Updates from October, 2013 Toggle Comment Threads | Keyboard Shortcuts

  • mokrish 11:34 pm on October 4, 2013 Permalink | Reply  

    குழந்தையும் தெய்வமும் 

    குழந்தைகளுக்கு புரியும்படி விளக்குவது என்பது ஒரு பெரிய கலை. கதையாக பாட்டாக அவர்களின் மொழியில் உரையாடி புராணம், வரலாறு, அறிவியல் கணிதம் என்று எல்லாவற்றையும் சொல்லித்தரும் வித்தை சிலருக்கே வசப்படுகிறது. இடைமறித்து அவர்கள் கேட்கும் கேள்விகளுக்கு விடை தேடும்போது நமக்கே புதிய அர்த்தங்கள் புலப்படும்.

    கடவுள் என்ற ஒரு Complex விஷயத்தை எப்படி குழந்தைகளுக்கு விளக்குவது? சாந்தி நிலையம் படத்தில் கண்ணதாசன் எழுதிய இறைவன் வருவான் என்றும் நல்வழி தருவான் என்ற ஒரு பாடல் (இசை எம் எஸ் விஸ்வநாதன் பாடியவர்கள் பி சுசீலா & குழுவினர்). குழந்தைகளுக்கு home schooling முறையில் கற்றுத்தரும் ஆசிரியர் பாடுவதுபோல் காட்சி. கடவுளைப் பற்றி குழந்தைகளுக்கு விளக்கம் சொல்வதுபோல் அமைந்த வரிகள்.

    http://www.youtube.com/watch?v=Mc_kXk4AaVI

    வண்ண வண்ணப் பூவினில் காயை வைத்தவன்

    சிப்பி ஒன்றின் நடுவே முத்தை வைத்தவன்

    சின்னச் சின்ன நெஞ்சினில் பாசம் வைத்தான்

    நெஞ்சில் வரும் பாசத்தை பேச வைத்தான்

    கண் முன் தெரியும் இயற்கையை முன்னிறுத்தி இறைவனைப்பற்றி சொல்வது வழக்கம். கவிஞரும் வண்ண வண்ண பூவுக்குள் ஒளிந்திருக்கும் கனிக்கூட்டம், சிப்பிக்குள் இருக்கும் முத்து எல்லாம் இறைவன் தந்தது என்கிறார். அருணகிரிநாதர் கந்தர் அனுபூதியில்

    உருவாய் அருவாய் உளதாய் இலதாய்

    மருவாய் மலராய் மணியாய் ஒளியாய்

    என்று மொட்டாய் மலராய் எல்லாமுமாய் இருப்பவன் குருவாகவும் வந்து அருள் செய்ய வேண்டுகிறார். கண்ணதாசன் இறைவன் வந்து நல்வழி தருவான் என்கிறார், அடுத்த சரணத்தில்

    கண்கள் அவனை காண

    உள்ளம் அவனை நினைக்க

    கைகள் அவனை வணங்க

    என்று சொல்கிறார். வணங்கத் தலைவைத்து வார்கழல்வாய் வாழ்த்த வைத்து என்று திருவாசகம் சொன்னதும் இதுதான். அப்பர் திரு அங்கமாலையில்

    வாழ்த்த வாயும் நினைக்க மடநெஞ்சும்

    தாழ்த்தச் சென்னியும் தந்த தலைவனைச்

    சூழ்த்த மாமலர் தூவித் துதியாதே

    வீழ்த்த வாவினை யேன்நெடுங் காலமே

    என்ற சொன்னதும் இதுதான். அருணகிரி நாதரும் அப்பர் பெருமானும் சொன்ன ஆழமான விஷயங்களை ஒரு நர்சரி ரைம் போல எளிமையாக சொல்கிறார் – குழந்தைகளுக்கும் நமக்கும் புரியும்படி!

    பெரியவர்களும் குழந்தைகளாக மாறி பொம்மைகளுடன் விளையாடி கடவுளுடன் பேசி மகிழும் நவராத்திரி ஆரம்பம். அனைவருக்கும் வாழ்த்துகள்

    மோகனகிருஷ்ணன்

    307/365

     
    • Uma Chelvan 11:54 pm on October 4, 2013 Permalink | Reply

      கண்ணன் வருவான் கதை சொல்லுவான்

      பச்சை வண்ணக் கிளி வந்து பழம் கொடுக்க
      பட்டு வண்ணச் சிட்டு வந்து மலர் கொடுக்க
      கன்னங்கரு காக்கை வந்து மை கொடுக்க
      கண்ணன் மட்டும் கன்னத்திலே முத்தம் கொடுக்க
      முத்தம் கொடுக்க முத்தம் கொடுக்க

      தத்தித் தத்தி நடக்கையில் மயில் போலே
      திக்கித் திக்கிப் பேசுகையில் குயில்

    • rajinirams 7:05 pm on October 5, 2013 Permalink | Reply

      நல்ல பதிவு.குழந்தைகளுக்கு புரியும் வகையில்,அவர்கள் மனதில் பதியும் வகையில் விளக்குவது என்பது ஒரு கலையே.”குலவிளக்கு”படத்தின் கவியரசரின் “பூ பூவாய் பூத்திருக்கு பூமியிலே ஆயிரம் பூ”என்று கேள்வி பதில் பாட்டும்,வேப்ப மர உச்சியில் நின்னு பேய் ஒண்ணு ஆடுதுன்னு விளையாடப் போகுமுன்னே சொல்லிவைப்பாங்க,வேலையற்ற வீணர்களின் மூளையற்ற வார்த்தைகளை வேடிக்கையாக கூட நீ நம்பி விடாதே என்று சின்னப் பயல்களுக்கு சேதி சொல்லும் பட்டுக்கோட்டையாரின் வரிகளும் “நன்மை ஒன்று செய்தீர்கள் நன்மை விளைந்தது,தீமை ஒன்று செய்தீர்கள் தீமை விளைந்தது,தீமை செய்வதை விட்டு விட்டு நன்மை செய்ய முயலுங்கள் என்று குழந்தைகளுக்கு அறிவுரை கூறும் வைரமுத்துவின் “ராஜா சின்ன ரோஜாவோடு காட்டுப்பக்கம் வந்தானாம்”பாடலும் பாலூட்டும் அன்னை அவள் வழிகாட்டும் தெய்வம் என்று அறிவுருத்தும் வாலியின் “நல்ல பேரை வாங்கவேண்டும் பிள்ளைகளே”வரிகளும் என்றும் மனதை விட்டு நீங்காதவை. நன்றி.

  • என். சொக்கன் 10:30 pm on September 30, 2013 Permalink | Reply  

    காதல் கரம் 

    • படம்: இருவர்
    • பாடல்: ஹல்லோ மிஸ்டர் எதிர்க்கட்சி
    • எழுதியவர்: வைரமுத்து
    • இசை: ஏ. ஆர். ரஹ்மான்
    • பாடியவர்: ஹரிணி
    • Link: http://www.youtube.com/watch?v=JqgwTxDeOa8

    காதலா, காதலா, உனை நான் விடமாட்டேன்,

    கைத்தலம் பற்றுவேன், பிரிய விடமாட்டேன்,

    கண்கள் மீதாணை, அழகு மீதாணை, விடவே விடமாட்டேன்!

    ’கைத்தலம்’ என்ற சொல்லை நம்மிடையே மிகவும் பிரபலப்படுத்தியவர்கள், இரண்டு கவிஞர்கள். ஒன்று ஆண்டாள், இன்னொன்று அருணகிரிநாதர்.

    ’வாரணமாயிரம் சூழ வலம் செய்து நாரண நம்பி நடக்கின்றான்’ என்று கல்யாணக் கனவைச் சொல்லத் தொடங்கிய ஆண்டாள், ‘கைத்தலம் பற்றக் கனாக் கண்டேன்’ என்கிறாள்.

    ஆண்டாள் இப்படிக் காதலோடு பாட, அருணகிரிநாதர் பக்தி நெறி நிற்கிறார். ‘கைத்தல நிறை கனி, அப்பமோடு அவல் பொரி’ என்று பட்டியல் போட்டுப் பிள்ளையாரை அழைத்து வழிபடுகிறார்.

    உண்மையில் ‘கைத்தலம்’ என்றால் என்ன?

    இந்த இரண்டு பாடல்களிலும், வைரமுத்துவின் இந்தத் திரைப்படப் பாடலிலும் கைத்தலம் என்றால் உள்ளங்கை என்றுதான் அர்த்தம் தோன்றுகிறது. உள்ளங்கையைப் பற்றுவேன், உள்ளங்கையைப் பற்றக் கனாக்கண்டேன், உள்ளங்கையில் கனிகளை நிறைத்துவைத்தேன்’…

    ஆனால் ‘கைத்தலம்’ என்பது கையாகிய தலம், அதாவது முழுக் கையையும் குறிக்கும். உள்ளங்கையும் அதன் பகுதி என்பதால், அதையும் குறிக்கும்.

    கம்ப ராமாயணத்தில் ஒரு பாடல்.

    ஓர் இளம் பெண். இவளுக்கு இடை இருக்கிறதா, அல்லது பொய்யான தோற்றமா என்று மயக்கமே ஏற்படும் அளவுக்குச் ‘சிக்’கென்ற பேரழகி.

    அவளுடைய காதலன், அவளை நெருங்குகிறான், கட்டித் தழுவுகிறான்.

    ஆனால் அவளோ, ஏதோ ஞாபகத்தில் மூழ்கியிருக்கிறாள். இப்போது அவளுக்குக் காதல் விளையாட்டுகளில் ஆர்வம் இல்லை. அவனுடைய கைகளை விலக்கிவிடுகிறாள்.

    உடனே, அந்தக் காதலன் அதிர்ந்துபோகிறான், அவள் அவனுடைய கையை ஒதுக்கிவிட்ட செயல், அவன் நெஞ்சில் கூர்வாள் பாய்ந்ததைப்போல் இருந்தது என்கிறார் கம்பர்.

    ஓர் ஆணின் நெஞ்சம் இப்படிப் புண்ணாவதை அவர் விரும்புவாரா? ‘கைத்தலம் நீக்கினள், கருத்தின் நீக்கலள்’ என்று சமாதானப்படுத்துகிறார். அதாவது, கையைதான் விலக்கினாள், கருத்திலிருந்து அவனை நீக்கவில்லை.

    புரியலையா? அவ ஏதோ வேலை விஷயத்தை யோசிச்சுகிட்டிருக்காய்யா, டிஸ்டர்ப் பண்ணாதே, கொஞ்ச நேரம் டிவி பார்த்துட்டு வா, அப்புறமா ரொமான்ஸ் பண்ணலாம்!

    ***

    என். சொக்கன் …

    30 09 2013

    303/365

     
    • rajinirams 12:26 pm on October 1, 2013 Permalink | Reply

      கைத்தலம் என்றவுடனே நினைவுக்கு வருவது கைத்தலம் தந்தேன் என் கண்மணி வாழ்க என்ற கவியரசரின் பூ முடித்தாள் இந்த பூங்குழலி என்ற நெஞ்சிருக்கும் வரை படப்பாடல் தான்.கைத்தலம் பற்றி உள்ளங்கை நெல்லிக்கனியாய் விளக்கிய நல்ல பதிவு.நன்றி.

    • amas32 3:55 pm on October 1, 2013 Permalink | Reply

      கைத்தலம் என்பது அழகிய ஒரு சொல். வெறும் கைபிடித்துச் செல்லுதலைக் குறிக்காது தன்னையே ஒப்படைப்பதை/ஊன்றுகோலாகப் பற்றுவதைக் குறிப்பது போல தொனிக்கும். ஆண்டாள் பாசுரத்தின் பாதிப்போ என்னவோ? இந்தக் காதல் பாட்டில் கூட அப்படித் தான் வருகிறது. ஆனால் கைத்தல நிறை கனி என்று விநாயகரை நோக்கி அவ்வையார் சொல்லும்போது கை நிறைய என்று தான் தோன்றுகிறது.

      amas32

      • lotusmoonbell 4:17 pm on October 1, 2013 Permalink | Reply

        ‘கைத்தலநிறைகனி’ அருணகிரிநாதரின் திருப்புகழில் வருவது. அவ்வையின் பாட்டல்ல.

        • amas32 9:31 pm on October 1, 2013 Permalink

          ஆமாம் தவறு தான், அனைவரும் மன்னிக்க.

          amas32

        • என். சொக்கன் 8:50 pm on October 2, 2013 Permalink

          நான் செஞ்ச தப்புக்கு நீங்க ஏனுங்க மன்னிப்புக் கேட்கறீங்க? 🙂

    • Uma Chelvan 5:52 pm on October 1, 2013 Permalink | Reply

      புரியலையா? அவ ஏதோ வேலை விஷயத்தை யோசிச்சுகிட்டிருக்காய்யா, டிஸ்டர்ப் பண்ணாதே, கொஞ்ச நேரம் டிவி பார்த்துட்டு வா, அப்புறமா ரொமான்ஸ் பண்ணலாம்!…..::::))))டிவி பார்த்து டைம் ஏன் waste பண்ணனும்??? சமையலறைக்கு போய் எதாவது சமைக்கலாம் இல்ல?. வீட்லில் கூடமாட ஒத்தாசை பண்ணனும்னு எண்ணமே வராதே!!!!!!:::::))))

      • என். சொக்கன் 8:50 pm on October 2, 2013 Permalink | Reply

        அது வந்துட்டா நாங்க ஏன் இப்படி இருக்கோம்? :)))

  • GiRa ஜிரா 1:24 pm on September 29, 2013 Permalink | Reply  

    ஒரு துளி தேன்! 

    ஒரு மிகப்பிரபலாமான கதை. கண்டிப்பாக எல்லாருக்கும் தெரிந்திருக்கும்.

    ஒருவன் காட்டு வழியே சென்றான். திடீரென்று பெண் சிங்கமொன்று துரத்தியது. தப்பிக்க ஓடினான். ஆலமரம் ஒன்று வழியில் வந்தது. அதன் விழுதைப் பிடித்து ஏறினான். பாதி விழுது ஏறும் போதுதான் மரத்திலிருந்த மலைப்பாம்பைக் கவனித்தான். மேலே போனால் பாம்பு. கீழே இறங்கிலாம் பெண் சிங்கம்.

    தப்பிக்க வழியில்லாமல் அந்த விழுதில் தொங்கினான். அப்போது ஆலமரத்திலிருந்த தேன்கூட்டிலிருந்து தேன் சொட்டியது. அந்தத் துளி நாக்கில் விழுந்ததும் அவன் அதை ரசித்து ருசித்தான்.

    அந்த மனிதனின் நிலமைக்குப் பெயர்தான் வாழ்க்கை. பிறப்பும் எளிதில்லை. வாழ்வும் எளிதில்லை.

    ஆனால் அந்த ஒரு துளி தேனைச் சுவைக்கும் போது மலைப்பாம்பையும் பெண்சிங்கத்தையும் அவன் மறந்தது போல சிற்சில இன்பங்களில் வாழ்வியல் துன்பங்களை நாம் மறந்திருக்கிறோம்.

    இந்த உண்மை நமக்குப் புரிந்தால் நாம் அமைதியாவோம். முடிந்தவரை நல்லவராவோம்.

    புரியாதவர்கள் ஆடித் தீர்த்து விடுவார்கள். எதெற்கெடுத்தாலும் பிரச்சனை. எல்லாவற்றிலும் தவறு. அடுத்தவருக்கு முடிந்த வரை நேரடியாகவும் மறைமுகமாகவும் தொல்லை கொடுத்தல். கொள்ளையடித்தல். கொலை செய்தல். அரசியல் பிழைத்தல். வஞ்சகம் செய்தல். இன்னா செய்தல். நாவினால் சுடுதல். அமைதியைக் குலைத்தல். நீர்நிலைகளைக் கெடுத்தல். இயற்கையை அழித்தல். குழந்தைகளைத் துன்புறுத்துதல். இன்னும் எத்தனையெத்தனையோ தவறுகள்.

    ஆடித் தீர்த்துவிடுகிறது மக்கள் கூட்டம். ஆனால் எதுவும் தொடர்வதில்லை. ஒரு நாளில்.. ஒரு நிமிடத்தில்… அல்ல அல்ல. ஒரு நொடியில் அந்த ஆட்டம் அமைதியாகி விடுகிறது.

    ஆடி அடங்கும் வாழ்க்கையடா” என்று எழுதினார் உவமைக் கவிஞர் சுரதா. அத்தனை ஆட்டங்களும் அடங்குவதற்குத் தேவை ஒரேயொரு நொடிதான் என்பது மனிதனின் மிகப்பெரிய பலவீனம்.

    அந்த பலவீனத்தினால் உண்டாவது அச்சம். இறப்பின் மீதான அச்சம். அந்த அச்சம் ஏழைகளுக்கு மட்டும் வருவதல்ல. வேறுபாடே இல்லாமல் அரசன் முதல் ஆண்டி வரைக்கும் வியாபாரி முதல் விவசாயி வரைக்கும் வருவதுதான்.

    யோகிக்கும் உண்டு அந்த அச்சம். அச்சத்தைப் போக்கவும் மறைக்கவும் அவன் செய்வதுதான் யோகம். அதையே போகி வேறுவிதமாகச் செய்கிறான். போகத்தில் தன்னை மறைத்து இறப்பின் அச்சத்தைத் தள்ளிப் போடுகிறான்.

    அந்த அச்சம் இறப்பின் மீது மட்டுமல்ல… அது தொடர்பான அனைத்தின் மீதும் உண்டாகிறது.

    உலகத்திலேயே மிக மிக அமைதியான இடம் ஒன்று உண்டு. அங்கு சண்டை இல்லை. சச்சரவு இல்லை. மேலோர் இல்லை. கீழோர் இல்லை. செல்வந்தன் இல்லை. ஏழை இல்லை. எந்தப் பிரச்சனையுமே இல்லாத அமைதியான இடம் அது.

    ஆம். இடு/சுடுகாடுதான் அது. அங்கு யாரையாவது தனியாகப் போகச் சொல்லுங்கள். போகவே மாட்டார்கள். அந்த இடத்தைப் பற்றி கவிஞர் மருதகாசி அழகாக எழுதினார் ரம்பையின் காதலுக்காக படத்தில். பாடலுக்கு இசையமைத்தவர் டி.ஆர்.பாப்பா.

    சமரசம் உலாவும் இடமே
    நம் வாழ்வில் காணா சமரசம் உலாவும் இடமே

    அமைதியே இல்லாமல் ஓயாமல் சிந்தித்துச் சிந்தித்துக் குழப்பிக் கொண்ட எத்தனையோ உள்ளங்கள் அமைதியானது அங்குதான்.

    ஜாதியில் மேலோர் என்றும் தாழ்ந்தவர் தீயோரென்றும் பேதமில்லாது
    எல்லோரும் முடிவில் சேர்ந்திடும் காடு
    தொல்லையின்றினே தூங்கிடும் வீடு
    ஆண்டி எங்கே அரசனும் எங்கே ஆண்டி எங்கே அரசனும் எங்கே
    அறிஞன் எங்கே அசடனும் எங்கே அறிஞன் எங்கே அசடனும் எங்கே
    ஆவி போன பின் கூடுவார் இங்கே ஆவி போன பின் கூடுவார் இங்கே
    சேவை செய்யும் தியாகி ஸ்ருங்கார போகி
    ஈசன் பொற்பாதம் தன்னை நாடிடும் யோகி
    எல்லோரும் இங்கே ஒன்றாய் உறங்குவதாலே
    நம் வாழ்வில் காணா சமரசம் உலாவும் இடமே

    மனித வாழ்வில் இல்லாத அமைதியும் ஒற்றுமையும் பாகுபாடின்மையும் நிலவுவது அந்த ஒரு இடத்தில்தான்.

    சரி. இந்தப் பதிவைப் படிக்கும் போதே மனம் இவ்வளவு அமைதியாகிறதே… ஒரு மெல்லிய சோகம் மனதில் படிகிறதே. அப்படியிருக்க இந்த அச்சத்தை எப்படி வெல்வது? வெற்றி கொள்வது?

    புத்தபிக்குகள் எப்போதும் சோகமாக இருப்பார்களாம். ஏன்? பின்னால் நிகழப் போவதுக்கு முன்னாலேயே சோகம் அனுபவிப்பார்கள். துறவிகள் அனைத்தையும் துறந்து தவம் செய்யப் போய்விடுவார்கள்.

    நாமும் அப்படிச் சோகமாக இருக்கத்தான் வேண்டுமா? துறவு கொள்ளத்தான் வேண்டுமா? வேறுவழியே கிடையாதா? ஆண்டவனுடைய திருவடியைப் பற்ற வேண்டும் என்று எல்லா மதங்களும் சொல்கின்றன.

    காலக்கணக்கை முடிப்பதற்கு காலன் வந்தால் தானே அச்சம் வரும். ஆண்டவனே வந்தால்?

    எத்தனையோ யோகிகளும் சித்தர்களும் முனிவர்களும் காணக்கிடைக்காத அந்த அருட்பெருஞ்சோதியே வந்தால்?

    அப்படி ஒரு வழியைத்தான் அருணகிரியும் சொல்லிக் கொடுக்கிறார்.

    பாதி மதிநதி போது மணிசடை
    நாத ரருளிய குமரேசா
    பாகு கனிமொழி மாது குறமகள்
    பாதம் வருடிய மணவாளா
    காலன் எனை அணுகாமல் உனதிரு
    காலில் வழிபட அருள்வாயே

    அன்புடன்,
    ஜிரா

    302/365

     
    • rajinirams 2:55 pm on September 29, 2013 Permalink | Reply

      வாழ்வியல் தத்துவத்தை எளிமையாகவும் அழகாகவும் எடுத்து “காட்டு”ம் அருமையான பதிவு. “சமரசம் உலாவும் இடமே”-மருதகாசியின் என்ன அறுபுதமான வரிகள்.முகராசி படத்தில் இடம்பெறும் கவியரசரின் வரிகளும் அருமையாக இருக்கும்-பட்டணத்தில் பாதி இவன் வாங்கி முடித்தான்,அந்த பட்டயத்தில் கண்டது போல் வேலி எடுத்தான்,அதில் எட்டடுக்கு மாடி வைத்து கட்டிடத்தை எட்டடி நின்று படுத்தான்,மண்ணை கொட்டியவன் வேலி எடுத்தான்-உண்டாக்கி வெச்சவங்க ரெண்டு பேரு-இங்கே கொண்டு வந்து போட்டவங்க நாலு பேரு. கவிஞர் வைரமுத்துவின் “கம்பங்களி தின்னவனும் மண்ணுக்குள்ளே தங்கபஸ்பம் தின்னவனும் மண்ணுக்குள்ளே-இந்த வாழ்க்கை வாழ தான்,கையில் என்ன கொண்டு வந்தோம் கொண்டு செல்ல”வரிகளும் சிந்தனையை தூண்டுபவை.”இறைவனின் திருவடியை பற்றுவதே சரி”என்ற அருணகிரியாரின் பாடலை சொன்னது முத்தாய்ப்பு.

    • Uma Chelvan 5:06 pm on September 29, 2013 Permalink | Reply

      ஜாதியில் மேலோர் என்றும் தாழ்ந்தவர் கீழோர் என்றும் பேதமில்லாது
      எல்லோரும் முடிவில் சேர்ந்திடும் காடு…………..எனக்கு மிகவும் பிடித்த பாடல் “பட்தீப்” ராகத்தில் !! மரணம் என்பது எல்லோருக்கும் பொது!! ஆனால் “எங்கே” ” எப்படி” என்பதுதான் பெரிய கேள்விகுறி? அதில் தான் இறைவனும் இருக்கிறான்!!!!! .

    • amas32 4:00 pm on October 1, 2013 Permalink | Reply

      ஆடி அடங்கும் வாழ்க்கையடா ஆறடி நிலமே சொந்தமடா என்ற பாட்டும் வாழ்வு முடிந்ததும் எல்லோருக்கும் ஒரே நிலை தான் என்று சொல்ல வருகிறது. அதற்காக முதலில் இருந்தே வாழ்க்கையை அனுபவிக்காமல் இருக்க முடியாது. தலை கால் புரியாமல் ஆடாமல், நல்ல எண்ணங்களையும் செயல்களையும் செய்து வந்தால் முடிவும் அமைதியானதாக இருக்கும்.

      amas32

  • GiRa ஜிரா 10:54 am on June 28, 2013 Permalink | Reply  

    மோடிபற்றிக் கொஞ்சம் 

    சில சொற்களை நாம் அடிக்கடி பயன்படுத்தியிருப்போம். ஆனால் அதற்கு என்ன பொருள் என்று அவ்வளவாக சிந்தித்திருக்க மாட்டோம். அப்படியொரு சொல்லைத்தான் நாம் இன்று பார்க்கப் போகிறோம்.

    தொலைக்காட்சியில் “வாராயோ வெண்ணிலாவே கேளாயோ எந்தன் கதையே” என்ற பாடல் ஓடிக்கொண்டிருந்தது. அந்தப் பாடலில் வந்த ஒரு வரிதான் என்னுடைய சிந்தனையைத் தூண்டி விட்டது.

    அனுதினம் செய்வார் மோடி
    அகமகிழ்வார் போராடி

    இந்த வரியில் வந்த மோடி என்ற சொல்லைத்தான் இன்று நாம் பார்க்கப் போகிறோம்.

    பொதுவாகவே மோடி என்றால் அதுவொரு வித்தை என்ற அளவுக்கு நமக்குத் தெரியும். இந்தப் பாட்டிலும் அப்படித்தான் வருகிறது. அனுதினமும்(ஒவ்வொரு நாளும்) கணவன் மோடி வித்தை செய்து ஏமாற்றுகிறார் என்று பெண் குற்றம் சாட்டுவது போல பாட்டில் வருகிறது.

    சிலர் மோடி வித்தையை கண்கட்டு வித்தை என்றும் சொல்வார்கள். எப்படியோ, மோடி என்றால் ஒரு வித்தை. அதை வைத்து மக்களை ஏமாற்றலாம் (அல்லது) மகிழ்விக்கலாம் என்று தெரிகிறது.

    சரி ஐயா! மோடி என்ற சொல் எங்கிருந்து வந்தது?

    அதைப் புரிந்து கொள்ள கொஞ்சம் காலத்தால் பின்னோக்கிப் போக வேண்டும்.

    அந்தக் காலத்தில் மந்திர தந்திர வித்தைகளைக் கற்றுக் கொண்டவர்கள் மாகாளிக்கு நச்சு பொருட்களை இட்டு வேள்வி செய்து தீய மந்திரங்களை உச்சாடணம் செய்து பலி கொடுப்பார்களாம். அந்த பலியை ஏற்றுக் கொண்ட காளி குறிப்பிட்ட காலம் வரைக்கும் அவர்கள் இட்ட ஏவல்களை செய்வாளாம்.

    இந்த சக்திகளை வைத்துக் கொண்டு ஏதேதோ வித்தைகளைக் காளியின் அருளால் செய்து மக்களையும் மன்னர்களையும் மருட்டி வெருட்டி சொகுசாக வாழ்வார்களாம் அந்த மந்திரவாதிகள்.

    இப்படி காளியின் துணை கொண்டு செய்யப்படும் வித்தைக்கு காளியின் பெயரே அமைந்தது. ஆம். காளிக்கு மோடி என்றும் ஒரு பெயருண்டு.

    இப்போது புரிந்திருக்குமே மோடி வித்தை என்ற பெயர் வரக் காரணம்.

    காளியை மோடி என்று இலக்கியங்களிலேயே அழைத்திருக்கிறார்கள். அப்பரும் அருணகிரிநாதரும் கலிங்கத்துப்பரணி எழுதிய செயங்கொண்டாரும் மோடி என்ற பெயரில் காளியை அழைத்திருக்கிறார்கள்.

    உவையுவை உளஎன் றெண்ணி
    உரைப்ப தென்உரைக் கவந்த
    அவை அவை மகிழ்ந்த மோடி
    அவயவம் விளம்பல் செய்வாம்
    நூல் – கலிங்கத்துப்பரணி
    பாடியவர் – செயங்கொண்டார்

    காளிக்குப் படையல் வைக்கப்பட்டிருக்கிறது. படையல்களைப் பார்க்கிறாள் அன்னை. இருக்கின்ற எல்லாவற்றையும் கண்டு மகிழ்ந்து ஏற்றுக் கொள்கின்றாளாம் காளி. ஆனால் இந்தப் பாடலில் காளி என்ற பெயருக்குப் பதிலாக மோடி என்ற பெயரைப் பயன்படுத்தியிருக்கிறார் செயங்கொண்டார்.

    போகமார் மோடி கொங்கை
    புணர்தரு புனிதர்போலும்
    வேகமார் விடையர் போலும்
    வெண்பொடியாடு மேனிப்
    பாகமா லுடையர் போலும்
    நூல் – தேவாரம்
    பாடியவர் – அப்பர் (திருநாவுக்கரசர்)

    மோடி(காளி)யின் கொங்கை தனைப் புணர்ந்து போகத்தையும் ரசிக்கும் சிவனார் என்று திருநாவுக்கரசர் பாடுகிறார்.

    அருணகிரிநாதரை எதிர்த்த சம்பந்தாண்டானும் ஒரு மோடி வித்தைக்காரர்தான். காளி உபாசகராக இருந்து அருணகிரி மேல் காளியை ஏவி விட்டார். ஆனால் முருகன் அருளால் அருணகிரிநாதரும் பிழைத்தார். தமிழும் பிழைத்தது. அத்தோடு சம்பந்தாண்டானின் ஏவல் காலம் முடிவடைந்ததால் அதற்குப் பின்னர் காளி உதவவில்லை.

    இதுதான் மோடி வித்தையின் கதை.

    பதிவில் இடம் பெற்ற பாடல்
    பாடல் – வாராயோ வெண்ணிலாவே
    பாடியவர்கள் – ஏ.எம்.ராஜா, பி.லீலா
    பாடல் வரிகள் – தஞ்சை ராமையாதாஸ்
    இசை – எஸ்.ராஜேஸ்வரராவ்
    படம் – மிஸ்ஸியம்மா
    பாடலின் சுட்டி – http://youtu.be/1AbSd-UYoyo

    அன்புடன்,
    ஜிரா

    209/365

     
    • rajnirams 2:40 pm on June 29, 2013 Permalink | Reply

      ஓ,புதிய தகவல்-மோடி என்பதற்கு “காளி”என்றும் பொருள் என்று.நன்றி.-அதான் மோடின்னா எதிர்கட்சிகளுக்கு நாக்கு தள்ளுதோ:-))

  • என். சொக்கன் 8:39 pm on June 26, 2013 Permalink | Reply  

    மீனாக் கண்ணு! 

    • படம்: பூந்தோட்டக் காவல்காரன்
    • பாடல்: சிந்திய வெண்மணி
    • எழுதியவர்: கங்கை அமரன்
    • இசை: இளையராஜா
    • பாடியவர்கள்: கே. ஜே. யேசுதாஸ், பி. சுசீலா
    • Link: http://www.youtube.com/watch?v=e_fCjI0YTX0

    சேலாடும் கண்ணில், பாலூறும் நேரம்,

    செவ்வானம் எங்கும், பொன் தூவும் கோலம்!

    ’சேல்’ என்ற வார்த்தையைப் பழைய (அதாவது, கருப்பு வெள்ளைப்) பாடல்களில் நிறைய கேட்கலாம். தமிழ் மொழி கொஞ்சம் நவீன வடிவத்தைப் பெற்றபிறகு, பேச்சுவழக்கில் இல்லாத காரணத்தாலோ என்னவோ, திரைக் கவிஞர்கள் இந்த வார்த்தையை முற்றிலுமாகத் தவிர்த்துவிட்டார்கள்.

    அபூர்வமாக, கங்கை அமரன் இதைப் பயன்படுத்தியிருக்கிறார், மிக அழகான உவமையாக!

    ‘சேல்’ என்றால் கெண்டை மீன். அந்த மீனைப்போன்ற பெரிய, அகன்று விரிந்த கண்களைக் கொண்ட பெண்ணைச் ‘சேல்விழியாள்’ என்று சொல்வார்கள்.

    உதாரணமாக, திருப்புகழ் பாடல் ஒன்றில் அருணகிரிநாதர் வள்ளியை இப்படி வர்ணிக்கிறார்: கொஞ்சு வார்த்தை கிளி, தண் கண் சேல், குன்ற வேட்டிச்சி!

    அதாவது, கிளிபோல் கொஞ்சுகிற வார்த்தைகளையும், தண்ணீரில் எந்நேரமும் மிதப்பதால் குளிர்ந்திருக்கும் கெண்டை மீனைப்போன்ற கண்களையும் கொண்ட, குன்றில் வாழ்கிற வேடுவப் பெண்!

    கங்கை அமரனின் சொல்லாட்சி ஒருபுறமிருக்க, இந்தப் பாடலில் எனக்கு மிகவும் பிடித்த வரி, ‘பெண் என்னும் வீட்டில் நீ செய்த யாகம்’. கர்ப்பம் தாங்குதலை இதைவிட எளிமையாகவும் சுருக்கமாகவும் உயர்வாகவும் சொல்லிவிடமுடியுமா என்ன!

    ***

    என். சொக்கன் …

    26 06 2013

    207/365

     
    • amas32 8:55 pm on June 26, 2013 Permalink | Reply

      //‘பெண் என்னும் வீட்டில் நீ செய்த யாகம்’. கர்ப்பம் தாங்குதலை இதைவிடச் சுருக்கமாகவும் உயர்வாகவும் சொல்லிவிடமுடியுமா என்ன!// எடுத்துக் காண்பித்ததற்கு நன்றி 🙂

      //சேலாடும் கண்ணில், பாலூறும் நேரம்,// சேலின் அர்த்தம் புரிந்தது ஆனால் இந்த வரியின் பொருள் புரியவில்லை. கண் கிறங்குகிறது என்ற பொருளோ?

      amas32

    • என். சொக்கன் 9:54 pm on June 26, 2013 Permalink | Reply

      //கண்ணில் பாலூறும்// விழிகளில் தாய்மை உணர்வு ததும்பும் என்று சொல்வதாக நான் புரிந்துகொள்கிறேன், அர்த்தம் அதுதானா என்று தெரியவில்லை

    • rajnirams 7:51 pm on June 27, 2013 Permalink | Reply

      sale, சேலை என்று அறிந்திருந்த எனக்கு “சேல்” வார்த்தையின் “மீனி”ங்கை சொன்னதற்கு நன்றி. இவ்வளவு நாள் “வாலி”எழுதியது என்றே நினைத்திருந்தேன்.அந்த படத்தின் எல்லா பாடல்களும் கங்கை அமரன் என்று இப்போது தான் தெரிந்தது. அற்புதமான வரிகள் கொண்ட பாடல். நன்றி.

  • GiRa ஜிரா 11:36 am on June 19, 2013 Permalink | Reply  

    திருப்புகழ்! 

    திருப்புகழைப் பாடப் பாட வாய் மணக்கும்
    எதிர்ப்புகளை முருகா, உன் வேல் தடுக்கும்
    முருகா…… உன் வேல் தடுக்கும்!

    பூவை செங்குட்டுவன் எழுதிய அற்புதமான பாடல் வரிகள் இவை. கௌரி கல்யாணம் என்ற திரைப்படத்தில் இடம் பெற்ற பாடல் இது.

    திருப்புகழின் திருப்புகழை இதை விட எளிமையாகச் சொல்ல முடியுமா என்று நம்மையும் சிந்திக்க வைக்கும் வரிகள் இவை.

    திருப்புகழுக்கு அப்படி என்ன பெருமை? அதைப் புரிந்து கொள்ள சிலபல தகவல்களை நாமும் தெரிந்து கொள்ள வேண்டும்.

    தமிழுக்குக் கிடைத்த அற்புத மாமணி அருணகிரிநாதர். முருகன் திருவருளால் அருணகிரியின் வாக்கில் வந்த பாடல்கள்தான் திருப்புகழ் என்று தொகுக்கப்பட்டன. திருப்புகழ் என்ற பெயரைப் பின்னால் யாரும் வைக்கவில்லை. அருணகிரியே ஒரு பாடலில் திருப்புகழ் என்று குறிப்பிடுகிறார்.

    பக்கரை விசித்ரமணி பொற்கலனை இட்ட நடை
    பட்சியெனும் உக்ர துரகமும் நீபப்
    பக்குவ மலர்த்தொடையும் அக்குவடு பட்டொழிய
    பட்டுருவ விட்டருள்கை வடிவேலும்
    திக்கது மதிக்கவரு குக்குடமும் ரட்சைதரு
    சிற்றடியு முற்றிய பனிருதோளும்
    செய்ப்பதியும் வைத்துயர் திருப்புகழ் விருப்பமொடு
    செப்பென எனக்கருள்கை மறவேனே

    குற்றமற்ற மணிகள் பொருந்திய பொன்னணிகளை அணிந்து கொண்டு அழகு நடை போடும் மாமயிலையும்,
    கடம்ப மலர் மாலையையும்,
    கிரவுஞ்ச மலையானது மறைந்து போகும் படி திருக்கையால் ஏவித் துளைத்த வேலையும்,
    எட்டுத் திசையும் கிடுகிடுக்க வரும் சேவலையும்,
    அருள் தருகின்ற சிற்றடிகளையும்,
    பன்னிரண்டு தோள்களையும்,
    இருந்து அருள் செய்யும் ஒவ்வொரு திருப்பதிகளையும் வைத்து உயர்ந்த வகையில் திருப்புகழை உள்ளம் விரும்பிப் பாடு என்று அருள் சொன்ன கருணையை நான் என்றும் மறவேனே!

    ஆக.. இந்தப் பாட்டில் இருந்து தெரிவது என்ன? திருப்புகழ் என்ற பெயரை அருணகிரிநாதர் வைக்கவில்லை. முத்தமிழ்த் தெய்வமான முருகப் பெருமானின் திருவாயால் பெயரிடப்பட்ட நூல் திருப்புகழ் என்ற சிறப்பை நாம் புரிந்து கொள்ள வேண்டும்.

    திருப்புகழில் இப்போது கிடைத்திருப்பது 1307 பாடல்கள்தான். இன்னும் பல்லாயிரம் பாடல்கள் இருந்ததாகவும் அவை மறைந்து போனதாகவும் கூறுகிறார்கள்.

    திருப்புகழைப் பாடிய அருணகிரி அந்தப் பாடல்களை ஓலையில் எழுதி வைக்கவில்லை. அவர் பாடிய கோயில்களில் இருக்கும் அன்பர்கள் அந்தப் பாடல்களை ரசித்து எழுதி வைத்தார்கள். அப்படி எழுதி வைத்த பாடல்கள்தான் இன்று தப்பிப் பிழைத்து நமக்குக் கிடைத்திருக்கின்றன.

    திருப்புகழை அருணகிரி அறிவால் பாடவில்லை. முருகன் அருளால் பாடினார். அதாவது முருகன் அருணகிரியைப் பாட வைத்தான். அந்தப் பாடல்களில் எத்தனையெத்தனை சந்தநயம்! எத்தனை தாள வகைகள் உண்டோ அத்தனையும் திருப்புகழ் பாடல்களில் உள்ளனவாம். அத்தோடு அளவிட முடியாத கவிச்சுவை வேறு.

    அப்படிப்பட்ட திருப்புகழ் பாடல்களை அருணகிரியே ரசித்திருக்கிறார். கேட்டவர்கள் ரசித்ததையும் கண்டிருக்கிறார்.

    பத்தர்க ணப்ரிய நிர்த்தந டித்திடு
    பட்சிந டத்திய குகபூர்வ
    பச்சிம தட்சிண வுத்தர திக்குள
    பத்தர்க ளற்புத மெனவோதுஞ்
    சித்ரக வித்துவ சத்தமி குத்ததி
    ருப்புக ழைச்
    சிறி தடியேனுஞ்
    செப்பென வைத்துல கிற்பர வத்தெரி
    சித்தவ நுக்ரக மறவேனே

    அடியவர்களுக்கு அருளும் இறைவனே
    ஆடும் மயில் ஏறி விளையாடும் குகனே
    கிழக்கு, மேற்கு, தெற்கு, வடக்கு
    ஆகிய திசைகளில் உள்ள அன்பர்கள் எல்லாரும்
    அற்புதம் அற்புதம் என்று ரசித்து ஓதுகின்ற
    அழகு கவிநயமும் சந்தநயமும் மிகுந்து இருக்கும்
    திருப்புகழை கொஞ்சமாவது நானும்
    சொல்லும் படி செய்து உலகில் பரவுவதற்கு
    வகை செய்த உன்னருளை மறக்க மாட்டேன் முருகனே!

    இந்த வரிகளிலும் அருணகிரி முருகனுக்கு நன்றி கூறுகிறார். திருப்புகழ் என்ற பெயர் நிலைபெறும் வகையில் இந்தப் பாடலிலும் இடம் பெறுகிறது.

    சரி. திருப்புகழ் பாடல்களிலேயே முதலில் பாடப்பட்டது எந்தப் பாடல் என்று தெரியுமா? எங்கு பாடப்பட்டது என்று தெரியுமா?

    முத்தைத் தரு பத்தித் திருநகை” என்ற பாடல்தான் முதலில் பாடப்பட்டது. பாடப்பட்ட இடம் திருவண்ணாமலை கோயில்.

    திருப்புகழ் பாடு என்று முருகன் பணித்த பின் “என்ன பாடுவது எப்படிப் பாடுவது” என்று புரியாமல் தவித்த அருணகிரிக்கு “முத்து முத்தாகப் பாடு” என்று முருகனே எடுத்துக் கொடுக்க பாடப்பட்டதுதான் “முத்தைத் தரு பத்தித் திருநகை” என்ற திருப்புகழ்.

    இதில் முத்து என்பது அருணகிரியைப் பெற்ற அன்னை என்றொரு கருத்தும் உண்டு.

    திரைப்படங்களிலும் திருப்புகழ் பாடல்கள் வந்துள்ளன. குறிப்பாக அருணகிரிநாதர் திரைப்படத்தில் மூன்று திருப்புகழ் பாடல்கள் வந்துள்ளன.

    1. முத்தைத் தரு பத்தித் திருநகை
    2. பக்கரை விசித்ரமணி பொற்கலனை இட்ட நடை
    3. தண்டையணி வெண்டயம் கிண்கிணி சதங்கையும்

    அதற்குப் பல ஆண்டுகள் கழித்து இறையருட் கலைச்செல்வர் இயக்கத்தில் வெளிவந்த “யாமிருக்க பயமேன்” என்ற திரைப்படத்தில் ”பாதிமதி நதி போது மணிசடை” என்ற திருவேரகத்(சுவாமிமலை) திருப்புகழ் மெல்லிசை மன்னர் இசையமைப்பில் வெளிவந்தது. அதற்குப் பல ஆண்டுகளுக்குப் பிறகு இளையராஜா இசையில் “ஏறுமயில் ஏறிவிளையாடும்” என்ற திருப்புகழ் ”தம்பி பொண்டாட்டி” என்ற திரைப்படத்தில் இடம் பெற்றது.

    நாமும் திருப்புகழை ஓதி முருகனருளால் நல்லறிவும் நல்லருளும் பெற்று வளமோடு வாழ்வோம்.

    பதிவில் இடம் பெற்ற திருப்புகழ் பாடல்கள்
    திருப்புகழை/பி.சுசீலா,சூலமங்கலம் ராஜலட்சுமி/கௌரிகல்யாணம்/எம்.எஸ்.வி – http://youtu.be/awxORiSnHig
    முத்தைத்தரு/டி.எம்.சௌந்தரராஜன்/அருணகிரிநாதர்/டி.ஆர்.பாப்பா – http://youtu.be/2vRkCV3symk
    பக்கரை/டி.எம்.சௌந்தரராஜன்/அருணகிரிநாதர்/டி.ஆர்.பாப்பா – http://youtu.be/AfZ3UoT4pFw
    தண்டையணி/டி.எம்.சௌந்தரராஜன்/அருணகிரிநாதர்/டி.ஆர்.பாப்பா – http://youtu.be/QyZi7oEUtGI
    பாதிமதிநதி/வாணி ஜெயராம், எல்.ஆர்.அஞ்சலி/யாமிருக்க பயமேன்/எம்.எஸ்.வி – http://youtu.be/FDMcv6CjglI
    ஏறுமயில்/சுவர்ணலதா,மின்மினி,கல்பனா,பிரசன்னா/தம்பிபொண்டாட்டி/இளையராஜா – http://youtu.be/ju0VhKQHQ3c

    பி.கு. ஏ.ஆர்.ரகுமான் இசையில் வெளிவந்த “என் வீட்டுத் தோட்டத்தில்” பாடல் “நாதவிந்து கலாதீ நமோநம” என்ற திருப்புகழின் சாயலிலும் “வெற்றிக் கொடி கட்டு” என்ற பாடல் “முத்தைத் தரு பத்தி” என்ற திருப்புகழின் சாயலிலும் வந்துள்ளது.

    அன்புடன்,
    ஜிரா

    200/365

     
    • kamala chandramani 12:14 pm on June 19, 2013 Permalink | Reply

      திருப்புகழ் ஓதுவதன் சிறப்பை அருணகிரிநாதர் திருத்தணிகைத் திருப்புகழில் அருமையாகக் கூறுகிறார்.
      ”சினத்தவர் முடிக்கும் பகைத்தவர் குடிக்குஞ் செகுத்தவ ருயிர்க்குஞ் சினமாக,
      சிரிப்பவர் தமக்கும் பழிப்பவர் தமக்கும் திருப்புகழ் நெருப்பென் றறிவோம்யாம்;
      நினைத்தது மளிக்கும் மனத்தையு முருக்கும் நிசிக்கருவறுக்கும் பிறவாமல்
      நெருப்பையு மெரிக்கும் பொருப்பையு மிடிக்கும் நிறைப்புக ழுரைக்குஞ் செயல்தாராய்.”

      வள்ளலாரோ”உய்யும் பொருட்டுன் திருப்புகழை உரையே னந்தோ வுரைக்கடங்காய்” எனத் தணிகைச் செஞ்சுடரிடம் வருந்துகிறார். மேலும்,”அருணகிரி பாடும் நின்னருள்தோய் புகழைப் படியேன் பதைத் துருகேன் பணியேன் மனப்பந்தம் எல்லாம் கடியேன் என் செய்வேன் என் காதலனே” என உருகுகிறார். திருப்புகழும் அருட்பாவும் இரு கண்கள்.

    • Arun Rajendran 12:24 pm on June 19, 2013 Permalink | Reply

      ஜிரா சார்,

      அருணகிரிநாதர் காரணப் பெயர் மாதிரி தெரியுதுங்க.. சுருக்கமா ஒரு குறிப்பும் முடிந்தால் கொடுங்க..படிக்கிற ஆர்வத்தத் தூண்டி இருக்கீங்க… திருப்புகழையும் என்னோட அட்டவனைல சேர்த்திக்கிறேன்

      இவண்,
      அருண்

    • amas32 (@amas32) 12:53 pm on June 19, 2013 Permalink | Reply

      //திருப்புகழில் இப்போது கிடைத்திருப்பது 1307 பாடல்கள்தான். இன்னும் பல்லாயிரம் பாடல்கள் இருந்ததாகவும் அவை மறைந்து போனதாகவும் கூறுகிறார்கள்.//

      நீங்கள் இங்கே நாலு வரி நோட்டில் இந்த இருநூறு நாட்களில் பதிந்த பாடல்கள் நாளை ஒரு ரெபரன்சுக்கு நிச்சயம் பலருக்கு உதவப் போகிறது.

      உங்கள் டாபிக் ஜிரா! சூப்பர் பதிவு 🙂 அனுபவித்துப் படித்தேன் 🙂 நன்றி.

      amas32

    • rajnirams 10:07 pm on June 19, 2013 Permalink | Reply

      முதலில் உங்களுக்கெல்லாம் மனமார்ந்த நல்வாழ்த்துக்களை தெரிவித்துக் கொள்கிறேன்.
      சூப்பரான பதிவு. இதுவரை நான் அறியாத அரிய தகவல்கள்.அருணகிரிநாதரின் பெருமைகளையும் திருப்புகழின் சிறப்புகளையும் அருமையாக “சுட்டி”காட்டியதற்கு நன்றி கலந்த பாராட்டுக்கள்.

  • GiRa ஜிரா 8:46 am on May 18, 2013 Permalink | Reply  

    பனிப் பானு 

    நிலவைப் பார்த்தால் கவிஞனுக்குக் கவிதை வரும். குழந்தைக்கு தூக்கம் வரும். காதலர்களுக்கு ஏக்கம் வரும். ஏழைகளுக்குப் பசி வரும். கோழைகளுக்கு பயம் வரும். ஒவ்வொருவருக்கும் ஒவ்வொன்று வரும்.

    அந்த நிலவைப் பாடாத கவிஞன் இல்லை. பாடாவிட்டால் கவிஞன் இல்லை. இலக்கியச் சுவைகள் எத்தனை உண்டோ, அத்தனை விதமான சுவைகளையும் வெளிப்படுத்தும் கவிதைகளிலும் நிலவு இருக்கும். இது மறுக்க முடியாத உண்மை.

    அப்படியிருக்க திரைப்படக் கவிஞர்கள் மட்டுமென்ன நிலவோடு கோவித்துக்கொண்டவர்களா?

    அவன் மனைவியை இழந்தவன். நெஞ்சமெல்லாம் சோகம். அவனை விரும்புகிறாள் ஒருத்தி. அவள் காதலை மறுக்க வேண்டும். அதே நேரத்தில் சோகத்தையும் சொல்ல வேண்டும். இரண்டையும் ஒரே வரியில் சொல்ல கவியரசர் கண்ணதாசனுக்கு கைகொடுக்கிறது நிலவு. “நிலவே என்னிடம் நெருங்காதே நீ நினைக்கும் இடத்தில் நானில்லை”.

    அதே கவியரசர். வேறொரு கதாநாயகன். திருமணமானவன். பிடிக்காத கல்யாணம். தொடாதே என்று சொல்லிவிட்டாள் மனைவி. அவனுடைய ஆத்திரத்தையும் ஆற்றாமையையும் ஒரே வரியில் சொல்ல வேண்டும். மறுபடியும் நிலா உதவுகிறது. “நிலவைப் பார்த்து வானம் சொன்னது என்னைத் தொடாதே”.

    நல்லவர்கள் இருவர். தவறு செய்கிறார்கள். அவர்கள் செய்வது கடத்தல். கடலில் தோணி கட்டி தோணியில் பாட்டு கட்டி ஆடிப்பாடி வருகிறார்கள். அவர்கள் களிப்புக்கும் கும்மாளத்துக்கும் நிலவு உதவுகிறது. “நிலா அது வானத்து மேலே. பலானது ஓடத்து மேலே” என்று எழுதினார் இளையராஜா.

    குழந்தைகளுக்கும் கோவம் வரும். அந்தக் கோவத்தை மாற்றுவது எளிதான செயலா? கோவித்தது சேயாக இருந்தாலும் ஆடியும் பாடியும் சமாதானப்படுத்துவது தாயாகத்தான் இருக்கும். அப்படிச் சமாதான வரிகளைச் செதுக்க கவிஞர் வாலிக்குத் துணை வந்ததும் நிலாதான். “மண்ணில் வந்த நிலவே, என் மடியில் பூத்த மலரே” என்று எழுதினார்.

    தூக்கத்துக்குக் காரணமாகும் நிலவுதான் ஏக்கத்தும் காரணமாகிறது. காதலர்கள் பிரிந்தாலும் துன்பம். கூடினாலும் பிரியப் போவதை எண்ணித் துன்பம். அந்தத் துன்பம் அவனைத் தூங்கவிடவில்லை. அப்படியொரு பாட்டெழுத வேண்டும். ”நிலவு தூங்கும் நேரம். நினைவு தூங்கிடாது” என்று எழுதினார் வாலிபக் கவிஞர் வாலி.

    காதலர்கள் உள்ளத்தில் எப்போதும் ஒரு பெருமிதம் இருக்கும். இந்தக் காதலனுக்கும் அப்படிதான். அவன் காதலி பேரழகி. அப்படியொரு பிரபஞ்ச அழகி அவனுக்குக் காதலி என்ற பெருமிதத்தைப் பாட்டில் சொல்ல வேண்டும். இந்த முறை நிலவோடு கை கோர்த்தவர் வைரமுத்து. “சந்திரனைத் தொட்டது யார் ஆம்ஸ்டிராங்கா? அடி ஆம்ஸ்டிராங்கா? சத்தியமாய் தொட்டது யார்? நான்தானே” என்று எழுதினார்.

    அவனுக்கு வாழ்க்கையே வெறுத்து விட்டது. வாழ்க்கை எப்படியெல்லாம் ஏமாற்றியது என்ற வெறுப்பைப் பாட்டில் சொல்ல வேண்டும். இந்த முறை நிலவை துணைக்கழைத்தவர் புலவர் புலமைப்பித்தன். “சந்திரனப் பாத்தா சூரியனாத் தெரிகிறது. செங்கரும்பு கூட வேம்பாகக் கசக்கிறது” என்று எழுதினார்.

    கும்மாளக் காதலர்களுக்குத் திருமணமும் ஆகிவிட்டது. குதித்துக் கொண்டிருந்தவர்களுக்குக் கால்கட்டு போட்டாயிற்று. இன்று முதல் இரவு. அந்த அளவுக்கு மீறிய உற்சாகத்தை மகிழ்ச்சியின் உச்சத்தை வரிகளில் கொண்டு வர முடியுமா? நிலவிருக்க பயமேன். “நிலவைக் கொண்டு வா கட்டிலில் கட்டி வை” என்று வைரவரிகளை வைரமுத்து கொடுத்தார்.

    இப்படியாக சோகம், ஏக்கம், ஆதங்கம், மகிழ்ச்சி, கொண்டாட்டம், உல்லாசம், ஆத்திரம், தாலாட்டு என்று எந்த வகை உணர்ச்சியையும் கவிதையில் வடிக்க உதவுவது நிலவு.

    என்ன? பக்திச் சுவை விட்டுப் போயிற்றா? யார் சொன்னார்கள்? இறையருளைப் பெற்றதும் சுந்தரரே “பித்தா பிறைசூடி” என்றுதான் பாடத் தொடங்கினார். சின்னஞ்சிறு குழந்தையாய் திருஞானசம்பந்தர் ஞானப்பால் உண்டு பாடிய பொழுது “தோடுடைய செவியன் விடையேறியோர் தூவெண்மதி சூடி” என்றுதான் பாடினார்.”

    ஓ! திரைப்படப் பாடலாக இருந்தால்தான் ஒத்துக் கொள்வீர்களா? சரி. அதற்கும் பாடல்கள் பல உண்டு. ஆனாலும் ஒன்று சொல்கிறேன். ஆதிபராசக்தி திரைப்படத்தில் அபிராமி பட்டர் எப்படிப் பாடுகிறார்? ”சொல்லடி அபிராமி நில்லடி முன்னாலே முழு நிலவினைக் காட்டு உன் கண்ணாலே” என்று கண்ணதாசன் எழுதிக் கொடுத்தபடிதானே பாடினார்?

    இந்தப் பாடல்கள் மட்டுந்தானா? இல்லை. இன்னும் எத்தனையெத்தனையோ பாடல்கள். “வான் நிலா நிலா அல்ல உன் வாலிபம் நிலா” என்று பாட்டு முழுக்க எழுதினார் கவியரசர் கண்ணதாசன்.

    இந்த நிலவுக்கு எத்தனையெத்தனை பெயர்கள். மதியென்பார். சந்திரனென்பார். பிறையென்பார். வெண்ணிலா என்பார். முழுமதி, நிறைமதி, வளர்மதி, வெண்மதி என்று எத்தனையெத்தனையோ பெயர்கள்.

    ஈசனார் சூடிய பிறைச் சந்திரனை ஞானக்கண்ணால் பார்க்கிறார் அருணகிரிநாதர். அந்தப் பிறைச் சந்திரனை என்ன சொல்லிப் பாடுவது? உடனே ஒரு திருப்புகழ் பிறக்கிறது.

    பாதிமதி நதி போது மணிச்சடை நாதர் அருளிய குமரேசா
    பாகு கனிமொழி மாது குறமகள் பாதம் வருடிய மணவாளா

    பிறைச்சந்திரன் பாதியாகத்தானே இருக்கிறது. அதனால் பாதிமதி என்றே பெயர் சூட்டிவிட்டார் அருணகிரிநாதர்.

    அதே அருணகிரி கந்தரந்தாதியில் நிலவுக்கு இன்னொரு பெயரைச் சொன்னார். அந்தப் பெயரை அவருக்கு முன்னாலும் பின்னாலும் யாரும் சொன்னதில்லை.

    சேயவன் புந்தி வனவாச மாதுடன் சேர்ந்தசெந்திற்
    சேயவன் புந்தி கனிசா சராந்தக சேந்தவென்னிற்
    சேயவன் புந்தி பனிப்பானு வெள்ளிபொன் செங்கதிரோன்
    சேயவன் புந்தி தடுமாற வேதருஞ் சேதமின்றே

    இந்தப் பாடலில் நிலவுக்கு அவர் சொல்லியிருக்கும் பெயர் பனிப்பானு. பானு என்றால் சூரியனைக் குறிக்கும். பனி குளுமையைக் குறிக்கும். நிலவு என்பது குளுமையான சூரியனாம். அதனால்தான் பனிப்பானு என்று புதுப்பெயர் சூட்டியிருக்கிறார் அருணகிரி. அழகான பெயரல்லவா?

    நிலா நிலா ஓடி வா! நில்லாமல் ஓடி வா! மலை மேலே ஏறி வா! மல்லிகைப்பூ கொண்டு வா!

    பதிவில் இடம் பெற்ற பாடலின் சுட்டிகள்.

    பாதிமதிநதி (யாமிருக்க பயமேன்) – http://youtu.be/FDMcv6CjglI
    நிலவே என்னிடம் நெருங்காதே (ராமு) – http://youtu.be/Z8MYbZVETDU
    நிலவைப் பார்த்து வானம் (சவாலே சமாளி) – http://youtu.be/FSdL74sUCNE
    நிலா அது வானத்து மேலே (நாயகன்) – http://youtu.be/ldPFymzsVd8
    நிலவு தூங்கும் நேரம் (குங்குமச் சிமிழ்) – http://youtu.be/0k6lUIhIqPo
    சந்திரனைத் தொட்டது யார் (ரட்சகன்) – http://youtu.be/ZIQXtyJQMIE
    சந்திரனப் பாத்தா (பிரம்மச்சாரிகள்) – http://www.dhool.com/phpBB2/viewtopic.php?t=3278
    மண்ணில் வந்த நிலவே (நிலவே மலரே) – http://youtu.be/UmCcv-4uv7k
    நிலவைக் கொண்டு வா (வாலி) – http://youtu.be/QOcrng-CkmE
    தோடுடைய செவியன் (ஞானக்குழந்தை) – http://youtu.be/-OT2RCgAvVA
    சொல்லடி அபிராமி (ஆதிபராசக்தி) – http://youtu.be/fCltNDw_oFA
    வான் நிலா நிலா அல்ல (பட்டினப்பிரவேசம்) – http://youtu.be/bV8V2oowwwI

    அன்புடன்,
    ஜிரா

    168/365

     
    • rajnirams 11:45 am on May 18, 2013 Permalink | Reply

      பனிப்பானு-புதுமையான தலைப்பில் அருமையான பதிவு.தமிழ் கவிஞர்கள் நிலவை வைத்துக்கொண்டு ஏராளமான பாடல்கள் எழுதியிருக்கிறார்கள்.அதுவும் புலமைப்பித்தன் “ஆயிரம் நிலவிற்கு” ஒப்பாக பெண்ணை பாடியது தான் உச்சம்.வாலியின் நிலவு ஒரு பெண்ணாகி,நிலாவே வா,கண்ணதாசனின் நிலவுக்கு என் மேல் என்னடி கோபம்,இரவும் நிலவும் வளரட்டுமே இப்படி சொல்லிக்கொண்டே போகலாம்.நன்றி.

      • GiRa ஜிரா 8:29 am on May 21, 2013 Permalink | Reply

        ஆயிரம் நிலவே வான்னு அவர் எழுதிட்டாரேன்னு இன்னும் லட்சம் நிலவுகள்னு யாரும் எழுதலையா? 🙂

    • Arun Rajendran 12:38 pm on May 18, 2013 Permalink | Reply

      ஒரே நாள் உனை நான் நிலாவில் பார்த்தது -> love at first sight
      கல்யாணத் தேனிலா காய்ச்சாதப் பால் நிலா -> தலைவனும் தலைவியும் ஒருவரை ஒருவர் எண்ணித் திளைத்தல்
      வானிலே தேனிலா ஆடுதே பாடுதே -> தலைவனும் தலைவியும் ஒருவரை ஒருவர் கண்டு மகிழ்தல்
      அந்த நிலாவத்தான் நான் கையில புடிச்சேன் -> பரிசில்கள் பரிமாறுதல்
      அமுதைப் பொழியும் நிலவே -> பிரிவு; வருத்தம் காதல் கலந்து வெளிப்பட பாடல்
      நாளை இந்த வேளைப் பார்த்து ஓடி வா நிலா -> தலைவி ஆற்றியிருத்தல்; காதலாகி கசிந்துருகி..
      நிலவுக்கு என் மேல் என்னடி கோபம் -> மீண்ட தலைவன் தலைவியின் கோபம் தனித்தல்
      மஞ்சள் நிலாவுக்கு இன்று ஒரே சுகம் -> காதல் கனிந்து மணமுடித்தல்
      நிலா காயுது நேரம் நல்ல நேரம் -> விரகம்; கூடி களித்தல்
      வாராயோ வெண்ணிலாவே நீ கேளாயோ -> தலைவன் தலைவி ஊடல்;வாழ்வியல்
      நிலவும் மலரும் பாடுது என் நினைவில் தென்றல் -> and their love story continues

      இவண்,
      அருண்

      • GiRa ஜிரா 8:30 am on May 21, 2013 Permalink | Reply

        அடா அடா அடா… என்னவொரு பட்டியல்…. நிலாவுல கட்டில் போட்டேன்னு என்னச் சொன்னீங்களே… நீங்க வீடே கட்டியிருக்கீங்களே 🙂

    • amas32 7:04 pm on May 19, 2013 Permalink | Reply

      திரை இசைப் பாடல்களில் வரும் நிலவுப் பாடல்கள் மட்டுமே, கணக்கிட்டால் ஓராயிரம் தேறும் போல இருக்கிறதே! ஜோதிட சாஸ்திரப் படி கூட சந்திரன் மனத்தையாளும் ஒரு கிரகம். சந்திரனின் கிரக நிலை ஒருவனுக்குச் சரியாக இல்லாவிட்டால் அவன் பித்துப் பிடித்து அலைவான். காதல் வசப்படுவதும் அதனின் mild form தானே? 🙂

      Lovely post Gira 🙂

      amas32

      • GiRa ஜிரா 8:31 am on May 21, 2013 Permalink | Reply

        அப்போ இந்தக் காதல் கீதல் எல்லாத்துக்கும் சந்திரந்தான் காரணமா? இத மொதல்லயே சொல்லிருந்தா நாட்டுல சந்திரனுக்கு பெரிய பெரிய கோயில்கள் கெட்டியிருப்பாங்களே காதலர்கள். 🙂

    • Saba-Thambi 6:21 pm on May 20, 2013 Permalink | Reply

      பனிப்பானு , இன்று புதிதாக படித்த சொல்!
      நன்றி.

      • GiRa ஜிரா 8:32 am on May 21, 2013 Permalink | Reply

        பனிப்பானு – அருணகிரி வைத்த பெயர். ஓசையை மொழியாக்கி அதிலும் பொருளாக்கி அந்தப் பொருளும் அருளாக வைத்த பெருமான். அருணகிரிப் பெருமான்.

  • GiRa ஜிரா 1:31 pm on April 25, 2013 Permalink | Reply
    Tags: கே.பி.அறிவானந்தம், கோவை கமலா, ஸ்ரீபதி   

    நவ(ல)க் கிரகம் 

    ஒரு நண்பரோடு பேசிக் கொண்டிருந்த போது, அவருக்கு ஜாதகத்தில் ஏதோ தோஷம் இருப்பதாகவும் அதனால் குறிப்பிட்ட கோயிலுக்குச் சென்று ஏதோ பரிகாரங்களைச் செய்ய வேண்டுமென்றும் கூறினார்.

    நான் பொதுவாகவே ஜாதகங்களை பொருட்படுத்துவதில்லை. ஆண்டவன் அருள் இருந்தால் எல்லாம் நலமே என்பது என் கருத்து. அது சரி, என் கருத்தைப் பேசுவதற்கா இந்தப் பதிவு? இல்லவே இல்லை.

    அறுபடை வீடுகள், முருகன் கோயில்கள், திருமால் ஆலயங்கள் என்று எல்லாம் வரிசைப் படுத்திய திரைப்படங்கள் நவகிரகங்களைப் பற்றி ஏதேனும் பாடல் எழுதியிருக்கிறதா என்று யோசித்ததன் விளைவே இந்தப் பதிவு.

    நவக்கிரக நாயகி என்றொரு படம் கே.சங்கர் அவர்கள் இயக்கத்தில் வெளிவந்தது. நவகிரகங்களினால் உண்டாகும் பலன்களை வைத்து கதைகளை உருவாக்கி அந்தத் திரைப்படம் எடுக்கப்பட்டிருந்தது. வெற்றிப்படமாக அமைந்த அந்தப் படத்தில் மெல்லிசை மன்னர் இசையில் கே.பி.அறிவானந்தம் எழுதிய பாடலொன்று நவகிரகங்களையும் அவைகளுக்குரிய அதிதேவதைகளின் கோயில்களையும் பட்டியல் இட்டது.

    கிட்டத்தட்ட ஆறு நிமிடங்கள் ஓடும் இந்தப் பாடலை டி.எம்.சௌந்தரராஜன், பி.எஸ்.சசிரேகா, கோவை கமலா மற்றும் ஸ்ரீபதி ஆகியோர் பாடியிருந்தார்கள். வாருங்கள் பாடல் சொல்லும் தகவல்களைப் பார்க்கலாம். பாடலுக்கான ஒளிச்சுட்டி – http://youtu.be/GAE8cQ2dnoU

    பாடல் வரிகளில் புலவர் கே.பி.அறிவானந்தம் கொடுத்த தகவல்களை நவகிரகங்களையும் சோதிடம் பற்றியும் அறிந்தவர்கள் விளக்கலாம். பாடல் வரிகள் எளிமையாகப் புரிந்து கொள்ளும் வகையில் அமைந்துள்ளன. இந்தப் பாடலின் மற்றொரு சிறப்பு ஒவ்வொரு கிரகத்துக்கும் ஒவ்வொரு விதமாக இசையமைத்திருக்கிறார் மெல்லிசை மன்னர். பாடல் வரிகள் மாற மாற ராகமும் தாளமும் மாறுவதைக் கேட்கலாம்.

    உதயத்தில் ஒளி தந்து
    உலகத்தை வாழ்விக்கும்
    ஒப்பற்ற செஞ்சுடரைப் போற்றுவோம்
    சிவமாகி திருமாலின் வடிவான நவகிரக தேவனை நாம் வாழ்த்துவோம்
    ஆடுதுறை தனையின்று நாடுவோம்
    அந்த சூரியனார் கோயிலிலே காணுவோம்
    சந்ததமும் புகழ் தரும் வாழ்விலே
    என்றும் செந்தாமரை மலர் கொண்டே வணங்குவோம்

    சந்திர தேவனை சிந்தையில் நினைத்தால்
    இந்த உலகினில் எந்தக் குறையுமில்லை
    திருப்பதி மலை சென்று திருமாலின் பாதத்தில்
    வெள்ளை மலர் தூவினால் துயரமில்லை
    அதில் சந்திரனின் அருள் கிடைக்கும் ஐயமில்லை

    ருத்ரமூர்த்தியின் வியர்வையில் வந்த
    யுத்தபூமியின் தலைவனாம்
    உக்ரமூர்த்தியாம் செவ்வாய் குகனுடன் பழனியில் இருப்பான் திடம் தரவே
    செண்பக மலரால் வணங்குவோம் அவனருள் பெறவே
    செவ்வாய் தோஷம் நீங்கிடும் மங்கையர் நலம் பெறவே

    ஆயகலைகள் யாவும் அருள்பவன் புதனன்றோ
    அவனருள் பெற்றார்க்கு வித்தையில் குறைவுண்டோ
    தூய சொக்கநாதருடன் மதுரையில் அமர்ந்திட்டான்
    துலங்கும் வெண்காந்தள் மலர் தந்தாள் அருள் புரிவான்

    தேவரெல்லாம் துதிக்கும் பிரஹஸ்பதி
    உன் திருவிழி பட்டாலே மாறும் தலைவிதி
    ஸ்ருதியும் ஸ்ம்ருதியும் நீ தரும் வரமன்றோ
    சொல்லிய ஞானமெல்லாம் நீ தரும் அறமன்றோ
    திருச்செந்தூரிலே உன்னை தரிசித்தாலே போதும்
    முல்லை மலர் கொண்டு பூஜித்தால் அருள் மேவும்

    சுக்ரதிசையது முறையாய் வந்தால் செல்வம் குவிந்திடுமே
    தக்க களத்திரம் பொன் பொருள் நவநிதி சேர்ந்து கிடைத்திடுமே
    சீரங்கத்தில் திருவருள் செய்யும் தேவனை அனுதினமே
    சீதள வெண்டாமரை மலரால் பணிந்தால் நலம் வருமே

    வினைகளின் விளைவிங்கு விதியென்று பெயர் கொண்டு
    சனிபகவான் வடிவாக வருமல்லவோ
    சிறிய காகம் ஏறி பெரிய வாழை தந்த அனுபவம் புவிவாழ்வின் கதையல்லவோ
    வருவோற்கு அருள் செய்யும் நள்ளாறிலே திருநள்ளாறிலே
    குறை தீர்த்து அருளுவான் தீர்க்காயுளே
    கருங்குவளை மலரோடு எள் தீபம் ஏற்றி
    கழல் பணியலாம் என்றும் ஈஸ்வரனையே சனீஸ்வரனையே

    ராகு கேது இரு தேவர் சென்றமரும் வீடு அவருடைய ?!?தியே
    யோக காரகனும் மோட்ச காரகனும் நாகராஜன் வடிவாகுமே
    நாகதோஷமது சூழும் போது அதை நீக்கி வைக்கும் திருகாளஹஸ்தி
    கருமந்தாரை செவ்வல்லியோடு பணிந்தால் அருள்வாள் சிவசக்தி
    பணிந்தால் அருள்வாள் சிவசக்தி பணிந்தால் அருள்வாள் சிவசக்தி

    ஒன்பது கோள்களும் பலவித நல்வினைகளையும் தீவினைகளையும் நம் வினைப்பயன்களுக்கேற்ப கொடுக்குமானால் அதிலிருந்து தப்பிப்பது எப்படி? எந்தக் கோள் நம்மைக் கோவிக்கிறது எந்தக் கோள் நம்மை அரவணைக்கிறது என்பதெல்லாம் எப்படித் தெரிந்து கொள்வது? எதைச் செய்தால் எந்தப் பலன் கிட்டும்? எதைச் செய்யாவிட்டால் எந்தப் பாவம் தீண்டும்? இப்படிக் குழப்பும் கேள்விகளுக்கெல்லாம் என்ன விடை?

    திருஞானசம்பந்தர் அதற்கும் நல்ல விடை சொல்லியிருக்கிறார். இதற்காக கோளறுபதிகம் என்றே ஒரு பதிகம் பாடியிருக்கிறார்.

    வேயுறு தோளி பங்கன் விடமுண்ட கண்டன்
    மிகநல்ல வீணை தடவி
    மாசறு திங்கள் கங்கை முடிமேல் அணிந்து என்
    உளமே புகுந்த அதனால்
    ஞாயிறு திங்கள் செவ்வாய் புதன் வியாழன் வெள்ளி
    சனிபாம் பிரண்டும் உடனே
    ஆசறு நல்ல நல்ல அவைநல்ல நல்ல
    அடியாரவர்க்கு மிகவே

    இதற்கு என்ன பொருள்?
    மூங்கில் போன்ற தோளினை உடைய உமையவளை உடையனை
    நீலகண்டத்து ஈசனை வீணைக் கலைஞனை
    திங்களையும் கங்கையும் முடியில் சூடியவனை
    நெஞ்சத்தில் அன்போடு வைத்த காரணத்தால்
    ஞாயிறு திங்கள் செவ்வாய் புதன் வியாழன் வெள்ளி சனி ராகு கேது
    ஆகிய கோள்கள் நல்ல பயன்களையே தரும்

    இதே கருத்தை அருணகிரிநாதரும் கந்தர் அலங்காரத்தில் எடுத்துச் சொல்கிறார். முருகன் திருவடியைப் பணிந்தாரை “நாள் என் செயும்? வினைதான் என் செயும்? கோள் என் செயும்? கொடும் கூற்று என் செயும்?” என்று கேட்கிறார்.

    உள்ளத்தில் அன்பும் அருளும் நிறைந்தால் எல்லாம் இன்பமயம் என்பது அருளாளர்கள் கருத்து.

    அன்புடன்,
    ஜிரா

    145/365

     
    • n_shekar 2:03 pm on April 25, 2013 Permalink | Reply

      சரணாகதி தத்துவம் – உள்ளத்தில் அன்பும் அருளும் நிறைந்தால் எல்லாம் நல்ல பயன்களையே தரும் – அருமையான பதிப்பு 🙂

    • amas32 9:37 pm on April 25, 2013 Permalink | Reply

      என்ன ஒரு அருமையான பாடல்! இசைக் கடலில் மூழ்கி நல் முத்தை எடுத்து எங்களுக்குக் கொடுக்கிறீர்கள்.

      பாடலாசிரியர் கே.பி.அறிவானந்தம் ஒவ்வொரு கிரகத்தின் குணாதிசயங்களையும், பரிகார தலங்களையும், எந்த மலர் கொண்டு பூஜிக்க வேண்டும் என்பதையும் கோவையாகக் கொடுத்துள்ளார்.

      ஆனால் கிரகங்களூக்கும் அதிபதியான ஒருவன் காலைப் பற்றினால் பின் நமக்கு வேறு என்ன கவலை!

      amas32

  • GiRa ஜிரா 9:43 am on December 7, 2012 Permalink | Reply
    Tags: அருணகிரிநாதர், , கந்தர் அநுபூதி, மதன் கார்க்கி   

    சும்மா எனும் சுமை 

    பெங்களூருக்குப் போன புதிதில் தமிழ் நண்பர்களோடு பேசும் போது “சும்மா” என்ற சொல்லைப் பயன்படுத்தினால் வடக்கத்திய நண்பர்கள் “சும்மா” என்றால் என்ன என்று கேட்பார்கள். இந்தியில் சும்மா என்றால் முத்தம். தமிழர்கள் அடிக்கடி முத்தத்தைப் பற்றிப் பேசுகிறார்களே என்று அவர்கள் நினைத்திருக்கலாம்.

    ஒரு நாளில் நாம் எத்தனை முறை “சும்மா” சொல்கிறோம் என்பதும் எதற்கெல்லாம் “சும்மா” சொல்கிறோம் என்பது ஒரு ஆச்சரியமான புள்ளிவிவரமாக இருக்கக்கூடும்.

    பேச்சில் இத்தனை சும்மா வரும் போது திரைப்படப் பாடல்களில் வராமல் இருக்குமா? இன்றைய மதன் கார்க்கி வரை திடைப்பாடல்களில் “சும்மா” இருக்கிறது.

    பாடல்-1
    படம் – தூங்காதே தம்பி தூங்காதே
    இசை – இளையராஜா
    பாடல் – வாலி
    பாடியவர் – எஸ்.ஜானகி
    பாடலின் சுட்டி – https://www.youtube.com/watch?v=xwtip74JdXk
    சும்மா நிக்காதிங்க
    நான் சொல்லும்படி வெக்காதிங்க
    சின்ன மனசு தாங்காது
    தன்னந்தனியா தூங்காது

    பாடல்-2
    படம் – முகமூடி
    இசை – கிருஷ்ணகுமார்
    பாடியவர் – ஆலப் ராஜு
    பாடல் – மதன் கார்க்கி
    பாடலின் சுட்டி – http://www.tamilpaa.com/596-vaayamoodi-summa-tamil-songs-lyrics
    வாயை மூடி சும்மா இருடா
    ரோட்டப் பாத்து நேரா நடடா
    கண்ணைக் கட்டி காட்டுல விட்டுடும்டா
    காதல் ஒரு வம்புடா!

    சும்மா இருக்க முடியுமா என்று நகைச்சுவை நடிகர் வடிவேலு எல்லாரையும் ஒரு படத்தில் கேள்வி கேட்டு சும்மா இருப்பது எவ்வளவு கடினம் என்று நிரூபிப்பார். படத்தின் பெயர் தெரியவில்லை.

    அந்தப் படத்தில் நடித்த வடிவேலுக்கு முன்னால் யாராவது சும்மா இருந்திருக்கின்றார்களா?

    ஒருவர் இருந்திருக்கிறார். இன்னொருவர் அவரை சும்மா இருக்கச் சொன்னதால் இருந்திருக்கிறார்.

    இருந்தவர் அருணகிரிநாதர். சொன்னவர் முருகன்.

    காமக் கலவி என்னும் கள்ளை மொண்டு மொண்டு உண்டவர் அருணகிரி. தொழுநோய் அவரைப் பிடித்ததால் அவரை யாருக்கும் பிடிக்காமல் போனது. கோபுரத்தின் உச்சியில் ஏறி அங்கிருந்து குதிக்கும் போது தடுத்தான் முருகன். தடுத்த முருகன் அருணகிரிக்குச் சொன்னது “சும்மா இரு”.

    நம்மால் சும்மா இருக்க முடியும? மனம் எதையாவது நினைக்கும். நாக்கு எதையாவது சாப்பிடச் சொல்லும். காதில் ஏதாவது ஒன்று விழுந்து மூளையை சிந்திக்கத் தூண்டும். உடம்பு ஒரே நிலையில் இருந்ததால் வலித்து நகரச் சொல்லும். இப்படி எல்லா வகையிலும் சும்மா இருக்க நம்மால் இருக்க முடியாது.

    ஆனால் அருணகிரி சும்மா இருந்தார். இரவு, பகல், இன்பம், துன்பம், பசி, தாகம், வலி, வேதனை, வாசனை, சுவை, நினைவு, கனவு என்று எதுவும் தொல்லை கொடுக்காமல் சும்மா இருந்தார். அதனால் கிடைத்தது ஞானம்.

    கிடைத்ததை இலக்கியத்திலும்(கந்தர் அநுபூதி) எழுதி வைத்தார்.
    செம்மான் மகளைத் திருடும் திருடன்
    பெம்மான் முருகன் பிறவான் இறவான்
    சும்மா இரு சொல்லற என்றலுமே
    அம்மா பொருளன்றும் அறிந்திலனே

    முருகன் சும்மா இரு என்று சொன்னதும் சும்மா இருந்ததால் இது வரையிலும் மிகப்பெரிய பொருளாகத் தெரிந்த உலக இன்பங்கள் ஒன்றுமில்லாமல் போனதை மிக அழகாகக் கந்தர் அநுபூதிப் பாட்டில் எழுதி வைத்தார் அருணகிரி.

    அதெல்லாம் சரி. ஒரு போட்டி.

    சுடச்சுட ஒரு டம்ளரில் ஃபில்டர் காப்பி. இன்னொரு தட்டில் மிளகு காரச்சேவும் திருநெல்வேலி அல்வாவும். இன்னொரு பக்கம் தொலைக்காட்சி. இன்னொரு பக்கம் மொபைல் ஃபோன்.

    சுற்றிலும் இதையெல்லாம் வைத்துக் கொண்டு உங்களில் யாரெல்லாம் சும்மா இருக்க முடியும்? 😉

    அன்புடன்,
    ஜிரா

    006/365

     
    • NIRANJAN 9:56 am on December 7, 2012 Permalink | Reply

      அருமையான பதிவு.
      சார்லி சாப்ளின் படம் என்று நினைக்கிறேன். அதில் சும்மா என்ற வார்த்தையைப் பிரதானமாக வைத்து ஒரு டூயட் பாடலே எழுதினார்கள். யார் எழுதினார்கள் என்று தெரியவில்லை. அதில் மொத்தம் 133 சும்மாக்கள் வரும் என்று நினைக்கிறேன்.

      பிரபுதேவாவும், காயத்ரி ரகுராமும் இதில் நடித்திருப்பார்கள். இசை பரணி.

      –>இது தான் அந்தச் சுட்டி.

      சும்மா எழுதறது ஒண்ணும் சும்மா இல்ல 🙂 🙂

      • ரிஷி 10:00 am on December 7, 2012 Permalink | Reply

        Same pinch, NIRANJAN !! 🙂

      • GiRa ஜிரா 12:53 pm on December 7, 2012 Permalink | Reply

        அடா அடா அடா! இதுவல்லவோ சும்மா பாட்டு. உதித் நாராயணன் சும்மா என்ற சொல்லை மிக அழகாக உச்சரித்திருக்கிறார். சும்மா பிச்சி உதறிட்டாரு 🙂

    • ரிஷி 9:59 am on December 7, 2012 Permalink | Reply

      http://www.youtube.com/watch?v=m2UJk7JpVa8 சும்மா சும்மானு ஒரு பிரபு தேவா பாடல் இருக்கு…. http://www.thiraipaadal.com/Lyrics.asp?lyrid=4230&sngid=SNGBHA0023 சும்மாவுக்கு இவ்வளவு
      அர்த்தங்களா ?? 🙂

      //சுடச்சுட ஒரு டம்ளரில் ஃபில்டர் காப்பி. இன்னொரு தட்டில் மிளகு காரச்சேவும் திருநெல்வேலி அல்வாவும். இன்னொரு பக்கம் தொலைக்காட்சி. இன்னொரு பக்கம் மொபைல் ஃபோன்.
      சுற்றிலும் இதையெல்லாம் வைத்துக் கொண்டு உங்களில் யாரெல்லாம் சும்மா இருக்க முடியும்? //

      முடியும் ஆனா முடியாது 😉

      • GiRa ஜிரா 12:56 pm on December 7, 2012 Permalink | Reply

        // முடியும் ஆனா முடியாது 😉 //

        புரியுது புரியுது. சும்மாதானே இருக்கு காராச்சேவு. அதச் சும்மா ஒரு கடி கடிச்சுக்கிட்டு… சும்மா கொஞ்சம் அல்வாவை விழுங்கிட்டு.. சும்மா ஒரு மடக்கு காப்பி சாப்பிட்டு… பிரண்ட்ஸ் கிட்ட சும்மா பேசிக்கிட்டிருக்கும் ஆட்களாச்சே நாமள்ளாம் 🙂

    • BaalHanuman 10:06 am on December 7, 2012 Permalink | Reply

      பாடல்-3
      படம் – கிரி
      இசை – டி.இமான்
      பாடியவர் – தேவன், அனுராதா ஸ்ரீராம்
      பாடல் – டேய் கைய வச்சுக்கிட்டு சும்மா இருடா…
      பாடலின் சுட்டி – http://www.youtube.com/watch?v=k0Ap-xc0BzM

      • GiRa ஜிரா 1:57 pm on December 7, 2012 Permalink | Reply

        அட்டகாசமான பாட்டு சார். இந்தப் பாட்டை யார் சொல்வாங்கன்னு நெனச்சேன். நீங்க சொல்லிட்டிங்க 🙂

    • amas32 (@amas32) 11:23 am on December 7, 2012 Permalink | Reply

      சும்மா இருக்கும் சாமிக்கு சோத்து பட்டை இரண்டு கொடுங்க என்று ஒரு கோவிலில் இருந்த சித்தருக்கு, அவர் மௌனியாக சும்மா இருந்த செயலுக்கு இன்னும் ஒரு சாப்பாடு கிடைத்ததாக நான் படித்துள்ளேன். சும்மா இருப்பதே இன்றைக்கு பிரபலமாக இருக்கும் ஜென் நிலை! 🙂

      amas32

      • GiRa ஜிரா 2:03 pm on December 7, 2012 Permalink | Reply

        செம கத அது. சரியா எடுத்துச் சொல்லிட்டிங்க. சும்மா இருப்பதே சுகம். 🙂

    • @rmdeva 2:32 pm on December 7, 2012 Permalink | Reply

      அம்மான்னா சும்மா இல்லடா..அவ இல்லைனா யாரும் இல்லைடா

      ஜிரானா சும்மாவாஜென் தடத்துவம் மாதிரி சும்மா தத்துவம் சொன்ன ஜிரவுக்கு ஜெ

    • anonymous 2:48 pm on December 7, 2012 Permalink | Reply

      “சும்மா” -ன்னா “அம்மா” தான்:)
      பிழை பல செய்தாலும், சும்மா இருக்க அம்மாவால் மட்டுமே முடியும்!

      அதான்…கந்த சட்டிக் கவசத்தில்…

      எத்தனை குறைகள் எத்தனை பிழைகள்
      எத்தனை அடியேன் எத்தனை செயினும்
      “பெற்றவன்” நீ குரு, பொறுப்பது உன் கடன்
      – ன்னு பாடுவாரு!

      அதான் போலும், கவச காலத்துக்கெல்லாம் முன்னாடியே, அருணகிரியும்…
      சும்மா இரு = “அம்மா” பொருள்…. -ன்னு பாடினாரோ?

      சும்மா இருப்பது = அம் – மா – பொருள்
      எளிது அன்று; பெரிது, மா, மாபெரும் ;
      அதனால் “அம் மா” பொருள் ஒன்றும் அறிந்திலனே என்றும் பரவிய அருணகிரி;

      • anonymous 3:01 pm on December 7, 2012 Permalink | Reply

        சும்மா பற்றிய பாடல் பதிவு சும்மா இல்லை;
        சும்மா நச்:)

        வேறு சில “சும்மா” பாடல்கள்:

        • நம்ம சிங்காரி சரக்கு நல்ல சரக்கு

        “சும்மா” கும்மு -ன்னு ஏறுது கிக்கு எனக்கு:))
        (படம்: காக்கிச் சட்டை, பாடல்: வாலி)

        • சின்னப் பொண்ணு தான் வெட்கப் படுது – அம்மா அம்மாடி

        அவ கண்ணுக்குள்ள தான் மின்னல் அடிக்குது – “சும்மா சும்மாடி”
        (படம்: வைகாசி பொறந்தாச்சு; பாடல் – ?)

        • சோலைக்குள்ளே குயிலுக் குஞ்சு – சும்மாச் சும்மாக் கூவுது

        ன்னு வரும் -ன்னு நினைக்கிறேன்;
        old is gold; சுசீலாம்மா பாடும் வித்தியாசமான பாட்டு – படம் பேரு சரியா ஞாபகம் இல்ல

    • BaalHanuman 6:42 am on December 8, 2012 Permalink | Reply

      படம் – கேடி (2006)
      நடிகர்கள்: ரவி கிருஷ்ணா – தமன்னா
      இயக்குனர்: ஜோதி கிருஷ்ணா
      இசை – யுவன் ஷங்கர் ராஜா
      பாடியவர் – சுனிதா சாரதி
      பாடல் – சும்மா சும்மா நீ பார்க்காதே… சும்மா சும்மா நீ சொக்காதே…
      பூக்காத பூவெல்லாம் முள்ளாகுமே…
      எனைக் காணாத கண்ணெல்லாம் கல்லாகுமே….

      பாடல் ஆசிரியர்: பா.விஜய்
      பாடலின் சுட்டி – http://www.youtube.com/watch?v=8K39DNbFUlM

    • BaalHanuman 7:33 am on December 8, 2012 Permalink | Reply

      சுஜாதா பதில்கள் – பாகம் 1
      ? ‘சும்மா’வுக்கு அருஞ்சொற்பொருள் கண்டுபிடித்தாகிவிட்டதா ?

      ! சுகமா என்பதன் மரூஉ என்கிறார்கள். சும்மென என்கிற பிரயோகம் பிரபந்த காலத்தில் இருக்கிறது. சும்மாச் சும்மா இதையே கேட்டுக் கொண்டிருந்தால் அப்புறம் நான் சும்மா இருக்க மாட்டேன். ஆமாம்! அருஞ்சொற்பொருள் தெரியாவிட்டாலும் என்ன! சும்மா பயன்படுத்துங்கள்.

      • GiRa ஜிரா 7:00 pm on December 8, 2012 Permalink | Reply

        அருமையான தகவலுக்கு நன்றி 🙂

        சும்மென என்பதிலிருந்து சும்மா உண்டாகியிருக்கக்கூடும். கன்னடத்தில் சும்னே இரு என்றால் சும்மா இரு என்று பொருள்.

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel