
      நற்கதி அருள்வாய் அம்மா!
      ——-

      ஏன் இந்த மௌனம் அம்மா ஏழை எனக்கருள
      ** ஆனந்த பைரவியே ** ஆதரித்தாளும் அம்மா!

      ** கல்யாணியே ** கபாலி காதல் புரியும் அந்த
      உல்லாசியே உமா உனை நம்பினேன் அம்மா!

      தஞ்சம் என அடைந்தேன் தாயே உன் சேய் நான்
      ** ரஞ்சனியே ** ரட்சிப்பாய் கெஞ்சுகிறேன் அம்மா!
      ——–

      சும்மா, TMS இழுப்பாரு பாருங்க, ஒத்த தந்தித் தம்பூரா கணக்கா…
      யம்மாடியோவ்…
      கர்நாடக சங்கீதப் பிதாமகர்கள் கூட, அம்புட்டு உருக்கமாப் பாட முடியாது;
      உருக்கம் வேற, இலக்கணம் வேற = ரெண்டும் நிக்கும் TMS கிட்ட!

      இந்தப் பாடல் பற்றி எப்பவோ இட்ட பதிவு
      http://ammanpaattu.blogspot.com/2007/03/blog-post_27.html

      கற்பகவல்லி, சின்னஞ் சிறு கிளியே = ரெண்டும் நாதசுரத்தில் வாசிச்சிக் கேட்கும் போது, போற உயிரும், கொஞ்ச நேரம் நிக்கும்!
      மா மயிலாள் = கற்பகத்து அம்மன்;

    • Simulation 10:47 pm on June 1, 2013 Permalink | Reply

    • elavasam 10:07 am on June 2, 2013 Permalink | Reply

      /பாட்டாகப் பாடும் போது சுரங்கள் மறைந்து சொற்கள் வெளிப்படும்./

      இதற்கு ஸ்வராஷ்ட்ரப்ரயோக எனப் பெயர்.

      • anonymous 10:30 am on June 2, 2013 Permalink | Reply

        அது, ஸ்வ ராஷ்ட்ர அல்ல (தாய் நாடு)
        ஸ்வராக்ஷர
        = ஸ்வர + அக்ஷர (சுரம் + எழுத்து)

        சாமகான லோலனே, சதா சிவா -ன்னு கீர்த்தனை..

        ச, ம, க -ன லோலனே -ன்னு ஸ்வரம் போலவும் பாட முடியும்
        சாம கானத்தின் லோலனே -ன்னும் பொருள் வராப் போல, பாட முடியும்!

        = ஸ்வரமும் + அட்சரமும் இழைந்து ஓடுவது = ஸ்வராக்ஷரம்

    • Saba-Thambi 2:09 pm on June 3, 2013 Permalink | Reply

      பதிவு பிரமாதம். பலே பலே!

      இன்னொரு பாடல் -ஒரு சில ராக பெயர்களுடன்:

      • anonymous 2:48 pm on June 3, 2013 Permalink | Reply

        sooper song sir! – sri priya in grand

        ரஞ்சனி… சிவ ரஞ்சனி

        அதி காலையில் வரும் பூபாள ராகம்
        ஆனந்தத் தேன் தரும் கல்யாணி ராகம்
        என்ன சொல்லி என்ன பாட
        கம்பன் இல்லை கவிதை பாட
        class lines & a song for shankar ganesh to treasure

    • chinnapiyan 5:56 am on August 8, 2013 Permalink | Reply

      பதிவும் அருமை. வந்த விமர்சனக்கருத்துகளும் பலே. மிகவும் ரசித்து மகிழ்ந்தேன், நன்றி, வாழ்க ஜிரா

    • badrirag 8:43 pm on November 27, 2013 Permalink | Reply

      ”நீ ஒரு ராக மாலிகை என் நெஞசம் உன் காதல் மாளிகை” என்ற பாட்டில், வரிக்கு ஒரு ராகம் என்று பாடியிருப்பார் பாலு (SPB). அருமையான உவமைகள்.

  • mokrish 10:29 am on April 6, 2013 Permalink | Reply
    Tags: சினேகன், , மாலன்,   

    அன்பாலே அழகாகும் வீடு 

    எண்பதுகளின் துவக்கத்தில் மெர்க்குரிப் பூக்கள் நாவலில் வீடென்று எதனைச் சொல்வீர் என்ற மாலனின் கவிதை வந்தபோது ரசித்து நண்பர்களுடன் House Vs Home என்று விவாதித்தது உண்டு. இன்றும் முதல் வரியைச் சொன்னதும் சட்டென்று உடனே நினைவுக்கு வரும் கவிதை.

    வீடென்று எதனைச் சொல்வீர்?

    அது இல்லை எனது வீடு.

    ஜன்னல் போல் வாசல் உண்டு.

    எட்டடிக்கு சதுரம் உள்ளே

    பொங்கிட மூலை ஒன்று புணர்வது மற்றொன்றில்

    நண்பர்கள் வந்தால் நடுவிலே குந்திக் கொள்வர்

    தலை மேலே கொடிகள் ஆடும் கால்புறம் பாண்டம் முட்டும்

    கவி எழுதி விட்டுச் செல்ல கால்சட்டை மடித்து வைக்க

    வாய் பிளந்து வயிற்றை எக்கிச் சுவரோரம் சாய்ந்த பீரோ……

    இப்போது யோசித்தால் இந்த கவிதை பாதியில் நின்றது போலிருக்கிறது. வெறும் சோகம் சொல்லும் Status Update. தொடர்ந்து காணி நிலமும் பத்துப் பனிரெண்டு தென்னைமரமும் கேட்ட பாரதியார் போல ஒரு கனவையோ இலட்சியத்தையோ சொல்லி முடித்திருக்கலாம்.

    திரைப்பாடல்களில் வீடு பற்றி சில அழகான பாடல்கள். பாண்டவர் பூமி படத்தில் வரும் விரும்புதே மனசு விரும்புதே என்ற சினேகன் எழுதிய பாடல் பாரதியின் காணி நிலம் கனவைப்போலவே அமைந்த வரிகள்.

    http://www.inbaminge.com/t/p/Paandavar%20Bhoomi/Virumbudhae%20Manasu%20Virumbudhae.eng.html

    கவிஞன் வழியில் நானும் கேட்டேன்

    கவிதை வாழும் சிறு வீடு

    விரும்புதே மனசு விரும்புதே

    ஒரு பக்கம் நதியின் ஓசை

    ஒரு பக்கம் குயிலின் பாஷை

    ஒரு பக்கம் தென்னையின் கீற்று

    ஜன்னலை உரசும்

    என்று தொடங்கி தென்றல் வாசல் தெளிக்கும், கொட்டும் பூக்கள் கோலம் போடும் , நிலா வந்து கதைகள் பேசும், பறவைகள் தங்க மரகத மாடம், தங்க மணித்தூண்கள் என்று – சனிக்கிழமை Property Plus விளம்பரம் போல வர்ணனைகள்.

    பூவெல்லாம் உன் வாசம் படத்தில் வைரமுத்துவின் பாடல் ஒன்றில் சில சுவாரஸ்யங்கள்.

    http://www.inbaminge.com/t/p/Poovellam%20Un%20Vaasam/Chella%20Namm%20Veetuku.eng.html வானவில்லை கரைச்சு வண்ணம் அடிக்கலாம், தோட்டத்தில் நட்சத்திரம் பூக்கும் செடி என்று அதீத கற்பனைகளோடு தொடங்கும் பல்லவியில் ஒரு ட்விஸ்ட் வைத்து

    அட கோயில் கொஞ்சம் போரடித்தால்

    தெய்வம் வந்து வாழும் வீடு

    காற்று வர ஜன்னலும் செல்வம் வர கதவும் என்று வசீகரமான வாஸ்து சொல்கிறார். மறு ஜென்மம் இருந்தால் இதே வீட்டில் அட்லீஸ்ட் நாய்க்குட்டியாக பிறக்க வரம் வேண்டுகிறார். காரணம்?

    எங்கள் இதயம் அடுக்கி வைத்து இந்த இல்லங்கள் எழுந்ததம்மா

    நீ சுவரில் காது வைத்தால் மனத் துடிப்பு கேட்குமம்மா

    பசங்க படத்தில் யுகபாரதியின் பாடல் சொல்வதுதான் மிகவும் சரியானதென்று தோன்றுகிறது

    http://www.inbaminge.com/t/p/Pasanga/Anbaale%20Azhagagum%20Veedu.eng.html

    அன்பாலே அழகாகும் வீடு

    ஆனந்தம் அதற்குள்ளே தேடு

    சொந்தங்கள் கை சேரும்போது

    வேறொன்றும் அதற்கில்லை ஈடு

    வாடகை வீடே என்று

    வாடினால் ஏது இன்பம்

    பூமியே நமக்கானது

    என்று எளிமையான பாசிடிவ் பார்வை. அன்பும் சொந்தங்களும் இருந்தாலே வீடு இனிமையாகும் – தென்னைமரம், தென்றல், நிலா வெளிச்சம், நட்சத்திரம் பூக்கும் செடி, கிளப் ஹவுஸ், நீச்சல் குளம், ஜிம் எல்லாம் இரண்டாம் பட்சம் தான்.

    மோகன கிருஷ்ணன்

    126/365

     
    • rajnirams 10:39 am on April 6, 2013 Permalink | Reply

      அருமை. வைரமுத்துவின் “அட கோயில் கொஞ்சம் போரடித்தால் தெய்வம் வந்து வாழும் வீடு”வரிகளை சுட்டி காட்டியிருந்தது அருமை.சந்திப்பு படத்தில் வாலியின் “ஆனந்தம் விளையாடும் வீடு,நான்கு அன்பில்கள் ஒன்றான கூடு”பாடலும் அருமையாக இருக்கும் .

    • amas32 (@amas32) 10:02 pm on April 6, 2013 Permalink | Reply

      /சனிக்கிழமை Property Plus விளம்பரம் போல வர்ணனைகள்./ LOL

      /எங்கள் இதயம் அடுக்கி வைத்து இந்த இல்லங்கள் எழுந்ததம்மா/ Home is where the heart is!

      /அன்பாலே அழகாகும் வீடு

      ஆனந்தம் அதற்குள்ளே தேடு/

      அற்புதமான வரிகள். என் எண்ணத்தை நூறு சதவிதம் பிரதிபலிக்கும் வரிகள்.

      “Mid pleasures and palaces
      Though we may roam.
      Be it ever so humble,
      There is no place like home”
      அன்னையின் அன்பினால் குழந்தைகளின் பாசத்தினால் தகப்பனின் பாதுகாப்பினால் நம் வீடு சின்னக் குடிலாக இருந்தாலும் அது தங்கமும் வைரமும் பதித்த அழகிய அரண்மனை தான் 🙂

      amas32

    • GiRa ஜிரா 11:09 pm on April 6, 2013 Permalink | Reply

      மிக அருமையான பதிவு. அழகான வரிகள்.

      ‘’அட கோயில் கொஞ்சம் போரடித்தால் தெய்வம் வந்து வாழும் வீடு’ – அற்புதமான வரிகள். அன்புள்ள பெரியவர்களும் அடக்கமுள்ள இளவயதினரும் குறும்புள்ள குழந்தைகளும் இருக்கும் வீடு கோயிலே ஆகும்.

      இல்லம் சங்கீதம்
      அதில் ராகம் சம்சாரம்
      அவள் நாயகன் பாவம்
      பிள்ளை சிருங்கார ராகம் – என்று கண்ணதாசன் எழுதியிருக்கிறார்.

      பாசமில்லாத வீடு நீரில்லாத காடு. அதனால்தான் வீட்டை செங்கலையும் சுண்ணாம்பையும் வைத்துக் கட்டுவதை விட அன்பாலும் அருளாலும் கட்ட வேண்டும்.

      ஆனந்தம் விளையாடும் வீடு
      நான்கு அன்பில்கள் விளையாடும் கூடு

      மேலே உள்ள பாடலை சிறுவயதில் எங்கேயோ கேட்டுவிட்டு… மதுரை டி.ஆர்.வோ காலனி பக்கமுள்ள மாரியம்மன் கோயில் அருகிலுள்ள போலீஸ் கிரண்டைப் பார்த்து

      போலீஸ்கள் விளையாடும் கிரவுண்டு
      இது போலீஸ்கள் விளையாடும் கிரவுண்டு
      நான்கு சுவர் கொண்டு உருவான கிரவுண்டு – என்று பாடியது நினைவுக்கு வருகிறது.

  • GiRa ஜிரா 11:05 am on January 29, 2013 Permalink | Reply  

    மாற்றான் தோட்டத்து மெல்லிசை 

    ஒரு இசையமைப்பாளர் பாடுவது என்பது மிக இயல்பான ஒன்று. ஒரு பாடகருக்குரிய குரலினிமை குறைவாக இருந்தாலும் ஒரு இசையமைப்பாளரின் குரலில் இருக்கும் பாவம் மிகச் சிறப்பானது.

    மெல்லிசை மன்னர் அவருடைய எத்தனையோ படங்களில் பாடியிருக்கிறார். பாலிருக்கும் பழமிருக்கும் பாடலில் சுசீலாம்மா பாலிருக்கும் என்று பாட நடிகர் திலகத்துக்கு ம்ஹும் என்று குரல் கொடுத்துப் பாடியது மெல்லிசை மன்னர் எம்.எஸ்.விசுவநாதன் என்பதைச் சொன்னால்தால் தெரிந்து கொள்ள முடியும்.

    தன்னுடைய இசையில் வந்த பாடல்களையே பாடிக் கொண்டு வந்த மெல்லிசை மன்னரை இன்னொரு இசையமைப்பாளர் அவருடைய இசையில் பாட வைத்தார். அதன் பலன் இன்று ஜி.வி.பிரகாஷ்குமார் போன்ற இருபத்தைந்து வயது வாலிபனின் இசையிலும் எம்பது வயதைத் தாண்டிய மெல்லிசை மன்னர் பாடியிருக்கிறார்.

    அடுத்த இசையமைப்பாளர் இசையில் அதிகப்படியாகப் பாடிய ஒரே இசையமைப்பாளர் எம்.எஸ்.விசுவநாதன் என்று அடித்துச் சொல்லி விடலாம்.

    எம்.எஸ்.வி அவர்களை முதலில் அப்படிப் பாட வைத்தது இசையமைப்பாளர் வி.குமார். வெள்ளி விழா என்பது படத்தின் பெயர். “உனக்கென்ன குறைச்சல் நீ ஒரு ராஜா” என்ற மிக அற்புதமான பாடல் மெல்லிசை மன்னரின் குரலில் சாகாவரம் பெற்றது. இணையத்தில் இந்தப் பாடலின் ஒலி-ஒளி வடிவமும் கிடைக்கிறது (https://www.youtube.com/watch?v=PS5C7QF0yXU).

    அடுத்து கோவர்த்தனம் இசையில் பாடிய வரப்பிரசாதம் என்ற பாடலும் பிரபலமானது. அந்தப் பாடல் வரப்பிரசாதம் என்ற படத்தில் இடம் பெற்றது. ஆனால் இந்தப் பாடல் ஆன்லைனில் கிடைக்கவே இல்லை. தனித்து இசையமைத்திருந்தாலும் கோவர்த்தனம் மெல்லிசை மன்னரிடம் உதவியாளராகவும் இருந்துள்ளார். வரப்பிரசாதம் படத்தில் கங்கைநதியோரம் ராமன் நடந்தால் என்ற பாடல் மட்டும் இன்று இணையத்தில் கிடைக்கிறது. மிக அருமையான பாடல்.

    மெல்லிசை மன்னரின் இசைப்பயணத்தில் இசைஞானி இளையராஜாவை விட்டுவிட முடியுமா?

    தாய்மூகாம்பிகை படத்தில் ராஜா இசையில் நாரணன் தேவி திருமகளே என்று தொடங்கும் திருமகள் துதியைப் பாடியிருக்கிறார். அதே பாட்டில் கலைமகள் துதியை பாலமுரளிகிருஷ்ணாவும் மலைமகள் துதியை சீர்காழி கோவிந்தராஜனும் பாடியிருக்கிறார்கள். இந்தப் பாடலை இங்கு கேட்டும் பார்த்தும் ரசிக்கலாம் (https://www.youtube.com/watch?v=sVVBuQM4eJU). படத்தில் பாடலைப் பாடி நடித்திருப்பதும் மெல்லிசை மன்னரே.

    ஒரு யாத்ராமொழி என்று மலையாளப்படம். அதிலும் இளையராஜா இசையில் மெல்லிசைமன்னர் பாடியிருக்கிறார். எரிக்கனல் காட்டில் என்று தொடங்கும் உணர்ச்சி மிகுந்த பாடலைப் பாடியிருக்கிறார். இந்தப் பாடலைக் கேட்டுப்பாருங்கள். உள்ளத்து உணர்ச்சியை இசையும் குரலும் எப்படி வெளிக்கொண்டுவரும் என்பது புரியும். இந்தப் பாடலின் ஆடியோ வடிவம் ஆன்லைனில் கிடைக்கிறது (http://bsnl.hungama.com/fls_details.php?pid=26511).

    அண்ணனிடம் பாடியவர் தம்பியின் இசையில் பாடாமல் இருப்பாரா? நம்ம ஊரு நல்ல ஊரு என்ற படத்தில் கங்கை அமரன் இசையில் ஓடம் எங்கே போகும் என்ற பாடலைப் பாடியிருக்கிறார். இந்தப் பாடல் மூன்று இசையமைப்பாளர்களின் கூட்டணி. இசையை கங்கை அமரன் பார்த்துக் கொள்ள மெல்லிசை மன்னர் பாட (சங்கர்)கணேஷ் நடிக்க வந்த பாடல் இது. இதன் ஒளிவடிவம் கிடைக்கவில்லை. ஒலிவடிவம் இங்கு கிடைக்கிறது (http://music.cooltoad.com/music/song.php?id=404824).

    அடுத்து வந்தது காதல் மன்னன் திரைப்படம். இந்தப் படத்துக்கு இசை பரத்வாஜ். இந்தப் படத்தில் மெட்டு தேடி தவிக்குது ஒரு பாட்டு என்ற பாட்டை எம்.எஸ்.வி பாடியிருக்கிறார். இந்தப் பாடலுக்கு இசையமைத்தவரே எம்.எஸ்.விதான் என்று வைரமுத்து ஒரு பேட்டியில் சொன்ன நினைவு. இன்னொரு பேட்டியில் பரத்வாஜ் தன்னுடைய இசையில் எம்.எஸ்.வி பாடியதைப் பெருமையாகக் குறிப்பிட்டார். உண்மை எதுவோ! மெல்லிசைமன்னர் பாடலைப் பாடி நடித்த காட்சி இங்கே http://www.youtube.com/watch?v=qpd8r5MvBcM.

    ராஜா இசையில் இரண்டு பாடல்களைப் பாடியவர் ரகுமான் இசையிலும் இரண்டு பாடல்களை இதுவரையில் பாடியிருக்கிறார். முதலில் வந்தது ஆலால கண்டா ஆடலுக்குத் தகப்பா என்ற பாடல். இடம் பெற்ற படம் சங்கமம். இந்தப் பாடலைத் தனியாகவும் ஹரிஹரனோடு இணைந்தும் பாடியுள்ளார் மெல்லிசை மன்னர். பாடலின் ஒளிவடிவம் இங்கே – https://www.youtube.com/watch?v=8WxTlj1ieu4

    அடுத்த பாடல் மிகவும் உணர்ச்சிமயமான பாடல். கன்னத்தில் முத்தமிட்டால் படத்தில் இடம் பெற்ற விடை கொடு எங்கள் நாடே என்ற பாடல். தனது கரகரப்பான குரலால் ஈழத்து மக்களின் சோகத்தையெல்லாம் கொட்டி விட்டார் மெல்லிசை மன்னர். இந்தப் பாடல் காட்சியில் இலங்கையில் திரையரங்குகளில் மக்கள் எல்லாரும் அழுதார்கள் என்பது கேள்விப்பட்ட செய்தி. இந்தப் பாடலின் ஒலி-ஒளி வடிவங்களை மற்றொரு முறை கேட்கும்/பார்க்கும் திறன் எனக்கில்லை (https://www.youtube.com/watch?v=HjNsz1yQ6Mo).

    சிக்குபுக்கு சிக்குபுக்கு ரயிலே என்று பாடிய சிறுவன் இன்று இளைஞன். அதுவும் இசையமைப்பாளன். அந்த ஜி.வி.பிரகாஷ்குமார் இசையிலும் மெல்லிசை மன்னர் பாடியிருக்கிறார். மதராசப்பட்டினம் என்ற படத்தில் இடம் பெற்ற மேகமே ஓ மேகமே என்ற பாடல் அது. சலவைத் தொழிலாளர்கள் எல்லாம் இணைந்து பாடுவது போன்ற பாடல் அது. பாடலை இங்கே பார்க்கலாம் (https://www.youtube.com/watch?v=1Pl8_CgRWZo).

    தேவாவின் இசையில் மாணிக்க விநாயகத்தின் இசையிலும் மெல்லிசை மன்னர் பாடியிருக்கிறார் என்று கேள்வி. ஆனால் அவை திரைப்பாடல்களா பக்திப்பாடல்களா என்று தெரியவில்லை. மாணிக்க விநாயகம் இசையமைத்த ஒரு முருகன் பாடல்கள் தொகுப்பில் பன்னிரண்டு பாடல்களை மெல்லிசை மன்னரே பாடியது நினைவுக்கு வருகிறது. அவற்றை எங்கே தேடுவது?

    முன்பெல்லாம் சாகாவரம் வேண்டி அசுரர்களும் தேவர்களும் பாற்கடலைக் கடைந்தார்களாம். ஆனால் சில பாடல்கள் மெல்லிசை மன்னரின் குரலில் பாடப்பட்டு சாகாவரம் பெற்று விட்டன. படைப்புக் கடவுளான நான்முகனால் கொடுக்க முடியாத சாகாவரத்தை இந்த மெல்லிசைக் கடவுள் கொடுத்து விட்டார் என்றால் மிகையில்லை.

    அன்புடன்,
    ஜிரா

    059/365

     
    • amas32 (@amas32) 11:27 am on January 29, 2013 Permalink | Reply

      What research! நீங்கள் ஒரு ஞானச் சுரங்கம்! மெல்லிசை மன்னர் பாடி இருக்கும் பாடல்களில் ரஹ்மான் இசையில் பாடியவை தான் என் மனதுக்கு நெருக்கமாக உள்ளது. எந்தக் குரல் எந்தப் பாட்டுக்குப் பொருந்தும் என்று தேர்வு செய்வதில் இசையமைப்பாளரின் திறன் தெரிகிறது.

      //முன்பெல்லாம் சாகாவரம் வேண்டி அசுரர்களும் தேவர்களும் பாற்கடலைக் கடைந்தார்களாம். ஆனால் சில பாடல்கள் மெல்லிசை மன்னரின் குரலில் பாடப்பட்டு சாகாவரம் பெற்று விட்டன. படைப்புக் கடவுளான நான்முகனால் கொடுக்க முடியாத சாகாவரத்தை இந்த மெல்லிசைக் கடவுள் கொடுத்து விட்டார் என்றால் மிகையில்லை.//

      You are a great thinker and a writer 🙂

      amas32

    • தேவா.. 7:26 pm on January 29, 2013 Permalink | Reply

      மெல்லிசை மன்னர், SPB இசையிலும் பாடியுள்ளார். உன்னை சரணைந்தேன் படத்திற்காக..ராஜா, MSV and SPB மூன்று பேரும், நட்பு என்று ஒரு அருமையான பாடலை பாடியிருப்பார்கள்.

  • mokrish 11:01 am on January 24, 2013 Permalink | Reply  

    அவள் ஒரு ராகமாலிகை 

    திரையிசை பாடல்கள்  கர்நாடக இசைவடிவத்தை சார்ந்து இருப்பதை  பார்த்திருக்கிறோம்.  கதையின் நாயகிக்கு ராகத்தின் பெயர் வைத்ததையும் பார்த்திருக்கிறோம். ரஞ்சனியும் பைரவியும் சிந்துவும் சஹானாவும் நீலாம்பரியும் கதையில் உலா வருவதுண்டு.

     சண்முகம் என்னும் நாயகனை நினைத்து நாயகி மறைந்திருந்து  பாடிய பாட்டை சண்முகப்பிரியா ராகத்திலும்

    அபூர்வமான நாயகியைப்பற்றி  அதிசய ராகத்தில் பாடல் அமைத்ததும்

    நாயகியின் பெயர் கொண்ட லலிதா ராகத்தில் இதழில் கதை எழுதியதும்

    இசை அமைப்பாளர்களின் இனிய கற்பனை. Creative Brilliance

    திரைப்பாடல் வரிகளில் அதிகம் உபயோகப்படுத்தப்பட்ட வார்த்தைகளில் ‘ராகம்’ டாப் டென் லிஸ்டில் வரும். ராகங்கள் பதினாறு உருவான வரலாறும் ராக தீபம் ஏற்றும் நேரமும்  நமக்கு தெரியும். சரி ராகங்களின் பெயர்களை அது பெண்ணின் பெயராய்  வருவதை தவிர்த்து  கவிஞர்கள் எப்படி பிரயோகிக்கிறார்கள்?   முதலில் நினைவுக்கு வருவது ‘இசை கேட்டு எழுந்தோடி’ என்று தோடியை கண்ணதாசன் சொன்னதுதான். தர்பாரில் எனக்கு இணை யாரென்று கேட்டதும் ஒரு நாள் போதுமா என்று கேட்ட அதே பாடலில் தான்.

    அகத்தியர் படத்தில் ஒரு போட்டி பாடலில் சில முத்துக்கள் உண்டு. எந்த ‘நாட்டையும்’ நாதத்தால் வென்றிடுவேன் என்பதும் ‘அனைத்தும் உன் ‘வசந்தா’னா என்பதும் நயம். இசையமைப்பாளர் இளையராஜா கவிஞராகவும் மாறி என்ன சமையலோ என்று விசாரித்து ‘களைந்திடு அரிசியை கல்யாணி – கல் ஆணி என்று சர்க்கஸ் காட்டுவார்.

    கண்ணதாசன் முழுவதும் ராகங்களின் பெயர்களை வைத்து  ஒரு பாடல் எழுதியிருக்கிறார். பெண் ஒன்று கண்டேன் படத்தில் அவளை ராகமாலிகையாய் கற்பனை செய்யும்  பாடல்.

     உன் மை விழி ஆனந்த பைரவி பாடும்

    உன் தேகத்தில் மோகன ராகத்தின் பாவம்

    நீ ஒரு ராகமாலிகை

    உன் நெஞ்சம் என் காதல் மாளிகை

    என்று தொடங்கி எல்லா வரிகளிலும் ஒரு ராகத்தின் பெயரை சொல்லும் கவிதை.

     நான் வாவென அழைக்கையில் விரைந்தோடி

    வந்து தழுவிடும் தேவ மனோஹரி

    ஆரபிமானமும் தேவையில்லை இந்த

    அகிலத்தில் உன் போல் பாவையில்லை

    நீ ஓடி வந்து தழுவினால் வேறு யார் அபிமானமும் எனக்கு தேவையில்லை என்று சொல்லும் காதல்.

    நீ எனக்கே தாரம் என்றிருக்க

    உன்னை என் வசந் தாவென நான் கேட்க

    என்று ராகத்தின் பெயர்களை பிரித்து பொருள் கொண்டு அவன்  நெஞ்சினில் கொஞ்சும் ரஞ்சனியை அவன் தேடும் நாயகியை  பாடும் வரிகள் செய்யும் வித்தை  நயம்.

    பல்லவியும் சரணமும் ராகத்தின் பெயர்களில் சரணம் .

    மோகனகிருஷ்ணன்

    054/365

     
    • @npodiyan 2:51 pm on January 24, 2013 Permalink | Reply

      அருமை!

    • amas32 (@amas32) 2:55 pm on January 24, 2013 Permalink | Reply

      ராகங்களின் பெயர்களோடு அதே ராகத்தில் வரும் பாடல்கள் நம் நினைவில் நீங்காமல் நிற்பது அந்த ராகத்தின் பெருமை மற்றும் அப்படி இசை அமைத்தவர்களின் பெருமை, இரண்டையும் நமக்குக் காட்டுகிறது. நீங்கள் குறிப்பிட்டுள்ள அத்தனைப் பாடல்களுமே வரிகளைப் படித்தவுடன் மனதில் பாடல் ஒலி கேட்கிறது.

      amas32

    • suri 12:13 am on February 26, 2013 Permalink | Reply

      hai, this song was written by Vaali. The heroine is Premila!

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel