ஆறுபடை வீடு

ஏதாவது பண்டிகை வந்தால் கந்தன் கருணை திரைப்படம் ஏதாவது ஒரு டிவியில் ஒளிபரப்பப்படும். அவ்வளவு பிரபலமான திரைப்படம். அந்தப் படத்துக்கு இசையமைத்ததற்கான கே.வி.மகாதேவனுக்கு தேசிய விருது கிடைத்தது. அந்த அளவுக்கு அருமையான பாடல்கள். அதிலும் படம் முடியும் போது வரும் சீர்காழி கோவிந்தராஜன் பாடிய அறுபடை வீடு கொண்ட திருமுருகா என்ற பாடல் மிகமிக அருமையாக இருக்கும்.

பாடலை இந்தச் சுட்டியில் காணலாம் – http://youtu.be/ZMPyfZDubSE

தமிழ்க் கடவுளான முருகப் பெருமானின் ஆறுபடை வீடுகளையும் ஒரு வரிசையில் சொல்வார் அந்தப் பாடலை எழுதிய கவியரசர் கண்ணதாசன். அந்தப் பாடலில் வரும் வரிசையில் ஆறுபடை வீடுகளை முதலில் பார்ப்போம்.

பழனி – ஆண்டியின் கோலமுற்று மலை மீது நீ அமர்ந்த பழனி ஒரு படைவீடு
சுவாமிமலை – தந்தைக்கு உபதேசம் செய்த மலை
திருச்செந்தூர் – சூரன் உடல் கிழித்து கோவில் கொண்டே அமர்ந்த ஒருவீடு
திருப்பரங்குன்றம் – குறுநகை தெய்வானை மலரோடு திருமணக்கோலம் கொண்ட ஒரு வீடு
திருத்தணி – வள்ளி தெள்ளுத் தமிழ் குறத்தி தனை மணந்து காவல் புரிய என்று அமர்ந்த மலை
பழமுதிர்ச்சோலை – கந்தன் கருணை தந்து வள்ளி தெய்வானையுடன் அமர் சோலை

இந்த வரிசையைப் பார்த்தால் முருகன் குழந்தையாக இருந்து வள்ளி தெய்வானையைத் திருமணம் செய்து கொண்டு அருள் புரிவதை வாழ்க்கை வரலாறு போலச் சொல்வதைப் புரிந்து கொள்ளலாம்.

ஆனால் அறுபடை வீடுகளுக்கு இது சரியான வரிசையா? ஏ.பி.நாகராஜன் விளக்கிய காட்சியமைப்புக்கு கண்ணதாசன் எழுதிய வரிகள் குற்றமா?

அந்த விவரத்தைத் தெரிந்து கொள்வதற்கு முன்னால் தெரிந்து கொள்ள வேண்டியது படை வீடு என்றால் என்ன என்பது.

ஒரு அரசன் தன்னுடைய படைகளோடு இன்னொரு நாட்டின் மீது போருக்குச் செல்லும் போது வழியில் எங்கெல்லாம் தங்குகிறார்களோ, அந்த இடம் படைவீடு எனப்படும். அதாவது படை தங்கும் இடம்.

அப்படியானால் அறுபடை வீடு என்பது முருகன் சூரனை அழிப்பதற்காக படையோடு இமயத்திலிருந்து வரும் வழியில் தங்கிய இடங்கள் அறுபடை வீடுகளா?

இல்லை. இமையத்திலிருந்து தமிழகம் வரும் வரை எங்கும் தங்காமல் தமிழகத்தில் மட்டும் ஆறு இடத்தில் முருகனின் படை தங்கியது என்பது ஏற்புடைய கருத்து அல்ல.

அப்படியானால் அறுபடை வீடு என்றால் என்ன? வெறுமனே ஆறுவீடுகள் என்று சொல்லாமல் இடையில் ஏன் படை என்ற சொல் வந்தது? இதைப் புரிந்து கொள்ள நாம் நக்கீரரைத்தான் துணைக்கு அழைக்க வேண்டும். அவர்தானே தமிழில் முதன்முதலாக கடவுளைப் போற்றி நூல் எழுதியவர்.

புலவர்கள் பொதுவாக அரசர்களிடம் சென்று பாடிப் பரிசு பெறுவார்கள். அப்படி நல்லபடி பரிசளித்த மன்னர்களைப் பற்றி தம்மைப் போன்ற புலவர்களிடம் சொல்லி அவர்களையும் அங்கு அனுப்புவார்கள். இப்படிச் செய்வதற்கு ஆற்றுப்படுத்துதல் என்று தமிழில் பெயர்.

ஒவ்வொரு புலவரிடமாகச் சென்று விவரத்தைச் சொல்ல முடியாது என்று பொருள் தந்து வாழ்வித்த மன்னரைப் பற்றி நூலாகவே எழுதிவிடுவார்கள். அப்படி எழுதப்பட்ட நூல்களுக்கு ஆற்றுப்படை நூல்கள் என்று பெயர்.

பொருள் கொடுத்த மன்னனைப் பற்றி ஆற்றுப்படுத்திக் கொண்டிருந்த காலகட்டத்தில் அருளைக் கொடுத்த கடவுளை நோக்கி மக்களை ஆற்றுப்படுத்துவதற்காக நக்கீரர் எழுதியதுதான் திருமுருகாற்றுப்படை.

செந்தமிழ்க் கடவுளாம் செந்திலங்கடவுளின் செம்மையான பண்புகளைப் பாராட்டி அவனிடம் அருள் பெறலாம் என்று எழுதிய நூல்தான் திருமுருகாற்றுப்படை. தமிழில் எழுந்த முதல் பக்தி நூல் என்ற பெருமையும் இந்த நூலுக்கே உண்டு. சங்கநூல்களில் தொகுக்கப்பட்டு பின்னாளில் சைவத் திருமுறைகளிலும் தொகுக்கப்பட்ட ஒரே நூலும் திருமுருகாற்றுப்படைதான்.

ஆற்றுப் படுத்தும் போது அந்த மன்னன் வாழும் ஊரைச் சொல்லி அங்கு செல்க என்று சொல்வார்கள். ஆனால் இவரோ முருகனை நோக்கி ஆற்றுப்படுத்துகிறார். அப்படி ஆற்றுப்படுத்தும் போது முருகப் பெருமான் குடிகொண்ட ஆறு ஊர்களுக்குச் செல்லுமாறு ஆற்றுப்படுத்துகிறார்.

அப்படி நக்கீரர் குறிப்பிட்ட படைவீடுகள்தான் ஆற்றுப்படை வீடுகள். அப்படி ஆற்றுப்படுத்தப்பட்ட வீடுகள் எண்ணிக்கையில் ஆறாக இருந்ததால் ஆற்றுப்படை என்பது நாளாவட்டத்தில் மறுவி ஆறுபடை வீடுகளாகி விட்டன.

சரி. நக்கீரர் எந்த வரிசையில் ஆற்றுப்படை வீடுகளை பட்டியல் இடுகிறார்?

முதற் படைவீடு – திருப்பரங்குன்றம்
இரண்டாம் படைவீடு – திருச்சீரலைவாய் (திருச்செந்தூர்)
மூன்றாம் படைவீடு – திருவாவினன்குடி (பழனி)
நான்காம் படைவீடு – திருவேரகம் (சுவாமிமலை)
ஐந்தாம் படைவீடு – குன்றுதோறாடல்
ஆறாம் படைவீடு – பழமுதிர்ச்சோலை

மேலே குறிப்பிட்டிருப்பதுதான் நக்கீரர் பாடிய ஆற்றுப்படை வீடுகளின் வரிசை. கந்தன்கருணை பாடலில் ஒவ்வொரு படைவீட்டுக்கும் சொல்லப்பட்ட முருகன் வாழ்க்கை நிகழ்வுகளை நக்கீரர் ஆற்றுப்படை வீடுகளோடு தொடர்பு படுத்தவில்லை. பின்னாளில் ஆறுபடை வீடுகளோடு முருகனின் வாழ்க்கை நிகழ்வுகளும் தொடர்புபடுத்தப்பட்டன.

காலங்கள் மாறினாலும் கருத்துகள் மாறினாலும் கந்தப் பெருமான் தமிழர்களுக்குச் சொந்தப் பெருமானாய் ஆறுபடைவீடுகளிலும் வீற்றிருந்து அன்பு மாறாமல் அருள் புரிந்து கொண்டிருக்கிறான். கால மாற்றத்தில் தமிழ்நாடு என்று மாநிலம் உருவான போதும் ஆறுபடை வீடுகளும் தமிழ்நாட்டுக்குள்ளேயே அமைந்ததும் தற்செயல் அல்ல முருகனின் தமிழ்த் தொடர்பே என்பதும் கருதத்தக்கது.

குன்றிருக்கும் இடமெல்லாம் குடியிருக்கும் குமரனின் ஆற்றுப்படை வீடுகளுக்கு நாமும் செல்வோம். நல்லருள் பெறுவோம்.

அன்புடன்,
ஜிரா

Advertisements