Updates from October, 2013 Toggle Comment Threads | Keyboard Shortcuts

  • mokrish 7:04 pm on October 29, 2013 Permalink | Reply  

    பூமாலையும் பாமாலையும் 

    சென்னை பாண்டி பஜாரில் சாலையோரத்தில் உள்ள பூக்கடைகள் அகற்றப்படலாம் என்று ஒரு செய்தி படித்தேன். நடைபாதை வியாபாரிகள் , வழக்கு, தீர்ப்பு – இவை தவிர சுவாரசியமான ஒரு தகவல் கண்ணில் பட்டது. ‘Petal Rose’ மாலைக்கு ஜோதிகா மாலை என்று பெயர்., பெரிய ரோஜா மாலைக்கு ‘படையப்பா’ மாலை என்று பெயர். சம்பங்கி, விரிச்சி, வாடாமல்லி கொண்டு காட்டப்படும் மாலைக்கு ஆண்டாள் மாலை என்று பெயர்.

    ஆண்டாள் என்றாலே முதலில் அவள் சூடிய பூமாலைதான் நினைவுக்கு வரும். எம்பெருமான் மேல் ஆழ்ந்த பக்தியும் காதலும் கொண்டவள். ஆழ்வார் எம்பெருமானுக்கு கட்டிய மாலையைச் சூடி மகிழ்ந்தவள். மணப்பருவம் வந்தவுடன் தட்டுச் சேலையணிந்து, பருத்த செங்கழுநீர் மாலை சூடி, அன்ன நடையிட்டு அரங்கனோடு சேர்கிறாள். அதனால் ஆண்டாள் மாலை ஸ்பெஷல் தான். இன்றும் மதுரையில் நடைபெறும் சித்திரை திருவிழாவின் போது வைகை ஆற்றில் இறங்க வரும் கள்ளழகர் சூடுவது ஆண்டாளின் அழகு மாலைதான். ஒவ்வொரு ஆண்டும் புரட்டாசி பிரம்மோற்சவத்தின் போது திருவேங்கடமுடையவனுக்கு ஸ்ரீவில்லிபுத்தூரில் இருந்து ஆண்டாளின் மாலை செல்கிறது.

    கண்ணதாசன் பாடல்களில் ஆண்டாள் பற்றிய reference நிறைய உண்டு. மணக்கோலத்தில் இருக்கும் நாயகியைப் பாடும் பல வரிகளில் கோதை வர்ணனை இருக்கும். ஆனால் டீச்சரம்மா என்ற படத்தில் இந்த ஆண்டாள், மாலை என்பதை ஒரு காதல் முக்கோணத்தில் பயன்படுத்திய விதம் அருமை. தோழிகள் இருவரும் நாயகன் மேல் காதல் கொள்ள, ஒரு பெண் விட்டுக்கொடுக்கும் காட்சியமைப்பு (இசை டி ஆர் பாப்பா பாடியவர் பி சுசீலா)

    http://www.palanikumar.com/filmsongdetails_tamil.phtml?filmid=1367&songid=4737

    சூடிக் கொடுத்தவள் நான் தோழி

    சூட்டிக் கொண்டவளே நீ வாழி

    பாடிக் கொடுத்தவள் நான் தோழி

    பாட்டை முடித்தவள் நீ வாழி

    ஆண்டாள் தந்த பூமாலை பாமாலை இரண்டையும் வைத்து ஒரு ஆரம்பம். இதில் தோழி வாழி எல்லாம் சற்று மாற்றினால் ஆண்டாள் அரங்கன் மேல் பாடுவது போல் பொருள் வரும்

    மாலை தொடுத்து மலர் கொண்டு

    மஞ்சள் குங்குமச் சிமிழ் கொண்டு

    ஏழை எழுந்தேன் எனக்கென்று – அந்த

    இறைவன் முடித்தான் உனக்கென்று

    கதையை, காட்சியை உள்வாங்கி கண்ணதாசன் ஒரு பாடல் எழுதி கதையை நகர்த்துவார். பல வருடங்கள் கழித்து பாடல் வரிகளை மட்டும் கேட்டாலும் காட்சி மனதில் விரியும். அது ஒரு அபார வித்தை

    மோகனகிருஷ்ணன்

    331/365

    Advertisements
     
    • rajinirams 8:00 pm on October 29, 2013 Permalink | Reply

      அருமை.எனக்கு உடனே நினைவு வந்த வரிகள்- சூடி கொடுத்தாள் பாவை படித்தாள்,சுடராக எந்நாளும் தமிழ்வானில் ஜொலித்தாள்-கோதை ஆண்டாள் தமிழை ஆண்டாள் கோபாலன் இல்லாமல் கல்யாணம் வேண்டாள்.கன்னித்தமிழ் ஆவி தன் காதல் மலர் தூவி மாலையிட்டாள்-மல்லிகை முல்லை..கண்ணதாசன்.

    • Uma Chelvan 8:13 am on October 30, 2013 Permalink | Reply

      ஆம், கோதையின் பாடல்கள் அனைத்தும் தேன்தான். அதிலும் ” ஆழி மழை கண்ணா , ஒன்று நீ கைகரவேல் , ஆழியுள் புக்கு முகந்து கொடு ஆர்த்தேறி” …. எனக்கு மிகவும் பிடித்த ஒன்று.

      சூடி தந்த சுடர் கொடியே
      சோகத்தை நிறுத்திவிடு
      நாளை வரும் மாலை என்று ……………….

      மார்கழி திங்கள் அல்லவா.
      மதி கொஞ்சும் நாள் அல்லவா -இது
      கண்ணன் வரும் பொழுது அல்லவா
      ஒரு முறை உனது திருமுகம்
      பார்த்தால் விடை பெரும் உயிர் அல்லவா !!!

    • amas32 7:40 pm on October 31, 2013 Permalink | Reply

      பிராமணத் திருமணங்களில் மணப்பெண் மாலை மாற்றும் வேளையில் ஆண்டாள் மாலை தான் அணிந்துக் கொண்டு வருவாள். சாதா மாலை போல கீழே முடிந்து செண்டு இருக்காது. ஓபனாக இருக்கும். மாலை மாற்ற வசதி.

      ஆண்டாள் ராதை போல் ஒரு ஒப்பற்ற அன்பு தேவதை. அவர்கள் இருவரும் சொல்லிக் கொடுத்ததெல்லாம் இறைவன் பால் எப்படி தூய அன்பு செலுத்த வேண்டும் என்பது தான். Also unconditional love.

      ரொம்ப அருமையானப் பதிவு 🙂

      amas32

  • mokrish 7:54 pm on October 23, 2013 Permalink | Reply  

    இருவர் ஒன்றானால் ஒருவர் என்றானால் 

    அன்றொரு நாள் ட்விட்டரில் ஒரு அட்டகாசமான வெண்பா விளையாட்டு. நண்பர் @nchokkan கண்ணன் பற்றி வெண்பா எழுத நண்பர் @elavasam அதில் ஒரு கேள்வி கேட்க — இவர் பதில் சொல்ல என்று பரபரப்பான one day மாட்ச்  போல சுவாரசியமாக இருந்தது.

    எனக்கு வெண்பாவும் தெரியாது விருத்தமும் தெரியாது. ஆனால் விவாதிக்கப்பட்ட விஷயம் கண்ணனும் ராமனும். கண்ணன் பற்றிய பாட்டில் ஏன் ராமர் பற்றிய Reference என்று முதல் கேள்வி.. இருவரும் ஒன்றுதானே என்று ஒரு பதில். தப்பு செய்தவன் ஒருவன் மாட்டிக்கொண்டவன் வேறொருவன் என்று ஒரு மறுமொழி.  ஒரே பாட்டில் பல அவதாரங்கள் என்று ஒரு தனி track. அட அட

    அதே கேள்விகளுக்கு நாமும் பதில் தேடலாம் என்று ஒரு (விபரீத) ஆசை. ஆண்டாள் திருப்பாவையில் கொக்கு உருவத்தில் வந்த பகாசுரனை வதம் செய்த கண்ணனைக் குறித்தும், பொல்லா அரக்கனாகிய ராவணனைக் கொன்ற ராமனைக் குறித்தும்

    புள்ளின்வாய் கீண்டானைப் பொல்லா வரக்கனைக்

    கிள்ளிக் களைந்தானைக் கீர்த்திமை பாடிப்போய்ப்

    என்று ஒரே பாசுரத்தில் பாடியுள்ளதாகப் படித்தேன். மணாளன் எப்படி இருக்க வேண்டும் ஆண்டாள் கலங்குகிறாள். கண்ணனா ராமனா ? கண்ணுக்கு இனிய கண்ணனுக்கு ஒரு வரி மனத்துக்கு இனிய ராமனுக்கு ஒரு வரி என்று மாறி மாறி உருகுகிறாள்.  கண்ணதாசன் சுமைதாங்கி என்ற படத்தில் ஒரு matrimonial விளம்பரம் போல எழுதுகிறார் (இசை விஸ்வநாதன் ராமமூர்த்தி பாடியவர் எஸ் ஜானகி)

    http://www.youtube.com/watch?v=lsY6sJPpAF0

    ராதைக்கேற்ற கண்ணனோ

    சீதைக்கேற்ற ராமனோ

    கோதைக்கேற்ற கோவலன் யாரோ அழகு

    கோதைக்கேற்ற காவலன் யாரோ

    அன்னை இல்லம் படத்தில் நடையா இது நடையா என்ற பாடலிலும் (இசை கே வி மகாதேவன் பாடியவர் டி எம் எஸ்) பொருத்தம் பார்க்கிறார்.

    தேரோட்டும் கண்ணனுக்கு ராதா

    சிங்கார ராமனுக்கு சீதா

    காரோட்டும் எனக்கொரு கீதா

    கல்யாணம் பண்ணிக்கொள்ளத் தோதா

    நம்மாழ்வார்  ராமன் கூனி மேல் மண் உருண்டை எறிந்த பழியை

    மானேய் நோக்கி மடவாளை மார்வில் கொண்டாய் மாதவா

    கூனே சிதைய வுண்டைவில் நிறத்தில் தெறித்தாய் கோவிந்தா!

    என்ற பாடலில் கண்ணன் மேல் போடுகிறார். .

    ராமன் ஒரு வகை கண்ணன் ஒரு வகை என்பது ஆண்டாள் கட்சியா? நம்மாழ்வார் அதெல்லாம் இல்லை இருவரும் ஒன்றே என்கிறாரா? இன்னும் நிறைய படிக்க வேண்டும்.

    கண்ணதாசன் அந்த Bride / Bridegroom தேவை என்பதையெல்லாம் தள்ளிவைத்து இருவேடம் போட்டாலும் திருமால் ஒன்றே என்று உயர்ந்தவர்கள் படத்தில் (இசை சங்கர் கணேஷ் பாடியவர் எம் பாலமுரளிகிருஷ்ணா)

    http://www.palanikumar.com/filmsongdetails.phtml?filmid=2697&songid=13160

    ராமனும் நீயே கிருஷ்ணனும் நீயே

    ராதையின் வடிவம் சீதையும் தாயே

    நால் வேதம் அவனாக உருவானதோ

    நாலாகும் குணம் பெண்மை வடிவானதோ

    என்று சொல்கிறார்.

    தசாவதார வரிசை ஒரு evolution செய்தி சொல்லும் என்று படித்தேன் . முதலில் நீர் வாழ் உயிரினம் அடுத்து ஒரு amphibian அப்புறம் ஒரு நிலத்தில் வாழும் வராகம் அடுத்து கொஞ்சம் மிருகம் கொஞ்சம் மனிதன் என்று அது ஒரு அழகான வரிசை. இதில் ராமனுக்கு அடுத்து கண்ணன். இதில் இருக்கும் evolution செய்தி என்ன?

    மோகனகிருஷ்ணன்

    325/365

     
    • amas32 8:12 pm on October 23, 2013 Permalink | Reply

      மோகனக்ரிஷ்ணனனான உங்களுக்கு அது விளங்காதா? 😉 இராமன் ரூல்ஸ் ராமனுஜன். கிருஷ்ணன் சகலகலா வல்லவன். அடுத்த பரிணாம வளர்ச்சி அதுவாகத் தானே இருக்க வேண்டும். ஆறு அறிவுள்ள மனிதன் இன்னும் இன்னும் சாமர்த்தியத்தையும் செயல் திறனையும் அதிகப் படுத்திக் கொள்ள வேண்டிய நிலையை இன்று நாம் கண் கூடாகப் பார்க்கவில்லையா? அதைத் தான் கிருஷ்ணனின் அவதாரம் நமக்குக் கட்டியுள்ளது. இன்றைய காலக் கட்டத்திற்குத் தேவையான நெளிவு சுளுவோடு வாழ கிருஷ்ணன் கற்றுத் தருகிறார் என்பது என் தாழ்மையானக் கருத்து.

      இராமனின் வாழ்க்கை ஒரு பாடம். கிருஷ்ணன் உபதேசம் செய்யவே அவதாரம் எடுத்தார். சிலது கேட்டுத் தான் கற்றறிய முடியும். அதை நமக்கு அருளியவர் கண்ணன்.

      அருமையானப் பாடல்கள் :-)) நன்றி!

      amas32

    • rajinirams 7:35 pm on October 24, 2013 Permalink | Reply

      ராமன்,கிருஷ்ணன் என்ற அவதாரங்களை வைத்து அருமையான பதிவை தந்திருக்கிறீர்கள்.
      “டபுள்ஸ்”படத்தில் நாயகனை-ராமனாக சித்தரித்து மனைவியும் கிருஷ்ணனாக காதலியும் நினைத்து பாடும் வைரமுத்துவின் பாடல் நன்றாக இருக்கும். “ராமா ராமா ராமா சீதைக்கேத்த ராமா உன் வில்லாய் நானும் வந்தேன் அம்பு பூட்டடா… கிருஷ்ணா கிருஷ்ணா உன் புல்லாங்குழலாய் வந்தேன் நீ வாசிடா என்று வரும். தசாவதாரம் படத்தில் வாலியின் வரிகள் “ராவணன் தன் தலையை கொய்ய ராமனாக வந்தாய்,கண்ணனாக நீயே வந்து காதலையும் தந்தாய்”.இன்னொரு பாடல் வரிகள்: ஒருத்திக்கு ஒருவன் என்ற தத்துவமே ஸ்ரீ ராமன்,காதல் உணர்வுக்கு பேதமில்லை என்றவனே பரந்தாமன், ஸ்ரீ ராமனாக நாயகியோடு வாழ்வது ஓரின்பம்,ஸ்ரீ கிருஷ்ணனாக கோபியரோடு வாழ்வது பேரின்பம்-வீட்டிலே ராமன் வெளியிலே கிருஷ்ணன். http://youtu.be/XkM4zfgSBDg

  • என். சொக்கன் 10:30 pm on September 30, 2013 Permalink | Reply  

    காதல் கரம் 

    • படம்: இருவர்
    • பாடல்: ஹல்லோ மிஸ்டர் எதிர்க்கட்சி
    • எழுதியவர்: வைரமுத்து
    • இசை: ஏ. ஆர். ரஹ்மான்
    • பாடியவர்: ஹரிணி
    • Link: http://www.youtube.com/watch?v=JqgwTxDeOa8

    காதலா, காதலா, உனை நான் விடமாட்டேன்,

    கைத்தலம் பற்றுவேன், பிரிய விடமாட்டேன்,

    கண்கள் மீதாணை, அழகு மீதாணை, விடவே விடமாட்டேன்!

    ’கைத்தலம்’ என்ற சொல்லை நம்மிடையே மிகவும் பிரபலப்படுத்தியவர்கள், இரண்டு கவிஞர்கள். ஒன்று ஆண்டாள், இன்னொன்று அருணகிரிநாதர்.

    ’வாரணமாயிரம் சூழ வலம் செய்து நாரண நம்பி நடக்கின்றான்’ என்று கல்யாணக் கனவைச் சொல்லத் தொடங்கிய ஆண்டாள், ‘கைத்தலம் பற்றக் கனாக் கண்டேன்’ என்கிறாள்.

    ஆண்டாள் இப்படிக் காதலோடு பாட, அருணகிரிநாதர் பக்தி நெறி நிற்கிறார். ‘கைத்தல நிறை கனி, அப்பமோடு அவல் பொரி’ என்று பட்டியல் போட்டுப் பிள்ளையாரை அழைத்து வழிபடுகிறார்.

    உண்மையில் ‘கைத்தலம்’ என்றால் என்ன?

    இந்த இரண்டு பாடல்களிலும், வைரமுத்துவின் இந்தத் திரைப்படப் பாடலிலும் கைத்தலம் என்றால் உள்ளங்கை என்றுதான் அர்த்தம் தோன்றுகிறது. உள்ளங்கையைப் பற்றுவேன், உள்ளங்கையைப் பற்றக் கனாக்கண்டேன், உள்ளங்கையில் கனிகளை நிறைத்துவைத்தேன்’…

    ஆனால் ‘கைத்தலம்’ என்பது கையாகிய தலம், அதாவது முழுக் கையையும் குறிக்கும். உள்ளங்கையும் அதன் பகுதி என்பதால், அதையும் குறிக்கும்.

    கம்ப ராமாயணத்தில் ஒரு பாடல்.

    ஓர் இளம் பெண். இவளுக்கு இடை இருக்கிறதா, அல்லது பொய்யான தோற்றமா என்று மயக்கமே ஏற்படும் அளவுக்குச் ‘சிக்’கென்ற பேரழகி.

    அவளுடைய காதலன், அவளை நெருங்குகிறான், கட்டித் தழுவுகிறான்.

    ஆனால் அவளோ, ஏதோ ஞாபகத்தில் மூழ்கியிருக்கிறாள். இப்போது அவளுக்குக் காதல் விளையாட்டுகளில் ஆர்வம் இல்லை. அவனுடைய கைகளை விலக்கிவிடுகிறாள்.

    உடனே, அந்தக் காதலன் அதிர்ந்துபோகிறான், அவள் அவனுடைய கையை ஒதுக்கிவிட்ட செயல், அவன் நெஞ்சில் கூர்வாள் பாய்ந்ததைப்போல் இருந்தது என்கிறார் கம்பர்.

    ஓர் ஆணின் நெஞ்சம் இப்படிப் புண்ணாவதை அவர் விரும்புவாரா? ‘கைத்தலம் நீக்கினள், கருத்தின் நீக்கலள்’ என்று சமாதானப்படுத்துகிறார். அதாவது, கையைதான் விலக்கினாள், கருத்திலிருந்து அவனை நீக்கவில்லை.

    புரியலையா? அவ ஏதோ வேலை விஷயத்தை யோசிச்சுகிட்டிருக்காய்யா, டிஸ்டர்ப் பண்ணாதே, கொஞ்ச நேரம் டிவி பார்த்துட்டு வா, அப்புறமா ரொமான்ஸ் பண்ணலாம்!

    ***

    என். சொக்கன் …

    30 09 2013

    303/365

     
    • rajinirams 12:26 pm on October 1, 2013 Permalink | Reply

      கைத்தலம் என்றவுடனே நினைவுக்கு வருவது கைத்தலம் தந்தேன் என் கண்மணி வாழ்க என்ற கவியரசரின் பூ முடித்தாள் இந்த பூங்குழலி என்ற நெஞ்சிருக்கும் வரை படப்பாடல் தான்.கைத்தலம் பற்றி உள்ளங்கை நெல்லிக்கனியாய் விளக்கிய நல்ல பதிவு.நன்றி.

    • amas32 3:55 pm on October 1, 2013 Permalink | Reply

      கைத்தலம் என்பது அழகிய ஒரு சொல். வெறும் கைபிடித்துச் செல்லுதலைக் குறிக்காது தன்னையே ஒப்படைப்பதை/ஊன்றுகோலாகப் பற்றுவதைக் குறிப்பது போல தொனிக்கும். ஆண்டாள் பாசுரத்தின் பாதிப்போ என்னவோ? இந்தக் காதல் பாட்டில் கூட அப்படித் தான் வருகிறது. ஆனால் கைத்தல நிறை கனி என்று விநாயகரை நோக்கி அவ்வையார் சொல்லும்போது கை நிறைய என்று தான் தோன்றுகிறது.

      amas32

      • lotusmoonbell 4:17 pm on October 1, 2013 Permalink | Reply

        ‘கைத்தலநிறைகனி’ அருணகிரிநாதரின் திருப்புகழில் வருவது. அவ்வையின் பாட்டல்ல.

        • amas32 9:31 pm on October 1, 2013 Permalink

          ஆமாம் தவறு தான், அனைவரும் மன்னிக்க.

          amas32

        • என். சொக்கன் 8:50 pm on October 2, 2013 Permalink

          நான் செஞ்ச தப்புக்கு நீங்க ஏனுங்க மன்னிப்புக் கேட்கறீங்க? 🙂

    • Uma Chelvan 5:52 pm on October 1, 2013 Permalink | Reply

      புரியலையா? அவ ஏதோ வேலை விஷயத்தை யோசிச்சுகிட்டிருக்காய்யா, டிஸ்டர்ப் பண்ணாதே, கொஞ்ச நேரம் டிவி பார்த்துட்டு வா, அப்புறமா ரொமான்ஸ் பண்ணலாம்!…..::::))))டிவி பார்த்து டைம் ஏன் waste பண்ணனும்??? சமையலறைக்கு போய் எதாவது சமைக்கலாம் இல்ல?. வீட்லில் கூடமாட ஒத்தாசை பண்ணனும்னு எண்ணமே வராதே!!!!!!:::::))))

      • என். சொக்கன் 8:50 pm on October 2, 2013 Permalink | Reply

        அது வந்துட்டா நாங்க ஏன் இப்படி இருக்கோம்? :)))

  • mokrish 11:48 am on August 29, 2013 Permalink | Reply  

    கண்ணன் பிறந்தான் 

    இன்று கண்ணன் பிறந்த நாள். ஆவணிப் பொன்னாளில் ரோகிணி நன்னாளில் அஷ்டமி திதி பார்த்துக் கண்ணன் வந்த நாள்.

    அந்த ஒரு நாள் இரவில் நடந்த சம்பவங்கள்,  பல திருப்பங்கள் கொண்ட ஒரு த்ரில்லர். கடும் மழை பெய்ய, அருகிலிருந்த யமுனை ஆற்றில் வெள்ளம் பெருக்கெடுத்தோட, இருள் சூழ்ந்த ஒரு சிறைச்சாலைக்குள், குழந்தை ஒன்று பிறந்தது. இரவோடு இரவாக, தந்தையாகிய வாசுதேவர் அக்குழந்தையை ஒரு கூடையில் வைத்து, அதைத் தமது தலை மேல் சுமந்து கழுத்தளவு நீர் ஓடிய யமுனை ஆற்றைக் கடந்து, அக்கரை சென்று நந்தகோபரிடம் ஒப்படைத்தார்.

    ஒப்பற்ற தேவகியின் மகனாகப் பிறந்து அந்த இரவிலேயே மற்றோர் ஒப்பற்ற பெண்ணாகிய யசோதையிடம் வந்து வளர்ந்தாய்.என்று சொல்லும் ஆண்டாள் பாசுர வரிகள்

    ஒருத்தி மகனாய்ப் பிறந்து ஓர் இரவில்-

    ஒருத்தி மகனாய் ஒளித்து வளர

    யசோதைக்கு அடித்தது மிகப்பெரிய ஜாக்பாட். அந்த மாயன் கோபாலகிருஷ்ணனை,  ஈரேழு புவனங்கள் படைத்தவனை கையில் ஏந்தி சீராட்டி பாலூட்டி தாலாட்டும் பெரும்பாக்கியம் அவளுக்கு கிடைத்தது. இதை  பாபநாசம் சிவன் ஒரு அற்புதமான பாடலில் http://www.youtube.com/watch?v=efsqGgf2KUg

    என்ன தவம் செய்தனை யசோதா

    எங்கும் நிறை பரப்ரம்மம் அம்மா என்றழைக்க

    என்ன தவம் செய்தனை யசோதா

     என்ற வரிகளில் சொல்கிறார்.

    பிறந்தது ஓரிடம். வளர்ந்தது வேறிடம். இந்த core கருத்தை  கண்ணதாசன் அன்னை என்ற படத்தில் வரும் ஒரு காட்சிக்கு ஏற்றபடி கொஞ்சம் மாற்றி எழுதுகிறார் (இசை ஆர். சுதர்சனம், பாடியவர் பானுமதி)

    http://www.youtube.com/watch?v=wigeyu943kM

    பூவாகி காயாகிக் கனிந்த மரம் ஒன்று

    பூவாமல் காய்க்காமல் கிடந்த மரம் ஒன்று

    காய்க்காத மரத்தடியில் தேனாறு பாயுதடா

    கனிந்து விட்ட சின்ன மரம் கண்ணீரில் ஆடுதடா

    வளர்க்கும் அன்னையின் வாழ்வில் தேனாறு என்கிறார்

    பத்து மாத பந்தம் என்ற படத்தில் ‘இரண்டு தாய்க்கு ஒரு மகள்’ என்ற பாடலில் இதே கருத்தை மறுபடியும் சொல்கிறார். (இசை சங்கர் கணேஷ் பாடியவர் பானுமதி)

    ஒருத்தியின் கண்ணீரில் பிறந்தவள் கண்ணே நீ

    ஒருத்தியின் கையோடு வளர்ந்திட வந்தாய் நீ

    கண்ணனும் உனைப்போலே பிள்ளை தானம்மா

    பிறப்பும் வளர்ப்பும் வேறு வேறம்மா

    படத்தின் காட்சிக்கு ஏற்ற வரிகள். பாடல் வரிகளில் கண்ணன் கதையும் ஆண்டாள் பாசுரமும்  அடுக்கி எழுதுகிறார்.

    மோகனகிருஷ்ணன்

    271/365

     
    • pvramaswamy 11:57 am on August 29, 2013 Permalink | Reply

      All song selections superbly blend with excellent description. Great

    • Nagarajan 1:42 pm on August 29, 2013 Permalink | Reply

      annai – music by R Sudarsanam and not by KVM

    • rajinirams 3:06 pm on August 29, 2013 Permalink | Reply

      கிருஷ்ண ஜெயந்திக்கான பதிவு தாங்கள் இடுவதும் நல்ல பொருத்தமே:-)) தேவகி மகனாய் பிறந்து யசோதையிடம் வளர்ந்த கண்ணன் நிலையை வைத்து உருக்கமான பாடல்கள் கொண்ட நல்ல பதிவு. (பாடலின் சூழல் தெரியாது என்றாலும்) புகுந்த வீடு படத்தில் கவிஞர் வாலி எழுதிய “கண்ணன் பிறந்த வேளையிலே தேவகி இருந்தாள் காவலிலே” பாடலும் அருமையான பாடல். நன்றி.

    • Kennedynj 4:34 pm on August 29, 2013 Permalink | Reply

      wonderful research Mohan. Can feel your enjoying the old epics. Thanks for passing the benefit of your readings to us. These writings keeps us enlightened.

    • amas32 4:44 pm on August 29, 2013 Permalink | Reply

      யசோதை பிரசவித்தாள். குழந்தை மாறியது அவள் தவறல்லவே. ஆனால் பிரசவித்த தேவகி குழந்தையைப் பிரிந்து அந்த தெய்வக் குழந்தையின் பால பருவத்தை அனுபவிக்காமல் போனது அவளுக்குப் பெரும் இழப்பு தான்.

      பல சமயம் நாம் யசோதை குழந்தை பாக்கியம் இல்லாதவள், அவளுக்கு ஓசியில் குழந்தை பாக்கியம் கிடைத்த மாதிரி எண்ணுவோம்.

      அவளின் பாக்கியம் இறைவனை சீராட்டிப் பாலூட்டி வளர்த்து, நெஞ்சார அணைத்து, அவன் செய்யும் தவறுகளையும் தண்டிக்கும் பேற்றினைப் பெற்றது தான்.

      யசோதா – கிருஷ்ணன் உறவு என்னை மிகவும் நெகிழச் செய்யும்.

      அற்புதப் பாடல்கள் மோகன கிருஷ்ணா! நன்றி 🙂

      amas32

  • GiRa ஜிரா 4:42 pm on August 18, 2013 Permalink | Reply  

    ’இச்’சுவை 

    ஒரு இளம் டாக்டர் இருந்தார். எச்சில் பண்டங்களை விலக்கினாலே பாதி நோய் போய் விடும் என்று ஊருக்கெல்லாம் உபதேசித்துக் கொண்டிருந்தார்.

    அவருக்கும் காதல் வந்தது. காதல் வந்ததால் டாக்டரும் கவிஞரானார். காதலியிடம் சொல்வதற்காக ஒரு கவிதை எழுதினார்.

    எச்சில் பண்டம் விலக்கு
    அதில் முத்தம் மட்டும் விலக்கு

    எச்சில் பண்டங்களையெல்லாம் விலக்கச் சொன்ன அந்த டாக்டரே முத்தம் என்னும் எச்சில் பண்டத்துக்கு மட்டும் விதிவிலக்கு அளிக்கிறார். அதுதான் முத்தத்தின் வலிமை.

    அன்பை வெளிப்படுத்தும் எளிய முறைதான் முத்தம். முத்தமிடாத காதலர்கள் காதலின் சாபங்கள்.

    திரைப்படத்தில் முத்தக் காட்சிகளுக்காகவே பெயர் போன கமலஹாசன் எழுதி சங்கர் மகாதேவன் இசையமைத்த அந்தப் பாடல் விஸ்வரூபம் திரைப்படத்தில் இடம் பெற்றது.

    ஒன்றாக செய்திட ஒரு நூறு நாடகம் ,
    ஒத்திகைகள் செய்து எதிர்பார்த்து இருந்தேன்
    எதிர்பாராமலே அவன்………..
    எதிர்பாராமலே அவன்……. ஓ
    பின் இருந்து வந்து என்னை
    பம்பரமாய் சுழற்றி விட்டு
    உலகுண்ட பெருவாயன் – எந்தன்
    வாயோடு வாய் பதித்தான்

    உலகத்தையே படைத்தவனும் அந்த உலகத்தையே தன் வாயில் காட்டியவனும் ஆன ஆண்டவனுக்கே முத்தத்தை விலக்க முடியவில்லை. சாதாரண மானிடர்கள் என்ன செய்வார்கள்?!

    ஆண்களுக்கு மட்டும் தான் முத்தம் பிடிக்குமென்று யார் சொன்னது?

    கற்பூரம் நாறுமோ, கமலப்பூ நாறுமோ,
    திருப்பவளச் செவ்வாய்தான் தித்தித்திருக்குமோ

    இப்படி கவிதையாய்க் கதறி அழுததும் ஒரு பெண் தான். கிருஷ்ணனின் செங்கனியிதழின் சுவையை சுவைக்க விரும்புகிறாள். ஆனால் வாய்ப்புதான் கிடைக்கவில்லை. ஆண்டவர்களும் ஆள்பவர்களும் சாமானியர்களுக்காக இறங்கி வருவதில்லை என்பது ஆண்டாளுக்கே புரியவில்லை.

    வெண்ணை உண்டவன் வாய்ச்சுவை எப்படியிருக்கும்? அதில் கற்பூரம் மணக்குமோ? (அதென்ன சர்க்கரைப் பொங்கலா?) அல்லது தாமரை மலரின் மணம் வருமோ? (தாமரைக்குத்தான் மணமே கிடையாதே!) இல்லை தித்திப்பாகத்தான் இருக்குமோ? (பாயசம் குடித்த வேளையில் இந்த ஆயாச எண்ணம் தோன்றியிருக்குமோ!)

    ஆண்டாளாலால் முடிவுக்கு வர முடியவில்லை. முத்தச் சுவை எப்படியிருக்கும் என்று யாரைக் கேட்க முடியும்? கேட்டால் செருப்பால் அடிக்குமே சமூகம். அந்தக் கேசவனின் சங்கைக் கேட்கலாம் என்று முடிவுக்கு வருகிறாள்.

    அந்தச் சங்கை தானே வைகுந்தன் வாய் வைத்து ஊதுகிறான். அப்படியானால் அந்தச் சங்குக்கு பீதாம்பரனின் வாய்ச்சுவை தெரிந்திருக்க வேண்டுமல்லவா! அதனால்தான் சங்கிடம் கேட்கிறாள்.

    மருப்பொசித்த மாதவன் தன் வாய்ச்சுவையும் நாற்றமே
    விருப்புற்று கேட்கின்றேன் சொல் ஆழி வெண்சங்கே!

    இன்றைய கவிஞர்களில் முத்தத்தைப் பாடாத கவிஞர்களே இல்லை. எடுத்துப் பட்டியல் இட்டால் படத்துக்கொரு முத்தம் இருந்தாலும் ஆச்சரியப்படுவதற்கில்லை.

    பாடலின் சுட்டி – http://youtu.be/XuOgG2QWAgQ

    அன்புடன்,
    ஜிரா

    260/365

     
    • Uma Chelvan 7:04 pm on August 18, 2013 Permalink | Reply

      very nice write up………as you said, thousands of songs out there to discuss about this. One such a song in ………” நீல நதிக்கரை ஓரத்தில்
      நின்றிருந்தேன் ஒரு நாள்….
      உந்தன் பூவிதழ் ஈரத்தில்
      என்னை மறந்திருந்தேன்….பல நாள்!
      வானத்து மீன்களை மேகம் மறைத்தது போல்
      தினமும் எந்தன் மோகத்தை நாணத்தில்
      மூடி மறைத்திருந்தேன்..! ”
      (படம்: காக்கிச் சட்டை – பாடல்: பட்டுக்கன்னம்)

    • rajinirams 8:45 pm on August 19, 2013 Permalink | Reply

      இச்சை கொண்டு தாங்கள் போட்ட பதிவு மிக்க சுவை. பத்து பதினாறு முத்தத்தில் ஆரம்பித்தால் முத்தம் போதாதே.என்றும் எண்ணி சொல்லவா என் முத்தக்கணக்கு என பல முத்தப்பாடல்கள் உண்டு.திரையில் வந்த உதட்டு முத்த காட்சியென்றால் அது கமல்-காதரின் தோன்றிய சட்டம் என் கையில் படமே.இன்று வரை முத்த நாயகனாகவே இருக்கிறார். இதை வைத்து 4 நாட்களுக்கு முன் நான் போட்ட ட்விட்- திரையில் பல நடிகைகளின் வாய்க்கும் முத்தமிட கமலுக்கு மட்டுமே வாய்க்கும். நன்றி.

  • என். சொக்கன் 11:05 am on June 5, 2013 Permalink | Reply  

    கண்ணால கனவுகள் 

    • படம்: எங்க சின்ன ராசா
    • பாடல்: கொண்டச் சேவல் கூவும் நேரம்
    • எழுதியவர்: வாலி
    • இசை: சங்கர் கணேஷ்
    • பாடியவர்கள்: எஸ். பி. பாலசுப்ரமணியம், எஸ். ஜானகி
    • Link: http://www.youtube.com/watch?v=xXXUzmo_Az8

    அன்னாடம் வெளக்குவெச்சா, அத நெனச்சே எளச்சேனே!

    கண்ணாலம் முடியட்டுமே, அதுக்குதான் இருக்கேனே!

    நாள் கெழம ஒண்ணு பார்க்கணுமா?

    ஆக்கிவெச்சா தின்னு தீர்க்கணுமா?

    கல்யாணக் கனவுகளில் இருக்கும் ஒரு ஜோடி பாடுவதாக வரும் பாடல் இது. ’தினமும் மாலை வந்ததும் உன்னை நினைத்து என் உடல் இளைக்கிறது!’ என்கிறான் அவன், ‘என்ன அவசரம்? கல்யாணம் முடியட்டுமே!’ என்கிறாள் அவள்.

    ம்ஹூம், ‘கண்ணாலம் முடியட்டுமே’ என்கிறாள்.

    கிராமத்து ஜோடி, ‘கல்யாண’த்தைக் ‘கண்ணாலம்’ என்றுதான் சொல்வார்கள். இது ஒரு பெரிய விஷயமா?

    அவ்வளவு ஏன்? கல்யாணக் கனவுகளுக்காகவே புகழ் பெற்ற ஸ்ரீவில்லிப்புத்தூர் ஆண்டாள்கூட ஒரு பாடலில் ‘கண்ணாலம்’ என்ற வார்த்தையைப் பயன்படுத்தியிருக்கிறாள்:

    கண்ணாலம் கோடித்துக் கன்னி தன்னைக் கைப்பிடிப்பான்,

    திண் ஆர்ந்து இருந்த சிசுபாலன் தேசு அழிந்து

    அண்ணாந்து இருக்கவே ஆங்கு அவளைக் கைப்பிடித்த

    பெண்ணாளன் பேணும் ஊர், பேரும் அரங்கமே!

    நமக்கெல்லாம் தெரிந்த சினிமாக் கதைதான், கண்ணனைக் காதலித்தாள் ருக்மிணி. ஆனால், அவளுடைய தந்தை பீஷ்மகன் அவளைச் சிசுபாலனுக்குத் திருமணம் செய்துகொள்ளத் தீர்மானித்தான்.

    ‘என்னை மீறி யார் ருக்மிணிமீது கை வைக்கமுடியும்?’ என்று அந்தச் சிசுபாலன் தன் வலிமைமீது கர்வம் கொண்டிருந்த நேரம், அவன் அண்ணாந்து பார்த்துக்கொண்டிருக்கையில் ருக்மிணியைக் கொத்திக்கொண்டு போய்விட்டான் கண்ணன். அவன் எழுந்தருளிக் காக்கும் ஊர், ஸ்ரீரங்கம்!

    (பின்குறிப்பு: தலைப்பில் ‘க்’ விடுபட்டிருப்பது சந்திப் பிழையல்ல, சிலேடைக்காகச் செய்யப்பட்ட வம்புப் பிழை ;))

    ***

    என். சொக்கன் …

    05 06 2013

    186/365

     

     
    • anonymous 3:03 pm on June 5, 2013 Permalink | Reply

      //அன்னாடம் வெளக்குவெச்சா, அத நெனச்சே எளச்சேனே!//

      விளக்கு வைக்கறத்துக்கும், “இளைப்பதற்கும்” என்ன சம்பந்தம்?
      சரியாவே புரியல ஒங்க விளக்கம்; ஐயம் திரிபற விளக்குங்க:)))

    • anonymous 3:23 pm on June 5, 2013 Permalink | Reply

      //ஆண்டாள் கூட ஒரு பாடலில் ‘கண்ணாலம்’ என்ற வார்த்தையைப் பயன்படுத்தி யிருக்கிறாள்//

      அவ கெடக்குறா; my dear thozhi is லூசு:)
      மற்ற ஆழ்வார்களும், have used “கண்ணாலம்”

      நாடும் நகரும் அறிய – நல்லதோர் ** கண்ணாலம் ** செய்து
      வேடர் மறக்குலம் போலே – வேண்டிற்றுச் செய்து என்மகளை (பெரியாழ்வார்)

      ** கண்ணாலம் ** செய்யக் கறியும் கலத்து – அரிசியும் ஆக்கி வைத்தேன்
      கண்ணா நீ நாளைத் தொட்டுக் கன்றின் பின் போகேல்!
      கோலம் செய்து இங்கே இரு! (குலசேகராழ்வார்)
      ——–

      இதைத், தமிழில் “மரூஉ மொழி” என்பார்கள் (மருவுதல்)

      *கருப்புக் கட்டி = கருப்பட்டி
      *மேனிக்கேடு = மெனக்கேடு (மெனக்கெட்டுப் போயி)

      *சலிப்படை = சல்லடை
      *மதுரை =மருதை

      இடம் பிறழல், இடை நழுவல்,
      நீளல், குறுகல், குறைதல், திரிதல் -ன்னு வரும் மருவு மொழிகள்
      ———

      //அவன் எழுந்தருளிக் காக்கும் ஊர், ஸ்ரீரங்கம்!

      btw itz திருவரங்கம்:)
      ஆழ்வார்கள், எங்குமே ஸ்ரீரங்கம் -ன்னு பாடவே மாட்டாங்க!
      =அரங்கம் (இல்லீன்னா) திருவரங்கம்

      ஒரேயொரு இடத்தில் மட்டும்…
      ஸ்ரீதரன்; அதைக் கூடச் சிரீதரன் -ன்னு ஆக்கிடுவாரு அந்த ஆழ்வார்:) Just fyi:))

      • anonymous 3:30 pm on June 5, 2013 Permalink | Reply

        //(பின்குறிப்பு: தலைப்பில் ‘க்’ விடுபட்டிருப்பது சந்திப் பிழையல்ல, சிலேடைக்காகச் செய்யப்பட்ட வம்புப் பிழை//

        நீங்கள் செய்தது பிழையே அல்ல!
        காரணப் பெயரான் வந்த தொழில் படு கிளவி:))

        கண் + ஆலம்
        *ஆலம் = Ice (ஆலங்கட்டி மழை -ன்னு சொல்றோம்ல்ல)
        *கண் = கண்ணாலேயே Ice வைப்பதால் அல்லவோ, கண்ணாலம் நிகழ்கிறது?:)
        அதனால், உங்கள் கிளவியாக்கத்தை, “பிழை” என்று குறுக்கி விடாதீர்கள்:)))

    • amas32 12:01 pm on June 6, 2013 Permalink | Reply

      இது நாள் வரை கண்ணாலம் என்பது எங்கள் அழகிய சென்னை தமிழ் என்று நினைத்திருந்தேன். இப்பொழுது தான் தெரிகிறது அது தொன்மையான தமிழ் வார்த்தை என்று 🙂

      amas32

  • GiRa ஜிரா 11:36 am on January 1, 2013 Permalink | Reply
    Tags: கண்ணாடி, சிலப்பதிகாரம், , நிரஞ்சன் பாரதி   

    கண்ணாடி 

    நம்முடைய நண்பர் கவிஞர் நிரஞ்சன் பாரதி @poetniranjan எழுதிய ஒரு திரைப்படப் பாடலைக் கேட்டுக் கொண்டிருந்தேன். மங்காத்தா படத்தில் யுவன் ஷங்கர்ராஜா இசையில் வெளிவந்த பாடல் அது.

    கண்ணாடி நீ கண் ஜாடை நான்
    என் வீடு நீ உன் ஜன்னல் நான்
    என் தேடல் நீ உன் தேவை நான்
    என் பாடல் நீ உன் வார்த்தை நான்
    என் பாதி நீ உன் பாதி நான்
    என் ஜீவன் நீ உன் தேகம் நான்
    என் கண்கள் நீ உன் வண்ணம் நான்
    என் உள்ளம் நீ உன் எண்ணம் நான்

    பாடலின் சுட்டி – http://www.youtube.com/watch?v=Rj33vbsHtKU

    அழகான பாடல். புதிதாகத் திருமணமானவர்களுக்கான பாட்டு.

    இந்தப் பாட்டைக் கேட்கும் போது “கண்ணாடி” என்ற சொல் எந்தன் சிந்தனையைத் தூண்டியது. எத்தனையெத்தனை கண்ணாடி பாடல்கள். கண்ணாடி தொடாத கவிஞர்களே இல்லை என்று சொல்லலாம்.

    இந்தக் கண்ணாடி தமிழர்கள் பயன்பாட்டில் முன்பு இருந்ததா என்று முதல் கேள்வி.

    இருந்தது என்று திருப்பாவை படிக்கையில் புரிந்தது. “உக்கமும் தட்டொளியும் தந்து” என்று ஆண்டாள் பாடியது நினைவுக்கு வந்தது. இந்த வரியில் தட்டொளி என்பது கண்ணாடியைக் குறிக்கும்.

    தட்டொளி என்பதுதான் கண்ணாடிக்கு உரிய பழைய தமிழ்ப் பெயரா என்ற ஐயத்தோடு இலக்கியங்களைத் தேடிய போது அரிய விடைகள் கிடைத்தன.

    கண்ணாடி என்ற சொல் ஐம்பெருங்காப்பியங்களிலேயே இருந்திருக்கிறது. அப்படியிருக்க பின்னாளில் ஆண்டாள் தட்டொளி என்ற சொல்லை ஏன் பயன்படுத்தினாள் என்று தெரியவில்லை. சங்க இலக்கியங்களில் கண்ணாடி பற்றியும் தேடிப்பார்க்க வேண்டும்.

    சரி.. ஐம்பெருங்காப்பியங்களுக்கு வருவோம். அதிலும் முதற் காப்பியமான சிலப்பதிகாரத்திற்கு வருவோம்.

    முகம் பார்க்கும் கண்ணாடியை ஆடி என்றே இளங்கோவடிகள் குறிப்பிடுகிறார்.

    கோப்பெருந்தேவிக்கு அன்றைய நாள் நல்ல நாளாகவே இல்லை. கண்ட கண்ட கனவுகள். ஒன்றாவது நன்றாக இல்லை. ஏதோ ஒரு தவறு நடக்கப் போவது போல ஒரு குறுகுறுப்பு. அந்த உணர்வுகளைக் கணவனோடு பகிர்ந்து கொள்ள வருகிறாள். அப்போது அவளுடைய பணியாளர்கள் அவளுக்குத் தேவையான பொருட்களைக் கையோடு கொண்டு வருகிறார்கள். கிட்டத்தட்ட ஒரு சினிமா நடிகையின் மேக்கப் உதவியாளர்கள் போல.

    ஆடியேந்தினர் கலனேந்தினர்
    அவிர்ந்துவிளங்கும் அணியிழையினர்
    கோடியேந்தினர் பட்டேந்தினர்
    கொழுந்திரையலின் செப்பேந்தினர்
    வண்ணமேந்தினர் சுண்ணமேந்தினர்
    மான்மதத்தின் சாந்தேந்தினர்
    கண்ணியேந்தினர் பிணையலேந்தினர்
    கவரியேந்தினர் தூபமேந்தினர்

    ஆடி ஏந்தினர் – கண்ணாடி ஏந்தி வந்தார்கள்
    கலம் ஏந்தினர் – அணிகலன்களை ஏந்தி வந்தார்கள்
    அவிர்ந்து விளங்கும் அணியிழையினர் – நல்ல அணிமணி அணிந்த ஊழியப் பெண்கள்
    கோடி ஏந்தினர் – புதுத்துணிகளை ஏந்தி வந்தார்கள்
    பட்டு ஏந்தினர் – பட்டுத் துணிகளை ஏந்தி வந்தார்கள்
    கொழும் திரையலின் செப்பு ஏந்தினர் – நல்ல கொழும் வெற்றிலைப் பெட்டியை ஏந்தினர்
    வண்ணம் ஏந்தினர் – வண்ண வண்ணப் பொடிகளையும்
    சுண்ணம் ஏந்தினர் – வெண்ணிறச் சுண்ணத்தைப் பூசிக் கொள்வதற்கும் ஏந்தி வந்தார்கள்

    அடேங்கப்பா என்னவொரு பட்டியல். அரசியோடு எப்பவும் ஒரு கூட்டம் இருந்து கொண்டேயிருந்திருக்கும் போல.

    ஏந்திய பொருட்களில் முதற் பொருளாகச் சொல்லப் படுவதே ஆடிதான். அடிக்கடி முகத்தைப் பார்த்து ஒப்பனை செய்கிறவள் போல கோப்பெருந்தேவி.

    சரி. கண்ணாடி(Mirror) என்பது முகம் பார்ப்பதற்கு மட்டுமல்ல. Glass என்ற பொருளிலும் வருமே. ஆம். வருகிறது. சீவக சிந்தாமணி காட்டுகிறது அதையும். அந்தப் பாடலில் திருத்தக்க தேவர் சொற்சிலம்பமே ஆடியிருக்கிறார் என்றால் மிகையாகாது. எத்தனை கண்ணாடி வருகிறதென்று பாருங்கள்.

    கண்ணாடி யன்ன கடிமார்பன் சிவந்து நீண்ட
    கண்ணாடி வென்று களங்கண்டு நியம முற்றிக்
    கண்ணாடி வண்டு பருகுங்கமழ் மாலை மூதூர்க்
    கண்ணாடி யானை யவர்கைதொழச் சென்று புக்கான்

    ரொம்பவும் விளக்காமல் நேரடியாகப் பொருள் கொடுக்கிறேன். படித்து ரசியுங்கள்.

    கண்ணாடி அன்ன கடி மார்பன் சிவந்து நீண்ட
    கண் ஆடி வென்று களம் கண்டு நியமம் முற்றிக்
    கள் நாடி வண்டு பருகும் கமழ் மாலை மூதூர்க்கண்
    (கண்) ஆடு யானையவர் கை தொழச் சென்று புக்கான்

    கண்ணாடி போன்ற மார்புடைய சீவகன் தன்னுடைய சிவந்து நீண்ட கண்களால் ஆடி (பார்வையிட்டு) போரிட்டு வென்ற போர்க்களத்தைக் கண்ட பின்னர், போர் முடிந்த பின் செய்ய வேண்டிய நியமங்களை முடித்து விட்டு, கள் நாடி வந்து வண்டுகள் பருகும் மணமிகுந்த மாலைகள் நிறைந்த பழம் பெருமை மிக்க ஊருக்குள், வெற்றியானை கொண்டோரெல்லாம் கை தொழும் வகையில் புகுந்தான்.

    அதாவது வெற்றி பெற்ற சீவகன் தான் வென்ற ஊருக்குள் நுழைந்ததை நான்கு கண்ணாடிகளை வைத்து அழகாகச் சொல்லியிருக்கிறார் திருத்தக்க தேவர்.

    இளங்கோவும் திருத்தக்க தேவரும் பின்னாளில் ஆண்டாளும் தொடர்ந்த பாரம்பரியத்தை பாரதியின் வாரிசான கவிஞர் நிரஞ்சன் பாரதியும் தொடர்வதுதான் சிறப்பு.

    அன்புடன்,
    ஜிரா

    031/365

     
    • Rie 12:36 pm on January 1, 2013 Permalink | Reply

      CSS நீ, HTML நான் என்று ஃபேஸ்புக்கில் ஒரு வாசகம் பார்த்தேன்.

      • Niranjan 1:47 pm on January 1, 2013 Permalink | Reply

        என் பாடலைப் பற்றி இந்த வலைப்பூவில் எழுதிய ஜீரா அவர்களுக்கு என் நெஞ்சார்ந்த நன்றி. கண்ணாடி பற்றி எத்தனை தகவல்கள். ஆஹா !! படிக்கப் படிக்க சுவை கூடிக் கொண்டே இருந்தது.

  • GiRa ஜிரா 10:36 am on December 21, 2012 Permalink | Reply
    Tags: ஆண்டாள், ஆலங்குடி சோமு, பி.எஸ்.சசிரேகா   

    திருமண மலர்கள் பூக்கும் நேரம் 

    கல்யாணக் கனவுகள் ஆண்களை விட பெண்களுக்குத்தான் அதிகம். ஆண்களுக்கு கல்யாண விருப்பங்கள் நிறைய இருக்கும். ஆனால் கனவுகள் குறைவு.

    ஆனால் பெண்ணுக்கு அப்படியில்லை. குதிரையொன்றில் ஏறி மன்னன் வருவான். முதலில் மனத்தைத் தருவான். பின்னர் மணத்தை தருவான். அதற்குப் பின் இன்பங்களை மட்டும் அள்ளி அள்ளித் தருவான் என்று கனவுகளில் பருவப் பெண்கள் மிதந்து கொண்டிருப்பார்கள்.

    அப்படியொருவன் வந்தபின் திருமணம் எப்படியெல்லாம் நடக்க வேண்டும் என்று கற்பனைகளிலேயே அவள் மனம் மயங்கிக்கொண்டிருக்கும்.

    இந்தத் திரைப்படப் பாடலிலும் அந்தக் கற்பனையோடு ஒரு காதலி பாடுகிறாள்.

    படம் – லட்சுமி
    இசை – இளையராஜா
    பாடியவர் – பி.எஸ்.சசிரேகா
    பாடல் – ஆலங்குடி சோமு
    ஆண்டு – 1979
    பாடலின் சுட்டி – http://www.youtube.com/watch?v=LR1t5MXCmNs
    மேளம் கொட்ட நேரம் வரும் பூங்கொடியே
    மேளம் கொட்ட நேரம் வரும் பூங்கொடியே
    அன்னமே சொர்ணமே அன்றுதான் இந்த ஊர்வலம்
    மேளம் கொட்ட நேரம் வரும் பூங்கொடியே
    மேளம் கொட்ட நேரம் வரும் பூங்கொடியே

    பாட்டின் நடுவில் தன்னுடைய திருமணம் எப்படியெல்லாம் நடக்க வேண்டும் என்றும் நினைத்துப் பாடுகிறாள்.
    ஊருக்கெல்லாம் பாக்கு வச்சு காத்திருப்பேன்
    ஊரையெல்லாம் பாக்க வச்சு மணம் முடிப்பேன்
    கூரச்சேல சரசரக்க அஞ்சி நடப்பேன்
    கொண்டவனின் குணம் அறிந்து கொஞ்சி சிரிப்பேன்
    அம்மம்மா செல்லம்மா இந்த மயக்கம் எனக்கும் பொறக்கும் புது சுகமிருக்கும்

    பி.எஸ்.சசிரேகா ஒரு அருமையான பாடகி. தமிழில் சரியாகப் பயன்படுத்திக் கொள்ளப்படாத பாடகி என்பது என் கருத்து. அது போல ஆலங்குடி சோமு இளையராஜா இசையில் பாடல்களை எழுதியிருக்கிறார் என்பதே பலருக்குத் தெரியாது. அந்த வகையில் இந்தப் பாட்டு ஒரு அபூர்வ பாட்டுதான். சரி. கருத்துக்கு வருவோம்.

    இப்போதுள்ள பெண்கள் மட்டுந்தானா இப்படி கல்யாணக்கனவு காண்கிறார்கள்?

    இல்லை. பெண்களின் உள்ளத்தாசையை சங்க நூல்கள் அழகாகக் காட்டுகின்றன. சங்ககாலத்து வள்ளியும் இப்படித்தான் கனவு கண்டாள். முருகனைக் கணவனாகக் கொண்டாள்.

    இது மார்கழி மாதமல்லவா. ஆகையால் நினைக்கப்பட வேண்டிய இன்னொருத்தியும் இருக்கிறாள்.

    திருவில்லிபுத்தூர்க்காரி
    பெயர் ஆண்டாள்
    தமிழை ஆண்டாள்
    மாலனுக்குக் கட்டிய மாலைகளைத்
    தினந்தினமும் பூண்டாள்
    கண்ணனையன்றி எதையும் சீண்டாள்
    அவனையுள்ளும் எண்ணமன்றி எதுவும் தூண்டாள்
    காதல் கொதித்தெழுந்து
    கோவிந்தனைச் சேர்த்தணைத்து வாழாமல்
    ஒவ்வொரு இரவும் மாண்டாள்
    அந்தக் கார்மேகன் மதுசூதனன் மாதவன் இன்றிக்
    கல்யாணமும் வேண்டாள்

    அவளுக்கும் ஒரு கல்யாணக் கனவு. அதைப் பாட்டில் வைத்தாள். நெஞ்சக் கூட்டில் வைத்தாள். இறைவன் திருவீட்டிலும் வைத்தாள். பலன் எட்டியதோ கிட்டியதோ! உலகம் பேதையென்று திட்டியதோ! ஆயினும் தமிழாய்க் கொட்டியதோர் கனவினைப் பார்க்கலாம்.

    லட்சுமி திரைப்படத்து நாயகி மேளம் கொட்ட என்று பாடினால், இவளோ மத்தளம் கொட்ட என்று பாடுகிறாள்.

    மத்தளம் கொட்ட வரிசங்கம் நின்றூத
    முத்துடைத் தாமம் நிரை தாழ்ந்த பந்தல் கீழ்
    மைத்துனன் நம்பி மதுசூதன் வந்து என்னைக்
    கைத்தலம் பற்றக் கனாக் கண்டேன் தோழீ நான்

    வாய் நல்லார் நல்ல மறையோதி மந்திரத்தால்
    பாசிலை நாணல் படுத்துப் பரிதி வைத்துக்
    காய்சின மாகளிறன்னான் என் கைப்பற்றித்
    தீவலம் செய்யக் கனாக் கண்டேன் தோழீ நான்

    இந்தப் பாடல்களை நாச்சியார் திருமொழி என்று அன்று அவளும் எழுதி வைத்தாள். மார்கழி வருகையில் நாமும் நினைத்துப் பார்க்கிறோம். சரி. அவள் சொன்னதைப் பார்ப்போம்.

    ஆயிரம் ஆனைகள் அவனைச் சூழ்ந்து வரும்.  ஆயிரத்து ஒன்றாக அவன் வருவான். மங்கல நீரும் நல்லவர் வாழ்த்தும் மங்கையர் கண்ணும் அவனைத் தீண்டத் தீண்ட கூட்டத்தைத் தாண்டி வருவான்.

    கொட்டுகள் அதிரும். சங்கங்கள் முழங்கும். நல்முத்துப் பந்தலடியில் வெண்முத்துப் பல்லழகன் என் முத்துக் கரம் பற்றி மணம் கொள்வான்.

    சொல்லில் எல்லாம் உயர்வான சொற்கள் ஒலிக்க, என் கைப்பிடித்து முன் நடந்து பற்றிய தீயை சுற்றி வருவான்.

    மேளம் கொட்ட நேரம் வரும் என்று பாடிய சினிமா நாயகிக்கு ஒரு நாயகன் படத்தில் வந்து விட்டான் என்று படம் பார்த்தவர்களுக்கு தெரியும்.

    மத்தளம் கொட்ட என்று பாடியவனுக்கு நாரணன் நம்பி வந்தானா இல்லையா என்று யாரைக் கேட்பது!

    அன்புடன்,
    ஜிரா

    020/365

     
    • Arun Rajendran 11:40 am on December 21, 2012 Permalink | Reply

      ஜிரா,
      ஒரு கனம் வாலி தான் விவரிகிறாரோ-னு நினைக்க வச்சுடீங்க..நாச்சியார் மொழி சுட்டும் விளக்கமும் நல்லா இருந்துச்சு.. இந்த ”கைத்தலம் பற்ற” ஏனோ “தேவதை போலொறு பெண்ணிங்கு” பாட்ட ஞாபகப் படுத்துது..”கனாக் கண்டேன் தோழீ” பார்திபன் கனவு பட பாடல நெனைக்க வைக்குது..

  • என். சொக்கன் 11:17 am on December 16, 2012 Permalink | Reply  

    மருந்து 

    • படம்: கர்ணன்
    • பாடல்: கண்கள் எங்கே
    • எழுதியவர்: கண்ணதாசன்
    • இசை: விஸ்வநாதன், ராமமூர்த்தி
    • பாடியவர்: பி. சுசீலா
    • Link: http://www.youtube.com/watch?v=mrzVWyWe7E8

    இனமென்ன, குலமென்ன, குணமென்ன அறியேன்,

    ஈடொன்றும் கேளாமல் எனை அங்கு கொடுத்தேன்,

    கொடை கொண்ட மத யானை உயிர் கொண்டு நடந்தான்,

    குறை கொண்ட உடலோடு நான் இங்கு மெலிந்தேன்!

    இந்த நாயகியின் காதல் வேகத்தைக் கண்ணதாசன் எளிய வார்த்தைகளால் அழுத்தமாகப் பதிவு செய்துள்ளார். ’கொடை கொண்ட மத யானை’யாகிய அவனை நினைத்து இளைத்த இவளுடைய நோய்க்கு என்ன மருந்து?

    அதைப் பல நூற்றாண்டுகளுக்குமுன்னால் ஒரு பெண்ணே எழுதியிருக்கிறாள், இன்று தொடங்கும் மார்கழியின் நாயகி, ஆண்டாள் பாசுரத்திலிருந்து ஒரு பகுதி இது:

    வண்ணம் திரிவும் மனக்குழைவும் மானமிலாமையும் வாய் வெளுப்பும்

    உண்ணல் உறாமையும் உள்மெலிவும் ஓதநீர் வண்ணன் என்பான் ஒருவன்

    தண் அம் துழாய் என்னும் மாலை கொண்டு சூட்டத் தணியும்!

    இங்கே ஆண்டாளே நோயாளி, அவளே மருத்துவரும். தன்னுடைய நோய்க்கு அவள் சொல்லும் Symptomsஐப் பாருங்கள்:

    • உடல் வண்ணம் மாறும் (பசலை)
    • மனம் தளரும்
    • வெட்கம் மறக்கும்
    • வாய் வெளுக்கும்
    • சாப்பாடு தேவைப்படாது
    • உடல் மெலியும் / உள்ளம் சுருங்கும்

    சரி. இந்த நோய்க்கு மருந்து?

    கடல் வண்ணம் கொண்ட என் காதலன் (திருமால்), குளிர்ந்த அழகான துளசி மாலையைக் கொண்டுவந்து எனக்குச் சூட்டவேண்டும். உடனே இந்த Symptoms குறைந்து நோய் தணிந்துவிடும்.

    அப்புறமென்ன? கல்யாண நாள் பார்க்கச் சொல்லலாமா?

    ***

    என். சொக்கன் …

    16 12 2012

    15/365

     
    • Kannabiran Ravi Shankar (KRS) 11:42 am on December 16, 2012 Permalink | Reply

      நோயாளி Dr. கோதைக்கு வாழ்த்துக்கள்!:)

      சுசீலாம்மாவின் “ஆஆ” humming க்கு இலக்கணம் இந்தப் பாட்டு!

      கண்கள் எங்கே நெஞ்சமும் அங்கே

      ன்னு பாடும் போது, ஒரு கம்பீர சுசீலா தெரிவாங்க!

      கால்கள் இங்கே நெளியும் இங்கே

      ன்னு பாடும் போது, காய்ச்சல்-ல்ல நெளிவது போல் நெளிவாங்க!

      You can tell the difference of her humming “ஆஆ” & the chorus “”ஆஆ”

      மணி கொண்ட கரமொன்று, அனல் கொண்டு வெடிக்கும்
      மலர் போன்ற இதழ் இன்று, பனி கொண்டு துடிக்கும்
      துணை கொள்ள அவன் இன்றித், தனியாக நடிக்கும்
      துயிலாத பெண்மைக்கு, ஏனிந்த மயக்கம்? ஆஆஆஆ

      ———–

      //இனமென்ன, குலமென்ன, குணமென்ன அறியேன்,
      ஈடொன்றும் கேளாமல் எனை அங்கு கொடுத்தேன்//

      Very True!
      ஈடொன்றும் கேளாமல் = True love never asks anything, even the loveback
      It just falls sick & continues…

      //கொடை கொண்ட மத யானை உயிர் கொண்டு நடந்தான்//

      காய் சின மா களிறு அன்னான்
      காளை புகுதக் கனாக் கண்டேன் -ன்னு அவளும் யானையைத் தான் சொல்லுறா:)

      //தண் அம் துழாய் என்னும் மாலை கொண்டு சூட்டத் தணியும்//

      அதென்ன “சூட்ட”?
      இவளே “சூடிக்” கொடுத்தவ தானே? இவளே சூடிக்க மாட்டாளாமா?
      இப்ப மட்டும் “சூட்டணும்” போல:)

    • Kannabiran Ravi Shankar (KRS) 11:42 am on December 16, 2012 Permalink | Reply

      Btw, அதென்ன “குறை கொன்ற உடலோடு”?

      • என். சொக்கன் 1:07 pm on December 16, 2012 Permalink | Reply

        :)) corrected

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel