Updates from February, 2013 Toggle Comment Threads | Keyboard Shortcuts

  • GiRa ஜிரா 11:58 am on February 4, 2013 Permalink | Reply  

    Multi Cuisine பாடல் 

    ஒரு மொழியில் உண்டாகும் திரைப்படத்தில் பெரும்பாலும் அந்த மொழியில்தான் பாடல்கள் இருக்கும். கதைக்கு ஏற்றவாறு பிறமொழி பேசும் பாத்திரங்கள் இருந்தால் அந்த மொழியிலும் பாடல்கள் இருக்கும். சில சமயங்களில் தமிழும் பிறமொழியும் கலந்து பாடல்கள் இருக்கும்.

    ஆனால் பல மொழிகள் கலந்த பாடல்கள் மிகக் குறைவு. மிகமிகக் குறைவு. இப்படிப் பலமொழிகள் கலந்த தமிழ்ப் பாடல் என்றதுமே எல்லாருக்கும் முதலில் பாரதவிலாஸ் பாட்டான “இந்திய நாடு என் வீடு” என்ற பாடல்தான் நினைவுக்கு வரும். அதில் மலையாளம், தெலுங்கு, கன்னடம் மற்றும் பஞ்சாபி ஆகிய பிற மொழிகள் இருந்தாலும் பார்ப்பவர்களில் வசதிக்காக தமிழ் தாராளமாகக் கலந்திருக்கும்.

    அப்படியெல்லாம் இல்லாமல் ஒரு பாடல் உண்டு. அந்தந்த மொழிகளிலேயே பாடப்படும் பாடல் அது. அதுவும் ருசியான பாட்டு. ஆம். சாப்பாட்டுப் பாட்டு.

    1949ம் ஆண்டு ஜெமினி ஸ்டுடியோஸ் தயாரிப்பில் ஆச்சார்யாவின் இயக்கத்தில் வெளியான அபூர்வ சகோதர்கள் படத்தில் இடம் பெற்ற பாட்டுதான் அது. தீயவனின் படைவீரர்களிடமிருந்து தப்பிப்பதற்காக சமையற்காரியைப் போல பானுமதி நடித்துப் பாடும் பாடல் அது.

    ஒரு அவியல் ஒரு பொரியல்
    ஒரு மசியல் ஒரு துவையல்
    அப்பளம் பப்புடம் ஜாங்கிரி தேன்குழல்
    சாம்பாரு மோர்க்கொழம்பு சட்டினி
    எல்லாம் சமைக்காட்டி எல்லாரும் பட்டினி பட்டினி

    இப்படித் தொடங்கும் பாட்டில் அடுத்து ஒரு மலையாளி வந்து பேசவும் “நான் கேரள நாரியுமாவேன்” என்று தொடங்கி ”காலன் ஓலன் எரிசேரி காராகாருணை புளிசேரி” என்று கேரள உணவுவகைகளை அடுக்குவார்.

    அடுத்து ஒரு தெலுங்கு நாட்டுப் படைவீரர் வந்து பேசவும் “நான் ஆந்திரப் பெண்மணி ஆவேன்” என்று தொடங்கி “ஆவக்காய கோங்கூர பச்சடி பெசரட்டும் ஒரு பாயசமும் பப்பு புலுசு வெச்சே தருவேன்” என்று ஆந்திர உணவுவகைகளை அடுக்குவார்.

    அடுத்து ஒரு கன்னடத்துப் படைவீரர் வரவும் “நான் கன்னட காரிகையும் ஆவேன்” என்று தொடங்கி “பிசிவின்பேஹுளி சண்டிகே ஹோளி துப்பத்தோசை ஹப்பளமெல்லாம் செய்தே தருவேன் தாசரஹள்ளி ஹெண்ணு” என்று கன்னடத்து உணவு வகைகளையும் அடுக்குவார்.

    அடுத்து ஒரு இந்திக்காரர் வரவும் “நான் வடநாட்டு அழகியும் ஆவேன்” என்று தொடங்கி “கோதுமஹல்வா பாதாம்கீரு குலாப்ஜாமூன் ஜிலேபி லட்டு சுட்டுத் தருவேன் ரொட்டியும் தருவேன்” என்று இந்துஸ்தானி பலகாரங்களை அடுக்குவார்.

    கேட்கச் சுவையான பாடல் அது. இந்தப் படத்துக்கு மூன்று இசையமைப்பாளர்கள். எஸ்.ராஜேஸ்வரராவ், எம்.டி.பார்த்தசாரதி, ஆர்.வைத்தியநாதன் ஆகிய மூவரும் இசைப் பொறுப்பைப் பார்த்துக்கொண்டார்கள். இவர்களுக்குள் இருந்த வேலைப்பங்கீடு எப்படிப்பட்டதென்று தெரியவில்லை.

    இந்தப் படத்தை ஜெமினி ஸ்டுடியோஸ் இந்திக்கும் கொண்டு போனது. இந்தியிலும் இவர்கள் மூவருமே இசையமைத்தார்கள். பானுமதியே நடித்தார். ஆனால் பாடியது ஷம்தத் பேகம். இந்தியில் இந்தி, பெங்காலி, பஞ்சாபி, குஜராத்தி, தமிழ் (மதராசி) மொழிகளில் சாப்பாடு பாட்டு வந்தது.

    கிட்டத்தட்ட இருபத்துமூன்று வருடங்களுக்குப் பிறகு 1971ல் இந்தப் படம் எம்.ஜி.ஆர் நடிக்க மீண்டும் எடுக்கப்பட்டது. படத்தின் பெயர் நீரும் நெருப்பும். படத்தில் நாயகியாக நடித்தவர் ஜெயலலிதா. பானுமதி நடித்த அதே காட்சி இந்தப் படத்திலும் இடம் பெற்றது. அதற்கு இசையமைத்தவர் மெல்லிசை மன்னர் எம்.எஸ்.விசுவநாதன். பாடலைப் பாடியவர் எல்.ஆர்.ஈசுவரி.

    ஒரு அவியல் ஒரு பொரியல் ஒரு மசியல் ஒரு துவையல் என்று தொடங்கினாலும் பாடலிலும் இசையிலும் மெல்லிசை மன்னர் புதுமைகளைப் புகுத்தியிருந்தார்.

    கத்தரிக்கா சாம்பாரு காரவட மோர்க்கொழம்பு
    தக்காளிப் பருப்புரசம் தயிருவட பாயாசம்
    என்று தமிழ் நாட்டு உணவு வகைகள் நிறைய மாறியிருந்தன.

    அடுத்து ஒரு மலையாளி வந்ததும்,
    நான் கேரள நாரியும் ஆவேன்
    குட்டகாளன் புஞ்சேரி கூட்டி உண்ணான் புளிசேரி
    ஒரு அவியல் ஒரு தீயல் குறுத்தகாளன் பச்சடி கிச்சடி கடுமாங்காகறி கூட்டுகறி
    என்று மலையாள உணவுகளை அடுக்குவார். இந்தப் பெயர்களைக் கேட்டு எழுதும் போது சரியாக எழுதினேனா என்று தெரியவில்லை.

    இந்த வரிகள் முடிந்ததும் “நீலமுடம் காடுகள் மயிலாடும் மலையாளத்தில்” என்று பாடும் வரிகள் மிக நன்றாக இருக்கும்.

    அடுத்தது ஒருவர் “நீக்கு தெலுகு ராதா” என்று கேட்டதும்,
    நான் ஆந்திரப் பெண்மணி ஆவேன்
    தெனாலி பில்லனய்யா நேனு தெலுகு பிட்டனய்யா
    குண்டூரு கோங்கூரா ராஜமுந்திரி ஆவக்காய
    பெதவாடா பெசரட்டு XXXX லட்டு ருசி சூஸ்தாவா
    ஹைதராபாது அல்வா ஒண்டிக்கி செலவா
    ” என்று ஆந்திரா பலகாரங்களை அடுக்குவார்.

    அதே போல “நீ சூசு சூப்புலகு” என்று பாடும் வரிகளில் ஆந்திர வாடை அடிக்கும். நாட்டுப்புற குத்துப்பாட்டை அழகாகக் கொண்டு வந்திருப்பார் மெல்லிசை மன்னர்.

    அடுத்து கன்னடத்துக்காரர் வருவார். மங்களூரு போண்டா ஹுப்பள்ளி பேடா மைசூர்பாக் பக்கோடா என்று கன்னடத்துப் பலகாரங்கள் வரிசை கட்டும்.

    மூலப்பாடலில் இருந்த இந்திப் பலகாரங்கள் இந்தப் பாடலில் இல்லை. அது தமிழகத்து அரசியல் மாற்றங்களையும் இந்திமொழி விலக்கலையும் தெளிவாகக் காட்டுகிறது. திரைப்படங்களும் அந்த வகையில் காலம் காட்டும் கண்ணாடிகள்தான்.

    இந்தப் பாடல் வரிகளை நான் கொடுத்ததில் ஏதேனும் தவறுகள் இருந்தால் அதை எடுத்துச் சொல்லவும்.

    இந்தப் பதிவில் இடம் பெற்ற பாடல்களைப் பார்க்க,
    அபூர்வ சகோதரர்கள் – http://youtu.be/6IsdQUhG9hk
    அபூர்வ சகோதரர்கள் (இந்தி) – http://youtu.be/h9sErV1BP3A
    நீரும் நெருப்பும் – http://youtu.be/kCyUDKSDjWM

    அன்புடன்,
    ஜிரா

    065/365

     
    • kamala chandramani 12:37 pm on February 4, 2013 Permalink | Reply

      சொக்கன், ஜிரா, இந்த ஆராய்ச்சிகளை வைத்துக்கொண்டு ‘சினிமாவும் இலக்கியமும்’ என ஒரு Phd பட்டமே வாங்கிவிடலாம்.

    • Saba-Thambi 12:59 pm on February 4, 2013 Permalink | Reply

      பலே பலே பல் சுவை விருந்து!

      மிக்க தகவல்கள் கொண்ட பதிவு !!!

      நீரும் நெருப்பும் பட ப் பாடலில் “தீயல்” என்ற சொல் மலயாளத்தில் பாடப்படுகிறது.
      அந்தச் சாப்பாடு (உணவு) யாழ் குடா நாட்டில் வடமராட்சி பகுதியில் சமைப்பார்கள். “நெத்தலி தீயல்” (Anchovi) என்று சொல்லுவினம்.
      மலயாள தொடர்பு யாழ்ப்பாணத்தில் இருப்பதர்க்கு இது இன்னுமொரு சான்று. பச்சடியும் சாப்பிடுவோம் (உண்ணுவோம்)

      பாடல்களைக் கேட்டு சாப்பிட்ட திருப்தி. வயிறு full :)

    • amas32 8:58 pm on February 4, 2013 Permalink | Reply

      சூப்பரா இருக்கே இந்தப் பாடல்கள், அதுவும் இப்போ பசி வேளையில் படிக்கும் போது ;-) எங்கே இருந்தோ தேடிக் கண்டுப்பிடிக்கறீங்க நீங்க! Thanks for the links :-)

      amas32

    • Rajnirams 12:00 am on February 5, 2013 Permalink | Reply

      சான்சே இல்லை,கலக்கிட்டீங்க. சூப்பர்.நவரத்தினம் படத்தில குன்னக்குடி இசையில் இது போல் ஒரு பாட்டு இருப்பதாக ஞாபகம்.
      சரியா நினைவில்லை:-))

  • mokrish 11:14 am on January 18, 2013 Permalink | Reply  

    தீர்ப்ப மாத்தி சொல்லு 

    ஊருக்கென்று வாழ்ந்த நெஞ்சம் சிலைகளாகலாம் என்று சொல்கிறார் கண்ணதாசன். சரி  கண்ணகிக்கு, ஊரை எரித்தவளுக்கு ஏன் சிலை? இது என்ன நியாயம்?

    வேண்டுமென்றே அடுத்தவரின் வீட்டுக்கு தீ வைப்பது Arson என்ற குற்றம். இவள் ஒரு ஊரையே எரித்தவள். அரசியல், நதி, மொழி, ஜாதி இனம் மதம் என்று எல்லா போராட்டங்களிலும் எதையாவது தீயிட்டு கொளுத்தும் பழக்கத்திற்கு இவள்தான் முன்னோடியா? இவளுக்கு ஏன் சிலை? புரியவில்லை.

    வைரமுத்துவின் டேக் இட் ஈசி  பார்வையில்

    புரட்சிகள் ஏதும் செய்யாமல் பெண்ணுக்கு நன்மை விளையாது
    கண்ணகி சிலைதான் இங்குண்டு சீதைக்கு தனியாய் சிலையேது?

    மேலும் குழப்பம். என்ன நடக்குது இங்கே? ஏன் வைரமுத்து சீதையை கண்ணகியோடு சேர்த்து பேசி கலாய்க்கிறார்?

    கண்ணகியும் சீதையும் வேறு வேறு. இருவரும் ஒரே வாக்கியத்தில் அடைக்கப்படுவதே அநியாயம் இல்லையா? பல பட்டிமன்றங்களில் கொலைவெறியோடு விவாதிக்கப்பட்ட கற்பில் சிறந்தவள் இவளா அவளா என்ற  கேள்வியே அபத்தமானது. இருவரின் பிரச்னைகளும் தீர்வுகளும் ஒன்றல்ல. கண்ணகி தனக்கு அநீதி இழைக்கப்பட்டதாக நினைத்தவுடன் போராட புறப்பட்டவள். சீதை ‘எங்கே நீயோ நானும் அங்கே உன்னோடு’ என்று ராமனோடு சென்று அல்லல்பட்டு கண்ணில் நீர் தெரிய நின்ற நிலை நமக்கு தெரியும். இன்றைய மதிய நேர தொலைக்காட்சி சீரியல் கதாநாயகி ஆக எல்லா தகுதியும் உடையவள் சீதைதான்.

    இருவருக்கும் பொதுவான ஒரே அம்சம் நெருப்பு மட்டும் தான். கண்ணகி அதை மதுரை மீது எறிந்தாள். சீதை தானே அதில் நின்று எரிந்தாள்.

    கண்ணகி பெண்கள் நலனுக்காக புரட்சி செய்தவளா? அதனால்தான் அவளுக்கு சிலையா? தன் நலம் தவிர வேறெதுவும் தெரியுமா அவளுக்கு? வைரமுத்துவின் வாதம் புரியவில்லை. நல்ல தமிழாசிரியர்கள் பலர் நமக்கு சொல்லித்தந்த ‘ஆராயாமல் தீர்ப்பு வழங்கிய மன்னனே உனக்கு நான் உரைப்பது என்னவென்றால்’ என்ற பாடல்  கண்ணகியும் ஆராயாமல் மதுரையை எரித்தாள்  என்பதை சொல்லவேயில்லையே.

    சரி வாலியை கேட்கலாம். அக்னி சாட்சி படத்தில் ஒரு நாட்டிய நாடகம். ‘ஆரம்பம். அதிகாரத்தின் முடிவில் ஓர் ஆரம்பம், சிலப்பதிகாரத்தின் முடிவில் ஓர் ஆரம்பம்’ என்று ஒரு Sequel போடுகிறார்.

    ‘அநீதி கொன்றது மங்கையின் பதியை
    அக்னி தின்றது மதுரையம்பதியை’

    அடடா இவரும் Same சைடு கோல் போட்டு வாதத்தை துவக்குகிறார். கண்ணகி தான் வைத்த தீ சரியாக எரிகிறதா என்று பார்க்க ஊர்வலம் வரும்போது ஒரு பெண்ணை பார்க்கிறாள். அவள் தலைவிரிகோலமாக

    இன்னுயிர் தலைவன் பொன்னுயிர்தனை காவலன் நீதி கொண்டது போலே
    என்னுயிர் தலைவன் இன்னுயிர் தன்னை இழந்து நிற்கும் ஏந்திழையாள் நானே

    அதற்கு காரணம் நீ வைத்த தீயே என்று கண்ணகி மேல் குற்றம் சாட்டுகிறாள். கண்ணகி விடவில்லை. துஷ்டக்காவலன் இஷ்டக்கோவலன் என்று வார்த்தை வித்தை செய்து

    குற்றத்தீர்ப்பெழுதிய கூடல் மாநகர்
    முற்றும் தீர்ந்திட தீ வைத்தேன்.

    என்ன தவறு என்று கேட்க அந்தப்பெண் இந்த வாதத்தை ஏற்கவில்லை.

    குற்றமிழைத்தவன் செத்து மடிந்தபின் மற்ற உயிர்க்கேன் தண்டனையோ
    உந்தன் இழப்பினில் ஊரை எரிப்பது எந்தவிதத்தில் நெறிமுறையோ

    என்று சொல்லி ‘மற்ற உயிர்க்கொரு தீங்கு வராமல் உன்னை எரித்திங்கு காட்டுவேன் என்று சபதம் போட்டு நெருப்பிட்டு கல்மனம் கொண்ட கண்ணகியை ஒரு கல்லாய் போக சபிக்கிறாள்.

    அட இதுதான் சரி. அவள் சாபத்தில் கல்லாய் போனதைத்தான் நாம் சிலை என்று கொண்டோமா? வாலிக்கு ஒரு ஜே

    மோகனகிருஷ்ணன்

    048/365

     
    • amas32 (@amas32) 11:04 am on January 19, 2013 Permalink | Reply

      Super explanation! இந்த கோணத்தில் நான் சிந்தித்ததே இல்லை. அதை வாலியின் பாடல் மூலம் சொன்னதற்கு நன்றி :-)

      amas32

    • niranjanbharathi 10:50 pm on January 19, 2013 Permalink | Reply

      Very Different approach :) :)

    • psankar 11:43 pm on January 20, 2013 Permalink | Reply

      வாலிதான் எத்துணை பெரிய அறிவாளி. இந்த கவிதையை அறிமுகப்படுத்திய உங்களுக்கு ஆயிரம் நன்றிகள் :)

    • psankar 11:45 pm on January 20, 2013 Permalink | Reply

      Comment for followup mails.

  • mokrish 3:32 pm on January 12, 2013 Permalink | Reply  

    நான் சிரித்தால் தீபாவளி 

    திருப்பரங்குன்றத்தில் நீ சிரித்தால் முருகா
    திருத்தணி மலை மீது எதிரொலிக்கும்

    பூவை செங்குட்டுவன் எழுதிய இந்த பாடலை எப்போது கேட்டாலும் சட்டென்று ஒரு சிரிப்பு வரும். இதென்ன கலாட்டா ? பக்கத்தில் இருக்கும் பழமுதிர்ச்சோலையை (இச் உண்டாமே!) விடுங்கள். சுவாமிமலை, பழனி மற்றும் திருசெந்தூரில் கேட்காத சத்தம் திருத்தணியில் மட்டும் எதிரொலிப்பது ஏன்? தொடர்ந்து பாடலை பார்த்தால் http://www.youtube.com/watch?v=kgcTDdmew_o பதிலில்லை. வேறு பாடலில் விடை கிடைக்குமா பார்ப்போம்.

    புன்னகை மன்னன் பூவிழி கண்ணனைப்போல் நம் தமிழ்கடவுள் முருகனும் சங்கமமானது வள்ளி தெய்வானை இருவரின் நெஞ்சினிலே. இந்திரன் மகள் தெய்வானை

    அந்த சிவகாமி மகனிடம் சேதி சொல்லடி என்னை சேரும் நாள் பார்க்க சொல்லடி
    வேறு எவரோடும் நான் பேச வார்த்தையேதடி
    வேலன் இல்லாமல் தோகையேதடி

    என்று கிறங்கிய உடனே முருகன் ‘வா வந்து பக்கம் நில். இன்னும் நாளும் கோளும் பார்ப்பதேனடி’ என்று ஆட்கொள்கிறான்.

    இன்னொரு பெண். காயாத கானகத்தே நின்றுலாவும் நற்காரிகை. அவளை நினைத்து கந்தன் உருகுகிறான்.

    வள்ளி வள்ளி என வந்தான் வடிவேலன்தான்
    புள்ளி வைத்து புள்ளி போட்டான் புதுகோலம்தான்

    வேடனாய் உரு மாறி, மரமாய் நின்று கிழவனாகி தேனும் தினை மாவும் தின்று டெம்போ எல்லாம் வைத்து – மன்னிக்கவும்- யானை உதவியுடன் வள்ளியின் மனம் கவர முயல்கிறான். அந்த வள்ளி குறத்தியும் தோழியிடம்

    பழமுதிர்சோலையிலே பார்த்தவன் வந்தானடி
    அவன் அழகு திருமுகத்தில் இழையும் நகை எடுத்து
    ஆரமும் சொன்னானடி தோழி

    என்று அழகன் முருகனிடம் ஆசைவைக்கிறாள். வள்ளி என்றால் தமிழில் படர்கொடியாம். பக்கத்தில் வேல் வந்து நின்றவுடன் படராமல் இருக்குமோ கொடி? வள்ளிமலையில் அவளை ஏற்றுக்கொண்டு திருமணத்திற்கு பிறகு திருத்தணியில் வாசம்.

    தேவன் முருகன் கோவில் கொண்டது வள்ளியின் நெஞ்சத்திலே
    அவன் தெய்வானை என்றொரு பூவையை மணந்தது திருப்பரங்குன்றத்திலே

    இரண்டு பெண்கள். ஒரு மாலையை இரு தோளுக்கு சூடுதல் இறைவன் தன்மையன்றோ? அதை விடுங்கள். அப்புறம் என்னாச்சு? முருகனுக்கும் இரண்டு மனம் வேண்டும் நிலைமையா? இந்திரன் மகளும் மலைகுற மகளும் முருகனை பாடாய் படுத்தி விட்டாரோ? இதைத்தான் கவிஞர் முருகன் அங்கே சிரித்தால் இங்கே வெடிக்கும் என்று அழகு தமிழில் சொல்கிறாரோ?

    இது செந்தூர் முருகன் கோவிலில் மட்டுமில்லை வேறெங்கும் கேட்காத ஒரு சேதி

    மோகனகிருஷ்ணன்

    042/365

     
    • Saba 6:38 pm on January 12, 2013 Permalink | Reply

      அனுபவம் எழுத்து வடிவில் பிறக்கின்றதோ? ;)

    • amas32 (@amas32) 2:39 pm on January 13, 2013 Permalink | Reply

      நீங்கள் மேலே பதிவில் குறிப்பிட்ட பாடல் வரிகளைப் படிக்கும் பொழுது அனைத்துப் பாடல்களும் காதில் ரீங்காரமிடுகின்றன. அனைத்தும் எனக்கு மிக மிகப் பிடித்தப் பாடல்கள். எப்படி சுத்தி வளைத்துப் பாயின்ட்டுக்கு வருகிறீர்கள்!

      Well played :-)

      amas32

  • GiRa ஜிரா 10:16 am on January 11, 2013 Permalink | Reply  

    கன்னத்தில் முத்தமிட்டால் 

    கொஞ்ச வேண்டும் என்ற சூழல் வந்தால் கன்னத்தைத் தொடாத கவிஞன் இல்லை.

    கண்ணம்மா என் குழந்தை என்று எழுதிய பாரதியும் குழந்தையின் கன்னத்தில் முத்தமிடுவது கள்வெறி கொடுக்கும் மயக்கத்தைக் கொடுப்பதைக் குறிப்பிடுகிறான்.

    சின்னஞ்சிறு கிளியே கண்ணம்மா

    கன்னத்தில் முத்தமிட்டால் உள்ளந்தான் கள்வெறி கொள்ளுதடி
    படம் – நீதிக்கு தண்டனை
    இசை – மெல்லிசை மன்னர் எம்.எஸ்.விசுவநாதன்

    பாரதி இப்படிச் சொல்லியிருக்க, கண்ணாதாசனா கன்னதாசனா என்று ஐயத்தை உண்டாக்கும் வகையில் பாடல்களை எழுதியிருக்கிறார். கன்னம் என்பதே தித்திப்பது என்பது அவர் கருத்து.

    முத்துக்களோ கண்கள்
    தித்திப்பதோ கன்னம்
    படம் – நெஞ்சிருக்கும் வரை
    இசை – மெல்லிசை மன்னர் எம்.எஸ்.விசுவநாதன்

    பார்க்கப் பார்க்க மின்னும் கன்னம் பருவப் பெண்ணின் கன்னம் என்பதை ரசித்தவர்தானே கண்ணதாசன். அதுதான் இந்தப் பாடலில் இப்படி வெளிப்படுகிறது.

    பால் வண்ணம் பருவம் கண்டு
    வேல் வண்ணம் விழிகள் கண்டு

    கன்னம் மின்னும் மங்கை வண்ணம்
    படம் – பாசம்
    இசை – மெல்லிசை மன்னர் எம்.எஸ்.விசுவநாதன்

    தித்திக்கும் கண்ணம் என்று சொல்லியாகி விட்டது. ஆனால் கன்னம் ஒரு கிண்ணம் என்றும் அந்தக் கிண்ணத்திலே கறந்த பாலின் சுவையிருக்கும் என்றும் சொல்லியிருக்கிறார் கவியரசர்.

    விழியே விழியே உனக்கென்ன வேலை
    விருந்துக்கு வரவா நாளைக்கு மாலை

    கன்னம் என்னும் ஒரு கிண்ணத்திலே
    கறந்த பாலிருக்கும் வண்ணத்திலே
    படம் – புதிய பூமி
    இசை – மெல்லிசை மன்னர் எம்.எஸ்.விசுவநாதன்

    தங்கமானது கன்னம் என்றால் காதல் விளையாட்டில் அதில் சேதாரம் இருக்கும் என்பது தெரிந்தவரும் அவர்தான். அதனால்தான் கன்னத்தில் என்னடி காயம் என்று குறும்போடு கேட்கிறார்.

    கன்னத்தில் என்னடி காயம்
    இது வண்ணக்கிளி செய்த மாயம்
    படம் – தனிப்பிறவி
    இசை – திரையிசைத் திலகம் கே.வி.மகாதேவன்

    நாணத்தாலே கன்னம் மின்ன மின்ன
    நடிக்கும் நாடகம் என்ன
    படம் – சிஐடி சங்கர்
    இசை – வேதா

    நாணத்தில் மின்னும் கன்னம் காதல் சோகத்திலும் கண்ணீர் சேர்ந்து மின்னும் என்றும் தெரிந்து வைத்திருக்கிறார் கண்ணதாசன்.

    நினைவாலே சிலை செய்து
    உனக்கான வைத்தேன்.. திருக்கோயிலே ஓடி வா
    ..
    கண்ணீரிலே நான் தீட்டினேன்
    கன்னத்தில் கோலங்கள்
    படம் – அந்தமான் காதலி
    இசை – மெல்லிசை மன்னர் எம்.எஸ்.விசுவநாதன்

    கவியரசர் மட்டுந்தானா இப்படி? அடுத்து வந்த வாலியின் கை வண்ணத்து கன்னத்து அட்டகாசங்களைப் பார்ப்போம்.

    கன்னத்தை அத்திப்பழம் என்று உவமிக்கும் வாலி.. அந்தப் பழத்தைக் கிள்ளி விடவா என்று கேட்கிறார். மெல்லிய நண்டின் கால் பட்டாலே சிதைந்து போகும் மென்மையான பழம் அத்தி என்று அகநானூறு சொல்கிறது. கன்னத்தை அப்படியொரு பழத்துக்கு ஒப்பிடுவதும் அழகுதான்.

    வண்ணக்கிளி சொன்ன மொழி என்ன மொழியோ
    வஞ்சிமகள் வாய்திறந்து சொன்ன மொழியோ

    அத்திப்பழக் கன்னத்திலே கிள்ளி விடவா
    படம் – தெய்வத்தாய்
    இசை – மெல்லிசை மன்னர் எம்.எஸ்.விசுவநாதன்

    அத்திப் பழம் என்று உவமித்த அதே வாலி கன்னத்தை மாம்பழம் என்றும் சொல்லத் தவறவில்லை. மரத்தில் பழுக்கும் அந்த மாம்பழங்களை விட காதலியின் கன்ன மாம்பழங்களைத்தான் காதலன் விரும்புவானாம்.

    நான் மாந்தோப்பில் நின்றிருந்தேன்
    அவன் மாம்பழம் வேண்டுமென்றான்
    அதைக் கொடுத்தாலும் வாங்கவில்லை
    இந்தக் கன்னம் வேண்டும் என்றான்
    படம் – எங்க வீட்டுப் பிள்ளை
    இசை – மெல்லிசை மன்னர் எம்.எஸ்.விசுவநாதன்

    பழம் என்று சொன்னால் அணில் கடித்து விடுமோ என்று நினைத்தாரோ என்னவோ… தாமரைப் பூவைப் போன்ற கன்னங்கள் என்றும் வர்ணித்து விட்டார். அந்தத் தாமரைக் கன்னம் என்னும் கிண்ணத்தில்தானே தேன் இருக்கிறது.

    தாமரைக் கன்னங்கள்
    தேன்மலர்க் கிண்ணங்கள்
    படம் – எதிர் நீச்சல்
    இசை – வி.குமார்

    கண்ணதாசன் கன்னத்தில் என்னடி காயம் என்று கேட்டால்… வாலியோ கன்னத்து முத்தங்களால் கன்னிப் போகும் கன்னங்களே அத்தானின் அன்புக்கு அடையாளச் சின்னங்கள் என்று அடித்துச் சொல்கிறார்.

    அத்தானின் முத்தங்கள் அத்தனையும் முத்துக்கள்
    அழகான கன்னத்தில் அடையாளச் சின்னங்கள்
    படம் – உயர்ந்த மனிதன்
    இசை – மெல்லிசை மன்னர் எம்.எஸ்.விசுவநாதன்

    நறுந்தேனை கிண்ணத்தில் வடித்து எடுத்து வருகிறாள் ஒருத்தி. அதெல்லாம் எதற்கு? உன் கன்னத்தில் தேன் குடித்தால் ஆயிரம் கற்பனை ஓடி வராதா என்று ஏங்குகிறது கவிஞனின் உள்ளம்.

    கிண்ணத்தில் தேன் வடித்து கைகளில் ஏந்துகிறேன்
    எண்ணத்தில் போதை வர எங்கெங்கோ நீந்துகிறேன்
    கன்னத்தில் தேன் குடித்தால் கற்பனை ஓடி வரும்
    படம் – இளமை ஊஞ்சலாடுகிறது
    இசை – இசைஞானி இளையராஜா

    கண்ணன் ஒரு கைக்குழந்தை
    கண்கள் சொல்லும் பூங்கவிதை
    கன்னம் சிந்தும் தேனமுதை
    படம் – பத்ரகாளி
    இசை – இசைஞானி இளையராஜா

    கன்னத்தை பழமென்றும் பூவென்றும் வர்ணிக்க கண்ணதாசனாலும் வாலியாலும் மட்டுந்தான் முடியுமா? இதோ இருக்கிறார் வைரமுத்து.

    தொட்டுரச தொட்டுரச மணக்கும் சந்தனம். அப்படியான சந்தனக் கிண்ணமடி உன் கன்னம். அதைத் தொட்டுரசி தொட்டுரசி மணக்குதடி என் கைகள் என்று கவிதையை அடுக்குகிறார்.

    ரெண்டு கன்னம் சந்தனக் கிண்ணம்
    தொட்டுக் கொள்ள ஆசைகள் துள்ளும்
    படம் – சிவப்புமல்லி
    இசை – சங்கர் கணேஷ்

    தொட்டுப் பார்த்தால் பளபளப்போடு வழவழக்கும் பட்டை கன்னத்திற்கு ஒப்பிடாமல் போவாரோ கவிஞர்.

    பட்டுக் கன்னம்
    தொட்டுக் கொள்ள
    ஒட்டிக் கொள்ளும்
    படம் – காக்கிச்சட்டை
    இசை – இசைஞானி இளையராஜா

    கண்ணுக்கு மையழகு.. என்று சொல்லும் போது கன்னத்தில் குழியழகு என்று எழுதிய வைரமுத்து ஒரு கிராமத்துக் காதலைச் சொல்லும் போது கன்னத்தில் கன்னம் வைத்த காதலனைப் பற்றியும் சொல்கிறார்.

    காக்கிச்சட்ட போட்ட மச்சான்
    கன்னத்திலே கன்னம் வெச்சான்
    படம் – சங்கர் குரு
    இசை – சந்திரபோஸ்

    தன்னுடைய குழந்தை கன்னத்தில் முத்தமிட்டால் நெஞ்சில் ஜில்ஜில்ஜில்ஜில் என்று எழுதியதும் இதே வைரமுத்துதான். ஆனாலும் காதல் குறும்பில் கன்னத்தில் முத்தமிட வரும் காதலனின் கன்னத்தில் தேளைப் போலக் கொட்டுவேன் என்றா எழுதுவது! உயிர் போக்கும் வலி அல்லவா அது!

    நேந்துக்கிட்டேன் நேந்துக்கிட்டேன்
    நெய்விளக்க ஏந்திக்கிட்டேன்
    உன்னோட கன்னத்திலே முத்தம் குடுக்க
    ..
    கன்னத்திலே தேளப் போலே கொட்டி விடுவேன்
    படம் – ஸ்டார்
    இசை – இசைப்புயல் ஏ.ஆர்.ரகுமான்

    அன்புடன்,
    ஜிரா

    041/365

     
    • niranjanbharathi 10:24 am on January 11, 2013 Permalink | Reply

      தேன் கன்னம், மதுக் கன்னம் , சந்தனக் கன்னம் ஆகியவற்றோடு சேர்ந்து இது தான் “ஜீரா” கன்னம் போலும். ஜாமூனைச் சூழந்து நிற்கும் ஜீரா :) :)

    • amas32 (@amas32) 2:43 pm on January 13, 2013 Permalink | Reply

      What a myriad of songs with cheeks alone! ;-)) You are one genius only :-)

      amas32

    • தேவா.. 3:41 pm on January 13, 2013 Permalink | Reply

      கன்னங்களுக்கு பல உவமைகள்…..கண் பட்டிருச்சு ஜீரா…. :)

  • GiRa ஜிரா 10:35 am on January 8, 2013 Permalink | Reply
    Tags:   

    கலக்கல் 

    ஒரு இனிய காதற் சுவை நிறைந்த பாடல். அலைகள் ஓய்வதில்லை படத்திற்காக இளையராஜாவின் இசையில் வைரமுத்து எழுதியது. பி.எஸ்.சசிரேகாவும் இளையராஜாவும் இணைந்து பாடியது.

    விழியில் விழுந்து
    இதயம் நுழைந்து
    உயிரில் கலந்த உறவே

    இதில் வரும் கலந்த என்ற சொல் வேறொரு பாடலை நினைவுபடுத்தியது. அதுவும் இளையராஜாவின் இசையில் வந்த பாடல்தான். எஸ்.ஜானகியும் கமலகாசனும் சேர்ந்து பாடிய சிவப்பு ரோஜாக்கள் படப் பாடல். அட! இரண்டு பாடல்களுமே பாரதிராஜாவின் இயக்கத்தில் வந்த படங்களில் உள்ளவை.

    நினைவோ ஒரு பறவை
    விரிக்கும் அதன் சிறகை
    பறக்கும் அது கலக்கும் தன்னுறவை

    இரண்டு பாடல்களில் இருக்கும் ஒற்றுமை என்ன?

    அது உறவைக் கலப்பது. இந்த கலக்கல் தமிழில் எவ்வளவு பழையது என்று யோசித்துப் பார்த்தேன். தொல்காப்பியரின் ஒரு பாடல் நினைவுக்கு வந்தது. ஆம். தொல்காப்பியத்துப் பாடல்தான். பொருளதிகாரத்தின் மரபியலில் வரும் பாடல்.

    நிலம்தீ நீர்வளி விசும்பொ டைந்துங்
    கலந்த மயக்கம் உலகம்

    இந்தப் பாடலின் பொருள் பலருக்குத் தெரிந்திருக்கும். ஆனால் அதற்குள் ஒரு செய்தி ஒளிந்திருக்கிறது. அந்தப் பாடலைச் சீர் பிரித்து எளிமையாகத் தருகிறேன். எளிதில் புரியும்.

    நிலம் தீ நீர் வளி விசும்பொடு ஐந்தும்
    கலந்த மயக்கம் உலகம்

    நிலம், தீ, நீர், வளி(காற்று), விசும்பு(வானம்) ஆகிய ஐந்தும் கலந்த மயக்கமே உலகம் எனப்படும்.

    ஆக.. இந்த ஐந்தும் கலந்ததுதான் உலகம். இல்லை. இல்லை. கலந்த மயக்கமே உலகம்.

    அதென்ன கலந்த மயக்கம்?

    கலப்பதும் இரண்டு அல்லது அதற்கு மேற்பட்டவற்றைச் சேர்ப்பதுதான். மயக்கம் என்பதும் இரண்டு அல்லது அதற்கு மேற்பட்டவற்றைச் சேர்ப்பதுதான். ஆனால் ஒரு வேறுபாடு உண்டு. அதென்ன?

    கலந்தவைகளை பிரித்து எடுத்து விடலாம். மயங்கியவைகளை பிரித்து எடுக்க முடியாது.

    ஒரு கூடை முத்துகளும் ஒரு கூடை வைரங்களும் கலந்து விட்டால் பிரித்து எடுத்து விடலாம். ஆனால் குழம்பில் இட்ட உப்பைப் பிரிக்க முடியுமா? குழம்பில் உப்பு கலப்பது மயக்கம் எனப்படும். இன்னொரு எளிய எடுத்துக்காட்டு சொல்கிறேன். சரக்கோடு சோடாவைக் கலப்பதும் மயக்கமே.

    பிரிக்க முடியாதவாறு கலப்பதுதான் மயக்கம்.

    ஆனால் இந்த இரண்டு பாடல்களிலும் காதல் மிகுந்து உறவு இணையப் பாடுகின்றவர்கள் உறவு கலந்ததைப் பற்றித்தான் பாடுகிறார்கள். மயங்கியதைப் பற்றிப் பாடவில்லை. ஒருவேளை பிரிவு வரும் என்று நினைத்து உறவு கலந்தது என்று பாடுகின்றார்களோ!

    ஆனாலும் மயங்கிய உறவுகளும் உண்டு.

    மயங்கினேன்
    சொல்லத் தயங்கினேன்
    உன்னை விரும்பினேன் உயிரே
    (நானே ராஜா நானே மந்திரி படத்தில் பி.சுசீலாவும் ஜெயச்சந்திரனும் இளையராஜாவின் இசையில் பாடிய பாடல்)

    இந்த மயக்கம் என்பது மயக்கம் போட்டு விழுவதல்ல. அவளுடைய மனம் அவன் மீதானா காதலோடு கலந்து மயங்கி விட்டது. இனிமேல் அவளுடைய அந்த மயக்கத்தைப் பிரிக்கவே முடியாது என்று பொருள்.

    காதல் மயக்கம்
    அழகிய கண்கள் சிரிக்கும்
    ஆலிங்கனங்கள் பரவசம்
    இன்று அனுமதி இலவசம்
    என்று வைரமுத்து புதுமைப்பெண் படத்துக்காக எழுதிய பாடலைப் பாருங்கள். பாடியவர்கள் ஜெயச்சந்திரனும் சுனந்தாவும்.

    இதில் கவிஞர் காதல் கலக்கல் என்று எழுதவில்லை. காதல் மயக்கம் என்று சரியாக எழுதியிருக்கிறார்.

    மயங்காத மனம் யாவும் மயங்கும்
    அலை மோதும் ஆசைப் பார்வையாலே
    என்று ஆலங்குடி சோமு எழுதியது எவ்வளவு உண்மை(காஞ்சித் தலைவன் படத்திற்காக கே.வி.மகாதேவன் இசையில் பாடியவர் பி.பானுமதி).

    காதலில் எத்தனை மயக்கங்களோ! எத்தனை கலக்கல்களோ!

    அன்புடன்,
    ஜிரா

    038/365

     
    • @anuatma 12:36 pm on January 8, 2013 Permalink | Reply

      நல்ல விளக்கம். chemistry பாடம் மாதிரி இருக்கு. :-)

    • @RRSLM 9:52 am on January 9, 2013 Permalink | Reply

      கலக்கல் GiRa….:-)

    • amas32 (@amas32) 3:04 pm on January 13, 2013 Permalink | Reply

      மயக்கமா? கலக்கமா? மனதிலே குழப்பமா? இது கண்ணதாசன் பாடல் தானே? மயக்கம் வேறு கலக்கம் வேறு என்று பாகுபடுத்திச் சொல்லிவிட்டாரே :-)

      //ஆனால் இந்த இரண்டு பாடல்களிலும் காதல் மிகுந்து உறவு இணையப் பாடுகின்றவர்கள் உறவு கலந்ததைப் பற்றித்தான் பாடுகிறார்கள். மயங்கியதைப் பற்றிப் பாடவில்லை. ஒருவேளை பிரிவு வரும் என்று நினைத்து உறவு கலந்தது என்று பாடுகின்றார்களோ!// Super!

      amas32

  • mokrish 11:36 am on December 30, 2012 Permalink | Reply  

    பாடல் வரிகள் Remix 

    பழைய பாடல்களின் இசை ரீமிக்ஸ் கேட்டிருக்கிறோம் (அது பிடிக்குமா இல்லையா என்பது வேறு விஷயம்). பாடல் வரிகளின் ரீமிக்ஸ் பார்த்திருக்கிறீர்களா?
    தூக்கு தூக்கி படத்தில் ஒரு பாடல். உடுமலை நாராயண கவி இயற்றியது. “கண் வழி புகுந்து கருத்தினில் வளர்ந்த மின்னொளியே ஏன் மௌனம்”  இதை வைரமுத்து எப்படி ரீமிக்ஸ் செய்கிறார்? “விழியில் விழுந்து இதயம் நுழைந்து உயிரில் கலந்த உறவே” என்று வார்த்தைகளை சீராட்டி அலங்கரித்து ஒரு இலக்கிய வேஷம் கட்டி  … அழகாக இருக்கிறதே!
    அடுத்து பாசம் படத்தில் வரும் பாடல். கவியரசு கண்ணதாசன் கற்பனையில் “மாலையும் இரவும் சந்திக்கும் இடத்தில்,மயங்கிய ஒளியினைப் போலே மன மயக்கத்தை தந்தவள் நீயே”. இதையும் வைரமுத்து அவரது வார்த்தைகளில் ரசவாதம் செய்கிறார். எப்படி? “இரவும் பகலும் உரசிக்கொள்ளும் அந்திப்பொழுதில் வந்துவிடு”
    இரண்டு வேறு பாடல்களில் இருந்து இரண்டு வரிகளை இரவல் வாங்கி
    விழியில் விழுந்து இதயம் நுழைந்து உயிரில் கலந்த உறவே
    இரவும் பகலும் உரசிக்கொள்ளும் அந்திப்பொழுதில் வந்துவிடு
    கருமாறாமல் உருமாற்றி  மெட்டுக்குள் உட்காரவைக்கிறார். https://www.youtube.com/watch?v=pY8WyzuCXr0
    ஆசை முகம் என்ற படத்தில் ஒரு பாடல். காதலனும் காதலியும் உரையாடுவது போல அமைந்த வரிகள்

    நீயா இல்லை நானா நீயா இல்லை நானா

    நெஞ்சக் கதவைக் கொஞ்சம் திறந்தது

    நீயா இல்லை நானா

    https://www.youtube.com/watch?v=XVOpBghkkiQ

    இருவரும் அமர்ந்து காதல் எப்படி மலர்ந்தது என்று யோசித்து பல சம்பவங்களை நினைத்து இதை செய்தது நீயா இல்லை நானா என்று பேசுவது போல ஒரு அமைப்பு. கொஞ்சம் உண்மை கொஞ்சம் பொய் கொஞ்சம் கிண்டல் கொஞ்சம் சீண்டல் என்று வாலி அட்டகாசம் செய்யும் பாடல். எல்லா வரிகளும் நீயா இல்லை நானா என்றே முடியும்.

    ஒரு நிலையிலிருந்து வலையில் விழுந்தது,

    ஊர்வலமாக பார்வையில் வந்தது

    ஒரு மேடையில்லாமல் நாடகம் நடித்தது

    இளம் பருவத்தின் வாசலில் உருவத்தைப் பார்த்தது

    ஒரு நாள் வந்தது உள்ளத்தைக் கேட்டது

    இன்று மறு முறை வரும் வரை மயக்கத்தில் இருப்பது

    பூவிதழோரம் புன்னகை வைத்தது

    இன்று உள்ளத் திரையில் ஓவியம் வரைந்தது

    இந்த பாடல் வைரமுத்துவை inspire செய்திருக்கவேண்டும். பஞ்சதந்திரம் படத்தில் சரியான காட்சியமைப்பு கிடைத்தவுடன் வாலியின் இந்த வரிகளை அடித்தளமாக வைத்துக்கொண்டு எழுதிகிறார். இதுவும் காதலன் காதலி பேசிக்கொள்ளும் காட்சிதான். காதல் இளவரசனும்  கனவுக்கன்னியும் பாடும்  பாடல்  கடற்கரை நிலவொளி எல்லாம் இல்லை. ஜஸ்ட் லைக் தட் நடந்துகொண்டு பாடும் பாடல். கொஞ்சம் Blame game போல கட்டமைப்பு. கூர்ந்து பார்த்தால் காதல் பொங்கும்  வரிகள்

    என்னோடு காதல் என்று பேச வைத்தது  நீயா இல்லை நானா

    ஊரெங்கும் வதந்தி காற்று வீச வைத்து நீயா இல்லை நானா

    https://www.youtube.com/watch?v=tAjGFrWW3V4

    சட்டை பொத்தான், கூந்தல், கண்ணில் தூசி ஊதும் சாக்கு, லிப்டின் நீள அகலம் என்று ஒரு  contemporary காதல் உரையாடலை முன் வைக்கிறார். நக்கல் இருந்தாலும் ‘உன்னோடு லவ் என்று ஊர் சொன்னது, நீ வேறு நான் வேறு யார் சொன்னது என்று சமரசம் செய்துகொள்ளும் யதார்த்தம்

    கவாஸ்கர் போலவே  சச்சின்  straight டிரைவ்  அடித்தால் கொண்டாடுகிறோம் அதை  பாராட்டுவது  போல், இதையும் பாராட்டலாம்.

    மோகன கிருஷ்ணன்

    029/365

     
    • kamala chandramani 12:03 pm on December 30, 2012 Permalink | Reply

      ஆம் திருவெம்பாவை, ”காதார் குழையாடப் பைம்பூண் கலனாடக்
      கோதை குழலாட வண்டின் குழாமாட” பாடல். பெரிய இடத்துப் பெண் படத்தில் ”கட்டோடு குழல் ஆட ஆட,” என்ற கண்ணதாசன் பாடல் அப்படியே ரீமிக்ஸ்தான். விஸ்வனாதன் -ராமமூர்த்தி இசையில் பிரபலமான பாடல் அது.

    • பிழை 8:38 am on January 1, 2013 Permalink | Reply

      தினமலர் வாரமலரில் “எங்கிருந்து எடுக்கபட்டது” என்று ஒரு தொடர்… வைரமுத்துவின் பல படைப்புகள் மற்றவரின் பாடல் வரிகளின் ரீமிக்ஸ் செய்யபட்டது என்று உதாரணங்களோடு.. கடந்த 9-10 வாரங்களாக படித்து பாருங்கள் முடிந்தால்

      • என். சொக்கன் 11:34 am on January 1, 2013 Permalink | Reply

        அது திருச்சி பகுதியில்மட்டும் வருவதாகக் கேள்வி

        • பிழை 1:33 pm on January 1, 2013 Permalink

          தெரியவில்லை நான் வந்தவாசியில் படித்தேன்.. அது வேலுர் திருவண்ணாமலை பதிப்பில் வரும்…..

  • என். சொக்கன் 9:32 am on December 23, 2012 Permalink | Reply  

    கண்ணனின் நிறம்.

    காதலின் நிறம் பார்த்தோம். கண்ணனின் நிறம் என்ன? பாசுரம் முதல் திரைப்பாடல் வரை கண்ணன் வண்ணம் சொல்லும் வரிகள் ஏராளம். அவன் நீல மேக சியாமள வண்ணன். கருநீலம். கருமை நிறக்கண்ணன். இருட்டின் நிறம். நிலவின்  தேய்கின்ற பருவம் கிருஷ்ண  பட்சம் எனப்படுகிறது.

    தொண்டரடிப்பொடி ஆழ்வாரின், மனதை உருக வைக்கும் பாசுரத்தில்

    காரொளி வண்ணனே

    கண்ணனே கதறுகின்றேன்

    என்று பாடுகிறார். கரிய மேகத்தை போல் வண்ணமா?  கார் முகில் வண்ணன். பாரதியார்  காக்கையின் கரிய நிறம் பார்த்து கண்ணன் நினைவு வந்ததாக பாடுகிறார்.  கண்ணதாசனும் இந்த கரிய நிறத்தையே வழிமொழிகிறார். கோபியர் கொஞ்சும் ரமணனை

    மாபாரதத்தின் கண்ணா மாயக்கலையின் மன்னா

    மாதவா கார்மேக வண்ணா - மதுசூதனா

    வேறு ஒரு பாடலிலும் கரிய நிறத்தையே தொடர்கிறார்

    கண்ணா கருமை நிறக் கண்ணா – உன்னை

    காணாத கண்ணில்லையே
    ஒரு பழைய அழகான தாலாட்டு பாடலில் மருதகாசி நீலத்தை கண்ணன் வண்ணமாக கொள்கிறார். கருப்பு வண்ணம் குழந்தையை மிரளவைக்கும் என்று நினைத்து அவர்  நீலத்தை மட்டும் வைத்துக்கொண்டு மேகத்தை தள்ளிவைக்கிறார்.
    நீல வண்ண கண்ணா வாடா !
    நீ ஒரு முத்தம் தாடா
    வாலி இந்த கருப்பா  நீலமா கருநீலமா என்ற கேள்விக்கு  பட்டிமன்ற நடுவரை போல் ஒரு தீர்ப்பு சொல்கிறார்
    கங்கை கரை மன்னனடி கண்ணன் மலர் கண்ணனடி
    வங்கக்கடல் வண்ணனடி உள்ளம் கவர் கள்வனடி
    வங்கக்கடல் போல் கண்ணன் நிறம் என்றால் வாலி எல்லா தரப்பையும் ஏற்றுக்கொள்கிறார் என்று நினைக்கிறேன்.
    வைரமுத்து கடவுள் நம்பிக்கை இல்லை என்று சொல்பவர். . ஆனாலும் கண்ணன் வண்ணம் பாடாமல் இருக்க முடியுமா? வகையாக கிடைத்தார் ரஜினிகாந்த் – கரு வண்ணம் பற்றி பாடல் எழுத. தில்லானா தில்லானா பாடலில் எழுதிய வரிகள் கண்ணன் நிறம் கூறும்.

    கடல் வண்ணம் வானின் வண்ணம் கருவண்ணம் தானே

    கடல் வானம் காணும்போது உனைக்கண்டேன் நானே

    இன்னொரு பாடலில் அவர் வரிகள்

    வான் போலே வண்ணம் கொண்டு

    வந்தாய் கோபாலனே பூ முத்தம் தந்தவனே

    கடல் வண்ணம், கார்மேக வண்ணம் நீல வண்ணம் என்ற பலரும் சொன்னாலும் வைரமுத்துவின் இன்னொரு கற்பனை அபாரம். கண்ணாமூச்சி ஏனடா என்ற பாடலில்

    பாற்கடலில் ஆடிய பின்னும் உன் வண்ணம் மாறவில்லை இன்னும்

    என் நெஞ்சில் கூடியே நிறம் மாறவா

    என்ற கற்பனை அற்புதம். இதை ராதையும் ஆண்டாளும் மீராவும் பாடிய வரிகளாகவே பார்க்கிறேன்!
    ***
    மோகன கிருஷ்ணன்
    022/365
     
    • தேவா.. 1:40 pm on December 23, 2012 Permalink | Reply

      வண்ணமயாமான ஆராய்ச்சி.

    • niranjanbharathi 3:25 pm on December 23, 2012 Permalink | Reply

      அருமையான பதிவு இது. நம் கவிஞர்களும் எண்ண மயமானவர்கள் மட்டுமல்லர். வண்ணமயமானவர்களும் கூட. ஏனோ இதையெல்லாம் படிக்கும் போது எனக்கு தென்றல் வந்து தீண்டும் போது என்ன வண்ணமோ , மனசுல என்ற வாலி அய்யா பாடல் நினைவுக்கு வருகிறது.

    • amas32 (@amas32) 4:53 pm on December 23, 2012 Permalink | Reply

      மோகன கிருஷ்ணன் :-) நீங்கள் உங்கள் பெயருக்கு ஏற்ப பாடல் வரிகள் தேர்ந்தெடுத்து அலசி உள்ளீர்கள் :-)

      கருத்த மேகமே நாடு செழிக்க மழை பொழியும். கார்முகில் வண்ணனே நாம் செழிக்கக் கருணை மழை பொழிவான். கருப்புக்கு நகை போட்டு அழகு பார்க்க வேண்டும் என்பார்கள். அவர்களுக்கு தான் நகை எடுப்பாகத் தெரியும். கருப்பே அழகு காந்தலே ருசி என்ற வசனமும் உண்டு.

      பூணித் தொழுவினில் புக்கு புழுதி அளைந்த பொன்-மேனி என்று பெரியாழ்வார் (நிராட்டல் ) பாடியுள்ளார். மண்ணில் விழுந்து விளையாடி புழுதி படிந்து கண்ணனின் கரிய மேனி தக தகவென மின்னுவது போல தோற்றத்தைத் தருகிறது. அதனால் கருப்புக்கும் ஒரு அழகு உண்டு, நாம் கரிய நிறத்தவரை அன்போடு நோக்கும்பொழுது :-)

      amas32

    • ஸ்ரீதர் நாராயணன் 8:48 pm on December 27, 2012 Permalink | Reply

      சினிமாப் பாட்டுககளை விடுங்கள். கண்ணன் நிறம் என்று நேரடியாகவே பார்த்துவிடலாம்.

      கருநன் (கருமை நிறத்தவன்) – என்பதே கண்ணனாக மாறியதாக ஒரு வழக்கு உண்டு.

      கிருஷ்ண, ஷ்யாமள, நீளா – எல்லாமே வடமொழியில் கருப்பையே குறிக்கும். குறிப்பாக ‘நீள’ம் என்பது வெளிச்சம் இல்லாமையை, சூண்யத்தைக் கூட உருவகமாக சொல்லலாம்.

      தமிழில் ‘நீளத்தில்’ ள-விற்கு பதிலாக ‘ல’ போலியாக வந்து ‘நீல’மாக மாறி நாம் அதை தனி நிறமாக வழக்கில் கொண்டிருக்கிறோம். உண்மையில் நீலம் என்பது கருமையின் ஒரு கவசம்தான். இன்றும் கூட திரைப்படங்களில் ‘நைட் எஃபெக்ட்’ எடுக்க வேண்டும் என்றால் நீல வடிகட்டிகளைத்தான் (Filters) பயன்படுத்துகிறோம்.

      கதிரவனை வழிபடுவது போலவே நாம் இருளையும் தொடர்ந்து வழிபட்டுக் கொண்டு வந்திருக்கிறோம். கண்ணனும் கருப்பு. இராமனும் கருப்பு. ஏன் நம் தமிழர் பாரம்பரியமான திரௌபதி வழிபாட்டில் கூட திரௌபதி கருப்புதான். மகாபாரதத்தில் அவள் பெயரும் கிருஷ்ணா தான்.

    • Sethuraman 9:16 pm on December 27, 2012 Permalink | Reply

      beautiful :) :)

    • Kumar tp 9:23 pm on December 27, 2012 Permalink | Reply

      Well written mate. Recent book read abt Kannan is Krishna Key .

c
Compose new post
j
Next post/Next comment
k
Previous post/Previous comment
r
Reply
e
Edit
o
Show/Hide comments
t
Go to top
l
Go to login
h
Show/Hide help
shift + esc
Cancel
Follow

Get every new post delivered to your Inbox.

Join 88 other followers