Updates from July, 2013 Toggle Comment Threads | Keyboard Shortcuts

  • என். சொக்கன் 4:02 pm on July 5, 2013 Permalink | Reply  

    தென்றல் பாதை 

    • படம்: மவுனராகம்
    • பாடல்: மன்றம் வந்த தென்றலுக்கு
    • எழுதியவர்: வாலி
    • இசை: இளையராஜா
    • பாடியவர்: எஸ். பி. பாலசுப்ரமணியம்

    மன்றம் வந்த தென்றலுக்கு,

    மஞ்சம் வர நெஞ்சம் இல்லையோ!

    ’மன்றம்’ என்ற சொல் இப்போதும் புழக்கத்தில் உள்ள ஒன்றுதான், ஆனால் இதைப் பெரும்பாலும் நாம் தனித்துப் பயன்படுத்துவதில்லை. வேறு சொற்களோடு சேர்த்துச் சொல்கிறோம். உதாரணமாக:

    • பட்டி மன்றம்
    • நீதி மன்றம்
    • இளைஞர் மன்றம்
    • தமிழ் மன்றம்
    • ரசிகர் மன்றம்
    • நற்பணி மன்றம்

    இந்தச் சொற்கள் எல்லாவற்றிலும் ‘மன்றம்’க்கு ஒரே பொருள்தான். அது என்ன என்று ஊகிக்கமுடிகிறதா?

    பொதுவாக ‘மன்றம்’ என்றால் குழு (Group) என்றுதான் நாம் நினைத்துக்கொண்டிருக்கிறோம். ஆனால், ‘மன்றம் வந்த தென்றலுக்கு’ என்றால் என்ன அர்த்தம்? குழுவில் உள்ளவர்களுக்கு நடுவே புகுந்து வருகிறதா தென்றல்?

    இருக்கட்டும். கொஞ்சம் பழங்கதை பேசிவிட்டு இதற்கு மீண்டும் வருவோம்.

    சிலப்பதிகாரத்தை எழுதியவர் இளங்கோவடிகள். ஆனால், அவருக்குக் கோவலன், கண்ணகி கதையைச் சொன்னவர் சீத்தலைச் சாத்தனார்.

    அப்படியானால், சீத்தலைச் சாத்தனாருக்கு அந்தக் கதை எப்படித் தெரிந்தது?

    இதை அவர் விவரிக்கும்போது ”மன்றப் பொதியிலில் வெள்ளியம்பலத்து நள் இருள் கிடந்தேன், மதுரை மாதெய்வம் வந்து தோன்றி’ இந்தக் கதையைச் சொன்னது” என்கிறார்.

    அதாவது, ஒரு மன்றத்தில் சீத்தலைச் சாத்தனார் தூங்கிக்கொண்டிருக்கும்போது, மதுரை நகரின் காவல் தெய்வம் அவர்முன்னே தோன்றுகிறது, கோவலன், கண்ணகி கதையைச் சொல்கிறது.

    இந்தப் பின்னணியோடு, வாலியின் இந்த வரிகளை இன்னொரு முறை படித்துப் பாருங்கள், ’மன்றம்’ என்ற சொல்லின் பொருள் பளிச்சென்று தெரிந்துவிடும்.

    ‘மன்றம்’ என்றால், பொது இடம், இவருக்குதான் சொந்தம் என்று இல்லாமல், பலரும் கூடுகின்ற இடம், ஒரு வீட்டின் வரவேற்பு அறைபோல என்று சொல்லலாம்.

    அதே வீட்டில் ஒரு படுக்கை அறை தனிப்பட்ட சிலரின் பயன்பாட்டுக்காகமட்டும் இருக்குமல்லவா, அதைதான் ‘மஞ்சம்’ என்கிறார் வாலி. ‘ஊரார் முன்னால் என்னைத் திருமணம் செய்துகொண்டவளுக்கு, என்னுடன் வாழ விருப்பமில்லை’ என்று கதாநாயகன் புலம்புவதாக, தென்றலை உவமையாக வைத்துப் பாடுகிறார்.

    ’மன்றம்’ என்ற சொல்லின் பொருளை நினைவில் வைத்துக்கொள்ள இன்னோர் எளிய உதாரணம், அதுவும் தென்றலை ஜோடி சேர்த்துக்கொண்டதுதான், ‘இந்த மன்றத்தில் ஓடி வரும், இளம் தென்றலைக் கேட்கின்றேன்!’

    ***

    என். சொக்கன் …

    05 07 2013

    216/365

     
    • amas32 4:48 pm on July 5, 2013 Permalink | Reply

      அனைவரின் அங்கீகாரத்தோடு நடந்து முடிந்தத் திருமணம், ஆனால் மணமகனுக்கு முழு நிறைவைத் தராமல் தொக்கி நிற்கிறது. The wedding ceremony is over but the marriage is not consummated!

      ரொம்பா அருமையா சொல்ல வந்ததைச் சொல்லிருக்கிறார் கவிஞர் வாலி.

      amas32

    • rajinirams 5:30 pm on July 5, 2013 Permalink | Reply

      மன்றம்,தென்றல் மஞ்சம்,நெஞ்சம் என்ற வாலியின் சொல் விளையாட்டில் உருவான பாடல் மூலம் “மன்றத்தின்”சிறப்பை சொல்லி இருக்கிறீர்கள்.அவன் தான் மனிதனின் “அன்பு நடமாடும்”பாடலில் கவியரசரும் கண்ணில் விளையாடும் எழில் வண்ணமே கன்னித்தமிழ் மன்றமே”என்று கலக்கியிருப்பார்.

    • சிவா கிருஷ்ணமூர்த்தி 5:35 pm on July 5, 2013 Permalink | Reply

      என்னுடைய புரிதல் இந்த சினிமா பாடலைப் பற்றி என்னவென்றால் – “மன்றம்” என்பது இங்கு திருமண மேடை அல்லது சபை…
      ஊரறிய சபையில்
      மணம் முடிக்க ஒத்துக்கொண்ட
      மங்கை,
      மஞ்சம் வர மறுக்கிறாள் என்பதே…

      சிவா கிருஷ்ணமூர்த்தி

      • என். சொக்கன் 5:42 pm on July 5, 2013 Permalink | Reply

        Yes 🙂

    • Saba-Thambi 7:51 pm on July 5, 2013 Permalink | Reply

      மன்றம் – இன்னொரு அர்த்தம் – வீடு
      ஆயின்

      மன்ற ம்(வீடு) வந்த தென்றலுக்கு,

      மஞ்சம் வர நெஞ்சம் இல்லையோ! என்று பொறுள் படுமோ?

  • GiRa ஜிரா 10:23 am on May 25, 2013 Permalink | Reply
    Tags: நற்றிணை   

    ’வேலன்’டைன்ஸ்’ ஸ்பெஷல் 

    வள்ளி வள்ளி என வந்தான் வடிவேலன் தான்
    புள்ளி வைத்து புள்ளி போட்டான் புதுக் கோலம்தான்
    சொல்லித் தரச் சொல்லிக் கேட்டு – தினமும்
    சொல்லித் தந்த சிந்து பாடினான்
    வள்ளி இன்ப வல்லி என்று முல்லைச்சரம் கொண்டு சூடினான்
    பாடியவர்கள் – இசைஞானி இளையராஜா, எஸ்.ஜானகி
    பாடல் – கவிஞர் வாலி
    இசை – இசைஞானி இளையராஜா
    படம் – தெய்வவாக்கு
    பாடலின் சுட்டி – http://youtu.be/10PSPLEH1D0

    முதலில் நான் கவிஞர் வாலிக்கு நன்றி சொல்லிக் கொள்கிறேன். ஏன் தெரியுமா? இலக்கியத்திலும் வாழ்வியலிலும் மறைந்து போன ஒரு பழந்தமிழ் வழக்கத்தை மீண்டும் வெளிக் கொண்டு வந்தமைக்கு.

    திரைப்படப் பாடல்களில் காதல் பாடல்களில் கண்ணனை உயர்வு செய்து எழுதி பலபாடல்கள் நிறைய உள்ளன. அவை கால மாற்றத்தையும் மக்களின் நம்பிக்கையில் உண்டான மாற்றங்களையும் காட்டுகின்றன. மாற்றங்கள் என்றால் அவை குறைகள் என்று பொருள் அல்ல. ஒரு நிலையில் இருந்து இன்னொரு நிலைக்கு மாறின என்று செய்தியாகச் சொல்வது போலத்தான்.

    சரி. எதிலிருந்து மாறியது? சங்க நூல்களை எடுத்துப் பார்த்தால் காதல் என்று வந்தாலே முருகனும் வள்ளியும் தான். அகத்திணை நூல்கள் அத்தனையையும் எடுத்துப் புரட்டிப் பார்த்தால் அந்த உண்மை விளங்கும்.

    குறுந்தொகை, நற்றிணை என்று பெரிதாகப் பட்டியல் போடலாம். அதனால்தான் சங்க இலக்கியங்கள் என்று பொதுவாகவே குறிப்பிட்டேன். சங்க இலக்கியங்கள் என்ன…. சங்கம் மருவிய காலத்து சிலப்பதிகாரத்திலும் அப்படித்தான்.

    கோவலனுக்கும் கண்ணகிக்கும் திருமணம் நடக்கிறது. அதற்காக கோவலனை ஊர்வலமாக அழைத்து வருகிறார்கள். அப்போது புகார் நகரத்துக் கன்னிப் பெண்களெல்லாம் கோவலனைப் பார்க்கிறார்கள். அவன் அழகை ரசிக்கிறார்கள். “அட… பாத்தியா.. என்ன அழகா இருக்கான். அப்படியே முருகன் போல முறுக்கிக்கிட்டு இருக்கானே… காதலிச்சா இப்பிடி ஒருத்தனைக் காதலிக்கணும்.” என்று புகழ்கிறார்கள்.

    கண்டு ஏத்தும் செவ்வேள்” என்று இசை போக்கி காதலால்
    கொண்டு ஏத்தும் கிழமையான் கோவலன் என்பான் மன்னோ
    நூல் – சிலப்பதிகாரம்
    காண்டம் – புகார்க்காண்டம் (மங்கல வாழ்த்துப் பாடல்)
    இயற்றியவர் – இளங்கோவடிகள்

    பொண்ணு பாத்தா மகாலட்சுமி மாதிரி இருக்கா” என்று சொல்வது போல பையனைச் சொல்லும் போது முருகனை ஒப்பிட்டுச் சொல்லும் வழக்கம் தமிழரின் பழைய வழக்கம். அதுதான் சங்கத்தமிழ் முழுக்க விரவிக்கிடக்கிறது. எல்லா எடுத்துக் காட்டுகளையும் நான் குறித்து வைத்திருந்தாலும் ஒன்றேயொன்றை மட்டும் இங்கு பார்க்கலாம். கிட்டத்தட்ட இன்றைய திரைப்படங்களில் வருகின்ற காட்சியைப் போலத்தான் அந்த நற்றிணைக்காட்சி.

    காதலில் தவிக்கிறாள் காதலி. காதலனோ சிறுகுடியன். அவனும் காதலில் குதித்துவிட்டு தப்பிக்க முடியாமல் தவிப்பவன். நேரம் பார்த்து இடம் பார்த்து கூடிக் கழிக்கும் இன்பம் அவர்களுக்கு வாய்த்தது. அப்போது அவன் அவளிடம் கேட்கிறான். “பெண்ணே.. மூங்கில் போன்ற தோள் அழகே… கொடியழகி வள்ளியம்மை முருகப் பெருமானோடு கிளம்பிச் சென்றது போல என்னோடு வந்து என்னுடைய சிறுகுடியில் வாழ்வாயா?

    என்ன திரைப்பட வசனம் போலத்தானே இருக்கிறது? சரி.. அந்தப் பாடல் வரிகளைப் பார்ப்போம்.

    வேய்வனப்பு உற்ற தோளை நீயே
    என்னுள் வருதியோ நல்நடைக் கொடிச்சி
    முருகுபுணர்ந்து இயன்ற வள்ளி போல
    செய்யுள் – நோயும் நெகிழ்ச்சியும் என்று தொடங்கும் பாடல்
    பாடல் எண் – 82
    பாடியவர் – அம்மூவனார்
    திணை – குறிஞ்சி

    இப்போது புரிந்திருக்கும் நான் ஏன் கவிஞர் வாலிக்கு நன்றி சொன்னேன் என்று. இந்த ஒரு பாட்டில் மட்டுமல்ல இன்னும் சில பாடல்களிலும் வாலி முருகன் – வள்ளி காதலை எழுதியிருக்கிறார்.

    செல்லப்பிள்ளை சரவணன் திருச்செந்தூர் வாழும் சுந்தரன்
    வள்ளியை இன்ப வல்லியை குன்றம் ஏறிக் கொண்டவன்
    படம் – பெண் ஜென்மம்
    இசை – இளையராஜா
    பாடியவர்கள் – பி.சுசீலா, ஏசுதாஸ்
    பாடலின் சுட்டி – http://youtu.be/BGevMUI6t0A

    அழகன் முருகனிடம் ஆசை வைத்தேன்
    அவன் ஆலயத்தில் அன்புமலர் பூசை வைத்தேன்
    ………….
    பன்னிரண்டு கண்ணழகை பார்த்து நின்ற பெண்ணழகை
    ஐயன் தான் ஆள வந்தான் பெண்மையை வாழ வைத்தான்
    படம் – பஞ்சவர்ணக்கிளி
    இசை – மெல்லிசை மன்னர்கள் எம்.எஸ்.விசுவநாதன் – டி.கே.இராமமூர்த்தி
    பாடியவர் – இசையரசி பி.சுசீலா
    பாடலின் சுட்டி – http://youtu.be/9a0rNJBS594

    சரி. இது போல முருகனை முன்னிறுத்திய காதல் பாடல்கள் உங்களுக்கு ஏதேனும் தெரியுமா? தெரிந்தால் சொல்லுங்களேன்.

    அன்புடன்,
    ஜிரா

    175/365

     
    • ajayb17 10:44 am on May 25, 2013 Permalink | Reply

      ’வேலன்’டைன்ஸ்’ … தலைப்பு செம 🙂

      • GiRa ஜிரா 12:40 pm on May 26, 2013 Permalink | Reply

        தலைப்புகள் எல்லாம் நாகாவின் கைவண்ணம். 🙂

    • Uma Chelvan 6:59 pm on May 25, 2013 Permalink | Reply

      மானோடும் பாதை இலே ( கவி குயில் ) GIRA இந்த பாட்டு உங்ககிட்ட இருந்தால் u-tube li upload பண்ணுங்களேன் . Please !!

      • GiRa ஜிரா 12:44 pm on May 26, 2013 Permalink | Reply

        மானோடும் பாதையிலே பாட்டு யூடியூபில் இருக்கே. இதோ கேளுங்க http://youtu.be/Xp20Hs1c2HQ

    • Uma Chelvan 7:37 pm on May 26, 2013 Permalink | Reply

      Thanks, I didn’t know that.

    • amas32 9:53 pm on May 26, 2013 Permalink | Reply

      என் முருகனைப் பற்றிய பதிவு அனைத்துக்கும் உங்களுக்கு நூற்றுக்கு இருநூறு மதிப்பெண்கள் உண்டு 🙂 அருமையான பதிவு, நன்றி 🙂

      amas32

  • GiRa ஜிரா 12:35 pm on April 16, 2013 Permalink | Reply
    Tags: Suresh Peters   

    கண்ணகியும் சீதையும் 

    ஊர்வசி ஊர்வசி டேக் இட் ஈசி ஊர்வசி
    ஊசி போல ஒடம்பிருந்தா தேவையில்ல ஃபார்மசி
    வாழ்க்கையில் வெல்லவே டேக் இட் ஈசி ஃபார்மசி
    வானவில் வாழ்க்கையில் வாலிபம் ஒரு ஃபேண்டசி
    படம் – காதலன்
    பாடல் – வைரமுத்து
    பாடியவர் – சுரேஷ் பீட்டர்ஸ், ஷாகுல் ஹமீது, ஏ. ஆர். ரகுமான்
    இசை – ஏ.ஆர்.ரகுமான்
    பாடலின் சுட்டி – http://youtu.be/y2uT02X8a94

    Take it easy policy. ஒரு காலத்தில் ஊரெங்கும் ஓடி உலகெங்கும் ஆடிய பாடல். வாழ்க்கையில் வெற்றி பெறுவதற்கு எதையும் லேசாக எடுத்துக் கொள்ள வேண்டும் என்று இளைஞர்கள் பாடுவதாக எழுதப்பட்ட பாட்டு.

    ஆனாலும் இந்தப் பாடலை எழுதிய கவிப்பேரரசு வைரமுத்து லேசாக எடுத்துக் கொள்ளக் கூடாத/முடியாத ஒரு கருத்தையும் சேர்த்தே எழுதியிருக்கிறார்.

    கண்ணகி சிலைதான் இங்குண்டு
    சீதைக்கு தனியே சிலையேது

    இந்தக் கருத்தை ஏற்பாரும் உண்டு. மறுப்பாரும் உண்டு. எந்தவிதப் பாகுபாடும் இன்றி இந்தக் கருத்தைச் சிந்தித்தால் வைரமுத்து அவர்களின் இலக்கிய அறிவு விளங்கும். இன்றைக்கு வைரமுத்து சொன்னது அன்றைக்கே ஒரு பெரும் புலவரால் சொல்லப்பட்டதுதான். அதுவும் அவர் எழுதிய காப்பியத்தில் ஒரு பெண்ணின் வாயால் சொல்லப்பட்டது. ஆம். விளக்கத்தை தொடர்ந்து பார்ப்போம்.

    சேரன் செங்குட்டுவனுக்கு ஒரு ஐயப்பாடு. சேரன் செங்குட்டுவன் தெரியும்தானே? இளங்கோவடிகளின் அண்ணன். இமயவரம்பன் நெடுஞ்சேரலாதனின் மூத்த மகன். அந்த செங்குட்டுவன் தன் மனைவியான வேண்மாளிடம் வியந்து கேட்கிறான். இரண்டில் எது சிறந்தது என்பது அவனது கேள்வி.

    உயிருடன் சென்ற ஒரு மகள் தன்னினும்
    செயிருடன் வந்த இச் சேயிழை தன்னினும்
    நல்-நுதல்! வியக்கும் நலத்தோர் யார்? என மன்னவன் உரைப்ப

    புரியவில்லையா? இரண்டு பெண்கள் இருக்கிறார்கள். இருவரும் செய்தது பெரிய செயல்கள். இவர்கள் இருவரில் கற்பு நலத்தை வியந்து பாராட்டத்தக்கவர் யார் என்பதுதான் அவனது கேள்வி. சரி. யாரந்த இரண்டு பெண்கள்?

    கணவன் இறந்தான் என்று தெரிந்ததும் அவனுடனே கிளம்பி விட்டவள் ஒருத்தி.
    கணவனுக்கு அநீதி இழைக்கப்பட்டது என்று தெரிந்ததும் நீதி கேட்டுப் போராடினாள் ஒருத்தி.

    இப்போது புரிந்திருக்குமே அந்த இரண்டு பெண்கள் யாரென்று. கணவனோடு உயிர் விட்டவள் பாண்டியன் நெடுஞ்செழியன் மனைவி கோப்பெருந்தேவி. கணவனுக்காக நீதி கேட்டுப் போராடியவள் கண்ணகி.

    இவர்கள் இருவரில் யாருடைய கற்புநலத்தை வியப்பது? பாராட்டுவது? புகழ்வது?

    கேள்வி படுபயங்கர கேள்வி. இரண்டு சிறந்த பெண்களுக்குள் யாருடைய கற்புநலம் சிறந்தது என்று ஒரு ஆணுக்கு ஐயம். இன்னொரு வீட்டுப் பெண்ணைப் பற்றிப் பேசி சற்று வரம்பு மீறித்தான் சிந்தித்திருக்கிறான் செங்குட்டுவன்.

    அந்தச் சிந்தனையைத் திருத்தத்தான் வேண்டும். உலகுக்கும் புரிய வைக்கத்தான் வேண்டும். பெண்ணின் கற்பைப் பற்றி ஆண் பேசுவதே தவறு என்று இளங்கோவடிகள் கருதியிருக்க வேண்டும். அதனால்தான் ஒரு பெண்ணின் வாயிலாக “பெண்ணின் பெருந்தக்க யாவுள” என்று சொல்கிறார்.

    காதலன் துன்பம் காணாது கழிந்த
    மாதரோ பெரும் திரு உறுக, வானகத்து;
    அத்திறம் நிற்க, நம் அகல் நாடு அடைந்த இப்
    பத்தினிக் கடவுளைப் பரசல் வேண்டும்

    மேலே உள்ள வரிகள் சேரநாட்டரசி வேண்மாள் சொன்னவை. கற்பு பற்றி ஒரு பெண்ணின் கருத்தைப் பார்ப்போமே.

    கணவனோடு என்றும் உடன் நின்று, அவன் உயிரை விட்டதும் அவனுடனேயே ஒருத்தி உயிர் விட்டாள். அவள் பெரும் செல்வம் பெற்ற திருமகள். கணவனோடு அவள் விண்ணுலகில் என்றும் இருப்பதே அவளுக்குப் பிடித்த செல்வம். அதைத் தவிர எதுவும் அவளுக்குப் பிடிக்காது.

    ஆனால் கணவனுக்கு ஒரு குற்றம் இழைத்ததும் அதைத் தட்டிக் கேட்ட அறச் சீற்றத்தைக் கொண்டாளே.. அவளே பத்திக் கடவுள். அவளுடைய அந்தத் திறமே கற்பெனும் திண்மை. அவளுக்கே கோயில் கட்ட வேண்டும். அந்தக் கோயிலைப் பார்க்கின்றவர்களுக்கெல்லாம் குற்றத்தைத் தட்டிக் கேட்கும் எண்ணம் வரவேண்டும்.

    கோப்பெருந்தேவியின் இடத்தில் சீதையையும் பொருத்திப் பார்க்கலாம். அவளும் கணவனோடு சென்ற இடமெல்லாம் சென்றவள்தான். அவளுக்கு எது பொருத்தமாகவும் பிடித்தமானதாகவும் இருக்கும்? சற்று சிந்தித்துப் பாருங்கள்.

    மறுபடியும் வைரமுத்து எழுதிய இந்த வரிகளைப் பாருங்கள். ஒரு புதிய பரிமாணம் புலப்படுமே!
    கண்ணகி சிலைதான் இங்குண்டு
    சீதைக்கு தனியே சிலை ஏது?

    அன்புடன்,
    ஜிரா

    136/365

     
    • rajinirams 1:10 pm on April 16, 2013 Permalink | Reply

      சீதைக்கு ஏராளமான கோயில்களில் தெய்வாம்சமான சிலையுள்ளது.கண்ணகிக்கு மெரினாவிலும் கேரளத்தில் மட்டுமே.மெரினா சிலையை யாரும் கும்பிடுவதில்லை.பலரது வீட்டில் பூஜையறையில் ராமர் படத்த்டன் கூடிய சீதை படத்தை வணங்கி வருகிறார்கள்.

    • amas32 (@amas32) 1:25 pm on April 16, 2013 Permalink | Reply

      ஆண்களே காவியங்களை இயற்றி வந்து விட்டதால் இந்த மாதிரி ஒரு எண்ணம் அன்று முதல் இன்று வரை சமுதாயத்தில் வேரூன்றி விட்டது. கற்பு என்பது என்ன? அது ஏன் பெண்ணுக்குத் தனிப்பட்ட ஒரு குணமாகிறது? அதுவும் தவிர பெண்ணின் பெருமை அந்த”கற்பில்” தான் அடங்கியிருப்பதாக ஒரு கருத்து ஆழ்ந்து, எல்லார் மனத்திலும் வேரூன்றி இருப்பதும் ஏனோ?

      சீதை உயிருடன் இருக்கிறாள் என்று கேட்ட மாத்திரத்தில் இராமனுக்குப் பாதி உயிர் திரும்பி வந்ததாம். அவள் கற்புக்கு எந்த வில்லங்கமும் வரவில்லை என்று தெரிந்ததும் மீதி உயிரும் வந்ததாம். சீதைக்கு நிகழ்ந்தது ஒரு விபத்து. அப்படியே அவள் களங்கப் பட்டிருந்தாலும் அவளை சிறை மீட்டு ஏற்றுக் கொள்பவனே சிறந்த ஆண் மகன். அங்கே ஒருத்தி இவனையே நினைத்து மாய்ந்து, உருகி, வெதும்பி ஏங்கிக் காத்துக் கிடக்கிறாள். அந்தத் தூய்மையான அன்புக்கு முன்னாடி கற்பு என்ன கற்பு!

      சேரன் செங்குட்டுவன் கேட்ட கேள்வியே தவறு. கோப்பெருந்தேவி கணவன் மேல் வைத்த அன்பால் அவன் இறந்த அடுத்த நொடி தானும் மாண்டாள். கண்ணகி கணவனுக்கு நேர்ந்த அநியாயத்தைக் கேட்டாள். அவனுக்கு இழைக்கப் பட்டது அநீதி என்று நிருபித்தாள். அதனால் ஏற்பட்ட அவளின் அறச் சீற்றம் மதுரையை எரித்தது. அவளிடம் இருந்த உண்மை ஊரை எரித்தது. கற்பு எங்கே வந்தது?

      கண்ணகி, சீதை இருவருமே நாம் வணங்கும் தெய்வங்கள். அதில் எந்த சந்தேகமும் இல்லை.

      amas32

    • Saba-Thambi 3:41 pm on April 16, 2013 Permalink | Reply

      ஏனோ கீழ்வரும் பாடல் நினைவுக்கு வருகிறது.

      ப டம்: எங்கள் தங்க ராஜா (1973)
      lyricicst: kannadasan
      voice: TMS
      http://www.raaga.com/player4/?id=231985&mode=100&rand=0.3056239024735987

      You tube link: http://www.youtube.com/watch?v=jjtm8DcfFxI

  • GiRa ஜிரா 11:36 am on January 1, 2013 Permalink | Reply
    Tags: கண்ணாடி, சிலப்பதிகாரம், , நிரஞ்சன் பாரதி   

    கண்ணாடி 

    நம்முடைய நண்பர் கவிஞர் நிரஞ்சன் பாரதி @poetniranjan எழுதிய ஒரு திரைப்படப் பாடலைக் கேட்டுக் கொண்டிருந்தேன். மங்காத்தா படத்தில் யுவன் ஷங்கர்ராஜா இசையில் வெளிவந்த பாடல் அது.

    கண்ணாடி நீ கண் ஜாடை நான்
    என் வீடு நீ உன் ஜன்னல் நான்
    என் தேடல் நீ உன் தேவை நான்
    என் பாடல் நீ உன் வார்த்தை நான்
    என் பாதி நீ உன் பாதி நான்
    என் ஜீவன் நீ உன் தேகம் நான்
    என் கண்கள் நீ உன் வண்ணம் நான்
    என் உள்ளம் நீ உன் எண்ணம் நான்

    பாடலின் சுட்டி – http://www.youtube.com/watch?v=Rj33vbsHtKU

    அழகான பாடல். புதிதாகத் திருமணமானவர்களுக்கான பாட்டு.

    இந்தப் பாட்டைக் கேட்கும் போது “கண்ணாடி” என்ற சொல் எந்தன் சிந்தனையைத் தூண்டியது. எத்தனையெத்தனை கண்ணாடி பாடல்கள். கண்ணாடி தொடாத கவிஞர்களே இல்லை என்று சொல்லலாம்.

    இந்தக் கண்ணாடி தமிழர்கள் பயன்பாட்டில் முன்பு இருந்ததா என்று முதல் கேள்வி.

    இருந்தது என்று திருப்பாவை படிக்கையில் புரிந்தது. “உக்கமும் தட்டொளியும் தந்து” என்று ஆண்டாள் பாடியது நினைவுக்கு வந்தது. இந்த வரியில் தட்டொளி என்பது கண்ணாடியைக் குறிக்கும்.

    தட்டொளி என்பதுதான் கண்ணாடிக்கு உரிய பழைய தமிழ்ப் பெயரா என்ற ஐயத்தோடு இலக்கியங்களைத் தேடிய போது அரிய விடைகள் கிடைத்தன.

    கண்ணாடி என்ற சொல் ஐம்பெருங்காப்பியங்களிலேயே இருந்திருக்கிறது. அப்படியிருக்க பின்னாளில் ஆண்டாள் தட்டொளி என்ற சொல்லை ஏன் பயன்படுத்தினாள் என்று தெரியவில்லை. சங்க இலக்கியங்களில் கண்ணாடி பற்றியும் தேடிப்பார்க்க வேண்டும்.

    சரி.. ஐம்பெருங்காப்பியங்களுக்கு வருவோம். அதிலும் முதற் காப்பியமான சிலப்பதிகாரத்திற்கு வருவோம்.

    முகம் பார்க்கும் கண்ணாடியை ஆடி என்றே இளங்கோவடிகள் குறிப்பிடுகிறார்.

    கோப்பெருந்தேவிக்கு அன்றைய நாள் நல்ல நாளாகவே இல்லை. கண்ட கண்ட கனவுகள். ஒன்றாவது நன்றாக இல்லை. ஏதோ ஒரு தவறு நடக்கப் போவது போல ஒரு குறுகுறுப்பு. அந்த உணர்வுகளைக் கணவனோடு பகிர்ந்து கொள்ள வருகிறாள். அப்போது அவளுடைய பணியாளர்கள் அவளுக்குத் தேவையான பொருட்களைக் கையோடு கொண்டு வருகிறார்கள். கிட்டத்தட்ட ஒரு சினிமா நடிகையின் மேக்கப் உதவியாளர்கள் போல.

    ஆடியேந்தினர் கலனேந்தினர்
    அவிர்ந்துவிளங்கும் அணியிழையினர்
    கோடியேந்தினர் பட்டேந்தினர்
    கொழுந்திரையலின் செப்பேந்தினர்
    வண்ணமேந்தினர் சுண்ணமேந்தினர்
    மான்மதத்தின் சாந்தேந்தினர்
    கண்ணியேந்தினர் பிணையலேந்தினர்
    கவரியேந்தினர் தூபமேந்தினர்

    ஆடி ஏந்தினர் – கண்ணாடி ஏந்தி வந்தார்கள்
    கலம் ஏந்தினர் – அணிகலன்களை ஏந்தி வந்தார்கள்
    அவிர்ந்து விளங்கும் அணியிழையினர் – நல்ல அணிமணி அணிந்த ஊழியப் பெண்கள்
    கோடி ஏந்தினர் – புதுத்துணிகளை ஏந்தி வந்தார்கள்
    பட்டு ஏந்தினர் – பட்டுத் துணிகளை ஏந்தி வந்தார்கள்
    கொழும் திரையலின் செப்பு ஏந்தினர் – நல்ல கொழும் வெற்றிலைப் பெட்டியை ஏந்தினர்
    வண்ணம் ஏந்தினர் – வண்ண வண்ணப் பொடிகளையும்
    சுண்ணம் ஏந்தினர் – வெண்ணிறச் சுண்ணத்தைப் பூசிக் கொள்வதற்கும் ஏந்தி வந்தார்கள்

    அடேங்கப்பா என்னவொரு பட்டியல். அரசியோடு எப்பவும் ஒரு கூட்டம் இருந்து கொண்டேயிருந்திருக்கும் போல.

    ஏந்திய பொருட்களில் முதற் பொருளாகச் சொல்லப் படுவதே ஆடிதான். அடிக்கடி முகத்தைப் பார்த்து ஒப்பனை செய்கிறவள் போல கோப்பெருந்தேவி.

    சரி. கண்ணாடி(Mirror) என்பது முகம் பார்ப்பதற்கு மட்டுமல்ல. Glass என்ற பொருளிலும் வருமே. ஆம். வருகிறது. சீவக சிந்தாமணி காட்டுகிறது அதையும். அந்தப் பாடலில் திருத்தக்க தேவர் சொற்சிலம்பமே ஆடியிருக்கிறார் என்றால் மிகையாகாது. எத்தனை கண்ணாடி வருகிறதென்று பாருங்கள்.

    கண்ணாடி யன்ன கடிமார்பன் சிவந்து நீண்ட
    கண்ணாடி வென்று களங்கண்டு நியம முற்றிக்
    கண்ணாடி வண்டு பருகுங்கமழ் மாலை மூதூர்க்
    கண்ணாடி யானை யவர்கைதொழச் சென்று புக்கான்

    ரொம்பவும் விளக்காமல் நேரடியாகப் பொருள் கொடுக்கிறேன். படித்து ரசியுங்கள்.

    கண்ணாடி அன்ன கடி மார்பன் சிவந்து நீண்ட
    கண் ஆடி வென்று களம் கண்டு நியமம் முற்றிக்
    கள் நாடி வண்டு பருகும் கமழ் மாலை மூதூர்க்கண்
    (கண்) ஆடு யானையவர் கை தொழச் சென்று புக்கான்

    கண்ணாடி போன்ற மார்புடைய சீவகன் தன்னுடைய சிவந்து நீண்ட கண்களால் ஆடி (பார்வையிட்டு) போரிட்டு வென்ற போர்க்களத்தைக் கண்ட பின்னர், போர் முடிந்த பின் செய்ய வேண்டிய நியமங்களை முடித்து விட்டு, கள் நாடி வந்து வண்டுகள் பருகும் மணமிகுந்த மாலைகள் நிறைந்த பழம் பெருமை மிக்க ஊருக்குள், வெற்றியானை கொண்டோரெல்லாம் கை தொழும் வகையில் புகுந்தான்.

    அதாவது வெற்றி பெற்ற சீவகன் தான் வென்ற ஊருக்குள் நுழைந்ததை நான்கு கண்ணாடிகளை வைத்து அழகாகச் சொல்லியிருக்கிறார் திருத்தக்க தேவர்.

    இளங்கோவும் திருத்தக்க தேவரும் பின்னாளில் ஆண்டாளும் தொடர்ந்த பாரம்பரியத்தை பாரதியின் வாரிசான கவிஞர் நிரஞ்சன் பாரதியும் தொடர்வதுதான் சிறப்பு.

    அன்புடன்,
    ஜிரா

    031/365

     
    • Rie 12:36 pm on January 1, 2013 Permalink | Reply

      CSS நீ, HTML நான் என்று ஃபேஸ்புக்கில் ஒரு வாசகம் பார்த்தேன்.

      • Niranjan 1:47 pm on January 1, 2013 Permalink | Reply

        என் பாடலைப் பற்றி இந்த வலைப்பூவில் எழுதிய ஜீரா அவர்களுக்கு என் நெஞ்சார்ந்த நன்றி. கண்ணாடி பற்றி எத்தனை தகவல்கள். ஆஹா !! படிக்கப் படிக்க சுவை கூடிக் கொண்டே இருந்தது.

  • GiRa ஜிரா 10:51 am on December 26, 2012 Permalink | Reply  

    இஞ்சி 

    “என்னடா படிக்கிற? அமைதியா உக்காந்திருக்க. வாய் விட்டுப் படிச்சாத்தான் மண்டைல ஏறும்”

    நான் சொன்னதும் வாய் விட்டுப் படிக்கத் தொடங்கினான் மகன்.

    ”செம்பிட்டுச் செய்த இஞ்சித் திருநகர்ச் செல்வந் தேறி
    வம்பிட்ட தெரிய லெம்மு னுயிர்கொண்ட பகையை வாழ்த்தி”

    ”என்னடா இது?”

    “மனப்பாடச் செய்யுள். கம்பராமாயணம்.”

    ”சரி. படி. படி”

    ”அப்பா ஒரு சந்தேகம். இஞ்சித் திருநகர்னு போட்டிருக்கே. இலங்கைல இஞ்சி நெறைய வெளயுமா?”

    ”இலங்கையில் இஞ்சி வெளையும். ஆனா அந்த இஞ்சி வேற. இந்தப் பாட்டுல வர்ர இஞ்சி வேற. இந்த இடத்துல இஞ்சின்னா மதில். செம்பிட்டுச் செய்த இஞ்சின்னா செம்பு கலந்து கட்டப்பட்ட மதிற்சுவர்னு பொருள். படி. படி.”

    மதியம் சாப்பிடும் போது தயிர் ஊற்றிக் கொள்ளும் போது தட்டில் மாங்காய் இஞ்சி ஊறுகாய் விழுந்தது. மிக எளிதான ஊறுகாய். உடனடி ஊறுகாயும் கூட. கழுவிப் பொடிப்பொடியாய் நறுக்கிக் கொள்ள வேண்டும். மிளகாய்ப் பொடி கலந்து லேசாய்த் தாளித்து எலுமிச்சம்பழம் பிழிந்தால் தீடீர் ஊறுகாய் தயாராகிவிடும்.

    சாப்பிட்டுக் கையைக் கழுவிய பின்னரும் இஞ்சியை மனதிலிருந்து கழுவ முடியவில்லை. தமிழ் இலக்கியத்தில் இஞ்சி எத்தனை இடங்களில் வருகிறது என்று யோசித்தேன். பொதுவாகவே வளமையைக் குறிக்கும் இடங்களில் எல்லாம் இஞ்சி விளையும் என்று சொல்வார்கள்.

    சிலப்பதிகாரத்திலும் இஞ்சி இருக்கிறது. “மஞ்சளு மிஞ்சியு மயங்கரில் வலயத்து” என்கிறார் இளங்கோவடிகள். மிக அழகான வரி இது. பிரித்துச் சொல்கிறேன். எளிதாகப் புரியும்.

    மஞ்சளு மிஞ்சியு மயங்கரில் வலயத்து = மஞ்சளும் இஞ்சியும் மயங்கு அலரில் வலயத்து
    மயங்கு = மயக்கம் (பின்னிக்கொண்டு)
    அலர் = பெருமளவில் விரிந்து (நிறைந்து)
    வலயம் = வரப்பு

    மயக்கம் என்பது கலத்தலைக் குறிக்கும். பிரிக்க முடிந்த சேர்க்கை கலப்பு எனப்படும். பிரிக்க முடியாத சேர்ப்பு மயக்கம் எனப்படும். அரிசியும் கல்லும் கலக்கும். இன்பத்திலோ துன்பத்திலோ மனது மயங்கும். அப்படி நிலத்துக்கடியில் இஞ்சியும் மஞ்சளும் ஒன்றோடொன்று பிண்ணைப் பிணைந்து நிறைந்து வளம் கொளிக்கும் வரப்பு என்று பொருள்.

    இதில் ஒரு தகவல் உள்ளது. இஞ்சியும் மஞ்சளும் நிலத்துக்கடியில் விளைகின்றவை என்றாலும் இரண்டுக்கும் வேறுபாடு உள்ளது. மஞ்சள் கிழங்கு வகை. ஆனால் இஞ்சியோ வேர். திடீர் ஊறுகாய் மாங்காய் இஞ்சியும் வேர்தான்.

    இஞ்சியானது நிலத்திலிருக்கும் நீரை உறிஞ்சி உள்ளிழுத்து தன்னுடய செடிக்குக் கொடுக்கிறது. அப்படிச் செய்வதால்தான் அதற்கு இஞ்சி என்றே பெயர். இஞ்சுதல் என்றால் உறிஞ்சுதல் அல்லது உள்ளிழுத்தல். இப்போது புரிந்திருக்குமோ இஞ்சிக்கு அந்தப் பெயர் வந்த காரணம். இந்த இஞ்சி சுள்ளெனக் காய்ந்தால் சுள்+கு = சுட்கு. அதாவது இன்றைய சுக்கு.

    இந்த இஞ்சிவேர்தான் லத்தீனில் Gingiber ஆகி கிரேக்கத்தில் Gingibers ஆகி இப்போதைய Ginger ஆகியிருக்கிறது.

    நீரை உள்ளே உறிஞ்சி இழுக்கும் வேருக்கு இஞ்சி என்று பேர் வைத்தவன் அறிவை என் மனம் அசை போட்டது.

    ”அப்பா படிச்சிட்டேம்ப்பா… டீவி போடப் போறேன்” என்று கத்திக் கொண்டே தொலைக்காட்சியிடம் ஓடினான் மகன்.

    இஞ்சி இடுப்பழகி மஞ்சச் செவப்பழகி (படம்-தேவர்மகன், பாடல்-வாலி, இசை-இளையராஜா) என்று கமலஹாசன் பாடிக் கொண்டிருந்தார்.

    அட முருகா!

    அன்புடன்,
    ஜிரா

    025/365

     
    • @RRSLM 11:49 am on December 26, 2012 Permalink | Reply

      அருமை! வெகு அழகா சொல்லிருகீங்க GiRa! நிறைய புது தகவல்! தெரிந்து கொண்டதில் மிக்க மகிழ்ச்சி.

      • niranjanbharathi 10:13 pm on December 26, 2012 Permalink | Reply

        அருமை ஜீரா. விளக்கம் ரொம்ப பிரமாதம். எப்பேர்ப்பட்ட மொழி நம் தமிழ்மொழி ?

        • GiRa ஜிரா 9:11 pm on December 29, 2012 Permalink

          தமிழை எடுத்து விளையாட விளையாட.. ஆகா.

    • தேவா.. 12:38 pm on December 26, 2012 Permalink | Reply

      வாலி, இஞ்சி இடுப்பழகி என்று மதில் என்ற அர்த்ததில் உபயோகித்தாரா? வாலியின் ஒரு சில வார்த்தை பிரயோகம் அவருக்கு மட்டுமே தெரியும்… மற்றும் ஒரு பாடல் எனக்கு விளங்காத அர்த்ததுடன், லவ்னா..லவ்வு மண்ணெண்னெய் ஸ்டவு……. 🙂

      • mokrish 1:07 pm on December 26, 2012 Permalink | Reply

        மண்ணெண்ணெய் ஸ்டவ் மாதிரி லவ்வும் பத்திக்கிச்சு என்று சொல்கிறாரோ?

    • BaalHanuman 1:27 am on December 27, 2012 Permalink | Reply

      இஞ்சி இடுப்பழகு என்றால் என்ன?

      இடுப்பு இஞ்சி போன்று இருக்குமா? அப்படியென்றால் கிளை கிளையாக அல்லவா இடுப்பு கிளைத்திருக்க வேண்டும்! பின் ஏன் இஞ்சியிடுப்பழகு என்கின்றனர்?

      இஞ்சி நம் உடல் நலம் காக்கும் உன்னத உணவுப் பொருள். இஞ்சிச்சாற்றை, காலையில் தினந்தோறும் பருகிவந்தால் வயிற்றில் உள்ள தேவையில்லாத கொழுப்புச் சதையைக் குறைத்துவிடும். இடுப்பிலுள்ள தேவையற்ற சதைகள் குறையும்போது இடுப்பு அழகாக இருக்கும். தோள்பகுதி அகன்றும் இடுப்புப் பகுதி சுருங்கியும் இருப்பதுதான் உடல் நலத்தின் அடையாளம்; உடல் அழகின் அடையாளம். அதை இஞ்சி செய்வதால், இஞ்சி இடுப்பழகு என்றனர்.

      –http://www.periyarpinju.com/new/mar-2011/100-2011-05-31-09-16-09.html

    • mokrish 9:48 am on December 27, 2012 Permalink | Reply

      /இஞ்சியோ வேர்/ – அப்படியா வேருக்கும் வாசம் வந்தது வெட்டி வேர் மட்டும் இல்லையா?

      • GiRa ஜிரா 9:10 pm on December 29, 2012 Permalink | Reply

        இல்லை. இஞ்சிக்கும் உண்டு வாசம். அத்தோடு ரோசம் (காரம்). 🙂

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel