Updates from November, 2013 Toggle Comment Threads | Keyboard Shortcuts

  • mokrish 9:05 am on November 13, 2013 Permalink | Reply  

    வண்ண வண்ண சேலைங்க 

    விசாகா ஹரியின் பக்த சூர்தாஸ் கதா கச்சேரியில் கதை மெதுவாக பாடலுடன் விரிந்தது. முன்னுரையில் திரௌபதி குரல் கேட்டு எம்பெருமான் வருகிறார் என்ற நிகழ்வை பலர் அவரவர் உணர்ந்த விதத்தில் பாடிய அருமை பற்றி சொன்னார்.

    திரௌபதி – துகிலுரியப்படும் காட்சி என்றாலே எனக்கு டிவியில் பார்த்த பி ஆர் சோப்ராவின்  மகாபாரதம் நினைவுக்கு வரும். கிருஷ்ணர் -கையிலிருந்து மீட்டர் கணக்கில் வரும் பின்னி மில்  மஞ்சள் புடவை கண்ணில் தெரியும். இதுதான் பொதுவான விஷுவல்.

    பாரதியார் என்ன சொல்கிறார்? துச்சாதனன் பாஞ்சாலியின் துகிலை உரியத் தொடங்கினான். அவள் கண்ணனின் அருள் செயல்களைச் சொல்லி அவனை அழைத்து அடைக்கலம் புகுந்தாள். கண்ணன் அருளால் அவள்துகில் வளர்ந்து கொண்டேயிருந்தது.  அது வளர்ந்த விதத்தை உவமைகளை அடுக்கிச் சொல்கிறார்.

    பொய்யர்தம் துயரினைப் போல் – நல்ல

             புண்ணியவாளர்தம் புகழினைப்போல்

    தையலர் கருணையைப் போல் – கடல்

             சலசலத் தெறிந்திடும் அலைகளைப்போல்

    பெண்ணொளி வாழ்த்திடுவார்-அந்தப்

             பெருமக்கள் செல்வத்தின் பெருகுதல்போல்

    வண்ணப் பொற் சேலைகளாம் – அவை

             வளர்ந்தன வளர்ந்தன வளர்ந்தனவே !

    வாலியும்  பாண்டவர் பூமியில் பாஞ்சாலி கண்ணா கமலபூங்கண்ணா! என்று சீதரனை விளித்தாள். உடனே

    இருளினால் செய்த

    எழில்மேனியன் -எங்கிருந்தோ

    அருளினான்

    ஆடைமேல் ஆடைமேல்

    ஆடைமேல் ஆடைமேல்

    ஆடையாய் இடைவிடாது

    சங்கம்; சக்கரம்

    தங்கும் தனது

    கைத்தறியில் – உடை நெய்து

    கையறு பெண்ணுக் கனுப்பிட

    என்ற வரிகளில் அவன் பல புடைவைகள்  அனுப்பினான் என்றே சொல்கிறார்.

    வைரமுத்து சலங்கை ஒலி படத்தில் வான் போலே வண்ணம் என்ற பாடலில் (இசை இளையராஜா பாடியவர்கள் எஸ் பி பி, எஸ் பி ஷைலஜா) ஒரு ட்விஸ்ட் சொல்கிறார். கன்னியருடன் விளையாடியவன், பெண்களோடு அலைந்தவன் கோபியரின் சேலைகளை எடுத்தது பாஞ்சாலி கேட்கும்போது கொடுப்பதற்காகவே  என்று ஒரு cinematic ஜோடனை.

    http://www.youtube.com/watch?v=LkPxCJ5ux-c

    பெண்கள் உடை  எடுத்தவனே

    தங்கைக்கு உடை கொடுத்தவனே

    சேலைகளைத் திருடி அன்று செய்த லீலை பலகோடி

    ஆனால் சூர்தாஸ் deenan dukh haran dev santan hitkari என்ற பாடலில் சொன்னது சுவாரஸ்யமாக இருந்தது. துச்சாதனன் ஆடையை பிடித்து இழுக்கும் போது அவள்  ‘கிருஷ்ணா கிருஷ்ணா என்று கதறி வேண்டுகிறாள். உடனே கிருஷ்ணர் அங்கே வந்து தன்னையே அவளுக்கு ஆடையாக அளிக்கிறார் என்று சொல்கிறார்.

    http://www.youtube.com/watch?v=ayX_wJ8otVM

    கண்ணதாசன் பூவும் பொட்டும் படத்தில் எழுதிய பாடலில் (இசை கோவர்தனம்  பாடியவர் பி சுசீலா)

    http://www.inbaminge.com/t/p/Poovum%20Pottum/Ennam%20Pola%20Kannan%20Vanthan.eng.html 

    எண்ணம் போல கண்ணன் வந்தான் அம்மம்மா

    பெண்மை வாழ தன்னை தந்தான் அம்மம்மா

    என்ற வரிகளில் பெண் மானம் காக்க கண்ணன் தன்னையே தந்தான் என்கிறார். மீட்டர் கணக்கில், பல வண்ணங்களில் சேலைகள் என்பது வழக்கமான விளக்கம். சூர்தாசரும் கண்ணதாசரும் சொல்வது கண்ணனின் பெருமை.

    மோகனகிருஷ்ணன்

    Advertisements
     
    • rajinirams 5:43 pm on November 13, 2013 Permalink | Reply

      பாஞ்சாலி உன்னிடத்தில் சேலை கேட்டாள்-பார்த்தனவன் உன்னிடத்தில் கீதை கேட்டான் என்ற கவியரசர் “பெண்மை வாழ தன்னை தந்தான்” என்ற ஒரு வரியிலேயே அசத்தி விட்டாரே…அருமையான பதிவு.

    • Uma Chelvan 8:10 pm on November 13, 2013 Permalink | Reply

      very nice reply rajinirams.

      • rajinirams 10:14 pm on November 13, 2013 Permalink | Reply

        Uma Chelvan நன்றி

    • Uma Chelvan 8:27 pm on November 13, 2013 Permalink | Reply

      பாரதியார் கண்ணன் மீது கொண்ட அன்பு அளப்பரியது. So does ” Kanna…..Dasan”. When I look around and look back எல்லோருக்குமே கண்ணன் மீது ஒரு காதல் உண்டு.” கண்ணனை நினைக்காத நாளில்லையே ” ….ஆயினும் பாரதியின் காதல் உன்னதமானது , உயர்வானது !

      கண்ணன் எனது அகத்தே கால்வைத்த நாள்முதலாய்
      எண்ணம் விசாரம் எதுவும் அவன் பொறுப்பாய்ச்
      செல்வம், இளமாண்பு, சீர், சிறப்பு, நற்கீர்த்தி,
      கல்வி, அறிவு, கவிதை, சிவ யோகம்,
      தெளிவே வடிவாம் சிவஞானம், என்றும்
      ஒளிசேர் நலமனைத்தும் ஓங்கி வருகின்றன காண்!….

      .மிக தெளிவான , அழகான பாரதியின் கவிதை கண்ணனை பற்றி .

      • mokrish 8:17 am on November 14, 2013 Permalink | Reply

        பாரதியார் கண்ணன் மீது கொண்ட அன்பு அளப்பரியது. தல் உண்டு.” கண்ணனை நினைக்காத நாளில்லையே ” ….

      • mokrish 8:23 am on November 14, 2013 Permalink | Reply

        பாரதியார் கண்ணன் மீது கொண்ட அன்பு அளப்பரியது – அதில் எனக்கு சந்தேகமே இல்லை.

    • amas32 7:47 pm on November 15, 2013 Permalink | Reply

      சூர்தாசரும் கண்ணதாசரும் உட்பொருள் ஆராய்ந்து விளக்கம் கொடுத்திருக்கிறார்கள் என்றே தோன்றுகிறது. அதுவே உண்மை நிலை. மீட்டர் மீட்டரா துணி நீண்டு வருவது ஒரு figure of speech தான்.

      amas32

  • mokrish 10:06 pm on November 9, 2013 Permalink | Reply  

    உண்ணும் உணவும் நீரும் தந்த 

    பெருமாள் கோவிலில் திருமஞ்சனம் முடிந்தவுடன் திரை போட்டு அலங்காரம். பின் மஹா நைவேத்தியம். மடப்பள்ளியிலிருந்து ஒருவர் மூடிய பாத்திரத்தில் கொண்டு வந்ததை வைத்து நைவேத்தியம்

    இது வழக்கில் வந்த சொல். சரியான சொல் – நிவேதனம் இது இறைவனின் கருணையைப் போற்றுகிற விஷயம்.  அறிவிப்பது அல்லது காண்பிப்பது என்று பொருள். இறைவனுக்கு நாம் உணவு படைப்பதில்லை. அவன் கருணையினால் கிடைத்ததை, அவனுக்குக் காண்பித்து, அவன் உத்திரவுடன் அதை நாம் சாப்பிடுகிறோம் என்ற நம்பிக்கை. இது எல்லா மதங்களிலும் உள்ள நம்பிக்கை. அந்த கருணை நீடித்துக் கிட்ட இறைவனிடம் வேண்டிக் கொள்கிறோம். ஆங்கிலத்தில் Meal Time blessing என்று ஒரு பாடல்

    Thank you for the world so sweet,

    Thank you for the food we eat.

    Thank you for the birds that sing,

    Thank you God for everything.

    இறைவனுக்குரிய நிவேதனங்கள் எவை? ஒளவையார் அருளிய நல்வழியில்  

    பாலும் தெளிதேனும் பாகும் பருப்புமிவை

    நாலும் கலந்துனக்கு நான்தருவேன் – கோலஞ்செய்

    துங்கக் கரிமுகத்துத் தூமணியே நீயெனக்குச்

    சங்கத் தமிழ்மூன்றும் தா.

    விநாயகரிடம் ஒரு Barter டீல். அருணகிரிநாதர் கைத்தல நிறைகனி அப்பமொடவல் பொரி என்று விநாயகர் விரும்பி உண்ணும் உணவுப் பொருள்கள் சொல்கிறார். திருப்பாணாழ்வார்

    கொண்டல்வண்ணனைக் கோவலனாய் வெண்ணெய்

    உண்ட வாயன் என் உள்ளம் கவர்ந்தானை

    என்று கண்ணன் தின்ற வெண்ணெய் பற்றி சொல்கிறார். சிவனுக்கு அன்னம், அனுமனுக்கு வடை, முருகனுக்கு பஞ்சாமிர்தம், பெருமாளுக்கு லட்டு வெண்பொங்கல்,புளியோதரை என்று ஒரு பெரிய மெனு கார்ட் இருக்கிறது.

    நமக்கு கிடைத்த உணவை இறைவனிடம் காட்ட வேண்டும் என்றால் ஏன் இந்த லிஸ்ட்? மனப்பூர்வமாக எதையும் கொடுக்கலாம் என்பதே உண்மை. கண்ணப்பரும், குகனும், சபரியும் குசேலரும் தந்த எளிமையான நிவேதனங்களை இறைவன் ஏற்றுக்கொண்டானே?

    ஆதி பராசக்தி படத்தில் கண்ணதாசன் எழுதிய பாடல் (இசை கே வி மகாதேவன் பாடியவர் சீர்காழி கோவிந்தராஜன்) ஒரு மீனவன் தான் தரும் எளிய உணவை ஏற்றுக்கொள்ள சொல்லும் வேண்டுதல்

    http://www.youtube.com/watch?v=gRkiCrHRA-A

    ஆத்தாடி மாரியம்மா-சோறு

    ஆக்கி வெச்சேன் வாடியம்மா

    ஆழாக்கு அரிசியைப் பாழாக்க வேண்டாம்

    தின்னு புட்டுப் போடியம்மா

    பாட்டெடுத்தேன் தாளமிட்டேன் ஓடி வரலே-ஆடிப்

    பாத்துப்புட்டேன் பிள்ளை முகம் தேடி வரலே

    பேச்சுப்படி பொங்கல் உண்ண இங்கு வரலே-நான்

    மூச்சடிக்கி உன்னிடத்தில் அங்கு வருவேன்!

    நிவேதனம் செய்ய multi cuisine உணவோ அலங்காரமோ தேவையில்லை. தேவர் படம் ஒன்றில் பக்தர் முருகனுக்கு ஒரு லாரி லோடு வழைப்பழம் அனுப்புவார். லாரி ஓட்டுநர் போகும் வழியில் இரண்டு பழங்களை பசியில் வாடும் ஒரு குழந்தையிடம் தருவார். முருகன் பக்தரின் கனவில் தோன்றி ‘ நீ அனுப்பிய இரண்டு வாழைப்பழங்கள் வந்தாச்சு நல்லா இருப்பா’ என்பார். பசித்திருக்கும் ஒருவருக்கு அளிக்கும் உணவே சிறந்த நிவேதனம்.

    மோகனகிருஷ்ணன்

    342/365

     
    • Uma Chelvan 12:28 am on November 10, 2013 Permalink | Reply

      அன்பே தளிகையாய் ஆர்வம் நறுநெய்யாய்
      என்புதோல் போர்த்திய என்னுடலில் – அன்பொடுவக்
      கார அடிசில் உயிர்சமைத் தேன்கண்ணா
      நேராய் நுழைந்தே அருந்து…………

      இராமுருகன் ராமசாமியின் பழைய கவிதை. மிகவும் அருமையான ஒன்று !!!

    • rajinirams 1:10 pm on November 10, 2013 Permalink | Reply

      ரொம்பவே வித்தியாசமான ,விரிவான,அருமையான “நைவேத்திய”பதிவு. முருகன் பக்தரின் கனவில் தோன்றி ‘ நீ அனுப்பிய இரண்டு வாழைப்பழங்கள் வந்தாச்சு நல்லா இருப்பா’ என்ற “டச்” சூப்பர். நான் “இறை” தேடும் சாக்கில் “இரை”தேடுவது திருவல்லிக்கேணி பார்த்தசாரதி கோவில் புளியோதரைக்கு தான்-சூப்பராக இருக்கும்:-))

    • amas32 3:53 pm on November 10, 2013 Permalink | Reply

      எந்தக் கோவிலில் எந்தப் பிரசாதம் நன்றாக இருக்கும் என்று பாய்ஸ் படத்தில் செந்தில் ஒரு நோட்டு புத்தகத்தில் லிஸ்ட் போட்டு வைத்திருப்பதாக வரும். மேலும் அவர் இந்தத் தகவல்களை சேகரித்து வைத்து அதை “இன்பர்மேசன் இச் வெல்த்” என்று சொல்லும் டயலாக் ட்விட்டர்களிடையே ரொம்பப் பிரபலம் 🙂

      இதில் முக்கியமாகத் தெரிந்துக் கொள்ள வேண்டியது என்னவென்றால், எந்த உணவையும் இறைவனுக்குப் படைக்காமல் (காட்டாமல்) உண்ணுவது மலத்தை உண்ணுவதற்குச் சமம் என்று ஒரு உபன்யாசகர் சொல்லிக் கேள்விப்பட்டிருக்கேன். மனத்தால் இறைவா இது உனக்கு என்று சொல்லி அந்தப் பண்டத்தை அவன் பிரசாதமாகச் சாப்பிடுவதை நம் வழக்கமாகிக் கொள்ள வேண்டும். அவன் பிராசதமாக நம் உள்ளேப் போகும் எந்த உணவும் அமிர்தமாக மாறி நம்மை வாழ வைக்கும் என்பது நம்பிக்கை.

      amas32

    • pvramaswamy 6:55 pm on November 10, 2013 Permalink | Reply

      Beautiful

  • என். சொக்கன் 9:38 pm on October 25, 2013 Permalink | Reply  

    கங்கையும் காவிரியும் 

    • படம்: ஞானப்பழம்
    • பாடல்: யாரும் இல்லாத தீவொன்று வேண்டும்
    • எழுதியவர்: பா. விஜய்
    • இசை: கே. பாக்யராஜ்
    • பாடியவர்கள்: உன்னி கிருஷ்ணன், சுஜாதா
    • Link: http://www.youtube.com/watch?v=QRWeVVy-rMk

    காவிரியில் வந்து கங்கை

    கை சேர்க்க வேண்டும்,

    நாமும் அதில் சென்று காதல்

    நீராடவேண்டும்!

    இன்று மாயவரம் மயூரநாதர் ஆலயம் சென்றிருந்தேன். அத்தலத்தின் வரலாற்றுப் புத்தகத்தைப் படித்துக்கொண்டிருந்தபோது, சட்டென்று இந்தப் பாடல், இந்த வரியை நோக்கிச் சென்றேன்.

    காவிரியில் கங்கை வந்து சேரவேண்டும் என்பது ஒரு சுவையான கற்பனை. புவியியல் ரீதியில் சிரமம், ஆனால் கவி மனத்துக்குச் சாத்தியம், காதல் நோக்கமோ, பக்தி நோக்கமோ!

    மனிதர்கள் செய்த குற்றங்களைக் கழுவ கங்கைக்குச் சென்று நீராடுவார்கள். ஆனால், இப்படி எண்ணற்றோரின் அழுக்குகளைச் சேர்த்துக்கொண்ட கங்கை என்ன ஆகும்?

    தவறு செய்த மனிதர்கள் கங்கையில் குளித்துக் குளித்து அந்த நதியே அழுக்காகிவிட்டதாம். அதனைப் புனிதமாக்க, மாயவரம் நகரில் உள்ள காவிரிக்கு வந்து மூழ்கி எழுந்ததாம். இப்படிச் செல்கிறது இந்நகரின் தல புராணம்.

    கிட்டத்தட்ட இதையே பிரதிபலிப்பதுபோல, ‘மகாநதி’ படத்தில் வாலி எழுதிய இரு வெவ்வேறு பாடல்கள், ஒன்றில் ‘கங்கையின் மேலான காவிரித் தீர்த்தம்’ என்பார், இன்னொரு பாடலில், ‘இங்கே குளிக்கும் மனிதர் அழுக்கில் கங்கை கலங்குது’ என்பார்.

    இதற்கெல்லாம் அர்த்தம், கங்கையை இழிவுபடுத்துவது அல்ல. நம் அழுக்குகளை ஒரு நதி கழுவிவிடும் என்ற சிந்தனை ஒரு வசதியாக அமைந்துவிடக்கூடாது. ‘தப்புச் செஞ்சுட்டு, அப்புறமா மன்னிப்புக் கேட்டுக்கலாம்’ என்று நினைக்காமல், உண்மையிலேயே திருந்துகிறவர்களாக நாம் இருக்கவேண்டும் என்றுதான் வாலியும், மாயவரத் தல புராணமும் சொல்வதாக நான் நினைக்கிறேன்!

    ***

    என். சொக்கன் …

    25 10 2013

    327/365

     
    • Uma Chelvan 2:12 am on October 26, 2013 Permalink | Reply

      கண்ணதாசன் இதையே கொஞ்சம் மாற்றி எழுதியுள்ளார்

      கங்கையின் வெள்ளம் தண்ணீரோ -இல்லை
      கன்னியர்கள் விடும் கண்ணீரோ ……………………………….

      பிருந்தா வனத்திற்கு வருகிறேன்

    • amas32 8:30 pm on October 27, 2013 Permalink | Reply

      கங்கையை விட காவிரி உயர்ந்தது என்ற எண்ணம் நமக்குப் பெருமையே. ஏனென்றால் கங்கையைப் புகழாத இதிகாசமோ புராணமோ கிடையாது. கங்கை தன் பாவத்தைப் போக்கக் காவிரி நதியிடம் வருகிறாள் என்றால் காவிரியின் மகத்துவம் தான் என்னே!

      amas32

    • kannan 10:40 pm on November 5, 2013 Permalink | Reply

      Pulamai Pithan has thought about it much before Vijay.

      //கங்கையும் தெற்கே பாயாதா? காவிரியோடு சேராதா?//

      Film – Unnal Mudiyum Thambi.

  • mokrish 11:34 pm on October 4, 2013 Permalink | Reply  

    குழந்தையும் தெய்வமும் 

    குழந்தைகளுக்கு புரியும்படி விளக்குவது என்பது ஒரு பெரிய கலை. கதையாக பாட்டாக அவர்களின் மொழியில் உரையாடி புராணம், வரலாறு, அறிவியல் கணிதம் என்று எல்லாவற்றையும் சொல்லித்தரும் வித்தை சிலருக்கே வசப்படுகிறது. இடைமறித்து அவர்கள் கேட்கும் கேள்விகளுக்கு விடை தேடும்போது நமக்கே புதிய அர்த்தங்கள் புலப்படும்.

    கடவுள் என்ற ஒரு Complex விஷயத்தை எப்படி குழந்தைகளுக்கு விளக்குவது? சாந்தி நிலையம் படத்தில் கண்ணதாசன் எழுதிய இறைவன் வருவான் என்றும் நல்வழி தருவான் என்ற ஒரு பாடல் (இசை எம் எஸ் விஸ்வநாதன் பாடியவர்கள் பி சுசீலா & குழுவினர்). குழந்தைகளுக்கு home schooling முறையில் கற்றுத்தரும் ஆசிரியர் பாடுவதுபோல் காட்சி. கடவுளைப் பற்றி குழந்தைகளுக்கு விளக்கம் சொல்வதுபோல் அமைந்த வரிகள்.

    http://www.youtube.com/watch?v=Mc_kXk4AaVI

    வண்ண வண்ணப் பூவினில் காயை வைத்தவன்

    சிப்பி ஒன்றின் நடுவே முத்தை வைத்தவன்

    சின்னச் சின்ன நெஞ்சினில் பாசம் வைத்தான்

    நெஞ்சில் வரும் பாசத்தை பேச வைத்தான்

    கண் முன் தெரியும் இயற்கையை முன்னிறுத்தி இறைவனைப்பற்றி சொல்வது வழக்கம். கவிஞரும் வண்ண வண்ண பூவுக்குள் ஒளிந்திருக்கும் கனிக்கூட்டம், சிப்பிக்குள் இருக்கும் முத்து எல்லாம் இறைவன் தந்தது என்கிறார். அருணகிரிநாதர் கந்தர் அனுபூதியில்

    உருவாய் அருவாய் உளதாய் இலதாய்

    மருவாய் மலராய் மணியாய் ஒளியாய்

    என்று மொட்டாய் மலராய் எல்லாமுமாய் இருப்பவன் குருவாகவும் வந்து அருள் செய்ய வேண்டுகிறார். கண்ணதாசன் இறைவன் வந்து நல்வழி தருவான் என்கிறார், அடுத்த சரணத்தில்

    கண்கள் அவனை காண

    உள்ளம் அவனை நினைக்க

    கைகள் அவனை வணங்க

    என்று சொல்கிறார். வணங்கத் தலைவைத்து வார்கழல்வாய் வாழ்த்த வைத்து என்று திருவாசகம் சொன்னதும் இதுதான். அப்பர் திரு அங்கமாலையில்

    வாழ்த்த வாயும் நினைக்க மடநெஞ்சும்

    தாழ்த்தச் சென்னியும் தந்த தலைவனைச்

    சூழ்த்த மாமலர் தூவித் துதியாதே

    வீழ்த்த வாவினை யேன்நெடுங் காலமே

    என்ற சொன்னதும் இதுதான். அருணகிரி நாதரும் அப்பர் பெருமானும் சொன்ன ஆழமான விஷயங்களை ஒரு நர்சரி ரைம் போல எளிமையாக சொல்கிறார் – குழந்தைகளுக்கும் நமக்கும் புரியும்படி!

    பெரியவர்களும் குழந்தைகளாக மாறி பொம்மைகளுடன் விளையாடி கடவுளுடன் பேசி மகிழும் நவராத்திரி ஆரம்பம். அனைவருக்கும் வாழ்த்துகள்

    மோகனகிருஷ்ணன்

    307/365

     
    • Uma Chelvan 11:54 pm on October 4, 2013 Permalink | Reply

      கண்ணன் வருவான் கதை சொல்லுவான்

      பச்சை வண்ணக் கிளி வந்து பழம் கொடுக்க
      பட்டு வண்ணச் சிட்டு வந்து மலர் கொடுக்க
      கன்னங்கரு காக்கை வந்து மை கொடுக்க
      கண்ணன் மட்டும் கன்னத்திலே முத்தம் கொடுக்க
      முத்தம் கொடுக்க முத்தம் கொடுக்க

      தத்தித் தத்தி நடக்கையில் மயில் போலே
      திக்கித் திக்கிப் பேசுகையில் குயில்

    • rajinirams 7:05 pm on October 5, 2013 Permalink | Reply

      நல்ல பதிவு.குழந்தைகளுக்கு புரியும் வகையில்,அவர்கள் மனதில் பதியும் வகையில் விளக்குவது என்பது ஒரு கலையே.”குலவிளக்கு”படத்தின் கவியரசரின் “பூ பூவாய் பூத்திருக்கு பூமியிலே ஆயிரம் பூ”என்று கேள்வி பதில் பாட்டும்,வேப்ப மர உச்சியில் நின்னு பேய் ஒண்ணு ஆடுதுன்னு விளையாடப் போகுமுன்னே சொல்லிவைப்பாங்க,வேலையற்ற வீணர்களின் மூளையற்ற வார்த்தைகளை வேடிக்கையாக கூட நீ நம்பி விடாதே என்று சின்னப் பயல்களுக்கு சேதி சொல்லும் பட்டுக்கோட்டையாரின் வரிகளும் “நன்மை ஒன்று செய்தீர்கள் நன்மை விளைந்தது,தீமை ஒன்று செய்தீர்கள் தீமை விளைந்தது,தீமை செய்வதை விட்டு விட்டு நன்மை செய்ய முயலுங்கள் என்று குழந்தைகளுக்கு அறிவுரை கூறும் வைரமுத்துவின் “ராஜா சின்ன ரோஜாவோடு காட்டுப்பக்கம் வந்தானாம்”பாடலும் பாலூட்டும் அன்னை அவள் வழிகாட்டும் தெய்வம் என்று அறிவுருத்தும் வாலியின் “நல்ல பேரை வாங்கவேண்டும் பிள்ளைகளே”வரிகளும் என்றும் மனதை விட்டு நீங்காதவை. நன்றி.

  • என். சொக்கன் 8:13 pm on September 24, 2013 Permalink | Reply  

    யாரோ ஆட்டும் பொம்மை 

    • படம்: பார்த்தாலே பரவசம்
    • பாடல்: பார்த்தாலே பரவசமே
    • எழுதியவர்: நா. முத்துக்குமார்
    • இசை: ஏ. ஆர். ரஹ்மான்
    • பாடியவர்கள்: ரெஹானா, கங்கா, ஃபெபி, ஃபெஜி, பூர்ணிமா
    • Link: http://www.youtube.com/watch?v=65jlOHVvg9A

    ராத்திரியின் சொந்தக்காரா, ரகசியப் போர் வித்தைக்காரா,

    முத்தத்தால் வன்முறை செய்வாயா?

    பார்த்தாலே பரவசமே!

    ’வசம்’ என்ற சொல்லை, ஏதோ ஒன்றைத் தன்னிடம் வைத்திருப்பது என்கிற பொருளில் பயன்படுத்துகிறோம். உதாரணமாக, ‘இந்தப் பையன் கைவசம் நிறைய திறமைகள் இருக்கு!’

    இதையே செயலாகவும் குறிப்பிடலாம், ‘என்ன மாயமோ, அந்தப் பொண்ணு என் பையனை அப்படியே வசப்படுத்திட்டா!’

    இப்படிப்பட்ட ஒரு நிலையைதான் ‘பரவசம்’ என்கிறோம், பர + வசம், அதாவது, ஒருவர் தன்னுடைய கட்டுப்பாட்டில் இல்லை, சுய வசத்தில் இல்லை, இன்னொருவருடைய, அல்லது இன்னொன்றுடைய (பர) வசத்தில் இருக்கிறார். தேசி, பரதேசிபோல, வசம், பரவசம்.

    இந்தப் பாடலில் காதலனைச் சூழும் பெண்கள் உன்னைப் ‘பார்த்தாலே பரவசம்’ என்கிறார்கள். அதாவது, ‘டேய், உன்னைப் பார்த்தாலே போதும், அடுத்த விநாடி எங்க மனசு எங்க கையில இருக்கறதில்லைடா!’

    இதையே கோயிலில் கடவுள் முன்னால் நிற்கும்போதும் சொல்லலாம். கண்ணனைப்பற்றி ஊத்துக்காடு வேங்கடசுப்பையர் ‘பால் வடியும் முகம், நினைந்து நினைந்து என் உள்ளம், பரவசம் மிக ஆகுதே’ என்று பாடுவார்.

    இந்தப் பரவசத்துக்கு ‘இன்னொருவர் வசம்’ என்பதைத்தவிர இன்னோர் அர்த்தமும் சொல்லலாம்: பரவசம் = பரன் + வசம்.

    பரன் என்றால் கடவுள், பரவசம், பரன் + வசம் என்றால் கடவுளின் வசம், ‘நானா இயங்குகிறேன்? என்னை ஆட்டுவிப்பவன் அவன் அல்லவா?’ என்கிறார்கள் பக்தர்கள்!

    ***

    என். சொக்கன் …

    24 09 2013

    297/365

     
    • amas32 9:07 pm on September 24, 2013 Permalink | Reply

      பரஸ்தானம், பரஸ்திரீ, பரப்ரம்மம் இதிலெல்லாமும் பர என்பதற்கு நீங்கள் கூறிய பொருள் தான். ஆனால் ஸ்திரீயும், ஸ்தானமும் பிரம்மமும் வடமொழி சொற்கள்.

      amas32

  • mokrish 12:27 pm on September 10, 2013 Permalink | Reply  

    ஆயிரம் மலர்களே 

    கடந்த சில தினங்களாகவே சென்னை பரபரவென்று பிள்ளையாரின் பிறந்த நாளைக் கொண்டாடத் தயாராகிக்கொண்டிருந்தது. பூஜை, ஹோமம், ஆடல் பாடல் நிகழ்ச்சிகள் என்று அமர்க்களமான ஏற்பாடுகள். சில இடங்களில் கோயில் இருப்பதே நடைபாதையில். அங்கு போக்குவரத்துக்கு இடைஞ்சலாக தெருவை அடைத்து பந்தல் அலங்காரம் சீரியல் விளக்குகள்,

    அந்த நாளில் அழகிய சிறுகதையாக இருந்த பூஜையை ஏதோ ஷங்கர் பட பிரம்மாண்டத்தில் மாற்றியது யார்? கொஞ்சம் மஞ்சள் பொடியை குவித்து உருவம் செய்தாலே பூஜையை ஏற்கும் பிள்ளையாருக்கு இதையெல்லாம் செய்தவர் யார்? இறைவனை வழிபட இவையெல்லாம் தேவையா? ஆடை அணிகலன் ஆடம்பரங்கள் ஆண்டவன் விரும்பவுதில்லை என்று கண்ணதாசன் சொன்னாரே ?

    தாயுமானவர் ஒருநாள் நடராஜர் பூஜைக்குப் பூ எடுக்க நந்தவனத்திற்கு போனார். செடிகொடிகள் மலர்களால் நிறைந்திருக்க ‘ ஆஹா இயற்கையே நடராஜப் பெருமானை ஆராதிக்கிறது’ என்று எண்ணுகிறார். தன் பூஜையை மறந்தார்.

    பண்ணேன் உனக்கான பூசை ஒரு வடிவிலே

    பாவித்து இறைஞ்ச ஆங்கே

    பார்க்கின்ற மலரூடு நீயே இருத்தி அப்

    பனிமலர் எடுக்க மனமும்

    நண்ணேன் அலாமல் இரு கைதான் குவிக்க எனில்

    நாணும் என் உளம் நிற்றி நீ

    நான் கும்பிடும் போது அரைக்கும்பி டாதலால்

    நான்பூசை செய்யல் முறையோ

    என்று இவர் தம் அனுபவத்தைப் பாடியிருக்கிறார். கண்ணதாசன் மகாகவி காளிதாஸ் என்ற படத்தில் (இசை கே வி மகாதேவன் பாடியவர்கள் டி எம் எஸ் பி சுசீலா )

    மலரும் வான் நிலவும் சிந்தும்

    அழகெல்லாம் உன் எழில் வண்ணமே

    குழலும் யாழ் இசையும்

    கொஞ்சும் ஒலியெல்லாம் உன் குரல் வண்ணமே

    என்று சொல்வதும் இயற்கையின் அழகெல்லாம் இறை வழிபாடு என்பதுதான். கண்ணதாசன் திருமால் பெருமை படத்தில் மலர்களில் இறைவன் நிறம் பார்க்கிறார். பக்தி உள்ளம்தான் பூஜைக்கேத்த பூ என்கிறார்

    http://www.youtube.com/watch?v=l9dg_SPhdxM

    மலர்களிலே பல நிறம் கண்டேன் – திரு

    மாலவன் வடிவம் அதில் கண்டேன்

    பக்தி உள்ளம் என்னும் மலர்தொடுத்து

    பாசமென்னும் சிறுநூலெடுத்து

    சத்தியமென்னும் சரம் தொடுத்து – நான்

    சாற்றுகின்றேன் உன் திருவடிக்கு

    இப்படி ஒரு எளிமையான One-to-One வழிபாடு இப்போது சாத்தியமா? யோசித்தால் சமீபத்திய பக்தி இயக்கங்கள் மக்கள் ஒன்று கூடி வழிபடுவதையே வலியுறுத்துகின்றன என்று தோன்றுகிறது.. ஐயப்பன், ஹரே ராம ஹரே கிருஷ்ணா, சாய்பாபா, மேல் மருவத்தூர், பஜனை மண்டலி என்று பல உதாரணங்கள். இதனால்தான் பூஜை பெரிய அளவில் சிறப்பாக ஒளியும் ஒலியும் போல் நடக்கிறதா? பக்தி உள்ளம் மலர் என்றால் ஓராயிரம் மலர்கள் ஒன்று கூடி வழிபடுதல் சரிதானே ?

    மோகனகிருஷ்ணன்

     
    • amas32 1:22 pm on September 10, 2013 Permalink | Reply

      அர்ஜுனனுக்கு என்றுமே தான் தான் இறைவனை அதிக பூஜிப்பதாக எண்ணம். கதை சரியாகத் தெரியவில்லை – ஒரு முறை அவன் வானத்தில் இருந்து பூஜித்த மலர்கள் வண்டி வண்டியாகக் கொட்டப் படுவதைப் பார்த்து அனைத்தும் தான் சமர்ப்பித்தது என்று எண்ணுகிறான். அப்பொழுது தான் அர்ஜுனனுக்குத் தெரிய வருகிறது அவை அனைத்தும் பீமன் சமர்ப்பித்தவை என்று. மலர்களைக் கொய்து அர்ஜுனன் சமர்ப்பித்தான், ஆனால் பீமனோ மலர்களைப் பார்த்த மாத்திரத்திலேயே மானசீகமாக அனைத்தையும் இறைவனுக்கு அரப்பணித்தான். அதனால் அவன் சென்ற வழியில் பார்த்த மலர்கள் அனைத்தும் இறைவன் திருவடிக்குச் சென்றன.

      //மலரும் வான் நிலவும் சிந்தும்

      அழகெல்லாம் உன் எழில் வண்ணமே

      குழலும் யாழ் இசையும்

      கொஞ்சும் ஒலியெல்லாம் உன் குரல் வண்ணமே//

      இந்த வரிகள் எனக்கு மேற்சொன்னக் கதையையும் அதன் மூலம் உணர்த்தப்படும் தூய பக்தியையும் தான் நினைவுப் படுத்துகிறது.

      amas32

    • uma chelvan 6:51 pm on September 10, 2013 Permalink | Reply

      ஊத்துக்காடு வேங்கட கவி அந்த பரம்பொருளை பற்றி !!

      அழும்தொறும் அணைக்கும் அன்னை …..அறிவிலாது
      ஓடி விழும்பொழுது எடுக்கும் அப்பன்
      விளையாடும் போது தோழன்
      தொழும் தொறும் காக்கும் தெய்வாம்….. சொந்தாமாய்
      எடுப்போர் கெல்லாம் குழந்தை
      இப்படி உலவும் என் குருநாதன் வாழி

      என்ன புண்ணியம் செய்தேனோ ….சற்குருநாத
      எத்தனை தவம் செய்தேனோ ..உன் அருள் பெறவே !!
      பண்ணரும் வேதங்கள் படித்து உணர்ந்தாலும் …உன்னருள்
      இல்லாவிட்டால் ஒன்றுக்கும் உதவாது !

      ராகம் ..ரீதிகௌளை

      கேளுங்கள் !! மனம் மிக அமைதி அடையும். எல்லோருக்கும் எல்லாமும்கிடைக்கட்டும் ..http://www.youtube.com/watch?v=gIUEWAZfvcg

    • uma chelvan 6:57 pm on September 10, 2013 Permalink | Reply

      கே ஜே ஜேசுதாஸ் பாடிய பாடல் மிகவும் நன்றாக இருக்கும். U.tube இல்லை. i have it in audio cassette.

    • rajinirams 4:19 pm on September 11, 2013 Permalink | Reply

      உண்மையான இறை வழிபாட்டிற்கு உண்மையான பக்தியும் அன்பும் எளிமையும் இருந்தாலே போதுமானது.அன்பெனும் அகல்விளக்கை ஏற்றி வைத்தேன்.அதில் ஆசையெனும் நெய்யை ஊற்றி வைத்தேன்-உள்ளம் உருகிடவே பாடிவந்தேன்-உன் ஏழு மலையேறி ஓடிவந்தேன் என்று வாழும் பக்தர்களை போல.

  • என். சொக்கன் 7:02 pm on September 9, 2013 Permalink | Reply  

    தெய்வம் உள்ள வீடு 

    • படம்: சரஸ்வதி சபதம்
    • பாடல்: தெய்வம் இருப்பது
    • எழுதியவர்: கண்ணதாசன்
    • இசை: கே. வி. மகாதேவன்
    • பாடியவர்: டி. எம். சௌந்தர்ராஜன்
    • Link: http://www.youtube.com/watch?v=-aJ5cuerkpg

    தெய்வம் இருப்பது எங்கே?

    தெளிந்த நினைவும், திறந்த நெஞ்சும் நிறைந்ததுண்டோ அங்கே!

    எண்ணும் எழுத்தும் நிறைந்தவர் நெஞ்சம் இறைவன் திகழும் வீடு!

    இசையில், கலையில், கவியில், மழலை மொழியில் இறைவன் உண்டு,

    இவைதான் தெய்வம் என்பதை அறிந்தால் ஏற்கும் உனது தொண்டு!

    மேற்கண்ட வரிகளை இன்னொருமுறை படித்துப் பாருங்கள், இது ஆத்திகப் பாட்டா, அல்லது நாத்திகப் பாட்டா?

    எழுதியவர் கண்ணதாசன் எனும்போது, இந்தச் சந்தேகம் இன்னும் வேறுவிதமாக எழும். இது அவர் நாத்திகராக இருந்தபோது எழுதியதா, அல்லது ஆத்திகராக மாறியபின் எழுதியதா?

    உண்மையில், தெய்வம் கோயிலில் இருக்கிறதா, அல்லது வேறு எங்குமா? ஆத்திகர்கள் என்னதான் சொல்கிறார்கள்?

    ’தெய்வம் கோயிலில் இல்லை’ என்று கண்ணதாசன் சொல்லவில்லை. ஆனால் வேறு எங்கெல்லாம் இருக்கிறது என்று தெளிவாகச் சொல்கிறார்: தெளிந்த நினைவு, திறந்த நெஞ்சு (Open Mind), நிறைந்த நெஞ்சு, எண், எழுத்து, இசை, கலைகள், கவிதை, ஏன் மழலை மொழியில்கூட இறைவன் இருக்கிறான்!

    கடவுளை வெளியே தேடலாகாது என்பது நிச்சயம் நாத்திகக் கருத்தல்ல. அநேகமாகத் தமிழின் பக்தி இலக்கியங்கள் அனைத்தும் திரும்பத் திரும்ப இதைப் பலவிதமாக வலியுறுத்தியுள்ளன.

    உதாரணமாக, சிவனின் அடி, முடி தேடி பிரம்மனும் விஷ்ணுவும் திணறிய கதை நமக்குத் தெரியும். அதைக் குறிப்பிட்டுத் திருநாவுக்கரசர் தரும் ட்விஸ்டைப் பாருங்கள்:

    ’நாடி நாரணன், நான்முகன் என்று இவர்

    தேடியும் திரிந்தும் காண வல்லரோ?

    மாட மாளிகை சூழ் தில்லை அம்பலத்து

    ஆடி பாதம் என் நெஞ்சுள் இருக்கவே!’

    பிரம்மனே, விஷ்ணுவே, நீங்கள் அங்கேயும் இங்கேயும் தேடித் திரிந்து என்ன பலன்? தில்லை அம்பலத்தில் ஆடுகிற சிவன் என்னைப்போன்ற பக்தர்களின் நெஞ்சுக்குள் அல்லவா இருக்கிறான்?!

    இறைவனின் வீடு, பக்தர்கள் நெஞ்சம் என்றார் திருநாவுக்கரசர். அதைக் கொஞ்சம் நீட்டி, தெளிவான சிந்தனை உள்ளவர்கள், திறந்த மனம் கொண்டவர்கள், கல்வியில் வல்லவர்கள், கலையில் சிறந்தவர்கள், குழந்தைகள் நெஞ்சிலெல்லாம் அவன் இருப்பான் என்கிறார் கண்ணதாசன்.

    சரிதானே? கொஞ்சம் நெஞ்சைத் தொட்டுச் சொல்லுங்கள்!

    ***

    என். சொக்கன் …

    09 09 2013

    282/365

     
    • uma chelvan 9:31 pm on September 9, 2013 Permalink | Reply

      இதே பாடலில் வரும் இன்னும் ஒரு வரியும் மிக மிக நன்றாக இருக்கும்.” அங்கொரு கண்ணும் இங்கொரு கண்ணும் ஆலய வழிபாடில்லை” !!!

    • rajinirams 9:19 am on September 10, 2013 Permalink | Reply

      அருமையான பதிவு.இறைவன் வேறெங்கெல்லாம் இருப்பான் என்று சொல்லும் வாலியின் வரிகளை பாருங்கள்-” அவன் பூ விரியும் சோலையிலே மணப்பான்,இசை பூங்குயிலின் தேன்குரலில் இருப்பான்,குளிர் மேகமென தாகத்தையே தணிப்பான்,தளிர் கொடி விளையும் கனிகளிலே இனிப்பான்-பல நூல் படித்து நீ அறியும் கல்வி,பொது நலம் நினைத்து நீ வழங்கும் செல்வம்,பிறர் உயர்வினிலே உனக்கிருக்கும் இன்பம்,இவை அனைத்திலுமே இருப்பது தான் தெய்வம்-பாசமுள்ள பார்வையிலே கடவுள் வாழ்கிறான்-அவன் கருணையுள்ள நெஞ்சினிலே கோவில் கொள்கிறான்-இதோ எந்தன் தெய்வம் முன்னாலே,நான் ஒரே ஒரு புன்னகையில் கண்டேனே-படம்-பாபு.
      பாபா படத்தில் ரஜினி நாத்திகராக இருக்கும்போது பாடப்படும் பாடல்-டிப்பு டிப்பு குமரி-அந்த பாடலில் ஒவ்வொரு பருவத்தை பற்றியும் பாடும்போது “குழந்தை குழந்தை மனது-அது கடவுள் வாழும் மனது”என்ற வரி வரும்.படத்தின் கதாபாத்திரம் நாத்திகர்-எப்படி கடவுள்? சரி கவிஞர் வைரமுத்து அவர்களிடமே கேட்டு விடலாம் என்று எண்ணி தொலைபேசியில் கேட்டேன்-அவர் கொஞ்சமும் யோசிக்காமல் அடுத்த நொடியே “அதில் ஒன்றும் தவறில்லை-நாத்திகரான அறிஞர் அண்ணாவே சொல்லியிருக்கிறார்-ஏழையின் சிரிப்பில் இறைவனை காண்போம் என்று.அது போல தான் இதுவும் என்று சொல்லி தன் திறமையை வெளிப்படுத்தி தெளிவுபடுத்தினார். நன்றி.

    • amas32 1:50 pm on September 10, 2013 Permalink | Reply

      ஜேம்ஸ் ஹண்ட் என்ற ஆங்கில கவிஞர் எழுதிய Abou Ben Adam என்ற அற்புதக் கவிதை நினைவுக்கு வருகிறது. (சுட்டி இங்கே http://www.poemhunter.com/poem/abou-ben-adhem/ ) இறைவனை விரும்புவோர் பட்டியலை எழுதும் தேவதையிடம் தன் பெயர் உள்ளதா என்று கேட்கிறார் அபு பென் ஆடம். இல்லை என்று சொல்லும் தேவதையிடம் பரவாயில்லை, என் பெயரை சக மனிதனை நேசிக்கும் பட்டியலில் சேர்த்துவிடு என்பார். அடுத்த நாள் இரவு பெரு ஒளியுடன் வந்த தேவதை அவரிடம் இறைவன் ஆசிர்வதித்த பெயர் லிஸ்டைக் காண்பிகிறது. அதில் அவன் பெயர் தான் முதலிடம் வகித்தது.

      கிருஷ்ண பரமாத்மாக்கு ஒரு முறை உடல் நலமில்லாமல் போகிறது. எந்த வைத்தியத்துக்கும் சரியாகாமல் இருக்கும் பொழுது கிருஷ்ணன் கோகுலத்தில் இருக்கும் கோபியர் கால் தூசியை வாங்கி வருமாறு சொல்கிறார். அதைத் தஹ்டவிக் கொண்டாள் தனக்கு உடல் நிலை சரியாகிவிடும் என்கிறார். இதைக் கேட்ட உத்தவர் அரண்டுப் போகிறார். ஆனாலும் கண்ணன் ஆணைப்படி கொகுலத்துக்குப் போகிறார். அவர் வரப் போகிறார் என்று சூக்ஷமாமக்த் தெரிந்து ஏழு வண்டி நிறைய கோபியர்கள் கால் தூசியை சேகரித்து வைத்திருக்கிண்டனர், உத்தவரிடம் கொடுக்க!

      இறைவனின் ஊடுருவல் உடலையும் உள்ளத்தையும் தூய்மைப் படுத்தி இறைவன் வாழும் ஆலயம் ஆக்குகிறது 🙂 அந்த பக்தனின் பாத துளி இறைவனுக்கே மருந்தாகிறது 🙂

      amas32

  • GiRa ஜிரா 6:04 pm on August 30, 2013 Permalink | Reply  

    பொருத்தம் 

    எல்லாம் நன்றாகப் பொருந்தி வந்தால் மட்டுமே எதுவும் பெரும் வெற்றி பெறும்.

    எது பொருந்த வேண்டும்? அப்படிப் பொருந்தினால் எது வெற்றி பெறும்?

    காதலைத்தான் சொல்கிறேன். காதல் வெற்றி பெற மனப் பொருத்தம் வேண்டும். இல்லையென்றால் தோல்விதான். அதனால்தான் இலக்கியம் கூட பொருந்தாக் காமம் என்று ஒரு வகையையே வைத்திருக்கிறது. பெயரிலேயே தெள்ளத்தெளிவாக அது பொருந்தாது என்பதையும் முடிவு செய்திருக்கிறது இலக்கியம்.

    அப்படி உள்ளம் சிறப்பாகப் பொருந்திய காதலர்கள் பாடினால் எப்படி பாடுவார்கள்? கண்ணதாசன் எழுதிய ஒரு பாடல் உடனடியாக என் நினைவுக்கு வருகிறது.

    என்ன பொருத்தம் நமக்குள் என்ன பொருத்தம்
    காதல் என்னும் நாடகத்தில் கல்யாணம் சுகமே
    படம் – ரகசிய போலீஸ் 115
    இசை – மெல்லிசை மன்னர் எம்.எஸ்.விசுவநாதன்

    காதலர் இருவருக்கும் மனப் பொருத்தம் மிகப் பொருத்தமாக இருந்தால் திருமணப் பொருத்தம் பார்க்க வேண்டியதுதான்.

    அதெல்லாம் சரி. கல்யாணத்தில் பத்து பொருத்தங்கள் பார்ப்பார்களாமே. அவை எவையெவை?

    வைதிக முறைப்படி நடக்கும் திருமணங்களில் பார்க்கப்படும் பொருத்தங்கள் பத்து மட்டுமல்ல. மொத்தம் பதினாறு. அந்தப் பதினாறில் பத்து பொருந்தினாலே திருமணம் செய்யலாம் என்பது கருத்து. அந்த பதினாறு பொருத்தங்கள் எவையெவை எனப் பார்க்கலாமா?

    1. கிரக பொருத்தம்
    2. நட்சத்திர பொருத்தம்
    3. கண பொருத்தம் (மணமக்களின் குணப் பொருத்தத்தை இது குறிக்கும்)
    4. மகேந்திர பொருத்தம் (குழந்தைப் பேறு)
    5. ஸ்திரி தீர்க்க பொருத்தம் (தீர்க்க சுமங்கலியாக இருக்கும் பெருமை)
    6. யோனி பொருத்தம் (இன்பமான இல்லறவாழ்க்கைக்காக)
    7. இராசி பொருத்தம்
    8. இராசியதிபதி (மணமக்களின் மனவொற்றுமைக்கு)
    9. வசிய பொருத்தம் (ஒருவர் மீது ஒருவருக்கு உண்டாகும் ஈர்ப்பு)
    10. இரஜ்ஜு பொருத்தம் (மாங்கல்ய பலம்)
    11. வேதை பொருத்தம் (வாழ்வில் வரும் இன்பதுன்பங்களைக் காட்டும்)
    12. விருஷ பொருத்தம் (வம்சா விருத்தி)
    13. ஆயுள் பொருத்தம்
    14. புத்திர பொருத்தம்
    15. நாடி பொருத்தம்
    16. கிரக பாவ பொருத்தம் (செய்த செய்யப் போகும் பாவங்கள் பற்றியது)

    மனப்பொருத்தம் மட்டும் இருந்தால் போதாது. ஒவ்வொருவருக்குமான உடற் பொருத்தமும் தேவை. அது இருந்தால்தான் இன்பம் பெருகி இல்லறம் நிலைக்கும். அதையும் கவியரசர் கண்ணதாசன் ஒரு பாட்டில் சொல்லியிருக்கிறார்.

    மனைவி அமைவதெல்லாம் இறைவன் கொடுத்த வரம்
    மனது மயங்கியென்ன உனக்கும் வாழ்வு வரும்
    பொருத்தம் உடலிலும் வேண்டும்
    புரிந்தவன் துணையாக வேண்டும்
    படம் – மன்மதலீலை
    இசை – திரையிசைச் சக்கரவர்த்தி எம்.எஸ்.விசுவநாதன்

    இப்படியெல்லாம் பொருந்தி வாழும் கணவன் மனைவியரைக் கண்டால் எல்லாருக்கும் மகிழ்ச்சி வரும். சிலருக்கு மட்டும் பொறாமை வரும். அதற்கும் உண்டு ஒரு கண்ணதாசன் பாட்டு.

    எனக்கும் உனக்குந்தான் பொருத்தம்
    அதில் எத்தனை கண்களுக்கு வருத்தம்
    படம் – முகராசி
    இசை – திரையிசைத் திலகம் கே.வி.மகாதேவன்

    காதலரோடுதான் பொருத்தம் பார்க்க வேண்டுமா? கடவுளோடும் பொருத்தம் பார்க்கிறார் வள்ளலார்.

    எனக்கும் உனக்கும் இசைந்த பொருத்தம் என்ன பொருத்தமோ
    இந்தப் பொருத்தம் உலகில் பிறருக்கு எய்தும் பொருத்தமோ

    முருகப் பெருமானின் திருவருள் முழுமையாகப் பெற்றவர் வள்ளலார். வெற்றுக் கண்ணாடியில் மயிலேறி கந்தன் வரக்கண்ட மாமணி அவர்.

    ஆனால் பாடலில் முருகனை மெய்ப்பொருள் வடிவமாகவே எழுதியிருக்கிறார். அந்த மெய்ப்பொருளோடு தனக்கு உண்டான பொருத்தத்தை வியந்து பாராட்டுகிறார்.

    ஆண்டவனோடு பொருந்திய உள்ளத்தில் துன்பமில்லை. துயரமில்லை. வலிகள் இல்லை. வேதனை இல்லை. எல்லாம் இன்ப மயம். பேரின்பமயம்.

    வள்ளலார் அருளிய திருவருட்பாவின் இந்த அற்புத வரிகள் நம்ம வீட்டு தெய்வம் திரைப்படத்தில் குன்னக்குடி வைத்தியநாதன் இசையில் இந்தப் பாடல் இடம் பெற்றது. என்ன… ஒரு திருமண மேடையில் விலைமகளொருத்தி ஆடிப்பாடுவதாக அமைந்த காட்சியில் பாடல் இடம் பெற்றது.

    பதிவில் இடம் பெற்ற பாடல்கள்
    1. என்ன பொருத்தம் (டி.எம்.எஸ், பி.சுசீலா) – http://youtu.be/KJobbwySqRI
    2. எனக்கும் உனக்குந்தான் (டி.எம்.எஸ், பி.சுசீலா) – http://youtu.be/b_6C2Z3-8XQ
    3. மனைவி அமைவதெல்லாம் (கே.ஜே.ஏசுதாஸ்) – http://youtu.be/f4VxmTuaztQ
    4. எனக்கும் உனக்கும் இசைந்த (பி.சுசீலா) – http://youtu.be/m0urUMBv_ZA

    பின்குறிப்பு – என்ன பொருத்தம் பாடலிலும் எனக்கும் உனக்குந்தான் பொருத்தம் பாடலிலும் புரட்சித்தலைவர் எம்.ஜி.ஆரும் புரட்சித்தலைவி ஜெயலலிதாவும் நடித்தது என்ன அதிசயப் பொருத்தமோ!

    அன்புடன்,
    ஜிரா

    272/365

     
    • uma chelvan 9:57 pm on August 30, 2013 Permalink | Reply

      Very interesting post! ஆனால், கல்யாணம் தான் கட்டிக்கிட்டு ஓடி போலாமா இல்ல ஓடி போய் கல்யாணம் தான் கட்டிக்கலமா என்ற கால கட்டத்லில் பொருத்தம் எங்கே பார்கிறது???? எது எப்படி இருப்பினும், காதலின் போது நாம் ஒருவர் மீது வைக்கும் “பேரன்பு என்றும் பெரும் துன்பம் தான்”!!!

    • uma chelvan 11:42 pm on August 30, 2013 Permalink | Reply

      நாம் ஒன்றா வேறா? ஒன்றெனில் சரியானதைச்செய்யும் சக்தி வரட்டும், வேறெனில் வீணாய் கனவுகளில் காலம் கரையாதிருக்கட்டும்…. அன்பு சத்தியம் என்பதால் என் அவசரத்துக்கு உடனே வராது, ஆனாலும் காத்திருக்க திடம் கிடைக்கும் சன்னதியில்.
      நானென்றால் அது அவளும் நானும், ஆதலால் காத்திருத்தலும் அவளால், காத்திருத்தலும் அவளே !! A wonderful post by Dr. Rudhran….I think it is most appropriate for this post !!!

    • rajinirams 4:32 am on August 31, 2013 Permalink | Reply

      பதினாறு பொருத்தங்களையும் பட்டியலிட்டு.அதற்கு”பொருத்தமான”பாடல்களையும் கொன்டு அருமையான பதிவை தந்திருக்கிறீர்கள்.புருஷன் பொஞ்சாதி பொருத்தம் தான் வேணும்-பொருத்தம் இல்லாட்டி வருந்த தான் வேணும் என்ற வாலியின் வரிகளும்.பொருத்தமென்றால் புதுப்பொருத்தம் பொருந்தி விட்ட ஜோடி-நான் புலவனென்றால் பாடிடுவேன் கவிதை ஒரு கோடி என்ற கவியரசரின் வரிகளும் நினைவிற்கு வருகிறது.நன்றி.

    • amas32 6:10 pm on September 2, 2013 Permalink | Reply

      சூப்பர் போஸ்ட் ஜிரா 🙂 ரொம்ப ரசித்துப் படித்தேன் 🙂 சமையல் குறிப்பில் தான் நீங்கள் வல்லவர் என்று நினைத்தேன், ஜோசியப் பொருத்தங்கள் பார்ப்பதிலும் நீங்கள் காழியூர் நாராயணன் என்று இன்று தான் தெரிந்து கொண்டேன் 🙂

      //பொருத்தம் உடலிலும் வேண்டும்
      புரிந்தவன் துணையாக வேண்டும்// அடுத்த வரிகள் “கணவனின் துணையோடு தானே, காமனை வென்றாக வேண்டும்” என்று வரும் இல்லையா? கண்ணதாசன் கண்ணதாசன் தான்!

      amas32

    • Rajarajeswari jaghamani 5:50 pm on February 25, 2014 Permalink | Reply

      அருமையாக ரசிக்கவைத்த பாடல்களும் , பகிர்வுகளும் ..பாராட்டுக்கள்..!

  • mokrish 8:54 pm on August 26, 2013 Permalink | Reply  

    கங்கை தலையினில் மங்கை இடையினில் 

    நண்பர் @nchokkan னுடன் பேசிக்கொண்டிருந்தபோது  ‘ஜனனி ஜனனி ஜகம் நீ’ பாடல் வரிகள் பற்றி அவருடைய நண்பர் கேட்டதாக ஒரு கேள்வி எழுப்பினார். சிவன் அக்னி வடிவம். அடிமுடி காணாத ஜோதிஸ்வரூபம்.  ஆனால் கவிஞர் வாலி பாடலின் முதல் சரணத்தில் http://www.youtube.com/watch?v=PFPX9OgqEG4

    கொண்ட நாயகனின் குளிர் தேகத்திலே..

    நின்ற நாயகியே இட பாகத்திலே..

    என்ற வரிகளில் ஏன் குளிர் தேகத்திலே என்று சொல்கிறார்?

    சிவபெருமான் உஷ்ணமான திருமேனியை உடையவர். அந்த நெருப்பின் கடுமை குறையவே குளிர்ச்சியான திருக்கயிலையை இருப்பிடமாகக் கொண்டிருக்கிறார். மேலும் தேவலோகத்திலிருந்து கங்கை பூமிக்கு வரும் பொழுது எழும் பிரவாகத்தினை கட்டுப்படுத்தி தன் சடாமுடியில் தாங்கி  பூமி தாங்கும் அளவில் மட்டும் வெளிவிட்டார். இருப்பது கயிலையில், கங்கையின் பிரவாகம் தலையில் என்னும்போது குளிர் தேகம் என்பது சரிதானே?

    விஷ்ணு அலங்காரப் பிரியர். அனுமன் ஸ்தோத்திரப் பிரியர். சிவ பெருமான் அபிஷேகப் பிரியர். தன்னைத் துதித்துச் செய்யப்படும் அபிஷேக ஆராதனைகளால் மனம் மகிழ்ந்து  வேண்டியதை தருபவன். சிவபெருமானுக்கு என்னென்ன பொருட்களால் அபிஷேகம் செய்ய வேண்டும் என்பதை அண்ணாமலைச் சதகம் என்ற நூல் சொல்கிறது. பேரொளி மயமான அவன் திருமேனி குளிர்ந்தால், அண்ட சராசரங்களும் குளிர்ந்து, காலம் தவறாமல் மழை பொழிந்து, பயிர்கள் நல்ல முறையில் விளைந்து உலகை வாழ்விக்கும் என்பது நம்பிக்கை. தொடர்ந்து அபிஷேகங்கள் என்னும்போது குளிர் தேகம் என்பது சரிதானே?

    நீரும் நெருப்பும் மட்டுமல்லாமல் ‘இருநிலனாய்த் தீயாகி நீருமாகி’ என்ற தேவாரப் பாடல் பரமசிவனின் எட்டு வடிவங்கள் சொல்லும். பஞ்சபூதங்களுக்கும் உரிய தலங்களில் அமைந்துள்ள சிவாலயங்களில், மூலவர் பஞ்ச பூதங்களின் பெயர்களாலேயே அழைக்கப்படுகிறார். இதில் திருவானைக்கா  நீர்த்தலம் ஆகும். மூலஸ்தான லிங்கம் இருக்குமிடம் தரைமட்டத்திற்க்குக் கீழே இருப்பதால் எப்போதும் தண்ணீர் கசிவு இருந்துகொண்டே இருக்கும். கோடையில், காவேரி வறண்டிருக்கும் நேரங்களிலும், இந்நீர்க்கசிவு வற்றுவதில்லை என்பது குறிப்பிடத் தக்கதாகும்.

     Phosphorus என்ற பொருள் பற்றி நாம் படித்திருக்கிறோம். இது நீரில் கரைவதில்லை. காற்றில் தானாக எரியும் தன்மை உடையது. எரிவதற்கான தாழ்ந்த வெப்ப நிலை ஏறக்குறைய அறை வெப்ப நிலையாக இருப்பதால் இதை நீரில் இட்டு வைத்திருப்பார்கள். சிவனும் எப்போதும் ஒரு அபிஷேக mode ல் இருப்பதால் குளிர் தேகம் என்பது சரிதானே?

    இருக்கும் இடத்தையும் தன் மேனியையும் குளிர்விக்க எல்லா ஏற்பாடுகளும் செய்த பிறகே உமையவளுக்கு இட பாகத்தை அளிக்கிறான். அட!

    மோகனகிருஷ்ணன்

    268/365

     
    • amas32 4:59 pm on August 27, 2013 Permalink | Reply

      கர்நாடகாவில் பல கோவில்களில் மேலிருந்து சொட்டு சொட்டாக நீர் லிங்கத்தின் மேல் படும்படியாக ஒரு சொம்பில் துளையிட்டு மேலே கட்டி வைத்திருப்பதைப் பார்த்திருக்கிறேன். சிவபெருமானை சதா குளிர்விக்க நல்ல ஒரு வழி. திருமாலோ பாற்கடலில் பள்ளிக் கொண்டிருப்பவன். சிவன் சுடும் மயானத்தில் மகிழ்ச்சியாக இருப்பவன். அதனால் வெளி உபகரணங்களால் தான் அவனை குளிர்விக்க வேண்டும்.

      amas32

    • rajinirams 2:52 pm on August 29, 2013 Permalink | Reply

      குளிர் தேகத்திலே என்ற வார்த்தைக்கான தங்களின் விரிவாக்கம் அருமை. amas32 அவர்கள் கூறியதை போல இங்கு எல்லா கோவில்களிலுமே இறைவனை குளிர்விக்கிரார்கள்.கவிஞர் வாலியின் இந்த பாடலை ராஜா ஸ்பஷ்டமாக உச்சரித்து பாடும்போது மெய் சிலிர்க்கும் என்பது உண்மை.நன்றி.

  • என். சொக்கன் 11:43 pm on August 25, 2013 Permalink | Reply  

    நெஞ்சை அள்ளும் முன்னுரை 

    • படம்: மகாநதி
    • பாடல்: ஸ்ரீரங்க ரங்கநாதனின் பாதம்
    • எழுதியவர்: வாலி
    • இசை: இளையராஜா
    • பாடியவர்கள்: எஸ். பி. பாலசுப்ரமணியம், உமா ரமணன், ‘மகாநதி’ ஷோபனா
    • Link: http://www.youtube.com/watch?v=itZ1ESboqOk

    அந்நாளில் சோழ மன்னர்கள் ஆக்கிவைத்தனர் ஆலயம்,

    அம்மாடி என்ன சொல்லுவேன், கோயில் கோபுரம் ஆயிரம்,

    தேனாக நெஞ்சை அள்ளுமே தெய்வப் பூந்தமிழ்ப் பாயிரம்

    வாலியின் மிகச் சிறந்த பாடல்களில் ஒன்று இது. சொந்த ஊரைப்பற்றிய பாடல் என்பதாலோ என்னவோ, மனிதர் ரவுண்டு கட்டி விளையாடியிருப்பார். ஒவ்வொரு சொல்லும் அத்துணை அருமையாக வந்து உட்கார்ந்திருக்கும், ஒன்றை எடுத்துவிட்டு இன்னொன்றை வைப்பது சாத்தியமே இல்லை.

    அச்சுப்பிச்சு தங்கிலீஷ் வரிகளுக்காக வாலிமீது குற்றம் சாட்டுபவர்கள் அவருடைய இதுபோன்ற பாடல்களை ஒருமுறையாவது நிதானமாகக் கேட்கவேண்டும். இப்படியும் எழுதக்கூடியவர்தான் அவர். பிறகு அவர் கொட்டிய குப்பைகளுக்குக் கேட்டவர்கள் பொறுப்பா, எழுதியவர் பொறுப்பா?

    அது நிற்க. நாம் குறை சொல்லாமல் நல்லதைத் தேடி ரசிப்போம், இந்தப் பாடலைப்போல.

    ஸ்ரீரங்கத்தில் தொடங்கினாலும், அங்கே நின்றுவிடாமல், பொதுவாகவே சோழ மண்ணின் வர்ணனையாக அமைந்த பாட்டு இது. அன்றைய ஆலயங்களின் கோபுரங்களை வர்ணித்த கையோடு, அவற்றில் நுழையும்போது கேட்கும் தேவாரம், திருவாசகம், நாலாயிரம் திவ்யப் பிரபந்தம், திருப்புகழ் போன்ற தெய்வப் பூந்தமிழ்ப் பாடல்களைக் குறிப்பிடுகிறார் கவிஞர்.

    கொஞ்சம் பொறுங்கள், அவர் பாடல்கள் என்று சொல்லவில்லை. ‘பாயிரம்’ என்கிறார். அதற்கு என்ன அர்த்தம்?

    இப்போது எல்லாருக்கும் புரியும்படி சொல்லவேண்டுமானால், ‘முன்னுரை’ அல்லது ‘அறிமுக உரை’ என்று சொல்லலாம். அன்றைய கவிஞர்கள் ஒரு நூல் எழுதினால், அதற்குள் என்ன இருக்கிறது என்று விளக்கும்விதமாகப் ‘பாயிரம்’ என்கிற முன்னுரையைப் பாடல் வடிவிலேயே எழுதிச் சேர்ப்பார்கள். இந்தப் பாயிரத்தை நூலின் ஆசிரியரே எழுதலாம், அல்லது, அவருடைய நண்பரோ, சிஷ்யரோ, குருநாதரோகூட எழுதலாம். வாசகர்களுக்கு நூலைச் சரியாக அறிமுகப்படுத்தவேண்டும். அதுதான் நோக்கம். ஆர்வமுள்ளோர் இந்த இலக்கணத்தை முழுமையாகப் படிக்க இங்கே செல்லுங்கள்: http://365paa.wordpress.com/2012/05/07/306/

    ஆனால் ஒன்று, ஒருவர் வெறுமனே பாயிரத்தைப் படித்தால் போதாது. நூலையும் படிக்கவேண்டும்.

    நிலைமை அப்படியிருக்க, இங்கே வாலி ‘பாயிரம்’ என்ற சொல்லை எடுத்துப் பயன்படுத்தவேண்டிய அவசியம் என்ன? அது ‘ஆயிரம்’க்கு எதுகை, இயைபாக இருக்கிறது என்பதால்மட்டுமா?

    இருக்கலாம். ஆனால் எனக்கு இதை எப்படிப் பார்க்கத் தோன்றுகிறது என்றால், கடவுளைப்பற்றி எத்துணை பாடல்கள் பாடப்பட்டாலும் சரி, அவையெல்லாம் வெறும் பாயிரம்தான், அறிமுகம்தான். அவற்றைப் படித்தால் முழு அனுபவம் கிடைக்காது. கோயிலுக்குள் சென்று இறைவன் முன்னே கை கூப்பி நிற்கும்போது நாம் அடையப்போகும் அந்த உணர்வுதான் நிஜமான கவிதை.

    ***

    என். சொக்கன் …

    25 08 2013

    267/365

     
    • uchelvan 1:35 am on August 26, 2013 Permalink | Reply

      நீர் வண்ணம் எங்கும் மேவிட – நஞ்சை புஞ்சைகள் பாரடி
      ஊர் வண்ணம் என்ன கூறுவேன் – தெய்வ லோகமே தானடி
      வேறெங்கு சென்ற போதிலும் – இந்த இன்பங்கள் ஏதடி

    • rajinirams 9:03 pm on August 26, 2013 Permalink | Reply

      “பாயிரம்”என்றால் பா ஆயிரம் என்று நினைத்துகொண்டிருந்தேன்.தங்கள் விளக்கத்திற்கு நன்றி. கவிஞர் வாலியின் அற்புதமான பாடல்களில் இதுவும் ஒன்று.

    • amas32 6:33 pm on September 2, 2013 Permalink | Reply

      //இருக்கலாம். ஆனால் எனக்கு இதை எப்படிப் பார்க்கத் தோன்றுகிறது என்றால், கடவுளைப்பற்றி எத்துணை பாடல்கள் பாடப்பட்டாலும் சரி, அவையெல்லாம் வெறும் பாயிரம்தான், அறிமுகம்தான். அவற்றைப் படித்தால் முழு அனுபவம் கிடைக்காது. கோயிலுக்குள் சென்று இறைவன் முன்னே கை கூப்பி நிற்கும்போது நாம் அடையப்போகும் அந்த உணர்வுதான் நிஜமான கவிதை.//

      நீங்கள் நான் ட்விட்டர் வந்த புதிதில் சில கோயில்கள் போய் அந்ததந்த கோவில்களின் சிறப்புக்களை ட் வீட்டுக்களாகப் போட்டு வந்தீர்கள். அப்போ நான் வேண்டுதல்/பக்தி பற்றிக் கேட்டேன், எனக்குக் கோவிலின் அழகையும் தல புராணத்தையும் தெரிந்து கொள்ளும் ஆர்வமே அதிகம் என்று பதில் சொல்லியிருந்தீர்கள்.

      மேலே நீங்கள் எழுதியுள்ள வரிகள் உங்கள் உள்ளத்தை எனக்குப் படம் பிடித்துக் காட்டுகிறது 🙂
      நல்ல பதிவு!

      amas32

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel