Updates from November, 2013 Toggle Comment Threads | Keyboard Shortcuts

  • என். சொக்கன் 11:13 pm on November 30, 2013 Permalink | Reply  

    விருந்தினர் பதிவு : குழந்தைப் பாடல்கள் 

    முன்பெல்லாம் நம் தமிழ் திரைப்படங்களில்  குழந்தைகளுக்கு நாயகர்கள் அறிவுரைக் கருத்துகளைக் கூறும் பாடல்கள் நிறைய இடம் பெறும். அந்தப் பாடல்களில் உள்ள நற்கருத்துகள் பல பிஞ்சு மனங்களில் பசுமரத்தாணிபோல பதிந்து நல்வாழ்விற்கு வழிவகுக்கும் ஆற்றல் கொண்டவை. அது போன்று பல பாடல்கள் வந்திருந்தாலும் என்றும் மனதில் நிற்கும் சில பாடல் வரிகள்:
    “பாலுட்டும் அன்னை அவள் நடமாடும் தெய்வம்-அறிவூட்டும் தந்தை நல்வழி காட்டும் தலைவன்
    துணையாக கொண்டு நீ நடைபோடு இன்று-உருவாகும் நல்ல எதிர்காலம் ஒன்று”
    கிளி போல பேசு இளங்குயில் போல பாடு-மலர் போல சிரித்து நீ குறள் போல வாழு
     மனதோடு கோபம் நீ வளர்த்தாலும் பாவம்-மெய்யான அன்பே தெய்வீகமாகும்”
    : இது காவியக்கவிஞர் வாலியின் எளிமையான சக்தி மிகுந்த வரிகள் கொண்ட “நல்ல பேரை வாங்க வேண்டும் பிள்ளைகளே”பாடல்.
    அடுத்து கவியரசர் கண்ணதாசன் எழுதிய வரிகளை பாருங்கள்:
    “அறம் செய்ய விரும்பு என்றாள் ஔவை-தருமம் செய்யுங்கள்
       அன்பே தெய்வம் என்றார் பெரியோர் -அன்புடன் வாழுங்கள்
      யாரும் தீமை செய்தாலும் நீங்கள் நன்மை செய்யுங்கள்
       யாரும் பொய்யை சொன்னாலும் நீங்கள் மெய்யை சொல்லுங்கள்
      நேர்மையாய் வாழ்வதில் தோல்வியே இல்லையே”!

    எப்படிப்பட்ட வரிகள் பாருங்கள், “தங்கங்களே நாளை தலைவர்களே நம் தாயும் மொழியும் கண்கள்”பாடல்.

    அடுத்து  கவிஞர் வைரமுத்து அவர்களின் வரிகள்-
    குழந்தைகளுக்கு யானை,குரங்கு”கதையை கூறி “வினை விதைத்தவன் வினை அறுப்பான்-திணை விதைத்தவன் திணை அறுப்பான்,நன்மை ஒன்று  செய்தீர்கள் நன்மை விளைந்தது-அட தீமை ஒன்று செய்தீர்கள் தீமை விளைந்தது-தீமை செய்வதை விட்டு விட்டு நன்மை செய்வதை தொடருங்கள்”என்று எளிமையாக அறிவுறுத்தும் “ராஜா சின்ன ரோஜாவோடு காட்டுப்பக்கம் வந்தானாம்”..
    புதிய இயக்குனர்களும் தங்கள் படங்களில் இது போன்ற நல்ல கருத்துக்களை தங்கள் படங்களில் புகுத்துவது ஆரோக்கியமான வளர்ச்சியாக அமையும். நன்றி
    பதிவில் இடம் பெற்ற பாடல்கள்:
                                                                                பாடல்:             நல்ல பேரை வாங்க வேண்டும் பிள்ளைகளே
                                                                                படம் ”              நம் நாடு
                                                                                எழுதியவர்:   கவிஞர் வாலி
                                                                                இசை :             கே.வி. மகாதேவன்
                                                                                 பாடியவர்:      டி.எம்.சௌந்தர்ராஜன்
                                                                                 சுட்டி :                http://youtu.be/Th9bUtTIRGY
                                                                                 பாடல்:             தங்கங்களே நாளை தலைவர்களே
                                                                                 படம் :                என்னைப்போல் ஒருவன்
                                                                                 எழுதியவர்:     கவியரசர் கண்ணதாசன்
                                                                                  இசை:                எம்.எஸ்.விஸ்வநாதன்
                                                                                  பாடியவர் :        டி.எம்.சௌந்தரராஜன்
                                                                                  சுட்டி:                  http://youtu.be/6FQEFdXE3Io
                                                                                  பாடல்:                ராஜா சின்ன ரோஜாவோடு
                                                                                   படம்:                   ராஜா சின்ன ரோஜா
                                                                                   எழுதியவர்:       கவிஞர் வைரமுத்து
                                                                                    இசை:                  சந்திரபோஸ்
                                                                                    பாடியவர்கள்:   எஸ்.பி.பாலசுப்ரமணியம் குழுவினர்
                                                                                     சுட்டி:                    http://youtu.be/w9O4sdhxwos

    நா. ரஜினி ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன். ட்விட்டரில் என்னைப் பின்தொடர: @rajinirams

    Advertisements
     
  • என். சொக்கன் 11:03 pm on November 30, 2013 Permalink | Reply  

    விருந்தினர் பதிவு: ஊசி முனைக் காதுக்குள்ளே ஒட்டகங்கள் 

    சமீபத்தில் ஓர் பழைய பாடலைக் கேட்டுக் கொண்டிருந்தபோது கவிஞர் கண்ணதாசனின் வசனம் என் கவனத்தை ஈர்த்தது.  

    “ஊசிமுனைக் காதுக்குள்ளே ஒட்டகங்கள் போனாலும் காசாசை போகாதடி” 

    கவியரசு கண்ணதாசனின் ஓர் மிகச் சிறப்பான அம்சம் எல்லா மதங்களையும் மதிக்கும் மனப்பாங்கு – இந்த முதிர்ச்சி எல்லோருக்கும் வருவதில்லை. மதத்தின் பரந்த அறிவுமுதிர்ச்சி மற்றைய மத நூல்களையும் படிப்பதனால் ஏற்படுகிற தெளிவு. அவருடைய கொள்கையில் ஒவ்வொரு சமயமும் ஒவ்வொரு சிற்றாறு.. சிற்றாறுகள் சேர்ந்து உருகவாக்குவது ஒரு மகா நதி.

    நாஸ்திகனாக இருந்து கண்ணனின் தாசனாக மாறிய முத்தையா தனது பாடல்களில் காட்சிக்கு தகுந்தவாறு மற்றைய மத கோட்பாடுகளையும் தாரளமாக அள்ளித் தெளிப்பது வழக்கம்.  இந்த வகையில் மேலே குறிப்பிட்ட வசனம் கிறிஸ்தவ விவிலிய நூலில் (Holy Bible) இருந்து எடுக்கப்பட்டது.

    இயேசு நாதருக்கும் ஓர் பெரிய பணக்காரனுக்கும் இடையே நடக்கும் சம்பவம், மேற்கோளின் சுருக்கமான பின்னணி: (லூக்கா 18:18-25)

    பணக்காரன்: இயேசு நாதரே! நான் நித்திய வாழ்வை (Eternal life) பெறுவதற்கு என்ன செய்யவேண்டும்”

    இயேசு நாதர்: நீ பத்துக் கட்டளைகளையும் கடைப் பிடிக்கிறாயா?

    பணக்காரன்:  ஓ! நான் சிறுவயது முதல் இந்த கட்டளைகளை கடைப்பிடிக்கிறேன்

    இயேசு நாதர்: இன்னும் உன்னிடத்தில் ஒரு குறை உண்டு. உனக்கு உள்ள எல்லா ஆஸ்திகளையும் விற்று ஏழைகளுக்கு கொடு அப்போது உனக்கு பரலோகத்தில் பொக்கிஷம் உண்டாகும். அதற்கு பின் என்னைப் பின் பற்றி வா!

    இதைக்கேட்ட அந்த செல்வந்தன் மிகவும் துக்கமடைந்ததைப் பார்த்த இயேசு “ ஐசுவரியவான் தேவனுடைய ராஜ்யத்தில் பிரவேசிப்பதைப் பார்க்கிலும், ஒட்டகமானது ஊசியின் காதிலே நுழைவது எளிதாயிருக்கும்” என்றார்.

    இந்த சிறு சம்பாஷனை புதிய ஏற்பாட்டில் உள்ள முதல் 3  சுவிசேடகங்களும் குறிக்கின்றன. ஆங்கிலத்தில் இதை camel and the eye of the needle என்று பொதுவாக குறிப்பிடுவார்கள். நடக்கமுடியாத சம்பவத்தை விவரிப்பதற்கு இந்த வசனம் ஓர் எடுத்துக்காட்டு. கவியரசு கண்ணதாசன் இதை பண ஆசையுடன் ஒப்பிட்டு எழுதியுள்ளார்.

    இப்போது இந்த திரைப் பாடலை கேட்டுப் பாருங்கள். அர்த்தம் புரியும்.

    திரைப்படம்: பணத்தோட்டம்(1963)

    பாடல்: குரங்கு வரும் தோட்டமடி பழத்தோட்டம்( மனத்தோடம் போதுமென்று)

    இசை: விஸ்வநாதன் -ராமமூர்த்தி

    பாடலாசிரியர் : கவியரசு கண்ணதாசன்

    பாடலின் சுட்டி:  http://www.youtube.com/watch?v=M1YnOtuff1c

    பிற்குறிப்பு: விவிலிய நூலின் ஒரு பகுதியான புதிய ஏற்பாடு (New Testament) கிரேக்க மூல மொழியில் இருந்து தமிழுக்கு முதன்முதலாக மொழி பெயர்க்கப்பட்டது. கவியரசு கண்ணதாசன் அவர்கள் இதன் மூன்றாவது புத்தகத்தை (லூக்கா சுவிசேடகம் – Gospel of Luke) தன்னுடைய பாணியில் யேசு காவியம் எனும் தலைப்பில் படைத்தது குறிபிடத்தக்கது.

    சபா- தம்பி

    சபா-தம்பி பிறந்து வளர்ந்தது இலங்கையில். கால் நூற்றாண்டு காலத்துக்குமுன்னால் ஆஸ்திரேலியாவில் குடியேறியவர், தற்போது பெர்த் நகரத்தில் வசிக்கிறார். தமிழார்வம் ஏராளம், ஆனால் கடந்த சில ஆண்டுகளாக ஆங்கிலத்தில்மட்டுமே எழுதிவந்திருக்கிறார், கண்ணதாசனும் #4VariNoteம் தந்த ஊக்கத்தில் தமிழிலும் எழுதத் தொடங்கி, தொடர்ந்து எழுதிவருகிறார்.

    Twitter: @SabaThambi
     
    • kamala chandramani 11:44 am on December 1, 2013 Permalink | Reply

      மனிதனுக்கு காசு மீதுள்ள ஆசையைக் கண்ணதாசன் எத்தனை அழகாகச் சொல்லியுள்ளார்! விவிலிய நூலில் சொல்லியுள்ளவற்றை விளக்கியிருப்பது பொருத்தமாக இருக்கிறது. அனைவருக்கும் தெரியாத, இயேசுவுக்கும், பணக்காரனுக்கும் இடையே நடக்கும் சம்பவத்தை எழுதியதற்கு நன்றி.

    • amas32 3:18 pm on December 1, 2013 Permalink | Reply

      ஒரே நாலு வரி நோட்டில் ஒவ்வொரு பதிவாளரும் திரைப்பாடல்களின் நாலு வரிகளைக் கையாளும் விதம் அத்தனை வித்தியாசமாக உள்ளது. ஒவ்வொருவருக்கும் ஒரு பார்வை. ஆனால் சொல்ல வரும் கருத்துக்கள் அத்தனையும் அருமை.

      நீங்கள் பாடல் வரிகளுக்கும் விவிலயக் கருத்துக்கும் உள்ள கனெக்ஷன் பற்றி சொல்லியிருப்பது அருமை 🙂

      amas32

    • Saba-Thambi 8:44 pm on December 1, 2013 Permalink | Reply

      நன்றி kamala chandramani, amas32
      உங்கள் பின்னோட்டங்கள் எப்போதுமே உற்சாகமுள்ளவை.

  • என். சொக்கன் 12:08 am on November 30, 2013 Permalink | Reply  

    விருந்தினர் பதிவு: நான் கண்ணாடிப் பொருளல்லவா! 

    பாடல் : கண்ணாமூச்சி ஏனடா

    படம் : கண்டுகொண்டேன் கண்டுகொண்டேன்

    பாடலாசிரியர் :  வைரமுத்து

    இசை: எ.ஆர்.ரஹ்மான்

    பாடகர் : சித்ரா

    என் மனம் உனக்கொரு விளையாட்டு பொம்மையா ?

    எனக்கென உணர்ச்சிகள் தனியாக இல்லையா ?

    நெஞ்சின் அலை உறங்காதோ ?

    உன் இதழ் கொண்டு வாய்
    மூட வா என் கண்ணா…

    உன் இமைக் கொண்டு விழி
    மூட வா என் கண்ணா…

    உன் உடல் தான்
    என் உடையல்லவா….!

    காதலைப் பற்றியப் பாடல். எப்பொழுதுமே காதலை சொல்வதில் இரு பாலாருக்கும் தயக்கம் இருக்கும், ஏனென்றால் ஒருவரால் சொல்லப்பட்டக் காதல் மற்றவரால் நிராகரிக்கப்பட்டால் அது சொன்னவருக்கு வேதனை மட்டும் தராது, அவமானத்தையும் சேர்த்துத் தரும். சொல்லாமல் இருந்தாலும் மனம் கொந்தளித்துக் கொண்டே இருக்கும். ஆனால் பெரும்பாலான சமயம் காதல் வயப்பட்ட இருவருக்குமே ஒருவர் மற்றவரைக் காதலிப்பதுத் தெள்ளத் தெளிவாகவே தெரியும். 

    இது ஒரு பெண் பாடும் பாடல். அவள் இன்னும் காதலில் விழவில்லை ஆனாலும் தன் அக்காவின் காதல் நிலை கண்டு பாடும் பாடல். பெண் மனம் ஒரு உணர்ச்சிக் குவியல். ஆணுக்கு எல்லாமே ஒரு விளையாட்டு. பெண்ணுக்குக் காதல் ஒரு சீரியஸ் மேட்டர். மீனைக் ஆற்றில் பிடித்துத் திரும்பி நீரிலேயே விட்டு விளையாடுவதைப் போல பெண்ணிடம் சீண்டி விளையாடுவது ஆணுக்குக் கை வந்த கலை. ஆனால் அவளுக்கோ மனதை பறிகொடுத்துவிட்டால் எல்லாமே அவன் தான்.

    “எனக்கென உணர்ச்சிகள் தனியாக இல்லையா?” மிக முக்கியமான வரி. அவளே காதலன் பால் மயங்கி தனக்கென தனியாக எண்ணாமல் அவனைச் சார்ந்தே எண்ணத் தொடங்கிப் பிறகும் எனக்குத் தனியாக எண்ணங்கள் இல்லையா என்று கேட்பதில் நியாயமே இல்லை. ஆயினும் காதலனின் எண்ணங்களும் செயல்களும் அவள் உணர்சிகளுக்கு மதிப்புக் கொடுத்து நடக்கும்படி இருக்கவேண்டும் என்று அவள் நினைப்பதிலும் தவறேதும் இல்லை.

    நெஞ்சில் அடிக்கும் எண்ண அலைகள் கடலை விஞ்சும். அவன் எப்பொழுதும் என்னிடம் காதலுடன் இருப்பானா? வேறு பெண்ணைப் பார்த்து மயங்கி விடுவானோ? கடைசி வரை காதல் நிலைக்குமா? திருமணம் கைகூடுமா? நடுவில் கைவிட்டு விட்டுப் போய்விடுவானோ என்று ஆயிரத்தெட்டுக் கவலைகள்.

    இதில் தொடர்ந்து வரும் வரிகள் காதலன் எப்படி தன்னை சேர்ந்தவுடன் தான் தன் காதலுக்கே உத்தரவாதமே என்ற காதலி நினைக்கிறாள் என்ற பொருளில் வருகிறது. 

    //உன் உடல் தான்
    என் உடையல்லவா….!//
    நானே உன் உடையாக வேண்டும் -என்று சங்கத் தமிழ் வரிகள் நேரடியாக இல்லை! 
    ஆனால், நள வெண்பாவில் ஒன்று உள்ளது!

    —ஒருவர் உடலில் ஒருவர் ஒதுங்கி
    இருவர் எனும் தோற்றம் இன்றிப் – பொருவெங்
    கனற்கேயும் வேலானும் காரிகையும் சேர்ந்தார்
    புனற்கே புனல்கலந்தாற் போன்று—-

    அதாவது நளன்-தமயந்தி, ஒருவர் உடம்பில் ஒருவர் ஒதுங்குகிறார்கள். அதாவது ஒருத்தர், இன்னொருத்தரோட உடம்பாகவே ஆகிவிடுகிறார்கள். அதைத் தான் இந்தப் பாடல் வரிகளும் சொல்கின்றன.

    மிக அருமையான இசை. சித்ரா தன் தேன் குரலில் உணர்ச்சிப் பொங்கப் பாடியிருகிறார். அதற்கேற்பத் திரைப்படத்தில் ஐச்வர்யா ராயின் நடனமும், முக்கியமாக அஜித்தும் தபுவும் மறைந்திருந்தே பார்க்கும் மர்மமென்ன பாணியில் காதல் பார்வை பார்த்துக் கொள்வதும் பாட்டுக்குப் பெருமை சேர்க்கிறது.
     
    youtube link for the song : http://www.youtube.com/watch?v=5ftMtHBgKTc
    நள வெண்பா உதவி KRS  

    சுஷிமா சேகர்

    பிறந்தது பாண்டிச்சேரியில், வளர்ந்தது சென்னையில். கலிபோர்னியாவில் பத்து வருடங்களும் சிங்கப்பூரில் மூன்று வருடங்களும் இருந்துவிட்டுத் தற்போது வசிப்பது சென்னையில். குழந்தைகள் பிறந்த பிறகு MBA படித்தேன். நிறைய கற்றுக்கொள்ள வேண்டும் என்கிற ஆர்வம் உண்டு. இணையத்துக்கு (டவிட்டருக்கு) வந்து இரண்டு வருடங்கள்தான் ஆகிறது. அதன் மூலம் எனக்குக் கிடைத்த நண்பர்களை எண்ணி மகிழ்கிறேன். இணையத்துக்கு வந்த பிறகுதான் தமிழ் பயில்கிறேன். நேசிப்பது என் தொழில், பொழுதுபோக்கு 🙂

    சுஷிமா சேகர் வலைப்பதிவு: http://amas32.wordpress.com/

     
    • rajinirams 10:32 am on November 30, 2013 Permalink | Reply

      அருமையான பதிவு.”வைர”வரிகளுக்கு பட்டை தீட்டியது போன்ற அருமையான விளக்கம்,உடல் தான் உடையல்லவா என்ற அற்புதமான வரிகளை நளவெண்பா வரிகளுடன் எடுத்துக்காட்டி நல்ல பதிவை தந்திருக்கிறீர்கள்.பாராட்டுக்கள். “உன் இமை கொண்டு விழி மூடவா” வரிகள் வாலியின் வரிகளை நினைவு படுத்தும்- இதழோடு இதழ் வைத்து இமை மூடவோ-இருக்கின்ற சுகம் வாங்க தடை போடவோ,மடி மீது தலை வைத்து இளைப்பாறவோ முகத்தோடு முகம் வைத்து முத்தாடவோ….

      • amas32 9:35 pm on November 30, 2013 Permalink | Reply

        மிக்க நன்றி. You are a connoisseur of 4varinote. So any appreciation from you is a big honour, thank you 🙂

        amas32

    • B.MURUGAN 11:21 am on November 30, 2013 Permalink | Reply

      அருமை, யாராவது சிலாகித்து சொல்லும்போதுதான் அந்த பாடலின, பாடல் வரிகளின் மகத்துவம் புரிகிறது

    • umakrishh 11:24 am on November 30, 2013 Permalink | Reply

      ஹா..பெண்ணின் மனதை உணர்ந்து எழுதிய,பாடியவங்களுக்கு கௌரவம் சேர்க்கும் விதமாக உணர்ந்து எழுதி இருக்கீங்க 🙂
      //காதலைப் பற்றியப் பாடல். எப்பொழுதுமே காதலை சொல்வதில் இரு பாலாருக்கும் தயக்கம் இருக்கும், ஏனென்றால் ஒருவரால் சொல்லப்பட்டக் காதல் மற்றவரால் நிராகரிக்கப்பட்டால் அது சொன்னவருக்கு வேதனை மட்டும் தராது, அவமானத்தையும் சேர்த்துத் தரும். சொல்லாமல் இருந்தாலும் மனம் கொந்தளித்துக் கொண்டே இருக்கும். ஆனால் பெரும்பாலான சமயம் காதல் வயப்பட்ட இருவருக்குமே ஒருவர் மற்றவரைக் காதலிப்பதுத் தெள்ளத் தெளிவாகவே தெரியும்.//
      முற்றிலும் உண்மை :))
      இப்படத்தில் எங்கே எனது கவிதையும் நல்லதொரு உருக்கமான பாடல்

      • amas32 9:33 pm on November 30, 2013 Permalink | Reply

        உண்மை தான் உமா, நன்றி 🙂

        amas32

    • kamala chandramani 11:42 am on November 30, 2013 Permalink | Reply

      அருமையான பதிவு. வாழ்த்துகள்.

    • pvramaswamy 11:42 am on November 30, 2013 Permalink | Reply

      Excellent choice of song. The lyrics, tune, singing style, and, all very well picturised. Aishwaya Rai, apart from her being the “Miss World”, was a model too. That is very visible in graceful movements in this song (and the songs in ‘iruvar’). You have a superb taste. I wanted to write about this song, but avoided, as I could be accused of being carried away… Yeah, I went to you tube once again! 🙂

      Now about your writing. Good style, good flow. Direct. As usual. You seem to have a thin layer of suspicion about the ‘ரொம்பவே பாவம்’ men. Luckily you have not been elected as the Chairma… sorry Chairperson of Indian Women’s Fedration! 😉

      • amas32 9:31 pm on November 30, 2013 Permalink | Reply

        Thank you PVR 🙂 So happy to see your comment 🙂 This song is got a wholesomeness like the Thillaana Mohanambal’s மறைந்திருந்தே பார்க்கும் மர்மமென்ன, ஆனால் இக்காலத்திற்குடையது. நன்றி!

        amas32

        • to_pvr 9:54 pm on November 30, 2013 Permalink

          Yes.

    • Uma Chelvan 6:04 pm on November 30, 2013 Permalink | Reply

      Excellent write up !!!

      உங்க postம் commentsம் எப்பொழுதுமே மிகவும் நன்றாக இருக்கும். படிக்கும் காலத்தில், கேட்ட கேள்விக்கு மட்டும் பதில் சொல்லும் நல்ல மாணவியாக இருந்து இருபீங்கனு நினைக்கிறேன். Though I don’t have an account, I regularly follow you in Twitter, மிகவும் மென்மையான போக்கு, அனைவரயும் மனம் திறந்து வாழ்த்தும் உயர்ந்த உள்ளம் ……..God Bless you and My best wishes for your Kids especially for your Daughter for a bright and Beautiful Future…

      “A Happy person is not a person in a certain set of circumstances, but rather a person with a certain set of Attitudes “……….Hugh Downs

      • amas32 9:26 pm on November 30, 2013 Permalink | Reply

        Thank You Uma Chelvan. I always wondered who you were as you are not on twitter. Happy to know you through this blog site. Your comments are always very distinctive and your song links a welcome and picturesque interlude 🙂 Thank you so much for your kind words. I wish you the very best in everything. I have a great admiration for doctors and their yeomen service.

        amas32

        • Uma Chelvan 10:36 pm on November 30, 2013 Permalink

          Thank you very much amas 32. With my busy schedule (if you look at the time, I post my comments are mostly around 2:00 AM) I cannot cope with the speed of twitter, might be easier after a while ??:). I am on Facebook, not active now a days though. Finally I found a “Niche” here. Thank you very much for your appreciation on my comments. Couple of times, I was baffled by twitter people ‘s comments. I know how to easily ignore/avoid people, some times unwanted/ unnecessary comments will make you to look inside. It is Very nice know you too.!!!!!!:) . .

    • Saba-Thambi 8:46 pm on December 1, 2013 Permalink | Reply

      அருமையான பதிவு!

  • என். சொக்கன் 12:00 am on November 30, 2013 Permalink | Reply  

    விருந்தினர் பதிவு: யானைக் குட்டிகள் 

    பாரதிக்குப் பின் வந்தவர்களில், (இதுவரை) கண்ணதாசனே நான் விரும்பும் மகா கவிஞன். அப்படியிருக்கையில், நான் இந்தக் குறிப்பைப் படிக்க நேர்ந்தது.

    பாரதியைப்பற்றிக் கண்ணதாசன்:

    ‘ஆறு தொகுதிகள் கவிதைகள் எழுதி இருக்கிறேன், ஏராளமா சினிமா பாட்டெழுதி இருக்கிறேன், உரை நடை எழுதி இருக்கிறேன்… பன்றி குட்டி போட்டமாதிரி இவ்வளவு எழுதி என்ன பிரயோசனம்? பாரதி இந்தக் கவிதைத் தொகுதி ஒன்றினால்மட்டும் உலகத்தை ஜெயிச்சுட்டானே!  அவன்தான் மகாகவி, என்னைப்பத்தியெல்லாம் பேசப்படாது!’

    (from அர்த்தமுள்ள அநுபவங்கள் : இராம. கண்ணப்பன் : நர்மதா பதிப்பகம் வெளியீடு)

    இதைப் படித்ததும், பாரதி பற்றி என் ஒரு மனம் கர்வப்பட்டாலும், இன்னொரு மனம் கண்ணதாசனுக்காக மிக நெகிழ்ந்தது.

    காலத்தில் அழியாத

    காவியம் தரவந்த

    மாபெரும் கவி மன்னனே – உனக்கு

    தாயொரு மொழி சொல்லுவேன்…                        *a

    என்று, அவன் எழுதிய வரிகளாலேயே வருடிகொடுத்தும், தட்டிக்கொடுத்தும் தேற்ற விழைந்தது.

    சினிமா நல்லதாகவோ அல்லாததாகவோ, எப்படியோ இருந்து போகட்டும். ஆனால் ஒரு சிறந்த கவிஞன்,

    நிரந்தரமானவன், அழிவதில்லை – எந்த

    நிலையிலும் அவனுக்கு மரணமில்லை                   *b

    என்ற மிக உன்னதமான இடத்திலேயே கண்ணதாசன் இருந்துவருவதைச் சுட்டிக்காட்டத் தோன்றியது.

    கொடிதிலும் கொடிது, இளமையில் வறுமை என்று ஔவையார் சொல்லுவதை எல்லாரும் புரிந்துகொள்ளும் வகையில் சரியாகவும் அழகாகவும் காட்டும் கண்ணதாசனின் பாடல் இது:

    செல்வர்கள் இல்லத்தில்

    சீராட்டும் பிள்ளைக்கு

    பொன்வண்ணக் கிண்ணத்தில் பால் கஞ்சி

    இதில், ‘பொன்வண்ணம்’ என்பதற்கு, தங்கநிறத்தில் என்று பொருள் கொள்ளக்கூடாது. அது செல்வந்தர் இருப்பிடம். மாளிகை. எனவே, அவர்கள் வீட்டுக் குழந்தை, ‘பொன்னாலான அழகிய’ கிண்ணத்தில் பால் குடிக்கிறது. சரி, அங்கே ஏழை வீட்டில் என்ன நடக்கிறது?

    கண்ணீர் உப்பிட்டு காவேரி நீரிட்டு

    கலயங்கள் ஆடுது சோறின்றி

    இதயங்கள் ஏங்குது வாழ்வின்றி

    தரித்திரம் தாண்டவமாடுகிறது. காசே கிடையாது. வீட்டில் ஒரு பிடி அரிசிகூட இல்லை. உப்பு வாங்கவும் துட்டு கிடையாது. துயரத்தில் பொங்கிய அழுகையால், கலயத்தில் விழுந்த கண்ணீரில் இருந்த உப்பு மட்டுமே, இனாமாகக் கிடைத்த தண்ணீரில் கலந்ததாம். ஒரு சின்ன வரியில் – கண்ணீர் உப்பிட்டு காவேரி நீரிட்டு கலயங்கள் ஆடுது சோறின்றி – மாபெரும் அற்புதத்தை நிகழ்த்திக்காட்டிய சாகசம் கண்ணதாசனுக்கு மட்டுமே சொந்தம்!

    கண்ணதாசன் பாடல் இன்னும் தொடர்கிறது..

    மாணிக்க தேர் போல

    மையிட்டுப் பொட்டிட்டு

    மகராஜன் செல்வங்கள் விளையாடும்

    கண்ணாடி வளையலும் காகித பூக்களும்

    கண்ணே உன் மேனியில் நிழலாடும்

    இல்லாத உள்ளங்கள் உறவாடும்

    கண்ணாடி வளையல்களும் காகித பூக்களும் கண்ணே உன் மேனியில் நிழலாடும் என்று எடுத்துக்கொண்ட காட்சியை நிலை நிறுத்துகிறது!!

    இந்த இரண்டு வரிகளுக்கும் முத்தாய்ப்பாக, இன்னும் இரண்டு வரிகள்.

    கண்ணுறங்கு, கண்ணுறங்கு – பொன்னுலகம்

    கண்ணில் காணும்வரை கண்ணுறங்கு, கண்ணுறங்கு

    இதுவா பன்றி குட்டிபோல இருக்கு… மனசு ஆறமாட்டேங்குது!

    மிகப்பரவலான தலைப்புகள் என்றாலும் அழகாகவும் ஆழமாகவும் –நுனிப்புல் மேயாமல் என்று பொருள் கொள்க- எழுத, வெகுச்சிலரால் மட்டுமே முடியும். அதிலும் கவிதை என்று வந்தால் அத்தகையவர்களின் எண்ணிக்கை ரொம்பவே குறைந்துவிடும். அதனால் தான், என்னளவில், பாரதிக்குப்பின் (இன்றுவரை) கண்ணதாசன் மட்டுமே என்று சொல்கிறேன்.

    பாரதியார் 39 வயது மட்டுமே வாழ்ந்தார் – அதுவும், தான் கனவுகண்ட சுதந்திர இந்தியாவைக் காணாமல் 1921-இலேயே மறைந்தார். ஆனால், தன் ஐம்பத்திநாலு வயதில், 1981-இல் மறைந்த கண்ணதாசன், சுதந்திர இந்தியாவின் மாற்றங்களை மட்டுமல்லாது, உலகளாவிய விஞ்ஞா ன வளர்ச்சியையும், ஏனைய தாக்கங்களையும் கண்டவர்.

    ஆகவே, “பன்றி குட்டி போட்டமாதிரி இவ்வளவு எழுதி என்ன பிரயோசனம்? பாரதி இந்தக் கவிதைத் தொகுதி ஒன்றினால்மட்டும் உலகத்தை ஜெயிச்சுட்டானே!  அவன்தான் மகாகவி, என்னைப்பத்தியெல்லாம் பேசப்படாது” என்று கண்ணதாசன் சொல்லுவதன் உள்ளர்த்தம் வேறாயிருக்க வேண்டும். முகத்துக்கு நேரேவரும் மிகைப்புகழ்ச்சியால் நெளிபவர்கள், அதைக் கடப்பதற்காக, தனக்கிணையான அல்லது தன்னிலும் மேலான ஒரு மேதையின் பெயரை உபயோகிப்பது என்பது, இது முதல் தடவையல்ல. எனவே இதை நாம் இப்படியே விட்டுவிடலாம். 🙂

    சினிமாப் பாடல்களில் தமிழின் சிறப்பைப்பற்றி சொல்லுவதும், அதைப் பற்றிச்செல்லுவதும் அடிக்கடி நடப்பது தான். அதில் எல்லார் மனதையும் சொக்கவைப்பவர் கண்ணதாசன்.

    சந்தம் நிறைந்த தமிழ் -சங்கீதம் பாடும் தமிழ்

    சிந்து பல கொண்ட தமிழ் -வெல்லும், வெல்லும்…

    இந்த தேசம் முற்றும் ஆண்ட கதை -சொல்லும், சொல்லும்…

    இந்த வரிகளைக் கேட்கும் ஒவ்வொரு தடவையும், எனக்கு திரிகூடராசப்பக் கவிராயரின் திருக்குற்றாலக் குறவஞ்சியில், ‘பைந்தொடி நாரி வசந்த ஒய்யாரி பொற்பந்து கொண்டாடினளே நினைவுக்கு வந்துவிடும். யார் அந்த ஒய்யாரி, அவள் பந்தாடினதில் என்ன விசேஷம் என்று பார்க்க, இங்கேசெல்லவும்.

    கண்ணதாசன் பாடலில்,

    செவ்வரியோடிய கண்களிரண்டினில் சேலோடு வேலாட – இரு

    கொவ்வை இதழ்களும் கொத்து மலர்களும் கொஞ்சி மகிழ்ந்தாட…

    என்ற வரிகள் ரசிக்கப் பட்டாலும், அதிகம் பேசப்பட்டது கீழேயுள்ள வரிகள் தாம்.

    தோட்டத்திலே தென்னையிரண்டு முற்றித்திரண்டு பக்கம் உருண்டு,

    கண்ணில் தூக்கி நிறுத்திய விருந்து – அதைத்

    தொடவோடிய விழியோடொரு விழி மோதிய கணமே – எனைத்

    ஆனால், இவனுக்கும் முன்னால் எழுதிய பாரதி ஏற்கனவே இதையெல்லாம் எழுதிவிட்டான். இதோ, எந்தநேரமும் நின் மையலேறுதடீ – குறவள்ளி சிறுகள்ளி.. என்ற பாடலைக் கேளுங்கள். இந்த பாரதியார் பாடலுக்கு எல்.வைத்யநாதன் இசையமைத்துள்ளார். முழுப்பாடலும் கேட்டால் பிரமிப்பாயிருக்கும்.

    தமிழ் என்றும் புதியது, எப்பொழுதும் திகட்டாதது. எனவே, கொஞ்சம் ஜாலியாக காய் வகைகளையும் கண்ணதாசனின் எழுத்தில் காணலாம்:

    உள்ளமெலாம் மிளகாயோ ஒவ்வொரு பேச்சுரைத்தாயோ
    வெள்ளரிக்காய் பிளந்ததுபோல் வெண்ணிலவே நீ சிரித்தாயோ

    கோதை எனைக் காயாதே கொற்றவரங்காய் வெண்ணிலா
    இருவரையும் காயாதே தனிமையிலேங்காய் வெண்ணிலா

    தமிழில் நன்றாக எழுதிப் படைப்பதனால், அவன் பேர் இறைவன். இணப்பிலிருக்கும் பாடல்கள் ஒவ்வொன்றையும் முழுமையாகக் கேட்டு ரசியுங்கள்.  🙂

    =========

    நாலு வரிக்காக எடுத்தாண்ட பாடல்கள்:

    1. காலத்தில் அழியாத காவியம் தரவந்த: http://www.youtube.com/watch?v=l1kYJFo-uBU
    2. ஒரு கோப்பையிலே என் குடியிருப்பு: http://www.youtube.com/watch?v=eCC6tV8sgSM
    3. பூஞ்சிட்டுக் கன்னங்கள்: http://www.youtube.com/watch?v=zsBG59Y0k04
    4. சங்கம் வளர்த்த தமிழ்  http://www.youtube.com/watch?v=9fPHG8IE-vU
    5. இந்திரையோ, இவள் சுந்தரியோ  http://www.youtube.com/watch?v=u515oyKoO7I
    6. எந்த நேரமும் http://www.raaga.com/player4/?id=231999&mode=100&rand=0.6847409228794277
    7. அத்திக்காய் காய் காய்  http://www.youtube.com/watch?v=muWBARd3oAk பாட்டில்வரும்  வார்த்தைகளுக்கு ஒன்றுக்கும் அதிகமான அர்த்தமிருப்பதால், இதில் இருக்கும் சப்-டைட்டில், பாடலை முழுமையாக ரசிக்க, உதவும்.

    பி. வி. ராமஸ்வாமி

    ரீடெய்ல் துறையில் பல வருடங்கள் பணியாற்றிய அனுபவஸ்தர் பி. வி. ராமஸ்வாமி, ’ஜார்ஜ் ஆர்வெல்’லின் புகழ் பெற்ற நாவலான ‘விலங்குப் பண்ணை’யை அருமையான நடையில் தமிழாக்கம் செய்திருக்கிறார், தமிழ் இணையத்தில் நல்ல படைப்புகள் எங்கு தென்பட்டாலும் தேடிச் சென்று பாராட்டுகிற நல்மனத்துக்காரர்.

    https://twitter.com/to_pvr

     
    • amas32 1:39 am on November 30, 2013 Permalink | Reply

      ஏழ்மை என்னை மிகவும் நெகிழ்த்தும். துலாபாரம் படத்தில் பூஞ்சிட்டு கன்னங்கள் பாடலை எங்கு கேட்டாலும் தானாகக் கண்ணில் நீர் வழியும். கண்ணதாசனின் வரிகளின் வலிமை அவ்வளவு. கண்ணதாசனின் திரைப்பாடல்கள் சொல்லாத கருத்துக்களே இல்லை. அதுவும் அவர் இருந்த காலத்தில் சினிமாவின் இரு ஜாம்பவான்கள் கோலோச்சிய நேரம். சிவாஜியும் எம்ஜியாரும் இவரின் பாடல் வரிகளுக்கு வாயசைத்தேப் பெருமை அடைந்தனர்.

      பல நல்ல பாடல்களை தேர்வு செய்து அசை போட்டிருக்கிறீர்கள். என் போன்றோருக்கு நல்லதொரு பாடம். மிக்க நன்றி 🙂

      amas32

      • pvramaswamy 11:17 am on November 30, 2013 Permalink | Reply

        Thank you my friend. An acceptable level of appreciating words are always welcome. Thank you. But your generosity extends too much in your last line /என் போன்றோருக்கு …/

    • Niranjan Bharathi 10:24 am on November 30, 2013 Permalink | Reply

      நல்ல பதிவு.

      பாரதியார் 1927 ஆம் ஆண்டில் இறக்கவில்லை. அவர் இறந்த ஆண்டு 1921.

      சுதந்திர இந்தியாவைக் காணாவிடினும் “ஆடுவோமே பள்ளு பாடுவோமே, ஆனந்த சுதந்திரம் அடைந்து விட்டோம் என்று” என்று பின்னர் வரவிருக்கும் சுதந்திரத்தை முன்னரே கண்டுணர்ந்து பாடிய தீர்க்கதரிசி.

    • pvramaswamy 11:14 am on November 30, 2013 Permalink | Reply

      நன்றி நிரஞ்சன் பாரதி. அவர் மறைந்தது 1921-ல் தான். நான் தப்பாக எழுதிவிட்டேன். என் பிழை, மன்னிக்க. அவர் தீர்க்கதரசியே தான். #பாரதிரப் பாடிய பாரதி!

    • Badri 8:22 am on December 1, 2013 Permalink | Reply

      ’பூஞ்சிட்டு கன்னங்கள்’ பாடலை பல முறை கேட்டிருக்கிறேன். அந்த மெட்டையும், சுசீலாவின் குரலையும் அனுபவித்திருக்கிறேன். ஆனால் அந்த வார்த்தைகளின் அர்த்தத்தையும், அழகையும் இன்றுதான் உணர்ந்தேன். நன்றி PVR.

      • pvramaswamy 6:07 am on December 3, 2013 Permalink | Reply

        Thanks a lot Badri. I am happy you enjoyed it again. I hope you liked the other songs tagged also. 🙂

    • Saba-Thambi 8:40 pm on December 1, 2013 Permalink | Reply

      அருமையான பதிவு! இறந்தும் இறவா கண்ணதாசன் என்றும் வாழ்க!!

      • pvramaswamy 6:21 am on December 3, 2013 Permalink | Reply

        கண்ணதாசன், தமிழின் செல்லப்பிள்ளை. அவர் பேசுவதும் அற்புதமாயிருக்கும். இலக்கியத்தில் காதல் என்று ஒரு யூட்யூபில் தேடினால் கிடைக்கும். இதோ, அவற்றிலிருந்து ஒன்று: http://www.youtube.com/watch?v=s0REHod0O90

        வசந்த ஒய்யாரி மேலும் அழகு பெறுகிறாள்.

        • Saba-Thambi 10:55 am on December 4, 2013 Permalink

          அபாரம்!!! இணையத்திற்கு மிக்க நன்றி.

          ரிதமெடிக் சென்ஸை மிகவும் இலகுவாக விளக்குகிறார். A musician and a Physicist would struggle to put the concept across but KD has used simple day to day example and that is an art itself.

  • என். சொக்கன் 11:01 pm on November 16, 2013 Permalink | Reply  

    விருந்தினர் பதிவு: கொல்லையில் தென்னை 

    இரவு நேர பண்பலையில் எப்பொழுதுமே நாம் கேட்டறியாத அல்லது கேட்டு நீண்ட நாட்கள் ஆகிப் போன பாடல்களை ஒலிபரப்புவதால்  நான் அதற்கு ரசிகை.. அப்படி ஒரு நாளில் ஜெயச்சந்திரனின் அருமையான தாலாட்டு

    கொல்லையில தென்னை வச்சி குருத்தோலைப் பெட்டி செஞ்சி சீனி போட்டு நீ திங்க செல்லமாய்ப் பிறந்தவளோ ,மரக் கிளையில் தொட்டில் கட்ட மாமனவன் மெட்டுக் கட்ட  அரண்மனையை விட்டு வந்த அல்லி ராணி கண்ணுறங்கு..

    இந்தப் பாடல் சின்னதாய்ப் போயிற்றே என்று முதன் முதலாய்க் கேட்ட தருணத்தில் இருந்தே மனக் குறை . அதிக இசைக்கருவிகள் இன்றி  இரவு நேர இதத்துக்கு இழுக்கு சேர்க்காமல் நேர்த்தியாக இசையமைத்திருக்கிறார் ரஹ்மான்.    இப்பாடலில் வரும் கொல்லையில என்பது கிராமத்துப் பேச்சு வழக்கு. வீட்டின் பின் புறத்தை கொல்லைப் பக்கம் என்பார்கள். சின்ன வயதில் புதுக்கோட்டையில் உள்ள உறவினர் வீட்டுக்குச் செல்வதுண்டு. அங்கே பெரும்பாலும் ஒவ்வொரு வீட்டின் பின்புறமும் ஏதேனும் மரங்கள் செடிகள் இருக்கும்.முன்புறமும் சிறிதளவேனும் இடம் விட்டு செடிகள் வளர்த்து வீடுகள் பார்க்கவே அழகாகவும் குளுகுளுவென இருக்கும். வீடு என்று ஒன்று கட்டினால் இப்படிதான் கட்ட வேண்டும் என்று தீர்மானமே உண்டு எனக்கு. நகரத்து கான்கிரீட் காடுகளில் இது குறைந்து விட்டது. இந்தப் பதிவுக்கு மூல காரணம் அந்த கொல்லை அல்ல 🙂 பாடலில் வரும் குருத்தோலை என்ற சொல்.

    குருத்தோலை என்றதும் எனக்கு உடனே பனை ஓலை தான் நினைவுக்கு வந்தது. (ஆனால் பாடலை எழுதிய வைரமுத்து கொல்லையில தென்னை வச்சு குருத்தோலைப் பெட்டி செய்துன்னு தானே எழுதி இருக்கிறார்..அவர் தவறு செய்ய வாய்ப்பு இருக்காதே என்று தென்னை ஓலையிலும் குருத்தோலைப் பெட்டி செய்யப்படுமா என விபரம் சேகரித்தேன்..

    குருத்து -முளை இந்த முளை விடும் இலையே ஓலையாக இருப்பது தென்னை மற்றும் பனைக்கு மட்டும் தானாம் ..

    பனை ஓலையில்,விசிறிகள்,பெட்டி ,கூடை ,கிலுக்கு என நிறைய செய்வார்கள். பனை ஓலை கிலுக்கு ப்ளாஸ்டிக் கிலுக்கு போல அல்லாமல் அதிக சத்தமின்றி அழகாகவும் அருமையாகவும் இருக்கும். பனை ஓலையில் கைப்பை கூட உண்டு. என்ன மடங்காது :)(திருப்புலானி கோவில் தலத்தில் விற்கிறார்கள்.இப்படி ஒரு காலத்தில் பனை ஓலையில் செய்தவற்றை ஆர்வத்துடன் வாங்கியதுண்டு..இந்தக் குருத்தோலைப் பெட்டியும் அதில் ஒன்று. இன்றும் என் அம்மா பூஜை அறையில் காணிக்கைக் காசுகள் ,காதோலை கருக மணி போட இந்தப் பெட்டி தான் பயன்படுத்துகிறார். (வீட்டில் இருக்கும் பெண்ணடி தெய்வத்தை நினைத்து வணங்க இந்தக் காதோலைக் கருகமணி தான் )

    கருப்பட்டி ,வெல்லம் இதில் வைத்து விற்றுப் பார்த்திருக்கிருக்கிறேன். (கருப்பட்டி நினைச்சாலே நாக்கில் எச்சில் ஊறுது .கருப்பட்டி காப்பி குடித்தவர்கள் பாக்கியவான்கள் 🙂 )

    குருத்தோலை ஞாயிறு என கிறித்துவர்கள் கொண்டாடுவார்கள்.

    தென்னங்குருத்து ,குருத்தோலை தென்னை மரத்திற்கும் உண்டு. கல்யாண  வீடுகளில் மாவிலையோடு சேர்த்து தோரணமாய்ப் போடுவது இந்தக் குருத்தோலையைத் தான் . மதுரையில் தென்னங்குருத்து என்றே தள்ளுவண்டியில் இன்னமும் விற்கின்றார்கள்.உடல் நலத்திற்கு நல்லது எனக் கேள்விப் பட்டு வாங்கிச் சாப்பிட்டதுண்டு.ருசியாகவே இருக்கும். நல்ல காரியங்களுக்கு இந்தத் குருத்தோலை தவறாமல் கிராமத்தில் இடம் பெறும் .பல கிராமப்புற சினிமா திருவிழாப் பாடல்களில் அதை நீங்கள் காணலாம் .(மதுரை மரிக் கொழுந்து வாசம் பாடலில் கூட ஆரம்பத்தில் காட்டுவாங்க) கிராமங்களில் காட்டு வேலை செய்பவர்கள் மரக் கிளையில் தொட்டில் கட்டி பிள்ளைகளை உறங்க வைப்பார்கள். (அதெல்லாம் ஒரு காலம் ) ..

    எனக்குத் தெரிந்து குரல் வளம் நன்றாக இருக்கிறதோ இல்லையோ ஒரு ஆராரோ ஆரிரரோ தாலாட்டுக்கு மயங்காத பிள்ளைகள் இல்லை. எனக்குத் தெரிந்த ஒரே தாலாட்டு ஜோ ஜோ 🙂 என் அண்ணன் பிள்ளைகளை கட்டுப் படுத்தும் மந்திரம் இது:) தாலாட்டு குழந்தைக்கு மிகவும் நல்லது என்று ஆராய்ச்சியில் கண்டுபிடிச்சிருக்காங்க .தாலாட்டு புரியாவிடிலும் நமக்கு வேண்டியவர்கள் நமக்கு மிக அருகாமையில் தான் இருக்கிறார்கள் என்ற பாதுகாப்பையும் ஆசுவாசத்தையும் குழந்தைக்குத் தரும் என்று அவதானிக்கிறேன். எவருமில்லாத அமைதியான சூழலில் அழும் குழந்தை அதை உறுதிப் படுத்தும்.குரல் கேட்டதும் குழந்தை இயல்பாகி மீண்டும் உறங்க ஆரம்பிக்கும்.

    இப்படியாக இந்தப் பாடல் பல நினைவுகளைக் கிளறி விட்டுவிட்டது .இந்தப் பாடலில் உள்ள ஒரே உறுத்தல் அவ்ளோ பெரிய அம்மணி நக்மாவை குழந்தையா  நினைச்சு தொட்டிலில் போட்டு ஆட்டுவதுதான். காதலுக்குக் கண்ணில்லைன்னு சும்மாவா சொன்னாங்க :))

    சில படங்கள்:

    1. குருத்தோலைப் பெட்டி:

    petti

    2. பனை ஓலைக் கிளுக்கு:
    petti

    3. தென்னங்குருத்து

    Thennanguruthu (2)

    4. பாடலின் வீடியோ:

    http://www.youtube.com/watch?v=LO6Vllv85Rk

    உமா கிருஷ்ணமூர்த்தி

    தென் மதுரைச் சீமையைச் சேர்ந்தவர். ட்விட்டரில் பெரியாள். தன்னுடைய வலைப்பதிவுக்கு (http://umakrishhonline.blogspot.in/) ”நிச்சயம் புரட்சிப்பெண் அல்ல, மனித கூட்டங்களின் நடுவே எனக்கென்று ஒரு அடையாளத்தை மட்டுமே விரும்புகின்றேன்” என்று Tagline வைத்திருக்கிறார்.

    ”வேற எதாவது சொல்லுங்க” என்றால் இப்படிப் பதில் வருகிறது: “மண் சட்டியில் சோறு ஆக்கி விளையாடுவது பிடிக்கும். பல்லாங்குழி வீட்டில் வைத்து இருக்கிறேன். மழை நின்றபிறகு மரத்தில் உள்ள நீரை உதிர்த்து விளையாடுவது பிடிக்கும். ஆற்று மணலில் வீடு கட்டி விளையாடுவது பிடிக்கும்”

     
    • amas32 11:16 pm on November 16, 2013 Permalink | Reply

      படங்களுடன் பதிவு ரொம்பவும் அழகு 🙂 எனக்கும் இந்தப் பாடல் ரொம்பப் பிடிக்கும். தென்னங்குருத்து ஓலை எல்லாவித மங்கள நிகழ்சிகளுக்கும் ஒரு கட்டாயம். கிராமப்புறத்து வாழ்க்கையை நினைவு படுத்துகிறது இந்தப் பாடல் 🙂

      amas32

    • pvramaswamy 11:20 pm on November 16, 2013 Permalink | Reply

      நன்றாக இருக்கிறது.

      மார்ஜினில் ஏதாவது கோளாறா? ஒவ்வொரு வரியிலும், கடைசி/முதல் எழுத்துகள் காணவில்லை!

  • என். சொக்கன் 9:27 pm on November 10, 2013 Permalink | Reply  

    விருந்தினர் பதிவு: போதை மயக்கம் 

    இன்றைய இளையதலைமுறையினரை மிகவும் பாதித்திருக்கும் கொடிய பழக்கம் போதைப்பழக்கம்.நாட்டில் பல சமூகவிரோத செயல்கள்,விபத்துக்கள் நடப்பதற்கு காரணம் மது மற்றும் இன்ன பிற போதைப் பழக்கங்களே.பலரின் உடல்நலம் கெடுவது மட்டுமல்லாமல் பலரின் திறமைகள் மங்கிப் போவதற்கு காரணமும் இதுவே.சமீபத்தில் ஒரு விழாவில் பேசிய கவிஞர் வைரமுத்து அவர்கள் “இளம் இயக்குனர்களே “மது”என்பது மதுரை என்ற வார்த்தையில் இருக்கட்டும்-உங்கள் வாழ்க்கையில் வேண்டாம்” என்று அறிவுறுத்தியுள்ளார்

    “உட்கப்படா அற் ஒளியிழப்பர்-எஞ்ஞான்றும் கட்காதல் கொண்டொழுகுவார்” என்று வள்ளுவரும் கள்ளுண்ணாமை குறித்து குறள்  எழுதியுள்ளார். தமிழ் சினிமாவில் இதை பற்றிய மூன்று முக்கியமான பாடல்கள்-

    கவிஞர் வாலி எழுதிய வரிகள்- “மானைப்போல் மானம் என்றாய்,நடையில் மதயானை நீயே என்றாய்,வேங்கை போல் வீரம் என்றாய் அறிவில் உயர்வாகச் சொல்லிக்கொண்டாய்-மதுவால் விலங்கினும் கீழாய் நின்றாய்” -தைரியமாக சொல் நீ மனிதன் தானா-இல்லை நீ தான் ஒரு மிருகம்-இந்த மதுவில் விழும் நேரம்…என மது அருந்திய ஒருவனை பார்த்து பாடப்படுவதாக அருமையாக எழுதியிருப்பார்.

    இரண்டாவதாக வாலியின் இன்னொரு பாடல்-

    “நல்ல மனுஷன் சாராயத்தை தொட்டதுமில்லை-அது தொட்டவனை லேசில தான் விட்டதுமில்லை-மனுஷனோட ரத்தத்தை தான் அட்டை குடிக்கும் ஆனா மனைவி மக்கள் குடும்பத்தையே பட்டை குடிக்கும்-“குடிக்காதே தம்பி குடிக்காதே-நீ குடிச்சிருந்தா ஊருலகம் மதிக்காதே,உன் வீட்டை ஒரு கழுதை கூட மிதிக்காதே” என மிக எளிமையாக குடியின் தீமைகளை எடுத்து கூறியிருப்பார்.

    மூன்றாவது பாடல்-கவிஞர் வைரமுத்து எழுதிய பாடல்-” ஒரு நாள் சுவைப்போம் என்று நினைத்தால் உயிரை சுவைக்கும்-பொய்யில்லை என போதைப் பழக்கத்தின் கேட்டைக் கூறி

    “மயக்கம் என்பது மாத்திரையா-மரணம் போகும் யாத்திரையா

    விளக்கு இருந்தும் இருட்டறையா -விடிந்த பின்னும் நித்திரையா

    வரம்பு கடந்து நரம்பு தளர்ந்து வயதை தொலைத்து வாழுவதா?

    இந்த உலகம் உன்னை அழைக்கிறது-அட இன்னும் வாழ்க்கை இருக்கிறது

    ஒரு பண்பாடு இல்லையென்றால் பாரதம் இல்லை-நாம் பண்போடு வாழ்ந்திருந்தால் பாவமும் இல்லை” என போதை பழக்கதிலிருந்து இளைஞர்கள் மீள்வதற்காக அற்புதமாக எழுதியிருப்பார்.

     

    பதிவில் இடம்பெற்ற பாடல்கள்-

    பாடல்:          தைரியமாக சொல் நீ மனிதன் தானா

    படம்:             ஒளிவிளக்கு

    எழுதியவர்:  கவிஞர் வாலி

    இசை :           M.S.விஸ்வநாதன்

    பாடியவர்:    T.M. சௌந்தர்ராஜன்.

    சுட்டி:            http://youtu.be/zwOSls9qlqY

     

    பாடல்:            குடிக்காதே தம்பி குடிக்காதே

    படம்:                நான் குடித்துக்கொண்டே இருப்பேன்

    எழுதியவர்:    கவிஞர்  வாலி.

    இசை:              M.S.விஸ்வநாதன்

    பாடியவர்:     T .M.சௌந்தரராஜன்

    சுட்டி:               கிடைக்கவில்லை.

     

    பாடல்:             ஒரு பண்பாடு இல்லையென்றால்

    படம்:                ராஜா சின்ன ரோஜா

    எழுதியவர்:    கவிஞர் வைரமுத்து

    இசை:               சந்திரபோஸ்

    பாடியவர்:       கே.ஜே.யேசுதாஸ்.

    சுட்டி:                http://youtu.be/2rcTcGv08NM

    நா. ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன். ட்விட்டர் முகவரி: http://twitter.com/rajinirams

     
    • Uma Chelvan 3:19 am on November 11, 2013 Permalink | Reply

      மிகவும் அருமையான போஸ்ட் !!!

      புகழிலும் போதை இல்லையோ.-பிள்ளை
      மழலையில் போதை இல்லையோ
      காதலில் போதை இல்லையோ- நெஞ்சில்
      கருணையில் போதை இல்லையோ.

      நீ நினைக்கும் போதை வரும் நன்மை செய்து பார் ,
      நிம்மதியை தேடி நின்றால் உண்மை சொல்லி பாரு !!

      இவ்வ்வளவு விசயங்களில் போதை இருக்கும் பொழுது தனியாக வேறு போதை எதற்கு ??

    • amas32 6:27 pm on November 11, 2013 Permalink | Reply

      போதை பொருட்களை விற்பவர்கள் அதை உட்கொள்ள மாட்டார்கள். அதன் தீமை அவர்களுக்குத் தெரியும். ஆனால் அதை விற்பதில் வியாபரத் தன்மையே ஓங்கி நிற்கும். மனசாட்சி இடிக்காது. இது உலக நாடுகள் அனைத்துக்கும் பொருந்தும். கஞ்சா பயிரிட்டு விற்பவன் அதை பயன்படுத்த மாட்டான்.

      ஆனால் நாடு இன்று போதை மயக்கத்தில் பாழாகிக் கொண்டிருக்கிறது. முன்பெல்லாம் MGR போன்ற நடிகர்களின் ரசிகர்கள் அவரை தெய்வமாகக் கொண்டாடியதால் அவர் சொல்வதை வேத வாக்காக எடுத்துக் கொண்டு அவர்அறிவுரையை ஏற்பர். இன்றும் நடிகர்கள் மீது அதே கிரேஸ் உள்ளது. ஆனால் நடிகர்கள் போதிப்பதில்லை.தங்கள் பாட்டைப் பார்த்துக் கொண்டு செல்கின்றனர்.

      அரசாங்கமே குடியை தேசிய பாஸ் டைமாக மாற்றிக் கொண்டிருக்கும்போது சாமான்ய மனிதன் என்ன செய்ய முடியும்.

      கடவுள் தான் காப்பாற்ற வேண்டும்.

      அருமையானப் பதிவு, வாழ்த்துகள் 🙂

    • Raja ram 7:22 pm on November 11, 2013 Permalink | Reply

      அருமையான பதிவு.

    • rajinirams 9:56 am on November 12, 2013 Permalink | Reply

      Uma Chelvan amas32 Raja ram தங்களின் கருத்துக்களுக்கு மிக்க நன்றி.

    • swaminathan 4:13 pm on March 1, 2015 Permalink | Reply

      nice

  • என். சொக்கன் 9:23 pm on November 10, 2013 Permalink | Reply  

    விருந்தினர் பதிவு: இரட்டைப் பிறவிகள் 

    தாமரை இலை-நீர் நீதானா?
    தனியொரு அன்றில் நீதானா?|
    புயல் தரும் தென்றல் நீதானா?
    புதையல் நீதானா?
     
    பாடல்: கருகரு விழிகளால்
    படம்: பச்சைக்கிளி முத்துச்சரம்
    இசை: ஹாரிஸ் ஜெயராஜ்
    பாடலாசிரியர்: தாமரை
    பாடியவர்: கார்த்திக்
     
    தலைவன் தலைவியை மையப்படுத்தி எண்ணற்ற சங்ககாலப் பாடல்கள் வந்திருக்கும். சில திரைப்பாடல்களிலும் உவமையாக அவ்வப்போது தலை காட்டுவது வழக்கம். தாமரை இலை-நீர் என்பது பெரும்பாலும் அனைவருக்கும் தெரிந்த உவமை. (ஒட்டியும்-ஒட்டாமலும்)

    தனியொரு அன்றில் என்றால்?

    இதற்கும் சங்கப் பாடல்களில் குறிப்புகள் உள்ளன. அன்றில் என்பது ஓருடல்-இருதலையாக வாழும் பறவை என்று பஞ்சதந்திரக்கதைகளிலும் குறிப்பிடப்பட்டுள்ளது. ஆனால் சங்ககாலப் பாடல்களில், இணைபிரியாதிருக்கக் கூடிய பறவைகள் என்கிற அர்த்தத்தில் (இரண்டில் ஒன்று இறந்தால், மற்றொன்று(ம்) இறக்கும். அல்லது சோகத்தோடு வாழும் ) பாடல்கள் உள்ளன.

    அன்றில் போல் ‘புன்கண் வாழ்க்கை’ வாழேன்  (நற்றிணை-124 | மோசிகண்ணத்தனார்)

    கவிஞர் வைரமுத்து கூட, ஒரு பாடலில் (கண்ணோடு காண்பதெல்லாம்/ஜீன்ஸ்/ ஏ.ஆர்.ரஹ்மான்)
    “அன்றில் பறவை ரெட்டைப்பிறவி
    ஒன்றில் ஒன்றாய் வாழும் பிறவி
    பிரியாதே..விட்டுப்பிரியாதே”
    என்று எழுதியிருக்கிறார்.
    சாத்தியமோ, இல்லையோ ஆனால் (இணை) பிரியாத வரம் வேண்டும்தானே?
    தமிழ்

    நான் தமிழ். @iamthamizh என்கிற பெயரில் ட்விட்டரில் எழுதுகிறேன்.

    பயணப்படுதலும் அதன் சுவாரசியங்களும் மிகப் பிடிக்கும். பயணப்படுதலின் பொருட்டு பாடல்கள் கேட்கத் துவங்கிய இப்போது அவை குறித்து எழுதியும் வருகிறேன்.

    பார்க்க:

    thamizhg.wordpress.com

    isaipaa.wordpress.com

     
    • rajinirams 10:14 am on November 11, 2013 Permalink | Reply

      சங்கப்பாடல்,திரைப்பாடல் கொண்டு “அன்றில் பறவை”யின் சிறப்பை விளக்கிய அருமையான பதிவு-வாழ்த்துக்கள் “தமிழ்”.

    • amas32 7:18 pm on November 11, 2013 Permalink | Reply

      “அன்றில் பறவை” பாட்டில் கேட்டிருந்தும் கவனித்து அர்த்தம் யோசித்ததில்லை. நல்ல ர்டுத்துக்காட்டுக்களுடன் விளக்கி உள்ளீர்கள் 🙂

      சங்க இலக்கியங்களில் தான் எவ்வளவு இருக்கின்றன! படித்துப் புரிந்து கொள்ள நேரம் ஒதுக்க வேண்டும்.

      நன்றி

      amas32

  • என். சொக்கன் 8:53 pm on October 22, 2013 Permalink | Reply  

    விருந்தினர் பதிவு: சிரித்து வாழவேண்டும் 

    வாய் விட்டு சிரிச்சா நோய் விட்டு போகும் என்றார் கலைவாணர் என்.எஸ்.கிருஷ்ணன்.மனிதன் ஒருவன்தான் சிரிக்க தெரிந்தவன்,சிரித்து  கவலையை மறக்க தெரிந்தவன்,சிரியுங்கள் மனிதர்களே,இதை விட மருந்தில்லை வாழ்க்கையிலே என்று அமரகாவியம் படத்தில் பாடல் எழுதியவர் கவியரசர் கண்ணதாசன்.சிரிப்பில் உண்டாகும் ராகத்திலே பிறக்கும் சங்கீதமே என்ற கவியரசரின் வார்த்தைக்கு இசையோடு சிரிப்பை இணைத்து ரசிக்க வைத்தவர் மெல்லிசை மன்னர் எம்.எஸ்.வி.வாய் விட்டு சிரிப்பது மன அழுத்ததை குறைக்கும் என்பதால் கோபபடும் போது கூட சிரிப்பது போல வசூல்ராஜா படத்தில் பிரகாஷ்ராஜ் கதாபாத்திரத்தை நகைச்சுவையாக காட்டியிருப்பார்கள்.சிரித்து சிரித்து என்னை சிறையிலிட்டாய்,பொம்பளை சிரிச்சா போச்சு,சிரித்தாலும் போதுமே,ஆணவ சிரிப்பு ஆனந்த சிரிப்பு என்று பல சிரிப்பு பாடல்கள் இருந்தாலும் இந்த மூன்று பாடல்கள் மனம் கவரும் வகையில் அமைந்தவை. தமிழ் பாடல் உலகின் மூவேந்தர்கள் எழுதியவை.மூன்றுமே வித்தியாசமான சூழல் அமைந்தவை.

    இவரும் வசூல்ராஜா பிரகாஷ்ராஜ் போல “நல்ல மனிதர் போர்வையில் சிலர் செய்யும் அநியாயங்களை பட்டியலிட்டு மனம் நொந்து” சிரித்து பாடுவதாக அமைந்தது-

    “மேடையேறி பேசும்போது ஆறு போல பேசு-கீழ இறங்கி போகும்போது சொன்னதெல்லாம் போச்சு-உள்ள பணத்தை பூட்டி வெச்சு வள்ளல் வேஷம் போடு,ஒளிஞ்சு மறைஞ்சு ஆட்டம் போட்டு உத்தமன் போல் பேசு நல்லகணக்கை மாத்தி கள்ளகணக்கை ஏத்தி நல்ல நேரம் பார்த்து நண்பனை ஏமாத்து”…சிரிப்பு வருது சிரிப்பு வருது”சின்ன மனுஷன் பெரிய மனுஷன் செயலை பார்த்து சிரிப்பு வருது…..என்று அருமையாக எழுதியிருப்பார் கவியரசர்.

    அடுத்து சில தீயவர்களால் மிரட்டப்பட்டு சிரிப்பையே தொலைத்திருந்த தன் தங்கை அச்சத்தை விட்டு சிரிக்கும்போது ஒரு அண்ணன் மனமகிழ்ந்து பாடும் பாடல் –

    “வசந்தம் சிரித்தாலே வண்ண தேன் பூ மலரும்,வைகை சிரித்தாலே மதுரை வாழ்வு பெறும்

    அம்பிகை சிரித்தாலேஆலயம்அழகொளிரும் -அம்மமா நீ சிரித்தால் அண்ணனின் மனம் குளிரும்”- என்று உவமையோடு கலக்கியிருப்பார் கவிஞர் வாலி-தங்கச்சி சிரித்தாளே செவ்விதழ் விரித்தாளே-மல்லிகை சிரிப்பாலே மௌனம் கலைத்தாளே….

    இன்னொரு வகையான பாடல் -“கலகலவென சிரி கண்ணில் நீர் வர சிரி -சிரிக்க தெரிந்த மிருகத்திற்கு மனிதன் என்று பெயர்,சிரிக்க மறந்த மனிதனுக்கு மிருகம் என்று பெயர் ” என்று ஒரு சிறிய விழாவில் நகைச்சுவை பரிமாற்றமாக அமைந்த பாடல்-பாக்கு மாற்றி கொள்வது போல ஜோக்கு மாற்றி கொள்வோமே,சிரி சிரி சிரி சிரி… என்று வித்தியாசமாக அமைந்த கவிஞர் வைரமுத்துவின் சிரிப்பு பாடல்.

    என்ன…கவலைகளை கொஞ்சம் ஒதுக்கி நாமும் சிரித்து மகிழ்வோமே ….

    பதிவில் இடம் பெற்ற பாடல்கள்:

    பாடல்-சிரிப்பு வருது சிரிப்பு வருது

    படம்-ஆண்டவன் கட்டளை

    எழுதியவர்-கவியரசர் கண்ணதாசன்

    பாடியவர்-சந்திரபாபு

    இசை-விஸ்வநாதன் ராமமூர்த்தி

    பாடலின் சுட்டி- http://youtu.be/54qGTIOkuww

    பாடல்-தங்கச்சி சிரித்தாளே

    படம்-சிவப்பு சூரியன்

    எழுதியவர்-கவிஞர் வாலி

    பாடியவர்-மலேஷியா வாசுதேவன்

    இசை-எம்.எஸ்.விஸ்வநாதன்

    பாடலின் சுட்டி- http://youtu.be/QML2Nn-fhy0

    பாடல்-சிரி சிரி சிரி சிரி

    படம்-ஆளவந்தான்

    எழுதியவர்-கவிஞர் வைரமுத்து

    பாடியவர்கள்-கமலஹாசன்,மகாலக்ஷ்மி ஐயர்

    இசை-ஷங்கர் இஷான் லாய்

    பாடலின் சுட்டி –  http://youtu.be/PySy84R-DDo

    நா. ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன். ட்விட்டர் முகவரி: http://twitter.com/rajinirams

     
    • amas32 10:41 pm on October 22, 2013 Permalink | Reply

      அங்கே சிரிப்பவர்கள் சிரிக்கட்டும் அது ஆணவ சிரிப்பு, இங்கே நீ சிரிக்கும் புன்சிரிப்போ ஆனந்த சிரிப்பு. இதுவும் ஒரு அருமையான் பாடல். ரிக்சாக்காரன் படத்தில் குழந்தையைப் பார்த்து MGR பாடும் பாடல். இந்தப் பாடலில் அனைத்து வரிகளும் அருமை.

      ஆளவந்தான் படப் பாடல், சிரி சிரி சிரி சிரி ஒரு வித்தியாசமானப் பாடல், எனக்கு ரொம்பவும் பிடிக்கும் 🙂

      நல்ல பதிவு, எப்பொழுதும் போல 😉

      amas32

      • rajinirams 9:37 am on October 23, 2013 Permalink | Reply

        மிக்க நன்றி amas32

    • Uma Chelvan 12:25 am on October 23, 2013 Permalink | Reply

      மார்கழி பனி போல் உடை அணிந்து
      செம்மாதுளம் கனி போல் இதழ் கனிந்து

      சிரித்தால் தங்க பதுமை..
      அட அட என்ன புதுமை …….very beautiful and a very very beautiful post!!!

      • rajinirams 9:37 am on October 23, 2013 Permalink | Reply

        Uma Chelvan மிக்க நன்றி

    • மின்னல்சுதா (@sweetsudha1) 1:12 pm on October 23, 2013 Permalink | Reply

      அருமையான பதிவு !! தகுந்த பாடல்களை மேற்கோளிட்டு காட்டியிருந்தது பதிவுக்கு அழகு சேர்த்தது !! இன்னும் நிறைய எழுதவும் !!

      • rajinirams 10:05 pm on October 23, 2013 Permalink | Reply

        மிக்க நன்றி

  • என். சொக்கன் 4:32 pm on September 26, 2013 Permalink | Reply  

    விருந்தினர் பதிவு: காதல் மயக்கம் 

    காதலை பற்றி பல்வேறு கவிஞர்கள் பலவிதமாக பாடியிருக்கிறார்கள் –

    உலகமெங்கும் ஒரே மொழி,உண்மை பேசும் காதல் மொழி-கவியரசர் கண்ணதாசன்.

    காதல் எனும் தேர்வெழுதி  என்று தேர்வுக்கு ஒப்பாக எழுதியவர் காவியக்கவிஞர் வாலி.

    காதலித்துப் பார்-உன்னை சுற்றி ஒளி வட்டம் தோன்றும்,உனக்கும் கவிதை வரும் என்று கவிதை எழுதியவர் கவிப் பேரரசு வைரமுத்து.

    திரைப்படங்களில் காதல் வயப்பட்டவர்களின் சிந்தனையை நம் கவிஞர்கள் தங்கள் கற்பனையில் வெளிப்படுத்தும் விதம் அலாதியானது.இந்த வகையில் ஆயிரக்கணக்கான பாடல்கள் இருந்தாலும் எனக்கு உடனே தோன்றியது இந்த மூன்று பாடல்கள். உணவிருந்தாலும் உண்பதற்கு மனமிருக்காது பசியுமிராது என்பதை எளிமையாக கூறும் பாலிருக்கும் பழமிருக்கும் பாடல்.  

    “கட்டவிழ்ந்த கண்ணிரண்டும் உங்களை தேடும்,பாதி கனவு வந்து மறுபடியும் கண்களை மூடும் என்று” தன் நிலையை எடுத்துசொல்வது மட்டுமல்லாமல்  

                                  “காதலுக்கு ஜாதியில்லை மதமுமில்லையே,

                                    கண்கள் பேசும் வார்த்தையிலே பேதமில்லையே 

                                     வேதமெல்லாம் காதலையே மறுப்பதில்லையே “என்று காதலுக்கு வக்காலத்து வாங்கும் கவியரசரின் வரிகள் நிறைந்த பாடல் 

                                    பாடல்:பாலிருக்கும் பழமிருக்கும் பசியிருக்காது 

                                     படம்- பாவ மன்னிப்பு 

                                      இயற்றியவர்-கவியரசர் கண்ணதாசன் 

                                     பாடியவர்:பி.சுசிலா 

                                       இசை-விஸ்வநாதன் ராமமூர்த்தி 

    இரண்டாவது பாடல்-தன் இதயம் தொலைந்து போனதாக கூறும் “என்னவளே” பாடல்:-காதலென்றால் பெரும் அவஸ்தையென்று உன்னை கண்டதும் கண்டு கொண்டேன்-கழுத்து வரை எந்தன் காதல் வந்து இரு கண்விழி பிதுங்கி நின்றேன்.”வாய்மொழியும் எந்தன் தாய்மொழியும் வசப்படவில்லையடி 

                                                   வயிற்றுக்கும் தொண்டைக்கும் உருவமில்லாதொரு உருண்டையும் 

                                                    உருளுதடி, என்றும்  ,காதலுக்கு காத்திருக்கும் தருணத்தை-“காத்திருந்தால் எதிர்பார்த்திருந்தால் ஒரு நிமிஷமும் வருஷமடி” என்று தன் உணர்வுகளை அற்புதமாக வெளிப்படுத்தியிருக்கிறார்.”

                                                                    பாடல்-என்னவளே அடி என்னவளே 

                                                                     படம்-காதலன் 

                                                                     இயற்றியவர்-கவிப்பேரரசு வைரமுத்து 

                                                                      பாடியவர்-உன்னிகிருஷ்ணன் 

                                                                       இசை-ஏ.ஆர்.ரகுமான்.

    மூன்றாவது பாடல் : “விழிகளின் அருகினில் வானம்-தொலைவினில் தொலைவினில் தூக்கம்,இது ஐந்து புலன்களின் ஏக்கம்,என் முதல் முறை அனுபவம்.”தன்னாலும் பேச முடியவில்லை,பிறர் கேட்பதும் தன் காதில் விழவில்லை,என்ற விக்கித்து நிற்கும் நிலையை வெளிப்படுத்தும் வார்த்தை வரிகள் 

    “கேட்காத ஓசைகள்,இதழ் தாண்டாத வார்த்தைகள்,இமை மூடாத பார்வைகள்-இவை நான் கொண்ட மாற்றங்கள்” அருமை.மேலும் “பசி நீர் தூக்கம் இல்லாமல் உயிர் வாழ்கின்ற மாற்றங்கள்” என்று அதிசயித்து  “இருதயமே துடிக்கிறதா-துடிப்பது போல் நடிக்கிறதா”என்று வெளிப்படுத்தும் விதம் அபாரம்.

                                                                 பாடல்-விழிகளின் அருகினில் வானம் 

                                                                  படம்-அழகிய தீயே 

                                                                 இயற்றியவர்-கவிவர்மன் 

                                                                  இசையமைத்து பாடியவர்-ரமேஷ் விநாயகம்.

            பாடல்களுக்கான சுட்டிகள்:

                     பாலிருக்கும் பழமிருக்கும் –      http://youtu.be/xqofnfgytws

                      என்னவளே அடி என்னவளே:   http://youtu.be/tvZi0fd_1IY

                     விழிகளின் அருகினில் வானம்: http://youtu.be/nb_v7W4HfCw

    பின்குறிப்பு: “விழிகளின் அருகினில் வானம்”பாடலை எழுதிய கவிவர்மன், என் சொந்த அண்ணன்!

    நா. ராமச்சந்திரன்

    பிறந்தது கடலூர், என்றாலும் வளர்ந்ததெல்லாம் சிங்காரச் சென்னைதான். ஒரு தனியார் நிறுவனத்தில் பணி. தற்போது பெங்களுரில் வசிக்கிறேன்.

     
    • Uma Chelvan 8:55 pm on September 26, 2013 Permalink | Reply

      Very nice post on ” Kadhal” As mokrish asked ” இன்னக்கு என்ன காதலர் தினமா”. முடிவே இல்லாத அளவுக்கு இந்த topic li பாடல்கள் உண்டு.

      என்னாளும் வாழ்விலே கண்ணான காதலே
      என்னென்ன மாற்றமெல்லாம் காட்டுகின்றாய் ஆசை நெஞ்சிலே

      கண்ணானால் நான் இமையாவேன்
      காற்றானால் நான் கொடியாவேன்
      மண்ணென்றால் நான் மரமாவேன்
      மரமென்றால் நான் தளிராவேன் ………

      ..சுகராகமே என் சுகபோகம் நீயே
      கண்ணே கலைமானே கதை பேச வருவாயோ
      அன்பே அனல் வீசும் விழி வாசல் குளிராதோ……….and so on and on and on……….

      The movie ” அழகிய தீயே” is a wonderful movie and the song is very beautiful too. It’s Nice to know that your own brother penned that song.!!!

    • rajinirams 11:21 pm on September 27, 2013 Permalink | Reply

      நன்றி umachelvan

    • amas32 4:18 pm on September 29, 2013 Permalink | Reply

      அருமையான பதிவு ரஜினிராம் 🙂 மற்ற எந்த உணர்வையும் பிறருக்கு விளக்கிச் சொல்ல வேண்டும், காதலை எவர்க்கும் விளக்க வேண்டாம். வாழ்வில் ஒரு முறையேனும் அதை அனுபவித்து இருப்பார். மேலும் அந்த உணர்வு செய்யும் தாக்கம் என்றும் நம் நெஞ்சத்தை விட்டு அகலாது, காதலில் ஜெயிக்கவில்லை என்றாலும்.

      காதல் பாட்டுக்கள் ஏராளம். அதில் அழகான மூன்று செய்துள்ளீர்கள். விழிகளின் அருகினில் வானம், என் மனதுக்கு அருகினில் இருக்கும் ஒரு பாடல் 🙂

      amas32

    • rajinirams 7:58 pm on September 29, 2013 Permalink | Reply

      amas32 மிக்க நன்றி-அருமையான பின்னூட்டம்.

  • என். சொக்கன் 9:30 pm on September 18, 2013 Permalink | Reply  

    விருந்தினர் பதிவு: பூச்சரமே 

    சாதி மல்லிப் பூச்சரமே ..சங்கத் தமிழ்ப் பாச்சரமே ஆசையின்னா ஆசையடி அவ்வளவு ஆசையடி ”

    சிறு வயதில் பாரதிதாசன் பற்றி பாட நூலில் படித்த பொழுது ஒரு பெண் எப்படி எல்லாம் இருக்கக் கூடாது என்று “இருண்ட வீடு” கதையிலும் எப்படி இருக்க வேண்டும் என்று “குடும்ப விளக்கு ” கதையிலும் ொல்லி இருப்பார் என்று தேர்வு நிமித்தம் படித்ததோடு சரி . அதன் பிறகு அதனை மறந்தே போனேன்.

    கணவருக்கு ஊட்டி விடுவது பற்றி @amas32 ஒரு ட்வீட் போட நான் பதிலுக்கு அப்படி ஒரு கற்பனை செய்து பார்த்தேன் என்று கிண்டலடிக்கவும் @nchokkan நீங்கள் பாரதிதாசனின் குடும்ப விளக்கு படியுங்கள் என்று காரணம் சொல்லாமல் ிங்க் கொடுத்துவிட்டுப் போய்விட்டார் .சரி என்று படித்துக் கொண்டிருக்கும் பொழுதே “குடும்ப விளக்கு” க்குத் தக்கவாறு இந்தப் பாடல் வெகுவாகப் பொருந்திப் போவதை உணர்ந்தேன். ஒருவேளை அவர் இப்பொழுது எழுதி இருந்தால் பெண்ணீய வாதிகள் எவரேனும் சண்டைக்கு வந்தாலும் வரலாம் 🙂 ஆனால் இப்பொழுது படித்தாலும் இனிக்கவே செய்கிறது 🙂

    ஆணோ , பெண்ணோ இருவரும் அன்புக்குக் கட்டுப்பட்டு அடிமைத் தனத்தை விரும்பி ஏற்கும் பொழுது ஆணாதிக்கம் பெண்ணீயம் அனைத்தும் ஒரு புள்ளியில் மறைந்தே போகின்றது .

    “குடும்ப விளக்கில்”பகல் முழுக்க அவள் செய்யும் வேலைகள் அவள் குடும்பம் நடத்தும் பாங்கு என்று விவரித்து விட்டு சின்னச் சின்ன அன்புப் பரிமாற்றங்களையும் சொல்லி விட்டு இரவு நேரத்தில் ஓர் அறைக்குள் நாயகனும் நாயகியும் இணைந்து நிற்கும் தருணம் , சற்றே ஆர்வக்கோளாறில் நாற்காலியை இழுத்துப் போட்டு சீட்டின் நுனியில் அமர்கிறேன் அடுத்து என்ன சொல்லப் போகிறாரோ என்று 🙂

    ஆனால் நாயகி கவலையுடன் நாட்டுக்கு என்ன செய்தோம் என்ற பேச்சை ஆரம்பிக்கிறாள் இந்தக் காட்சியின் அடிப்படையில் சற்றே உல்டாவாக , தலைவன் தலைவிக்கு சொல்லும் விதமாக கவிஞர் புலமைப் பித்தன் வெகு அழகாகஎழுதியுள்ள பாடலே இது .

    ​எனக்கு இது மறக்க முடியாத பாடலாகிப் போனதற்கு காரணம் ஒன்று உண்டு ​.கல்லூரியில் பாட்டுப் போட்டியில் தோழிக்கு இந்தப் பாடலைப் பரிந்துரை செய்திருந்தேன். அவளும் சரி என்று சொல்லி விட்டு அங்கே பாடறியேன் படிப்பறியேன் பாடி விட்டாள் .மைக் முன்பு அவள் நிற்கும் வரை பாடலை மாற்றுவதைப் பற்றி அவள் சொல்லவே இல்லை. அதிலே ஒரு வருத்தம் அவள் மீது. அதனால் பாடலைக் கேட்கும் பொழுது அந்த நினைவுகளும் கோர்வையாக வந்து விழும் .

    “சாதி மல்லிப் பூச்சரமே ” முத்ல் வரியே தகராறாக ஒரு முறை விவாதித்தோம் ட்விட்டரில் 🙂 சாதி மல்லி என்பது பிச்சி என்று @anu_twits சொல்ல இல்லை இல்ல மல்லிகையில் உயர் தரம் வாய்ந்த மல்லிகை என்று நான் சொல்ல ஒரே பூ வாசனை டைம் லைனில் ஒரு மணி நேரத்திற்கும் மேல். இன்றுவரை பிச்சியை சாதி மல்லியாக நான் ஒத்துக் கொள்ளவே இல்லை போலவே அவரும் 🙂

    புதுப் புது அர்த்தங்களில் விளைந்த கருத்து வேறுபாடுக்குப் பிறகு ராஜாவும் பாலசந்தரும் கை கோர்க்கவே இல்லை .ராஜா ஜாம்பாவானாக வலம் வந்து கொண்டிருந்ததருணத்தில் துணிந்து வேறு ஒருவரை இசையமைப்பாளராகப் போட்டு பால சந்தர் எடுத்த ரிஸ்க்குக்கு தான் தகுதியானவன் என்று நிரூபித்து இருக்கிறார் மரகத மணி . பாடல்களெல்லாம் முத்துகள் . MSV யோ இளையராஜாவோ ,மரகதமணியோ ,AR ரகுமானோ தனக்குத் தேவையான பாடல்களைக் கறந்து விடுவதில் இயக்குநர் KB வல்லவர் என்றே அவரின் படங்களில் இடம்பெற்ற பாடல்கள் பறை சாற்றுகின்றன .

    இந்தப் பாடலுக்கான பின்னணி வெகு சுவ்ராசியம்.அதிலே பாரதிதாசனின் பாடலைப் புகுத்த வேண்டும் என்ற யோசனைக்காக இயக்குனருக்கு ஒரு ஷொட்டு. ஒருவர் ட்வீட் கூட RT ஆகி வந்தது இது போன்று சினிமாவில் புகுத்தப் பட்ட பாரதியார் பாரதிதாசன் பாடல்களை மட்டுமே பெரும்பாலோனோர் இதுவரை அறிந்திருக்கிறோம் என்று . .நிதர்சனமான உண்மை. ஆக சினிமா என்ற மாபெரும் ஊடகம் மூலமாக எடுத்துச் செ(சொ)ல்லப் படும் சேதிகள் தக்க வீரியத்தோடு மக்களைச் சென்றடையும்.அதனால் படத்திற்குத் தகுந்தாற்போல் மிகப் பொருத்தமாக உறுத்தாமல் KB உட்புகுத்தியதைப் போல வரும் தலைமுறை இயக்குனர்களும் செய்தால் நலம் .

    வெள்ளை &வெள்ளை கருப்புக் கண்ணாடியில் மம்முட்டி இன்னும் அழகுடன் மிளிர பாடலின் வீணை இடையிசைக்கெல்லாம் துள்ளலுடன் பானுவின் இடையும் அசைகிறது.தான் விரும்பிய் காதலன் தன் பெயரை உச்சரிக்க வேண்டும் என்று கண்மணி என்று மாற்றி எழுதுவதும் அதை வேறு ஒருவருக்குச் சமர்ப்பிப்பதில் அதிர்ந்தும் போவதுமாக கீதாவின் நடிப்பு கனகச்சிதம் .

    “எனது வீடு எனது வாழ்வு என்று வாழ்வது வாழ்க்கையா
    இருக்கும் நாலு சுவருக்குள்ளே வாழ நீ ஒரு கைதியா ”
    “யாதும் ஊரென யாரு சொன்னது சொல்லடி
    பாடும் நம் தமிழ்ப் பாட்டன் சொன்னது கண்மணி”

    யாதும் ஒரே யாவரும் கேளிர் எனச் சொன்னது கணியன் பூங்குன்றனார் ..பாரதிதாசனோடு அவரையும் உள்ளிழுத்து விட்டார் புலமைப் பித்தன்

    பாடல் ஆரம்பிப்பதுக்கு முன்பு அழகான உச்சரிப்போடு ஏற்ற இறக்கத்துடன் மம்முட்டி சொல்வதும் அழகு.உதாரணம் கன்னித் தமிழ் தொண்டாற்று அதை முன்னேற்று “பின்பு ” என்பதை நிறுத்திச் சொல்லி கட்டிலில் தாலாட்டு என்பார்.

    தனி ஒருவனுக்கு உணவில்லை எனில் ஜகத்தினை அழித்திடுவோம் என்ற பாரதியின் கொதிப்பினை நினைவூட்டும் விதமாக “உலகம் யாவும் உண்ணும் போது நாமும் சாப்பிட எண்ணுவோம் ” என்ற வரிகள் இருக்கின்றது .காதல் மொழி பேச வேண்டிய தருணத்தில் நாட்டைப் பற்றிக் கவலைப் பற்றி அக்கறைப் படுவது நமக்கு இந்த காலத்தில் மிகை தான் . குறைந்த பட்சம் இப்படி கற்பனையிலாவது நடக்க்கிறதே என்று எண்ணிக் கொள்ள வேண்டியதுதான் 🙂

    ஒரு இசைக்கு பானு சரிவான பகுதியில் சடசடவென ஆடிக்கொண்டே இறங்குவார் ..அந்த இசைக்கு அக்காட்சியமைப்பு அவ்வளவு பொருத்தம் . பொதுவாக ஒரு காரியம் ஆக வேண்டும் என்றால் என் செல்லம் இல்ல கண்மணி,ராசாத்திஎன்ற அழைப்புகள் சொல்லிக் காரியம் சாதிப்பதுண்டு தலைவனும் தலைவியை அவ்வாறே கொஞ்சி காரியம் சாதிக்கப் பார்க்கிறார் 🙂 “கேட்டுக்கோ ராசாத்தி தமிழ் நாடாச்சு இந்த நாட்டுக்கு நாமாச்சு ”

    வெறும் பாடலோடு நிறுத்தாம பாரதிதாசனின் அந்தக் கவிதையோடும் ,பின்னணிக் காட்சியோடு சேர்த்தே ரசிக்க ​
    http://www.youtube.com/watch?v=9G8e0uaWzLw

    உமா கிருஷ்ணமூர்த்தி

    தென் மதுரைச் சீமையைச் சேர்ந்தவர். ட்விட்டரில் பெரியாள். தன்னுடைய வலைப்பதிவுக்கு (http://umakrishhonline.blogspot.in/) ”நிச்சயம் புரட்சிப்பெண் அல்ல, மனித கூட்டங்களின் நடுவே எனக்கென்று ஒரு அடையாளத்தை மட்டுமே விரும்புகின்றேன்” என்று Tagline வைத்திருக்கிறார்.

    ”வேற எதாவது சொல்லுங்க” என்றால் இப்படிப் பதில் வருகிறது: “மண் சட்டியில் சோறு ஆக்கி விளையாடுவது பிடிக்கும். பல்லாங்குழி வீட்டில் வைத்து இருக்கிறேன். மழை நின்றபிறகு மரத்தில் உள்ள நீரை உதிர்த்து விளையாடுவது பிடிக்கும். ஆற்று மணலில் வீடு கட்டி விளையாடுவது பிடிக்கும்”

     
    • GiRa ஜிரா 9:41 pm on September 18, 2013 Permalink | Reply

      அட்டகாசம். உங்களை நாலு வரி நோட்டு எழுத வைத்த பாரதிதாசனுக்கும் புலமைப் பித்தனுக்கும் கனியன் பூங்குன்றனுக்கும் நன்றி. எழுதத் தூண்டிய நாகாவுக்கும் தான். 🙂

    • amas32 9:45 pm on September 18, 2013 Permalink | Reply

      உங்கள் குரலிலேயே முழுவதும் கேட்டு முடித்தேன். அப்படியே பேசுவதுபோல் உள்ளது உங்கள் எழுத்து 🙂

      அருமையாக எழுதியிருக்கிறீர்கள் என்று சொல்லவும் வேண்டுமோ?

      ஒரு பாடல் வெற்றிபெற வேண்டும் என்றால் பாடல் வரிகள், இசை, பாடகர்களின் தெளிவான உச்சரிப்பு, காட்சியமைப்பு, நடிகர்களின் பங்களிப்பு அனைத்தும் A 1 ஆக இருக்க வேண்டும். இந்தப் பாடல் அதற்கு ஒரு சான்று! எவ்வளவு தடவை பார்த்தாலும் அலுக்காது.

      சூப்பர் பதிவு உமா 🙂

      amas32

    • Uma Chelvan 3:00 am on September 19, 2013 Permalink | Reply

      Very Beautifully written Uma!

      ஏட்டிக்கு போட்டியாக பேசுவதும், ஆண்களை பொது வெளியில் அவமான படுத்துவதும் தான் “பெண்ணியம்” என்று இன்று பல பேர் நினைக்கிறாங்க! அதிகம் படித்தவர்களே இந்த தப்பை ரொம்ப பண்ணறாங்க !”தேவதாசி முறை இருக்கட்டும் ” என்று சொன்ன திரு.சத்திய மூர்த்தியிடம் ” அப்படி என்றால் உன் வீட்டு பெண்களை அனுப்பு இவர்களை விட்டு விடு” என்று சொன்ன Dr. .முத்து லக்ஷ்மி ரெட்டி அவங்க பேசுனது பெண்ணியம். து .இன்று மத்தவங்க பேசுறது எல்லாம் என்ன வென்று பேசுறவங்கதான் சொல்லணும் !!!!

      “ஆணோ , பெண்ணோ இருவரும் அன்புக்குக் கட்டுப்பட்டு அடிமைத் தனத்தை விரும்பி ஏற்கும் பொழுது ஆணாதிக்கம் பெண்ணீயம் அனைத்தும் ஒரு புள்ளியில் மறைந்தே போகின்றது …………………………அதுதான் அமைதிக்கும் நிம்மதிக்கும் வழி!!!

      காலடியில் விழுந்தது மட்டும் அல்லாமல் எழவும் முடியாமல் இருப்பதுவும் சிறப்புதான்!!

    • Uma Chelvan 3:19 am on September 19, 2013 Permalink | Reply

      Just 3 minutes video, watch and enjoy!!!!

    • umakrishh 7:59 am on September 19, 2013 Permalink | Reply

      மிக்க நன்றி ஜிரா 🙂 மிக்க நன்றி அம்மா 🙂 மிக்க நன்றி உமா 🙂
      உமா நீங்க சொன்ன மாதிரி சொன்னா அப்போ என் வீட்டுப் பெண்ணும் தேவதாசியும் ஒன்றா எப்படி ஒப்பிடப் போச்சு என்று டைம் லைனில் கட்டி உருளுவார்கள் ..அப்படி பல சம்பவங்கள் நடந்தேறி இருக்கின்றன 🙂
      ட்விட்டரில் என்னை உயிர்ப்புடன் வைத்திருப்பது இது போன்றவைகள் தாம்..பயன்படுத்தும் விதத்தில் பயன்படுத்தினால் விசயம் நாம் நிறைய அறியலாம் இங்கே..ஊக்கம் கொடுக்கும் உங்களைப் போன்ற நண்பர்களே என்னை இந்த அளவுக்கு எழுத வைப்பது ..இச்சிறு விளக்கை கோபுரத்தில் வைத்து அழகு பார்க்கும் அன்பு உள்ளங்களுக்கு நன்றி ..:)

    • Chari Iqbal Emendis (@Rasanai) 9:15 am on September 19, 2013 Permalink | Reply

      அட்டகாசம் உமா..இந்த பாட்டுன்னோன நேராவே அர்த்தம் புரிஞ்சுடுதே, என்ன புதுசா இருக்கப்போகுதுன்னு தோனிச்சு..எல்லாம் கலந்து செம ரைட்டப்.

      குறிப்பா இந்த வரிகள் கிளாஸ். எனக்கு அவ்வளவு ஒத்துப்போகுது 😉

      ”ஆணோ , பெண்ணோ இருவரும் அன்புக்குக் கட்டுப்பட்டு அடிமைத் தனத்தை விரும்பி ஏற்கும் பொழுது ஆணாதிக்கம் பெண்ணீயம் அனைத்தும் ஒரு புள்ளியில் மறைந்தே போகின்றது .”

      வெல்டன் உமா..

    • rajinirams 10:54 am on September 19, 2013 Permalink | Reply

      amas32 அவர்கள் கூறியது போல பேசுவது போலவே இருந்த யதார்த்தமான பதிவு.பாரதிதாசனையும் கணியன் பூங்குன்றனாரையும் தன் எழுத்துக்களில் கொண்டுவந்த புலவர் புலமைப்பித்தனின் திறமைக்கு இந்த பாடல் நல்ல சான்று. பூச்சரம்,பாச்சரம் என தூய தமிழில் பாடல்கள் இப்போது வராததும் கவலையளிக்கிறது. நல்ல பதிவு. வாழ்த்துக்கள்

      • kamala chandramani 11:57 am on September 19, 2013 Permalink | Reply

        அருமையான பதிவு உமா அவர்களே. மிக நன்றாக எழுதி இருக்கிறீர்கள்.பாரதிதாசனையும், கணியன் பூங்குன்றனாரையும் தன் எழுத்துக்களில் இணைத்த புலமைப் பித்தன், அருமையான நடிப்பு. எடுத்துச் சொல்லியிருக்கும் பாணி அருமை.

    • Prabhu 9:27 pm on September 19, 2013 Permalink | Reply

      Somebody just confused ‘Pulamai pithan’ with ‘Pudhumai pithan’. I imagine chokkan’s reaction. Ha.. Ha…

      • என். சொக்கன் 9:40 pm on September 19, 2013 Permalink | Reply

        Corrected 😉

    • jroldmonk 11:31 pm on September 19, 2013 Permalink | Reply

      ஆனாலும் பாத்துட்டு தான் இருக்கோம் முன்பு “மாலையில் யாரோ மனதோடு பேச ..” பதிவு இப்போ இந்த பதிவு, பானுப்ரியாவை கொஞ்சம் ஓவரா தான் ரசிக்கிறீங்க 😛

      • umakrishh 4:02 pm on September 23, 2013 Permalink | Reply

        நன்றி மாங்கு…பானு ஒரு வித அழகு ..அவங்க நடனம் பிடிக்கும் :))

    • Deva 7:18 am on September 20, 2013 Permalink | Reply

      I was under impression that’s this song was written by vairamuthu. My respect towards pulamaipithan increasing day by day.

    • Thiyagarajan 7:38 am on September 20, 2013 Permalink | Reply

      எல்லோராலும் ஏற்றுக்கொள்ள கூடிய வகையில் உங்கள் பார்வையை பதிவு செய்திருக்கிரிர் . குறிப்பாக நீங்கள் பயன்படுத்திய இரண்டு வரி மிகவும் அருமை ” ஆணோ , பெண்ணோ இருவரும் அன்புக்குக் கட்டுப்பட்டு அடிமைத் தனத்தை விரும்பி ஏற்கும் பொழுது ஆணாதிக்கம் பெண்ணீயம் அனைத்தும் ஒரு புள்ளியில் மறைந்தே போகின்றது”. இந்த வரிக்காவே அவரை நிச்சயம் பாராட்ட வேண்டும் ” வாழ்த்துகள் உமாகிருஷ்”.

      • umakrishh 4:02 pm on September 23, 2013 Permalink | Reply

        நன்றி தியாகராஜன் :))

    • umakrishh 4:01 pm on September 23, 2013 Permalink | Reply

      நன்றி 🙂 ரசனைக்காரரே :))நன்றி ரஜினிராம்ஸ் நன்றி கமலா மேடம் 🙂

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel